د. عەلی تەتەر، پارێزگارێ دهۆكێ دوهی 8/12/2024 پێشوازی ل فیراس رەشید، سەرۆكێ تیما (GIS) یا ئامارا گشتی یا ئیراقێ و ئەندازیاران سارا ئیبراهیم و نورا ئەحمەد ئەندامێن تیما ناڤبری كر.
د هەڤدیتنەكێ دا ب ئامادەبوونا چیاڤان عەبدولرەزاق، رێڤەبەرێ ئامارا پارێزگەها دهۆكێ بەحسێ گرنگیا ئەنجامدانا پرۆسێسا ئامارا گشتی ل ئیراقێ و هەرێما كوردستانێ و ئەو ئاریشەیێن هاتینە پێش و هەڤكاری و هاریكاریا هەموو لایەنان ل هەرێما كوردستانێ و حكومەتا ئیراقا فیدرال بۆ نەهێلانا هەر ئاستەنگەكێ ب گشتی هاتە كرن.
پارێزگارێ دهۆكێ خوشحالیا خۆ ب سەرەدانێ دیاركر و دەستخوشی ل تیمێن ئەنجامدانا ئامارا گشتی ل ئیراقێ و هەرێما كوردستانێ و پارێزگەها دهۆكێ كر و بەرهەڤیا پارێزگەهێ بۆ هەر هاریكاریەكێ بۆ تمامكرنا برگەیێن ماین ژ ئەنجامدانا ئامارا گشتی دیاركر.

ئەڤرۆ، دلڤین رەشید:

زینا هەمۆن، رێڤەربەرا پڕۆژەیێ‌ پرا ل رێكخراوا ئاشتی و ئازادی بۆ رۆژناما ئەڤرۆ دیار كر، د قوووناغا ئەڤرۆ دا گەلەك گرنگە ئەو كار ل سەر موكمكرنا پێكڤەژیانێ‌ ل هەرێما كوردستانێ‌ ب گشتی و ل دەڤەرداریا شێخان ب تایبەتی بكەن، ژ بۆ هندێ‌ زێدەتر گیانێ‌ هەڤدو قەبوولكرنێ‌ و رێزگرتنێ‌ د ناڤبەرا ئەوان ئایین و نەتەوەیێن ل دەڤەرێ‌ دا هەین پەیدا بكەن و دبێژیت: دەڤەرداریا شێخان هەر ژ كەڤن دا ب وارگەهێ‌ پێكڤەژیانێ‌ هاتیە ناسكرن و گرنگە ئەڤ پێكڤەژیانە بهێتە پاراستن.
زینایێ‌ گۆت: «د سەردەمێ‌ پێشكەفتنێ‌ و هاتنا تەكنەلۆژیایێ‌ دا، ئەم گەلەك گۆتارێن رەق و كینێ‌ تێدا دبینین، ئەڤ یەكە ژی بوویە ئەگەر، كو كارتێكرنێ‌ ل بنەمایێن پێكڤەژیانێ‌ و هەڤدو قەبوولكرنێ‌ بكەت، لەورا ئەم وەكو رێكخراوا ئاشتی و ئازادی رابووینە ب ڤەكرنا خوولێن ب هێزكرنا پێكڤەژیانێ‌ ل دەڤەرا شێخان، ژ بۆ رۆژنامەڤان و كەسانێن ئایینی و چالاكڤانان، ژ بۆ هندێ‌ هەر كەسەك ب رێكا خۆ ئەڤێ‌ پێكڤەژیانێ‌ ل دەڤەرێ‌ ب پارێزیت، ب تایبەت ژی ب رێكا سوشیال میدیایێ‌، چونكی میدیایێ‌ رۆلەكێ‌ كاریگەر ل سەر جڤاكی هەیە».
گۆتژی: «ئەڤ جۆرە خوولە دێ‌ د بەردەوام بن، هەتا ئەم وەكی رێكخراو دگەهینە ئارمانجەكێ‌، ئەو ژی دیاركرنا وان خالێن گرنگە، كو بنەمایێ‌ پێكڤەژیانێ‌ د پارێزین، ئەم دێ‌ بینە پشتەڤان ژ بۆ وان كەس و پشكداربوویان؛ یێن هزرێن باش هەین، ژ بۆ پاراستنا گیانێ‌ پیكڤەژیانێ‌ و هەڤدو قەبوولكرنێ‌ ل دەڤەرا شێخان».

پەیڤدارێ دەستەیا گەشتوگوزارا هەرێما كوردستانێ‌ ئاشكرا كر، پێشبینی دهێتە كرن بۆ رۆژێن بێهنڤەدانا سەرێ سالێ زێدەتری 200 هزار گەشتیار سەرەدانا هەرێما كوردستانێ بكەن و دبێژیت: بەرهەڤی دهێتە كرن بۆ پێشوازیا گەشتیاران.
ئیبراهیم عەبدولمەجید، پەیڤدارێ دەستەیا گەشتوگوزارێ بۆ رۆژناما ئەڤرۆ دیار كر، بەرهەڤی دهێنە كرن بۆ هاتنا سالا نوو، بۆ ڤێ مەرەمێ ژی دەستەیا گەشتوگوزارێ ل گەل لایەنێن پەیوەندیدار هەموو سالەكێ بەرهەڤیان دكەت، ژ بۆ پێشوازیا گەشتیاران؛ یێن ب مەرەما بێهنڤەدانا سەرێ سالێ سەرەدانا هەرێما كوردستانێ دكەن و گۆت: «ل زالگەهان ئاسانكاری بۆ هاتنا گەشتیاران دهێنە كرن و هەموو دەزگەهێن پەیوەندیدار دێ پێشوازیا گەشتیاران كەن».
ئیبراهیم عەبدولمەجید گۆتژی: «سالا بۆری بۆ بێهنڤەدانا سەرێ سالێ 200 هزار گەشتیاران سەرەدانا هەرێما كوردستانێ كربوو، بەلێ ئەم پێشبینی دكەین بۆ سەرێ سالێ زێدەتری ئەڤێ هژمارێ گەشتیار سەرەدانا هەرێما كوردستانێ بكەن، هەرێما كوردستانێ شیانێن باش هەنە بۆ پێشوازیكرن ل گەشتیاران و هژمارا بنگەهێن گەشتیاری و پڕۆژەیێن گەشتوگوزارێ زێدەبووینە».

زاخۆ، دلۆڤان هالۆ:

ل ناوچەداریا دەركارێ یا سەر ب ئیدارەیا سەربخوە یا زاخۆ ڤە، نەخوەشخانەیەكا هەوارهاتنێ دهێتە ئاڤاكرن، پێشتر ناوچەداریا دەركارێ و سێ كەمپ و دو كۆمەلگەهـ ب هیڤیا بنگەهەكێ ساخلەمیێ یێ بچووك و كێم خزمەتگوزاری ڤە بوون.
كۆڤان لوقمان، سەرپەرشتێ پڕۆژەیێ نەخوەشخانا هەوارهاتنێ ل ناوچەداریا دەركارێ بۆ ڕۆژناما ئەڤرۆ دیار كر كو ژ بۆ پتر خزمەتكرنا خەلكێ ناوچەداریا دەركارێ و دەوروبەران د كەرتێ ساخلەمیێ دا، ل سەر ئەركێ حكومەتا هەرێما كوردستانێ، ئەڤ نەخوەشخانەیا هەوارهاتنێ ل سەر ڕووبەرێ هزار و 300 مەتران و ب گوژمێ زێدەتری ئێك ملیار دیناران دهێتە ئاڤاكرن.
ناڤهاتی ئاماژە ب وێ چەندێ ژی كر كو ئەڤ نەخوەشخانە ژ چەندین پشكان پێك دهێت، وەكو: پشكا نڤاندنێ و پشكا چاڤدێریێ و پشكا نۆشدارێ تایبەت یێ ددانان یێ ئافرەت و زەلامان جودا، ل گەل هەموو پێدڤیێن وێ وەكو تیشك و دەرمانخانە و تاقیگەهـ تێدا هەنە.