هەولێر، قائید میرۆ

بریكارێ بەرێ یێ وەزارەتا دارایی ل ئیراقێ‌ ئاشكراكر، بیلانێن مەزن و مەترسیدار ل دژی هەرێما كوردستانێ هەنە و پێدڤیە كورد هشیاری خۆبن ژ ڤان پیلانان. هەروەسا دبێژیت: دەستەك ل پشت بابەتێ داخوازكرنا لیستا فەرمانبەرێن هەرێمێ هەیە و تەیف سامی وەزیرا دارایی كەسەكا قانوونیە و چو كەرب و كین دگەل هەرێما كوردستانێ نینە و گۆت: مخابن نوكە كورد ل بەغدا زۆر د لاوازن و هیچ دەمەكی وەكی نوكە كورد لاواز نەبووینە ل بەغدا، پێدڤیە شاندەكێ بلندێ سیاسی ل هەرێما كوردستانێ سەرەدانا بەغدا بكەت بۆ چارەسەركرنا پرسا پەتڕۆلێ.

فازل نەبی، بریكارێ بەرێ یێ وەزارەتایی ل ئیراقێ‌ بۆ رۆژناما ئەڤرۆ دیار كر «مادە و برگەیێن زۆر خراپ د ناڤا قانوونا بودجێ ئیراقێ‌ هەنە و ئەگەر ب ڤی شێوەی قانوونا بودجەی بهێتە بجهئینان د بەرژەوەندیا هەرێما كوردستانێ نینە، لەوڕا ژی كوردان داخوازا راستڤەكرنا قانوونا بودجەی كریە، دەمێ پەسەندكرنا قانوونا بودجەی زۆر مە هەواركر زیانێن مەزن هەنە و نوكە كورد دزانن قانوونا بودجەی چەند زیان هەنە، لەوڕا حوكمەتا هەرێم و بەغدا رێكەفتینە قانوون بهێتە راستڤەكرن.
زێدەتر دبێژیت: ئەز باوەرم ئەگەر بهێت و مووچێ فەرمانبەرێن هەرێمێ بهێتە راكرن و بچیتە سەر میزانیا حاكیمە یان ژی میزانیا وەزارەتا دارایی، ئەڤسالە ئاریشا گیرۆبوونا مووچەی نامینیت، چونكە چەندین پارە هەنە ل ئیراقێ‌ ل سەر میزانیا وەزارەتا دارایی نە، دشێن مووچێ فەرمانبەرێن هەرێمێ ژی بكەڤیتە چوارچوڤێ میزانیا وەزارەتا دارایی، هەتا هندەك شیعە و سونەژی دخوازن ئاریشا مووچێ فەرمانبەرێن هەرێما كوردستانێ بهێتە چارەسەركرن.
نەبی ئاشكرا ژی كر، د هەمبەردا گرۆپەك هەیە كار بۆ ڤێ چەندێ دكەت بەغدا راستەوخۆ مووچێ فەرمانبەرێن هەرێما كوردستانێ بەلاڤ بكەت، ئەڤە ژی بەرۆڤاژی سیاسەتا هەرێما كوردستانێ و حوكمەتا هەرێمێ ناهێلین بەغدا راستەوخۆ مووچەی بەلاڤ بكەت، بەریا سالەكێ من گۆتیە دڤێت هەرێمێ چاڤ ل خوە هەبیت و بیلان هەنە ل سەر هەرێما كوردستانێ، نیەتێن زۆر خراب هەنە بۆ ڤەگوهاستنا مووچێ هەرێمێ و دڤێت كورد هشیاری خۆ بن.
بریكارێ بەرێ یێ وەزارەتا دارایی دبێژیت «ل ئیراقێ‌ سەرۆك وەزیران هەموو تشتەك نینە و یا دیارە هندەك لایەنێن سیاسی حوكمەت پێك ئینایە، پەرلەمانێ ئیراقێ‌ ژی یێ ئەكتیڤە و دشێت ئاریشەیان پەیدا بكەت و رێگریێ ل هندەك بڕیاران بكەت، راستە رێكەفتن دهێنەكرن دناڤبەرا هەرێم و بەغدا، بەلێ ئەو باش دزانن رێكەفتن ناهێنە بجهئینان، مخابن نوكە كورد ل بەغدا زۆر د لاوازن و هیچ دەمەكی وەكی نوكە كورد لاواز نەبووینە ل بەغدا، پێدڤیە شاندەكێ بلندێ سیاسی ل هەرێما كوردستانێ سەرەدانا بەغدا بكەت بۆ چارەسەركرنا پرسا پەتڕۆلێ، شاندێ تەكنیكی شیانێن چارەسەركرنا هەموو بابەتەكی نینە، پەرت بوونا كوردان و لایەنێن كوردی ئەگەرن بەغدا ئاستەنگان بۆ پشكا بودجێ هەرێما كوردستانێ چێكەت، چەندی كورد ئێكگرتی بن دشێن هەمبەری حوكمەتا فیدڕال سەركەڤن.
فازل نەبی ئاماژەكر «ل گۆرەی قانوونێ بۆ هیچ كەسەكی نینە داخوازا لیستا ناڤێن فەرمانبەرێن هەرێما كوردستانێ بكەت، چونكە پشكا هەرێما كوردستانێ دیارە دناڤا قانوونا بودجێ ئیراقێ‌، بەلێ دەستەك هەیە بۆ پەیداكرنا ئاریشەیان و لاوازكرنا هەرێما كوردستانێ داخوازا لیستا ناڤێن فەرمانبەران دكەت، تەیف سامی وەزیرا دارایی چەند سالان بەردەستێ من كاركریە وەك رێڤەبەرا گشتی و كەسەكا زۆر قانوونیە و چو كەرب و كین دگەل هەرێما كوردستانێ نینە، بەلێ د پشت وەزیرا دارایی ڕا ئاریشە دهێنە پەیداكرن بۆ هەرێمێ و دەستەك هەیە ل دەركرنا هندەك بڕیاران و بجهنەئینانا هندەك بڕیارێن دی، ل ئیراقێ‌ ئاریشە ئەڤە كەسێن دیار وەك پێدڤی هەموو بڕیارەك د دەستی دا نینە و خەلك هەیە رێكێ نادەت بڕیار بهێنە بجهئینان، وەختێ وەزیرا دارایی بڕیارەكێ ددەت هندەكێن دی هەنە ئاریشەیان بۆ هەرێما كوردستانێ پەیدا دكەن و رێگرن ل هنارتنا مووچە و بودجەی.

رەمەزان زەكەریا

بۆ سالا 2024ێ چەندین پرۆژەیێن ستراتیژی د وراێ وەبەرهێنانێدا ل سنوورێ دەڤەرداریا ئاكرێ دێ هێنە بجهئینان، پشكەكا وان پرۆژەیان رازیبوون وەرگرتیە و ل نیزیكترین دەم دێ هێنە ڕاگەهاندن. دەڤەردارێ ئاكرێ ژی گۆت: نوكە كاركرن ل پرۆژەیێ‌ ئاڤا ئاكرێ‌ دا دهێتەكرن، كو د شیاندایە ب ڕێژەیا 90%ێ ئاریشەیا كێم ئاڤیێ ل ئاكرێ چارەسەربكەت، ئەڤ سالە سێ یاریگەهێن وەرزشی ل ئاكرێ و گردەسێن و دینارتە هاتینە نووژەنكرن و د قۆناغێن دووماهیێدانە.

د. دلاوەر بۆزۆ، دەڤەردارێ ئاكرێ گۆت: ئەڤ سالە پرۆژەیەكێ مەزنێ وەبەرهێنانێ كو چاندنا دارێن زەیتوونانە و دروستكرنا كارگەهەكا مەزن یا بەرهەمئینان روونی ل ئاكرێ دێ هێنە بجهئینان، پرۆژەیەكێ ب خودانكرنا چێلان ژی هەیە كو ل ناوچەداریا گردەسێن سنوورێ ئاكرێ هێتە بجهئینان، ل بجیل ژی پرۆژەیەكێ مەزنێ بخودانكرنا ماسییان هەیە.
ناڤبری گۆتژی: د وراێ گەشتیاری ژی دا پرۆژەیێن گرنگ هەنە ژ وان ژی دروستكرنا باژێرێ یاریێن ئاكرێ، كو نوكە دەست ل دروستكرنێ‌ هاتییە كرن، پرۆژەیێ تلفریكا ئاكرێ ژی پرۆژەیەكێ گرنگ و ستراتیژییە و بریارە د ئەڤ سالە دا بهێتە بجهئینان.
دەڤەردارێ‌ ئاكرێ‌ زێدەتر گۆت: د وارێ ڕێك و پرادا پرۆژەیێن گرنگ هاتینە بجهئینان، قێركرنا ڕێكێن سەرەكییا ئاكرێ و بەرفرەهكرنا ڕێیا سەرێ گرێ، تونێلا پیرس كو سێ هزار میترە، پرۆژەیێن گرنگن و دێ هێنە بجهئینان.
ناڤهاتی خویاكر: نوكە كاركرن ل پرۆژەیێ‌ ئاڤا ئاكرێ‌ دا دهێتەكرن، كو د شیاندایە ب ڕێژەیا 90%ێ ئاریشەیا كێم ئاڤیێ ل ئاكرێ چارەسەربكەت، ئەڤ سالە سێ یاریگەهێن وەرزشی ل ئاكرێ و گردەسێن و دینارتە هاتینە نووژەنكرن و د قۆناغێن دووماهیێدانە.