لەزگین جوقی:
هاریكارێ رێڤەبەرێ سەنتەرێ نەخۆشیا پەنجەشێرێ ل پارێزگەها دهۆكێ دیار كر، د سالا بۆری ل پارێزگەها دهۆكێ هزار و 180 كەس تووشی نەخۆشیا پەنجەشێرێ بووینە، دیسا ل سەرانسەری هەرێما كوردستانێ ژی نەه هزار و 911 كەس تووشی پەنجەشێرێ بووینە و دبێژیت: هەمی جۆرێن چارەسەریێ ژ لایێ حوكمەتا هەرێما كوردستانێ ڤە بێ بەرامبەر بۆ نەخۆشان دهێنە كرن.
د. چەكدار ئەحمەد، هاریكاری رێڤەبەرێ سەنتەرێ نەخۆشیا پەنجەشێرێ ل پارێزگەها دهۆكێ بۆ ئەڤرۆ خویا كر، نوكە ل پارێزگەها دهۆكێ نەخۆشخانەك بۆ چارەسەریا تووشبوویێن نەخۆشیا پەنجەشێرێ یا دهێتە بەرهەڤكرن، ئەو ژی نەخۆشخانا تەنگاڤیانە ل بەڕۆشكێ و گۆت: «پشتی دهێتە نووژەنكرن، دێ بیتە نەخۆشخانا پەنجەشێرێ و بڕیارە ئەڤ سالە ئەڤ نەخۆشخانا تایبەت بۆ چارەسەریا نەخۆشێن پەنجەشێرێ ب دووماهی بهێت و بهێتە ڤەكرن».
ناڤهاتی گوتژی: «بەرێ بنیاتی بۆ پشكا تێشكێ هاتیە دان، ئەڤە ژی دێ گەلەك خزمەتا نەخۆشێن پەنجەشێرێ كەت و حوكمەتا هەرێما كوردستانێ هەمی خزمەتێن چارەسەریێ بێ بەرامبەر بۆ نەخۆشان دابین دكەت».
ئاشكرا ژی كر، چارەسەریا نشتەرگەریێ و كیمیایی و بەرگری و بایلۆجی هەمی ل سەنتەرێ چارەسەریا نەخۆشیا پەنجەشێرێ ل نەخۆشخانا ئازادی ل دهۆكێ بێ بەرامبەر بۆ نەخۆشان دهێنە كرن.
نيشاندان