پارێزگارێ دهۆكێ ب گوژمێ ٢٢ ملیار دیناران بەرێ‌ بنیاتی بۆ هەژمارەكا پڕۆژەیان ل دەڤەرداریا سێمێلێ‌ دانا و هەژمارەكا پڕۆژەیان ژی ڤەكرن.
د. عەلی تەتەر، پارێزگارێ دهۆكێ و د گەل دا دەڤەردارێ سێمێلێ و رێڤەبەرێ گشتی یێ باژێرڤانیێن پارێزگەها دهۆكێ و رێڤەبەرێن سازیێن خزمەتگوزاری د چارچوڤێ بەرنامەیێ بەردەوامێ‌ حوكمەتا هەرێما كوردستانێ یێ بجهئینان و دەستپێكرنا پڕۆژەیێن خزمەتگوزاری دا، ل رۆژا 25/1/2024 ب گوژمێ ٢٢ ملیار دیناران بەرێ بنیاتی بۆ هەژمارەكا پڕۆژەیان ل دەڤەرداریا سێمێلێ دانا و چەندین پڕۆژەیێن ب دووماهی هاتین ژی ڤەكرن ل گەل رازیبوون و رەوانەكرنا یاریگەهەكا وەرزشی ل سێمێلێ بۆ بجهئینانێ‌.
ژ وان پڕۆژەیێن پارێزگارێ‌ دهۆكێ‌ ل دەڤەرداریا سێمێلێ‌ بەرێ‌ بنیاتی بۆ دانای ئەڤە نە: بجهئینانا پڕۆژەیێ رێكا سەرەكی یا ٦٠مەتری بەرامبەر زانكۆیا نەورۆز ل گەل رێكا نەخۆشخانا گشتی و یا تایبەت ب پەنجەشێرێ‌ ڤە ل كۆمەلگەها تەناهیێ، چێكرنا سایدەكێ جاددەیێ یێ ٣٠مەتری ژ وێستگەها كارەبێ هەتا رێكا ٦٠مەتری بەرامبەر زانكۆیا نەورۆز، چێكرنا دو سایدێن دی یێن جاددەیێ یێن ٣٠مەتری ژ وێستگەها كارەبێ هەتا رێكا ٦٠مەتری بەرامبەر یەكەیێن ئاكنجیبوونێ ل تەناهیێ، پڕۆژەیێ چێكرنا رێكێن ناڤخوەیی ل گوندێ سێجێ ل گەل چێكرنا رێكێن ناڤخوەیی ل تاخێ شەهیدان و سولینان د گەل دا، چێكرنا رێكێن ناڤخوەیی ل تاخێ ئازادی ل گەل سۆلینێ و چێكرنا سایدەكێ خزمەتگوزاری بۆ ئەندەرپاسا سێمێلێ و سەخبێركرنا رێكێن ناڤخوەیی ب ئەسفەلتی ل سێمێلێ ل گەل سەخبێركرنا رێكێن ناڤخوەیی ب كۆنكرێتی ل سێمێلێ.

دهۆك، لەزگین جوقی:

جێگرێ‌ پارێزگارێ دهۆكێ دیار كر، حوكمەتا هەرێما كوردستانێ گرنگیەكا مەزن ب دروستكرنا جاددەیان دایە، ئەڤ سالە رێیا د ناڤبەرا ناوچەداریێن سەرسنكێ‌ و دێرەلۆكێ دا ب درێژاهیا 40 كیلۆمەتران دێ بیتە جۆتساید.
ماجد سەید سالح، جێگری پارێزگارێ دهۆكێ بۆ رۆژناما ئەڤرۆ خویا كر، ئەڤ سالە دەست ب پڕۆژەیێ‌ دروستكرنا جۆتسایدێ‌ د ناڤبەرا ناوچەداریێن سەرسنكێ‌ و دێرەلۆكێ‌ دا دێ هێتە كرن و رێیا دهۆكێ‌ هەتا ناوچەداریا شێلادزێ‌ هەمی دێ بیتە جۆتساید و گۆت: “درێژاهیا ڤێ‌ جاددەیێ‌ 40 كیلۆمەترن و ئەڤە ئێكە ژ پڕۆژەیێن گرنگ ل پارێزگەها دهۆكێ دێ هێتە بجهئینان”.
ناڤهاتی گۆتژی: “جۆتسایدكرنا رێكا سەرەكی یا د ناڤبەرا سەرسنكێ بۆ دێرەلۆكێ دا پڕۆژەكێ گرنگە و دێ سەنتەرێ پارێزگەها دهۆكێ ب دەڤەرا ئامێدیێ و دەڤەرا بارزان ڤە گرێ دەت و چەندین دەڤەرێن دی ژی ژ بجهئینانا ڤێ پڕۆژەی دێ مفادار بن”.

ئامێدیێ، مەحمود نهێلی:

فرۆكەیێن لەشكرێ توركیا پڕۆژەكێ خودانكرنا پەزی و عەمبارێن هەلگرتنا ئالفی ل گوندێ سەرگەلێ یێ‌ سەر ب ناوچەداریا دێرەلۆكێ‌ ڤە كرنە ئارمانج و ژناڤبرن، زێدەباری ب گوژمێ‌ پتری 30 دەفتەرێن دۆلاری زیان گەهاندنێ‌ و 300 سەرێن پەزێ وی ژی هێلانە بێ خوارن و جهێ ڤەحواندنێ، دیسا زیانێن مەز گەهاندنە مالێن وەلاتیان و پەنجەر و دیوارێن وان شكاندینە.
پێشكەفت رەشید، خودانێ پڕۆژەیێ ناڤهاتی بۆ رۆژناما ئەڤرۆ دیار كر، پشتی ئەو هاتیە ئاگەهدارن، پێدڤیە ئەو پڕۆژەیێ خوە چۆل بكەت، نەكێشا رۆژەكێ پشتی هنگی هاتە بوردۆمانكرن و هاتە ژناڤبرن و گۆت: “من ئەڤ پڕۆژە ب مۆلەت یێ چێكری و پتر ژ 30 دەفتەرێن دۆلاری لێ مەزاختینە و 121 ملیۆن دینار ژ حوكمەتێ قەر كرینە، هێشتا 97 ملیۆن دینارێن قەرێن حوكمەتێ ل نك من ماینە”.
ناڤهاتی گۆتژی: “من ئەڤ پڕۆژەیە ل سالا 2011 یێ چێكری و ل سالا 2012 من پەزێ كریە تێدا و شڤانەكێ عەرەب بۆ گرت كو نەه نەفەر بوون ل وێرێ دژیان، سوپاس بۆ خودێ‌ گیان ب سلامەتن و ئەم شیاین شڤانی ب مال ڤە و پەزی قورتال بكەین، ئاڤاهی هەموو هاتە وێرانكرن و بەر سەر بەری نەمایە”.
ئاشكرا ژی كر، ژ بلی پێنج هۆلێن خودانكرنا پەزی و عمبارێن هەلگرتنا ئالفی، سێ خانی، دیسا دو دۆنەمێن ئەردی ل وێرێ مە كربوونە پڕۆژە و ئاڤاهی و هەموو ژناڤچوون و گۆت: “پشتی پڕۆژەیێ من هاتیە بوردۆماكرن، ناهێلن ئەم بچینە وێرێ، هەكە بەلكو ئەم شیاباین هندەك ئالفی بینین بەری ئەڤ بارانە ل سەر بهێت، داخوازێ‌ ژ حو كمەتا هەرێمێ دكەین، سەر و مالێن مە ب پارێزن، هەكە هەر هوسا ئەڤ شەڕ و بوردۆمانە بەردەوام بیت ئەم دێ نەچار بین گوندێ خوە چۆل بكەین”.
پێشكەفت زێدەتر گۆت: “پشتی سەرهلدانێ‌ و ل سالا 1992 ئەم ل گوندێ‌ خوە ئاكنجیبووینە، بەلێ نوكە ژ بەر ڤی شەڕی پتریا گوندیان باركریە و نوكە ب تنێ دۆرێن 30 مالان ماینە د ناڤ گوندی دا، لێ هەكە رەوش هەر هوسا بیت ئەو ژی دێ نەچار بن ژ گوندی دەركەڤن و گوندی چۆل بكەن”.

ئاكرێ‌، رەمەزان زەكەریا:

د روودانەكا هاتنوچوونێ‌ دا ل سەر رێكا سەرەكیا دهۆكێ‌ بۆ هەولێرێ‌ و ل نێزیك ناوچەداریا ڕۆڤیا ترۆمبێلەكا ژ جۆرێ تایبەت د ئۆڤەرپاسا گوندێ پالاسان دا كەفت و شۆفێری گیانێ‌ خۆ ژ دەست دا.
ل گۆر زانیاریان دوهی ڕۆژا شەمبی 27/1/2024 ترۆمبێلەكا ژ جۆرێ تایبەت د ئۆڤەرپاسا گوندێ پەلاسان دا ل سنۆرێ ناوچەداریا رۆڤیا وەرگەڕیا و د ئەنجام دا شۆفێرێ ترۆمبێلێ بناڤێ (ر. ش. ك) گیانێ خۆ ژ دەست دا، كو ئاكنجیێ پارێزگەها دهۆكێ‌ بوو.
د دەمێ دو رۆژێن بۆری دا ل سنوورێ دەڤەرداریا ئاكرێ، د دو روودانێن دی یێن هاتنوچوونێ‌ دا شەش كەس برینداربوون.

دهۆك، لەزگین جوقی:

ئێكەتیا كرێكارێن كوردستانێ‌ لقێ‌ دهۆكێ‌ داخوازێ‌ ژ هەمی كرێكارێن پارێزگەها دهۆكێ‌ دكەت بایكۆتا كەلوپەلێن ئیرانی بكەن، دیسا كرێكارێن مە دخوازن كرێكارێن ئیرانی بهێنە دەرئێخستن.
ئێكەتیا كرێكارێن كوردستانێ‌ لقێ‌ دهۆكێ‌ راگەهاند، تاخا كرێكاران وەفادارترین تاخا جڤاكی یە هەردەم بەرهەڤن بۆ ئاڤەدانیا وەلاتێ‌ خۆ هەست ب ئێش و ئازارێن مللەتێ‌ خۆ دكەن، ژ بەر هێرشا ئیرانێ‌ بۆ سەر هەولێرێ‌، ئەم داخوازێ‌ ژ هەمی كرێكارێن پارێزگەها دهۆكێ‌ دكەین بایكۆتا كەلوپەلێن ئیرانی بكەن.
دیسا داخوازێ‌ ژ حكومەتا هەرێما كوردستانێ‌ دكەین ئاگەهداریێ ب دەتە حكومەتا ئیرانێ‌ ب هزارەها كرێكارێن ئیرانی ل جهێ‌ كرێكارێن كوردستانێ‌ كار دكەن، هەكە ئەڤ هێرش نەهێنە راوەستاندن هەمی كرێكارێن ئیرانی ژ هەرێما كوردستانێ‌ بهێنە دەرئێخستن، داكو دەلیڤە بۆ كرێكارێن مە خۆشتر لێ‌ بهێت.

دووڤچوون:

نوونەرێ قوربانیێن جینۆسایدا شنگال ل حەردان دیار كر، حوكمەتا ئیراقێ‌ 41 رۆفاتێن جینۆسایدا شنگالێ ل بەغدا دانە دەستێ كەس و كارێن قوربانیان، پشتی ل بەغدا رێورەسم دهێنە كرن، دێ هەموو رۆفات بەرەڤ نەینەوا هێن و دێ د رێورەسمەكیدا ل شنگال هێنە ڤەشارتن».

حەسەن قاسم، نوونەرێ قوربانیێن جینۆسایدا شنگال ل گوندێ حەردان راگەهاند، ژ سەرجەمێ 41 رۆفاتان 16 رۆفات خەلكێ گوندێ حەردانن و 14 رۆفات خەلكێ گوندێ كۆچۆ نە و رۆفاتێن دی ژی خەلكێ شنگالێ نە ب شێوەیەكێ هۆڤانە ژلایێ تیرۆرستێن داعش ڤە هاتبوونە كوشتن و د ناڤ گۆرێن ب كۆمدا هاتبوونە ڤەشارتن، پشتی گۆرێن ب كۆم ل حەردان و كۆچۆ هاتینە ڤەكرن و پشكنینا DNA هاتیە كرن، ناسنامێن هەر 41 رۆفاتێن قوربانیێن جینۆسایدا شنگالێ ئاشكرابووینە».
زێدەتر گۆت: ل گوندێ كۆچۆ گورستانەكا تایبەت بۆ ڤەشارتنا قوربانیان هاتیە دروستكرن، ل گوندێ حەردان ژی گورستانەكا تایبەت هاتیە دروستكرن و ئەڤ رۆفاتێن قوربانیان ل ناڤ گۆرستانێن تایبەت دا ب جینۆسایدا ئێزدیان ل شنگالێ دێ هێنە ڤەشارتن».