رەمەزان زەكەریا
د داخویانیەكێدا سەرۆكێ یانەیا ئاكرێ یاوەرزشی دیار كر یارییا د ناڤبەرا تیما تەپا پێی یا یانەیێن ئاكرێ و زاخۆ دا ژ چارچووڤەیێ‌ گەڕا 16ێ‌ یا خولا نایابا كوردستانێ ئەوا ل یاریگەها یانەیا بەردەڕەش هاتە ئەنجامدان،پشتی یاریێ گرژی د ناڤبەرا یاریزانان دا دروست بوو، دووڤدا كارگوزارەكێ تیما مە رەفتارەك دژی یاریزانەكێ یانەیا زاخۆ ئەنجامدا.
زێدەتر سەلاح ئیبراهیم بۆ ئەڤرۆ گۆت:پشتی دووماهی هاتنا یاریێ گرژیەك دناڤبەرا یاریزانان دا پەیدا بوو،دووڤدا كارگوزارەكێ یانەیا ئاكرێ دگەل یاریزانەكێ یانەیا زاخۆ ب دژ ئێك داچوون ئەو بۆ ئەگەرێ وێ چەندێ كو ب شێوەكێ‌ كرێت دربەك ب یاریزانێ یانەیا زاخۆ دایی بۆ ئەگەرێ برینداربوونا یاریزانێ ناڤبری، كارگێریا یانەیامە دگەل هێزێن ئێمناهیێ ب دەمەكێ كێم گرژی و ئالوزی راوەستاندن و ئەو كارگوزارێ ئەو رەفتار كری دێ پێرابوون گەلەك هێنە ئەنجامدان.
سەرۆكێ یانەیا ئاكرێ گۆتژی: كارگێریا یانەیا ئاكرێ و كادرێ هونەریێ تیمێ سەردانا مالباتا یاریزان یوسف ئەیوب و كارگێریا یانەیا زاخۆ یا وەرزشی كر ل باژێرێ زاخۆ ب مەرەما لێك نێزیكبوونا زێدەتر و گەهاندنا پەیاما برایینیا هەردەم دناڤبەرا خەلكێ ئاكرێ و زاخۆ، هەردو لایەنان دووپاتكر ل سەر پاراستنا گیانێ وەرزشی و برایینی و دووماهی ئینان بڤان ئالوزی وگرژیێن دروستبووی، سوپاسیا مالباتا یاریزان یوسف ئەیوب و سەرۆكێ یانەیا زاخۆ و دەستەیا كارگێریا یانەیێ‌ دكەین كو ب سینگەكێ بەرفرەهـ سەردانا شاندێ مە قەبوول كری و پێشوازی كر و دووماهی ئینا ب هەمی گرژی وئالوزیان.
ل دووماهیێ‌ سەلاح ئیبراهیم گۆت: هەردەم خەلكێ ئاكرێ و زاخۆ ل هەمی بوارێن دیتر دا هاریكار وپالپشت و دۆستن و پالپشت وپشتەڤانن دگەل ئێك و چ جاران ئەو ئالوزیێن ڤی رەنگی كاریگەری نابیت ل سەر هەڤالینی و ژیك نیزیكبوونا دێرینا خەلكێ هەردو دەڤەرداریا، هەر پشتی یاریێ ئێكسەر یانەیا ئاكرێ بەیاننامەیەك بەلاڤكرو تێدا داخوازا لێبوورینی ژ یانەیا زاخۆ خواست.

عەلی حاجی:

د داخویانیەکێ دا ئەندامەکێ دەستەیا کارگێریا یانا زاخۆ یا وەرزشی بۆ رۆژناما ئەڤرۆ دیار کر ئەو دێ ب تیمەکا باشتر و ب هێزتر پشکداریێ د جاما کوردستانێ یا تەپاپێی دا کەن ب هێڤینە ناسناڤی ب دەستڤە بینن.
زێدەتر دلژار عەدنان گۆت : ژ بۆ وەرزێ دویێ یا خولا نایابا کوردستانێ پیشەکارەکێ دی ل تیما خوە زێدە کرینە و ئەو دانوستاندنا دانە دگەل یاریزانەکێ دیتر یێ پێشەکار و ئارمانج ژ وێ چەندێ ئەوە ئەم ب تیمەکا باشتر پشکداریێ د وەرزێ دویێ دا ژ خولێ بکەین، بۆ جاما کوردستانێ مە بریار دایە ب تیمەکا باشتر و ب هێزتر پشکداریێ بکەین ژبەرکو مە دەلیڤەیەکا مەزن هەیە بۆ جارا سێیێ ناسناڤێ جاما کوردستانێ ب دەستخوە ڤەبینن و وەکو دەستەیا کارگێریا یانه‌یێ ژی مە پلانەکا باش دانایە و دێ چەندین یاریزانێن خوە یێن تیما مە یا پشکدار د خولا ستێرێن ئیراقێ دا ل سه‌ر تیما خوە یا خولا کوردستانێ دا زێدەکەین و هەمی ئارمانجێن مە ئەون بشێن کارەکێ باش بکەین.
ناڤبری گۆت ژی: وەکو دەستەیا کارگێریا یانێ ژی هەمی پشتەڤانیا خوە دوپات دکەین ژ بۆ جاما کوردستانێ یا ئەڤ سالە ب تیمەکا باش پشکداریێ بکەین ژبەرکو د جامێ دا بتنێ چار یاریان دێ ئەنجام دەین و هەکە مە شیا د هەمی یاریان دا سەرکەڤتنێ ب دەستڤە بینن دێ بینە قارەمان بۆ جارا سیێ.

ب دووماهی هاتنا یاریێن گەڕا 16ێ‌ ژ هەڤڕكیێن خولا پلا نایابا كوردستانێ‌ یا تەپا پێی، پشتی بۆرینا پێنج گەڕان تیما یانەیا ئاكرێ‌ سەرێ‌ لیستا رێزبەندییا خولێ‌ ژ دەستدا و دهۆك بەردەوامە ل سەر ڤەگەڕیانا خوە بۆ باشتكرنا جهێ‌ خوە و زاخۆ ژی وەكهەڤییا 10ێ‌ تۆماركر.
د دێربیێ‌ پارێزگەها دهۆكێ‌ دناڤبەرا یانەیا ئاكرێ‌ و زاخۆ ب گۆلەكێ‌ وەكهەڤی ب دووماهی ئینا، د یارییا واندا ئەوا ل یاریگەها ئاكرێ‌ هاتییە كرن كو ئەڤ ئەنجامە بوو ئەگەر خودانێن ئەردی سەرێ‌ لیستێ‌ ژ دەست بدەت بۆ هەڤڕكا خوە شێروانە بهێلن ب جوداهییا گۆلان، تیما ئاكرێ‌ ئەوا ژ هەشت سەركەفن، چار وەكهەڤی و چار خوسارەتییان ب كۆمكرنا 28 خالان پاشڤەچوو رێزا ب جوداهییا شەش گۆلان ژ یانەیا شێروانە ئەوا ب هەمان سەركەفتن، خوسارەتی و وەكهەڤییان و هەمان خال سەرێ‌ لیستێ‌ وەرگرتی و مفا ژ وەكهەڤییا دێربیێ‌ پارێزگەهێ‌ وەرگرتی ب دو گۆلان شیابوو سەركەفتنێ‌ ل سەر سۆران بینت.
د بەرانبەر دا تیما زاخۆ ئەوا ب خالەكێ‌ ژ باژێرێ‌ ئاكرێ‌ ڤەگەڕیایی و نەهێلایی تیما پارێزگەهێ‌ بەردەوامیێ‌ بدەتە سەرێ‌ لیستێ‌ جهێ‌ خوە ل رێزا حەفتێ‌ ب كۆمكرنا 22 خالان پاراست ژ چار سەركەفتن، 10 وەكهەڤی كو مەزنترین رێژەیا وەكەهەڤییانە د خولێ‌ دا و دو خوسارەتی كود بیتە كێمترین خوسارەتی ب هەڤپشتی دگەل تیما چارقۆرنە د خولێ‌ دا، دیسان 12 گۆل هەنە و 10 گۆل ل سەر هاتینە تۆماركرن.
ژلایەكێ‌ دووڤە تیما یانەیا دهۆكێ‌ ب سەرپەرشتییا راهێنەرێ‌ خوە یێ‌ نوو رابین هاشم شایە سەركەفتنەكا گرنگ ل سەر مێڤانا خوە یانەیا سەید سادق بینت ب گۆلەكێ‌ بێ‌ بەرانبەر و هیڤیێن مانا خوە د خولێ‌ دا گەشتر لێبكەت، ب كۆمكرنا 17 خالان خوە ژ هەڤڕكێن خوە یێن دووماهیێ‌ دووربێخیت ل رێزا 14ێ‌ بهێت و ببیتە هەڤڕك د رێزێن پێشییا خوە.
لیستەیا گشتی پشتی ب دووماهی هاتنا یاریێن گەڕا 16ێ‌، شێروانە ب28 خالان رێزا ئێكێ‌، ئاكرێ‌ ب جووداهییا گۆلان هەمان خالان رێزا دویێ‌، هەر ئێك ژ سیروانی نوو ب27 خالان، چوارقوڕنە ب26خال، پێشمەرگەیا هەولێر ب25 خال، دەربەندیخان ب24 خال، زاخۆ 22 خال، برایەتی ب21 خال رێزێن سێیێ‌ هەتا هەشتێ‌ دهێن، رانیە ب20 خال، ئارارات ب هەمان خالان، هندرین ب19 خال، هەولێر و سۆران و دهۆك ب 17 خالان رێزێن نەهێ‌ هەتا 14ێ‌ لدووڤئێك دهێن، شەقلاوە و سەید سادق ب13 خالان رێزێن15ێ‌ و دووماهیێ‌ دهێن.

قەیس وەیس:

هه‌ڤڕكیێن ده‌ستڤه‌ ئینانا پلێتا ده‌ربازبوون بۆ پلا نایابا كوردستانێ به‌ر ب قۆناغێن دووماهیێ چوویه‌ و یانه‌یا سێمێل به‌رده‌وامه‌ ل سه‌ر هه‌ڤڕكیێ و گه‌هشتن به‌ر ب ئارمانجا خوه‌ و هیڤیێن یانه‌یا ته‌ناهی بۆ نێزكبوونا خه‌ونا خوه‌ به‌ر ب لاواز بوونێ ڤه‌ دچیت، پشتی ب دووماهی هاتنا یاریێن گه‌ڕا نه‌هێ ژ هه‌ڤڕكیێن خولا پلا ئێكا ته‌پا پێی یا كوردستانێ.
ل یاریگه‌ها خوه‌ تیما یانه‌یا سێمێل به‌رده‌وامی دا شه‌ڕێ ب ده‌ستڤه‌ ئینانا پلێتا نایابێ پشتی شیایی سه‌ركه‌فتنێ بینت ل سه‌ر مێڤانا خوه‌ بازیان ب گۆله‌كێ بێ به‌رانبه‌ر بینت و پێنگاڤه‌كا باش به‌ر ب هیڤێن خوه‌ برییه‌، سێمێل شیا جووداهییا خالان دگه‌ل خودانا سه‌رێ لیستێ كێمتر لێبكه‌ت و پێشڤه‌ بهێته‌ رێزا چارێ ب19 خالان و سه‌ركه‌فتنا شه‌شێ بینت به‌رانبه‌روه‌كهه‌ڤیه‌كێ و دو خوساره‌تییان، ئه‌وا تیما رزگاری ب 22 خالان سه‌رێ لیستێ دهێت، كۆیه‌ ب هه‌مان خال رێزا دویێ و پیشه‌سازی ب 21 خالان رێزا سێیێ دهێت، ده‌لیڤه‌كا باش به‌رده‌ستێ كوڕێن سێمێلێ هه‌یه‌ ژبۆ گه‌هشت به‌ر ب خه‌ونا خوه‌ یا به‌ری 13 سالان دوباره‌ ڤه‌گه‌ریان بۆ پلا نایابا كوردستانێ.
ژلایه‌كێ دووڤه‌ تیما یانه‌یا ته‌ناهی به‌رده‌وامی دا ئه‌نجامێن خوه‌ یێن لاواز و نه‌شیا سه‌ركه‌فتنێ ل سه‌ر تیما خاك ب گۆله‌كێ بێ به‌رانبه‌ر تووشی خوساره‌تییا شه‌شێ بوویی، ئه‌ڤ ئه‌نجامه‌ وه‌كر تیما پارێزگه‌هێ پاشڤه‌ ببه‌ته‌ رێزا 11 ب نه‌هـ خالان و هیڤیێن هه‌ڤڕكیێ بۆ نایابا كوردستانێ لاواز بكه‌ت.
پشتی ب دووماهی هاتنا یارییچن گه‌ڕا نه‌هێ هه‌لوه‌ستێ گشتی بڤی ره‌نگی یه‌، رزگاری ب22 خالان سه‌رێ لیستێ دهێت، كویه‌ ب هه‌مان خال، پیشه‌سازی ب21خال، سێمێل ب19 خال، قه‌لادزێ ب18خال، سلێمانی ب14خال، شۆرجه‌ ب13خال، خاك ب11 خالان رێزێن دویێ هه‌تا هه‌شتێ دهێن، هه‌لۆ ب11خال، بابان ب10 خال، ته‌ناهی ب نه‌هـ خالان، رواندز هه‌مان خالان، چه‌مچه‌مال شه‌ش خال، خانه‌قین و بازیان پێنج خال و هه‌له‌بجه‌یی شه‌هید دو خال رێزێن نه‌هێ هه‌تا 16 و دووماهیێ دهێن.

هەردو نوونەرێن پارێزگەهێ‌ تیما یانەیا ئافرەتێن دهۆك و ئافرەتێن یانەیا زاخۆ سەرێ‌ لیستا كۆمێن خوە پاراستن و دەربازبوون بۆ چارگۆشەیا زێرین مسۆگەر كرینە پشتی ئەنجامدانا یاریێن گەڕا پێنجێ‌ و بەری ب دووماهی هاتنا قۆناغا كۆمان ب ئێك گەر ژ هەڤڕكیێن خولا فوتسالا كوردستانێ‌ یا كچان.
تیمائافرەتێن دهۆكێ‌ وەكو ئێك تیم شیابوو پشتی ب دووماهی هاتنا یاریێن گەڕا چارێ‌ دەربازبوونا خوە بۆ چارگۆشەیا زێرین مسۆگەر بكەت و هەتا نوكە ژی ئێكەم تیمە شیاییە سەرجەمێ‌ پێنج یارییان پێنج سەركەفتنان بینت و نمرەیا دیرۆكی یا وەرزێ‌ ئەڤ سالە تۆماربكەت د هەڤڕكیێن كۆما ئێكێ‌ دا، پشتی شیایی هەر ژ دەستپێكا خولێ‌ و هەتا دووماهی یاری دا سەرێ‌ لیستێ‌ بهێت و گەهاندیە 15 خالان، و مەزنترین رێژەیا گۆلان ژی تۆماربكەت ب 35 گۆلان بەرانبەر دو گۆل ل سەر هاتینە تۆماركرن ئەوژی كێمترین رێژەیا گۆلانە د خولێ‌ دا، سیپەل شوكر ب14 گۆلان، ئافرەتێن سۆران ب نەهـ خالان، هەلەبجەیا شەهید چار خال و خەلاتی پێنجوین ب ئێك خال رێزێن دویێ‌ هەتا چارێ‌ دهێن.
ژلایەكێ‌ دووڤە ئافرەتێن یانەیا زاخۆ دەربازبوونا خوە بۆ چارگۆشەیا زێرین مسۆگەر كر پشتی ب11 خالان هاتییە سەرێ‌ لیستا كۆما دویێ‌ بەری ب دووماهی هاتنا قۆناغا كۆمان ب ئێك یاری، پشتی سێ‌ سەركەفتن و دو وەكهەڤییان، ب تۆماركرنا 25 گۆلان بەرانبەر حەفت گۆل ل سەر هاتینە تۆماركرن، دووڤدا تیما سیروانی هەلەبجە ب10 خالان رێزا دویێ‌، رواندز ب حەەفت خالان رێزا سێیێ‌ و چەمچەمال بێ‌ خال رێزا چارێ‌ دهێت.

راهێنەرێ‌ تیما تەپا پێی یا بەرشەلۆنا یا ئسپانی دیار كر باش د زانم كو ئەركێ‌ من دگەل تیمێ‌ بەر ب دووماهیێ‌ دچیت و نێزیكە و ئەڤچەندە ژی ب سرۆشتی دبینم و ژ وێ‌ رۆژێ‌ ژی نا ترسم.
زێدەترچاڤی بۆ ماركا یا ئسپانی گۆت: دوور ژ ئەنجامێن تیما مە د خول و كۆپا ئسپانیا دا ئەز باش دزانم دەمێ‌ من یێ‌ دگەل تیما بەرشەلۆنا وەكو راهێنەری نێزك بوویە بجهـ بهێلم و ئەڤە ژی سرۆشتییە، بەری من لویس ئەنریكی بۆ سێ‌ سالان مابوو هەر وەسان گواردیۆلا ژی و ئەڤە ئەڤ دو سال و نیڤە دگەل تیمێ‌، لەوما ئەو دەم نێزیك بوویە ئەز ئەركێ‌ خوە ب دووماهی بینم ب شێوەكێ‌ سرۆشتی و تۆرە ژی نابم.
بۆ زانین چاڤی هێرناندێز دگەل بەرشەلۆنا 121 یاری هەنە ، 76 سەركەفتن، 20 وەكهەڤی و 25 خوسارەتی، دیسان ب تنێ‌ دو ناسناڤ هەنە