دهۆك، لەزگین جۆقی:

رێڤەبەرێ گشتیێ گەشتوگوزارا پارێزگەها دهۆكێ دیار كر، فەستیڤالا گەشتیاری یا نێڤدەولەتی ل پارێزگەها دهۆكێ دی هێتە گێڕان و دبێژیت: ئارمانج ژێ‌ ئەوە پتر خزمەتا كەرتێ‌ گەشتوگوزارا دهۆكێ بهێتە كرن و كۆمپانێن دەولەتێن بیانی ژی دێ‌ پشكداریێ‌ تێدا كەن.
د. خەیری عەلی، رێڤەبەرێ گشتیێ گەشتوگوزارا پارێزگەها دهۆكێ بۆ ئەڤرۆ گۆت: “فەستیڤالا گەشتیاری ل دووماهیا مەها بهێت دێ ل پارێزگەها دهۆكێ هێتە كرن، دوهی 23/1/2024ێ مە ل گەل نوونەرێن وەلاتێن قەتەر و سعوودیێ‌ دانوستاندن كرن ب مەرەما ئینانا كۆمپانێن وان وەلاتان بۆ فەستیڤالا گەشتیاری ل پارێزگەها دهۆكێ، ئەم هەمی بزاڤان دكەین گەلەك دەولەتێن بیانی پشكدار ببن، ئەڤ فەستیڤالە دێ خزمەتا ئابوورێ‌ دهۆكێ كەت”.

ب ئامادەبوونا فازل میرانی، بەرپرسێ دەستەیا کارگێڕیا مەکتەبا سیاسی یا پارتی دیموکراتی کوردستان و بەرپرسێن دی یێن حزبی و حکومی و هەژمارەکا پەرلەمانتار و کەسایەتی و رەشەنبیر و رۆژنامەنڤیس و ئەکادیمی و توێژێن جودا، دوهی ٢٣/١/٢٠٢٤ ل هولا پشکا رەوشەنبیری و راگەهاندنا پارتی، ئێڤارە رێوڕەسمەک بۆ دانەنیاسین و شرۆڤەکرنا پرتووکا (عارف ڕوشدی) یا ب ناڤونیشانێ (ڕۆژانی خەبات) هاتە سازکرن.
د. سالار عوسمان، بەرپرسێ پشکا ڕەوشەنبیری و راگەهاندنا پارتی د پەیڤەکێ دا باس ل گرنگیا چاپکرنا پرتووکێ کر، د دووڤ دا فازل میرانی، بەرپرسێ دەستەیا کارگێڕیا مەکتەبا سیاسی پەیڤەک پێشکێش کر و تێدا باس ل ڕۆل و خەباتا (عارف ڕوشدی) و گرنگیا پرتووکا (ڕۆژانی خەبات) کر.
د دووماهیێ دا عارف ڕوشدی نڤیسەرێ پرتووکێ، ناڤەڕۆکا پرتووکێ شڕۆڤە کر و رۆناهی دانە سەر هندەک روودانێن گرنگێن د ناڤ پرتووکا (ڕۆژانی خەبات) دا و رێورەسم ب پێشکێشکرنا دەستکێن گولان و ئیمزاکرنا پرتووکێ ب دووماهی هات.

ئامێدیێ، مەحمود نهێلی:

بەرەڤان حەمدی، بەرپرسێ لقێ 18 یێ پارتی د كۆمبوونەكێ دا ل گەل هەلبژێرێن گوندێن سنوورێ دەڤەرداریا ئامێدیێ، زێدەباری ڕەوشا كوردستانێ و ئیراقێ بەحس ل ئەرك و رۆلێ هەلبژێر و هەماهنگیا د ناڤبەرا هەلبێژ و حكومەتێ دا كر.
بەرپرسێ لقێ 18 خویا كر، مایتێكرنێن لایەنێن دەرەكی و بەزاندنا بەردەواما سنووران كارتێكرن ل سەر هەرێما كوردستانێ ژی كریە تا گەهشتیە بڕینا بودجەی و موشەكبارانا هەولێرا پایتەخت ژ لایێ پاسدارێن ئیرانێ ڤە و گۆت: “د ڕەوشەكا هوسا دا پێدڤیە كوردستان یا خوەراگر و خودان ئیرادە و بڕیار بیت”.
گۆتژی: “هەلبژێر وەك نوونەر دبیتە خەلەكا گەهاندنێ د ناڤبەرا تاخی یان گوندی و ئیدارێ، لەوما پێدڤیە ببیتە دەنگێ وان یێ ڕاستەقینە بێ جوداهی ب گەهاندنا ئەوا پێدڤی و د هەمان دەم ئەوا هاتیە كرن دیار و بەرچاڤ بكەت، تایبەت رەوشا دەڤەرا ئامێدیێ یا جودایە ژ هەر پارچەكا دی یا كوردستانێ، ژ بەر وێ یەكێ ئەم پێدڤی ب پتر هەماهنگی و هەڤكاریێینە دا كو بشێین ببینە پشتەڤان بۆ پتر خزمەتا خەلكێ خوە”.

زاخۆ، عەلی حاجی:

د رێورەسمەكێ تایبەت دا ب ئامادەبوونا گوهدار شێخۆ، سەرپەرشتێ ئیدارەیا سەربخوە یا زاخۆ ئاڤاهی و نڤیسینگەها پاسپۆرتێن ئەلكترۆنی ل زاخۆ هاتە ڤەكرن.
د كۆنگرەكێ رۆژنامەڤانی دا گوهدار شێخۆ دیار كر، جهێ شانازیە نڤیسینگەها پاسپۆرتێن ئەلیكترۆنی ل زاخۆ هاتیە ڤەكرن، ل دووڤ كارنامەیا كابینەیا نەهێ ب سەروكاتیا مەسرور بارزانی كو زێدەتر خزمەتا وەلاتیان بهێتە كرن د بیاڤێن جودا دا و نەهێلانا روتینیێ د ناڤ رێڤەبەریێن حكومەتێ دا و گۆت: “ل نڤیسینگەها زاخۆ وەلاتی دشێن د دەمژمێرەكێ دا پاسپۆرتا خوە یا نوو وەربگرن، بەری نوكە ژ بەر دووراتیا د ناڤبەرا پاسپۆرتێن زاخۆ و بانكێ دا هندەك كێشە بۆ وەلاتیان دروست دبوون، بەلێ د نوكە دا ئەو كێشەیە ژی نەمان و وەلاتی دشێن بێ هەبوونا كێشەیا بانكێ مامەلەیێن پاسپۆرتێن خوە ب رێڤە ببەن”.
ناڤبری گۆتژی: “د دەمەكێ‌ نێزیك دا دێ پڕۆژەیێ (هەژمارا من) ل زاخۆ دەست پێكەت و وەلاتی دشێن ب ڕێیا وێ كارتێ پارەیێ پاسپۆرتا خوە بدەن و دروستكرنا وێ كارتێ ژی كار ئاسانییەكە بۆ وەلاتیێن مە”.

زاخۆ، دلۆڤان هالۆ:

محەمەد ئەحمەد، ڕێڤەبەرێ شوونواران ل زاخۆ بۆ ڕۆژناما ئەڤرۆ دیار كر كو پشتی بۆرینا چار مەهان ژ هەلكۆلانا چەندین جهێن قشلا زاخۆ، هەژمارەكا مەزن ژ پارچەیێن شوونواری لێ هاتنە دیتن، كو دیرۆكا وان بۆ بەری پێنج هزار سالان دزڤڕیت.
ڕێڤەبەرێ شوونواران ل زاخۆ ئاماژە ب وێ چەندێ ژی كر كو ڤەدیتنا ڤان پارچەیێن شوونواری جۆراوجۆرن وەكو: گۆزەك و جەڕكان، كو نەخش ل سەر هاتینە دروستكرن و پەیكەرێن گیانەوەران و كەرەستەیێن ڕۆژانە یێن ب ڕێڤەبرنا كاروبارێن ژیانێ ل سەردەمێ كەڤن.
ناڤهاتی گوت: “ئەڤ پارچەیێن شوونواری كەڤناتیا باژێڕێ زاخۆ دیار دكەن، كو مێژوویا باژێڕی بۆ بەری پێنج هزار سالان و سەردەمێ سۆمەریان و دەستپێكا شارستانیەتا مرۆڤایەتیێ دزڤڕیت”.

سالار محەمەد دۆسكی:

كاڤین شێخ شەعید، ئەنداما پەرلەمانێ ئیراقێ ژ فراكسیۆنا پارتی دیموكراتی كوردستان بۆ رۆژناما ئەڤرۆ گۆت: سەرۆكوەزیرێن ئیراقێ بڕیار دایە، كو هەتا 1/3/2024 هەمی وەلاتی كارتێن نیشتمانی دروست بكەن، لەو مە سەرەدانا رێڤەبەرێ گشتیێ دروستكرنا كارتێن نشتیمانی ل وەزارەتا ناڤخوە و رێڤەبەرێ گشتیێ دروستكرنا پاسپۆرتان ل بەغدا كر و رازیبوون ل سەر زێدەكرنا میلاكی ل شێخان و زێلكان وەرگرت.
كاڤینێ گۆتژی: “پشتی مە سەرەدانا فەرمانگەها دروستكرنا كارتا نیشتمانی ل شێخان و زێلكان كری، مە دیت كو میلاكێ وان یێ كێمە، لەو مە سەرەدانا فەرمانگەها گشتی ل بەغدا كر و مە رازیبوونا زێدەكرنا میلاكی بۆ وەرگرت، دیسا مە خواست دەم بهێتە زێدەكرن و پتر دەلیڤە بۆ خەلكێ مە بهێتەدان”.
كاڤینێ‌ زێدەتر گۆت: “پێشتر مە رازیبوونا ڤەكرنا فەرمانگەها دروستكرنا پاسپۆرتان ل شێخان وەرگرت بوو، بڕیارە ب زووترین دەم فەرمانگەها ناڤبری دەست بكار ببیت”.

ئاكرێ‌، ئازاد عزەت:

راهێنەرەكا ژن ل قەزا ئاكرێ‌ ئاشكرا كر، شوفێری وەكە هونەر ل دەف زۆربەیا ژنان دبینم، چونكو ئەگەر ئافرەتێ حەزا شوفێریێ نەبیت هونەرێ فێربوونا شوفێریێ نزانیت و هەر ئافرەتەكا دهێتە شوفێریێ واتە حەزا هەی فێرببیت.

شرین ئەسعەد، ڕاهێنەرەكا ئافرەتا دیارە ل دەڤەرا ئاكرێ و ئێكەم ئافرەتا ڕاهێنەرە شوفێر بوو ل قەزا ئاكرێ. شرین هەر ژ تەمەنێ خۆ یێ زارۆكینیێ حەز و ڤیانەكا زێدە بۆ شوفێریێ هەبوو. د دیدارەكێ‌ دا بۆ ڕۆژناما ئەڤرۆ گۆت: ئەڤە بۆ ماوێ 13 سالانە ئەز شوفێریێ دكەم و ل سالا 2014، من مۆلەتا شوفێریێ دەرئینایە، هەروەسا ئەڤە بۆ ماوێ سێ سالانە كارێ فێركرنا شوفێریێ دكەم، ب تایبەت بۆ ئافرەتان.
ناڤهاتی زێدەتر دبێژیت: ئەز وەكو ڕاهێنەر دبینم هەموو تەمەن دهێنە فێركرنا شوفێریێ و تەمەنەكێ گۆنجایی یێ دیار نینە، هەتا ٥٠ سالیێ ژی ئافرەت هەبوویە خۆ فێری شوفێریێ كریە و دووبارە دێ بێژمەڤە حەز و ڤیانە، بۆ هەر پیشەیەكێ دەستپێكێ دڤێت مرۆڤ حەز ژێ بكەت و ئەڤ ڤیانە دێ پتر هاندەت، كو ببیتە كەسەكا سەركەڤتی.
هەروەسا دبێژیت ژی: ب دیتنا من زۆر یا گرنگە ئافرەت كارێ شوفێریێ بكەت، ب تایبەت ل ڤی سەردەمی، ئەز دبینم زۆربەیا ئافرەتان خودان كار و فەرمانبەرن ئەگەر ئافرەت شوفێریێ بزانیت دێ ڕێڤە چوونا كارێ وێ و ژیانا وێ یا ڕۆژانە ئاسانتر بیت. دبیت زەڵام ژی ل سەر كارێ خۆ بیت یان ئەو پێدڤی ترۆمبێلێ بیت، ڤێجا ژبەر هندێ ئەز وەكو ڕاهێنەرەكا شوفێریێ، شوفێریا ئافرەتێ ب ئاستەكێ گەلەك باش دبینم، ئێك ژ وان لایەنێن هەرە باشە یێن ژیانێ.
زێدەتر گۆت: ترسا هاژووتنا ترۆمبێلێ ل دەستپێكێ یا ل دەڤ هەر كەسەكی هەی، دەمێ دەستپێكا وێ بیت بهێتە شوفێریێ، ئەم وەكو ڕاهێنەر یا ل سەر مە پێدڤیە هاریكار بین و وێ ترس و دوودلی و بێ هیڤیبوونێ ل دەف نە هێلین. هەروەسا د ماوێ ڤان سێ سالاندا زێدەتری (300) ئافرەتا من فێری شوفێریێ كرینە.
شرین ئەسعەد خویا ژی كر، شوفێریا ئافرەتێ زۆر یا باشە هەتا ل ڕوویێ سەرپێچیاڤە دەمێ سالانە ڕێڤەبەریا گشتیا هاتن و چوونێ ئامارێن خۆ بەلاڤ دكەن دێ بینین ئافرەت كێمتر تووشی سەرپێچیا و ڕوودانا بوویە، ژ بەر هندێ دبێژم شوفێریا ئافرەتێ باشترە و ل سەرخۆ ترە.
ل دووماهیێ ناڤبری دبێژیت: پەیامامن بۆ هەموو شوفێران ئەوە گرنگیێ ب یاسایێن هاتن و چوونێ بدەن، دا كو گیانێ وان یێ ب سلامەت بیت ل هەر روودانەكا نەچاڤەرێ كری.