لەزگین جوقی

رێڤەبەرێ‌ گشتیێ‌ گەشت و گوزارا پارێزگەها دهۆكێ‌ دیاركر، د سەردەمێ‌ كابینا نەهێ دا كەرتی گەشتیاری گەلەك پێشڤەچوویە، ب تایبەتی ژی ل پارێزگەها دهۆكێ‌، گەلەك گرنگی ب گەشت و گوزارا دهۆكێ‌ دهێتە دان و چەندین پرۆژین گرنگ گەشتیاری دهێنە بجهئینان و گۆت:

د. خەیری عەلی، رێڤەبەرێ‌ گشتیێ‌ گەشت و گوزارا پارێزگەها دهۆكێ‌ بۆ رۆژنامەیا ئەڤرۆ ئاشكرا كر، حوكمەتا هەرێما كوردستانێ‌ ب سەروكاتیا مەسرور بارزانی، گەلەك گرنگی دایە كەرتێ‌ گەشت و گوزارێ‌، سەنتەرێ‌ دهۆكێ‌ دێ‌ بیتە جهەكێ‌ مەزن یێ‌ گەشتیاری و پاشەرۆژا گەشت و گوزارا دهۆكێ‌ دێ‌ گەلەك یێ‌ گەش بیت، هەموو بزاڤ ئەون دهۆك ببیتە پایتەختی گەشتیاری و ئەم هیڤدارین بگەهینە ڤێ‌ ئارمانجێ‌، رۆژانە ل دهۆكێ‌ جهێن گەشتیاری یێ دهێنە ڤەكرن و گەلەك گرنگی ب كەرتی گەشتیاری هاتیە كرن، ئەڤە بوویە ئەگەر خەلك ب خۆ جهێن گەشتیاری ڤەكەن و تێدا كاربكەن و چەندین دەلیڤێن كاركرنێ‌ ب رێیا كەرتێ‌ گەشت و گوزاری بۆ وەلاتیان پەیدابووینە».
ئاشكرا كر، گەلەك پرۆژێن گرنگ یێن گەشتیاری هاتینە بجهئینان، ئەڤ پرۆژە بووینە ئەگەر گەشتیار پتر قەستا دهۆكێ‌ بكەن، نەخاسمە ژی ل دهۆكێ‌ و ئامێدیێ‌ و سەرسنك كو نوكە ئوتێلەكا حەجەری ل سەرسنكێ‌ یا دهێتە نووژەنكرن و ل دەستپێكا چێكرنا ڤێ‌ ئوتێلی بۆ سالێن پێنچیان دزڤریت، گەلەك گرنگە بۆ گەشتیاری نوكە ب رێژا 95% ئوتێل حەجەری ب دووماهی هاتیە و بەردەوام كار تێدا دهێتە كرن».
رێڤەبەرێ‌ گشتیێ‌ گەشت و گوزارا پارێزگەها دهۆكێ‌ گۆت: پرۆژێ‌ تلفریكا سەرسنك و تلفریكا چیایێ‌ گارە و ئوتێلا مەزن دگەل كۆمەلگەهەكا تەمام گەشتیاری ل ئامێدی ژی دهێتە چێكرن و ئوتێلەكا پێنچ ستێر ژی یا دهێتە چێكرن».
د. خەیری عەلی، گۆت ژی: سكرێ‌ دهۆكێ‌ ژی بەری چەند رۆژان كۆمبوونەك ل سەر هاتیە ئەنجامدان دێ‌ بیتە جهەكێ‌ گرنگێ‌ گەشتیاری، ل زاخۆ و شێخان و ئاكرێ‌ ژی پرۆژەێن گرنگێن گەشتیاری دهێنە دروستكرن و گەلەك پرۆژە یێن هاتینە گەنگەشەكرن و بووینە پلان بۆ پیشڤەبرنا كەرتێ‌ گەشتیاری ل دهۆكێ‌«.
زێدەتر گۆت: بۆ گەشت و گوزارا زڤستانێ‌ ژی كار دهێتە كرن بۆ هندێ‌ گەشتیار قەستا دهۆكێ‌ بكەن و مفا ژ گەشتیارا زڤستانێ‌ ژی بهێتە دیتن».
د. خەیری عەلی، رێڤەبەرێ گشتیێ گەشت و گوزارا پارێزگەها دهۆكێ دیار كر ژی، سەرێ چیایێ‌ زاوا پرۆژەكێ گەلەك مەزن یێ گەشتیارییە و ئەڤ پرۆژە بوویە ئەگەر گەشتیار پتر قەستا دهۆكێ بكەن، نوكە قۆناغا دوویێ ژ پرۆژێ گەشتیاریێ چیایێ زاوا دێ دەست پێكەت».
ئاشكرا كر:» ئەڤ قۆناغە پێكهاتیە ژ چێكرنا ئوتێل و موتێل و خارنگەهـ و كافتریا و گەلەك جهێن گرنگ یێن گەشتیارێ و دێ ل چیایێ زاوا هێنە دروستكرن».

ئەمیر ئەترووشی:

رێڤەبەرێ گشتیێ وەبەرهێنانێ ل ئیدارا سەربەخۆیا زاخۆ دیاركر، ئەڤ سالە حەفت پرۆژێن وەبەرهێنانێ ل زاخۆ مۆلەت وەرگرتیە و ب كوژمێ 16 ملیۆن دولاران هاتینە بجهئینان و گۆت: وەڵاتێ ئیمارات دێ پرۆژەكێ مەزن یێ چاندنێ ل ئیدارا سەربەخۆیا زاخۆ دروست كەت، ئەڤ پرۆژە دەلیڤێن كاركرنێ بۆ دوو هزار و 500 جۆتیاران پەیدا دكەت.

جەگەر خوین تاهر، رێڤەبەرێ گشتیێ وەبەرهێنانێ ل ئیدارا سەربەخۆیا زاخۆ راگەهاند، سالا 2023ێ ل ئیدارا سەربەخۆیا زاخۆ حەفت پرۆژان مۆلەتا وەبەرهێنانێ وەرگرتیە ژ وانا ژی سێ پرۆژێن پەروەردێ و دوو پرۆژێن گەشتیاری و ئێك پرۆژێ چاندنێ و ئێك پرۆژێ وەرزشی و ئەڤ پرۆژە هاتنە بجهئینان و كار ل سەر وان بەردەوامە، سەرمایێ ڤان پرۆژان دگەهیتە 16 ملیۆن دولاران و گەلەك دەلیڤێن كاركرنێ بۆ خەلكێ زاخۆ پەیدابووینە ب رێكا پرۆژێن وەبەرهێنانێ.
ئاشكرا كر، بۆ سالا 2024ێ پرۆفایلێ وەبەرهێنانێ ل ئیدارا سەربەخۆیا زاخۆ هاتیە بەرهەڤكرن و دێ 27 پرۆژە هێنە دروستكرن، ئەڤ پرۆژە هەموو دهێنە راگەهاندن د سالا بهێت دا ژ وانا ژی 12 پرۆژە دەستپێكا سالا نوی دێ بنە مۆلەت.
رێڤەبەرێ گشتیێ وەبەرهێنانێ ل ئیدارا سەربەخۆیا زاخۆ دیار كر، وەڵاتێ ئیمارات دێ پرۆژەكێ مەزن یێ چاندنێ ل ئیدارا سەربەخۆیا زاخۆ دروست كەت، ئەڤ پرۆژە دەلیڤێن كاركرنێ بۆ دوو هزار و 500 جۆتیاران پەیدا دكەت.
جەگەر خوین تاهر، رێڤەبەرێ گشتیێ وەبەرهێنانێ ل ئیدارا سەربەخۆیا زاخۆ راگەهاند، وڵاتێ ئیمارات پرۆژەیەكێ مەزن یێ وەبەرهێنانێ وارێ چاندنێ ل ئیدارا سەربەخۆیا زاخۆ دروست دكەت، نوكە دەست ب بەرهەمئینانا فاسولیان كریە و دێ گەنم شامی و نوك و باقلك دناڤدا هێنە چاندن و هەموو بەرهەم دێ بۆ ئیمارات هێنە رەوانەكرن، د ناڤ پرۆژەی دا هەتا 50 دەرچوویێن كۆلیژا چاندنێ دێ هێنە وەرگرتن.
ئاشكرا كر، ئەڤ پرۆژە دەلیڤێن كاركرنێ بۆ دوو هزار و 500 جوتیارین زاخۆ پەیدا دكەت د هەر وەرزەكێ سالی دا و ئەڤە باشترین پرۆژەیە و خەلكێ زاخۆ ژی مفاداردبن.
چیا ئەمین، رێڤەبەرێ گشتیێ گەشت و گوزارا ئیدارا سەربەخۆیا زاخۆ راگەهاند، گەلیێ زاخۆ دێ بیتە مەزنترین پرۆژێ گەشتیارێ ل ئیدارا سەربەخۆیا زاخۆ دێ پرۆژەكێ ڤەكری بیت، هەموو خزمەتێن گەشت و گوزاری دێ ناڤدا هەبن، ئەڤ جۆرە پرۆژە دێ بیتە ئەگەر خەلك پتر بۆ گەشت و گوزارێ‌ سەرەدانا زاخۆ بكەن و دێ هژمارەكا مەزن یا دەلیڤێن كاركرنێ بۆ خەلكێ پەیداكەت، نوكە كومپانیایەكێ داخواز كریە پرۆژەی بجهبینت و هێشتا پرۆژە د قوناغێن گەنگەشێ دایە».
ئاشكەرا كر، ئۆتێلێن پێنچ ستێر و خارنگەهـ و ڤەخارنگەهـ و هەر تشتەكێ گرێدایێ گەشت و گوزارێ‌ ڤە بیت دناڤ پرۆژێ گەلیێ زاخۆ دا هەیە».