زاخۆ، دلۆڤان هالۆ:

دكتۆر نەجمەددین نێروەیی، هاریكارێ ڕاگرێ كۆلیژا ئەندازیاری بۆ ڕۆژناما ئەڤرۆ دیار كر كو ب سپۆنسەریا كۆلیژا ئەندازیاری ل زانكۆیا زاخۆ و ب چاڤدێریا دكتۆر نازم سلێمان، سەرۆكێ زانكۆیا زاخۆ و دكتۆر فەرسەت حیتۆ، ڕاگرێ كۆلیژا ئەندازیاری و ب ئامادەبوونا مشیر محەمەد، دەڤەردارێ زاخۆ، سێیەمین پێشانگەها نێڤدەولەتی یا داهێنان و هزرێن نوو و بەریكانا (ئەدیسۆن) یا تایبەت ب داهێنان و داهێنەرانڤە هاتە ڤەكرن.
هاریكارێ ڕاگرێ كۆلیژا ئەندازیاری، ئاماژە ب وێ چەندێ ژی كر كو ئەڤە بۆ سێیەمین جارە ئەڤ پێشانگەهە ل سەر ئاستێ پارێزگەها دهۆكێ و دویەمین جارە ب سپۆنسەریا كۆلیژا ئەندازیاری ل زانكۆیا زاخۆ و ب پشكداریا هژمارەكا زۆر یا داهێنان و داهێنەران د بیاڤێ‌ نۆشداری و ئەندازیاری و ژینگەه و پەروەردا وەرزشی و مۆزیكێ دهێتە ڤەكرن.
دكتۆر نەجمەددین نێروەیی گۆت: «مەرەم ژ ڤێ پێشانگەهێ دروستكرنا چارچۆڤەیەكێ پەیوەندیا ڕاستەوخۆیە د ناڤبەرا داهێنەر و پشكداربوویان دا و پشتەڤانیە بۆ بزاڤا داهێنانێ ب ڕێزگرتن و خەلاتكرنا داهێنەرێن پشكداربوویی ڤە».

دلڤین رەشید:

هژمارەكا گەنجێن هەرێما كوردستانێ‌ ب نوونەراتیا ئیراقێ‌ ل وەلاتێ‌ چینێ‌ پشكداری راهێنانەكا گرنگ بوون و باوەرناما نێڤدەولەتی یا سەركردایەتیكرنا گەنجێن فیدراسیۆنا جیهانی ل وەلاتێ‌ چینێ‌ وەرگرت.
حەسەن شێخ جەمال بەرزنجی، گەنجەكێ‌ كوردە خۆجهێ‌ پارێزگەها حەلەبجەیە و ئێك ژ پشكداربوویێن راهێنانا وەلاتێ‌ چینێ‌ بوو، بۆ رۆژناما ئەڤرۆ دیار كر، ئەو ل گەل چار گەنجێن دی یێن كورد ژ هەرێما كوردستانێ‌ ب نوونەراتیا ئیراقێ‌ ل وەلاتێ‌ چینێ‌ پشكداری راهێنانەكا گرنگ بوون و گۆت: «راهێنان یا تایبەت بوو، ژبۆ ئاڤاكرنا پڕۆژەیێن گەنجان و بازرگانیا پێشكەفتی د قووناغا نووكە دا».
ناڤهاتی گۆتژی: «وەلاتێ‌ چینێ‌ د ڤێ‌ چالاكیێ‌ دا مێڤانداریا نەه وەلاتێن جودا كربوو، چونكی چینێ‌ دڤێت ئەزموونا وەلاتێ‌ خۆ ل گەل گەنجێن وان وەلاتان پارڤە بكەت، ژبۆ هندێ‌ ئەڤ گەنجە د پاشەڕۆژێ‌ دا بشێن ئەڤان جۆرە هزر و بیران بێخنە د خزمەتا وەلاتێن خۆ دا».
حەسەن زێدەتر گۆت: «مە مفایەكێ‌ باش وەرگرت، دیسا من گۆتارەكا تایبەت ژی ب جلكێن كوردی دەربارەی مێژوویا كوردستانێ‌ و رۆلێ‌ حكومەتا هەرێما كوردستانێ‌ ل ۆیراقێ‌ د ناڤا چالاكیا وەلاتێ‌ چینێ‌ دا پێشكێشكر».

هەولێر، قائید میرۆ:

پەیڤدارێ وەزارەتا ئەوقاف و كاروبارێن ئایینی یا حوكمەتا هەرێما كوردستانێ‌ ئاشكرا كر، ل سەر راسپاردەیا سەرۆكێ حوكمەتا هەرێما كوردستانێ هژمارەكا مامۆستایێن قوتابخانەیێن ئایینی ب شێوەیێ گرێبەست دێ هێنە دامەزراندن.
نەبەز ئیسماعیل، پەیڤدارێ وەزارەتا ئەوقافێ‌ بۆ رۆژناما ئەڤرۆ دیار كر، ل هەرێما كوردستانێ 21 قوتابخانەیێن ئایینی هەنە و گرێدایی وەزارەتا ئەوقافێ‌ نە و گۆت: «ل سەر راسپاردەیا مەسرور بارزانی، سەرۆكێ حوكمەتا هەرێما كوردستانێ بڕیار هاتیەدان، ئەو مامۆستایێن خۆبەخش وەكو گرێبەست بهێنە دامەزراندن، ئەڤە ژی بڕیارەكا باشە، كو مامۆستایێن قوتابخانەیێن ئایینی ژی مینا مامۆستایێن كەرتێ پەروەردێ ببنە گرێبەست و بشێن زێدەتر كارێ خۆ ل قوتابخانەیێن ئایینی بكەن».
نەبەزی گۆتژی: «هژمارا مامۆستایێن خۆبەخش ل قوتابخانەیێن ئایینی 105 مامۆستانە و د دەمێ نوكە دا مژوولی ئەنجامدانا رێكارێن دامەزراندنێینە ب شێوەیێ گرێبەست، ئەو دێ بەردەوامبن ل سەر كارێ خۆ ل قوتابخانەیێن ئایینی، هەموو پارێزگەهان و هەر جهەكێ قوتابخانەیا ئایینی یا گرێدایی وەزارەتا ئەوقاف و كاروبارێن ئایینی هەبیت؛ ڤەدگریت».

رێڤەبەریا گشتی یا وەبەرهێنانێ ل دهۆكێ مۆلەتا وەبەرهێنانێ دایە پڕۆژەیەكێ كەرتێ ساخلەمیێ، كو سەنتەرەكێ خزمەت و چارەسەریێن دەروونی یە.
پڕۆژە بناڤێ (سەنتەرێ دكتۆر عەدنان ئەسعەد)ە بۆ خزمەتێن دەروونی ب سەرمایێ ملیۆنەك و 430 هزار دۆلاران و د دەمێ‌ (36) مەهان دا دا ژ لایێ وەبەرهێنەرەكێ ناڤخۆیێ ڤە دێ‌ دهێتە بجهئینان.
ئەڤ پڕۆژە ل سەر رووبەرێ هزار و 702 مەترین دوجار دێ‌ هێتە چێكرن و دكەڤیتە دەڤەرا حەوشكێ ل دهۆكێ‌.

سندس سالح سلێڤانەیی:

هنگافتنا گیانەوەرێن بەرەلا ژلایێ هندەك شۆفێران، ب تایبەت ل سەر جادەیێن ژ دەرڤەی باژێری د زێدەبوونێ دایە و ڤێ چەندێ خەلكەك دلگرانكریە و نۆژدارەكێ ڤێتێرنەریی دبیژیت: حكومەتا هەرێمێ یاسایەك بۆ ڤێ چەندێ دانایە و هەر شۆفێرەكێ ب (ئەنقەست) گیانەوەركی بكوژیت پێدڤیە بهێتە سزادان.

ماجد عەلی، شۆفێرەكە ل سەر رێیا ئامێدیێ كاردكەت، دبیژیت: پتریا رۆژان ئەڤ دیمەنێن هوسا ئانكو گیانەوەرێن مرار ل سەر جادەیان دهێنە دیتن و جاران هەبوویە گیانەوەری مری ل نیڤا جادێ بوویە و هەر ترۆمبێلەكا دەربازبووی د سەر كەلەخێ وێ را بۆرییە و ئەڤ چەندە گەلەكا كرێتە و پێدڤیە ئەو شۆفێرێ هنگافتی هەر چو نەبیت لاشێ وی گیانەوەری بدەتە رەخەكێ جادی.
ئیسكان رێبەر، شۆفێرەكێ دی یە دبیژیت: راستە ئەڤ دیاردە یا هەی و رۆژ بۆ رۆژێ د زێدەبوونێ دا یە، چونكو رۆژانە ئەم ڤان دیمەنان ب چاڤێن خوە دبینین و پێدڤیە شۆفێر ل دەمێ هاژۆتنا ترۆمبێلێ گەلەك د هشیاربن، چونكو گیانەوەر ژی رحن و كوشتنا رحەكێ گونەها وێ یا مەزنە.
نایف حسێن، وەلاتیەكی دەبارەی وێ چەندێ دبێژیت: ژبەركو ژیانا ل ئاقاران نەمایە، لەورا گیانەوەر ژی قەستا سەنتەرێ باژێری دكەن، بۆ نموونە سەیێن بەرەلا كو رۆژانە ل پتریا تاخێن باژێری دهێنە دیتن، ئەڤ گیانەوەرە دبرسینە و بۆ خوە ل بەرمایكێن خوارنێ دگەڕن، لەورا پێدڤیە بلەز چارەیەك بۆ بهێتە دیتن، چونكو هەكە ئەو گیانەوەر برسی بوو دێ هێرشێ كەتە سەر خەلكەكی ب تایبەت ژی زارۆكان و ئەڤە چەندە ژی مەترسیەكا دی یە، چونكو بەری نوكە چەندین جاران ئەڤ چەندە روودایە و زارۆك برینداركرینە.
د: سلێمان تەتەر، كو نۆژدارەكێ ڤێتێرنەری یە، دبێژیت: راستە ل ڤێ دووماهیێ ئەڤ روودانە مشە بووینە و ب دەهان گیانەوەر ژلایێ شۆفێران ڤە ب تایبەت ل سەر جادەیێن ژدەرڤەی باژێری هاتینە هنگاڤتن و كوشتینە و شۆفێرێ خوە لێ نەكریە خودان و پێدڤیە ئەو رەوشەنبیری ل دەف شۆفێران هەبیت دەمێ ئەو گیانەوەركی د هنگاڤیت، یان ل سەر جادێ گیانەوەرەكێ مری ببینیت هەر چو نەبیت ئاگەهداریا جهێن شۆلەژێ بكەت دا بهێن راكەن و بۆ ڤێ چەندێ حكومەتێ یاسایەك دەرخستیە، ئەو ژی كو هەر شۆفێرەكێ ب (ئەنقەست) گیانەوەرەكی ب هنگاڤیت و بهێتە كوشتن ل گۆڕەی یاسایێ دێ هێتە سزادان.