جێگرێ سەرۆكێ لژنا ئاسایش و بەرگریێ ل پەرلەمانێ ئیراقێ دیار كر، لژنەك ژ هەشت پەرلەمانتارێن ئیراقێ پێكهاتیە، كو چار ژ وان پەرلەمانتاران كوردن، دێ ڤەكۆلینێ د بۆردومانا سۆپایێ پاسدارێن ئیرانێ بۆ سەر هەرێما كوردستانێ كەت، بڕیارە ئەڤرۆ ئەو لژنە سەرەدانا جهێ بوردۆمانا هەولێرێ بكەت و راپۆرتەكێ ل دۆر وێ بەرهەڤ بكەت و ڕاستیێن وێ بۆردومانێ بۆ رایا گشتی ئاشكرا بكەت.
سەگڤان سندی، زێدەتر بۆ رۆژناما ئەڤرۆ گۆت: “پەرلەمانێ ئیراقێ لژنەك پێكئینایە ژ هەشت ئەندامێن لژنا ئاسایش و بەرگرییێ كو نوونەرێن پرانییا فراكسیۆنێن پەرلەمانێ ئیراقێ د ناڤ دانە، لژنە دێ سەرەدانا هەولێرێ و ئەو مالا ژ لایێ سوپایێ پاسدارێن ئیرانێ ڤە هاتیە بۆردومانكرن كەت و راپۆرتەكێ بەرهەڤ كەت و دێ بۆ هەموو ئالیان ئاشكرا كەت، كو ئەو جهێ ئیرانێ بۆردۆمان كری، مالا وەلاتیەكێ سڤیلە و خەلكێ بێتاوان هاتینە شەهید كرن”.
ناڤهاتی گۆتژی: ئەڤرۆ 21/1/2024 ئەو لژنە دێ سەرەدانا هەولێرێ كەت و چیتە جهێ وێ بۆردۆمانێ و راپۆرتەكێ بەرهەڤ كەت، پاشی دێ وێ راپۆرتێ دەتە سەرۆكاتیا پەرلەمانێ ئیراقێ، بۆ هندێ بێختە بەرنامێ كارێ كۆمبوونێن پەرلەمانێ و بڕیار ل سەر هێتەدان، چونكی ئەو جهێ هاتیە بۆردۆمان كرن، مالا وەلاتیەكێ سڤیلە و ئەو كەسێ شەهیدبوویی بازرگانە و پەیوەندی ب چ كارێن دیترڤە نینە”.
لژنەیەكا پەڕلەمانێ ئیراقێ دێ سەرەدانا هەولێرێ كەت
نيشاندان