چاڤەڕێ‌ دهێتە كرن ل ناڤەراستا مەها شوباتا بهێت شاندەكێ‌ فیدراسیۆنا تەپا پێی بەر ب وەلاتێ‌ هنگارییا ب ڕێكەڤن ژبۆ پشكداریێ‌ د كۆمبوونا سالانە یا فیدراسیۆنا جیهانی كۆنیفا بن بۆ هەرێمێن جیهانی، ژ تەوەرێن سەرەكی یێن ڤێ‌ كۆمبوونێ‌ باس ل سەر بەرهەڤیێن هەرێمێ‌ بۆ كۆپا جیهانی كۆنیفا 2024ێ‌ و رۆلێ‌ سەرۆكێ‌ هەرێما كوردستانێ‌ ژبۆ پشتەڤانییا قارەمانیێ‌ هێنە كرن.
د داخویانیەكا تایبەت دا ئازاد محەمەد ئەندامێ‌ فیدراسیۆنا تەپا پێی یا كوردستانێ‌ بۆ رۆژنامەیا ئەڤرۆ گۆت: ب فەرمی هەر ئێك ژ تارق عەبدولرەحمان سەرۆكێ‌ فیدراسیۆنا تەپا پێی یا كوردستانێ‌ و شوان رەئووف بەرپرسێ‌ پەیوەندیان ل فیدراسیۆنا ناڤهاتی نوونەراتییا كوردستانێ‌ د كۆمبوونا سالانە و تایبەت یا فیدراسیۆنا جیهانی كۆنیفا بكەن ئەوا بڕیارا ل ناڤەراستا شۆباتا بهێت ب پشكدارییا 48 فیدراسیۆنێن پایتەختێ‌ هنگارییا بۆدابێست جیهانی مێڤاندارییا وێ‌ بكەت، هەرچەندە دێ‌ گەلەك بابەتێن كاروچالاكیێن وەرزێ‌ نوو هێنە بەحسكرن لێ‌ تەوەرێ‌ سەرەكی دێ‌ باس ل مێڤانداریكرنا هەرێما كوردستانێ‌ بۆ كۆپا جیهانی كۆنیفا 2024ێ‌ ئەوا بڕیارە ل هاڤینا ئەڤ سالە ل چەند یاریگەهێن هەرێمێ‌ بهێنە كرن، دیسان تەوەرێ‌ هەرە گرنگ رۆلێ‌ مەسرۆر بارزانی سەرۆكێ‌ حوكمەتا هەرێمێ‌ و پشتەڤانییا وی بۆ ژێرخانەیا وەرزشی ب گشتی و مێڤانداریكرنا قارەمانییا كۆنیفا 2024 ل سەر ئاستێ‌ هەلبژارتیێن هەرێمێن جیهانێ‌ كو دێ‌ بشێوەیی داتا بەحس هێتە كرن.
هەروەسان ناڤهاتی دیاركر پشتی سەرەدانا شاندەكێ‌ فیدراسیۆنا تەپا پێی یا هەرێمان كۆنیفایێ‌ بۆ كوردستانێ‌ ژبۆ دووڤچوونا بادەكا مێڤانداریا قارەمانیا جیهانی 2024ێ‌ و رازیبوون ل سەر هاتە دان هەرێما كوردستانێ‌ قارەمانیێ‌ مێڤان بكەت كو ب سەرپەرشتیا سەرۆكێ‌ فیدراسیۆنا كۆنیفایێ‌ یێ‌ سویدی پێر ئەندرێس بیلند و هەردو جێگرێن وی یێ‌ هنگاری كریستۆف ڤێنیزێل و یێ‌ رۆسیایێ‌ دیمێتری پاگاڤا ل دەستپێكا ئادارا سالا 2023ێ‌ سەرەدانا پارێزگەهێن دهۆك، هەولێر، سلێمانی و ئیدارا سەربەخوەیا زاخۆ كربوون ژبۆ دیتن و دووڤچوونا هەر پێنچ یاریگەهێن وەرزشی ل سەر ئاستێ‌ هەرێمێ‌ دگەل ژێرخانەیا وەرزشی، ئۆتێل وجهێن پێدڤی وەكو بادەكا هەرێما كوردستانێ‌، هەر ژ دیتنا دەستپێكی رازەمەندی ل سەر هاتیە كرن و كەیفخوەشیا خوە دیار كر كوردستان ژ هەموو هەرێمێن دیتر یا بەرهەڤە بۆ مێڤانداریێ‌ و گونجای ترە.
سەرۆكێ‌ حوكمەتا هەرێمێ‌ پشتەڤانێ‌ سەرەكی بوو
هەروەسان ئازاد محەمەد دیار كر مەسرۆر بارزانی سەرۆكێ‌ حوكمەتا هەرێما كوردستانێ‌ پشتەڤانیا خوە یا تەمام بۆ مێڤانداریا قارەمانیێ‌ دیار كری بوو و ئەڤچەندە ژی بوو ئەگەرێ‌ سەرەكی و مەرەم ژی زێدەتر ناساندنا هەرێما كوردستانێ‌ ب كەلەتۆر و دیرۆكا خوە بۆ هەموو هەرێمێن جیهانێ‌ بهێتە دیاركرن و كوردستان ژی حەز و ڤیانا وەرزشێ‌ هەیە.
كیش هەرێم هەڤڕكا سەرەكی یا كوردستانێ‌ بوو؟
سەرباری هەشت هەرێمان داخوازا مێڤانداریێ‌ كربوون لێ‌ هەڤڕكی د ناڤبەرا هەردو هەرێمێن كوردستانێ‌ و ترۆنگ بوو یا فێتنامێ‌ بۆ قارەمانیا هەرێمان كۆنیفا 2024ێ‌ یا دژوار بوو پشتی د كۆمبوونا دووماهیێ‌ یا سەرۆك ئێكەتیێن هەرێمێن جیهانێ‌ هاتیە كرن، لێ‌ ژێرخانە و بادەكا كوردستانێ‌ زێدەتر دەنگێن رازیبوونێ‌ وەرگرتن.
چەند هەلبژارتی دێ‌ پشكداربن؟
ل دووڤ لیستەیا بەلاڤبوویی ژ فیدراسیۆنا كۆنیفایێ‌ 48 هەلبژارتی دێ‌ هەڤڕكیێ‌ بۆ 15 پلێتنێن دەربازبوونێ‌ بەر ب قارمانییا كۆنیفایی كەن، دگەل هەلبژارتیێ‌ مێڤاندار دێ‌ بنە 16 هەلبژارتیی كو دووڤ هژمارا تیما بۆ هەموو كێشوەران هاتینە بەلاڤكرن بڤی رەنگی: ژ ئۆرۆپا شەش هەلبژارتی، ئەمریكا باشۆر دو، ئاسیا دو، ئەمریكا باكۆر ژی دو و هەر ئێك ژ كێشوەرێ‌ ئەفریقیا، ئۆقیانۆس دێ‌ پشكداربن، دگەل هەلبژارتیێ‌ مێڤان، هەرچەندە ل كێشوەریێن ئۆرۆپا، ئاسیا، ئەمریكا باشۆر و باكۆر دگەل ئەفریقا رێژا هەلبژارتیان زێدەترن لێ‌ لدووڤ سیستەمێ‌ هاتیە دیاركرن دێ‌ ئەو دناڤبەرا خوە دا ڤاڤارتنان كەن ژبۆ وەرگرتنا پلێتێن دەربازبوونێ‌.
سیستەمێ‌ قارەمانیێ‌ و مێڤانداریێ‌
فیدراسیۆنا كۆنیفایێ‌ دیار كربوو شێوازێ‌ قارەمانیێ‌ دێ‌ ل سەر چار كۆمان هێنە بەلاڤكرن و ل پێنچ یاریگەهێن باژێرێن كوردستانێ‌ هاتینە دەستنیشانكرن لێ‌ دێ‌ بڕیارا دووماهیێ‌ پشتی رازیبوون دهێتە وەرگرتن دێ‌ دیاربیت كو چاوانیا بڕێڤەبرنێ‌ و بەلاڤكرنا هەر كۆمەكێ‌ ل كێش یاریگەهێ‌ بیت.
بۆ زانین قارەمانیا كۆنیفا یا هەرێما ل سالا 2014ێ‌ دەستپێكر بوو، ئەوا هەر دو سالان جارەكێ‌ ل هەرێمەكا وەلاتێن جیهانێ‌ دهێتە رێكخستن، ئەڤ قارەمانیە دبیتە یا پێنجێ‌ پشتی دووماهی قارەمانی ل 2020 ژبەر كۆرۆنایێ‌ بۆ ماوەیێ‌ چار سالە هاتیە راوەستاندن.

قەیس وەیس:

كوڕێ‌ باژێرێ‌ دهۆكێ‌ و یاریزانێ‌ یانەیا دیفاع ئەلجەوی و هەلبژارتیێ‌ ئیراقێ‌ فەرید رەعد د نوكەدا بوویە جهێ‌ سەرنجراكێشا هەمی یانەیێن ئیراقێ‌ د خولا پلا نایابا یا یارییا باسكێت بۆلێ‌ دا، پشتی دگەل تیما خوە شیایی باشترین ئەنجام و ئاستێ‌ هونەری نیشان بدەت.
ل دووڤ ئامارێن هاتینە بەلاڤكرن تیما یانەیا دیفاع ئەلجەوییە شیایە ژ 17 یارییان 32 خالان كۆمبكەت ژ 15 سەركەفتن و دو خوسارەتیان ل سەرێ‌ لیستا خولی پلا نایابا ئیراقێ‌ یا باسكێت بۆلێ‌ بهێت وەكو ب هێزترین بەربژارا ناسناڤێ‌ وەرزێ‌ ئەڤ سالە، ئەڤچەندە ژی ڤەدگەریت بۆ پێكهاتییەكێ‌ ب هێز یێ‌ هەیی، د ناڤ ئەوی پێكهاتی دا فەرید رەعدی كوڕێ‌ باژێرێ‌ دهۆكێ‌ و هەلبژارتیێ‌ ئیراقێ‌ ئەوێ‌ شیایی ببیتە ئێك ژ باشترین یاریزانێن د خولا ئیراقێ‌ دا.
محەمەد نەجار راهێنەرێ‌ بەرنیاس و شارەزا د یارییا باسكێت بۆلێ‌ داب ۆ دەزگەهێن راگەهاندنێ‌ گۆت: فەرید رەعدی ساخلەتێن پیشەكاران ل دەڤ هەیە و ئاستێ‌ وی بەردەوام بەر ب باشتر دچیت و شیاییە ببیتە جهێ‌ سەرنجراكێشا من و هەمی یانە و چاڤدێرێن وەرزشی، ژبەر شیانێن وی و مفایی ژ درێژاهییا خوە دبینت و هێزەكا باش یا هەیی كو د ناڤ یاریگەهێ‌ دا تەكتیك و هونەر ئاستێ‌ خوە نیشان دەت و رۆلەكێ‌ مەزن بینت ب تۆماركرنا خالان بۆ تیما خوە ئینایە.
ژلایەكێ‌ دووڤە فیدراسیۆنا باسكێت بۆلا ئیراقێ‌ بۆ چار یاریێن گەڕا ئێكێ‌ یا خولا نایاب فەرید رەعدی وەكو ئێك ژ باشترین یاریزانێن یاریێ‌ هاتبوو دیاركرن و شیاییە ببیتە سەرنجراكێشا هەمی یانەیان.

رۆژنامەیێن جیهانی هەمی ل سەر ئێك بووچوون بابەتێن جودا بەلاڤكرینە تێدا ستێرێ‌ بەرازیلی و یانەیا ریال مەدرید جونیۆر ڤینیسیۆس ب سۆپەرێ‌ یارییا دووماهییا سۆپەرا ئسپانیا دانایە پشتی شیایی بسێ‌ گۆلان هاتریك ل سەر یانەیا بەرشەلۆنا بینت و ب چارگۆلان بەرانبەر گۆلەكێ‌ ریال ب ناسناڤێ‌ قارەمانیا كۆپا سۆپەرا ئسپانیا بهێتە خەلاتكرن د یارییا واندا ئەوا ل شەڤا ئێكشەمبییا بۆری ل سعۆدیێ‌ هاتییە كرن.
رۆژنامەیا دیپۆرتیڤۆ یا ناڤدار ل ئسپانی دیار كر ئاست و نیشاندانێن ستێرێ‌ ریال مەدرید ڤینیسیۆسی د یارییا بۆری دا روویێ‌ راستەقینە یێ‌ شیانێن وی دیاركرن و سۆپەرێ‌ یاریێ‌ بوو و ژ هەژی خەلاتێ‌ باشترین بوو، ژلایێ‌ خوەڤە رۆژنامەیا لیكیب یا فرەنسی دیاركر ئەو ژ هەژی خەلاتێ‌ باشترین یاریزانێ‌ جیهانێ‌ یە سەرباری گڤاشتنێن رەكەزپەرسیێ‌ شیا بهێز خوە دیاربكەت.
ژلایەكێ‌ دووڤە تۆرا دیڤنسا سێنترال دیاركر سەرۆكێ‌ یانەیا ریال مەدرید فلۆرنتینۆ پێرێز پیرۆزباهییا ڤینیسیۆسی كر و گۆتێ‌ دێ‌ بییە باشترین یاریزانێ‌ جیهانێ‌ هیڤییە بەردەوامی ل سەر شیانێن خوە.

ل ئەینییا بۆری هەڤڕكیێن كۆپا ئاسیا 2023ێ‌ ل یاریگەهێن قەتەر هاتنە كرن ئەوا ب پشكدارییا 24 هەلبژارتییان كو دهێتە هژمارتن بۆ جارا سێیێ‌ یە وەلاتەكێ‌ ئاسیایی مێڤاندارییا كۆپا ئاسیا بكەت پشتی سالێن 1988 و 2011ێ‌، ژ ریكۆردێن دیرۆكی د هەڤڕكیێن قارەمانییا كێشوەری دا هاتینە تۆماركرن.
هەلبژارتیێ‌ چاپانێ‌ خودانا زوورترین ناسناڤا یە ب چار جاران ئەوژی 1992، 2000، 2004 و 2011، دووڤدا هەردو هەلبژارتیێ‌ ئیرانێ‌ و سعۆدیێ‌ هەرئێك سێ‌ ناسناڤ دەستڤە ئیناینە، كوریا باشۆر دو ناسناڤ، هەر ئێك ژ ئیراق، قەتەر، ئوسترالیا، كوێت و ئیسرئیلێ‌ ناسناڤەك هەیە، یێ‌ ئیرانی عەلی دائی سەرێ‌ لیستا گۆلكەرێن دیرۆك یێ‌ كۆپا ئاسیا دهێت ب14 گۆلان، بلەزترین گۆل د كۆپایێ‌ دا ژلایێ‌ هێرشبەرێ‌ ئیماراتی عەلی مەبخۆت بووە د چركا 14ێ‌ دا گۆل ل سەر هەلبژارتیێ‌ بەحرەین ئینا بوو د كۆپا ئاسیا 2015ێ‌ دا ژ چارچووڤەیێ‌ كۆمان بوو، بۆ زانین ئەڤ یاریزانە دێ‌ دكۆپا قەتەر ژی دا پشكداربیت، هەروەسان هەلبژارتیێ‌ ئیرانێ‌ خودانا نمرەیا پیڤایە ب سەركەفتنان كو ژ68 یارییان 41 سەركەفتن تۆماركرینە.