ب شێوەكێ‌ فەرمی كارگێرییا یانەیا دهۆك یا وەرزشی د. رابیت هاشم وەكو راهێنەرێ‌ تیما خوە یا تەپا پێی ئەوا پشكدار د خولا پلا نایابا كوردستانێ‌ دا ل جهێ‌ راهێنەرێ‌ بەرێ‌ حسێن عەبدوللا هاتە دەستنیشانكرن كو گرێبەستا وێ‌ دێ‌ بۆ دو وەرز و نیڤا بیت.
ل دۆر ڤێ‌ یەكێ‌ د. رابین هاشم راهێنەرێ‌ نوو بۆ رۆژنامەیا ئەڤرۆ گۆت: سۆپاسییا كارگێرییا یانەیا دهۆكێ‌ دكەم كو ئەڤ باوەرییە دایە من و ب ئەركەكێ‌ مەزن دگەل یانەیا دایك راسپاردین ب هیڤییا وێ‌ یەكێ‌ دگەل پشتەڤانییا یانەیێ‌ بشێن خزمەتا تیما خوە بكەین و ناڤێ‌ تیمێ‌ دۆبارە ڤەگەڕینە ئاستێن بلند، پێنەڤێت ئەركێ‌ من ب سانەهی نابیت ژبەركو دێ‌ تیمەكێ‌ وەرگرم ژلایێ‌ دەرۆنی و ئاستی ڤە پێدڤیت ب گوهۆڕینی و كارەكێ‌ رژدی ل سەر بهێتە كرن، د نوكە دا ئەز یێ‌ ل وەلاتێ‌ دەرڤە ل حەفتییا بهێت دێ‌ دەست ب ئێكەم یەكا خوە یا راهێنانێ‌ كەم ب كۆمەكا پلان و هزرێن باشتر بۆ تیمێ‌.
هەروەسان ناڤهاتی گۆت: ئەو ئاست و ئەنجامێن تیمێ‌ هەتا نوكە د خولا كوردستانێ‌ دا پێدڤی ب گوهۆڕینێ‌ و بێهنفرەهێ‌ هەنە ژبەركو رەوشا وێ‌ یا باش نینە و گڤاشتنا دەرۆنی ژی ل سەر یاریزانان و كارگێریێ‌ یا هەیی، لەوما پێدڤی ب هەدارێ‌ و بێهنفرەهێ‌ هەیە، من دووڤچوونا تیمێ‌ یا كری ژ هەمی لایەكی ڤە و پێدڤی ب بهێزكرن و گوهۆڕینان هەیە تایبەت یێن هێلێن بەرەڤانی، ناڤین و هێرشبرنێ‌ و یا ژ هەمیێ‌ گرنگتر گوهۆڕینا شێوازێ‌ یارییا تیمێ‌ یە كو ئەڤە ژی دەم بۆ دڤێت، لێ‌ گەشبینم ب هاریكارییا هەڤالێن خوە و پشتەڤانییا كارگێریێ‌ دێ‌ شێن تیما خوە ڤەگەڕینە زلهێزییا جاران.
بۆ زانین راهێنەر رابین هاشم باوەرنامەیا دكتۆرایێ‌ د بوارێ‌ راهێنانێن وەرزشی ل زانكۆیا پەروەردەیا وەرزشی یا ئۆكراینێ‌ ل سالا 2020 دەستڤەئینایە، باوەرنامەیاUEFA DIPLOMA ل فیدراسیۆنا تەپا پێی یا ئۆرۆپا وەرگرتیە، راهێنەرێ‌ چەندین ئەكادیمیێن جودا ل ئۆكراینێ‌ بوویە ل سالێن 2015-2020، هەروەسان راهێنەرێ‌ یانەیا گارە بوو ل2021-2022، رێڤەبەرێ‌ هۆنەری یێ‌ یانەیا رۆیال ئادمینتۆن 2022، رێڤەبەرێ‌ هۆنەری بۆ یارییا تەپا پێی یا رێكخراوا health section communityبوویە، هەڤالبەندی دگەل چەندین یانەیێن ئۆرۆپا كرییە.

عەلی حاجی:

د داخویانیەکێ دا سکرتێرێ یانه‌یا زاخۆ یا وەرزشی بۆ رۆژنامه‌یا ئەڤرۆ دیار کر ژبۆ ڤەگەڕاندنا سێ خالان دێ بەر ب دادگەها نێڤدەلەتی ڤە چن پێخه‌مه‌ت وه‌رگرتنا مافێ خوه‌.
زێدەتر هشیار شەهباز گۆت: سەرۆکێ یانه‌یا زاخۆ کارێ وی ب خوە پارێزەری یە لەوما ب ڕێیا دەستەیا کارگێریا یانا زاخۆ یا وەرزشی هاتە ڕاسپاردن کو ئەو زویترین دەمدا بەر ب سوێسرا ڤە بچیت دا سکالایێ ل سەر فیدراسیونا تەپا پێی یا ئیراقێ تومار بکەت ژبەر نه‌حه‌قییا ل سه‌ر تیما مه‌ هاتیه‌ کرن و سێ خالێن یارییا مه‌ به‌رانبه‌ر یانا شورتە ژ مه‌ هاتیه‌ ستاندن، هەرچەندە پێشتر ژلایێ هەمان فیدراسیونڤە سێ خال بۆ یانه‌یا زاخۆ هاتبوونە دان، هەلوەشاندنا ئه‌ڤێ بڕیارێ ب نە دروست دبینین د دەرحەقێ یانه‌یا زاخۆ دا و هەمی بەلگە ژی هەنە کو دێ سەلمینت مافێ زاخۆیە سێ خال ب وان بهێتە دان و ئەو دادگەها شیایی مەزنترین یانەیا ئۆرۆپا و ئیتالیا سزا بدەت دێ شێت یانەیەکا وەکو شورتە ژی سزا دەت، بریارا هاتیە هەلوەشاندن ژی هەمی ئەندامێن وێ لژنەیێ ئیمزا ل سەر نەکریە و ئەو ژی بەلگەیەکێ گرنگە د دەستێن مە دا و هەر دیسان لێدوانا سەرۆکێ فیدراسیونا ئیراقێ یا تەپا پێی ژی ل بەر دەستێ مەیە کو دیار دکەت ئەو د خەلەت بوون د رێنمایان دا.
ناڤبری گۆت ژی: ئەم جەماوەرێ خوە پشتراست دکەین ئەم بێ دەنگ نابین ل سەر مافێ خوە و دێ داخازا مافێ خوە کەن ژبەرکو یانه‌یا زاخۆ ژ هەژی سێ خالێن یاریێ یە.

ب دووماهی هاتنا یاریێن قۆناغا ئێكی یا خولا فوتسالا كوردستانێ‌ ل سەر ئاستێ‌ كچان، هەردو نوونەرێن پارێزگەهێ‌ و ئیدارا سەربەخوەیا زاخۆ سەرێ‌ لیستا كومێن ئێكێ‌ و دویێ‌ دهێن و گەشبینی بۆ دەربازبوون بەر ب قۆناغا چارگۆشەیا زێرین گەشتر لێ كرییە.
ژ چارچووڤەیێ‌ كۆما ئێكێ‌ دا ئەوا چار یانە پشكدارن ئافرەتێن دهۆك شیاییە سێ‌ سەركەفتنان ل دووڤ ئێك بینت ئەوژی دگەل هەر ئێك ژ كچێن سۆران 3-1 گۆلان، دگەل خەلاتی پێنجوین 12 گۆلان بێ‌ بەرانبەر، د یارییا سێیێ‌ دا سەركەفتن ل سەر كچێن هەلەبجەیا شەهید ب نەهـ گۆلان بێ‌ بەرانبەر، گۆلكەرێن تیما دهۆكێ‌، سیپەل شوكر 10 گۆل، یوسرا ئیبراهیم حەفت گۆل، مەروا جیان شەش گۆل، مینا سەرحان گۆلەك.
د داخویانیەكێ‌ دا بۆ رۆژنامەیا ئەڤرۆ خەیری ئەحمەد راهێنەرێ‌ دهۆكێ‌ دیاركر بوو كو بزاڤێن وان نە بتنێ‌ بۆ چارگۆشەیا زێرینە بەلكو دێ‌ هیڤی و ئارمانجێن خوە كەنە دەستكەفتەكێ‌ ژ هەژی بۆ پارێزگەها دهۆكێ‌ و ئەڤ پێنگاڤە ژی ب پشتەڤانییا پارێزگارێ‌ دهۆكێ‌ و كارگێرییا یانەیێ‌ و زاخا بلند یا یاریزانێن مە دێ‌ بیتە بەرهەم.
ژلایێ‌ خوەڤە ژی كچێن یانەیا زاخۆ ژی ل سەر لیستا كۆما دویێ‌ دهێن ب كۆمكرنا حەفت خالان ژ دو سەركەفتن و وەكهەڤیەكێ‌ بڤی رەنگی، سەركەفتن ل سەر رەواندۆز ئینابوو ب دو گۆلان بێ‌ بەرانبەر، دیسان ب هەشت گۆلان بەرانبەر گۆلەكێ‌ سەركەفتن ل سەر كچێن چەمچەمال ئینا، دگەل سیروانی هەلەبجە وەكهەڤبوو ب دو گۆلان.
ژلایێ‌ خوەڤە د داخویانیەكێ‌ داه شیار شەهباز سكرتێرێ‌ یانەیا زاخۆ بۆ رۆژنامەیا ئەڤرۆ دیاركربوو كو وەرزێ‌ ئەڤ سالە پشكدارییا تیما وان بۆ دەستڤە ئینانا ناسناڤی یە و ئارمانجا مە دێ‌ ئەو بیت، بۆ ڤێ‌ یەكێ‌ ژی مە هەر زوو دەست ب بەرهەڤییان كربوو.
بۆ زانین د كۆما ئێكێ‌ دا ئافرەتێن دهۆك ب نەهـ خالان سەرێ‌ لیستێ‌ دهێت، سۆران شەش خالان رێزا دویێ‌، هەلەبجەیا شەهید سێ‌ خال كۆمكرینە رێزا سێیێ‌ و خەلاتی پێنجوین بێ‌ خال رێزا چارێ‌ دهێت، د كۆما دویێ‌ دا زاخۆ سەرێ‌ لیستێ‌ دهێت ب حەفت خالان، سیروانی هەلەبجە ب هەمان خال كێمترییا چار خالان رێزا دویێ‌ دهێت، رەواندۆز سێ‌ خالان رێزا سێیێ‌ دهێت و چەمچەمال بێ‌ خال رێزا دووماهیێ‌ دهێت، بڕیارە دو تیم ژ هەر كۆمەكێ‌ دەربازبنە قۆناغا چارگۆشەیا زێرین و یاریێن وان بشێوەیی هاتنۆچوون بهێتە كرن.

د داخویانیەكێ‌ دا سەرۆكێ‌ یانەیا تەناهی یا وەرزشی دیار كر ژبەر كاودانێن دارایی یێن نەخۆش و چاڤەڕێ‌ بوونەكا درێژ یا پشتەڤانیێ‌، ئەگەر هەیە هەتا دەستپێكا حەفتییا بهێت تیما مە یا تەپا پێی د خولا پلا ئێكا كوردستانێ‌ دا بەردەوامیێ‌ نەدەتە پشكداریێن خوە.
زێدەتر جاسم شەعبان بۆ رۆژنامەیا ئەڤرۆ گۆت: هەرچەندە بەری دەستپێكا وەرزێ‌ نوو یێ‌ خولا پلا ئێكا كوردستانێ‌ ب سۆپاسی ڤە پارێزگارێ‌ دهۆكێ‌ گەشبینی دامە ژبۆ پشتەڤانییا دارایی ل تیما مە یا تەپا پێی، لەوما مە دەست ب بەرهەڤییان كرن و پێكهاتیێ‌ تیما خوە راگەهاندن، ئەڤە بۆ دو مەهە ئەم چاڤەڕێ‌ پشتەڤانییا دارایی نە و گەشبینن دێ‌ پارێزگارێ‌ دهۆكێ‌ بۆ یانەیان فرێكەت، لێ‌ ژبەركو گڤاشتنێن یارییان و داخوازیێن یاریزانان و كادرێ‌ راهێنانێ‌ بۆ وەرگرتنا مافێ‌ خوە ئەم نەشیاینە بەرهەڤ بكەین و پشت گەرمییا مە ب پشتەڤانییا پارێزگارێ‌ دهۆكێ‌ یە.
هەروەسان ناڤهاتی گۆت: یانەیا تەناهی پێدڤی ب نێزیكی 22 ملیۆن دیناران هەیە بۆ مووچەیێن یاریزانان و كادرێ‌ راهێنانێ‌ و فەرمانبەرێن دگەل كار دكەن و هەروەسان ئەو دەمێ‌ تیما مە د چیتە ژ دەرڤەیی پارێزگەهێ‌ بۆ ئەنجامدانا یارییا خوە پێدڤی ب ئۆتێل، خارن و كرییا ترۆمبێلا پاسێ‌ و چەند پێدڤیین دی، دیسان نێزیكی پێنچ ملیۆنان ئەم قەردارێن زانكۆیا دهۆكێ‌ نە ژبەر یاریگەها وێ‌ كو ئەم راهێنان و یارییان ل سەر ئەنجامدەین.
ژلایەكێ‌ دووڤە ناڤهاتی گۆت: ئەڤە هەموو مەزاختیێن پێدڤی نە و ئەم چاڤەڕێ‌ ئەوێ‌ پشتەڤانیێ‌ نە ئەوا دێ‌ بۆ مە هێتە كرن ژبۆ چارەكرنا ئەڤان پێدڤییان، لێ‌ هەنە پشتەڤانی نە هاتە كرن ئەم نەچارین هەتا ئێكشەمبییا بهێت بڕیارا خوە ڤەكێشانێ‌ بدەین، ژبەركو پرانییا یاریزانێن مە پێدڤی ب مووچەیی خوە نە و ئەو دخوازن هەكە نە هاتە دان ئەو دێ‌ یانێ‌ بجه هێلن و بەر ب یانەیێن دی چن تایبەت د نوكە دا دەرگەهێ‌ ڤەگۆهاستنا یاریزانان هاتیە ڤەكرن و ئەڤە مافێ‌ وانە، لەوما هیڤییا مە ئەوە ژ بەرێز د. عەلی تەتەر پارێزگارێ‌ دهۆكێ‌ ئاریشەیا مە چارەسەربكەن و نەهێلین تیما مە تووشی مەزنترین شكەستن بیت و بڕیارا خوە ڤەكێشانێ‌ بدەت.

قەیس وەیس:

بڕیارە ئەڤرۆ و سوبەهی هەشت یاری ژ چارچووڤێ‌ هەڤڕكیێن گەڕا 15ێ‌ یا خولا پلا نایابا كوردستانێ‌ یا تەپا پێی بهێنە ئەنجامدان، یانەیێن پارێزگەهێ‌ دێ‌ شەڕی بۆ سەركەفتنان كەن پێخەت باشتكرنا هەلوەستێ‌ خوە د رێزبەندیێ‌ دا ئەو هەمی یاری دێ‌ ل دەمژمێر دو یێ‌ پشتی نیڤرۆ هێنە كرن.
د یارییەكا پڕی هەڤڕكی دا بڕیارە ئەڤرۆ تیما یانەیا ئاكرێ‌ دناڤ ئەرد و جەماوەرێ‌ خوە دا مێڤاندارییا یانەیا چوارقۆرنە بكەت ب هیڤیێن سەركەفتنێ‌، كوڕێن پایتەختێ‌ نەورۆزێ‌ پێشەنگییا رێزبەندییا خولێ‌ دا نە ب 26 خالان ژ هەشت سەركەفتن، دو وەكهەڤی و چار خوسارەتی، مێڤانا وێ‌ هەڤڕكا وێ‌ یە ب جوداهییا دو خالان رێزا سێیێ‌ دهێت، ئاكرێ‌ ب سەرپەرشتییا كوڕێ‌ باژێرێ‌ خوە هەژار سابری د شەش یاریێن بۆری دا پێنچ سەركەفتن هەبووینە و ئێك خوسارەتی دێ‌ بزاڤێ‌ كەن ڤەگەڕێنە سەركەفتنان و سەرێ‌ لیستێ‌ پارێزین، بەرانبەر دا تیما چارقۆرنە بتنێ‌ دو خوسارەتی هەنە و دێ‌ بزاڤێن وان بۆ بەردەوامییا ئەنجامێن باش بیت.
ژلایێ‌ خوەڤە تیما یانەیا دهۆك سوبەهی دێ‌ ل یاریگەها خوە مێڤاندارییا یانەیا هندرین كەت، ئەلهۆیێن چیا د كاودانەكێ‌ خراب داییە ب ئاست و ئەنجامێن خوە یێن خولێ‌ دا ئەوا نوكە ب14 خالان ژ سێ‌ یەركەفتن پێنج وەكهەڤی و شەش خوسارەتی هەین رێزا14ێ‌ دهێت، یارییا سوبەهی دبیت یا دووماهیێ‌ بیت بۆ راهێنەرێ‌ وێ‌ حسێن عەبدوللا پشتی هاتیە راگەهاندن د. رابین هاشم ل جهێ‌ وی هاتییە دەستنیشانكرن، د بەرانبەر دا تیما هندرین ب16 خالان رێزا 10ێ‌ دهێت.
هەروەسان بڕیارە سوبەهی تیما یانەیا زاخۆ ل پارێزگەها سلێمانیێ‌ ببیتە مێڤانا یانەیا دەربەندیخان د یارییەكا هەڤڕكی و ئێكلاكرنا هەڤپشكییا خالانن ژبەركو دەربەندیخان و زاخۆ هەر ئێك 20 خال هەنە رێزێن شەشێ‌ و حەفتێ‌ دهێن، كوڕێن خابووری دێ‌ بزاڤێ‌ كەت سەركەفتنا پێنجێ‌ بینت بەرانبەر هەشت وەكهەڤی و دو خوسارەتییان.
ژ یاریێن دی یێن ئەڤرۆ، سۆران- شەقلاوە، هەولێر- ئارارات، برایەتی- سیرۆانی نوو، یاریێن سوبەهی، ڕانیە- سەید سادق، پێشمەرگەیا هەولێر- شێرۆانە.

چاڤەڕێ‌ یە ل ئەینییا بهێت هەڤڕكیێن چاپا 17ێ‌ یا كۆپا ئاسیا یا تەپا پێی ل وەلاتێ‌ قەتەر بهێتە ئەنجامدان ئەوا دێ‌ 24 وەلاتێن كێشوەرێ‌ ئاسیا دێ‌ پشكداریێ‌ تێدا كەن و هاتینە بەلاڤكرن ل سەر شەش كۆمان، یاریێن وان هەتا 10ی شۆباتا بهێت بەردەوامن، د سیستەمێ‌ كۆمان دا رۆژانە سێ‌ یاری دێ‌ هێنە كرن.
هەلبژارتیێن پشكدار:
كۆما ئێكێ‌: قەتەر، چین، تاچاكستان، لوبنان.
كۆما دویێ‌: ئوسترالیا، ئۆزپاكستان، سوریا، هند.
كۆما سێیێ‌:ئیران، ئیمارات، هۆنگ كۆنگ، فلەستین.
كۆما چارێ‌: چاپان، ئیندۆنیسیا، ئیراق، فێتنام.
كۆما پێنجێ‌: كوریا باشۆر، مالیزیا، بەحرەین، ئوردن.
كۆما شەشێ‌: سعۆدیە، تایلەند، قێرغێزستان، عومان.
یاریێن رۆژا ئەینی و شەمبییا بهێت
دەمژمێر حەفت شەشڤ هەلبژارتیێ‌ قەتەر مێڤاندارا قارەمانیێ‌ دێ‌ هەلبژارتیێ‌ لوبنان مێڤان كەت.
ل رۆژا شەمبی، ئوسترالییا- هندستان دەمژمێر 2:30 نیڤرۆ، هەروەسان چین- تاچاكستان دەمژمێر 5:30 مەغرەب، یارییا سێیێ‌ ئۆزپاكستان- سوریا ل دەمژمێر 8:30 شەڤ هێتە كرن.
بۆ زانین هەلبژارتیێ‌ ئیراقێ‌ دێ‌ یاریێن خوە بڤی شێوەیی كەن، ل15 ڤێ‌ مەهێ‌ بەرانبەر ئەندونیسیا دەمژمێر5:30 كەت، ل19ڤێ‌ كەهێ‌ بەرانبەر چاپان دەمژمێر 2:30 پشتی نیڤرۆ، یارییا سێیێ‌ ل 24ێ‌ ڤێ‌ مەهێ‌ بەرانبەر فێتنام دەمژمێر 2:30 نیڤرۆ كەت.
بۆ زانین هەلبژارتیێ‌ چاپان خودان چار ناسناڤە، هەر ئێك ژ سعودیێ‌، ئیران سێ‌ ناسناڤ هەنە، كوریا باشۆر دو ناسناڤ، هەر ئێك ژ ئیراق، قەتەر، ئوسترالیا، كوێت و ئیسرئیلێ‌ ناسناڤەك یێ‌ هەی.