ب دووماهی هاتنا یاریێن گەڕا 10ێ‌ ژ هەڤڕكیێن خولا پلا نایابا كوردستانێ‌ یا تەپا پێی، هەلوەست و ئاستێ‌ یانەیێن پارێزگەهێ‌ ژێكجودانە، یانەیا ئاكرێ‌ بەردەوامە ب ئاست و ئەنجامێن باش بڕێڤە دچیت و زاخۆ بادەكا لیستەیا خوە بێ‌ خوسارەتی دەربازكرییە و دهۆك بەردەوامە ل سەر تۆماركرنا ئەنجامێن لاواز.
تیما یانەیا ئاكرێ‌ بەردەوامە ل سەر ئەنجامێن خوە یێن باش ب سەركێشییا كوڕێ‌ باژێرێ‌ خوە هەژار سابری ئەوێ‌ ل جهێ‌ راهێنەرێ‌ بەرێ‌ یێ‌ سوری یونس سلێمان و شیا پشتی وەرگرتنا تیمێ‌ و بۆرینا سێ‌ یارییان سێ‌ سەركەفتنان ل دووڤ ئێك بینت دگەل هەر ئێك ژ هندرین 1-چنە، سەیدسادق 1-چنە و دهۆكێ‌ 2-چنە، ژ رێزبەندیا 12 پێشڤە بهێتە رێزا سێیێ‌ ب 17 خالان ب پێنج سەركەفتن، دو وەكهەڤی و سێ‌ خوسارەتییان.
تیما یانەیا زاخۆ هەتا نوكە شیاییە بۆ ماوەیێ‌ زێدەتر 900 خولەكان بادەكا خوە یا رێزبەندییا خولێ‌ پارێزیت ژ خوسارەتییان و زوورترین وەكهەڤی هەنە كو حەفت جاران وەكهەڤبوویە و سێ‌ خوسارەتی هەنە ب16 خالان رێزا پێنجێ‌ دهێت، دیسان كێمترین گۆل ل سەر هاتینە تۆماركرن ئەوژی چار گۆلن بەرانبەردا حەفت خول ل سەر هاتینە كرن.
تیما تەپا پێی یا یانەیا دهۆك بەردەوامە ل سەر ئانجامێن خوە یێن خراب پشتی د دوماهی یارییا خوە دا دگەل یانەیا ئاكرێ‌ ب دو گۆلان خوسارەت بوویی كو دبیتە خوسارەتییا چارێ‌ د خولێ‌ دا بەرانبەر چار وەكهەڤی و دو سەركەفتنان، هەروەسان زوورترین گۆل ل سەر تیما دهۆكێ‌ بووینە د خولێ‌ دا كو گەهشتینە 17 گۆلان، د نوكە دا ب 10 خالان رێزا 13ێ‌ دهێت، ئەڤ ئەنجامە بوویە جهێ‌ نە رازیبوونا پشكەكا جەماوەرێ‌ یانەیێ‌ و داخوازا گوهۆڕینا راهێنەر و دووڤچوونا یاریزانان ژ كارگێریێ‌ دكەن.
هەلوەستێ‌ گشتی بڤی شێوەیە، سیرۆانی نوو ب19 خالان سەرێ‌ لیستێ‌ دهێت، پێشمەرگەیا هەولێر و ئاكرێ‌ هەر ئێك 17 خالان رێزێن دویێ‌ و سێیێ‌ دهێن، چوارقۆرنە ب16 خالان و زاخۆ ب هەمان خال رێزێن چارێ‌ و پێنجێ‌ دهێن، رانیە ب14 خالان، دەربەندیخان ب15خالان رێزا شەشێ‌ و هەمان خال و شێروانە رێزێن حەفتێ‌ و هەشتێ‌ دهێن، هندرین 13 خال، ئارارات 12 خال، سۆران 11خال، سەیدسادق 11خال، دهۆك 10 خال، برایەتی10 خال، هەولێر و برایەتی ب هەشت خالان رێزێن نەهێ‌ هەتا 16 ل دووڤ ئێك دهێن.

د داخویانیەكێ‌ دا سەرۆكێ‌ فیدراسیۆنا تەپا مێزێ‌ یا كوردستانێ‌ دیار كر خولا پلا نایاب ل سەر ئاستێ‌ كچان و كوڕان ب باشترین شێوە و هەڤڕكییەكا دژوار ل پارێزگەها دهۆكێ‌ هاتە كرن و پتر ژ پلانەكێ‌ بۆ پشكەفتنا ڤێ‌ یاریێ‌ دانایە.
زێدەتر ئێحسان حەسەن بۆ رۆژنامەیا ئەڤرۆ گۆت: ل دووڤ بەرنامەیێ‌ سالانە یێ‌ فیدراسیۆنا تەپا مێزێ‌ ل كوردستانێ‌ پێخوەشحالین ب سەركەفتیانە شیاین دووماهی چالاكییا خوە یا سالا 2023ێ‌ ب سەركەفتیانە بڕێڤەببەین ئەوا ل سەر ئاستێ‌ كوڕان و كچان بۆ خولا پلا نایاب پشكدارییا 10 یانەیان هاتیە رێكخستن و تێدا دیاربوو هەڤڕكییەكا دژوار دناڤبەرا یانەیێن پشكدار هەتا چركەیا دووماهیێ‌ هەبوو و ئەڤە ژی ئاماژەیێ‌ وێ‌ چەندێ‌ ددەت مە یاریزانێن خودان شیان هەنە.
هەروەسان ناڤهاتی گۆت: نە بتنێ ئەڤ خولە بەلكو مە پلانێن باشتر و پتر هەنە كو رەوشا ڤێ‌ وەرزشێ‌ بەر ب باشتر ببەین و پێشبێخین تایبەت بۆ سالا بهێت ژ وانا دانانا خولێن راهێنانێ‌ و یێن دادڤانیێ‌ تایبەت بۆ پارێزگەها دهۆكێ‌ ژبەركو گەلەك پێدڤی بێ‌ هەیە، هەروەسان ئینانا شارەزایێن ڤێ‌ یاریێ‌ ژ وەلاتێن دەرڤە بهێنە كوردستانێ‌ پێخەمەت دانانا قوتابخانەیان بۆ یاریزانێن ژیێن جودا و نێزكترین شارەزا ژی ل وەلاتێ‌ ئیرانێ‌ كو بەری نوكە مە سەربۆرێن سەركەفتی دگەل هەنە و هەتا نوكە چەندین یاریزانێن مە ل سەر دەستێ‌ وان رابووینە و قارەمانن، لێ‌ هەكە پشتەڤانی هەبیت دێ‌ شێن ئەڤان پێنگاڤێن باش دگەل چەندین پلانێن دی كار پێكەین و هەروەسان خولا پلا نایاب ل شوونا ئێك قۆناغ دێ‌ بیتە دو قۆناغ و زێدەتر هەڤڕك و پێشكەفتن پەیدابیت
ژلایەكێ‌ دووڤە سەرۆكێ‌ فیدراسیۆنا كوردستانێ‌ گۆت: بۆ سالا بهێت ل دووڤ بەرنامەیێ‌ مە ل شۆباتا 2024ێ‌ دێ‌ خولا پلا دو یا كوردستانێ‌ هێتە رێكخستن، ب هیڤی نە سالەك بیت كاودانێن دارایی ل كوردستانێ‌ بەر ب باشتر بچیت و ئەم و هەمی كەرتێن دی بشێن زێدەتر پێشكەفتنێ‌ و خزمەتا وەرزشا كوردستانێ‌ بكەت.
بۆ زانین ل شەمبییا بۆری قارەمانیا هەرێما كوردستانێ‌ ب دووماهی هاتبوو و ئەنجام بڤی رەنگی بوون، ل سەر ئاستێ‌ كوڕان، سلێمانی بوو قارەمان، ئاشتی رێزا دویێ‌، ئەكاد عەنكاوە رێزا سێیێ‌ و دهۆك ل رێزا حەفتێ‌ هات، ل سەر ئاستێ‌ كچان، پەیام رێزا بوو قارەمان، ئەكاد عەنكاوە رێزا دویێ‌ و دهۆك رێزا سێیێ‌ هات.

قەیس وەیس:

فیدراسیۆنا تەپا پێی یا كوردستانێ‌ چەند بڕیار و راسپاردێن نوو د دووماهی كۆمبوونا خوە یا ئاسایی دەركرن پشتی دووڤچوونا راپۆرتێن سەرپەرشتیارێن چەند یارییان كرین، ژ پێشچاڤترین بڕیارێن وان سزایێن دارایی ل سەر یانەیا زاخۆ و هاریكارێ‌ راهێنەرێ‌ دهۆكێ‌ بوون.
هەروەسان فیدراسیۆنا تەپا پێی پەسەندكرنا لژنەیا نوو یا دادڤانێن كوردستانێ‌ كو پێكهاتی بوون ژ، كرێكار زەرار سەرۆك لژنە، نەوزاد سالد جێگرێ‌ سەرۆكی، هەر ئێك ژ د. ئەحمەد جەلال، شێروان فارۆق و سۆران ئەحمەد ئەندام، هەردیسان عەبدوللا عابد ژ پارێزگەها دهۆكێ‌ ئەندامێ‌ لژنەیا دادڤانان.
ژلایەكێ‌ دووڤە پشتی دووڤچوونا راپۆرتێن سەرپەرشتیاریێن یاریێ‌ و دادڤانان، بڕیار هاتە دان ب سزادانا هاریكارێ‌ یانەیا دهۆك عامر ئیسماعیل ب كۆژمەیێ‌ 250 هزار دیناران ژبەر وەرگرتنا كارتا سۆر ژلایێ‌ دادڤانێ‌ یارییا دهۆك و دەربەندیخان، هەروەسان ب هەمان سزا بۆ سەرپەرشتیارێ‌ یانەیا دەربەندیخان عادل محەمەد هاتە دان، ژلایەكێ‌ دووڤە فیدراسیۆنا تەپا پێی یانەیا زاخۆ ب 500 هزار دیناران سزادا پشتی ب شێوەكێ‌ راستەوخۆ یارییا تیما خوە دگەل پێشمەرگەیێ‌ هەولێر ژ گەڕا نەهێ‌ د پەیچێ‌ فەرمی دا ڤەگۆهاستی و هەكە دوبارە بو ودێ‌ سزا توند تربیت و ئەڤچەندە ژی سەرپێچییە ل سەر رێنمایێن ڤەگۆهاستنا یاریێن خولا كوردستانێ‌.

عەلی حاجی:

بۆ سالا پێنجێ لدووف ئێک ناڤەندا بلند ل زاخۆ یا ئێکەتیا لاوێن دیموکراتا کوردستانێ ب ئامادەبوونا د. پشتیوان سادق باشترین یاریزانێن زاخۆ ل سەر ئاستێ تیمێن مللی دەستنیشان کرن.
د داخویانیەکێ دا حکمەت محەمەد بەرپرسێ ناڤەندا زاخۆ بۆ رۆژناما ئەڤرۆ گۆت: ب ئامادەبوونا د. پشتیوان سادق بەرپرسێ مەکتەبا رێکخستنا پارتی ل پارێزگەها دهوکێ و بۆ سالا پێنجێ یە ل دووف ئێک ئەم رادبین ب دەستنیشان کرن باشترین یاریزان ل سەر ئاستێ پێگەهشتی، لاوان، تازەپێگەهشتیان و هەر دیسان باشترین گولکەر و راهێنەر و بەرەڤان و گولپارێز ژی ل سەر ئاستێ تیمێن مللی ل زاخۆ دهێنە دەست نیشان کرن و خەلات کرن،د رێورەسمەکێ تایبەت دا باشترینێن ئەڤ سالە هاتنە دەستنیشان کرن و خەلات کرن،ب دەست نیشان کرنا وان باشترین یاریزانان ژی دەرفەتەک باش پەیدا دبیت کو ئەو یاریزانە بگەهنە دناڤ رێزێن تیمێن یانەیا زاخۆ دا و پشتەڤانیەکا باش ژی بۆ وی یاریزانی پەیدا دبیت،بێگومان دەست نیشان کرنا باشترین یاریزانان ژی ل سەر هندەک پیڤەرایە و ژلایێ لژنەیەکا تایبەتمەند ڤە دهێنە دەست نیشان کرن.
ناڤبری گۆت ژی: مە ژمارەیەکا زێدە یا یاریزان و تیمێن مللی ل زاخۆ هەنە و هەمی تیم هاتینە رێکخستن و رێنما ژی ل سەر وان هاتینە دانان و لدویف وان رێنمایان ئەو تیمە دهێنە رێکخستن و ئێکەم ناڤەندین ل هەرێما کوردستانێ خەلاتێ باشترین یاریزان بەلاڤ دکەت.
بۆ زانین باشترین وه‌رزشڤانێ یارییا ته‌پا پێی بۆ تیمێن مللی بڤی ره‌نگی بوون، به‌رۆژ جادر ژ تیما بارزان ل سه‌ر ئاستێ یاریزانێن دێرین، مێهڤان جومعه‌ ژ تیما بارۆڤ ل سه‌ر ئاستێ پێشكه‌فتیان، نه‌شوان عه‌لی ل سه‌ر ئاستێ لاوان و ئاراس حزنی ل سه‌ر ئاستێ تازه‌پێگه‌هشتیان یێن تیما ئه‌حمه‌د كایار دیسان محه‌مه‌د ژ تیما خابیر ل سه‌ر ئاستێ پشكۆژان.

لژنەیا ئۆلمپییا نێڤدەولەتی رازیبوو ل سەر دوورئێخستنا رەعەد حەمۆدی سەرۆكێ‌ بەرێ‌ یێ‌ لژنەیا ئۆلمپییا ئیراقێ‌ و دیار كر ئەو رێزێ‌ ل بڕیارا كۆمەلا گشتی یا لژنەیا ئۆلمپییا ئیراقێ‌ دكەت و پێنگاڤا وان بابەتەكێ‌ نافخۆیە و ئەگەرێن سەرپێچییا رێنمایان و كەندەلییا دارایی یە.
بڤێ‌ چەندێ‌ بڕیارا فەرمی ژلایێ‌ كۆمەلا گشتی یا لژنەیا ئۆلمپی ب دانانا عقێل مفتن وەكو سەرۆكێ‌ لژنەیا ئۆلمپی ژبەركو ل دووڤ سیستەمێ‌ نافخۆیی یێ‌ لژنا ئۆلمپی دێ‌ ب وەكالەت مینت هەتا هەلبژارتن بهێنە كرن، ل شوباتا بۆری 25 دەنگێن ئەندام د كۆمەلا گشتی یا لژنەیا ئۆلمپی یا ئیراقێ‌ ب دوورئێخستنا رەعەد حمۆدی هاتبوو دان بەرانبەر دو دەنگ ب تنێ‌ د بەرژوەندیا وی دا بوون.
بۆ زانین رەعەد حمۆدی ل نیسانا سالا 2009ێ‌ بوو سەرۆكێ‌ لژنەیا ئۆلمپیا ئیراقێ‌، لڤێ دووماهیێ‌ چەندین بابەتێن گەندەلییا دارایی وەكو سكالا ل سەر هاتینە تۆماركرن و بۆ لژنەیا دەستپاكیێ‌ یا ئیراقێ‌ ژی هاتنە هنارتن.