زاخۆ، دلۆڤان هالۆ:
چار ڕووبارێن هشكەڕوو ل ئیدارەیا سەربخوە یا زاخۆ هەنە، د زێدەتری دەهـ تاخان ڕا دەرباز دبن، هەبوونا ڤان هشكەڕوویان دناڤ باژێڕی دا خەلك دلگران كرییە و كاریگەری لسەر ژیانا وان یا ڕۆژانە و ڕەوشا وان یا ساخلەمیێ كریە، ل دەمێ هاتنا بارانان لەهی دروست دبن و مەترسی دكەڤیتە سەر ژیانا وان، لەوما ئەو دخوازن چارەسەریەكا ب ئێكجاری ل ڤان هشكەڕوویان بهێتە كرن، ژبەر كو گەلەك جاران بوویە ئەگەرێ وێ چەندێ كو قوربانی ل دووڤ ڕا بهێن.
نەجمەددین سەعید، ئێك ژ ئاكنجی یێن تاخێ سێمالكانە ل زاخۆ و مالا وی ل سەر هشكەڕوویە بۆ ڕۆژناما ئەڤرۆ دیار كر كو ژبەری چەند سالان من نەڤیێ خوە یێ حەفت سالی ل ڕووبارێ هشكەڕوویی ژ دەست دا، ژ ئەگەرێ بلند بوونا ئاڤێ كەفتە د ڕووبارێ هشكە ڕوویی دا و گیانێ خوە ژ دەستدا.
عەبدوللا حەسەن، ژی ئێكە ژ ئاكنجیێن تاخێ شەعبانیكێ و مالا وی ژی ل سەر هشكە ڕوویە، دبێژیت:» ئەڤ هشكە ڕوویە بووینە جهێ كۆمڤەبوونا ئاڤا گران و هاڤێتنا بەرمایكان، و ئەڤ چەندە ژی كاریگەریێ ل سەر ڕەوشا ساخلەمیا مە وەلاتیان دكەت یێن كو ل دەردورێن ڤان هشكە ڕوویان دژین، لەوما مە دڤێت چارەسەریەكا ب ئێكجاری ل ڤان هشكە ڕوویان بهێته كرن، چونكە چ پاقژی ناكەڤیتێ و بتنێ یا هندەك جاران دكەن ئەوە كو گلێشی ژ ڤی لایی بۆ لایێ دی دبەن و پشتی هینگێ ئەو مشك و جڕد و بەقە ب سەرمە دا دهێن زێدەباری بێهنا پیساتیێ، و ل دەمێ ئەم دچینە دختۆری ئەم دبێژینێ ئەم نەساخین، دبێژیتە مە نەساخیا وە ئەگەر بێهنا جهێ وەیە».
یونس محەمەد، سەرۆكێ باژێڕڤانیا زاخۆ گۆت: «ئەگەر ڕەزامەندیا سەرۆكێ حكومەتا هەرێما كوردستانێ بهێتە وەرگرتن بۆ بجهئینانا پڕۆژەیەكێ بۆ هەر چار ڕووبارێن هشكەڕوو یێن زاخۆ، دێ ئاریشەیا ڤان ڕووبارێن هشكەڕوویان ب تەمامی چارەسەر بیت و ئەو خانیێن دكەڤنە بەر ڤی پڕۆژەیی ژی دێ هێنە ڕاكرن و خودانێن وان دێ ب پارچەیێن ئەردی هێنە قەرەبووكرن».
نيشاندان