دهۆك، لەزگین جوقی:

بەرپرسێ راكەهاندنا هاتنوچوونا پارێزگەها دهۆكێ دیار كر، رێكا شێخان بۆ پارێزگەها دهۆكێ، ژ بەر كاركرن د پڕۆژەیێ جۆتسایدكرنا رێكا باعەدرێ بۆ ئێتیتێ‌ و دهۆكێ دێ هێتە گرتن.
ئازاد تەها، بەرپرسێ راگەهاندنا هاتنوچوونا پارێزگەها دهۆكێ بۆ رۆژناما ئەڤرۆ ئاشكرا كر، حەفتیا بهێت رێكا د ناڤبەرا دهۆكێ بۆ دەڤەرداریا شێخان دا دێ هێتە گرتن و گۆت: «نوكە كار د پڕۆژەیێ جۆتسایدكرنا جادەیا د ناڤبەرا دهۆكێ و ناوچەداریا باعەدرێ دا بەردەوامە و كاركرن گەهشتیە گەلیێ دێركێ، لەو بۆ پاراستنا گیانێ شۆفێر و خەلكێ مە ئەڤ رێكە دێ هێتە گرتن.»
گۆتژی: «پشتی رێكا دهۆكێ و شێخان دهێتە گرتن، ل گەلیێ دێركێ دێ جادەیا پێگوهۆر هێتە بكارئینان ژ لایێ شۆفێر و خەلكی ڤە، ئەو ژی جاددەیا د ناڤبەرا پارێزگەها دهۆكێ و بەدریكێ دایە بۆ شێخان و هاتنوچوون ل وێ‌ جاددەیێ‌ دێ‌ هێتە كرن».

دهۆك، لەزگین جوقی:

پەرلەمانتارەكێ كوردێ ئێزدی ل پەرلەمانێ ئیراقێ راگەهاند، نوكە مەترسیا ئازادكرنا تاوانبارێن جینۆسایدا شنگالێ هەیە و دبێژیت: هەر كەسەكێ ل سەر یاسا لێبۆرینا گشتی رازی بیت، ئەم دێ وی شەرمزار كەین.
مەحما خەلیل، ئەندامێ پەرلەمانێ ئیراقێ بۆ رۆژناما ئەڤرۆ دیاركر، هندەك لایەن بزاڤان دكەن ب رێكا یاسایەكێ تاوانباران ئازاد بكەن و گۆت: «د ناڤ وان دا تاوانبارێن جینۆسایدا شنگالێ هەنە، نوكە ل پەرلەمانێ ئیراقێ پڕۆژەیاسایەك هاتیە بەرهەڤكرن، دوور نینە ب رێكا ڤێ پڕۆژەیاسایێ هژمارەكا تاوانبارێن جینۆسایدا شنگالێ بهێنە ئازادكرن، لەورا ئەم رێگریێ ل پڕۆژەیاسیێ‌ دكەین و نابیت تاوانبارێن جینۆسایدا شنگالێ بهێنە ئازادكرن، بەلكو پێدڤیە بهێنە سزادان».
گۆتژی: «ئازادكرنا تاوانبارێن جینۆسایدا شنگالێ، دێ‌ مەترسیێ ل سەر خەلكێ شنگالێ و هەمی خەلكێ ئیراقێ دروست كەت و نابیت ب چ شێوەیان تاوانبارێن جینۆسایدا شنگالێ ئازاد ببن».

ئامێدیێ، مەحمود نهێلی:

ژ بۆ پتر گرنگیدان ب كەرتێ گەشتیاری و راكێشانا گەشتیاران بۆ دەڤەرێ، پڕۆژەیێ چێكرنا رێکا كەمەری ل دۆر ئامێدیێ دهێتە بجهئینان و نوكە ل ژێر بجهئینانێ یە و گوژمێ دو ملیار و 318 ملیار دیناران بۆ هاتینە تەرخانكرن.
ئەڤراز حەسەن، سەرۆكێ باژێرڤانیا ئامێدیێ بۆ رۆژناما ئەڤرۆ دیار كر، ئەڤ پڕۆژە یێ گەشتیاریە و نوكە كەفتیە د قووناغا بجهئینانێ دا و گۆت: «ئەڤ پڕۆژەیە پێك دهیت ژ رێیەكا پەیادە، كو ل دۆر كەلها ئامێدیێ دزڤڕیت، هەروەسا چەندین جهێن بێهنڤەدانێ تێدا هەنە زێدەباری فرۆشگەهان».
گۆتژی: «ئەڤ پڕۆژەیە دێ بیتە ئەگەرێ پتر پێشخستنا كەرتێ گەشتیاری ل ئامێدیێ و راكێشانا گەشتیاران بۆ دەڤەرێ ب گشتی، هەروەسا دێ دەلیڤەیێن كاری ژی بۆ گەنجێن مە ل ڤێ دەڤەرێ پەیدا كەت».
سەرۆكێ باژێرڤانیا ئامێدیێ ئاشكرا ژی كر، نوكە ئەڤ پڕۆژەیە گەشتیە قووناغێن چێكرنا دیوارێ بەرێ بازی و قووناغا ڤەكرنا رێیێ و ڤەكرنا رێیێ بۆ قوبەهان ب دووماهی هاتیە و گۆت: «ب ئانەهیا خودێ د سالا بهێت دا دێ كەڤیتە د خزمەتا وەلاتیان دان».

زاخۆ، دلۆڤان هالۆ:

ل ئیدارەیا سەربخوە یا زاخۆ جاددەیا نێڤدەولەتی و بازرگانی یا زاخۆ ل سنوورێ ناوچەداریا ڕزگاری دبیتە جۆتساید و دهێتە قێركرن، كو ئەڤ جاددە كوردستانێ و سووریا پێكڤە گرێ ددەت.
ئەدیب جەعفەر، ڕێڤەبەرێ ناوچەداریا ڕزگاری بۆ ئەڤرۆ دیار كر كو ل سەر ئەركێ حكومەتا هەرێما كوردستانێ ئەڤ جاددە ب گوژمێ پتری 40 ملیار دیناران و ب درێژاهیا 14 كیلۆمەتران دبیتە جۆتساید و دهێتە قێركرن.
كۆمپانیا بجهئینانا پڕۆژەیی ژی ئاماژە ب وێ چەندێ كریە كو فرەهیا هەر سایدەكی 16 مەترە، هەتا نوكە پڕۆژە ب ڕێژەیا 86% ئەڤ پڕۆژە هاتیە بجهئینان.

رەمەزان زەكەریا:

ل سنوورێ دەڤەرداریا ئاكرێ هژمارەكا بەرچاڤ یا خانیێن پلاستیكی هەنە و چاندن د ناڤ دا دهێتە كرن، ب تایبەت ل وەرزێ زڤستانێ.
ئەندازیار فازل مستەفا، رێڤەبەرێ چاندنا ئاكرێ بۆ ئەڤرۆ گۆت: «ل سنوورێ دەڤەرداریا ئاكرێ جۆتیاران گرنگیەكا باش دایە كەرتێ چاندنێ، ل وەرزێ زڤستانێ ژی ل سەر بەرهەمئینانا بەرهەمێ رۆژانە د ناڤ خانیێن پلاستیكی دا دبەردەوامن».
ناڤبری گۆتژی: «چەندین سالە خانیێن پلاستیكی مفایەكێ باش گەهاندیە كەرتێ چاندنێ، جۆتیار دشێن ل سەر رووبەرەكێ كێم بەرهەمەكێ زۆر بەرهەم بینن، ئەڤە ژی بوویە ئەگەر جۆتیاران بەردەوام كار و بەرهەم هەبیت».
ئەندازیار فازل خویا ژی كر، ل دەڤەرا ئاكرێ پتری سێ هزار خانیێن پلاستیكی هەنە و سالانە رێژەیا وان زێدەتر دبیت و هەموو جۆرێن بەرهەمی، ب تایبەت خیاران د ناڤ دا دچینن.