چاڤەڕێ‌ دهێتە كرن ئەڤرۆ رۆژا سێ‌ شەمبی ڕێكەفتی سێیێ‌ كانوونا دویێ‌ تیما یانەیا دهۆك ل وەلاتێ‌ ئێماراتێ‌ دوور ژ پشتەڤانێن خوە دێ‌ بیتە مێڤانا یانەیا نەسر یا ئیماراتی ژ چارچووڤەیێ‌ گەڕا چارێ‌ یا كۆما ئێكێ‌ كو دبیتە یارییا ئێكێ‌ ژ قۆناغا دویێ‌ یا قارەمانییا كۆپا كەنداڤی بۆ یانەیێن قارەمان ل دەڤەرا كەنداڤی، ئەو بڕیارە یارییا وان ل ستادیۆما ئال مەكتۆب ل باژێرێ‌ دوبەی یا ئیماراتی هێتە كرن، د هەمان كۆم دا یانەیا ئەهلی سەنعا یا یەمەنی دێ‌ مێڤاندارییا زەفار یا عومانی كەت
ئەلهۆیێن چیا بەرانبەر تاقیكرنەكا ب هێزدایە
یاریزانێن تیما یانەیا دهۆك ب مۆرالەكا بلند بەر ب وەلاتێ‌ ئیماراتێ‌ چووینە و پێكهاتیەكێ‌ بێ‌ ئاریشە و كێماسی یە و ب هیڤیێن مەزن بۆ ئەنجامەكێ‌ باش ئەوێن هەتا نوكە پێنج خال كۆمكرین ژ سێ‌ یارییان سەركەفتنەك و دو وەكهەڤی ل رێزا دویێ‌ ل سەر ریكا كۆما خوە دهێت، د بەرانبەر دا یانەیا نەسر سەرێ‌ لیستێ‌ دهێت ب حەفت خالان، د یارییا ئێكێ‌ دا ئەوا ل سێ شەمبییا بۆری دناڤبەرا واندا ل یاریگەها یانەیا دهۆك هاتییە كرن، هەردو تیم ب دو گۆلان وەكهەڤ بوون د وێ‌ یاریێ‌ دا ئەوا پیشەكارێ‌ دهۆكێ‌ شیایی تیما خوە ژ خوسارەتیەكێ‌ قورتالبكەت و گۆلا وەكهەڤیێ‌ د خولەكا90 دا بینت، لێ‌ یارییا ئەڤرۆ دێ‌ یا جودا بیت و هەر ئەنجامەكێ‌ نە چاڤەڕێ‌ كری دهێتە پێشبینیكرن.
نەسر د كۆپا كەنداڤی دا خودان ناسناڤە لێ‌ دهۆك ژی هەڤڕكە
هەرچەندە بتنێ‌ جارەكێ‌ هەردو تیم بەرانبەر ئێك بووینە و ئەوا ب وەكهەڤییا دو گۆلان بوویە، لێ‌ وەكو دیرۆك د قارەمانییا كۆپا كەنداڤی دا یانەیا نەسر بۆ جارا پێنجێ‌ یە پشكدار دبیت ئەوا شیای ل وەرزێ‌ 2014ێ‌ ناسناڤی ب دەستڤە بینت پشتی د یارییا دووماهیێ‌ دا سەركەڤتن ل سەر سەحم یا عومانی ئینایی، لێ‌ د خولا ئەڤ سالە یا ئیماراتی دا ئاستێ‌ وێ‌ جێگر نینە ئەوا نوكە ب كۆمكرنا13 خالان رێزا پێنجێ‌ دهێت، د بەرانبەر دا تیما ئەلهۆیێن چیا سەرباری د خولا ستێرێن ئیراقێ‌ دا رێزبەندییا 18ێ‌ نە لێ‌ سەربۆرەكا باش د یاریێن دەرڤە دا هەنە تایبەت د كۆپا فدراسیۆنا ئاسیا كو ل وەرزێن 2011-2012 گەهشبوو قۆناغا پێش دووماهیێ‌ و 2012-2013ێ‌ د قۆناغا كۆمان دا خاترا خوە خاستبوو، لێ‌ د ڤێ‌ قارەمانیێ‌ دا دەلیڤە باشتر بەردەستە كو بشێت دەربازی قۆناغا پێش دووماهیێ‌ بیت و دوور نینە بگەهیتە دەستكەفتەكی ژی.
لەشكەرێ‌ دهۆكییا دناڤ یاریگەهێ‌ دا كینە؟
ل دووڤ دووماهی پێكهاتیێ‌ هاتییە دانان ژلایێ‌ ڕاهێنەرێ‌ تیما دهۆكێ‌ مەسعۆد میرال دێ‌ ب پشتبەستن ل سەر كۆمەكا یاریزانێن خوە كەت و دبیت پێكهاتیێ‌ وی بڤی شێوەیی بیت، گۆلپارێز محەمەد سالح، هێلا بەرەڤانیێ‌ ماسێس ئارتین، بەیار ئەبۆبەكر یان ژی سیابەند عەگید، لۆكاس مۆسێس، رۆبێن ئەكۆا، محەمەد سەعید، باشانگ عەبدوللا، پیتەر گۆرگیس، هارۆن ئەحمەد، یانیك زاكێری و شەرقی ئەلبەحری.
جاسم محەمەد حاجی: تاقیكرنەكا ب زەحمەتە لێ‌ بۆ ئەنجامی دێ‌ شەڕی كەین
ل دۆر دووماهی بەرهەڤیێن تیما دهۆكێ‌ جاسم محەمەد حاجی سەرپەرشتێ‌ تیما یانەیا دهۆكێ‌ بۆ رۆژنامەیا ئەڤرۆ گۆت: د یارییا بۆری دا ئەم دگەل تیما نەسرێ‌ وەكهەڤ بووین د ناڤ ئەرد و جەماوەرێ‌ خوە دا، ئانكۆ یارییەكا ب زەحمەت هاتبوو ئەنجامدان لێ‌ یارییا ئەڤرۆ دێ‌ یا جودا بیت و تاقیكرنەكا بهێزتر بیت د كۆپایێ‌ دا، هەرچەندە هەموو یاریزان بەرهەڤن و ل دووڤ پلانێن بۆ یاریێ‌ هاتینە دانانان و دۆڤچوونا ئەوان كێماسیێن تیمێ‌ و یاریزانان هاتییە كرن ژلایێ‌ راهێنەری ب هیڤی نە بۆ یارییا ئەڤرۆ یاریزانێن مە بشێن یا پێدڤی ئەنجامبدەن، ب مورالەكا بلند شەڕی بۆ سەركەفتنێ‌ دێ‌ هێتە كرن و هیڤییا مە ئەوە ژی دلێ‌ جەماوەرێ‌ خوە ب ڤێ‌ ئەنجامێ‌ سەركەفتی خوەش بكەین.
شرۆڤەكارەكێ‌ وەرزش بۆچوونا خوە دیار كر
ژلایەكێ‌ دووڤە وەحید رەشید شرۆڤەكارێ‌ وەرزشی و ڕاهێنەرێ‌ بەرنیاس یێ‌ یارییا فوتبۆلێ‌ ل پارێزگەها دهۆكێ‌ گۆت: هەردو تیم د یارییا بۆری دا بەرانبەر ئێك بووینە ئانكو هەردو تیم هێز و كێماسیێن ئێكودو باش د زانن، لەوما ژی دێ‌ یارییەكا ڤەكری بیت بۆ تیما نەسرێ‌ لێ‌ بەرۆڤاژی دڤێت دهۆك یارییا ڤەكر نەكەت و هەمی بزاڤان بكەت خالەكێ‌ دناڤ ئەردێ‌ وێ‌ دا وەربگریت و بزاڤێ‌ بۆ هێرشێن هەڤدژ بكەت، ژبەركو نەسر یا بزەحمەتە و هەڤڕكەكا دی یا ژی هاتییە دمەیدانێ‌ دا ئەوژی ئەهلی سەنعا، پێنەڤێت وەكو ناڤ و هەبوونا یاریزانێن ئاست بلند زێدەتر یێن یانەیا نەسرێ‌ نە و هەروەسان دێ‌ دناڤ ئەرد و جەماوەرێ‌ خوە دا كەت و ئەوێ‌ دڤێت سەركەفتنێ‌ بینت ژبۆ پاراستنا سەرێ‌ لیستێ‌ و دەربازبوونێ‌ مسۆگەر بكەت لەوما ژی یارییا ئەڤرۆ دێ‌ پلێتا دەربازبوونێ‌ مسۆگەر كەت، هەردو ڕاهێنەران پلان و حساباتێن خوە بۆ یاریێ‌ داناینە ژبەركو ئەنجامێ‌ یارییا ئەڤرۆ گەلەك یا گرنگە، دبیت د یارییا بۆری دا ژبەر سەقایێ‌ سار و بارانی ئەو ئاستێ‌ چاڤەڕێ‌ كر یێ‌ دورست ژ هەردو تیمان مە نە دیتبن و گۆلێن خوەجهـی دهاتنە تۆماركرن، یا گرنگە دهۆك ئەنجامی ژ دەست نەدەت هەكە خوە خالەك ژی بیت هیڤییا مە ئەوە خەلەتیێن ڕاهێنەری یێن یارییا بۆری د یارییا ئەڤرۆ دت دۆبارە نەبن، پێنەڤێت وەكو هەر جار دبێژن هیڤییا مە ئەوە ئەم یانەیا خوە دڤێ‌ یاریێ‌ دا ب سەركەفتی ببینن، چنكو نوونەرا كوردستانێ‌ و ئیراقێ‌ یە و جهێ‌ شانازیێ‌ یە.
نەسرا ئیماراتی دڤێت پاراستنا سەرێ‌ لیستێ‌ بكەت
ژلایێ‌ خوەڤە یانەیا نەسر یا ئیماراتی دڤێت سەرێ‌ لیستێ‌ پارێزیت و بێ‌ چاڤەڕێ‌ بوونا یاریێن مایی دەربازبیتە قۆناغا پێش دووماهیێ‌ و چاڤ ل ناسناڤێ‌ خوە یێ‌ دویێ‌ یە پشتی 10 سالێن دووركەڤتنێ‌، عەلی ئەحمەد یاریزانێ‌ نەسرێ‌ ڕژدی ل سەر دەستڤەئینانا سێ‌ خالان كر و دیار كر ئەوان چ ڕێك نینن ژبلی سەركەفتنێ‌ ژبۆ مسۆگەركرنا دەربازبوونێ‌ و دیاركر یاری دگەل دهۆكێ‌ یا بزەحمەتە ژبەركو خودان پێكهاتییەكێ‌ بهێزە.
پشتەڤانەكێ‌ یانەیا دهۆكێ‌ گەشبینە ب تیما خوە
ژلایێ‌ خوەڤە مشیر دوسكی ئێك ژ پشتەڤانێن دێرین یێن یێن یانەیا دهۆكێ‌ گۆت: یارییەكا گرنگە بۆ تیما مە، هەرچەندە یاری ب زەحمەتە لێ‌ مە باوەری شیانێن یاریزانان هەیە كو دشێن ئاستەكێ‌ مەزن و ئەنجامەكی ب دەستڤە ئینن، پشكداری د قارەمانییەكا دەرڤە دا بەردەوامی دانە ب دیرۆكا یاریێن نێڤدەولەتی، بۆ هەر ئەنجامەكی ژی هەردەم پشتەڤانێن تیما خوەینە.
یانەیێن پشكدار و یاریێن دهۆكێ‌
هەشت یانەیێن كەنداڤی پشكدارن و هاتینە بەلاڤكرن ل سەر دو كۆمان، یاریێن وان ب شێوەیێ‌ خول دو قۆناغ دهێنە ئەنجامدان و دێ‌ بەردەوامبن هەتا 25ێ‌ نیسانا سالا 2025ێ‌، یانەیا دهۆك د كۆما دویێ‌ دا.
كۆما ئێكێ‌ دهۆك، نەسر یا ئیماراتی، زەفار یا عومانی، ئەهلی سەنعا یا یەمەنی.
كۆما دویێ‌: عەرەبی یا قەتەری، ئیتفاق یا سعۆدی، ریفاع یا بەحرێنی، قادسییە یا كوێتی.
ل دووڤ لیستەیا یاریێن تیما یانەیا دهۆك د كۆپا كەنداڤی دا یاریێن مایی دێ‌ بڤی شێوەی. یارییا پێنجێ‌ ل 4-2-2024 دێ‌ بەر ب وەلاتێ‌ یەمەن چیت و بیتە مێڤانا یانەیا ئەهلی سەنعا یا عومانی كەت، یارییا پێنجێ‌ و یا دووماهیێ‌ ژ قۆناغا كۆمان دێ‌ ل 19-2-2024ێ‌ مێڤاندارییا یانەیا زەفار یا عومانی كەت كو دێ‌ ل دەمژمێر حەفتی شەڤ هێتە ئەنجامدان.

عەلی حاجی:

د داخویانیەکێ دا ڕاهێنەرێ زاخۆ یا پشكدار د خولا ستێرێن ئیراقێ یا فوتبۆلێ دا بۆ رۆژنامەیا ئەڤرۆ دیار کر گرتنا سەرێ لیستێ نیشانا وێ چەندێ یە کارەکێ باش تیما وان ئەنجام ددەت و یارییەکا ب زەحمەت ژی ل پێشیا وانایە.
زێدەتر تەلال بلوشی گۆت: یارییا مە بەرامبەر ئه‌لكەرمە ژ یاریێن ب زەحمەت بوو ژبەرکو تیمەکا باش و رێک و پێکە، بۆ دووەم یارییە لدووف ئێک دەستپێکا نیڤا دویێ دا یاریزانێن مە ب کارتێن سۆر دهێنە دوورئێخستن ئەڤە ژی دبیتە ئەگەرێ هندێ تیما مە بکەڤیتە د بن گڤاشتنێ ڤە، لێ د یاریا بەرامبەر ئه‌لكه‌رمه‌ دا یاریزانێن مە یا پێدڤی ل سەر مللێن وان ئەنجامدان و شیان سێ خالێن یاریێ ب دەستڤە بینن و تیمێ بەر ب سەرکێشا خولێ ڤە ببەن، تیما مە د قوناغەکا باش دا دەرباز دبیت و پێدڤیە ژی ئەم ل سەر ڤێ چەندێ د بەردەوام بین هەتا کو خول ب دووماهی دهێت و پێدڤیە ژی مە هەناسەیەکا درێژ بۆ خولێ هەبیت.
لدووماهیێ گۆت: ئەو پلانێن ئەم د دانینن یاریزانێن مە ب ئەرکێ خوە رادبن و جێبەجێ دکەن و ئەڤ چەندە یا گرنگە ژبەرکو رێک و پێکیا تیما مە زێدەتر دیار دبیت.
ب دووماهی هاتنا یاریێن گه‌ڕا نه‌هێ هه‌لوه‌ست بڤی ڕه‌نگی یه‌.
1- زاخۆ 16 خال
2- ئه‌لنه‌فت 16 خال.
3- زه‌ورا 15 خال
4- هه‌ولێر 15 خال.
5- شورته‌ 14 خال ژ شه‌ش یارییان.
6- ئه‌لكه‌رمه‌ 14 خال.
7- ئه‌لنه‌جه‌ف 13 خال.
8- كه‌ربه‌لا 13 خال.
9- كاره‌با 13 خال.
10- جه‌وییه‌ 12 خال ژ شه‌ش یارییان.
11- نه‌فت میسان 12 خال ژ هه‌شت یارییان
12- ئه‌لته‌له‌به‌ 11 خال.
13- ئه‌لكه‌رخ 11 خال.
14- ئه‌لقاسم 10 خال ژ هه‌شت یارییان.
15- نه‌فت ئه‌لبه‌سرا نه‌هـ خال.
16- نه‌ورۆز هه‌شت خال ژ حه‌فت یارییان.
17- ئه‌لمینا هه‌شت خال ژ هه‌شت یارییان.
18- دهۆك پێنج خال ژ شه‌ش یارییان.
19- دیالا چار خال.
20- ئه‌لحدود چنه‌ خال.