د داخویانیەكێ‌ دا سەرپەرشتێ‌ تیما فوتبۆلا یانەیا دهۆك دیار كر بۆ یارییا سوبەهی دگەل یانەیا نەسر یا ئیماراتی ئەركێ‌ وان ب سانەهی نینە بەرانبەر تیمەكێ‌ خودان باشترین یاریزانێن پیشەكارە لێ‌ بتنێ‌ هزرا دەربازبوونێ‌، ئەوا بڕیارە ژ چارچووڤەیێ‌ گەڕا چارێ‌ ژ كۆپا كەنداڤی ل ئیماراتێ‌ بهێتە كرن.
زێدەتر جاسم محەمەد حاجی گۆت: تیما یانەیا نەسر ئێك ژ ب هێزترین یانەیێن دناڤ قارەمانیێ‌ دا و بەربژارە بۆ هەڤڕكییا ناسناڤی، یارییا ئەڤرۆ دێ‌ هەموو بزاڤان كەین دناڤ ئەرد و جەماوەرێ‌ وێ‌ دا ئاست و ئەنجامەكێ‌ با ب دەستڤە بینن، هێشتا هەڤڕكی یا مایی ژبەركو تیما ئەهلی سەنعا ژی نێزیكی مە بووینە، بەرهەڤیێن مە د باشن و كادرێ‌ راهێنانێ‌ ژی ل دووڤ پلان و بەرنامەیێ‌ خوە شیاییە ب گەهینە باوەریێ‌ بۆ ڤێ‌ یاریێ‌ بزانن چەوا سەرەدەیێ‌ دگەل بكەن، پێنەڤێت ئەركێ‌ مە ب سانەهی نینە لێ‌ ڕژدین بگەهینە ئارمانجا خوە.
هەروەسان ناڤهاتی گۆت: تیما نەسر خودانا حەفت خالانە و دەربازبوون تا ڕادەیەكی مسۆگەر كرییە و مە پێنج خال هەنە و ئەهلی سەنعا یا یەمەنی ژی سێ‌ خال هەنە و هێشتا سێ‌ یاری ماینە ئانكو دەربازبوونا مە هێش مسۆگەر نەبوویە، لێ‌ گەشبین دێ‌ ب ئەنجامەكێ‌ باش و دەنگۆباسەكێ‌ خوەش گەهینە پشتەڤانێن دهۆكێ‌ و كوردستانێ‌ و ئیراقێ‌.
بۆ زانین هەشت یانە پشكدارن و هاتینە بەلاڤكرن ل سەر دو كۆمان، كۆما ئێكێ‌ دهۆك، نەسر یا ئیماراتی، زەفار یا عومانی، ئەهلی سەنعا یا یەمەنی، كۆما دویێ‌: عەرەبی یا قەتەری، ئیتفاق یا سعۆدی، ریفاع یا بەحرێنی، قادسییە یا كوێتی. یاریێن وان ب شێوەیێ‌ خول دو قۆناغ دهێنە ئەنجامدان و دێ‌ بەردەوامبن هەتا 25ێ‌ نیسانا سالا 2025ێ‌.

عەلی حاجی:

بڕیارە ئەڤرۆ تیما باسكێت بۆلا یانەیا زاخۆ یارییا خوە یا هەشتێ‌ ژ هەڤڕكیێن گەڕا 10ێ‌ یا خولا ئیراقێ‌ ل سەر ئاستێ‌ پیشەكارن ل باژێرێ‌ بەغدا بكەت و چاڤ ل سەركەفتنا پێنجێ‌ یە و پێشڤە چوون بەر ب رێزێن باشتر.
كوڕێن خابووری د حەفت یاریێن بۆری دا شیایە چار سەركەفتنان بینت و سێ‌ خوسارەتی هەنە، دووماهی سەركەفتن ل شەمبیا بۆری بوو بەرانبەر یانەیا كارەبا ئەوا ل هۆلا شەعب ل پایتەختێ‌ ئیراقێ‌ بەغدا هاتیە كرن ب جووداهییا نەهـ خالان 71- 62 خالان سەركەفتن ئینای، بڕیارە ئەڤرۆ ل هەمان هۆل ببیتە مێڤانا یانەیا دیفاع ئەلجەوی یا بەغدایی د بهێزترین یاریێن خوە دا، زاخۆ د نوكە دا 11 خال هەنە ل رێزا حەفتێ‌ دهێت، یانەیا دیفا ئەلجەوی ب 15 خال هەنە سەرێ‌ لیستێ‌ دهێت.
جوتیار عەلی هاریكارێ‌ راهێنەرێ‌ زاخۆ یارییا ئەڤرۆ ئێك ژ زەحمەترین هەڤڕكیێن خوە دانا و گۆت: ئەڤرۆ تاقیكرنەكا ب هێزە بۆ تیما مە بەرانبەر یانەكێ‌ ل وەرزێ‌ بۆری ناسناڤ ب دەستڤە ئینابوو و بۆ ئەڤ سالە ژی بزاڤێن پاراستنا وی ناسناڤی دكەت هەروەسان هەتا نوكە سەرێ‌ لیستا خولێ‌ دهێت، ئانكو یارییا مە ب سانەهی نابیت، لێ‌ ئەم ژی دێ‌ بۆ سەركەفتنێ‌ كەین و هەموو یاریزان رژدن ب گەهینە ئارمانجا خوە.

هه‌لبژارتیێ تێنسا ئه‌ردی یا ئیراقێ ل سه‌ر ئاستێ كچان ژ ڤاڤارتنێن قاره‌مانییا نێڤده‌وله‌تی پله‌ی جین كینگ ڤه‌گه‌ڕیان و نه‌شیان ده‌ربازبووبنه‌ مۆندیالا جیهانی، د هه‌ڤڕكیێن كۆما چارێ دا ئه‌وا ب پشكدارییا چار هه‌لبژارتیین ئه‌وژی به‌حرین مێڤاندارا قاره‌مانیێ، تاچاكستان، بۆتان و میانمار.
ل دۆر ڤێ قاره‌مانیێ و پشكدارییا یاریزانێن پارێزگه‌ها دهۆكێ د داخویانیه‌كێ دا سه‌عید خه‌لیل ئه‌ندامێ فدراسیۆنا تێنسا ئه‌ردی ل ئیراقێ و یا پارێزگه‌ها دهۆكێ بۆ ئه‌ڤرۆ گۆت: هه‌ردو یاریزانێن دهۆكێ زه‌لال سه‌عید و لارا ئاڤده‌ل و سه‌رپه‌رشتییا راهێنه‌رێ دهۆكێ و هه‌لبژارتیێ ئیراقێ ئاڤده‌ل حه‌سه‌ن دگه‌ل دو یاریزانێن دی پشكداری ڤاڤارتنێن مۆندیالا جیهانی بوون ئه‌وا بناڤێ قاره‌مانییا نێڤده‌وله‌تی پله‌ی جین كینگ ل به‌حرێنێ هاتییه‌ كرن، سه‌رباری هه‌بوونا ئاست و شیانێن یاریزانێن مه‌ دگه‌ل هه‌لبژارتیێن پشكدارن ئه‌وێن ئه‌ڤه‌چه‌ندین ساله‌ پشكدارن و خودان ناسناڤن، لێ ئه‌و ئارمانجا مه‌ دڤیایی ژلایێ تیۆری و پراكتیكی كو مفایی ژ ڤێ قاره‌مانیێ بهێته‌ وه‌رگرتن ئه‌م شیاین تا ڕاده‌یه‌كێ باش ژێ وه‌ربگرین.
هه‌روه‌سان ناڤهاتی گۆت: هه‌رچه‌نده‌ ئێك سه‌ركه‌فت مه‌ ئینا ئه‌و ژی ل سه‌ر هه‌لبژارتیێ بۆتان بوو و ئه‌ز د وێ باوه‌ریێ دامه‌ دبیت ئێكه‌م سه‌ركه‌ڤتنا دیرۆكی ل دووڤ پێزانین من، یاریزانێن مه‌ زه‌لالێ سێ یاریێن كت كرن ئێك سه‌ركه‌فت ئینا و چار یاریێن شێوازێ جود دو سه‌ركه‌فتن هه‌بوون، هه‌روه‌سان لارایێ بتنێ یاریێن ل سه‌ر ئاستێ جوت كرن ژبه‌ر هنگاڤتنێ، سێ یاری كرن دو سه‌ركه‌فتن ئینابوون، هه‌لبه‌ت هه‌ردو یاریزانێن پارێزگه‌هێ د قاره‌مانیێ دا جۆت بوون، هێزا هه‌لبژارتیێ ئیراقێ كو ئێك ئاستن و ژیێ وان یێ گۆنجایه‌ ل سه‌ر ئاستێ 17 و 18 سالی دانه‌، له‌وما ژی بۆ مه‌ یا گرنگ د نوكه‌ دا مه‌ تیمه‌كا گه‌نج و باوه‌ری ب شیانێن خوه‌ هه‌نه‌ و هه‌موو ژی لبن 17 سالی دانه‌ و گه‌شبینم دێ تیمه‌كا باش و یا پاشه‌روژێ ژێ و ئه‌و مه‌ره‌ما مه‌ یا سه‌ره‌كی یه‌، ب هیڤینه‌ بۆ قاره‌مانیێن داهاتی كچێن دهۆكێ ئه‌نجام و ده‌ستكه‌فتێن باشتر بینن.

دەزگەهێ‌ لژنەیا دەستپاكیێ‌ ل فدراسیۆنا تێنسا ئەردی یا نێڤدەولەتی ڕاگەهاند كو ستێرا پۆلەندی ئیگا سڤیۆتینگ بۆ ماوەیێ‌ ئێك مەهـ هاتە ڕاوەستاندن پشتی دیاربووی دەرمانەكێ‌ قەدەغەكری یێ‌ ب كارئینایی.
د ڕاپۆرتا خوە دا لژنەیا دەستپاكیێ‌ دیاركر شڤیۆتینگێ‌ مادەیێ‌ Trimetazidine یێ‌ قەدەغەكری ب كارئینایە ئەوا ل ئەیلۆنا بۆری بەری گەشتەكێ‌ بۆ پشكدارییا قارەمانیەكێ‌ دا بكەت و دیاركر هەرچەندە ئەو مادە دهێتە ب كار ئینان ژبۆ چارەسەركرنا ئاریشەیێن خەوێ‌ د دەمێ‌ گەشتێن فرۆكەیان كو ڕێكێن وان دوورن لێ‌ ژبەر زیانێن وێ‌ بۆ یاریزانی هاتییە قەدەغەكرن، لێ‌ ئەڤ مادە ل بن پلەیا ئاستێ‌ مەزن دایە لەوما ژی بۆ ماوەیێ‌ ئێك مەهـ شڤیۆتینگ هاتییە ڕاوەستاندن.
ژلایێ‌ خوەڤە ئیگا شڤیۆتینگ دانپێدان كر و گۆت: ڕاستە من ئەو مادە یێ‌ ب كارئینایی ژ نەچاری دا ب ئارامی بنڤم و نە گۆنەهەكا مەزنە و بەرپرسم ژ ئەوێ‌ خەلەتیێ‌، هیڤی دكەم هندەك بڕیاران دۆڤچوون بۆ بهێتە كرن.
شڤیۆتینگ یا 23ێ‌ سالی ئێك ژ ستێرێن تێنسا ئەردییە ل جیهانێ‌ بۆ دۆ وەرزێن بۆری سەرێ‌ لیستا پلەدارییا جیهانێ‌ بوویە و د نوكە دا ب كۆمكرنا 8371 خالان رێزا دویێ‌ دهێت.