قەیس وەیس:

هەر ژ دەستپێكا وەرزێ‌ نوو یا خولا ستێرێن ئیراقێ‌ یا فوتبۆلێ‌ ستێرا یانەیا دهۆك هارۆن ئەحمەد شیاییە ببیتە ئێك ژ كاریگەرترین یاریزان د خولێ‌ دا ب ئاست و شیانێن خوە و شێوازێ‌ یارییەكا پیشەكاری، د دووماهی دەركەفتنا خوە دا ئەوا ل شەڤا دەربازبووی دگەل تیما خوە بەرانبەر تیما جەوییە ئەوا ب سەركەفتنا دهۆكێ‌ ب گۆلەكێ‌ ب دووماهی هاتی، جەماوەرێ‌ وەرزشی ل پرانییا دەڤەرێن ئیراقێ‌ داخواز ژ ڕاهێنەر خیسۆس كاساس دكەن بۆ ناڤ ڕێزێن هەلبژارتیێ‌ ئیراقێ‌ بهێتە گازیكرن.
ل دور ڤێ‌ یەكێ‌ د داخویانیەكێ‌ دا ستێرا فوتبۆلا یانەیا دهۆك و یاریزانێ‌ هێلا ناڤین هارۆن ئەحمەد دیار كر بۆ هەر یارییەكێ‌ ئەو ئاستێ‌ خوە پێش دئێخیت پێخەمەت دناڤ یاریگەهێ‌ دا یێ‌ بەرهەڤبین و سەركەفتنا تیما وی گرنگترە ژ داخوازكرن بۆ ناڤ رێزێن هەلبژارتیێ‌ ئیراقێ‌ دا لێ‌ هیڤیێن هەر یاریزانەكی یە.
زێدەتر مایسترۆیێ‌ یانەیا دهۆكێ‌ بۆ رۆژنامەیا ئەڤرۆ گۆت: زوور پێخوەشحالم وەكو ئێك ژ یاریزانێن تیما یانەیا دهۆك دگەل هەڤالێن خوە سەركەفتنەكا گرنگ ل سەر یانەیا جەوییە ئینایی و ئەڤە ژی نیشانا وێ‌ یەكێ‌ ددەت كو ئەم پێكڤە كارەكێ‌ ب كۆم و رژدی بۆ سەركەفتنان دكەین، هەروەسان پێگێریێ‌ ب پلانێن ڕاهێنەرێ‌ خوە دكەین، یا كەیفخوەشتر هەبوونا جەماوەرەكێ‌ ئێكجار زوور یێن یانەیا مە كو د خوەش و نەخوەشیان دا دگەل مەدانە و بۆ هەموو یاریێن نافخوە و دەرڤەیێ پارێزگەهێ‌ بەرهەڤن، وەكو یاریزان یا د شیان ژی دا بیت دێ‌ بۆ سەركەفتنا تیما خوە كەین.
ژلایەكێ‌ دیڤە هارۆن ئەحمەدی سۆپاسییا ئەوا لایەن و پەیچان كر ئەوێن پەسنا وی دكەن و داخواز ژ ڕاهێنەرێ‌ كاساسی دكەن مایسترۆیێ‌ دهۆكێ‌ بۆ ناڤ ڕێزێن هەلبژارتیێ‌ ئیراقێ‌ زێدەكەن و گۆت: پێنەڤێت دگەل هەلبژارتیێ‌ ئیراقێ‌ هیڤییا هەر یاریزانەكی یە یاریێ‌ بكەت، لێ‌ د نوكە دا هەموو هزر و خەما مە بۆ هەر یارییەكێ‌ دێ‌ چەوا ئاستێ‌ خوە دگەل یانەیا خوە پێشبێخین و بەر ب سەركەفتنان ببەین، ئەم یێن رێزێن پێشیێ‌ و پاراستن و هێش پێشڤەچوون ئەو بۆ مە گرنگە لەوما ژی د نوكە دا بۆ من سەركەفتنا تیما مە گرنكترە ژ داخوازكرن بۆ ناڤ رێزێن هەلبژارتیێ‌ ئیراقێ‌، لەوما ژی ئەم بەردەوامین ل سەر بلندكرنا ئاستێ‌ خوە و وەرگرتنا ئامۆژگاری و بجهئینانا پلانێن راهێنەری پێخەمەت سەركەفتنا تیما مە.

عەلی حاجی:

د داخویانیەکێ دا کاپتنێ تیما باسکتبولا زاخۆ بۆ رۆژنامەیا ئەڤرۆ دیار کر سەرکەڤتنا وان ل سەر حەشدا شەعبی ڕێیەکا مەزن بەرامبەر دەربازبوونا وان بۆ چار گوشا زێرین ڤەکر.
زێدەتر جەگەر عەلی گۆت: ئەم د بەردەوامین ل سەر دەستڤەئینانا ئەنجامێن باش د خولا پێشەکارێن ئیراقێ یا باسکێت بۆلێ دا و تیما مە ئاستەکێ ژ هەژی پێشکێش دکەت ب تایبەتی ل ڤان یاریێن دوماهیێ، ئاست و ئەنجامێن مە یێن باش دەلیڤەیەکا مەزن ل بەر مە ڤەکر کو ئێدی ئەم ژ چار تیمێن دەستپێکێ بن د خولێ دا،سەرکەڤتنا ل سەر حەشدا شەعبی گەلەک یا گرنگ و ب زەحمەت ژی بوو لێ روحیەتا تیما مە وەکر ئەم بشێن سەرکەڤتنەکا باش ب دەست ڤە بینن،ئەڤ یاریێن مایی ژی هەمی بۆ مە د گرنگن ژبەرکو بتنێ ئەو سەرکەڤتنە دێ بیتە ئەگەر ئەم ببینە چار تیمێن ئێکەم.
ناڤبری گۆت ژی : جەماوەرێ مە ڕۆلەکێ کاریگەر هەبوو د پێشکێشکرنا ئاستەکێ باش و بلند و پێدڤیە پشتەڤانیکرنا وان یا بەردەوام بیت دگەل مە دا.
بۆ زانین تیما یانه‌یا زاخۆ سه‌ركه‌فتنا نه‌هێ د خولێ دا تۆماركرینه و شه‌ش خوساره‌تی هه‌نه‌‌ و 24 خال كۆمكرینه‌ پێشڤه‌ هاته‌ رێزا پێنجێ وزێده‌تر خوه‌ نێزیكی چارگۆشه‌یا زێرین كریه‌.

چاڤەڕێ‌ یە ئەڤرۆ چار یاریێن مایی ژ هەڤڕكیێن گەڕا هەشتێ‌ یا خولا فوتبۆلا پلا ئێكا كوردستانێ‌ بهێنە كرن، یانەیێن پارێزگەهێ‌ بەرانبەر ئەركەكێ‌ ب زەحمەت دانە ئەوا بڕیارە هەموو یاری ل دەمژمێر 2:15 پشتی نیڤرۆ بهێنە كرن.
تیما یانەیا دهۆك بەر باژێرێ‌ سلێمانیێ‌ چوویە و ئەڤرۆ ل یاریگەها زانكۆ ێ‌ بیتە مێڤانا یانەیا بابان د یارییەكا گرنگ دا بۆ پێشڤەچوون بەر ب رێزێن باشتر، ئەلهۆیێن چیا ل رێزا 11ێ‌ دهێت ب كۆمكرنا پێنج خالان ژ سەركەفتنەك، دو وەكهەڤی و دو خوسارەتی هەنە، مێڤاندارا وێ‌ هەمان خال هەنە كێمترییا گۆلان ل رێزا 13ێ‌ دهێت، پشتی دەستكاركێشانا راهێنەرێ‌ تیما دهۆكێ‌ عزەدین عەسكەر دنوكە دا ب سەرپەرشتییا كوڕێ‌ باژێرێ‌ خوە یێ‌ گەنج بەیارعەبدولعەزیز یاریێن تیمێ‌ بڕێڤە دبەت.
هەر ئەڤرۆ بڕیارە تیما یانەیا سێمێل د ناڤ ئەرد و جەماوەرێ‌ خوە دا مێڤاندارییا یانەیا سۆران بكەت د یارییەكا بهێز و هەڤڕكی دا، تیما كوڕێن دەشتا دۆبانێ‌ حەفت خال كۆمكرینە ل رێزا هەشتێ‌ دهێت ژ دو سەركەفتن ئێك وەكهەڤی و دو خوسارەتی هەنە، د بەرانبەر دا یانەیا سۆران 10 خال كۆمكرینە ل رێزا چارێ‌ دهێت، هەردو یانە ب ئارمانجێن مەزن هەنە و هیڤیێن سەركەفتنێ‌، تیما مێڤان ل وەرزێ‌ بۆری پاشڤە هاتبوو پلا ئێك، یاری ب سانەهی نابیت بۆ كوڕێن دەشتا دۆبانێ‌ تایبەت د دەمەكێ‌ هەستیار دا دەرباز دكەن.
ژ یاریێن دی یێن ئەڤرۆ، بازیان- كۆیە، چەمچەمال- ڕەواندۆز، یانەیا قەلادزێ‌ دێ‌ یا چاڤەڕێ‌ كریبیت.

هەرهین محەمەد:
دداخۆیانیەكێ‌ دا جەواد محەمەد تەمەر سەرۆكێ‌ فدراسیۆنا یاریا كیۆكۆشنكای كاراتێ‌ بۆ ئەڤرۆ گۆت: وەلاتێن دەورۆبەر ب وەرزشێ‌ د هێزن، لێ‌ ئەم چو هزران بۆ چ دەولەتان ناكەین، چونكو مە ئاستەكێ‌ باش هەیە و بێ‌ خۆدانین، ئەڤ وەرزشە ل چاپان هاتییە و هەكە ئیران بچیتە چابانێ‌ دێ‌ ل رێزا ئێكێ‌ هێت.
هەروەسان ناڤهاتی گۆت: سوپاسیا د.ئەحمەد قاسم سەرۆكێ‌ لژنەیا ئۆلمییا دهۆكێ‌ دكەم، ئەگەر ئەوان بودجە هەبا دا هاریكاریا مە كەن، مخابن ئەم دبێ‌ خۆدان بووین مە گەلەك دەرگەه قوتان و دو جاران نڤیسار داینە پارێزگاری، لێ‌ چو هاریكاری بۆ مە نەهاتیەكرن و مە یانەیا تەناهی یا هەی، بۆ ئەوان مەگەلەك دەرگەه قوتان بتنێ‌ هاریكاریەك بۆ گەنجان هەبیت، لێ‌ یا بێ‌ مفا بوو ژ بۆ قارەمانیەكێ‌ ل ئیرانێ‌ ل سەر كیستێ‌ خوە ب پاسان چووینە و چوون ب پاسا ژی وەستیانە و زەحمەتە.
جەواد محەمەد ئەو چەندەژی گۆت: مە یانا تەناهی هەیە یا كیۆكۆشنكای، ل وەرزێ‌ هاڤینێ‌ گەلەك دبیتە قەرەبالغ و هەتا سەد یاریزانان ژی مە هەنە ژ كچ و كوڕان، ئەم هەلدبژێرین و دبەینە قارەمانیان، هەموو كەس ناهێنە وەرگرتن بۆ ئەڤێ‌ یاریێ‌ بتنێ‌ ئەو نەبن یێن حەزا ئەڤێ‌ یاریێ‌ هەی و مەرجێ‌ وەگرتنێ‌ چ نەخوشی و شكەستن دلەشێ‌ وی دا نەبن، چونكو كیۆكۆشنكای وەرزشەكا بهێزە و هەموو كەس نەشێن خوە لبەر بگرن و ئەو كەسی ڤێ‌ یاریی دكەت دڤێت خۆارنا وی یا باش بیت و دیسان وەرزشا ئاسنی بكەت دا خوە ل بەر بگریت.

شاهۆ فەرید:

د داخویانیەكێ یاریزانێ تیما فوتبۆلا یانەیا نەفتا بەغدایی و كورێ باژێرێ سێمێلێ ئەحمەد سەبری دا بۆ رۆژنامەیا ئەڤرۆ دیار كر: د ڤی وەرزی دا من پتر ئاستێ خوە باشتر لێكریە و بەردەوامی راهێنانێن خوە ئەنجامدەم، هەر كارەكێ تو وەستاینێ پێ ببەیی دێ ئەنجامەكێ باش ب دەستڤەئینی و خودێ تەوفیقا تەدەت، ئاست و ئەنجامێ تیما مە ژی گەلەك د باشن و رێزبەندیێن پێشیێ‌ دانە.
زێدەتر ناڤهاتی گۆت: گەلەك گرێبەست بۆ من هاتبوون لێ هەر من نەفت هەلبژارت چۆنكو ل وێ یانەیێ هەست ب ئارامیێ دكەم، ئەڤی وەرزی راهێنەرێ تیمێ گەلەك خوە مە یاریزانان ڤە وەستاندیە هەتا شیاین ڤی ئاستێ نوكە تێدا پێشكێشبكەین و رێزبەندێن دەستپێكێ و هەڤركیێ دابین، بۆ ڤەگوهاستنێن زڤستانێ گەلەك بوندێن هاتین لێ یانەیا نەفت دەستبەردایی من نابیت و من گرێبەست مایە گەل وان هەتا دووماهیا وەرزیی هێشتا من ژی بڕیار مان و نەمانا خوە دگەل یانەیا بەغدایی نەدایە.
ژلایەكێ‌ دیڤە ئەحمەد سەبری گۆت: یاریزانێ‌ كوردستانی خودان شیانە هەكە دەلیڤە بۆ بهێتە دان نە بتنێ‌ دگەل یانەیان خوە یا كوردستانی بەلكو دەرڤەیی باژێرێ‌ وی ژی دێ‌ شێت باشترین شێوە ئاستی نیشان دەت، ب هیڤییا وێ‌ یەكێ‌ پشتەڤانییا یاریزانێ‌ كورد بهێتە كرن.