زاخۆ، دلۆڤان هالۆ:
تیپا ڕۆژ یا ستران و مۆزیکێ ل سالا 2012 ل ئیدارەیا سەربخوە یا زاخۆ هاتیە دامەزراندن، و پار سال دەست ب مۆزیکا گەڕۆك کرییە ل کۆڕنیشێ پرا دەلال و سیکا تاری، ل ڕۆژێن پێنج شەمبێ و ئەینیا دەست ب ژەنینا مۆزیکێ و ستران گۆتنێ دکەن، بڤێ چەندێ ڕەوشەکا دی دایە کۆڕنیشێ پرا دەلال.
حسێن پیرۆ، بەرپڕسێ تیپا ڕۆژ یا ستران و مۆزیکێ ل زاخۆ بۆ ڕۆژناما ئەڤرۆ دیار کر کو پشتی کۆڕنیشێ پرا دەلال و سیکا تاری هاتیە ڤەکرن، مە پێ باش بوو ل وان جهان مۆزیکا گەڕۆك دەست پێ بکەین، و پشتی جارەکێ مە دەستپێکری ڕەنگڤەدانەکا باش ل تۆڕێن جڤاکی هەبوو، و مە دیت خەلکێ ئەڤ کارێ مە پێ باش بوو، لەوما ئەم بەردەوام بووین، پشتی هینگێ ئیدارەیا سەربخوە یا زاخۆ و ڕێڤەبەریا ڕەوشەنبیری و هونەری پشتەڤانیا مە یا ماددی و مەعنەوی کرن.
ناڤهاتی، ئاماژە ب وێ چەندێ ژی کر کو پشتی مە دەست ب کارگێریا تیپێ کری مە دوو پەیام هەبوون کو یا ئێکێ کارەکێ بکەین کو ژبەری نوکە نە هاتبیتە کرن داکو بشێن جیاواز تر بین، یا دووێ ژی دانانا مۆزیکا گەڕۆك کو ل هەموو جیهانێ هەیە، مە دیت زاخۆ ژی گۆنجایە بۆ ڤێ مۆزیکا گەڕۆك کو جهێن تایبەت و گەشتیاری هەنە و گەشتیارێن بیانی سەرەدانا باژێڕی دکەن، و ئارمانجا مە بڤێ چەندێ ئەوە کو ئەم ڕوویەکێ هونەری یێ جوان یێ باژێڕی نیشا گەشتیاران بدەین.
گۆت ژی:»خەلك ئەگەرێ بەردەوامیا کارێ مە بوو، ب تایبەت خەلکێ زاخۆ پسیارا مە دکرن کو هوون دێ ڤێ حەفتیێ ل کیڤە بن، لەوما مە هەست پێ کر کو خەلکێ زاخۆ تێهنیێ ڤی جۆرێ مۆزێکا گەڕۆکە، و ئەگەر پشتەڤانی هەبیت ئەم دشێن وەکو کەمپینەکا مۆزیکا گەڕۆك بۆ دەمێ حەفتیەکێ بچینە هەمی باژێڕێن کوردستانێ».
زێدەتر ژی گۆت:»تیپا ڕۆژ ئێکەم تیپە کۆ بشێت بەردەوامیێ ب مۆزیکا گەڕۆك بدەت و پتری 45 کەسان دڤێ تیپێ دا ئەندامن کو پێك دهێن ژ کۆڕ و کچێن موسلمان و مەسیحی و ئێزدی، زێدەباری دەستەکا کارگێری کو ژ پێنج کەسان پێك دهێت، پێشتر ڕێژا مۆزیکژەنان ل سەر دەپێ شانوویێ ل زاخۆ کێم بوو، لێ پشتی تیپا ڕۆژ هاتی ئەو ڕێژە زێدە بوو، دیسان مە شیایە دوو مۆزیکژەنێن ئامیرێن نوو یێن کلارنێت و قانوونێ ژی ل زاخۆ زێدە بکەین کو پێشتر نەبوون، و هەبوونا کچێن ستران بێژ دناڤ تیپا مە دا».
نيشاندان