فەهیما ئیبراهیم

هەردەم ژ دەرڤەی بازنەیێ ژیانێ دا بووم، هەروەكو من چ جهـ د ڤی گەردوونی دا نەیی. خەونێن من، هیڤیێن من، پلانێن ژیانا من ژی هندەكێن دی ل پەی حەزێن خوە ددانان.
دەستێ خوە دا پەردا پەنجەرێ و هلدا، رێ دا هندەك رۆناهیێ ب ژۆر بكەڤت، چاڤێن وێ دناڤ شفشێن پەنجەرێ را ب وان ژن و كچان كەتن یێن ل لایێ دی یێ باخچەی روونشتی و مژیلی ئاخفتنێ بوون. وێ هەردەم پەنا دبرە بەر تنیاتیێ و ئەو كۆمبوون پشتگوههاڤێت بوون، وێ حەزكرن نەبوو تێكەلیێ دگەل كەسێ بكەت، ب تنێ ئەو و بیرهاتنێن وێ یێن ژ ئاگرێ دوزەخێ دژوارتر، ئەو دگەل دەروونێ خوە یێ ئالودەی نەخۆشیا بوویی، رۆژێ هزار جەنگان دەرباز دكەت. ل داویێ ژی دەمێ شەڤ تاریا خوە بەرددەت سەر برینێن وێ، ئالایێ دەستبەردانێ بلند كەت. وێ پێخەمەت ئازادیا خوە دەست ژ هەر تشتی بەردان. ئەو بریارا وێ دای نە یا ب ساناهی بوو، لێ دودلیا ئەڤرۆ ئەو تێدا، ژ رابردۆیێ وێ تالتر بوو.
هەستێ پەشێمانیێ وێ دكوژت، خوە هەردەم د گێژەڤانكەكێ دا دبینت، بۆ خوە دگۆت: هەتا ئەڤرۆ من خوە ژ وان قەید و زنجیرەیێن ژێ رەڤیم، قورتال نەكریە. ئەز ژ زیندانا جڤاكێ رەڤی مە زیندانەكا كوورتر و ئالۆزتر. هێشتا ترس خوە ل دۆر من دئالینت، هێشتا رۆندكان بۆ خەونێن خوە یێن بەرزە دبارینم و ب هەموو حەسرەت قێریێن من د قڕكا من دا ئاسێ دمینن. چاڤێن خوە ژ ترسا دا زوو ب زوو نا دانمە سەرئێك، رەشەیێ كوردۆیی ژ خەیالێن من دەرناكەڤت، هەردەما پیچەكێ خەیالێن من ڤارێ دبن، دێ دوبارە من ڤەگەریننە وێ رۆژا رەش یا ژیانا من سەروبنێك كری. ل وی دەمێ بابێ من پێخەمەت پاران ئەز رادەستی كوردۆی كریم، ژیان ل من تاری بوو. ئەز بەردێلیا قەرێن بابێ خوە بووم.
د وێ ژۆرا تاری ڤە، رۆناهیا وێ گلۆپا ب نیڤا بانیڤە هلاویستی هند یا كز بوو تێرا هندێ نەدكر باش دەوروبەرێن خوە ببینم. ترسێ گیانێ من د لەرزاند، دەمێ ژ نشكەكێڤە دەرگەهێ ژۆرێ ڤەبوویی، ژ ترسا دا رابوومە سەرخوە. كوردۆیێ سێ ژیێن من دەربازكرین، دڤیا خوە نێزیكی من بكەت. لێ من رێ نەدایێ، گەلەك هەولدان، لێ من شیا وی پاشڤەببەم. گەلەك بزاڤكرن كو من رازی كەت كو ئەو هەڤژینێ منە و حەلالێ منە و دڤێت خوە ب دەستڤەبەردەم، لێ یا بێ مفا بوو. دەمێ ژ ژۆرێ دەركەتی من ئاخینكەكا كوور راهێلا و من هزركر هەموو تشت ب داوی هاتن و ئێدی نازڤرت. دوبارە دەرگەهـ ڤەبوو، لێ ڤێ جارێ هەڤژینا وی یا سەرە دگەل بوو. وێ دەرسۆكا خوە ژ سەرێ خوە كر و هەردو دەستێن من ب پێپكێ تەختێ ئاسنی ڤە گرێدان. دا كو قێریێن من ژی راوەستینت، خوە ب سەر دەڤێ من دادا، دەڤێ من گرت. كوردۆیی ئەز بێستارە كرم، ب خورتی یا وی ڤیا دگەل من كر. قێریێن من د ناخێ من دا بژكین، فەتسیم، هەروەكو ئەز د بارۆڤەیەكێ وەربوویم، ترس و ئێشان ژ سینۆرێ خۆلبەرگرتنا من زێدەترلێهات، ب بزاڤا بێدەنگكرنا من، وێ هەر خوە ب سەر دەڤێ من دادا و بێهنا من تەنگكر، هەتا د دەستێن وان دا بێهش بوویم.
دەمێ هشێن من هاتینە سەرێ من، من خوە د ناڤ خوینێ وەركری دا دیت. هەڤژینا كوردۆیی ل هنداڤ سەرێ من بوو و ئاڤا تەزی ل ناڤ چاڤێن من دكر دا هشیار بم. ب هەموو هێزا خوە من كرە هەوار، وێ دەستێ خوە ب دەڤێ من ڤەنا و گۆت: تە هەتكا مە بر، دێ جیران دهەوارا مە هێن. ئەز برمە سەرشوویێ و سەرێ من شووشت، هەتا سپێدێ ژ بەر ئازاران من دكرە گری. ئەو مینا زێرەڤانەكێ ل بەر من ما. سپێدێ دگەل ئەلندێ، پێخاس من قەستا مالباتا خوە كر. ل بەر دەرگەهێ مالێ، دایكا من ل من كرە هەوار و گۆتە من: ب زڤرە مالا خوە، بابێ تە تە ببینت دێ تە كوژت. د ڤی ژیێ بچووك دا بێی كو كەسەك دلۆڤانیێ ب من ببەت، ڤەگەریان بۆ وێ مالێ د سەرێ من دا نەبوو، پێخاس و سەركۆل ل سەر ڤان جادەیان چ رێ نینن بەرێ خوە ب دەمێ، بیرا من ل مامۆستایا من هات، وێ هەردەم دگۆتە مە، نەهێلن كەس خورتیێ ل هەوە بكەت، هەوە ژی مینا كوڕی مافێ هەی، من ب دلەكێ تژی هیڤی قەستا مالا وێ كر، وێ ب دلەكێ بەرفرەهـ دەرگەهێ مالا خوە بۆ من ڤەكر. ئەز برمە بنگەهێ توند و تیژیا دژی ژنان.
نوزانم دێ چەوا دەربرینێ ژ ئێشانا دەروونێ خوە كەم؟ دەمێ هەلبژارتنا تە یا دوێ ژ یا ئێكێ ب ئازارتر بت، دەمێ تو بۆ رزگاركرنا خوە بهێیە زیندانكرن، ئەڤە دەمەكی درێژە ل جهێ ڤەحەواندنا ژنێن بێ سەمیان خوە زیندانكری دبینم، ل بەندا دەلیڤەكێ مە بۆ رەڤینێ، رەڤین ژ ڤان هەموو نەخۆشیان، ژ كەتواری، ژ جیهانێ، ژ بەندا مرۆڤێن خاپینۆك.
دەلیڤەك دانە من، ل هەمبەر بابێ خوە و وی كەسێ ب ناڤێ كوردۆ یێ خوە ب هەڤژینێ من ددا نیاسین ب راوەستم. هەوە راستی دڤێت، ئەو نە هەڤژین بوو، بەلكو كەسەك بوو تنێ دەستدرێژی و خورتی ل من كربوو. ئەز و ئەو ل هەمبەر ئێك راوەستیان، نێرینێن وان دلێ من ژ سینگێ من ئینا دەر، هەردوان ئیمزا كر كو ب چ رەنگان نێزیكی من نەبن، پۆلیسان ژ كوردۆی خواست دەستان ژ من بەردەت، هەكەر نە، ئەو و بابێ من دگەل وی مەلایێ ئەز ل وی مارەكریم هەموو دێ هێنە زیندانكرن. ما چەوا د ژیێ سێزدەسالیێ دا ئەو شیان ڤێ خورتیێ ل من بكەن؟ بابێ من سۆزدا خوە نێزیكی من نەكەت، لێ ئەوی تەركا من كر و رازی نەبوو من ڤەگەرینتە مالا خوە.
نوكە حەزدكەم لێدانێن دلێ من ژ قوتانێ راوەستن، هەر تشت ل جهەكی ب مینتە راوەستیایی، دا ئازارێن دەروونێ من ژی دگەل ب راوەستن.
پتری سالەكێ مامە ل جهێ ڤەحەواندنا ژنێن بێ سەمیان، نە كەسێ پرسیارا من كر، نە چ چارە بۆ دەردێ من هاتنە دیتن.
سەرێ خوە بلندكر و ل ئەسمانێ نێری، ل تاریا شەڤێ ستێر دبرسقین، هەیڤێ شەڤ ب رۆناهیا خوە رۆهن كربوو. ژ نشكەكێڤە دەرگەهێ ژۆرێ ڤەبوو، دەنگێ رێڤەبەرا بنگەهی هاتە گۆهێ وێ، دگۆت: ژیان دگەل من وەرە. بێی پرسیاركرن، من دا دووڤ. كارێ من كر، هندەك جلكێن نوو كرنە بەر من، هەروەكو دێ من بەتە ژڤانەكی گرنگ. من پرسیاركر، دێ كیڤە چین؟ ب گرنژینڤە گۆتە من، تو بتنێ دێ چی. گەلەك یا سەیر بوو، ژ من خواست چ پرسیار نەكەم، بتنێ یا گوهداربم دا بشێم بەردەوامیێ ب دەمە ژیانا خوە. ل بەر دەرێ بنگەهی، ترۆمبێلەكا جام رەش یا راوەستیای بوو، ئەز لێ سواركرم و ب رێ كەت، ئەو ل بەر دەری ما راوەستیایی هەتا رەشەیێ ترومبێلێ بەرزەبوویی.
ل تاخێ ژۆری، ل هنداڤ وی گرێ مەزنێ ب رۆناهیان شەڤ كریە زەنگل، د ناڤ بێدەنگیا شەڤێ دا قێریەك دهاتە ڕاهێلان.

مستەفا مەلا سەلیم ئاكرەیی

جارەكێ ئەز بەرەڤ دارستانەكا تاری ڤە چووم.. من دڤییا نهینی یا شەڤێ بزانم ، دبێژن دارستان  ب شەڤێ گەلەك ب ترسن، ل دەمەكی عەورەكێ  ڕەش هات و پێلێن ڕویباری هاركرن، هەمی دەنگ دهاتنە گوهێن من یێن دڕندەیا و بالندەیا و …، ژترسادا، من ل پشت دارا بەروویەكێ خیفەتا شەڤا خۆ ڤەدا،  ژنشكەكێڤە،  من بەرێ خۆ دا ژێهەل، من دیت ل جیاتی چویچكا مرۆڤ لسەر چقێن دارا یێن نڤستین .. هنەك ببونە هەلامەت، سەرمایێ لەشێ وان بەستیبوون، جارجارە ژی دەنگێ زارۆكەكی نزم دهات، تاڕیێ ژی بەلكێن دارا دلویل ددان و كرنە بەرماكێن هۆڤ و گورگا.. لبەر كنارێن ڕویباری، هەیڤێ خیڤەتا خۆ ڤەدابوو.. هندەك نژدەڤان و چەتەیێن دەریایێ.. خوینا ڕەهێن دارا فڕدكرن و.. بەلەم هەمی دشكاندن، ژنشكەكێڤە ئەز برسی بووم.. من ڤیا نچیرەكێ بكەم .. لێ ژبلی بەلگێن چلییا تشتەك ب دەست من نەكەفت، نەچاربووم ل فێقیەكی بگەرێم، هەر دارەكا من هەژاندبا.. دا زارۆكەك یان گەنجەكێ مری كەڤیتە عەردی، ئەز دبەرویكێن وا خەبیتیم داكو ناسنامەێن وان بزانم، ئێك ژوان ئەندازیاربوو،  ئێك ژی ماموستابوو، یێ دی ناسنامەكا كەڤن و گلفچیای دبەرویكا وی دا بوو، دیاربو ئەو نەفەرێن قاچاخ چیابوون،  بۆ دەرڤەی وەلاتی داچن؛ لێ قەدەرا وان دسڕ و سەرمایێ دا هاتبوونە ڕاپورت كرن.  بەری ئەز ژدارستانێ ب زڤرم، من دیت وێڤەتر زارۆكەكێ تەما روحا دگیانیدا مای و هەر یێ دبێژیت بابۆ .. بابۆ.. بۆچی تەئەم هێلاین؟  من پێكول كرن هندەك پرسیارا لێ بكەم، لێ چاڤێن وی ژكویردا چوونەخوارێ و بەرڤ جیهانەكا دی چوو، تنێ ئەزشیام ئەو رستكا دحەفكاویدا لێڤەكەم دا بناسم، لێ رستكا وی دوودلك بوون دەما من ڤەكری ڕەخەك وێنێ دایكا وی بوو، ڕەخێ دی وێنێ بابێ وی بوو ل بەرۆكا شەری، دەما زڤڕیم من ئەڤ چیرۆكە بۆ هەڤالەكێ خو ڤەگێڕا و من گۆتێ: ئەز نزانم ڤان مرۆڤان ل وێرێ چ دكرن؟ بۆچی چووینە ڕێكا مرنێ، من هزركر پشتی ئەڤ چیرۆكا تراژیدی  یامن بۆ هەڤالێ خوە ڤەگێرای هەر چنەبیت دێ ڕونكەكێ بارینیت، لێ وی گۆتە من: بەس بێژە پا تە ل وێرێ چ دكر؟!

وەعد عەبدولرەحمان

وەكی عەورێن دەربازبووی
خابیر ئازراندنین، لڤین دالقاندین
ب تنێ‌ بێدەنگی ما،
سەهما پشتی لەهیێ‌
لەهی؛
زمانێ‌ گەفایە
گەفا خوداوەندێ‌ بێ دووربینانە
چاڤێ‌ بەهانەیێن هاندەرمریانە
وەك چاوا عشقا من ژی بۆ تە
و عشقا تە ژی بۆ من
دو ئاراستەیێن جودانە..

وەكی بارانێن نەهاتی
رەنگێن میمۆكی یێن دێمێن خاڤ
دەنگێن سڕوی یێن دەروونێن مرار
ب لاڤ لاڤ.. هەر دەم وگاڤ
پەنابرنەكا بێچارەیە
چاڤەرێبوونا بەرهەمێ‌ بێ‌ بزاڤ
وەكی چاوا كەربا من ژی بۆ تە
وكەربا تە ژی بۆ من
د بنەرەت دا
نە دەرئەنجامە،
بەلكو دەربڕینە
نەدبت ئارمانج
نەدبت ئالاڤ.