عەلی حاجی:

بڕیاره‌ ئه‌ڤرۆ ژی سێ یاریێن دی ژ هه‌ڤڕكیێن گه‌ڕا چارێ یا خولا پلا نایابا كوردستانێ یا فوتبۆلێ بهێنه‌ ئه‌نجامدان، ئه‌وا هه‌موو یاری ل ده‌مژمێر دویێ پشتی نیڤرۆ هێنه‌ كرن و یانه‌یا پێشه‌سازی د ڤێ گه‌ڕێ دا یا چاڤه‌ڕێ كری بیت.
ل یاریگه‌ها ده‌لال تیما یانه‌یا زاخۆ دێ مێڤاندارییا یانه‌یا سیدسادق كه‌ت ئه‌وا ژ پارێزگه‌ها سلێمانیێ بووینه‌ مێڤانێن كوڕێن خابووری، تیما زاخۆییا ل رێزا پێنجێ دهێت ژ سه‌ركه‌فتنه‌، وه‌كهه‌ڤییه‌ك و خوساره‌تیه‌ك هه‌یه‌، یارییا ئه‌ڤرۆ دبیته‌ یا ئێكێ كو ل یاریگه‌ها خوه‌ بكه‌ت پشتی هاتییه‌ نووژه‌نكرن، له‌وما ژی دێ بزاڤێ كه‌م ئێكه‌م سه‌ركه‌فتن دڤێ یاریگه‌هێ دا بینت و ببیته‌ سه‌ركه‌فتنا دویێ د خولێ دا، به‌رانبه‌ر دا یانه‌یا سه‌یدسادق خودانا دو خالانه‌ ژ دو وه‌كهه‌ڤیان ل رێزا 12ێ دهێت، دێ هزر ل وه‌كهه‌ڤییا سێیێ كه‌ت.
ل دۆر به‌رهه‌ڤیێن تیما زاخۆ نەدیار عەلی سه‌رپه‌رشتێ تیمێ بۆ رۆژنامه‌یا ئه‌ڤرۆ گۆت: پشتی وەکهەڤیا مە بەرامبەر شەقلاوە كادرێ ڕاهێنانێ ئێكسه‌ر پلان و به‌رنامه‌ بۆ یارییا ئه‌ڤرۆ دانابوون پێخه‌مه‌ت باشتری به‌رهه‌ڤی بۆ یاریێ، ڕاهێنەرێ تیمێ ل سەر خالێن لاواز کار کریە و چارەسەر کرینە، دیسان ل سه‌ر خالێن تیما هەڤرک ژی کریە پێخەمەتی هندێ بشێن وان خالان ب دەلیڤە ببینن بوو سەرکەڤتنێ، سەرکەڤتن بوومه‌ گرنگە ژبەرکو زێدەتر دێ نێزیکی سەرێ لیستێ بین.
ناڤبری گۆت ژی: مە تیمەکا باش و رێک و پێک هەیە و دشێن مەترسیێ ل سەر هەر تیمەکا بەرامبەر مە یاریێ بکەت پەیدا بکەت و دگەل بورینا دەمی دێ ئاستێ تیمێ بەرەڤ پێشڤە چیت.
ژ یاریێن دی یێن ئه‌ڤرۆ، یانه‌یا هه‌ولێر دێ بیته‌ مێڤانا یانه‌یا برایه‌تی ئێك ژ دێربیێن پایته‌ختی، هه‌ولێرێ بتنێ دو یاری كرینه‌ و ئێك خال هه‌یه‌ رێزا 13ێ دهێت لێ یانه‌یا برایه‌تی ژ سێ یارییان چار خال هه‌نه‌ رێزا شه‌شێ دهێت، ژلایێ خوه‌ڤه‌ شێروانه‌ دێ مێڤاندارییا شه‌قلاوه‌ كه‌ت د یارییه‌كا دی یا بهێز دا، شێروانه‌ خودانا سه‌رێ لیستێ یه‌ ب حه‌فت خالان بۆ خوساره‌تی، شه‌قلاوه‌ دو خال هه‌نه‌ رێزا 11ێ دهێت.

قەیس وەیس:

فدراسیۆنا فوتبۆلا ئیراقێ‌ دگەل ڕاهێنەرێ‌ هەلبژارتیێ‌ خوە یێ‌ نیشتمانی خیسۆس كاساس كۆمبوویە و تێدا بەرنامەك بۆ دەستنیشانكرنا كۆمەكا یاریزانان بۆ ناڤ رێزێن هەلبژارتیێ‌ ئیراقێ‌ دانایە پێخەمەت پڕكرنا شوون جهێ‌ ئەوا یاریزانێن ڕەڤەندا كوردستانی و ئیراقی، خوە بەرهەڤكرن بۆ كۆپا كەنداڤی ئەوا بڕیارە هەڤڕكیێن وێ‌ ل 21ێ‌ كانوونا بهێت وەلاتێ كوەیت مێڤاندارییا وێ‌ بكەت.
فیراس بەحر ئەلعلوم ئەندامێ‌ فدراسیۆنا فوتبۆلا ئیراقێ‌ گۆت: راهێنەرێ‌ مە دێ‌ دەست ب لێگەڕیانا یاریزانێن نوو بۆ ناڤ رێزێن هەلبژارتیێ‌ مە كەت خوە بەرهەڤكرن بۆ كۆپا كەنداڤی كو ئەوان كێماسیێن خوە چارەبكەت و پڕكرنا شوون جهێ‌ یاریزانێن مە یێن بۆ یانەیێن دەرڤەی ئیراقێ‌ و ڕەڤەند، دەست ب پێنگاڤا ئێكێ‌ كرییە و پلان دانایە.
ل دووڤ پلانا راهێنەر كاساسی هەر ئێك ژ یاریزانێن یانەیێن دهۆك، زاخۆ، هەولێر نەورۆز ل بن چاڤدێرییا وی دانە و پشتی ب دووماهی هاتنا گەڕا هەشتێ‌ و یاریێن دهۆك، شورتە و جەوییە د پشكداریێن دەرڤە دا دێ‌ یاریزان هێنە دەستنیشانكرن.

په‌روین سالح

ژبه‌ر تاقیكرنا وی یا سه‌ركه‌فتی د بوارێ راهێنه‌ریێ دا فدراسیۆنا فوتبۆلا ئه‌لمانیا ب فه‌رمی راهێنه‌رێ كوردستانێ و خه‌لكێ رۆژئاڤا كوردستانێ ئوڤید حاجو وه‌ك هاریكارێ راهێنه‌رێ هه‌لبژارتیێ ئه‌لمانیا بۆ ژیێ ل بن 21 سالی دا ده‌ستنیشانكریه‌.
ئوڤید حاجو خه‌لكێ باژێرێ ترپه‌سپی یا رۆژئاڤا كوردستانێ ل سالا 1983ێ ل وه‌لاتێ ئه‌لمانیا ژ دایكبوویه‌ و تاكه‌ راهێنه‌رێ كورد بوو ل سالا 2019ێ باوه‌رنامه‌یا پرۆ یا راهێنه‌ریێ ل سه‌ر ئاستێ یویفا ب ده‌ستخوڤه‌ ئینابوو و راهێنه‌رێ ناڤبری به‌ری نوكه‌ ل چه‌ندین یانه‌یا كاركریه‌ وه‌كو هاریكارێ راهێنه‌ری ئه‌و ژی ل 2013 هه‌تا 2015 ل یانه‌یا ئۆسنابروك و 2016-2017ێ ل یانه‌یا ئێف سی ئینگۆلشتا و دگه‌ل یانه‌یا دینامۆ دریسدن 2018 -2019 و ژ سالا 2021 هه‌تا 2024ێ هاریكارێ راهێنه‌رێ یانا دارمشتان 98 بوو دخۆلا بۆندس لیگا ئه‌لمانی دا ، ل گه‌ل وێ یانێ كاره‌كێ سه‌ركه‌فتی كربوو هه‌ر ژ به‌ر وێ تاقیكرنا وی یا سه‌ركه‌فتی ل وێ یانه‌یێ هه‌تا ده‌ستنیشانكرن بۆ هاریكاریا راهێنه‌ریا هه‌لبژارتیێ ئه‌لمانیا.

ستێرا فرەنسی و یاریزانێ‌ هێلا بەرەڤانیێ‌ یێ‌ یانەیا بەرشەلۆنا جۆل كۆندی دانپێدان ب خەلەتییا خوە كر پشتی بوویە ئەگەرێ‌ گۆلا ئێكێ‌ یا یانەیا سێلتا ڤیگۆ ل سەر تیما خوە، ئەوا ژ چارچووڤەیێ‌ گەڕا 14ێ‌ یا خولا ئسپانیا هاتییە كرن تێدا یانەیا بەرشەلۆنا ب دو گۆلێن پاقژ تووشی وەكهەڤیێ بووین.
د داخویانیەكا رۆژنامەڤانی دا جۆل كۆندی گۆت: بەرپرسیارم ژ گۆلا ئێكێ‌ یا ل سەر تیما مە هاتییە كرن، د ماوەیێ‌ یاریێ‌ دا ئەز یێ‌ باش نەبووم، فۆكسا من ل سەر یاریێ‌ نەمابوو ئەڤچەندە بوو ئەگەر بوهایێ‌ وێ‌ بدەین، من خەلەتیەكا مەزن كر ئەم تووشی گۆلا ئێكێ‌ كرین كو ئەڤ خەلەتییە نابیت بهێتە كرن، پشكەكا مەزن یا وەكهەڤیێ‌ ئەز ئەگەر بووم، لێ‌ رژدین بەرشەلۆنا بەردەوام بمینتە ل سەرێ‌ لیستێ‌ و بەرنادەت.

چیڤانۆكێ‌ فرەنسی و سەرپەرشتێ‌ كارگێری ل یانەیا چێلسی یا ئنگلتەرایێ‌ ئیمانوێل پێتیت دیار كر ب دەستڤە ئینانا ناسناڤێ‌ وەرزێ‌ ئەڤ سالە مافەكێ‌ سرۆشتی یە كار بۆ بهێتە كرن و چێلسی دێ‌ بیتە هەسپێ‌ ڕەش یێ‌ خولا پرێمەرلیگ.
پێتیتی بۆ PLP یا ئنگلێزی گۆت: هەتا نوكە كاروانێ‌ یانەیا چێلسی د خولا پرێمەر لیگ دا یا سەركەفتی یە ژ 12 یارییان بتنێ‌ دو خوسارەتی هەنە و رێزا سێیێ‌ دهێت ئانكو هەڤڕكا سەرێ‌ لیستێ‌ یە بتنێ‌ شەش خالن، ل دووڤ ئاست و ئەنجامێن یانەیێ‌ چێلسی ل سەر ڕێكەكا دروست د چیت و دێ‌ بیتە هەسپێ‌ ڕەش د خولا پرێمەر لیگ دا، وەرزێ‌ ئەڤ سالە نێزكترن بۆ رێزێن پێشیێ‌ و ناسناڤی، سەرباری یانەیێن بهێز هەنە لێ‌ چێلسی دێ‌ دەستكەڤتەكێ‌ ئینیت.

راپۆرتێن رۆژنامەڤانی ل ئسپانیا پێنگاڤێن یانەیا ریال مەدرید بۆ ب ئینانا راهێنەرەكێ‌ نوو ل جهێ‌ یێ‌ ئیتالی كارلۆ ئەنشلۆتی دیاركریە و دوور نینە هەكە د یارییا چامپیۆنز لیگ دا یا ڤێ‌ حەفتیێ‌ تووشی خوسارەتیێ‌ بیت بهێتە دوورئێخستتن.
رۆژنامەیا ریلیڤۆ دیاركر ریال مەدرید ژ ئەنشلۆتی بێ‌ هیڤی بوویە و ئێكەم پێنگاڤ هاڤێژتیە ژبۆ دەستنیشانكرنا شوون جهگرێ‌ وی ئەو ژی یێ‌ ئەرجەنتینی سانتیاگۆ سۆلاری یاریزان و راهێنەرێ‌ بەرێ‌ یێ‌ یانەیا ریال مەدرید و هەتا ژی هاتییە ئاگەهداركرن هەردەمێ‌ ئەنشلۆتی هاتە دوورئێخستن دڤێت یێ‌ بەرهەڤبیت ل جهێ‌ وی، دوور نینە پشتی یارییا بهێت بەرانبەر لیڤەرپۆل ژ چامپیۆنز لیگ ئەڤ چەندە بهێتە كرن هەكە ریال تووشی خوسارەتیێ‌ بوو، لێ‌ هەمان رۆژنامێ‌ دیار كر ناڤێ‌ چاڤی ئالۆنسۆ وەكو بەربژار بۆ پۆستێ‌ ڕاهێنەراتیێ‌ ژی هاتییە دیاركرن.