سندس سالح سلێڤانەیی:
بەری شەش هەیڤان قائیمقامیا قەزا دهۆكێ بڕیار دابوو (10) سەمۆنە ب هزار دیناران بهێنە فرۆتن، لێ وێ بڕیارێ سەرنەگرت و خەلكەك ژ بجهنەئینانا وێ یێ دلگرانە و خودانێن سەمۆنخانەیان ژی دبێژن تشت هەموو یێ گران بووی و ئەم نەشێین وێ بڕیارێ بجه بینین.
فەرهاد سەمیر، هاولاتیەكێ ل تاخێ بەرۆشكێ دبێژیت: دەمێ مە زانی دێ (10) سەمۆنە بنە ب هزار دیناران ب راستی گەلەك كەیفا مە هات، لێ مخابن سەرنەگرت و هەتا نوكە هەشت ب هزار دینارانە و دسەر هندێ ڕا سەمۆنەیێن خوە گەلەك یێن بچووك كرین.
خالد عیسا، وەلاتیەكێ دی یە ل هەمان تاخی دبێژیت: فەرە حكومەت هەموو شیانێن خوە تەرخان بكەت دا نەهێلیت نان یێ گران بیت، چونكو نان خوارنا سەرەكی یە د هەموو مالان دا و پێدڤی بوو ئەو بڕیار بجه هاتبا دا بارێ فەقیری سڤك بیت.
سەگڤان خالد، ژ سەمۆنخانەیەكێ یە گۆت: هەكە حكومەتێ كارەبا مە ئەرزان كربا و (ئار، گاز، غاز) ئەرزانتر دابا سەمۆنخانە و نانپێژیان ل وی دەمی دا ئەم ژی شیێن هاریكاریا خەلكی كەین و ئەو بڕیار دا بجه هێت، لێ ب ڤی دەستوداری هەموو تشتا ب گرانی بكرین ئەم نەشێین.
مەهدی، ژ سەمۆنخانەیەكا دی دبێژیت: ئار بۆ مە ب گرانی و ب دۆلاری ژ توركیا دهێت، بهایێ غازێ ژی دو جاران هندی سالێن بۆری زێدەبوویە، كارەب ژی یا گرانە ل سەر مە و هەر دەمێ حكومەتێ ئەڤە بۆ مە كرن ئەم ژی د بەرهەڤین وێ بڕبارێ بجه بینین و ل دووف پێزانینێن مە ل باژێرێ مووسل هاریكاریا خودانێن سەمۆنحانا و نانپێژیان دهێتە كرن، لەورا ئەو دەه سەمۆنان یان پتر ب هزارەكێ د فرۆشنە خەلكی هەروەسا سەنگا سەمۆنە و سەوكێن وان ژی ژ یا مە پترە.
نيشاندان