قەیس وەیس:
پشتی ب دووماهی هاتنا یاریێن گەڕا حەفتێ ژ هەڤڕكیێن خولا ستێرێن ئیراقێ یا فوتبۆلێ، پڕانییا یاریزان و راهێنەرێن یانەیێن پشكدار گازندە ل سەر خشتەیێ یاریێن خولێ كرینە كو دناڤبەرا هەردو سێ ر‌وژان یارییەك د هێتە كرن، ئەڤچەندە بوویە بارگرانی ل سەر كاركێریێن یانەیان و كارتیكرن ل سەر ئاست و جەستەیێ یاریزانان كرییە و هژمارا هنگاڤتیان بەر ب زێدەبوونێ چوویە، ل دۆر ڤێ یەكێ رۆژنامەیا ئەڤرۆ بۆچوونێن راهێنەرێن هەردو یانەیێن زاخۆ و هەولێرێ وەرگرتینە و بڤی ڕەنگی دیاركرینە.
تەلال ئەلبلۆشی: زەڕەر ب تیما زاخۆ كەڤتیە و ئەم یێ چارەسەردكەین
ل دەستپێكێ یێ قەتەری تەلال ئەلبلۆشی ڕاهێنەرێ تیما یانەیا زاخۆ گۆت: تیما مە زەڕەرمەندا مەزنە ب سیستەمێ ئەنجامدانا یارییان و ئەو خشتەیێ هاتیە دانان چ مفا نە گەهاندییە مە بەلكو كارتیكرنەكا نەرێنی ل سەر ئاست و جەستەیێ یاریزانێن مە كرییە و بوویە ئەگەر یاریزان ئەو ئاستێ هەیی ژبەر ماندیبوونا بەردەوام یا هاتنی و چوونێ دناڤبەرا پارێزگەهێ ئیراقێ دا بۆ یاریێ ژ دەست بدەن و پێشكێش نەكەت، زەرەرمەندێن مەزن تیما مەیە ژبەركو ئەم ژ دوورترین باژێر ژ زاخۆ هەكە بچینە بەسرا بۆ یاریێن مینا و نەفت ئەلجنوب ئانكو نێزیكی هزار كیلۆمەتران چوون و هزار كیلۆمەتر هاتن، بۆ بەغدا نیڤا ئەوێ درێژاهیێ، ئەم نە ل ئسپانییا ینە كو سیستەمێ لالیگایێ ل سەر یانەیێن ئیراقێ ب سەپینیت، ئێك ژ مەرجێن هەرە گرنگ دڤێت هەر یانەك دەمێ دووراتییا یارییا هەبیت دڤێت ب فرۆكێ بچیت، ئەم هەموو یارییان ب پاسان دچین و جادەیێن ئیراقێ ژی د باش نینن.
ژلایێ خوەڤە حسێن ئەلمورشید راهێنەرێ یانەیا هەولێرێ گۆت: ژبەر سیستەمێ نوكە یێ ئەنجامدانا یارییان و نەبوونا بهێنڤەدانێ كو یاریزان بشێت چنەبیت دو رۆژان بمینتە ل باژێرێ خوە بوو ئەگەر زێدەتر ژ سێ یاریزانێن مە تووشی هنگاڤتنێ بووینە و ئەگەر ژی ئەڤ سیستەمێ نوكە یێ خولا ئیراقێ یە، هەروەسان ژبەركو دەمێ ئەنجامدانا یاریێن گەڕەك بۆ گەڕا دووڤدا یا كێمە گڤاشتنەكا مەزن ل سەر مللێن كادرێن ڕاهێنانێ یە و یاریزانان ژبۆ بەرهەڤی بۆ یارییا دووڤدا، هەتا گەهشتییە وێ ڕادەیی ب دورستی پلان بۆ یاریەكێ نە هاتییە دانان.
شرۆڤەكارەكێ وەرزشی: دڤیابا دۆڤچوونا باش و خرابیێن ڤێ خشتەیی هاتبە كرن
ل دووماهیێ وەحید رەشید شرۆڤەكارێ وەرزشی ل پارێزگەها دهۆكێ گۆت: پێنەڤێت هەر سیستەمەكێ نوو ل دووڤ ستاندەرێن جیهانی و ڕێنمایێن ئاسیا و فیفایێ دێ بیتە ئەگەر بۆ پێشكەڤتنا ئاستێ وەرزشا ئیراقێ و كوردستانێ و دیاربوو وەرزێ ئەڤ سالە گوهۆڕینێن بەرچاڤ هاتنە دیتن چو ل سەر ئاست و شێوازێ خولێ یان ژی ڕاگەهاندن یان رێزبەندییا ئیراقێ د كێشوەرێ ئاسیا، لایەنێ ئەرێنی و باشی یە، لێ لایەنێ خرابیێ و نەرێنی ژی یا هەی ئەوژی كارتیكرنا خراب ل سەر جەستەیا یاریزانان ژبەركو یاریزانی بهێنڤەدان نابیت و پتر دێ ڕاهێنان، یاری و گەشت هەبن ژ هەرێما كوردستانێ بۆ بەغدا یان بەسرا، ئەڤە هەموو گڤاشتنێن بەردەوامن ل سەر یاریزانان و دبیت گەلەك جاران ڕاهێنەر ژی یا پێدڤی نە شێت بكەت تایبەت هەكە یاریزان تووشی هنگاڤتنان بیت، هەرچەندە ڤە خشتە ل سەر ئاستێ جیهانێ ژی گەلەك وەلاتان یا هەیی لێ ئەوان وەلاتان گەشتا وان ب فرۆكێ یە نەك ب پاسانە ئەڤە ژی ئەگەرەكێ دی یێ خرابیێ یە.
هەروەسان ناڤهاتی ئەوچەندە ژی گۆت: گڤاشتنێن دارایی ژی ل سەر كارگێریێن یانەیان هەنە كو دڤێت كۆژمەیێ پێدڤی بۆ هاتنۆچوونێ، ئۆتێل و پێدڤیێن وەرزشی پەیدابكەت، لێ یا گرنگتر ئەوە ئەڤ
ان هەموو گڤاشتنان دەمێ یانە تووشی خوسارەتیێ دبیت و جەماوەر یێ بهێنفرەهـ نینە و دبیت ئەڤان هەموو ئاریشەیان نەزانیت و گازندا ژ یاریزان، راهێنەر و كارگێرییا یانەیا خوە بكەت، لەوما ژی ئێك ژ ئەگەرێن بەرچاڤ و خراب ئەوە سیستەمێ خولێ ب دانانا یارییان بۆ هەر سێ رۆژان جارەكێ یارییەك هەبیت، هیڤییا مە ئەوە فدراسیۆنا فوتبۆلا ئیراقێ دۆڤچوونەكا تەسل ل سەر ژڤانێ یاریان بكەت و هەڤسەنگیەكیچ بێخیتە د ئەنجامدانا یاریان دا، پێخەمەت خول ب هێزتر بیت.
نيشاندان