سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارتی ل پارێزگەها دهـۆكێ ب هەڤالینیا سەباح بەیتوللا، هاریكارێ بەرپرسێ مەكتەبێ سەرەدانا لقێ‌ نەهـ یێ‌ پارتی ل ئاكرێ كر و ژ لایێ مەردان خدر، بەرپرسێ لقێ هاتنە پێشوازیكرن .
د دووڤ دا سەربەست لەزگین، بەرپرسێ مەكتەبا رێكخستنا پارتی ل پارێزگەها دهـۆكێ ب ئامادەبوونا بەرپرسێ لقێ كومبوونەك ل گەل كارگێرێن لقێ و بەرپرسێن ناوچە و بنكەیان و ئەندامێن میحوەرێن هەلبژارتنان ئەنجام دا و پیرۆزباهیا سەركەفتنا پارتی د هەلبژارتنێن خولا شەشێ یا پەرلەمانێ كوردستانێ دا ل ئامادەبوویان كر، هەروەسا دەستخوشی ل وان كر و بەرنامە و كارێ ئۆرگان و رێكخستیێن پارتی ل سنوورێ لقێ‌ نەهـ یێ‌ پارتی بلند هەلسەنگاند.

د. عەلی تەتەر، پارێزگارێ دهۆكێ دوهی 12/11/2024 ل كۆچكا مێهڤانداریان پێشوازی ل خانم «جانێت ئەلبێردا» بالیۆزا وەلاتێ هولەندا ل ئیراقێ و شاندێ د گەل دا كر.
د هەڤدیتنەكێ دا بەحسێ رەوشا پارێزگەها دهۆكێ و پەیوەندیێن دو قولی د ناڤبەرا هەرێما كوردستانێ و هولەندا دا و رەوشا ئاوارە و پەنابەران ل پارێزگەهێ و پرۆسێسا سەركەفتنا هەلبژراتنێن پەرلەمانێ كوردستانێ و هەولێن پێكئینانا حكومەتا هەرێمێ و رۆلێ سازی و كۆمپانیێن هولەندی ئەوێن ل هەرێما كوردستانێ و پارێزگەها دهۆكێ كار و خزمەتێ دكەن، ب تایبەتی د بیاڤێ چاندنێ وپ شتەڤانیكرنا ئاوارە و خوەجهێن پارێزگەهێ دا هاتە كرن.
پارێزگارێ دهۆكێ پەسنا رۆلێ رێكخراو و سازی و كۆمپانیێن هولەندی كر، نەخاسمە ئەوێن د بیاڤێ چاندنێ دا هاریكاری و شیرەتكاریێ پێشكێش دكەن و خواست هاریكاری و پشتەڤانیا وان سازیان بۆ ئاوارە و پەنابەران و خوەجهێن دەڤەرێ، هەروەسا بۆ كەرتێ چاندنێ پتر لێ بهێت، چونكو هولەندا سیستەمەكێ چاندنێ یێ پێشكەفتی هەیە و زۆر گرنگە ئەڤ سەربۆرە ل هەرێما كوردستانێ و پارێزگەها دهۆكێ ژی بهێتە پەیرەوكرن.
بالیۆزا هولەندا بەرهەڤیا وەلاتێ خۆ دیار كر بۆ خوشكرنا هەموو جۆرە پەیوەندیان، نەخاسمە هاندانا كۆمپانیێن هولەندی بۆ پتر پێشئێخستنا كەرتێ چاندنێ‌.
دیسا هەر دوهی 12/11/2024 و ل دووڤ راسپاردێن مەسرور بارزانی، سەرۆكێ حكومەتا هەرێما كوردستانێ، ل هولا ڕێڤەبەریا گشتی یا باژێرڤانیان ب ئامادەبوونا د. عەلی تەتەر، پارێزگارێ دهۆكێ و د. نەوزاد عەبدوللا، بەرپرسێ لقێ ئێكێ پارتی و ئەندازیار دیار بەحری، رێڤەبەرێ گشتیێ باژێرڤانیان د چارچوڤێ بەرنامێ حكومەتا هەرێما كوردستانێ یێ بەلاڤكرنا پارچێن ئەردی دا، قووناغا ئێكێ یا بەلاڤكرنا هزار و 48 پارچێن ئەردی ل سنوورێ باژێرڤانیا فەیدیێ ب تیروپشك ل سەر زیندانیێن سیاسی و كەسوكارێن ئەنفالكریان ئەوێن بەری نوكە ڕازیبوون هەی دەستپێكر.

زنار تۆڤی:

ل ژێر چاڤدێریا د. عەلی تەتەر، پارێزگارێ‌ دهۆكێ‌، بڕیارە ل رۆژێن 14 و 15/11/2024ێ‌، فەستیڤالا دویێ‌ یا تەحینا ئامێدیێ‌ و بەرهەمێن خۆمالی یێن دەڤەرێ‌ ل ئامێدیێ‌ بهێتە گێڕان.
هەكار حەمید رەشید، رێڤەبەرێ‌ چاندنێ‌ ل دەڤەرداریا ئامێدیێ‌ و ئەندامێ‌ لژنا سەرپەرشتا فەستیڤالا دویێ‌ یا تەحینا ئامێدیێ‌ و بەرهەمێن خۆمالی یێن دەڤەرێ‌، بۆ رۆژناما ئەڤرۆ دیار كر، بەرهەڤی هاتینە كرن بۆ ئەنجامدانا ڤێ‌ فەستیڤالێ‌ و گۆت: «ئەڤ فەستیڤالە ل رۆژێن پێنجشەمبی و ئەینیێ‌ 14 و 15/11/2024ێ‌ دێ‌ هێتە گێڕان و 60 خیڤەت بۆ جۆتیاران دێ‌ هێنە ڤەدان، 22 خیڤەت ژ وان بۆ خودانێن ئاشێن تەحینێ‌ هاتینە دیاركرن، یێن دیتر ژی بۆ بەرهەمێن خۆمالی نە، وەكو: هنگڤینی و بەرهەمێن هشك و فێقی و هنار و كارێن دەستی، ل گەل چەند خوارنێن كوردەواری ل گەل كادە و خەبیسان».
ناڤهاتی گۆتژی: «چەندین مێشەڤان ژی دێ‌ دناڤا ڤێ‌ فەستیڤالێ‌ دا ئامادە بن، هەروەسا بەرهەمێن جۆتیارێن دەڤەرا ئامێدیێ‌ وەكو سلك و كولند و سهكا خۆمالی و برنجێ‌ كوردی ژی دێ‌ د ناڤا فەستیڤالێ‌ دا هێنە نیشادان، مەرەم ژ ڤێ‌ فەستیڤالێ‌ ئەوە، كو بەرهەمێ‌ خۆمالی یێ‌ دەڤەرا ئامێدیێ‌ و جۆتیاران بهێنە نیشادان، دەلیڤەیێن كاری ژی بۆ جۆتیارێن دەڤەرێ‌ بهێنە پەیدا كرن».

زاخۆ، دلۆڤان هالۆ:

ئەحمەد ڕەمەزان، بەرپڕسێ ڕاگەهاندنا ڕێڤەبەریا پۆلیسێن زاخۆ بۆ ڕۆژناما ئەڤرۆ دیار كر كو دوهی 12/11/2024، ل نێزیك جاددەیا سەرەكی یا ئیبراهیم خەلیل تڕۆمبێلەكا ژ جۆرێ كیا بارهەلگر خوە ل وەلاتیەكێ ب ڕەگەز تۆرك دا، كو ژییێ‌ وی 61 سالبوون و دەملدەست هاتە ڕەوانەكرن بۆ نەخوەشخانا هەوارهاتنێ، لێ‌ ژ بەر گرانیا برینێن وی گیانێ خوە ژ دەست دا.
ناڤهاتی گۆت: «لاشێ وی هاتە رەوانەكرن بۆ نۆشداریا داد ل زاخۆ، پەرێن ڤەكۆلینێ ل بنگەهێ پۆلیسێن نەخوەشخانێ هاتنە ڤەكرن ل دووڤ ماددێ‌ 24 ژ یاسا هاتنوچوونێ».

سندس سالح سلێڤانەیی:

بەری سێ سالان جڤاتا پارێزگەها دهۆكێ، بڕیارا بێدەنگكرنا موەلیدێن كارەبێ یێن ئەهلی دەرێخستبوو، لێ هیشتا دەنگ و دووكێلا وان ل سەر هەموو تاخێن باژێری یا بەردەوامە و خەلك گازندان دكەن و ئەندامەكێ كومەلا موەلیدێن ئەهلی ژی دبێژیت: نێزیكی 50% ژ موەلیدان هاتینە بێدەنگكرن، بەلێ ب كونكریتی.

ئەحمەد سالح، وەلاتیەكێ تاحێ زۆزانە بۆ رۆژناما ئەڤرۆ دبێژیت: دەمێ بڕیارا بێدەنگكرنا موەلیدان هاتیە دان ئەم هەموو پێ كەیفخۆش یووین، لێ ئەڤە سێ سال دەربازبوون و هێشتا پتریا موەلیدێن باژێرێ وەكو بەرێ نە و دەنگێ وان یێ دگوهێن مە دا دەنگڤە ددەت، هەروەسا دووكێلا وان ژی سەر تاخێن باژێرێ دا دەرباز دبیت و حالێ مە بەردەوام ئەڤە یە، لەورا نەخۆشی د بەردەوامن.
دلێر سەلیم، وەلاتیەكێ تاخێ بەرۆشكێ یە، ئەو دبێژیت: هەكە ئەڤ موەلیدە یێن هندەك كەسێن بەرنیاس نەبان نوكە ژمێژە هاتبانە چارەسەركرن، لێ ژبەركو دەستێن هندەك بەرپرسان یێ ل پشت، یان بەرەڤانیێ ژوان دكەن، لەورا نە دهێتە راكرن و نەژی بێدەنكگرن و نە یا رەوایە پتری (30) سالانە حكومەت نەشێت ڤێ ئاریشەیێ چارەسەر بكەت.
دایكا ئەحمەدی، ژ تاحێ بەرۆشكێ یە، مالا وێ دكەڤیتە بەرامبەر چەند موەلیدەیان، دبێژیت: دەمێ موەلیدە دهێنە هەلكرن كادی و دووكێلا وی ب سەر مالێن مە دا دهێت و ئەم دەرگەه و پەنجەران ژی دگرین، بەلێ هەر یا بێ مفایە و ئەڤە بیست سالن حالێ مە ئەڤە یە د دەستێن خودانێن واندا و بەردەوام ئەم و زاڕۆكێن مە تووشی نەخۆشیان دبین.
عەبدولخالق دۆسكی، ئەندامێ كومەلا موەلیدەیێن ئەهلی یە ل دهۆكێ، ئەو دبێژیت: دەمێ بڕیارا بێدەنگكرنا موەلیدان هاتیە دان، ل هندەك تاخان ل شووینا (چینكۆ) دیوار هاتنە دانان و كونكریتكرن و ئەز دشێم بێژم ب رێژەیا 50% هاتینە چیكرن، لێ ل ڤێ دووماهیێ بەحسێ دانا (24) دەمژمێری یا كارەبێ هەیە، ئەو ژی بوویە ئەگەر كو سستیەك بكەڤیتە د ب وارێ بجهئینانا وێ بڕیارێ دا.

پەروین سەلاح

پەیڤدارێ رێڤەبەریا بەرگریا شارستانی ل پارێزگەها دهۆكێ راگەهاند، رێڤەبەریا مە یا بەرگریا شارستانی هەمی تیمێن خوە ئێخستنیە د ئامادە باشیێ دا، ژ بۆ وێ چەندێ هەر جهەكێ لەهی لێ پەیداببن یان ئاڤ بچیتە دناڤا مالێن هاوەلاتیان دا هاوەلاتیێ خوە ئاگەداركەین پەیوەندیێ ب ژمارە ١١٥ بكەن، دا ب زووترین دەم تیمێن بەرگری و شارستانی ل وی جهی ئامادە ببن و هاریكارییێ بكەن بۆ هاولاتیێ مە یێ خوشتڤی، ئەم ئاگەداریا هاوەلاتیێ خوە دكەین ئەم یێ بەرەف وەرزێ زڤستانێ ڤە دچین و وەلاتی بلا سۆپە و كەرەستەیێن گەرمێ هەمیان بگرن پاشی بنڤن داكو گیانێ وان و زارۆكێن وان یێ پاراستی بیت.

بێوار عەبدولعەزیز، پەیڤدارێ رێڤەبەریا بەرگریا شارستانی ل پارێزگەها دهۆكێ بو رۆژناما ئەڤرۆ دیاركر، ئەم وەك رێڤەبەریا بەرگریا شارستانیا دهۆكێ ل حەفتیا بوری كومبوونەك ئەنجام دا دگەل چەندین رێڤەبەریێن پارێزگەها دهۆكێ كو ئەڤێن كارێن وان ئەو دەمێ لافاو دروست ببن ل جهێ روودان ئامادە ببن هاریكاریا هاوەلاتیان بكەن، لێ ل ڤێرە پێشتر چەندین پێنگاڤ هاتینە هاڤێتن و رێڤەبەریا سۆلینا چەندین جهـ پاقژكرینە، دگەل رێڤەبەریا شارەوانی ژی ئەو جهێن ل سالێن پار لەهی لێ دروست بوین هاتینە دەستنیشانكرن بۆ پاقژكرنێ، وەك رووباری هشكەرۆی و چەند جهێن دی ژی.
ناڤبری گۆت: وەك رێڤەبەریا مە بەرگریا و شارستانی هەمی تیمێن خوە ئێخستنیە د ئامادە باشیێ دا، ژ بۆ وێ چەندێ هەر جهەكێ لافاو لێ پەیداببن یان ئاڤ بچیتە دناڤا مالێن هاوەلاتیان دا هاوەلاتیێ خوە ئاگەداركەین پەیوەندیێ ب ژمارە ١١٥ بكەن، دا ب زووترین دەم تیمێن بەرگری و شارستانی ل وی جهی ئامادە ببن و هاریكارییێ بكەن بۆ هاولاتیێ خوشتڤی، بێوار گۆتژی: چەندین جهـ هەبووینە ب تایبەتی ناڤ سەنتەرێ پارێزگەها دهۆكێ وەك تاخێ بەرۆشكێ رووبارێ هشكەرۆیە و ل تاخێن شاخكێ و ل مالتایێ ئەڤە هاتینە دەست نیشانكرن ژلایێ رێڤەبەریا بەرگریا شارستانی دەمێ لافاو پەیداببیت ئەم دێ تیمێ خوە ل ڤان جهان ئامادە كەین دا هاریكاریا هاوەلاتیان بكەین ژبەركو گەلەك جاران ل ڤان جهان دەمێ بارانەكا بلەز و ب رێژەیەكا باش دهێت ئاڤ رادبیت و رێكێن ڤان تاخان دهێنە گرتن.
ئاماژە ب وێ چەندێ ژی دا: ئەم هاوەلاتیان دلنیا دكەین كو روودانێن لافایێ پەیدانابن، چونكو ئەو جهێن مەترسی ل سەر هەیە لافاو ژێ پەیداببن مە هەمی پاقژكرینە و رێژا باران بارینێ دێ كێمتربیت ل پارێزگەها دهۆكێ بەراورد دگەل پارێزگەها هەولێر و سلێمانیی، هەر دیسان هندەك جاران وەلاتی ب خوە ئەگەرە ئاڤ بجیتە دناڤا مالا وی دا، چونكی هندەك جهێن هەین هاوەلاتی بەرمایكێن خوە دهاڤێژنێ و دیڤدا باران گەلەك بهێت، ئەڤە دبیتە ئەگەر ئاڤ ل وی جهی قەپادبیت و لافا پەیدا ببن دخوازین هاوەلاتی ئاگەداربن.
بێوار گوت: هەروەسا هێزا دهۆك پێشمەرگێ پاراستنا ژینگەهێ وان ژی پەیوەندی ب مە كریە 20 كارمەندێن خوە ئامادە كرینە داكو هەر جهەكێ پێدڤی بیت بهێن هاریكاریا تیمێن بەرگریا شارستانی بكەن.
پەیڤدارێ رێڤەبەریا شارستانی ل پارێزگەها دهۆكێ ئاشكراكر: خۆشبەختانە ل تاخێ بەرۆشكێ هندەك جهێن هەین ئەڤێن نێزیكی چیای گەلەك جاران باران گەلەك دهێت هندەك كەڤر و بەر ژچیای دهێنە خار و دبیتە ئەگەر جادە بهێنە گرتن یان ژی گەلەك جاران كارتێكرنێ ل وان مالان دكەن یێن دەروبەر و ل ڤی تاخی و دگەل هندەك تاخێن دی یێن ناڤا سەنتەرێ دهۆكێ دا و هەروەسا ل دومیز و قەزا سمێلێ ژی دێ تیمێن مە ئامادە باشیێ دابن هاریكاریا هاوەلاتیان كەن. ل دووماهیێ گۆت ژی: ئەم ئاگەهداریا هاوەلاتیێ خوە دكەین ئەم یێ بەرەف وەرزێ زڤستانێ ڤە چین هاوەلاتی بلا سۆپە و كەرەستەیێن گەرمێ هەمیان بگرن پاشی بنڤن، داكو گیانێ وان و زارۆكێن وان یێ پاراستی بیت.