عەلی حاجی:

تیما یانه‌یا زاخۆ یا رییا خوەلێکدانا ئازاد ل سەر ئاستێ لاوان و تازەپێگه‌هشتیان رێزبه‌ندیێن ئێكێ، دویێ و سێیێ بۆ كێشێن جودا د قارەمانیا ئیراقێ دا ب دەستخوەڤە بینن.
لدور ڤێ یه‌كێ رەمەزان حەسەن راهێنه‌رێ تیما یانه‌یا زاخۆ بۆ رۆژنامه‌یا ئه‌ڤرۆ گۆت: تیمێن یانه‌یا زاخۆ بۆ خوەلێکدانا ئازاد ل سەر ئاستێ تازه‌پێگه‌هشتیان و لاوان شیاین ئه‌نجامێن باش د قارەمانیا ئیراقێ دا ب دەستخوەڤە بینن و بڤی ره‌نگی بوون، حسێن خەلات شیا رێزا ئێكێ ل سەر ئاستێ لاوان بهێت، رەیان عه‌مه‌ر رێزا دویێ ل سه‌ر هه‌مان ئاست ده‌ستڤه‌ بینیت، ژلایێ خوه‌ڤه‌ ل سه‌ر ئاستێ یاریزانێن تازه‌پێگه‌هشتی هه‌ر ئێك ژ ئاری ئیسماعیل رێزا دویێ، شوان ئەحمەد رێزا دویێ بۆ كێشا جودا و جمعە رێزا سێیێ ب ده‌ستڤه‌ ئینان، ب شێوه‌كێ گشتی قارەمانی د ئاستەکێ باش دا بوو و هەڤڕکییەکا دژوار ژی د هاتە کرن، ئەو رێزێن یاریزانێن مە ب دەستڤە ئیناین د باش بوون، دەستەیا کارگێریا یانەیا زاخۆ پشتەڤانیەکا تمام ل تیما مە کربوو و ئەڤچەندە ژی وێ چەندێ دگەهینیت کو پووتە پێدانەکا باش ب یاریا مە دهێتە دان.
ناڤبری گۆت ژی: سال بۆ سالێ ئاستێ یاریا خوەلێکدانێ ل ئیراقێ ب هێزتر دبیت و یانەیێن دیترێن ئیراقێ یاریزانێن ژ دەرڤەیی ئیراقێ ژی پشکدار دکەن لێ وەکو یانەیا زاخۆ پشت بەستنا مە بتنێ ل سەر کوڕێن خابیری یە.

سولین سلێمان

د دیداره‌كێ دا رەنا بەرەکات یاریزانا باژێرێ ئاکرێ یا یارێن گۆره‌پانێ بۆ رۆژناما ئەڤرۆ دیاركر بڕێیا پەیمانگەها پەروەردا دهۆکێ هاتییه‌ دناڤ وەرزشێ دا وه‌كو یاریزانا یاریێن گۆره‌پانێ پشكداری چه‌ندین قاره‌مانییان دا كرییه‌.
ناڤهاتی زێدەتر گۆت: ئێکەم پشکداریا من د ماراسۆنا درێژدابوو ئه‌وا ل باژێری ئاکرێ برێڤەچووی من شیا پلا ئێکێ ل سه‌ر ئاستێ ئیراقێ ب دەستڤەبینم و کوردستانێ د به‌ریكانا 1500م شیام ڕیكۆردا پیڤانەیی بشکێنم، ئەو راهێنانێن ئەم ئەنجام ددەین مفایەکێ باش دگەهینیتە مە بوویە ئەگەرێ پێشخستنا ئاستێ مە، سپاسیا مامۆستایێن خوه‌ یێن پەیمانگەها وەرزشی دكه‌م کو بووینە ئەگەر بشێم وان پلێن بلند دەستڤەبینم د یاریا گورەپانێ دا، لێ لێبورینڤە ل وەلاتێ مە زێدەتر گرنگی ب یارییا فوتبۆلێ دهێتە دان ژ لایەکێ دووڤە مە ئاریشا نەبوونا یاریگەهێن تایبەت بڤێ یاریێ هەیە ئەوژی بوویە ئەگەرەکێ دی ئەڤ یارییە بەر ب نەمانێڤە بچیت.
رەنایێ ئه‌وچه‌نده‌ ژی گۆت: دڤی وەرزیدا پشتی پشکداریا وان د قارەمانیا گورەپانێ دگەل یانەیا کەلار یا وەرزشی بوویە گوتژی پشتی وێ قارەمانیێ من نۆکە پەیوەندی ب ڤێ یانەیێ ڤە نینە نۆکەدا وەکی کچە یاریزانەک یا بێ یانەمە.

قەیس وەیس:

فدراسیۆنا فوتبۆلا كوردستانێ‌ ئێكەم كۆمبوونا خوە یا ئاسایی پشتی دەستپێكرنا وەرزێ‌ نوو یا خولا نایاب سازكر، ئەوا ب چەندین ڕێنما و ڕاسپاردە هاتینە دەركرن، ژ گرنگترین خالێن كۆمبوونێ‌ پشتەڤانییا خوە بۆ دادڤانێن یارییا دیاركرن دگەل داكۆكی ل هەر مافەكێ‌ یاریزانی هەبیت بۆ بكەن.
ئازاد محەمەد ئەندامێ‌ فدراسیۆنا فوتبۆلا كوردستانێ‌ بۆ رۆژنامەیا ئەڤرۆ دیار كر ل شەمبییا بۆری ئێكەم كۆمبوونا خوە پشتی دەستپێكرنا وەرزێ‌ نوو و ب دووماهی هاتنا هەڤڕكیێن گەڕا ئێكێ‌ یا خولا پلا نایاب، چەند بابەت و تەوەرێن جودا هاتنە گەنگەشەكرن ژ وانا، وەكو فدراسیۆنا فوتبۆلێ‌ ب تەمامەتی مە پشتەڤانییا خوە بۆ هەموو دادڤانانا دوپاتكر و ناهێلێن چو گڤاشتن یان گەڤ ل سەر هەبن، لەوما ژی هەر ئەندامەكێ‌ كارگێرییا یانەكێ‌، یا سەرپەرشتیار، راهێنەر، دەستەكا ڕاهێنەران، یاریزان، یان هەركەسەكێ‌ پەیوەندی ب یانەكێ‌ هەبیت یان پەیچەكێ‌ یانەكێ‌ بیت هێرش بكەتە ل سەر دادڤانان و ب خرابی بەحس بكەت ئەو لایەنە دێ‌ تووشی سزایێ‌ بن، هەكە خەلەتیەك هەبیت یانەیێ‌ مافێ‌ هەیی ب نڤێسارەكا فەرمی سكالا خوە پێشكێشی مە بكەت و مە لژنەیا تایبەتمەند هەیە بۆ دۆڤچوونا بابەتی.
ژلایەكێ‌ دووڤە ناڤهاتی گۆت: ئێك ژ خالێن دی یێن گرنگ پاراستنا مافێ‌ یاریزانایە، لەما ژی مە دەرگەهـ بۆ هەموو یاریزانان ڤەكرییە و د ئازادن كو پەرەی گرێبەستا خوە بینیتە فدراسیۆنا فوتبۆلا كوردستانێ‌ ب مەرەما پەسەندكرنێ‌ د بەرانبەر دا رێژەیا 5% كۆژمەیێ‌ گرێبەستێ‌ دێ‌ بۆ فدراسیۆنێ‌ بیت پێخەمەت داكۆكی ل مافێ‌ وی ل دووڤ بەندێن گرێبەستێ‌ بهێتە كرن و ئەو یاریزانێ‌ گرێبەستا خوە ل دەڤ مە ئیمزا نەكەت ئەم داكۆكیێ‌ ل مافێن وان ناكەین، هەروەسان لژنەیا پێڕابوونێ‌ و دۆڤچوونان ژی هاتییە پێكئینان پێخەمەت ئاسانكاریێ و ل دووڤ ڕێنمایان بیت.
ل دووماهیێ‌ ئازاد محەمەد دیاركر ب فەرمی یانەیا ئارارات بۆ خولا پلا ئێك هاتە پاشڤە بر ل وەرزێ‌ 2025-2026ێ‌ پشتی ب نڤێسارا فەرمی داخوازا خوەڤەكێشانێ‌ ژ پلا نایاب كری و دێ‌ وەرز ب 15 یانەیا یا بەردەوام بیت و دیاركر وەكو پێنگاڤا ئێكێ‌ شیان هەموو شایستەیێن دادڤانێن گەڕا ئێكێ‌ بۆ پارڤە بكەن و دێ‌ د بەردەومابن.

ستێرێ‌ گەنج یێ‌ یانەیا یۆڤانتۆس و هەلبژارتیێ‌ ئیتالیا نیكۆلۆ ساڤۆنا دیار كر یانەیا مە بۆ وەرزێ‌ ئەڤ سالە كارێ‌ ب دەستڤەئینانا ناسناڤی دكەت و سەركەفتنێن مە دێ‌ د بەردەوامبن.
ل دووڤ داخویانییا ساڤۆنا بۆ پەیچێ‌ فەرمی یێ‌ فوتبۆل ئیتالیا گۆت: ئاستێ‌ تیما مە د ئەڤ سالە دا گەلەك یا باشە ژ 12 یارییان چو خوسارەتی نە هاتینە ئەم یێن ل رێزێن پێشیێ‌، ئەڤچەندە ژی بۆ ئەوان پلان و شێوازێ‌ ڕاهێنەرێ‌ مە یێ‌ خودان شیان تیاگۆ مۆتایی ڤەدگەڕیت ئەوێ‌ د زانیت بۆ هەر یارییەكێ‌ چو پێدڤییە، ڕێكا مە یا درێژە، لێ‌ گەشبینم یۆڤانتۆسا ئەڤ سالە دێ‌ شەڕی بۆ ناسناڤی كەت و ئارمانج بوو دانایە، هەموو یاریزان ب گیانێ‌ شەڕی و مورالەكا بلند یاریێ‌ دكەن و جەماوەری ژی پشتەڤانە.

ستێرا ئه‌مریكی و یاریزانا یاریا تێنسا ل سه‌ر ئه‌ردی كوكو جۆڤ ئێكه‌م ناسناڤێ پشكا دووماهیێ یا قاره‌مانیێن نێڤده‌وله‌تی ئێك ژ مه‌زنترین قاره‌مانیێن جیهانێ ب ده‌ستڤه‌ ئینا پشتی د یارییا دووماهیێ دا ب سه‌ركه‌ڤتی ل سه‌ر هه‌ڤڕكا خوه‌ یا چینی چینگ كینۆین ب دو كۆما به‌رانبه‌ر كۆمه‌كێ، دیاریا واندا ئه‌وا ل وه‌لاتێ سعۆدیێ هاتیه‌ كرن.
كۆكۆ یا پله‌دارا سێیێ ل جیهانێ ژ پاشكه‌ڤتنا خوه‌ ڤه‌گه‌ڕیا سه‌ركه‌فتنا و ب ده‌ستڤه‌ ئینانا ناسناڤی، د كۆما ئێكێ دا یا خوساره‌ت بوو ب3-6 خالان لێ د هه‌ردو كۆمێن دووڤدا ب سه‌ركه‌ڤت 6-4 و 7-6 و ڤه‌گه‌ڕیا ناسناڤان، هه‌روه‌سان ب كۆژمه‌یێ 4.8 ملیۆن دولاران هاته‌ خه‌لاتكرن كو دبیته‌ مه‌زنترین پاداشت د دیرۆكا تێنسا ئه‌ردی یا پیشه‌كاران بهێته‌ دان، هه‌روه‌سان هه‌ڤالا وێ یا چینی 2.3 ملیۆن دولار وه‌رگرتن.
بۆ زانین ئه‌ڤ قاره‌مانییه‌ ژلاییچ سندوقا وه‌به‌رهێنانا گشتی یا سعۆدیێ هاتبوو ڕێكخستن كو تێدا 15 ملیۆن دولار بۆ خه‌لاتان هاتبوونه‌ ته‌رخانكرن و ژلایێ فدراسیۆنا نێڤده‌وله‌تی هاتبوو په‌سه‌ندكرن.

د داخویانیەكا رۆژنامەڤانی دا پیب گواردیۆلا راهێنەرێ‌ ئیسپانی و یانەیا مانچستەر ستی یا ئنگلتەرایێ‌ ئالایێ‌ هەڤڕكیێ‌ و گەشبینیی بۆ تیما خوە بلند كر، پشتی تووشی خوسارەتیێ‌ بووین بەرانبەر یانەیا برایتۆن 2-1 گۆلان ژ چارچووڤەیێ‌ گەڕا 11ێ‌ یا خولا پلا نایاب هاتیە كرن كو دبیتە خوسارەتییا چارێ‌ ل دووڤ ئێك د خول و قارەمانیێن جودا دا.
گواردیۆلایی گۆت: دبینت هندەك ئاستەنگ هەبن كارتیكرن ل سەر ئاستێ‌ تیما مە كربیت ژ وانا سێ یاری د قارەمانیێن جودا ب شێوە و پلانێن جودا بووینە یا كۆپا دەستەیا پیشەكارێن ئنگلتەرا، چامپیۆنز لیگ و خولا ئنگلتەرا كو دبنە چار یاری دماوەیێ‌ دو حەفتیان دا، كارتیكرنا جەستەیی ل سەر شیانێن یاریزانان كرییە، لێ‌ بۆ هەوە هەموویان دیار كەم ئەم بێ‌ ئۆمێد نەبووینە و ئەم هێشتا هەڤڕكین و خوە ناڤەكێشم، من دڤێت بەردەوامبن راهێنانان دگەل ڤێ‌ تیما مەزن بكەم.