ب فەرمی هاتە ڕاگەهاند وەلاتێ‌ ئەلمانییا مێڤاندارییا هەڤڕكیێن مۆندیالا 2027ێ‌ یا یارییا تەپا دەستی بكەت، ئەوا بڕیارە ل شەش باژێران هەر ژ 13ێ‌ كانوونا دویێ‌ هەتا 31ێ‌ هەمان مەهـ یا سالا 2027ێ‌ بهێتە كرن.
لژنەیا ڕێكخستنا مۆندیالێ‌ ڕاگەهاند ب فەرمی وەلاتێ‌ ئەلمانیا هاتە دەستنیشانكرن بۆ بڕێڤەبرنا مۆندیالا جیهانی 2027ێ‌، ل دووڤ خشتەیێ‌ هاتییە دانانا ژی هەر ئێك ژ باژێرێن كیێل، ماجدیپۆرگ، میۆنخ و شتۆتگارت قۆناغا ئێكێ‌ مێڤان بكەت، لێ‌ هەردو باژێرێن كۆلن و هانۆڤەر قۆناغا دویێ‌ و دووماهیێ‌ مێڤانبكەت ئەوا بڕیارە ل 13ێ‌ كانوونا دویێ‌ هەتا 31 هەمان مەهـ یا سالا 2027ێ‌ بهێتە كرن، ژێگكرتنا ئەلمانیا ژبەر هەبوونا باشترین ژێرخانەیا وەرزشی و خالێن سەركەفتنا قارەمانیێ‌ و دبیتە جارا هەشتی ئەڤ وەلاتە مێڤانداریێ‌ بكەت، د دووماهی مێڤانداریكرنا وێ‌ ل سالا 2019ێ‌ بوو.

راهێنەرێ‌ ئسپانی و یانەیا مانچستەر ستی یا ئنگلتەرایێ‌ پێب گواردیۆلا دانپێدان ب خەلەتییا خوە كر كو نە شیا ئەوێ‌ پلانێ‌ بدانیت بەرانبەر یانەیا بۆرنمۆس ژ چارچووڤەیێ‌ گەڕا 10ێ‌ یا خولا ئنگلتەرا كو دبیتە خوسارەتییا ئێكێ‌ و بوو ئەگەڕ سەرێ‌ لیستێ‌ ژی ژ دەست بدەت.
د داخویانیەكا رۆژنامەڤانی دا بۆ تۆرا سكای سپۆرت گۆت: مە د زانی دێ‌ یارییەكا ب زەحمەت بیت بەرانبەر یانەیا بۆرنمۆس، ئەو پلانا مە دانایی یا سەركەفتی نەبوو ژبەركو هێلا وان یا بەرەڤانیێ‌ هەموو ڕێك ل مە گرتن یارییا وان یا ب گڤاشتن و توند بوو، لەوما یارییەكا ب زەحمەت بوو ئەم نەشیاین بەرانبەری وان ب ڕاوەستیێن، من خەلەتی د هزركرنێ‌ دا هەبوو، لێ‌ هێشتا ئەم هەڤڕكێن سەرێ‌ لیستێ‌ نە و دێ‌ ڤەگەڕین.
بڤێ‌ خوسارەتیێ‌ تیما مان ستی پاشڤە چوو رێزا دویێ‌ ب 23 خالان ئەوا لیڤەرپۆل هاتییە جهێ‌ وێ‌ ب 25 خالان، یانەیا بۆرنمۆس پێشڤە هاتییە رێزا هەشتێ‌ ب 15 خالان.

گەرمە نووچەیێن راپۆرتێن رۆژنامەڤانی ل هەردو وەلاتێن سعۆدیێ‌ و ئەمریكا بەحسی سۆپرایزەكا سەنگ دناڤبەرا هەردو یانەیێن ئینتەر میامی یا ئەمریكی و هیلال یا سعۆدی دكەن ژبۆ ڤەگۆهاستنا ستێرێ هەلبژارتیێ‌ بەرازیل ژ هیلال بۆ میامی پشتی ژ هنگاڤتنێ‌ ڤەگەڕیایی.
د رۆژنامەیا نیویورك تایمز هاتییە كو یانەیا ئینتەر میامی دەرگەهێ‌ دانۆستاندنێ‌ دگەل یانەیا هیلال یا سعۆدیێ‌ ڤەكرییە و رژدە ل سەر ڤەگۆهاستنا ستێرێ‌ وێ‌ یێ‌ بەرازیلی نیمار داسێلڤای ب شێوەیێ قەر كو د ماوەیێ‌ شەش هەیڤێن مایی یێ‌ گرێبەستا وی دگەل یانەیا هیلال ئەوا دێ‌ ل هاڤینا 2025ێ‌ ب دووماهی هێت بەرۆڤاژی ئەوان شەش هەیڤان ل ئینتەر میامی یاریێ‌ بكەت، ئەڤ بۆچوونە بەرپرسێن هیلال ڕەدنەكرییە لێ‌ بتنێ‌ ڕێكەفتن ل سەر كۆژمەیێ‌ مووچەیێ‌ و دانا پشەكەك ژ گرێبەستا وی و دبیت د ڤێ‌ حەفتیێ‌ دا بهێتە ئێكلا كرن.
د هەمان رۆژنامە دا دیاركرییە كو ئەگەرێ‌ سەرەكی یێ‌ رژدییا یانەیا ئەمریكی ل سەر ئینانا نیماری ل دووڤ داخوازییا یێ‌ ئەرجەنتینی و یاریزانێن میامی لیۆنێل مێسی، یێ‌ ئۆرگۆایی لویس سۆارێز و یێن ئسپانی جورد ئالبا و سێرجیۆ بۆسكێتس بوییە ئەوێن دناڤبەرا سالێن 2013 هەتا 2017ێ‌ هەڤالێن نیمار بووینە.

رەمەزان زەكەریا
د داخویانیەكێ دا سەرۆكێ یانەیا ئاكرێ یا وەرزشی ئاشكرا كر سالا 2024 یا زێرین بوو بۆ یانەیا ئاكرێ یا وەرزشی و شیا چەند ناسناڤا ب دەستڤەبینیت، ناسناڤێ خولا نایابا كوردستانێ و یا دویێ‌ د كۆپا كوردستانێ دا و ناسناڤێ سۆپەرا كوردستانێ كو ئەڤە بۆ یانەیێ و دەستەیا كارگێری و راهێنەرو یاریزان و جەماوەری دەستكەفتێن دیرۆكینە و ل وەرزێن بهێت دێ شەڕ و بزاڤێن یانەیێ پاراستنا ناسناڤان بیت .
زێدەتر سەلاح ئیبراهیم بۆ ئەڤرۆ گۆت: هەر ناسناڤەكێ یانە ب دەستڤە بینیت و دلێ جەماوەری خۆش بكەت هەم پێشكەفتنە و هەم دەستكەفتە بۆ یانەیێ، پشتی ب دەستڤەئینانا ناسناڤێن كوردستانێ ئەركێ ل سەر مللێن یانەیێ گران بوویە، ئەڤرۆ پاشڤە هەر یاریەكا یانە ئەنجام بدەت یانەیا بەرامبەر دێ دگەل یانەیا خودان ناسناڤ یاریێ كەت و ئەڤە ژی دێ بیتە سەدەم هەموو یانە ب هێز ڤە بەرامبەر یانەیا ئاكرێ یاریێ بكەن، لەورا دڤێت خوە ب هێز تر بكەین بۆ پاراستنا ناسناڤان و بەرەڤانیكرنێ بۆ وێ چەندێ وەرزێ نو وهەمان ناسناڤان و زێدەتر ب دەستڤە بینین.
ناڤبری ئەوچەندە ژ گۆت: ل وەرزێ نوو دێ هەموو بزاڤێن یانەیێ بۆ پاراستنا ناسناڤان بیت و دێ یاریا ئەنجامدەین بۆ پاراستنا ناسناڤی و هەر نوكە مە دەست ب گرێبەستا و ئینانا یاریزانا كرییە بۆ وێ چەندێ ئەنجامێن وەرزی نوو ل گۆر خواستا یانەیێ و جەماوەری بن و ئەم بەرهەڤین بۆ وەرزێ بهێت لەوما یا د شیان دابیت دگەل پشتەڤانییا بەردەوام یا حوكمەتا هەرێما كوردستانێ‌ ولایەنێن خەمخۆر بۆ یانەیێ‌ گەشبینن دێ‌ گەهینە ئارمانجێن خوە .

شاهۆ فەرید:

پشتی بۆرینا چەندین مەهێن خوە بەرهەڤكرنێ بۆ هەردو خولێن باسكێت بۆلێ كوردستانێ و ئیراقێ ل سەر ئاستێ‌ پلا ئێك و ژبەر كێشەیێن دارایی كارگێریا یانەیا گارە تیما یا باسكێت بۆلێ ژ هەردو خولا ڤەكیشان و دربەكێ‌ كۆژەكە.
ل دۆر ڤێ‌ چەندێ ڕاهێنەرێ تیمێ گارە خەتاب عومەری د داخویانیەكا تایبەت بۆ رۆژنامەیا ئەڤرۆ دیاركر: ئەز د وێ بڕیارا سەرۆكێ یانەیا گارە نە گەهشتم یا رووهن نەبوو، چەند مەهەك بوون مە خوە بەرهەڤی دكرن، مە نڤیسارێن پشكداریێ فرێكرن بۆ هەردو فیدراسۆنێن كوردستانێ‌ و ئیراقێ‌ و د پشكێشانێ ژی دا ناڤێ مە دگەل دابوو، لێ مە دیت رەوشا یانەیێ‌ شێلیە سەرباری دەستەكا ڕاهێنەران و یاریزان خوەبەخش هاتینە و هەموو پێدڤیێن خوە ژ كیسێ مە مەزاختی كرن و كەسێ خوە ل مە نەكریە خودان، ئەڤە بۆ جارا دویێ یە كارگێریا یانەیا گارە ڤێ چەندێ بەرامبەری مە ئەنجامدەت، هیڤییا مە تیمەكا باسكێت بۆلی بوو و ئەڤ یاریە نەمریت و نوونەراتیا پارێزگەها دهۆكێ بكەن، میكانیزما كارگێریێن یانەیێن ناڤا سەنتەرێ پارێزگەهێ ناگەهم چەوا كاردكەن تنێ گرنگیا دایە فوتبۆلێ‌ وەكۆ یانەیا دهۆك.
زێدەتر ناڤهاتی گۆت: بلا یانەیێن خوە تنێ دەستنیشان بكەن بۆ فوتبۆلێ‌، سەنتەرێن گەنجا ئێدیی گرنگێ نادەنە یاریزانان بۆ یاریا باسكێت بۆلی و ڤۆلی بۆلی، یانەیێن خوارێ گرنگیێ هەموو تیمێن خوە دەن دگەل فوتبۆلێ‌، ئەو بۆدجەیێ یانەیا دهێتن چەوا دمەزێخن، لژنا ئۆلمپی پێرابوونەكێ لسەر یانەیا بكەت كا ئاراستێ وەرزشێ بەرەڤ كیڤەدچیت، پشتی مە تیم هەلوەشاندی یاریزان چوون پەیوەندی ب هندەك یانەیێن دەرڤەیی پارێزگەهێ كرن، یانەیا ئەكەد داخوازیا راهێنەریێ ژمن كر لێ سەر یاریزانان رێكنەكەفتین ژبەركو من داخوازیا چار یاریزانێن خوەكر ئەوان دو یاریزانا دڤیان لەوما نەشیام گرێبەستێ دگەل گرێدەم.