ئه‌ڤرۆ، سالار محه‌مه‌د دۆسكی:
چاڤدێره‌كێ جڤاكی ئه‌نجامدانا گه‌شتێن خێزانی ب كاره‌كێ باش و سه‌ركه‌فتی بۆ خێزانێ دبینیت و دبێژیت: ئه‌ڤ گه‌شته دبنه هێڤنێ ئێكگرتنێ ل پاشه‌رۆژێ.
نێچیرڤان عه‌بدلخالق، چاڤدێرێ جڤاكی بۆ رۆژناما ئه‌ڤرۆ دیار كر كو گه‌شتكرن ب گشتی تشته‌كێ مفاداره، هه‌رچه‌نده گه‌له‌ك جورێن گه‌شتا هه‌نه، به‌لێ گه‌شتێن خیزانی تایبه‌تمه‌ندیا خوه یا هه‌ی و گۆت: (له‌وما دڤێت خێزان ب حه‌كیمانه ڤان گه‌شتان ئه‌نجام بده‌ت و ب شێوه‌كێ به‌ره‌لڵا نه‌بیت، هه‌كه ئه‌و مفایێ چاڤه‌رێكری ژێ ناهێته وه‌رگرتن) .
چاڤدێرێ جڤاكی دیار كر ژی، هه‌كه پلان بۆ گه‌شتا نه‌هێته دانان نابیته جهێ مفای، دبیت گوهورینه‌كا ده‌م كورت بیت بۆ ئه‌ندامێن خێزانێ نه زێده‌تر ، چونكی ئه‌ڤ گه‌شته دڤێت ل ده‌سپێكێ ب دلێ هه‌موویان بیت دا خوشی ژێ بهێته دیتن، هه‌روه‌سا ده‌ستنیشان كرنا جهی ژی زورا گرنگه دا هه‌ر ژ ده‌سپێكا ده‌می ناكوكی چێنه‌بیتن و گۆت: (به‌رهه‌ڤیێ ژبیر نه‌كه‌ین بۆ ڤێ گه‌شتێ چ به‌رهه‌ڤیێن كه‌سی بن یان ژی یێن خێزانی).
نێچیرڤان د به‌رده‌وامیا ئاخفتنێن خوه دا گۆت: (گه‌شتێن خێزانی په‌یوه‌ندیان بهێز دكه‌ن دناڤبه‌را ئه‌ندامێن خێزانێ دا و پتر لێك نێزیكیێ دناڤبه‌را واندا چێدكه‌ت، هه‌روه‌سا ده‌رفه‌ته‌كه كو ئه‌ندامێن خێزانێ فێری هاریكاریێ و كارێ ب كوم ببن، چونكی هه‌ر ئێك دێ پشكه‌كا كاری كه‌تن، هه‌روه‌سا ئه‌ندامێن خێزانێ تێدا فێری تشتێ نوی و پێزانینێن نوی دبن ل سه‌ر گه‌له‌ك جه و تشتان بتایبه‌ت ئه‌و جهێن ژنوو دبینن، ده‌رفه‌ته‌كه بۆ دوور كه‌فتنێ ژ روتینێ مالێ و ناكوكیان).
نێگیرڤان زێده‌تر گۆت: (خێزان دوور دكه‌ڤیت ژ هه‌موو ره‌نگێن ئامیرێن ئه‌لكترونی، باوه‌ری بخوه بون و هه‌ستكرن ب به‌رپرسیاریێ ژلایێ ئه‌ندامێن خێزانێ ڤه په‌یدا دبیت، هاریكاری و ڤیان بهێزتر و موكتر لێ دهێت دناڤبه‌را هه‌موو خیزانێ دا و موكمكرنا ساخله‌تێن باش و نه‌هێلانا یێن خراب لده‌ف ئه‌ندامێن خێزانێ).
ل دووماهیێ، نێچیرڤان عه‌بدلخالق چاڤدێرێ جڤاكی ئاماژه ب گوتنه‌كا مه‌زنا یا كورده‌واری كر ئه‌و ژی ((هه‌ره ملله‌تا دا ب گری عه‌ده‌تا)) ئه‌ڤ گوتنه ب هه‌روه نه‌هاتیه گوتن، به‌لكو چوونا مروڤی بۆ ناڤ ملله‌تێن جودا مروڤی فێری گه‌له‌ك تشتان دكه‌ت وه‌ك عه‌ده‌ت و داب ونه‌رێتێن وان و گۆت: (هه‌روه‌سا زمانێ وان ژبلی جه و وارێ وان ئه‌ڤه هه‌موو دبنه زێده‌هیه‌ك د بیردانكا ئه‌ندامێ خێزانێ دا كو دێ پێزانینێن وی زێده كه‌تن ژبلی كو خوشیا ده‌روونی بۆ چێدبیت ژ ئه‌نجامێ ڤان جوره گه‌شتان) .
نيشاندان