ئه‌ڤرۆ،

دادڤانێ‌ نێڤده‌وله‌تی و كوڕێ‌ باژێرێ‌ سێمێلێ‌ شڤان له‌زگین پێدڤی ب پشته‌ڤانیێ‌ هه‌یه‌ ژبۆ پشكداریێ‌ د قاره‌مانیا جیهانی یا چوونگ چینگ دا یا وه‌لاتێ‌ كوریا باشۆر ئه‌نترناسیۆنال بۆ یاریا تایكۆاندۆیێ‌ ئه‌وا دێ‌ ل دووماهیا هه‌یڤا بهێت ب یاریزانێن پیشه‌كار ل سه‌ر ئاستێ‌ جیهانی هێته‌ كرن.

لدور ڤێ‌ یه‌كێ‌ و د داخویانیه‌كێ‌ دا ناڤهاتی بۆ رۆژناما ئه‌ڤرۆ گۆت:وه‌كو تاكه‌ دادڤانێ‌ نێڤده‌وله‌تی و باوه‌رپێكری سه‌ر ئاستێ‌ ئیراقێ‌ كوردستانێ‌ ژلایێ‌ ئێكه‌تیا نێڤده‌وله‌تی ڤه‌ هاتیمه‌ داخوازكرن بۆ بڕێڤه‌برنا چه‌ند یاریێن قاره‌مانیا نێڤده‌وله‌تی ئه‌وا دێ‌ هه‌ڤڕكیێن وێ‌ ل دووماهیا هه‌یڤا بهێت پایته‌ختێ‌ كوریا باشۆر سیئۆل مێڤانداریا وێ‌ كه‌ت كو باشترین و یاریزانێن پیشه‌كار ل سه‌ر ئاستێ‌ جیهانێ‌ پشكداربن، ده‌ستڤه‌ ئینانا داخوازنامێ‌ بۆ دادڤانێن نێڤده‌وله‌تی ب سانه‌هی نینه‌ ژبه‌ركو لدووڤ هنده‌ك مه‌رج و دووڤچوونا سیڤیێ‌ ئه‌وا دچن، له‌ورا شانازیێ‌ پێ‌ دبه‌م وه‌كو دادڤانێ‌ ئێكه‌نه‌ سه‌ر ئاستێ‌ ئیراقێ‌ و كوردستانێ‌ بۆ قاره‌مانیێ‌ هاتیمه‌ داخازكرن.

ناڤهاتی چوونا خوه‌ ژی بۆ ئه‌ركێ‌ مه‌زن ب هه‌بوونا ئاسته‌نگه‌كێ‌ دا زانین و گۆت: هه‌رچه‌نده‌ نڤێسارا فه‌رمی یا قاره‌مانیێ‌ گه‌هشتیه‌ من لێ‌ ژبه‌ركو چوون و هاتن و مانا مه‌ ل كوریا پێدڤی ب پشته‌ڤانیێ‌ یه‌ و هه‌كه‌ر چو لایه‌ن پشته‌ڤانیێ‌ نه‌كه‌ن دێ‌ هه‌موو هیڤیێن من وه‌كو كورده‌كێ‌ ئێكانه‌ د ناڤ قاره‌مانیه‌كا مه‌زن دا دێ‌ ژ ده‌ست ده‌م، له‌ورا هیڤییا من ئه‌وه‌ ژ پارێزگارێ‌ دهۆكێ‌ د. عه‌لی ته‌ته‌ر و لایه‌نێن په‌یوه‌ندیدار و سه‌رۆكێ‌ نوونه‌راتیا لژنا ئۆلمپیا كوردستانێ‌ پشته‌ڤانیا من بكه‌ن ژبۆ تۆماركرنا دیرووكێ‌ وه‌كو دادڤانه‌كێ‌ كورد دناڤ ئێك ژ مه‌زنترین قاره‌مانیێن نێڤده‌وله‌تی دا.

ره‌مه‌زان زه‌كه‌ریا

د داخویانیه‌كێدا جێگرێ سه‌رۆكێ یانا دینارته‌ دیاركر سه‌رباری دامه‌زراندنا یانا وان یا نوویه‌ لێ‌ شیا هه‌ڤڕكیا هه‌موو یانا ل خولا پله‌ دو یا كوردستانێ بكه‌ت بۆ پلێتا ده‌ربازبوونێ‌ لێ د یاریا دووماهیێ‌ دا نه‌شیا دلێ جه‌ماوه‌رێ خوه‌ خوه‌شبكه‌ت.

زێده‌تر خه‌لیل حسێن بۆ رۆژناما ئه‌ڤرۆ گۆت: خه‌لكێ ده‌ڤه‌رێ گه‌له‌ك هاریكاربوون هه‌ر ئێك ل دووڤ شیانێن خوه‌ پشكداربوون و پشته‌ڤانێ سه‌ره‌كی دلێر فه‌رزنده‌ كو سوزدایه‌ به‌رده‌وام بیت ل گه‌ل یانێ دیسان بۆ وه‌رزێ بهێت ب رێكا كه‌سایه‌تی و لایه‌نێن سیاسی و حكومه‌تێ‌ و رێكا د. سه‌باح مه‌حمود یاریگه‌هه‌ك بۆ یانا دینارته‌ بهێته‌ دروستكرن ببیته‌ داهاته‌ك بۆ برێڤه‌برنا یانێ.

هه‌روه‌سان جێگری یانا دینارته‌ دیاركر غه‌در ل تیما ته‌پا پێی هاتیه‌ كرن لێ نه‌ ژلایێ جه‌ماوه‌ر و پشته‌ڤانێن یانێ ڤه‌ به‌لكو ژلایێ ئێكه‌تیا ته‌پا پێی یا كوردستانێ ژبه‌ركو چه‌ند یانه‌ هاتینه‌ زێده‌كرن ب نه‌یاسایی ، ئه‌م قه‌ردارێن جه‌ماوه‌رێ‌ خوه‌ینه‌ كو هێزه‌ك دابوو یانامه‌ و گۆت: مه‌ پلانێن هه‌ین بۆ گه‌نج و لاوێن ده‌ڤه‌رێ  بدورستكرنا چه‌ند تیمان مفای بگه‌هینن یانێ و یاریزانێن گه‌نج مه‌ ده‌ستنیشانكرینه‌ و بۆ هه‌ر یاریه‌كێ مه‌ پلان هه‌نه‌ و به‌رهه‌ڤی كرینه‌ وه‌رزێ بهێت باشتر وه‌رزشا ده‌ڤه‌رێ به‌ره‌ڤ پێش ببه‌ین.

لدووماهیێ‌ خلیل حسێن گۆت : وه‌كو یانا دینارتێ سوزێ دده‌ین باشتر خوه‌ رێكبێخین و كێماسیا چاره‌سه‌ربكه‌ین و به‌رهه‌ڤبین بۆ خولا پلا دو و سوزێ ده‌ین وه‌رزێ نوی خه‌ونا جه‌ماوه‌ری بكه‌ینه‌ راستی و بگه‌هینه‌ پله‌ ئێك و ده‌سته‌یا راهێنه‌را شیانێن خۆ مه‌زاختن بۆ ڤێ‌ ئارمانجێ‌.

ئه‌ڤرۆ، قه‌یس وه‌یس

وه‌زیرێ‌ وه‌رزش و لاوان ل حوكمه‌تا ئیراقێ‌ و سه‌رۆكێ‌ ئێكه‌تیا ته‌پا پێی دیاركر بۆ وه‌رزێ‌ بهێت چو ده‌لیڤه‌ نه‌ماینه‌ بۆ یانێن پلا نایاب و دێ‌ كار ب سیسته‌مێ‌ پیشه‌كاریێ‌ كه‌ین و هه‌ر یانه‌كا لدووڤ رێنما و راسپاردێن گرێدایی ب خولا پیشه‌كاریێ‌ یا ئێكه‌تیا ئاسیا نه‌كه‌ن مافێ‌ پشكداریێ‌ نینه‌.

زێده‌تر عه‌دنان درجال بۆ ده‌زگه‌هێن راگه‌هاندنێ‌ گۆت: پشتی لژنه‌یێن هه‌ڤپشك ژ ئێكه‌تیا ئیراقێ‌ و ئێكه‌تیا ئاسیا یا ته‌پا پێی كۆمبوونێن جودا كرین، بڕیار هاتیه‌ دان بۆ وه‌رزێ‌ بهێت خولا پیشه‌كاران لدووڤ رێنما و راسپاردێن ئێكه‌تیا ئاسیایی بهێته‌ دانان و گرنگ نینه‌ چه‌ند یانه‌ پشكداربن لێ‌ ئه‌و یانێن د نوكه‌ دا پلا نایابا ئیراقێ‌ یاریێ‌ دكه‌ن ئه‌گه‌ر هه‌موو ئه‌و خالێن هاتینه‌ دانان جهبینن ژوانا هه‌بوونا یاریگه‌هه‌كا نێڤده‌وله‌تی و چاره‌سه‌ركرنا ئاریشا یاریزانان دێ‌ د ناڤ خولا پیشه‌كاران مینن، ده‌لیڤه‌ بۆ چو یانا نه‌ مایه‌ ژبه‌ركو ئه‌ڤه‌ ماوه‌كێ‌ درێژه‌ ئه‌م داخوازێ‌ ژ یانا دكه‌ین بۆ جهئینانا رێنما و راسپاردان و دڤێت بجهبینن پێخه‌مه‌ت زێده‌كرنا یانێن ئیراقێ‌ بۆ چامپیۆنزا ئاسیا ژ یانه‌كێ‌ بۆ زێده‌تری دو یانا و ڤه‌گه‌ڕاندنا هێزا ئیراقێ‌ د هه‌لكه‌فتێن ئاسیا و عه‌ره‌بی دا.

ئه‌ڤرۆ،

تیما یانا ریال مه‌درید یا ئسپانی ب ناسناڤێ‌ قاره‌مانیا یانێن ئۆرۆپا قاره‌مانێن خولا چامپیۆنز لیگ هاته‌ خه‌لاتكرن پشتی شیایی سه‌ركه‌ڤیت ل سه‌ر هه‌ڤڕكا خوه‌ یانا لیڤه‌رپۆل یا ئنگلێزی ب گۆله‌كێ‌ بێ‌ به‌رامبه‌ر، د یاریا واندا ئه‌وا ل شه‌ڤا شه‌مبیا بوری ژ چارچووڤێ‌ یاریا دووماهیێ‌ ل یاریگه‌ها سان دونی یا پاریسا پایته‌ختێ‌ فره‌نسا هاتیه‌ كرن، گۆلا ریالێ‌ ژلایێ‌ ستێرا وێ‌ ڤێنێسیۆس جۆنیرۆ د خوله‌كا 59ێ‌ دا تۆماركر و تیما خوه‌ به‌ره‌ ب ناسناڤێ‌ 14ێ‌ یێ‌ قاره‌مانیێ‌ بر.

• كاروانێ‌ ریال مه‌درید د قاره‌مانیێ‌ دا

یانا ئسپانی د كۆما چارێ‌ دا هه‌مبه‌ری یانێن ئه‌نتر میلان یا ئیتالی، شیریڤ تراسبۆل یا مۆلدیڤیا و شاختار دۆنێسك یا ئۆكراین و شیا ب كۆمكرنا 15 خالان رێزا ئێكێ‌ بهێت و ده‌ربازبیته‌ قۆناغا 16ێ‌ و كه‌فته‌ هه‌مبه‌ری ئێك ژ بهێزترین یانێن قاره‌مانیێ‌ پاریس سانجێرمان یا فره‌نسی  ئه‌وا د یاریا ئێكێ‌ دا ب گۆله‌كێ‌ یا خوساره‌ت بوو و دیاریا دویێ‌ دا تیما فره‌نسی گۆلا ده‌ستپێكێ‌ ئینابوو لێ‌ ریال شیا سێ‌ گۆلان بینت و ده‌ربازبیته‌ قۆناغا چارێك دووماهیێ‌ و هه‌مبه‌ری چێلسی یا ئنگلێزی بیت، د یاریا ئێكێ‌ یانا ئسپانی ب 3-1 سه‌ركه‌فتی بوو،  د یاریا دویێ‌ دا ب سێ‌ گۆلا یا پاشكه‌فتی بوو لێ‌ شیا دو گۆلان د خوله‌كێن 80ێ‌ و 96ێ‌ دا تۆماربكه‌ت و سه‌رجه‌مێ‌ گشتی یێ‌ هه‌ردو یاریا پێنچ ب چار گۆلان بینت و ده‌ربازبیته‌ قۆناغا پێش دووماهیێ‌ و كه‌فیته‌ به‌رامبه‌ر مان ستی، د ڤێ‌ قۆناغێ‌ دا ل گه‌ل مان ستی یا ئنگلێزی یا ئێكێ‌ ب چار گۆلان به‌رامبه‌ر سێ‌ گۆلان یا خوساره‌ت بوو، د یاریا دویێ‌ دا سه‌رباری خوساره‌تیا وێ‌ ب گۆله‌كێ‌ هه‌تا خوله‌كا 89 دا، لێ‌  خوله‌كا 90 و ماوێ‌ زێده‌كری یێ‌ هه‌ردو چارێكێن یاریێ‌ ریال مه‌درید شیا سێ‌ گۆلا پێشكه‌فیت و سه‌رجه‌مێ‌ هه‌ردو یاریا شه‌ش گۆلان به‌رامبه‌ر پێنچ گۆلان ده‌ربازبیته‌ یاریا دووماهیێ‌ كو دهێته‌ هژمارتن نمرا پیڤایی هه‌مبه‌ری سێ‌ بهێزترین یانێن ئۆرۆپا سێ‌ ریمۆنتادا دا لدووڤ ئێك تۆماربكه‌ت، د یاریا دووماهیێ‌ دا هه‌مبه‌ری لیڤه‌رپۆل شیا بگه‌هیته‌ ئارمانجا خوه‌ و ب گۆله‌كێ‌ ناسناڤێ‌ خوه‌ یێ‌ 14ێ‌ تۆماربكه‌ت.

• ئامارێن جودا یێن یانا ئسپانی

پشتی ب ده‌ستڤه‌ ئینانا ناسناڤێ‌ خوه‌ یێ‌ 14ێ‌ یانا ئسپانی و چه‌ند یاریزان و راهێنه‌رێ‌ وێ‌ ئامارێن جودا تۆماركرن، ریال مه‌درید شیا به‌رده‌وامیێ‌ بده‌ته‌ پیشه‌نگا خوه‌ ل سه‌ر ئاستێ‌ قاره‌مانیا ئۆرۆپا پشتی 13 ناسناڤێن دی و بڤی ره‌نگی، 1956- 1957- 1958- 1959- 1966- 1998- 2000- 2002- 2014- 2016- 2017- 2018، دیسان گۆلپارێزێ‌ وێ‌ تیبۆ كۆرتۆا وه‌كو باشترین یاریزانێ‌ یاریێ‌ هاته‌ ده‌ستنیشانكرن، ژلایێ‌ خوه‌ڤه‌ راهێنه‌ر كارلۆ ئه‌نچلۆتی بۆ جارا چارێ‌ ناسناڤێ‌ چامپیۆنزێ‌ ده‌ستخوه‌ڤه‌ دئینت دو جاران ل گه‌ل یانا ئسپانی و دو جاران ل گه‌ل میلانا ئیتالی، هێرشبه‌رێ‌ ریالێ‌ ڤینیسیۆس ب گۆلا ناسناڤێ‌ 14 شیا وه‌كو بچووكترین یاریزانێ‌ ژ دایكبوویێ‌ 2000 ناڤێ‌ خوه‌ د تۆمارا گۆلكه‌ران تۆماربكه‌ت، هه‌روه‌سان كه‌ریم بنزێما ب خه‌لاتێ‌ گۆلكه‌رێ‌ قاره‌مانیێ‌ هاته‌ خه‌لاتكرن پشتی شیایی 15 گۆلان تۆماربكه‌ت وپێشكه‌ڤیت لسه‌ر هێرشبه‌رێ‌ بایرن میونخ یا ئه‌لمانی ئه‌وێ‌ 13 گۆل تۆماركرین، یانا ریال مه‌درید مفادارێ‌ ئێكێ‌ یێ‌ داهاتیێ‌ یاریا دووماهیێ‌ بوو دیسان داهاتیێ‌ مافێ‌ ڤه‌گۆهاستنێن تله‌فزیونی و جه‌ماوه‌ری كو سه‌رجه‌مێ‌ وان 105.34 ملیۆن یۆرۆیان قازانج كرن، بتنێ‌ دیاریا دووماهیێ‌ دا 15.5 ژلایێ‌ ئێكه‌تیا ئۆرۆپا وه‌كو قاره‌مانا چامپیۆنزێ‌ هاته‌ خه‌لاتكرن.

• به‌ربژارێن باشترین یاریزان هاته‌ دیاركرن

ئێكه‌تیا ته‌پا پێی یا ئۆرۆپا لیستا باشترین به‌ربژارێن باشترین یاریزان بۆ قاره‌مانیا چامپیۆنز هاتنه‌ دیاركرن ئه‌وژی، تبیۆ كورتۆا،كاسێمێرۆ و ڤینیسیۆس ژ ریال مه‌درید، ئیبراهیم كۆناتی ژ لیڤه‌رپۆل.

• ژڤانێ‌ سۆپه‌را ئۆرۆپا هاته‌ دیاركرن

بڕیاره‌ ل 10ێ‌ ته‌باخا بهێت یاریگه‌ها هلسنگی یا ئۆلمپی یا وه‌لاتێ‌ فنله‌ندا مێڤانداریا یاریا سۆپه‌را ئۆرۆپا د ناڤبه‌را قاره‌مانا خولا ئۆرۆپا یانا فرانكفۆرت یا ئه‌لمانی هه‌مبه‌ری قاره‌مانا چامپیۆنز لیگ ریال مه‌درید بكه‌ت.

• گشت ناسناڤێن ریال مه‌درید

یانا ریال مه‌درید شیایه‌ 85 ناسناڤێن جودا یێن قاره‌مانیێن ئسپانیا و ئۆرۆپا ده‌ستخوه‌ڤه‌ بینت و بڤی ره‌نگی خوارێ‌، خولا ئسپانیا 35 جاران، كۆپا ئسپانیا 19 جاران، چامپیۆنز لیگ 14 جاران، سۆپه‌را ئسپانیا 12 جاران، مۆندیالا یانێن جیهانێ‌ چار جاران، سۆپه‌را ئۆرۆپا چار جاران، قاره‌مانیا ئه‌نتركۆنتینتال سێ‌ جاران، كۆپا ئێكه‌تیا ئۆرۆپا دو جاران،كۆپا خولان چاره‌كێ‌، كۆپا ئیڤا دوراتی چاره‌كێ‌.

• بنزیما خودان ده‌ستكه‌فته‌

ئامارێن یاریزانێ‌ فره‌نسی و یانا ریال مه‌درید كه‌ریم بنزێمه‌ دۆپات دكه‌ن كو 30 ناسناڤ د كاروانێ‌ خوه‌ یێ‌ ته‌پا پێی دا ب ده‌ستڤه‌ ئیناینه‌ و دهێته‌ هژمارتن یاریزانێ‌ ئێكانه‌ یێ‌ فره‌نسی بۆ ده‌ستكه‌فتێن مه‌زن و بڤی ره‌نگی، ل گه‌ل یانا خوه‌ یا ئێكێ‌ لیۆن یافره‌نسی چار خول، دو كاسا قاره‌مانێن فره‌نسا و ئێك كۆپا فه‌رنسا، هه‌روه‌سان ل گه‌ل ریال مه‌درید پێنچ چامپیۆنز، چار خولێن ئسپانیا، چاركاسا جیهانی، چار جاران سۆپه‌را ئسپانی، سێ‌ سۆپه‌را ئۆرۆپا، دو كاسا شاهی، دیسان ل گه‌ل هه‌لبژارتیێ‌ فره‌نسا قاره‌مانیا نه‌ته‌وه‌ێن ئۆرۆپا جاره‌كێ‌ ده‌ستڤه‌ ئیناینه‌.

• 10 یاریزانێن ریالێ‌ پێنچ جاران چامپیۆنز ده‌ستڤه‌ ئینایه‌

ئه‌و یاریزانێن ل گه‌ل یانا ریال مه‌درید زێده‌تر ناسناڤێ‌ چامپیۆنز لیگ ده‌ستخوه‌ڤه‌ ئینایی كو هه‌ر ئێك پێنچ جاران ناسناڤ بلندكریه‌ ئه‌وژی، كرستیانۆ رۆنالدۆ، كه‌ریم بنزێمه‌، كاریس بێل، دانی كارباخال، كاسیمیرۆ، ئسیكۆ، تۆنی كروز، مارسێلۆ، لۆكا مۆدرێچ و ناتچۆ.