زاخۆ، دلۆڤان هالۆ:

عۆمەر ئۆرەیی، بەرپرسێ لقێ هەشت یێ‌ پارتی دیموكراتی كوردستان ل زاخۆ ب هەڤالینیا شاندەكێ كارگێری، سەرەدانا خێزانا شەهیدێ قەهرەمان (حەمید حەفزوللا سندی) كر، د ڕوونشتنا خوە دا شاندێ لقێ هەشت ژ نێزیك ڤە ل سەر ڕەوشا ساخلەمیا خێزانا شەهیدی و ژین و ژیارا وان ئاگەهدار بوو.
بەرپرسێ لقێ هەشت یێ‌ پارتی ل زاخۆ پەسنا خەبات و نیشتیمانپەروەریا شەهیدێ قەهرەمان (حەمید حەفزوللا سندی) كر، د داستان و شۆڕەشێن كوردستانێ دا و پێخەمەت وێ رێبازێ ژی جانێ خوە فیدا كر.
ل دوماهیێ ژی عومەر ئۆرەیی، گوهداریا ئاخفتنێن خێزانێ كر و بەرهەڤیا خوە بۆ هەر هاریكاری و پشتەڤانیەكێ نیشا دا و گۆت: «ب ئەركێ خوە دزانین خزمەتا خێزانێن شەهیدان بكەین».

ب بڕیارا مەسرور بارزانی، سەرۆكێ‌ حوكمەتا هەرێما كوردستانێ‌ پارچەیێن ئەردی ل سەر فەرمانبەر و پێشمەرگە و زیندانیێن سیاسی ل سەرانسەری هەرێما كوردستانێ‌ دێ‌ هێنە بەلاڤكرن، د ڤی چارچوڤی ژی دا، بڕیارە حەفتیا بهێت ل سنوورێ‌ دەڤەرداریا دهۆكێ‌ ژی دەست ب بەلاڤكرنا پارچەیێن ئەردی بهێتە كرن.
دیار بەحری، ڕێڤەبەرێ گشتیێ باژێرڤانیان ل پارێزگەها دهۆكێ ڕاگەهاند؛ حەفتیا بهێت زێدەتری هزار پارچەیێن ئەردی ل سنوورێ دەڤەرداریا دهۆكێ دێ هێنە بەلاڤكرن.
ڕێڤەبەرێ گشتیێ باژێرڤانیان ل پارێزگەها دهۆكێ ئاشكرا ژی كر، ل دووڤ ڕێكاران ئەو دشێن ڕۆژانە 400 پارچەیێن ئەردی بەلاڤ بكەن.

زاخۆ، دلۆڤان هالۆ:

ئەندازیار نێچیرڤان شاهین، ژ باژێرڤانیا زاخۆ بۆ ڕۆژناما ئەڤرۆ دیار كر كو د بەردەوامیا پڕۆژەیێن خزمەتگوزاری دا ئەوێن ل زاخۆ دهێنە بجهئینان، جاددەیا 20 مەتری ل تاخێ مهاباد هاتە قێركرن.
نێچیرڤان شاهین، ئاماژە ب وێ چەندێ ژی كر كو ئەو جاددەیە ب درێژاهیا 160 مەتران هاتە قیركرن، ل گەل كۆنكریتكرنا دو كولانان، دیسا چاككرنا هێلێن ئاڤێ و كارەبێ ب درێژاهیا 130 مەتران و گۆت: «ئەڤ پڕۆژە ژ لایێ سەرۆكاتیا باژێرڤانیا زاخۆ ڤە و ل سەر پێشینەیا هەیڤانە یا باژێرڤانیێ هاتە بجهئینان».

پەیڤدارا كۆمسیۆنا بلندا سەربخوە یا هەلبژارتنان ل ئیراقێ‌ ئاشكرا كر، بڕیارە ئەڤرۆ 30/10/2024 ئەنجامێن دووماهیێ‌ یێن هەلبژارتنێن خولا شەشێ‌ یا پەڕلەمانێ‌ كوردستانێ‌ بهێنە راگەهاندن.
جومانە غەلای: پەیڤدارا كمسیۆنا بلندا سەربخوە یا هەلبژارتنان ل ئیراقێ‌ ئاماژە ب وێ‌ چەندێ‌ ژی كر، ئەڤرۆ رۆژا چارشەمبی و ل دەمژمێر 10:00ێ سپێدێ ئەنجامێن دووماهیێ یێن هەلبژارتنان بۆ خولا شەشێ یا پەرلەمانێ كوردستانێ دێ‌ هێنە ڕاگەهاندن.
وەكو دیار ل رۆژا 20/10/2024 هەلبژارتنێن خولا شەشێ‌ یا پەرلەمانێ‌ كوردستانێ‌ هاتنە ئەنجامدان و پارتی دیموكراتی كوردستان سەركەفتیا ئێكێ‌ بوو.

سندس سالح سلێڤانەیی:

ئاكنجیێن تاخێ كێڤلا ب چێكرنا جۆت سایدێ وی تاخی د دلخۆشن، بەلێ دبێژن ئەڤ چەندە بەس نینە و ئەم دخوازین جادە و كولانێن ناڤخۆی ژی بهێنە چێكرن و باژێرڤانیا تەناهی ژی دبێژیت: وان ئاگەه ژ داخوازیێن وان هەیە و دێ بۆ هێنە چێكرن.
‎شوكری جومعە، ئاكنجیەكێ وی تاخی یە دبێژیت: ب راستی ب چێكرنا جۆت سایدی ئەم گەلەك دلخۆش بووین و سوپاسیا باژێرڤانیێ دكەین، لێ دێ گەلەك دلخۆشتر بیت هەكە جادە و كولانێن ناڤخۆی ژی بوومە چێكەن، چنكو ل وەرزێ زڤستانێ ب تایبەت دەمێ باران دهێن ژبەر تەقنێ ژیان ل ڤی تاخی گەلەك ب زەحمەت دكەڤیت.
‎مەجید حسێن، ئاكنجیەكێ وی تاخی یە دو كوڕێن وی دچنە قوتابخانێ دبێژیت: هاتن و چوونا قوتابیان بۆ قوتابخانێ گەلەكا ب زەحمەتە، چنكو ل وەرزێ هاڤێنی تۆزە و ل زڤستانێ ژی هەڕی و تەقنە، لەورا فەرە لەز د چێكرنا جادەیێن تاخی دا بهێتە كرن دا ژڤێ ئاریشەیێ رزگار بین.
‎ئەندازیار (حەمید عەبدولرەحمان) ژ باژێرڤانیا تەناهی بەرسڤا وان گازندەیان دا و گۆت: مە ئاگەه ژ وی تاخی هەیە و دو پرۆژە بۆ هاتینە دانان، یێ ئێكێ ب گۆژمێ (800) ملیۆن دینارانە ل نێزیك دێ دەستپێكەین و یێ دویێ ژی ب (400) ملیۆن دینارانە و ب ئەنجامدانا وان دێ گەلەك ئاریشەیێن تاخێ كێڤلا چارەسەربن.