دهۆك، له‌زگین جوقی
پشتی ئاواره‌بوونا خه‌لكێ شنگال ژ ئه‌گه‌رێ جینوسایدا سالا 2014ێ، كچێن ئێزدیان ب تایبه‌تی ژی كچێن ئاواره ده‌ست ب خواندنێ كرینه، نوكه رێژا خوینده‌واریێ د ناڤ كچان دا گه‌له‌ك زێده‌بوویه.
مه‌یسه‌ر حه‌جی، رێڤه‌به‌رێ په‌روه‌ردا قه‌زا شنگال بۆ ئه‌ڤرۆ دیار كر:” رێژا خوینده‌ڤانی دناڤ كچێن ئاواره یێن ئێزدی دا گه‌له‌ك زێده‌بوویه، ئه‌ڤه پێنگاڤه‌كا گه‌له‌ك باشه كچ قه‌ستا خواندنێ دكه‌ن، به‌رێ جینوسایدا شنگال ل سالا 2014ێ رووبده‌ت گه‌له‌ك ژ كچێن شنگال نه‌دشیان به‌رده‌وامێ ب خواندنا خۆ بده‌ن، ژبه‌ركو ل هنده‌ك گوندان قوتابخانا نه‌بوون هه‌تا ژی ده‌مێ كچێ خواند پشتی چه‌ند سالان ده‌ست ژ خواندنێ به‌ردان و نه‌شیان بچنه زانكۆ و په‌یمانگه‌هان، ژبه‌ركو بۆ هنده‌ك خێزانان ده‌ست نه‌دا كچێن خۆ ره‌وانه‌ی زانكۆ و په‌یمانگه‌هێن مووسل و پارێزگه‌هێن دێ یێن عێراقی بكه‌ن”.
رێڤه‌به‌رێ په‌روه‌ردا قه‌زا شنگال ئاشكه‌را كر:” پشتی جینوسایدا شنگال، خه‌لكێ شنگال ئاواره‌یێ هه‌رێما كوردستانێ بووین، كچان ده‌ست ب خواندنێ كرن و حۆكمه‌تا هه‌رێما كوردستانێ هه‌موو پشته‌ڤانیێ ل ڤه‌كرنا قوتابخانه‌یان دناڤ كه‌مپێن ئاواره دا كرن، هه‌روه‌سا ژی زانكۆ و په‌یمانگه‌هێن هه‌رێما كوردستانێ ده‌رگه‌هێن خۆ بۆ خه‌لكێ شنگال ب گشتی ڤه‌كرن، ئه‌ڤه بوو ئه‌گه‌ر خه‌لك پتر قه‌ستا خواندنێ بكه‌ن، نه‌خاسمه ژی كچ نوكه گه‌له‌ك قه‌ستا خواندنێ دكه‌ن”.
ئاماژه دا وێ چه‌ندێ ژێ:” رێژا زێده‌بوونا خوینده‌ڤانی دناڤ كچان دا بوویه ئه‌گه‌ر ره‌وشا هنده‌ك خێزانێن ئاواره باشتر بیت، چونكو كچ ژی پشتی ده‌رچووین هاتینه دامه‌زراندن و داهاتیه‌كی بۆ خێزانا خۆ په‌یدا دكه‌ن، ب شیوه‌یه‌كێ گشتی پێشكه‌ڤتن چێبوویه و نوكه هنده‌ك قوتابخانه هه‌نه 55% كچن و 45% كورن ئه‌ڤه وێ دگه‌هینیت رێژا كچان بۆ خواندنێ زێده‌بوویه بوویه سێ قات و چار قات ژ جاران رێژا خوینده‌ڤانی زێده‌بوویه”.
ئه‌حلام ، كچه‌كا ئاواره شنگال ل كه‌مپا شاریا دخوینیت دیار كر:” به‌ری جینوسایدا شنگال رووبده‌ت مه نه‌شیا بچینه خواندنێ، پشتی ئه‌م ئاواره‌بووین مه قه‌ستا خواندنێ دكر، ئه‌م ئێك ژ وان كچان بووم ل شنگال من نه‌شیا بخوینن، لێ پشتی ئاواره‌بوویم رێك ل به‌ر هاتنه ڤه‌كرن بچمه قوتابخانێ گه‌له‌ك كچێن ئاواره نوكه قه‌ستا خواندنێ دكه‌ن، كچ هه‌نه چووینه زانكۆ و په‌یمانگه‌هان و پله‌یێن باش بده‌ستخۆڤه‌ئیناینه، نوكه گه‌له‌ك ژ كچێن ئاواره بووینه ده‌رچوویێن زانكۆ و په‌یمانگه‌هان”.
ئاشكه‌را كر:” پتریا خه‌لكێ شنگال بووینه ده‌رچوویێن ئێكی و دوویێ و سیێ ل سه‌ر ئاستێ زانكۆ و په‌یمانگه‌هان، گه‌له‌ك كه‌س بووینه نوژدار و نوكه دناڤ ده‌زگه‌هێن ساخله‌میێ دا خزمه‌تا نه‌خۆشان دكه‌ن”.
نيشاندان