هه‌ولێر، سولین سلێمان
رێڤه‌به‌رێ گشتیێ كه‌شناسی و بیڤه‌له‌رزان ل هه‌رێما كوردستانێ راگه‌هاند، ژ ئه‌گه‌رێ گه‌رده‌لولێن بهێز ئاخ بارین دروست دبیت و ئه‌ڤ نزمه په‌ستانا ژ باشورێ رۆژئاڤایێ عیراقێ گرتیه‌ڤه و بویه ئه‌گه‌رێ بلندبوونا شه‌پولا تۆزێ و ئاخبارینێ ل ناڤچه‌یێن ناڤه‌راستا عێراقێ.
فازل ئیبراهیم، رێڤه‌به‌رێ گشتیێ كه‌شناسی و بیڤه‌له‌رزان ل هه‌رێما كوردستانێ بۆ رۆژناما ئه‌ڤرۆ دیاركر، ژ به‌ر نزمبوونا په‌ستانا ل باكورێ ئه‌فریقیا، ئه‌ف ئاخبارینه هه‌رێما كوردستانێ ژی ڤه‌گرتیه، دیسا ژی هه‌وایه‌كێ هشك دگه‌لدایه كو كاریگه‌ریێن خراب ل پشت خوه هێلاینه و گۆت: ئه‌م پێشبینیێ دكه‌ین ئه‌ڤ شه‌پولێن ئاخبارینێ دووباره دبنه‌ڤه.
ده‌ربارێ ئه‌گه‌رێن ڤێ ئاخبارینێ فازل ئیبراهیم گۆت: وه‌لاتێ مه به‌رده‌وام دبن گورانكاریێن كه‌ش و هه‌وایدانه، دیسا ژی كێم باراینا بارانێ دبیته ئه‌گارێ هشكه‌سالیێ، ئه‌گه‌ره‌كێ دی ژی ئه‌وه وه‌كی نوكه ئه‌م دبینین كومه‌لگه‌هێن نیشته‌جێبوونی د زێده‌بونێ دانه و چاندنا داروبارا و كه‌سكاتیێ یا كێمه، ئه‌ڤه ب خوه ژی گه‌له‌كا خرابه، چونكو ئه‌ڤ چه‌نده دبنه ئه‌گه‌ر له‌زاتیا بای كێم ببیت و ئاخبارینێ دروست بكه‌ت.
دیسا ژی گۆت: هه‌ر چه‌نده ئاخبارین دیارده‌كا سروشتیه، لێ ئه‌م پێشبینیێ دكه‌ین د 30 سالێن داهاتیدا سالانه 300 رۆژا ئاخ بباریت، چونكو ئه‌گه‌ر ئه‌م به‌راوردیێ ب سالێن بوری بكه‌ین، دێ بینین ئاخبارین گه‌له‌ك زێده‌بوویه. ئه‌م ژ خه‌لكێ خوه دخازین خوه بپارێزن. هنده‌ك ئاخبارین گه‌له‌ك دهشكن، ئه‌گه‌ر ماسكێ ژی دانی ئاخ دبن ماسێكڤه دچیته ناڤ سینگیدا، ئه‌ڤجا باشتره خه‌لك د ده‌مێ ئاخبارینێ ل مالێن خوه دا بمینن، ب تایبه‌رتی ژی ئه‌وێن نساخیا چاڤ و ره‌بویێ هه‌ی، یان ژی ئه‌و ن نه‌خۆشێن نه‌خوشیا درێژ خایه‌ن هه‌ی. زێده‌تر دبێژیت: پێدڤیه خه‌لك گه‌له‌ك كه‌سكاتیا و داروباران ل مالێن خوه و ل هه‌ر جهه‌كی بچینن، دا كو رێكی ل ڤێ ئاخبارینێ بهێته گرتن و چاندنا ئه‌و دارێن وه‌كی دار خورما و دار زه‌یتون گه‌له‌ك جورێن دیێن دارا ب ڤێ رێكێ ئاخبارین دێ كێم بیت.
شیلان ئازاد خانمه‌كا توشبویا نه‌ساخیا ره‌بویێیه ژ بۆ ئه‌ڤرۆ گۆت: هه‌ر ده‌مێ ئاخبارین ده‌ست پێدكه‌ت پێدڤیه بله‌ز ئه‌ز د نه‌خوشخانێ ڤه دبن ئوكسجینێ ڤه بم، چونكو ئه‌ڤه ٨ ساله من ئه‌ڤ نه‌ساخیه هه‌ی، هه‌ر چه‌نده ئه‌ز گه‌له‌ك خوه دپارێزم ژ ئاخبارینێ، لێ هنده‌ك جارا ئاخبارینێ گه‌له‌ك یا ب هێزه و پێدڤیه سه‌ره‌دانا نه‌خوشخانێ بكه‌م ژ بۆ چاره‌سه‌ریا خوه.
نيشاندان