ئه‌ڤرۆ، عه‌لی حاجی:

هاریكارێ‌ راهێنه‌رێ‌ هه‌لبژارتیێ‌ ئیراقێ‌ یێ‌ یاریا باسكێت بۆلێ‌ بۆ ئاستێ‌ تازه‌پێگه‌هشتیان دیاركر هه‌تا دووماهیا ڤێ‌ حه‌فتیێ‌ كه‌مپێ‌ وان یێ‌ راهێنانێ‌ ل پارێزگه‌ها دهۆكێ‌ دانایه‌ ژبۆ خوه‌ به‌رهه‌ڤكرن بۆ قاره‌مانیا رۆژئاڤا ئاسیا ئه‌وا چاڤه‌ڕێ‌ دهێته‌ كرن ل هه‌یڤا بهێت هه‌ڤڕكیێن وێ‌ وه‌لاتێ‌ ئوردن مێڤانداریا وێ‌ بكه‌ت.

زێده‌تر جوتیار عه‌لی د داخویانیه‌كێ‌ دا بۆ رۆژناما ئه‌ڤرۆ گۆت: پشتی ب دووماهی هاتنا كه‌مپێ‌ ئێكێ‌ ل به‌غدا هه‌لبژارتیێ‌ تازه‌پێگه‌هشتیێن ئیراقێ‌ كه‌مپێ‌ خوه‌ یێ‌ دویێ‌ ل هه‌شتێ‌ ڤێ‌ هه‌یڤێ‌ ل پارێزگه‌ها دهۆكێ‌ دانایه‌ و هه‌تا دووماهیا ڤێ‌ هه‌یڤێ‌ به‌رده‌وام بیت كو روژانه‌ دو یه‌كێن راهێنانێ‌ ب سه‌رپه‌رشتیا راهێنه‌رێ‌ جورجی هێته‌ كرن ئه‌وا سێ‌ یاریزانێن هه‌رێمێ‌ ل گه‌ل دانا دو ژ زاخۆ و ئێك یێ‌ سلێمانیێ‌ یه‌ و لدووڤ پلانا هاتیه‌ دانان كار ل سه‌ر لایه‌نێ‌ هونه‌ری، ته‌كتیكی و هێزا له‌شی بشێوی خشته‌ هاتیه‌ دانان ژبه‌ركو ده‌مه‌كێ‌ كێم مایه‌ بۆ پشكداریا قاره‌مانیا رۆژئاڤا ئاسیا ئه‌وا بڕیاره‌ ل هه‌شتێ‌ گۆلانا بهێت ده‌ستپێكه‌ت و كه‌مپێ‌ پارێزگه‌هێ‌ باشترین شێوه‌ دهێته‌ بڕێڤه‌برن.

ناڤهاتی ئه‌وچه‌نده‌ ژی گۆت: هه‌ر لیسته‌كا پێكهاتیێ‌ هه‌لبژارتیێ‌ ئیراقێ‌ بهێته‌ راگه‌هاندن دێ‌ یاریزانێن زاخۆ ژی د ناڤ دا هه‌بن و ل سه‌ر هه‌موو ئاستان و ئه‌ز هاتیمه‌ راسپاردن بۆ به‌رهه‌ڤكرنا دو یاریزانێن دی لسه‌ر ئاستێ‌ پێشكه‌فتیان و ئه‌ڤچه‌نده‌ ژبه‌ر وێ‌ باوه‌ریێ‌ و ئاست بلندیا تیما زاخۆیه‌ د خولێن ئیراقێ‌ دا و گۆت: هه‌بوونا یاریزانێن كورد ل گه‌ل پێكهاتیێن ئیراقێ‌ ب گرنگی دبینم و به‌لگه‌یه‌ ل سه‌ر ئاست و شیانێن وان و دێ‌ زێده‌تر به‌ره‌ڤ پیشه‌كاریێ‌ چن و قۆناغه‌كا باشتر یا باسكێت بۆلێ‌ ده‌رباز دكه‌ین، له‌ورا هیڤییا مه‌ ئه‌وه‌ جهێن په‌یوه‌ندیدار پشته‌ڤانیا گه‌نج و لاوێن ڤێ‌ یاریێ‌ بكه‌ن.

بۆ زانین ژلایه‌كێ‌ دووڤه‌ سه‌ر ئاستێ‌ پێشكه‌فتیان ژی سێ‌ یاریزانێن هه‌رێما كوردستانێ‌ بۆ پێكهاتیێ‌ ئیراقی هاتینه‌ داخوازكرن ئه‌وژی، موراد عه‌لی و فه‌رید ره‌عد ژ پارێزگه‌ها دهۆكێ‌ و محه‌مه‌د عه‌بدولخالق ژ هه‌ولێرا پایته‌خت.

ئه‌ڤرۆ، قه‌یس وه‌یس:

سه‌رۆكێ‌ ئێكه‌تیا پایسكلان ل هه‌رێما كوردستانێ‌ دیاركر هه‌لبژارتیێ‌ ئیراقێ‌ ئه‌وا نوكه‌ كه‌مپێ‌ راهێنانێ‌ ل دهۆكێ‌ دانایی دێ‌ پشتبه‌ستنێ‌ ب سێ‌ یاریزانێن پارێزگه‌ها دهۆكێ‌ كه‌ت خوه‌ به‌رهه‌ڤكرن بۆ قاره‌مانیا عه‌ره‌بی.

زێده‌تر د داخویانیه‌كێ‌ دا هشیار فه‌ریق هه‌ڤده‌م ئه‌ندامێ‌ كارگێریا یانا دهۆكه‌ بۆ رۆژناما ئه‌ڤرۆ گۆت: خوه‌ به‌رهه‌ڤكرن بۆ قاره‌مانیا عه‌ره‌بی هه‌لبژارتیێن ئیراقێ‌ سه‌ر ئاستێ‌ پێشكه‌فتیان و ئۆلۆمپی كه‌مپه‌كێ‌ راهێنانێ‌ ل پارێزگه‌ها دهۆكێ‌ دانایه‌ به‌ری پشكداری قاره‌مانیێ‌ بیت ئه‌وا دهێته‌ چاڤه‌ڕێ‌ كرن ل ده‌ستپێكا چڕیا ئێكێ‌ یا بهێت هه‌ڤڕكیێن وێ‌ ل ئێك ژ وه‌لاتێن رۆژئاڤا عه‌ره‌بی بهێته‌ كرن و ئه‌ڤ كه‌مپه‌ دێ‌ بۆ ماوێ‌ 20 رۆژان به‌رده‌وام بیت به‌ری بكه‌ڤنه‌ د كه‌مپێ‌ ده‌رڤه‌ یێ‌ وه‌لاتێ‌ ئیرانێ‌ دا كو دێ‌ رۆژانه‌ لدووڤ پلانێن تایبه‌ت ب سه‌رپه‌رشتیار راهێنه‌رێ‌ ئیرانی و هاریكارێ‌ وی یێ‌ پارێزگه‌ها دهۆكێ‌ تارق سه‌عید هێنه‌ بڕێڤه‌برن و گۆت: هه‌رسێ‌ كوڕێن پارێزگه‌هێ‌ ئه‌وێن دناڤ پێكهاتیێ‌ ئیراقێ‌ ئه‌وژی، نه‌وزاد مسته‌فا، سه‌ربه‌ست عه‌بدوللا بۆ هه‌لبژارتیێ‌ پێشكه‌فتیان و وه‌هبی سلێمان بۆ سه‌ر ئاستێ‌ ئۆلۆمپی هاتینه‌ ژێگرتن و دێ‌ پشتبه‌ستن ب شێوه‌كێ‌ سه‌ره‌كی لسه‌ر وان هێته‌ كرن ژبه‌ركو شیابوون د قاره‌مانییا ئاسیا یا ڤه‌كری بۆ به‌ریكانا پایسكلان رێزێن ئێكێ‌ هه‌تا سێیێ‌ بهێن ئه‌وا ل دووماهیا ئادارا بوری ل وه‌لاتێ‌ تاچاكستانێ‌ هاتیه‌ كرن.

هشیار فه‌ریق په‌سنا راهێنه‌ر و یاریزانێن پارێزگه‌هێ‌ كر و گۆت: هه‌بوونا سێ‌ یاریزانێن پارێزگه‌ها دهۆكێ‌ و راهێنه‌ری كو یێن یانا دهۆكێ‌ جهێ‌ ده‌ستخووشیێ‌ یه‌ و ئه‌ڤه‌ ژی وێ‌ یه‌كێ‌ دیاركه‌ت كو یاریا پایسكلان ل پارێزگه‌هێ‌ ئاست و پێشكه‌فتن به‌رده‌وام بخوه‌ دگریت و ئه‌ڤه‌ چه‌ندین ساله‌ سه‌ر ئاستێ‌ لاوان و پێشكه‌فتیان و تازه‌پێگه‌هشتیان تیمێن مه‌ هه‌رده‌م رێزێن پێشیێ‌ ده‌ستخوه‌ڤه‌ دئینن.

ئه‌ڤرۆ، هه‌ولێر، سولین سلێمان:

د دیداره‌كێ‌ دا زێنه‌ رۆسته‌م  یاریزانا یاریا تێنسا ئه‌ردی و كچا هه‌ولێرا پایته‌خت بۆ رۆژناما ئه‌ڤرۆ دیاركر هه‌ر د ژیێ‌ نه‌ه سالی دا ده‌ست بڤێ‌ یاریێ‌ كریه‌ و چه‌ندین ناسناڤ و رێزبه‌ندیێن جودا ده‌ستخوه‌ڤه‌ ئیناینه‌.

زێده‌تر ناڤهاتی یا 22 سالی گۆت: وه‌كو ئێك ژ حه‌ز ژێكه‌رێن ڤێ‌ یاریێ‌ هه‌ر د ژیێ‌ نه‌ه سالی دا ده‌ستپێكریه‌ ئه‌وژی ژبه‌ر پشته‌ڤانیا بابێ‌ خوه‌ كو ئه‌و ژی یاریزانێ‌ یاریا تێنسا ئه‌ردی بوو و ژبه‌ر گرنگی پێدانا وان ئاستێ‌ تێنسا ئه‌ردی ل كوردستانێ‌ د قۆناغێن باش ده‌ربازگرینه‌ و نڤشه‌كێ‌ خودان شیان په‌یدابووینه‌، له‌ورا هیڤییا مه‌ ئه‌وه‌ ئه‌ڤ یاریه‌ به‌ره‌ ب پێشڤه‌ بچیت و یاریه‌كا تایبه‌تمه‌نده‌ و ده‌مه‌كێ‌ جودا بۆ هه‌موو پشته‌ڤانا په‌یدا دكه‌ت، ب ئۆمێدین خێزان رێكێ‌ بۆ زاروویێن خوه‌ ڤه‌كه‌ت تایبه‌ت سه‌ر ئاستێ‌ كچان چنكو ئه‌ڤ یاریه‌ كچ گه‌له‌ك حه‌ز ژێ‌ دكه‌ن.

ژلایه‌كێ‌ دووڤه‌ زێنه‌ رۆسته‌م گۆت: د ژیێ‌ ده‌ه سالی دا من پشكداری قاره‌مانیێن ئیراقێ‌ كرینه‌ و شیایمه‌ رێزێن دویێ‌ ده‌ستخوه‌ڤه‌ بینم و هه‌روه‌سان سه‌ر ئاستێ‌ كوردستانێ‌ ئێكێ‌ بوویمه‌ و دیسان پشكداری قاره‌مانیێن ده‌رڤه‌ و نێڤده‌وله‌تی بوویمه‌ ژوانا ل تۆنس و لوبنانێ‌، لێ‌ ژبه‌ر به‌رهه‌ڤیێن كێم و جوداهیا شاره‌زاهیێ‌ نه‌ شیایمه‌ رێزێن پێشیێ‌ بده‌ستخوه‌ڤه‌ بینم و سۆپاسیا خێزانا خوه‌ دكه‌م هه‌رده‌م پشته‌ڤان و هاریكاربووینه‌ .

ئه‌ڤرۆ،

ستێرا ته‌پا پێی یێ‌ پۆرتۆگالی و یانا مانچسته‌ر یۆنایتد یا ئنگلێزی كرستیانۆ رۆنالدۆ دیرووكه‌كا نوو یا وه‌رزشی بۆ خوه‌ تۆماركر پشتی د یاریا بوری دا ژ خولا ئنگلیزێ‌ سێ‌ گۆل ل سه‌ر یانا نۆریچ ستی بینت و هاتریكا 50ێ‌ ل سه‌ر ئاستێ‌ پشكداریا وی ل گه‌ل یانێن وه‌رزشی و یا 60 ب گشتی تۆماركر پشتی 10 هاتریكێن ل گه‌ل هه‌لبژارتیێ‌ پۆرۆتۆگالێ‌ كو هێته‌ هژمارتن ئێكه‌م یاریزانه‌ سه‌ر ئاستێ‌ جیهانێ‌ بگه‌هیته‌ ئه‌ڤێ‌ هژمارێ‌.

رۆنالدۆ یێ‌ 37 سالی شیا ل گه‌ل مانچسته‌ر سێ‌ هاتریكا تۆماربكه‌ت پشتی ل 2008 ژی دو جارا هاتریك ئینای، هه‌روه‌سا ل گه‌ل یۆڤانتۆس یا ئیتالی سێ‌ جاران و 44 جاران ل گه‌ل یانا ریال مه‌درید بوو ژوانا 34 جاران  د خولا ئسپانیا دا و حه‌فت جاران چامپیۆنزێ‌  و دو جاران كۆپا شاهێ‌ ئسپانیا و جاره‌كێ‌ د مۆندیالا یانێن جیهانێ‌ دا، ژلایه‌كێ‌ دووڤه‌ 58 گۆل ب لێدانێن فاولێ‌ تۆماركرینه‌ 10 ل گه‌ل پۆرتۆگالێ‌، 15 گۆل بۆ مانچسته‌ر یۆنایتد و 32 بۆ ریالێ‌ و ئێك ل گه‌ل یۆڤانتۆس كو سه‌رجه‌مێ‌ گشتی یێن گۆلێن رۆنالدۆیی د كاروانێ‌ وی یێ‌ وه‌رزشی دا گه‌هشتینه‌ 810 گۆل.