ئامێدیێ، مه‌حمود نهێلی:
ژ ئه‌نجامێ شێلیبوونا ئاڤا رووبارێ زێ یێ مه‌زن سالانه ئاریشه بۆ پرۆژێ ستراتیژی یێ ئاڤا ئامێدیێ دروست دبن و ئه‌ڤ ساله ژی هه‌تا راده‌یه‌كێ زۆر رووبار شێلی بوویه و رێڤه‌به‌رێ پرۆژێ ستراتیژی یێ ئاڤا ئامێدیێ ژی دبێژیت: هندی د شیانێن مه دا بیت، ئه‌م ناهێلین وه‌لاتی بێ ئاڤ بمینن.
ئه‌ندازیار شیمال، رێڤه‌به‌رێ پرۆژێ ستراتیژی یێ ئاڤا ئامێدیێ بۆ رۆژناما ئه‌ڤرۆ دیار كر، نوكه رێژا شێلیبوونا ئاڤا رووبارێ زێ گه‌هشتیه دۆرێن هه‌شت سه‌دێ لێ رێژه‌كا زۆر یا خیزی د گه‌ل دا دهێت، ئه‌ڤ رێژا زۆرا خیزی ئاریشان بۆ پرۆژه‌ی دروست دكه‌ت، لێ هه‌تا نوكه پرۆژه یێ كار دكه‌ت و هندی بشێین ناهێلین وه‌لاتی بمیننه بێ ئاڤ.
ده‌رباره‌ی چاره‌سه‌ركرنا ئاریشا شێلیبونا ئاڤا رووبارێ زێ یێ مه‌زن كو سالانه ئه‌ڤ یه‌كه د ڤی وه‌رزێ زڤستان و بهارێ دا دوباره دبیت ناڤهاتی گۆت: “رازیبوون ل سه‌ر راكێشانا بۆریێن ئاڤێ ژ به‌نداڤا هایدروپاوه‌رێ دێره‌لۆكێ ل گه‌لیێ ره‌شاڤه بۆ پرۆژێ ئاڤێ یێ ئامێدیێ هاتیه كرن، نوكه رێژه‌كا بۆریان گه‌هشتینه به‌رده‌ست بۆ ده‌ستپێكرنا ڤی پرۆژه‌ی، لێ هێشتا پشكه‌كا ڤی پرۆژه‌ی رازیبوون ل سه‌ر نه‌هاتیه كرن، دیسا نوكه ئاستێ ئاڤا رووباری ژی یێ بلنده، ژ به‌ر وێ یه‌كێ چێدبیت ده‌ستپێكرنا ڤی پرۆژه‌ی بكه‌ڤیته د هاڤینا ئه‌ڤ ساله دا”.
نيشاندان