ئه‌ڤرۆ، هه‌ولێر، سولین سلێمان.

د دیداره‌كێ‌ دا كچا باژێرێ‌ هه‌ورمان و یاریزانا یاریێن هێزێ‌ یا بلندكرنا قورسی مه‌روا نوری هیڤی خواست گرنگی ب وه‌رزشا ئافره‌تان بهێته‌ دان ژبه‌ركو شیانێن وان یێن وه‌رزشی چو كێمتر نینن.

زێده‌تر ناڤهاتی گۆت: بۆ ماوێ‌ پێنچ ساله‌ وه‌كو وه‌رزشڤانا كچ یا یاریا بلندكرنا قۆرسی راهێنانێن خوه‌ دكه‌م و پشكداری چه‌ندین قاره‌مانیا بوویمه‌ و رێزێن سێیێ‌ سه‌ر ئاستێ‌ پارێزگه‌ها سلێمانیێ‌ و یا دویێ‌ سه‌ر ئاستێ‌ ئیراقێ‌ بده‌ستڤه‌ ئینایه‌ و هه‌تا نوكه‌ به‌رده‌وامم و به‌رهه‌ڤیا بۆ قاره‌مانیێن داهاتی دكه‌م، ژبلی ڤێ‌ یاریێ‌ وه‌كو گرۆپه‌كا شاخه‌وانا یا تایبه‌ت هه‌یه‌ و دیسان بۆ یاریێن غاردانێ‌ ژی پشكداری ماراسونا بوویمه‌، ئه‌ڤچه‌نده‌ ژبه‌ر حه‌ز و ڤیانا من بۆ وه‌رزشێ‌ یه‌ تایبه‌ت یاریێن هێزێ‌ و بلندكرنا قۆرسی، راهێنانێن یاریێن هێزێ‌ پێدڤی ب خالێن تایبه‌ت هه‌نه‌ ژبۆ ئه‌نجامدانا وێ‌ هه‌كه‌ خه‌له‌تیه‌كا بچووك د راهێنانان دا په‌یدا بیت دێ‌ زیانێن خوه‌ هه‌بن.

لدووماهیێ‌ مه‌روا نوری گۆت: سۆپاسیا خێزانا خوه‌ دكه‌م هاریكار و پشته‌ڤانێن من بووینه‌ و هیڤییا من ئه‌وه‌ هه‌ر ئافره‌ته‌كا حه‌زا وه‌رزشێ‌ هه‌بیت خێزان نه‌بیته‌ رێگر و دخوازم زێده‌تر گرنگیی ب وه‌رزشا ئافره‌تان بهێته‌ دان ژبه‌ركو ئافره‌تێ‌ ژی شیانێن هه‌ین بۆ ده‌ستڤه‌ ئینانا ئه‌نجامێن مه‌زن.

ئه‌ڤرۆ، عه‌لی حاجی:

یاریزانێ‌ تیما باسكێت بۆلا یانا زاخۆ سه‌ر ئاستێ‌ لاوان زنار هشیار وه‌كو باشترین یاریزانێ‌ خولا ئیراقێ‌ هاته‌ ده‌ستنیشانكرن پشتی بدووماهی هاتنا وه‌رزێ‌ 2020-2021 یێ‌ چالاكیێن ئێكه‌تیا باسكێت بۆلا ئیراقێ‌ و دبیته‌ یاریزانێ‌ سێیێ‌ یێ‌ زاخۆ ناسناڤێ‌ باشترین ده‌ستخوه‌ڤه‌ دئینت.

لدور ڤێ‌ یه‌كێ‌ جوتیار عه‌لی هاریكارێ‌ راهێنه‌رێ‌ یانا زاخۆ و هه‌لبژارتیێ‌ لاوێن ئیراقێ‌ بۆ رۆژناما ئه‌ڤرۆ گۆت: زنار هشیار ب ئاست و شیانێن خوه‌ ناسناڤێ‌ باشترین یاریزانێ‌ لاوان سه‌ر ئاستێ‌ ئیراقێ‌ وه‌رگرت ئه‌ڤچه‌نده‌ ژی نه‌ چارا ئێكێ‌ یه‌ به‌لكو به‌ری وێ‌ هه‌ر ئێك ژ محه‌مه‌د محسن ل وه‌رزێ‌ 2018، محه‌مه‌د عه‌لی ل 2019 وه‌كو باشترین یاریزان هاتبوونه‌ ده‌ستنیشانكرن، ئه‌ڤه‌ ژی به‌لگه‌یه‌ كو لاوێن باژێرێ‌ زاخۆ گه‌هشتینه‌ ئاستێن بلند ل ئیراقێ‌ و به‌ره‌ ب قۆناغێن پیشه‌كاریێ‌ دچن، ژبه‌ركو نڤشه‌ك هاتیه‌ دروستكرن سال بۆ  سالێ‌ باشتر دهێنه‌ دیتن و ده‌ستڤه‌ ئینانا رێزا دویێ‌ سه‌ر ئاستێ‌ ئیراقێ‌ یێ‌ لاوان به‌لگه‌یا بهێزه‌ بۆ ڤێ‌ چه‌ندێ‌، له‌ورا پشته‌ڤانیا یاریزانێن لاوان دێ‌ پاشه‌رۆژه‌كا گه‌ش بۆ باسكێت بۆلا پارێزگه‌هێ‌ و زاخۆ په‌یداكه‌ت.

لدووماهیێ‌ ناڤهاتی دیاركر ئه‌و به‌رده‌وامن لسه‌ر دروستكرنا بنیاته‌كێ‌ زانستی و ئه‌كادیمی یێ‌ یاریزانان و زاخۆ بوویه‌ باشترین قوتابخانه‌ ل سه‌ر ئاستێ‌ ئیراقێ‌ وه‌كو ڤی به‌رهه‌می دبینین ئه‌م وه‌ستیانا خوه‌ ژبیر دكه‌ین ژبه‌ركو به‌رهه‌مه‌كێ‌ سه‌ركه‌فتیه‌.

ئه‌ڤرۆ،

ئه‌ڤرۆ جه‌ماوه‌رێ‌ وه‌رزشی ب گشتی و حه‌ز ژێكه‌رێن یاریا ته‌پا پێی تایبه‌تی ب ژڤانن بۆ دیتنا دو یاریێن دی یێن بهێز و ڤه‌بڕ ژ چارچووڤێ‌ قۆناغا چارێك دووماهیێ‌ و ده‌ربازبوونێ‌ به‌ره‌ ب پێش دووماهیا چامپیۆنز لیگێ‌ ئه‌وا دێ‌ ل ده‌مژمێر 10ێ‌ شه‌ڤ ل وه‌لاتێن ئنگلیز و ئسپانیا هێنه‌ ئه‌نجامدان.

• ئه‌تله‌تیكۆ مه‌درید- مانچسته‌ر ستی

یاریا ئێكێ‌ یا ئه‌ڤ شه‌ڤه‌ دێ‌ ل یاریگه‌ها مێترۆبۆلیتانۆ ل پایته‌ختێ‌ ئسپانیا مه‌درید هێته‌ ئه‌نجامدان ده‌مێ‌ خودانێن ئه‌ردی یانا ئه‌تله‌تیكۆ مه‌درید هه‌ڤڕكا خوه‌ مانچسته‌ر ستی یا ئنگلێزی مێڤان دكه‌ت د یاریه‌كا ڤه‌گری دا، د یاریا ئێكێ‌ یا چوونێ‌ دا ئه‌وا ل یاریگه‌ها ئیتحاد ل ئنگلیزێ‌ هاتیه‌ كرن مانچسته‌ر ستی شیابوو ب گۆله‌كێ‌ سه‌ركه‌فتنێ‌ تۆماربكه‌ت كو ئه‌ڤ گۆله‌ك یا پشتراست نابیت بۆ ده‌ربازبوونێ‌ ژبه‌ركو دێ‌ هه‌مبه‌ری تیمه‌كا چڕ بیت خودانێن ئه‌رد و جه‌ماوه‌ری، راهێنه‌رێ‌ ئه‌تله‌تیكۆ سیمیۆنی تووشی ره‌خنه‌یێن دژوار بوو ژلایێ‌ جه‌ماوه‌ر و رۆژنامه‌ڤانێن ئسپانی ژبه‌ر شێوازێ‌ یاریا به‌ره‌ڤانیێ‌ د یاریا بوری دا دكر لێ‌ بۆ ڤێ‌ یاریێ‌ سیمیونی سۆزدایه‌ ب هه‌موو شیان و پلانێن تایبه‌ت بهێته‌ دناڤ یاریگه‌هێ‌ دا و بزاڤێن گۆله‌كا بله‌ز تۆماربكه‌ن ژبۆ ڤه‌گه‌ڕیان بۆ ناڤ هه‌ڤڕكیێ‌ به‌ری هزرا ده‌ربازبوونێ‌ بكه‌ن، پشت گه‌رمیا راهێنه‌رێ‌ ئه‌تله‌تیكۆ ب جه‌ماوه‌رێ‌ وی یه‌، لێ‌ راهێنه‌رێ‌ مان ستی یێ‌ ئسپانی پێب گۆاردیولا شاره‌زاهیه‌كا باش ل گه‌ل یانا ئه‌تله‌تیكۆ هه‌یه‌ تایبه‌ت دناڤ یاریگه‌ها وێ‌ دا ده‌مێ‌ راهێنه‌رێ‌ به‌رشه‌لۆنا و دێ‌ بزاڤا كه‌ت سه‌ركه‌فتنا خوه‌ پارێزیت كو دێ‌ ب چه‌كێ‌ گران یێ‌ ستێرێن خوه‌ یاریگه‌ها ئه‌تله‌تیكۆ داگیركه‌ت و پلێتا ده‌ربازبوونێ‌ ده‌ستڤه‌ بینت، دادڤانێ‌ یاریێ‌ یێ‌ ئه‌لمانی دانیێل سپێرت دێ‌ بڕێڤه‌به‌ت.

• پێكهاتیێ‌ پێشبینیكری یێ‌ راهێنه‌رێ‌ مانچسته‌ر ستی پیب گۆاردیولایی.

گۆلپارێز: ئێدرسۆن

هێلا به‌ره‌ڤانیێ‌: جواو كانسێلۆ، ئیمیرك لابۆرت، جون ستۆنز، كایێل ووكر.

هێلا ناڤین: كیڤن دی برۆین، رۆدرێ‌، ئیلكایی جۆندۆان.

هێلا هێرشبرنێ‌: ریاز موحرز، فێل فۆدین، ره‌حیم ئسترلینگ.

• پێكهاتیێ‌ پێشبینی كری یێ‌ راهێنه‌رێ‌ ئه‌تله‌تیكۆ مه‌درید سیمیۆنی.

گۆلپارێز: یان ئۆبلاك.

هێلا به‌ره‌ڤانیی: رینیلدۆ، فیلیپی، ستیڤیان ساڤێچ.

هێلا ناڤین:ماركۆس یۆرنتی، رۆدرێگۆ دی بۆل، یانگ كاراسكۆ، كۆكی،گۆندۆبیا.

هێلا هێرشبرنێ‌: ئانتونیۆ گرێزمان، جواو فلێكس.

• لیڤه‌رپۆل – بنڤیكا

د یاریه‌كا دی دا بۆ وه‌رگرتنا پلێتا ده‌ربازبوونێ‌ یانا لیڤه‌رپۆل یا ئنگلێزی دێ‌ دناڤ ئه‌رد و جه‌ماوه‌رێ‌ خوه‌ دا مێڤانداریا یانا بنڤیكا یا پۆرتۆگالی كه‌ت، یانا ئنگلێز پێنگاڤه‌كا باش هاڤێتیه‌ بۆ قۆناغا پێش دووماهیێ‌ پشتی كو ل حه‌فتیا بوری شیابوو د یاریا ئێكێ‌ دا ل یاریگه‌ها وێ‌ ب سێ‌ گۆلان به‌رامبه‌ر گۆله‌كێ‌ سه‌ركه‌فتنێ‌ تۆماربكه‌ت، دیاریا ئه‌ڤ شه‌ڤه‌ دا لیڤه‌رپۆل بزاڤێ‌ كه‌ت دناڤ یاریگه‌ها خوه‌ ئانفێلد ئاهنگا ده‌ربازبوونێ‌ ب گێڕیت، یانا بنفیكا پێدڤی ب ریمونتادێ‌ یه‌ ب سێ‌ گۆلان بێ‌ به‌رامبه‌ر ژبۆ ده‌ربازبوونێ‌، ئه‌ڤچه‌نده‌ ژی بزه‌حمه‌ته‌ هه‌مبه‌ری یانه‌كا خودان هێز و باشترین یاریزانێن شاره‌زا نموونه‌ یێ‌ مسری محه‌مه‌د سه‌له‌ح، یێ‌ سنیگالی سادیۆ مانی و گۆلپارێزێ‌ خودان شیان ئه‌لیسۆن كو ب وه‌كهه‌ڤی ژی ده‌رباز دبیت، لێ‌ پشتبه‌ستنا راهێنه‌رێ‌ بنفیكا دێلسۆن فیریسیمۆ دێ‌ ب هێرشێن هه‌ڤدژی و مفا وه‌رگرتن ژ خه‌له‌تیان بیت دێ‌ بزاڤێن وی یێن به‌رده‌وامبن بۆ ئینانا ریمۆنتاده‌كا بزه‌حمه‌ت.

• پێكهاتیێ‌ پێشبینی كری یێ‌ راهێنه‌رێ‌ یانا لێڤه‌رپۆل یۆرگن كلۆب.

گۆلپارێز: ئه‌لیسۆن.

هێلا به‌ره‌ڤانیێ‌: ترینت ئه‌لیكسه‌نده‌ر ئارنۆلد، ئیبراهیما كۆناتی، فێرگێل ڤان دیك، ئه‌ندرۆ رۆبێرتسۆن.

هێلا ناڤین: جۆردان هندرسۆن، فابینیۆ، نابی كیتا.

هێلا هێرشبه‌ریێ‌: محه‌مه‌د سه‌لاح، فێرمینیۆ، لویس دیاز.

• پێكهاتیێ‌ پێشبینیكری یێ‌ راهێنه‌رێ‌ بنفیكا دێلسۆن فیریسیمو.

گۆلپارێز: ئۆدیسیاس فلاكۆدیمۆس.

هێلا به‌ره‌ڤانیێ‌: جیلبرتۆ، نیكۆلاس ئۆتامیندی، جان فیرتۆنگین، ئالیخاندرو جریمالدۆ.

هێلا ناڤین: رافا، عادل ته‌عرابت، جولیان ویگێل، ئیڤرتۆن.

هێلا هێرشبرنێ‌: رامۆس، دارۆین نونێز.