ئازاد بەرواری

گەلەك جۆرێن بەنیشتی ب تام و چێژێت جیاواز هەنە، یا ب ناڤ و دەنگ بەنیشتێ كوردی یە! ل خوارنگەهێن گرانبها، بەنیشتێ ب تام و چێژێن جیاواز پێشكەش دكەن، داكو مرۆڤ گرانیا بهایێ خوارنێ ب ساناهی هەزم بكەت و داعیریت. ئەڤروكە من دڤێت وەك بەنیشت هندەك پێزانینان دەربارەی ڕەوشا توركیا یا ڤێ داویێ بێخمە بەر چاڤێن وە یێن قەدرگران.
ئەو چالاكیا سەربازیا سەركەفتی یا كو ل مەلبەندێ پیشەسازیا ئاسمانی و گەردۆنی ل توركیا هاتیە ئەنجامدان، ناڤێ وێ دەڤەرێ (قازان) ـە، پشتی وێ كودەتایا سەربازیا ل هەیڤا تیرمەها ساڵا ٢٠١٦ یا نەسەركەفتی، سەرۆكێ ئاك پارت ڕەجەب تەیب ئەردۆگان، ناڤێ وێ دەڤەرێ گوهۆڕی و كرە (قەهرەمان قازان). ناڤكرنا ڤێ دەڤەرێ ب ناڤێ قازان سەربۆڕەك دیرۆكی گەلەك سەیر و بالكێش هەیە، من ب هەژی هندێ دیت كو بۆ خوەندەڤانێن هێژا ڤەگێڕم.
وەختێ هێرشێن مەغۆلیان ب سەر دەڤەرێ داگرتی، هێزێن وان بۆ چەند گرۆپەكان دابەش بوون، ئێك ژ وان گرۆپان، ل ساڵا ١٤٢٠ بەرەڤ دەڤەرا ئەنادۆل ڤە، واتە توركیا ئەڤرۆكە هات، ب سەركێشیا سەردارێ لەشكریێ مەغۆلی ب ناڤێ (ئەسەن بۆگا) و گەلەك سەیرە كو ڕامانا ڤێ ناڤێ ب زمانێ مەغۆلی و زمانێ توركی وەك یەكە و مانا وێ (گایێ حنشەڕی) واتە گایێ بەختەوەر ! ل وە دەمی هێزێن لەشكریێن عێلێن توركان ب هزاران بوون و ب سەرلەشكریا (یلدرم بایەزید) ئو ل ڤێ نهاڵا نوكە ناڤێ وێ قازان و مەڵبەندێ پیشەسازیا سەربازیا ئاسمانی و گوردوونی لی هاتیە دامەزراندن، جهێ بەرهەڤكرنا خوارنێ بوو بۆ وێ هژمارا ب هزارا یا لەشكرێ عوسمانیان و ب سەدان قازانێن خوارنێ رۆژانە دكەلین.
سەرلەشكرێ مەغولیان بۆ بەرهەڤیا هێرشەكا سەربازی، چەند فیلەك ب زنجیرا پێكڤە گرێدا وەكی تانك و زریپوشێن سەربازیێن نوكە، هێڕش برە سەر لەشكرێ عوسمانیان و ب دژواری شكاندن و سەرلەشكرێ توركان ب ناڤێ یلدرم بایەزید ژی ب ئێخسیری گرت.
ئەو نهاڵا توركان خارن لێ چێدكر، پشتی چەندین سڵان كەڤگیر و قازان لێ دهاتنە ڤەدیتن، لەوما ناڤێ وێ دەقەرێ ب قازان هاتیە ناڤكرن.
لێ تشتی هەری سەیر تر ئەوە كو توركان ناڤێ فڕۆكەخانا ئەنقەرێ یا نێڤدەولەتی ژی ب ناڤێ وی سەركردێ مەغولیان ((ئەسەن بۆگا)) ناڤ كریە، ل زمانێ توركی پیتا گ دهیتە سڤك كرن بو خاندنێ لەوما نوكە ناڤێ وێ فڕۆكەخانێ یا بویە (ئەسەن بووا). بابەتەكێ دن وەك بەنیشتێ رۆژنامەگەریێ بۆ وەیێن هێژا، ل دەمێ كۆمكوژیا ئەرمەنیان ل ئاكامێن جەنگێ جیهانیێ ئێكێ، گەلەك زارۆكێن ئەرمەنیان مانە بێ دایك و باب. توركان ئەو زارۆك هەر ژ بچویكاتی ب خودان كرن و ل سەر تیتال و رەفتارێن توركان پەروەردە كرن و مەژیێ وان شویشتن. ئێك ژ وان كچكەكا ئەرمەنی ب ناڤێ (سەبیحا گۆكجە)، ئەتا توركی ب خودان كر و پاشی هنارتە خولێ فڕۆكەڤانیا سەربازی، و بوو ئێكەمین فڕۆكەڤانێ سەربازیێ ئافرەت ل توركیا، لێ نڤشێ ئەرمەنی بوو، لەوما ئەركێ بۆمبەبارانكرنا دێرسمێ پێ هاتە ڕاسپاردن، بۆمبەباران كرنا كوردێن دێرسمێ ب دەستێ كچكەكا فڕۆكەڤانا ئەرمەنی هاتە ئەنجامدان و تورك ژی تەماشە ڤان بوون.
و نوكە باژێڕێ ئستەنبۆڵی دو فرۆكەخانە لێ هەنە، ناڤێ ئێك ژ وان فڕۆكەخانەیا (سەبیحە گۆكجە) یە.
خواندەڤانێ هێژا، من خواست ڤان پێزانینێن دیرۆكی ل گەل وەیێن هێژا پاڕڤەبكەم، هیڤیدارم وەك بەنیشتەكێ رۆژنامەگەری بجین و خۆ پێڤە مژویل بكەن.

ئـازاد بەرواری – ئەڵمانیا

ئاشكرایە كو ل ١٥ شواتا سالا ١٩٩٩ دەزگەهێن ئاسایشێ‌ و ئەولەهیا ئەمەریكا و ئیسرائیل (سی ئای ئەی/ مۆساد)؛ ب هەڤپشكی و هاریكاریا كرێگرتیێ خۆ دەزگەهێ ئاسایشا یۆنانی، سەرێن ڕێكا ل بەڕێز عەبدوللا ئۆجەلان گرتن و ل ناڤ بالیۆزخانەیا یۆنانستانێ ل پایتەختا كینیا – نایڕۆبی ل باشوورێ ئەفریقا ب فند و فێل دەستەسەركرن و تەسلیمی دەزگەهێ مخابەراتا توركی كرن، كو ب فرۆكەیەكا (جێت) یا تایبەت یا كارساز و سیاسەتمەدار (جاوید چاڵار) كو ل وێرێ ل بەندێ بوون و ئینانە توركیا. پشتی كو گەهاندیە توركیا، سەرۆك وەزیران یێ هینگی یێ توركی (بۆلەنت ئەجەوید) ئاخفتنەكا دیرۆكی كر و گۆت: ئەز نزانم ئەڤ مرۆڤە واتە (عەبدوللا ئۆجەلان) بۆچی تەسلیمی مە كرن! لێ گەلەك بالكێشە كو بەرسڤا پرسیارا وی پشتی ٢٥ بیست و پێنج سالان واتە ئەڤرۆكە هاتەدان!
دەمێ ئۆجەلان گەهاندیە توركیا و ل سەر تەلەڤزیۆنێ ب وی شێوەی دیمەنێن وی هاتینە بەلاڤكرن، ئەو مرۆڤێن مەژی ڤالا ل توركیا، وە هزر كر سەركەفتنەك مەزنە بۆ توركیا، لێ نەزانی شەرت و مەرجێن وێ هەنە و پێدڤیە ل سەر توركا كو سەرپێچیان نەكەت. هەر چەندە بەڕێز ئۆجەلان ل ژێر سیاسەتا (تەجرید واتە بتنێ هێشتن) و ئەشكەنجەیا دەروونی گەلەك كوشندە بوو، لێ شیا ل بەر خۆ بدەت.
چەند رۆژەكان پشتی هینگی هندەك مافناسێن كورد یێن پاڕێزەر سەرەدانا سەردۆزگەرێ گشتی كرن و داخوازكر كو ب شێوەیەكی خۆبەخش بەڕەڤانیێ ل (بەڕێز ئۆجەلان) بكەن. ئێك ژ بیرەوەریێن وان پارێزەران، وەختێ چووینە دەف سەردۆزگەری و گۆتن كو دڤێن وەك پارێزەر بەڕەڤانیێ ژ ناڤبری بكەن و داخوازا چاڤپێكەفتنێ كر. سەردۆزگەر ژ تڕسێن ڤێ بڕیارا وان (پشت و پشت) ل سەر كورسیكێ كەفت! ڕەوشا سیاسی وەسا دژوار و ڕەشە بوو.
ئێك ژ ڕۆژنەمەگەرێن هەری ب ناڤودەنگ (فاتیح ئالتایلی) ل چاڤپێكەفتنەكا خۆ دا دەربارەی چاڤپێكەفتنا وی ل گەل (عەبدوللا ئۆجەلان) ل سالا ١٩٩٧ گۆت: ڕاستی ئەو ئاخفتنێن ئۆجەلان ل دەمێ بەڕەڤانیا خۆ ل دادگەهێ كری، هەمان ئەو ئاخفتنێن سالا ١٩٩٧ بوو وەختێ من چاڤپێكەفتن ل گەل كری و پەكەكە ل ڕەوشەكا گەلەك ب هێز دا بوو.كو كورتیا وێ ئەڤەیە: (گەلێ كورد و تورك)، ئەڤە نێزیكی ئێك هزار سالە ب هەڤڕا دژین، گەلەك زەحمەتیە ل ئێك بهێنە جوداكرن، لێ بۆ بەردەوامیا ب هەڤڕا ژیانێ، پێدڤیە سیاسەتا كویرا توركی ئێدی دەست ژ ئینكار و ئەسیملاسیۆن و ڕەگەز پاكتاویێ بەردەت.
هەروەسا ڕۆژنامەگەر و میدیاتۆرێ ب ناڤودەنگ یێ تورك (محەمەد عەلی بیران) ل بەرنامەیە یا (٣٢ رۆژ) واتە (ئۆتز ئیكینجی گوین) دا دیتنێن خوە وەسا ئینابوو زمان ((دێ رۆژەك هێت، كو ئەگەر شەڕ بهێتە ڕاوەستاندن، ئۆجەلان دێ ژ زیندانێ دەركەڤیت و ڕەنگە ببیتە سەرۆكێ پارتە یاسایی ژی و ئەڤ چەندە ژی مومكنە و پێدڤیە ژی! ئەگەر توركیا سیستەمەكا دیمۆكراسی جێبجێ بكەت).
ئەڤ گوهوڕینێن ل ڤێ داویێ ل توركیا ب تایبەت و ل دەڤەر ب گشتی هاتنە پێش، دەولەتا توركی ئێخستە بەر سەكەراتا پارچەبوونێ! لەوما ناچاربوون ڤێ پێنگاڤێ بهاڤێژن، هەروەكی وەختێ خۆ (خومەینی ڕازی بووی ل سەر ڕاوەستاندنا شەڕ ل ناڤبەرا ئیراق و ئیرانێ) و ئاخفتنا خۆ یا دیرۆكی گۆتی ((وەك ڤەخوارنا فنجانەكا ژەهرێ)) بوو، لێ بۆ بەرژەوەندیا مانا كۆمارا ئیسلامی یە.
یا ڕاستی بڕیارا خومەینی یا هینگی نەبوو گەرەنتی بۆ مانا كۆمارا ئیسلامی، لێ تەنێ هەڕفین و پارچەبوون، هەتا ئەڤرۆكە ڤ پاش ئێخستیە و ئایندەیەكا نێزیك دەربارەی ئیرانێ گەلەك (سۆپڕایز) تێدایە كو گەش و ڕۆناكی یە، بۆ گەلێن ئیرانێ و ڕەش و تاری بۆ ئیدۆلۆژیا و یالەت فەقی. هەر ل سەر ڤێ بنەمایێ ئەڤ پێنگاڤا توركان ژی، یەكئاخەیا توركیا گەرەنتی ناكەت، بەلكی تەنێ پارچەبوونا وێ ب پاش دئێخیت. چونكی ڕەوشا جیۆپۆلیتیك هندێ دخوازیت.
ل گۆرەی زانیاریێن باوەرپێكری، ئۆجەلان داخواز ژ توركان كریە كو (لێبۆرینەكا گشتی و بێ شەرت و مەرج)، بۆ هەمی ئەندام و لایەنگرێن بزاڤا پەكەكە، ل هندوڕی توركیا و ل دەرڤەی توركیا و گەریللا و كادر و سەركردەیێن قەندیل و هەمی زیندانیێن سیاسی ژی وەك پەرلەمانتار و سەرۆكێن باژێڕڤانیان یێن ل زیندانێ، هەروەسا هەڤسەرۆكێن زیندانكری (سەلاحەددین دەمیرتاش و فیگەن یۆكسەك داغ ).
ئێك ژ بابەتێن هەری گرنگ یێ كو هاتینە ڕاوێژكرن ل دەمێ سەرەدانا جەنابێ سەرۆك وەزیران كاك مەسڕۆڕ بارزانی بۆ توركیا، ئەڤە بوو كو باشوور هەول بدەت قەندیل و ڕۆژئاڤا ڕازی بكەت بۆ (شەڕ ڕاوەستاندن) واتە چەك دانان ناهێتە خواستن، تەنێ بكارنەئینانا چەك ل دژی توركیا دهێتە خواستن. سەرەدانا سەرۆك وەزیران كاك مەسرۆر بۆ ئوردن و چاڤپێكەفتن ل گەل شاهێ ئوردن و پاشی ل ئیماڕات چاڤپێكەفتن ل گەل (بن زاید) كر و ل دویڤدا چاڤپێكەفتن ل گەل سەرۆك كۆمارێ ئازەربایجان (عەلیێڤ) وەكر. ل دویڤدا ل داڤۆس – سۆیسڕا هەڤدیتن ل گەل وەزیرێ دەرڤە یی سووریا نوی (شیبانی)، بابەتێن گرێدای ڤێ ڕەوشێ هاتینە گەنگەشەكرن. و وەزیڕی دەرڤەیێ هەلبژارتی یێ ئەمەریكا بۆ كابینا تڕامپ چاڤپێكەفتنەك تەلەفوونی ل گەل (هاكان فیدان) وەزیرێ دەرڤەیێ توكیا كر. ئەڤ چەندە هەمی گرێدای ڕەوشا كوردانە ل باكوور و رۆژئاڤا واتە توركیا و سووریا.
كورت و كرمانج: ل ١٥ شواتا ٢٠٢٥ دێ بەڕێز ئۆجەڵان بانگ ل قەندیل كەت بۆ شەڕ ڕاوەستان بەرانبەر لێبۆرینا گشتی ل توركیا و سەرۆژنووی نڤیسینا دەستوورێ كۆمارا توركیا كو تێدا دان ب هەبوونا كوردان ل توركیا ئاماژە پێ بهێتەدان.
ل ئالیەكێ دن ل توركیا هەول بۆ ڕێگری ل ڤێ پێنگاڤێ دهێنە دان، ب تایبەتی ل ئالیێ دو پارتێن نەژادپەرستێن توندڕەو (زەفەڕ پارتیسی كو سەرۆكێ وێ پارتێ پڕۆفیسۆڕ ئومیت ئۆزداغ) نەژاد پەرستەكێ توركی یێ توندڕەوە، هەژی ئاماژەپێكرنێ یە ل ٢١/١/٢٠٢٥ هاتە بنچاڤكرن و پشتی هینگی هاتە زیندانكرن، هەروەسا چەند سیاسەتمەداركێن توندڕەوێن دن ژی هەنە ل پسارتێن دن یێن نەتەوەپەرستێن توركی كو وەك تەدبیر ڕەنگە بهێنە دەستەسەركرن، داكو ڕێگری ل تەڤلهەڤیا ناڤخۆیا بهێتەكرن كو ڕەنگە توركێن نەژادپەرست دەستپێشخەریێ بكەن داكو ڕێكی ل ڤێ پێنگاڤا ئاشتی بگرن.
ئەگەر ئەو پێنگاڤا چارەسەریێ ژی وەك یێن بەری نوكە بهێتە تێكدان ئانكو سەرنەگریت! ڕەنگە نەڤرۆزا ٢٠٢٥ دێ بیتە سەدەمێ كارەساتەكا مەزن ل باكۆر و رۆژئاڤایێ كوردستانێ كو ژ كارەساتا كۆچا ملیۆنییا باشوور كێم دژوارتر نەبیت! و ل دەرئەنجام پارچەبوونا توركیا یا حەتمی واتە بڤێت نەڤێت دێ ل دویڤڕا هێت.
ل داویێ ئێك ژ بیرەوەریێن سەركردەیێ نەمر قاسملۆ هەژی ئاماژە پێكرنێ یە كو دگۆت:(( ل دەمێ دانوستاندنێن ساڵێن ١٩٧٠ هەتا ١٩٧٤، ئەز ل ئەوڕۆپا دژیام، من سەرەدانا ئیراقێ كر و چوومە خزمەتا نەمر بارزانی و مە دەربارەی بەیانا ١١ ئازار و پێشهاتێن دەڤەرێ و ڕەوشا كورد و كوردستانێ‌ ب گشتی دانوستاندن دكر، بارزانی بەرێ خۆ دا من و گۆتە «ڕەحمان، ئازادبوونی كوردستانی سەرانسەری ئەبێت لە توركیا وە دەست پێ بكات، نەك لای ئێمە، بەڵام وەزعی ئیساتی كوردانی توركیا بۆ شۆڕش دەستنادات و هێشتا فڕسەت نەهاتوە، بۆیە ئەبێت ئێمە بەردەوام بین لە سەر شۆڕش كردن، تاكو زەمینەی شۆڕش بۆ پارچەكانی تری كوردستانیش بهێتە كایەوە )).

ل توركیا حوكمەتا ٥٤ ێ ل ساڵا ١٩٩٨ – ١٩٩٩ هاتە دامەزراندن ل ناڤبەرا، (دۆغرو یۆڵ پارتیسی ب سەركردایەتیا خانم تانسۆ چیللەر و ڕەفاه پارتیسی ن سەركێشیا خ. نجم الدین ئێرباكان)، واتە پارتەك خوەدی ئیدۆلەژیەكا محافز كو تانسۆ خانم وەك دیكۆر هاتە هلبژارتن و ب پشتەڤانیا (سلێمان دمێرل) كو بەرێ سەرۆكێ وێ پارتێ بوو و هاتە كاندیدكرن و بۆ سەرۆكاتیا كۆمارا توركیا و یێ دی ژی خوەدی ئیدولۆژیا ئایینی یا ب ناڤێ (میللی گۆرۆش) ـە. كو نو كە ڕەجەب تەیب ئەردۆگان میراتگرێ وێ هزرا ئیخوانییە.
ئێك ژ مەرجێن سەیر یێن ڤێ حوكمەتا هەڤپشك، ئەوبوو كو هەر ئێك ژ وان دێ دو ساڵان سەرۆكاتیا وەزیران كەت. هینگی دەولەتا كویر ژ لایێ لەشكرێ توركی ڤە دهاتە ئاڕاسـتەكرن و تانسۆ چیللەر وەك ئێكەمین ئافرەت ل ڤێ پۆستا وەسا گرنگ، ناچار بوو وەك گوستیلكەك بیت ل تبلێن جەنەڕالێن توركی دا.
لێ بەروڤاژی وێ نەجمەدین ئەربەكان، ئێكەمین سەرەدانا خۆ بۆ كۆمارا ئیسلامیا ئیرانێ كر و یا دووێ ژی چوو سەرەدانا (خ. موعەمەر قەزافی) ل وێرێ ل بەر چاڤێن ڕۆژنامەگەریا عەرەبی و توركی و جیهانی موعەمەر قەزافی دەڤێ خۆ ل توركا و سیاسەتا وان یا ڕەگەزپەرستی ڤەكر و پەسنا گەلێ كورد گەلەك باش كر، واتە (ئەوا نەگۆتی… نەهاتەبیرێ لەوا)
پشتی وێ سەرەدانا نەجمەدین ئەربەكان، هەما زڤڕی و هێش نەگەهشتیە مال، لەشكرێ توركی داخواز ژێكرن ئەو ب خۆ حوكمەتا خۆ یا كولیسیۆن هەلوەشینن. ئەگەر نە دێ كۆدەتایا سەربازی كەن. ئەوبوو سەدەم كو لەشكرێ توركی هێز ئینا سەر سـنوورێ سووریا و گەف كرن، ئەگەر (ئۆجەلان و هەمی ڕێكخستنێن پەكەكێ) ژ سووریا نەدەركەڤن، دێ توركیا دەست ب هێرشا زەمینی كە بۆ سەر سووریا. حافز ئەسەد ئەڤ گەفە ل دەستپێكێ ژدل وەرنەگرت، لێ پشتی هینگی سەرۆكێ مسڕێ (حوسنی موبارەك) سەرەدانا سووریا و جدیەتا ڕەوشێ ل گەل حافز ئەسەد گفتوگۆكرن و دەرئەنجام ئۆجەلان ژ سووریا دەركەفت.
توركیا ناچار بوو، دەست ب هلبژارتنێن لەزگین كرن، ل ئەنجام هیچ پارتەكێ بارا پتری دەنگان نەئینان واتە دامەزراندنا كابینا نوی یا حوكمەتێ گەلەك ڤ پاشكەفت.
دەمێ بەڕێز ئۆجەلان دەرگەهێ ئەوڕۆپا و هێزێن جیهانی قوتای و كەسێ دەرگەه لێ ڤەنەكری، مینا ڕێڤینگیا بارزانیێ نەمر دەمێ ل ئاڤا ئاراس دەربازبووی و ستالین ژ بەر پەیوەندیێن خۆ ل گەل توركیا كو ئەسلێ خۆ جۆرجی بوو و دەولەت و دامودەزگەه ژی ژنوی ل جەنگێ جیهانی یێ دووێ تەواو ببوون و هێشتا دویكێلا بۆمبەبارانكرنێ ژ بالەگەه و ئاقارێن ڕۆسیا و هەمی دەولەتێن پشكدار ل وێ جەنگێ ڕادبوو.
ل توركیا پارتێن سیاسی نە دشیان حوكمەتێ دابمەزرینن. هەتا كو دەزگەهێن موخابەراتێن سەردەست یێن جیهانی مینا (سی ئای ئەی) و مۆساد و ب هاریكاریا موخابەراتا كرێگرتیا یۆنانی، ئۆجەلان دوورپێچ كربوون و گۆتنە توركان:
((دڤێت هەرچی زووتر، حوكمەتێ دامەزرینن، داكو ئۆجەلان ڕادەستی وە بكەین)). توركان بەرژەوەندیێن حزبایەتی هەمی دانە لایەكێ هەمی پارتا ب ئێك دەنگ (بولەند ئەجەوید و پارتا وی هلبژارتن، كو دەنگێن هەری كێم ئینا بوو، لێ ڕەنگە ژبەر هندێ ئەو بڕیار هینگی هاتبیتە دان، چونكو (ئەجەوید وەك خورتێ ڕەشتەحلە ل ناڤ گەلێ تورك هاتبوو نیاسین و هنارتنا لەشكرێ توركی ل سالا ١٩٧٤ بۆ قوبروس ل سەر فەرمان و سەرپەرشتیا وی بوو، هینگی ژی سەرۆك وەزیران بوو.
بارزانیێ نەمر ل وان ڕەوشێن دژوار یێن هەندەران شیا هەوڵ بدەت كو مانا خۆ و پێشمەرگێن خۆ وەك یەكڕیزی بهێلیتەڤە.
هەر چەندە مەرجێن پەیوەندیان ل وی دەمی گەلەك گەلەك سەخت و دژوار ژی بوون.
ل كوردساتنا باشوور گەلەك كەس هاتنە گرتن و ئەفسەرێن كورد یێن نیشتمان پەروەر هاتنە سێدارەدان، لێ بەردەوام بارزانی ب شێوەیەكی غیابی ژی وەك سەرۆك دهاتە هبلژارتن. هەتا كۆدەتایا عەبدولكەریم قاسم ل سەر شاهنشاهێ ئیراقێ. پاشی بڕیارا لێبۆرینەك گشتی هاتەدان و ڕێبەر بارزانی و هەڤاڵێن خۆ ب سەربەرزی بۆ ئاخا وەلاتی ڤەگەڕیان.
ل توركیا ژی ژبەر مەرجێن جیوپۆلیتیكا دەڤەرێ ناچارن دان ب مافێ گەلێ كورد بدەن، ئەگەر نە پارچە پارچەبوونا توركیا وەك پەیڤا ئامین یا پشتی ئایەتێن قورئانێ ل نڤێژان مسۆگەرە.
لێ ل ڤێرێ ژی كورد ب شێوەكی گشتی دڤێت چاڤ ل دوژمنێ خۆ بكەن و ململانێ یا سیاسی و دەسەلات و كورسیكێ ل بەر چاڤێن خۆ لادەن و هێڤكەنە ئایندەیا چارەنڤیسا گەلێن كوردستانێ لەو ئەڤ پەیڤا سەرۆك بارزانی ئۆبالەكا سیاسی ـ دیروكی یە وەك سەركردە ل سەر ملێن خۆ ڕاكر و فەرمۆی: دەبیت تاوەکوو دوو مانگی دیکە کابینەی نویی حکوومەت پێکبهێنرێت.