نەوزاد زادە نەقەبی

یا دیارە ل روودانێن ڤێ دوماهیێ یێن رۆژئاڤایێ كوردستانێ و هێرشێن دەستهەلاتا نوی یا سووریا بۆ سەرگەلێ مە ل رۆژئاڤایێ كوردستانێ، گەلێ كوردستانێ ل سەر ئاستێ هەر چار پارچەیێن كورستانێ و رەڤەندا كوردی ل دەرڤە، ئێكرێزی و ئێك هەلوەستییا خۆ ب باشترین و جوانترین شێوە دیاركر، هاریكاریكرنا خەلكێ كوردستانێ ب هەمی حزب و لایەن و پێكهاتەیێن جودا ڤە، ژ وان ژی ب تایبەت دەزگەهێ خێرخوازیێ بارزانیێ نەمر و رۆلێ كاریگەرێ یێن كەنال و دەزگەهێن راگەهاندنێ كوردی مەزنترین رۆل ل پێناڤ دەستكەفتن و پاراستنا مافێن گەلێ كورد ل رۆژئاڤایێ كوردستانێ گێرا، ئەڤە ژی پێنگاڤەكا دیرۆكی بوو د دیرۆكا تەڤگەرا رزگاریخوازا كوردستانێ دا.
ب بۆچوونا مە؛ ئەگەرێ سەرەكیێ ڤێ ئێك هەلوەستی رۆلێ جەنابێ سەرۆك بارزانی بوو كو هەمی كورد كرنە ئێك هەلوەست، جەنابی وی هەمی شیان و پەیوەندیێن خۆ بكارئینان بۆ هاریكاریكرنا رۆژئاڤایێ كوردستانێ ژلایێ دبلوماسی و ئابووری ڤە، دیسا هەر بۆ ڤێ چەندێ سەردانا پاپایێ ڤاتیكانێ و وەلاتێ ئیتالیا كر، ل سەر ئاستێ نیڤدەولەتی ڤە دگەل وەلاتێن زلهێز ب تایبەت ویلایەتێن ئێكگرتیێن ئەمریكا نەخاسمە ل گەل توم بازاك هنارتیێ ئەمریكا بۆ كاروبارێن سووریێ‌ بەردەوام ل سەر هێلێ بوو، ل سەر ئاستێ هەرێمی ژی ڤە رۆلەكێ گرنك گێرا، ل ئەنجامێ ڤان هەول و ب زاڤان رێككەفتنا ئاشتیێ د ناڤبەرا حوكمەتا نوی یا سووریا و هێزین سووریایا دیموكرات هاتە ئەنجامدان، كو ئەگەر رۆلێ سەرۆك بارزانی و سەرۆكێ هەرێمێ و سەرۆكێ حوكمەتێ نەبا دا رەوش گەلەك بەر ب خراپتر ڤە چیت، جەنابێن وان ب هەمی هێز و شیانێن خۆ كاركرن بۆ پاراستنا گەلێ مە ل رۆژئاڤایێ كوردستانێ، ئەڤە ژی جهێ دلخۆشییە، وان كار و بزاڤان ئەنجام هەبوو و شەر هاتە راوەستاندن و رێككەفتنا ئاشتیێ هاتنەكرن.
ب بۆچوونا مە ئەگەر بەردەوام ئەڤ ئێكرێزی و ئێك هەلوەستیە د ناڤبەرا خەلكێ كوردستانێ، نەخاسمە حزب و لایەنێن كوردستانی ل سەر پرسێن نیشتمانی هەبیت، ل داهاتی دا دێ دەستكەفیێن گرنگتر هەبن بۆ گەلێ كوردستانێ، ژ بەركو مە گەلەك پێدڤی ب ئێك هەلوەستیێ هەیە بۆ پاراستنا دەستكەفتیان و دیسا بۆ دەستڤەئینا دەستكەفتیێن زێدەتر.
ل دوماهیێ پێشنیار دكەین ل سەركردایەتیا سیاسیا حزب و لایەنێن كوردستانێ كو ل داهاتی دا زێدەتر كاری ل سەر ئێكرێزیێ و ئێك هەلوەستیێ بكەن ب تایبەتی د ڤێ قووناغا نەهەمواریا هەی و د بەرژەوەندیا خەلكێ كوردستانێ بهێتە بكارئینان، ژ بەر كو گومان تێدا نینە ئەگەر ئەم ئێكرێز و ئێك هەلوەست بین دێ مە دەستكەفتێن زێدەتر هەبن.

نەوزاد زادە نەقەبی

وەكی یا خۆیایە هەمی دەمان ئێكڕێزیا لایەنێن سیاسی بۆ گەلێ كوردستانێ یا گرنگە، ب تایبەت ژی د ڤێ قۆناغێ دا، ژبەركو گەلەك گوهۆڕینێن بلەز روو ددەن ل سەر ئاستێ جیهانێ و ب تایبەتی د رۆژهەلاتا ناڤین دا، لەوما بۆ پاراستنا دەستكەفتیێن گەلێ مە و سەروەریا قەوارەیا هەرێما كوردستانێ و بدەستڤەئینانا دەستكەفتیێن زێدەتر و خۆگونجاندن دگەل واقعێ نوی و ب تایبەتی پشتی هەلبژارتنێن پەرلەمانێ ئیراقێ و پێكئینانا حوكمەتا فیدرالی گەلەك یا پێدڤی و گرنگە لایەنێن سیاسی یێن هەرێما كوردستانێ ب ئێكڕێزی بچنە بەغدا و بۆ ڤێ چەندێ ژی فەرە لیژنەیەك بهێتە پێكئینان ژلایێ حزب و لایەنێن سیاسی یێن هەرێما كوردستانێ ب تایبەت ژلایێ پارتی و ئێكەتی ڤە بۆ دانوستاندنان دگەل لایەنێن سیاسی یێن ئیراقێ ئەوێن سەركەفتی، ژبەركو ب ڤێ چەندێ دێ هەڵوێستی حزب و لایەنێن كوردستانێ دێ بهێزتربیت و دێ سەنگ و گرانیەكا دی هەبیت بۆ بدەست ڤەئینانا ماف و داخوازیێن گەلێ مە.
وەكو یا دیار گەلەك كێشە و ناكۆكی هەنە د ناڤبەرا حوكمەتا ئیراقا فیدرالی و حوكمەتا هەرێمێ و گەلەك ژ وان مافێن گەلێن كوردستانێ نەهاتینە جێبەجێ كرن ژلایێ حوكمەتا فیدرالی ڤە، دیسا بەردەوام قەیران و كێشە دهێنە دروستكرن بۆ گەلێ كوردستانێ ب هۆكارێن سیاسی كو یا ل هەمیان بەرچاڤتر برینا بودجە و مووچەیێن فەرمانبەرێن هەرێما كوردستانێ یە، هەرچەندە گەلەك جاران رێككەفتن هاتینە كرن كو حوكمەتا هەرێمێ پابەندی وان هەمی رێككەفتنان بوویە و هەمی ئەركێن خۆ جێ بەجێكرینە لێ ب هۆكارێن سیاسی حوكمەتا فیدرالی پابەندی وان رێكەفتنان نابیت و هەیڤانە كێشەیان بۆ مووچە یێن فەرمانبەرێن هەرێما كوردستانێ دروست دكەت، ژبلی مافێن دی یێ یێن هەرێما كوردستانێ وەكو بودجە و پارەیێ گەشەپێدانا پارێزگەهان و پشكا هەرێما كوردستانێ ل دامەزراندنێ و مادەیێ 140یا دەستووری.
ب بۆچوونا مە نەبوونا ئێكڕێزی و ئێك هەلوەستیا حزب و لایەنێن كوردستانی ئەگەرەكی سەرەكی و رێخۆشكرنە بۆ وان قەیران و كێشەیێن بەغدا بۆ گەلێ مە دروست دكەت، ژبەركو بەغدا ناكۆكیێن د ناڤبەرا حزب و لایەنێن سیاسی ب دەلیڤە دزانیت داكو مافێن گەلێ كوردستانێ بنپێ بكت و جێبەجێ نەكەت.
دیسا گەلەكا پێدڤی یە لەز د پێكئینانا كابینەیا 10یا حوكمەتا هەرێما كوردستانێ بهێتەكرن وحوكمەتەكا بنكەفراوان بهێتە دروستكرن كو ئەڤە بۆ ڤێ قۆناغێ گەلەكا گرنگە حوكمەتا بهێز بهێتە دروستكرن كو رێگری ل بریارێن وێ نەهێنەكرن و حوكمەت ب شێوەیەكی سەرانسەری كار بكەت و پەرلەمانێ كوردستانێ بهێتە كاراكرن و تاكو خزمەتا وەلاتیێن هەرێمێ ب شێوەییەكێ پێشكەفتیتر بهێتەكرن، د پێكئینانا ڤێ حوكمەتێ رێز ل بنەمایێن دیموكراتیێ و ئەنجامێن هەلبژارتنێن پەرلەمانێ كوردستانێ بهێتەگرتن كو هەر لایەنەك ل دویڤ سەنگ و هێزا خۆ پشكداریێ بكەت، دیسا هزر د بەرژەوەندییا خەلكێ كوردستانێ و ماف و داخوازێن كوردستانێ بهێتەكرن.
ل دوماهیێ دبێژین د ڤێ قووناغێ دا گەلەك مە پێدڤی ب ئێكڕێز و ئێك هەڵوێستیێ هەیە بۆ پاراستن و زێدەتر بدەستكەفتنا دەستكەفتان كو هەر ب ئێكڕێزیێ سەركەفتن بۆ گەلێ كوردستانێ بدەستڤەدهێن.

نەوزاد زادە نەقەبی

د دیرۆكا بزاڤا رزگاریخوازا هەر گەلەكێ دا رەنگە ب دەهان سەركردە و قەهرەمان لێ دروست ببن, لێ د كێمن ئەو سەڕكردە و رێبەر كو د دیرۆكا گەلێ خۆ دا هەر ب زێندی بمینن و شوون دەستێن وان هەر د دیار و بەرچاڤ بن.
سەرۆك مەسعود بارزانی ئەو پێشمەرگە و رێبەرێ مەزنە كو پێگەهەكێ كاریگەرێ بهێز یێ هەیی ل سەر ئاستێ نیڤدولەتی و هەرێمایەتی و نافخۆیێ دا و ئەزموونا دەولەمەندا شۆڕشگێری و خەباتا سەرۆك بارزانی پشت بەستێ دكەتە سەر بنەمایێن ئاشتی و ئازادی و دیموكراسیێ، هەردەم یا پڕە ل دوربینیێ و تێكگەهشتن ل واقعی و دیالۆگ و رەتكرنا توندوتیژی و تولڤەكرنێ، ئەڤە هەمی دزڤرنەڤە بۆ رێبازا بارزانیێ نەمر و بنەمایێن كولتووری یێن سەرۆك بارزانی پێك دئینن، كو رۆلەكێ گەلەك مەزن د شۆڕشا ئیلۆنێ دا گێرا و رێبەرایەتیا شۆڕشا گولانێ كر كو سەرهلدانا پیرۆزا سالا1991 یا گەلێ كوردستانێ هەر بەرهەمێ وێ شۆڕشێ بوو، سەرۆكێ دلۆڤان و هێمن و ئاشتیخواز بووییە و یێ توند بوویە ل هەنبەر دوژمن و داگیركەرێ كوردستانێ و چ جاران سازش ل مافێن گەلێ كورد نەكرییە، رۆلەكێ سەرەكی د هەڕفاندنا رژێما بەعسا ژناڤچوویی دا گێرا، دیسا ل دارێشتنا دەستوورێ نوی یێ‌ ئێراقا فیدرال دا هەمی هەول و بزاڤ بۆ دابینكرنا مافێن گەلێ كوردستانێ ب هەمی پێكهاتان ڤە كرن و گەلەك ل مافێن گەلێ كوردستانێ ب هەول و بزاڤێن سەرۆك بارزانی د وی دەستووری دا هاتنە چەسپاندن.
دیسا ل دەمێ هاتنا تیرۆرستێن داعش، ل پێناڤ پاراستنا هەرێما كوردستانێ سەرۆك بارزانی پێشمەرگە و سەرۆكێ بەرۆكێن شەڕی دژی تیرۆرستێن داعش بوو، دیسا خۆدانێ ریفراندۆما سەربەخۆییا هەرێما كوردستانێ بوو كو بەلگەهەكا دیرۆكی یە یێ دیاركرنا ئیرادا كوردستانیانە بۆ سەرخۆبوونێ.
سەرۆك بارزانی پارێزەر و ئەندازیارێ دیموكراسیێ و ئازادییە، دیرۆكەكا پڕ ل سەروەریێ بۆ گەلێ مەیێ بێ پشت و پەنا تۆماركریە ل پێناڤ گەهشتن ب ئازادی سەرفیرازیێ و پاشەرۆژەكا گەش كو هەر ل دەستپێكا گەنجاتیێ هەتا نوكە خەبات و تێكۆشانەكا بێ ڕاوەستیان دكەت ل پێناڤ مافێن ڕەوا یێن گەلێ كوردستانێ، هەر ب ڤێ خەبات و تێكۆشانێ دەنگێ گەلێ كوردستانێ گەهاندییە ناڤەندێن سیاسێن جیهانێ و هشیاركرینە ل وێ زولما كو ل هەنبەر گەلێ مە هاتیەكرن و دهێتەكرن.
لەوما ل دوماهیێ دبێژین ل هەلبژارتنێن پەرلەمانێ ئیراقێ ل رێكەفتی 11/11/2025 بلا دەنگێن مە بۆ لیستا (275) یا سەرۆك بارزانی بن كو ئەڤەژی باشترین و هەژیترین وەفاداری یە بۆ خەبات و تێكۆشانا بێ ڕاوەستیان یا سەرۆك بارزانی.

نەوزاد زادە نەقەبی

خۆیایە هەر ل دەستپێكا دامەزراندنا كابینەیا نەهێ یا حوكمەتا هەرێما كوردستانێ، بارودۆخێ ئابووری و سیاسی یێ هەرێما كوردستانێ یێ هاریكار نەبوو، هەر دیسا بەردەوام دوژمن و نەحەزێن كوردستانێ ل پێناڤی رێگریكرن ل پێشكەفتن و ئاڤەدانكرن و چاكسازیێ پیلان گێراینە كو ئەو بەرنامەیێ رێزدار جەنابێ مەسرۆر بارزانی سەرۆكێ حوكمەتێ دانایی د بەرژەوەندییا زۆر لایەن و كەسایەتێن گەندەل دا نەبوویە كو مەرەما وان تنێ بەرژەوەندیێن كەسۆكی و تایبەتن، لێ سەرۆكێ حوكمەتێ هەردەم بەرژەوەندیێن گەلێ كوردستانێ پێ گرنگترن ژ بەرژەوەندیا لایەنەكی و كەسایەتیەكی یان ژی رازیكرنا بەرژەوەندی خوازەكی، لەوما یا دیار و بەرچاڤە كو ئارمانجا سەرۆكێ حوكمەتا هەرێما كوردستانەكا ب هێز و پاشەرۆژەكا گەش و پێشكەفتی نە بۆ گەلێ كوردستانێ بێ هیچ جوداهییەك هەر ل دەستپێكا پێكئینانا ڤێ كابینەیێ هەمی كارو بزاڤێن سەرۆكێ حوكمەتێ ل پێناڤ خزمەتكرنا زێدەترا وەلاتیان و ب ساناهیكرن بلەز برێڤەچوونا كاروبار و مامەلەیێن وەلاتیان، دیسا پرۆژەێ رۆناكی یا كارەبا 24 دەمژمێری و پروژێ هەژمارا من و دروستكرنا بەنداڤان و دیسا رێك و پران د ناڤبەرا پارێزگەه و دەڤەران و خزمەگوزاری د هەمی بیاڤان دا، دیسا نەهێلانا گەندەلیێ و سەروەریكرنا قانوونێ بێ جوداهی، نەهێلانا رۆتینێ و چارەسەركرنا كێشەیێن كێم ئاڤیێ یێن باژێر و دەڤەرێن هەرێمێ مینا پرۆژەیێ ئاڤێ یێ باژێرێ هەولێرێ باشترین نموونە نە بۆ پرۆژەیێن ستراتیژیك یێن كابینەیا نەهێ.
هەرچەندە نەیار و دوژمنێن هەرێما كوردستانێ هەمی هەوڵ و پیلان گێران و دگێرن ل پێناڤ لاوازكرن و ڕاوەستاندنا پێشكەفتنێن هەرێما كوردستانێ كو نەدانا بودجە و برسیكرنا خەلكێ كوردستانێ بەشەكێ سەرەكی بوو ل وان پیلانان، بەلێ رێزدار مەسرۆر بارزانی ب راستگۆیی و ئەزموون و شارەزاییا خۆ یا زۆر و ب‌ پشتەڤانیا خەلكێ خۆڕاگرێ كوردستانێ شییا رووبەروی وان پیلانان بیتەڤە و رێك نە دا هەرێما كوردستانێ لاواز ببیت بەلكو بەروڤاژی ب پلان و پرۆژەیێن سەركەفتی هەرێما كوردستانێ بهێزتر و پێشكەفتیتر لێ كر, ل پێناڤ بەرژەوندیێن گشتی بۆ ب دەستڤەئینان مافێن خەلكێ كوردستانێ و دامەزراویێن پێدڤی دابین بكەت ل پێناڤ بەردەوامبوونا دیرۆكێ و ب شێوەیەكی كو شیانێن هەی رێكەكا تەكنیكیا پێداویستیان ڤەبینیت بۆ هێنادیا پرۆگرام و ئامانجێن پاشەرۆژێ ل ژێر رۆناهیا ستراتیژیێن گشتی چاڤەرێ تێكرن بۆ رێرەوێ وێ خەباتێ و سەركردایەتیێ ل پێناڤ ئایندەیەكێ گەش و مەزن بۆ گەل و نەتەوەیێ خۆ تێدكوشیت ب ڤی شێوەییە ئەنجامێن كاروخەباتێ بەردوامبیت هەتا زەنگێ سەركەفتنێ و ئەنجامێن ب دەستڤەهاتی دبنە پشتەڤان بۆ سەركەفتنا چاڤەرێكری، كو دبنە جهێ ئومێدێ بۆ ئۆمێدەكا گەش و خۆڕاگر و ب هیڤی بۆ گەلێ كوردستانێ.
ل دوماهیێ دبێژین ل پێناڤ بهێزكرنا زێدەترا پێگەهێ گەلێ كورد و بەردەوامیا كاروانێ خزمەتگوزاریان و پێشكەفتنا زێدەترا هەرێما كوردستانێ و درۆستكرنا پاشەروژەكا گەشتر, پێدڤیە ل سەر هەمی خەلكێ كوردستانێ ل روژا هەلبژارتنێن پەرلەمانێ ئێراقێ بچنە سەر سندۆقێن دەنگدانێ و دەنگی بدەنە لیستا ژمارە (275) یا پارتی دیموكراتی كوردستان.

نەوزاد زادە نەقەبی

وەكی یا خۆیا و ئاشكرایە كو بریارە هەلبژارتنێن خۆلا (6) یا پەرلەمانێ ئیراقێ ل 11/11 بهێنە ئەنجامدان كو ئەڤە چەند رۆژەكە لیستێن پشكدار دەست ب بانگەشەیێ كرینە كو هیڤیخوازین بانگەشەیەكا ئارام و هێمن و دویر ژ ئاخفتنێن زڤر و ناڤزراندن و توندوتیژیێ بیت.
ئەگەر مرۆڤ ب وژدان ڤە بەرێ خۆ بدەتە حزب و لایەنێن پشكدار و ئەوێن بانگەشەیێن دكەن، دێ دیاربیت كو پارتی دیموكراتی كوردستان ئەو پارتەیە كو ناڤێ وێ و سەرۆكێ وێ و سەركردەیێن وێ ئەڤرۆ د ئاستێ نیڤدەولەتی و هەرێمایەتی و ناڤخۆیی دا وەكو پارتەكا بهێز و خۆدان پێگەھ و دیارە د رۆژهەلاتا ناڤین دا و حزبا ئێكێ یە د ئیراقێ دا و خۆدان دەنگێ مەلیۆنییە، یا فەرە و یا هەژی وەكو ئەركەكێ نیشتیمانی كو كوردستانی دەنگی ب لیست و بەربژارێن وێ بدەن و ڤێ جارێ ژی بكەنە حزبا ئێكێ، ژبەركو ئەو حزبە یا هەمی دەمان ب بەرپرسیارەتی كاركریە و بەرژەوەندیا گشتی ل پێش هەر بەرژەوەندییەكا تایبەت و حزبی و كەسۆكی داناییە، هەر ژ دامەزراندنا خۆ هەتا نوكە پارتی ب ئەقلەكێ بەرفرەھ و دویر ژ لۆكالیێ خەبات كریە و دكەت بەلكو ب شێوەیەكێ سەرانسەری كار بۆ هەمی گەلێ كوردستانێ كرییە و ل پێناڤ مافێن گەلێ كورد كو چ جاران سازش ل سەر ماف و دەستكەفتیێن گەلێ كورد نەكرینە و ناكەت ژی، هەمی هەول و خەباتێن وێ ل پێناڤ كوردستانەكا بهێزن و سەرفرازییا گەلێ كورد ل نك وێ ل هەر تشتەكێ دی گرنگتر بوویە.
دیسا د ڤان كاودانێن ئالۆزێن یێن جیهانێ و ب تایبەت د رۆژهەلاتا ناڤین دا، هەرێما كوردستانێ دێ یا پاراستی و ئارام و پێشكەفتیتر بیت ئەگەر دەنگێ مە بۆ لیستا پارتی و بەربژارێن وێ بیت، دوژمن و نەیار باش دزانن كو پارتی بۆ هەڕێما كوردستانێ پێنگاڤێن گرنگ بڕینە بۆ قۆناغێن داهاتی ژبەر هندێ ئەڤان گڤاشتنیێن نەڕەوا ل هەنبەری گەلێ مە ل بیاڤێن سیاسی و ئابۆری و ئەمنی دكەت.
ژ لایەكێ دی ڤە ژلایێ ئاڤەدانكرن و پێشكەفتنا كوردستانێ ژی ڤە پارتی پێشەنگ بوویە كو هەر جهەكێ پارتی لێ دەستهەلات ئاڤەدانی ل وێرێ بوویە و بێ ڕاوەستیان كاروانێ ئاڤەدانیێ لێ بەردەوام بوویە، هەمی كار و بزاڤێن پارتی ل پێناڤ كوردستانەكا پێشكەفتی و پر خزمەتگوزارینە و ب دابینكرنا خزمەتگوزارییان بێ جوداهی و دروستكرنا پرۆژەیێن ستراتیژی كوردستان پێشئێخستیە، ڤێ چەندێ وەكریە كو كوردستان یا جودابیت ژ پارێزگەهێن دی یێن ئیراقێ كو هەمی چاڤدێرێن بیانی و ناڤخویێ یێت ب وژدان دیدەڤانێن ڤێ چەندێنە.
یا ئاشكرایە كو هەمی پیلان و بزاڤێن لایەنێن شۆفینی و نەیارێن گەلێ كورستانێ ل پێناڤ لاوازكرنا پارتینە كو بەردەوام هەول ددەن و پیلانان دگێرن ب پشتگیریا هندەك لایەنێن ناڤخۆیی دا كو پارتی لاوازبكەن ژبەركو دزانن لاوازبوونا پارتی لاوازبوونا هەرێما كوردستانێ یە ژبەركو دزانن تنێ پارتی یە بەرگریكارا راستەقینە یا ماف و دەستكەفتیێن گەلێ كوردستانێ، لەوما داكو مە كوردستانەكا ب هێز و پاراستی و پێشكەفتی هەبیت و پیلانێن نەیاران بهێنە هەلوەشاندن، دبێژین پێدڤیە ل سەر كوردستانیان ل رۆژا دەنگدانێ بچنە سەر سندۆقێن دەنگدانێ و دەنگێ خۆ بدەنە لیستا 275 یا پارتی دیموكراتی كوردستان و بەربژارین وێ.

نـەوزاد زادە نـەقـەبـی

دیرۆكا بزاڤا رزگاریخوازا هەر گەلەكی رەنگە ب دەهان رێبەر و قەهرەمان لێ‌ دروست ببن, لێ د كێمن ئەو سەركردە و رێبەر كو د دیرۆكا نەتەوا خۆ دا هەر ب زیندی بمینن و شوون دەستێن وان د دیاربن ب سەر دیرۆكا گەلێ خوە ڤە، مللەتێ كوردی ژی ئێكە ل دێرینترین گەلێن ڤێ دەڤەرێ، ب دەهان سەركردە و قەهرەمان و بلیمەت رێبەراتیا ڤی كاروانی یا ب دەستڤەگرتی و پێشەنگ و بەرخۆدانیا نەتەوەیا خۆ یاكری، لێ هیچ رێبەرەكی و سەركردەیەكێ كورد وەكی بارزانیێ نەمر رۆل و كاریگەری ل سەر ب پێشڤەبرنا تەڤگەرا رزگاریخوازا گەلی كوردستانێ نەبوویە.
بارزانیێ نەمر د شۆرشا ئیلۆنا مەزن دا شییا پێكهاتێن گەلێ كوردستانێ بێ جوداهییا رەگەزی و ئایینی و مەزهەبی ل ژێر ئالایێ شۆرشا ئیلۆنێ دا كۆمڤە بكەت و شۆرشەكا سەرانسەری رابگەهینیت كو د چارچووڤێ لۆكالی دەركەڤیت و بشێت ب شێوەیەكی واقعییانە و سەردەمانە جەماوەری رێكبێخیت و ئاراستە بكەت و ئارمانجێن نەتەوەیی ب دەستڤەبینیت، كو بەرێ د دیرۆكێ دا نەهاتبووكرن، ئەڤە ژی ل دژی ستەما رژێما ئێراقێ یا وی سەردەمی پشتی كو هەمی رێكێن دانوستاندن و گفتوگۆیان ل گەل حوكمەتا وی سەردەمی بۆ بدەستڤەئینانا مافێن رەوایێ گەلێ كوردستانێ ل گەل رژێما وی سەردەمی یا ب سەرۆكایەتیا عەبدولكەریم قاسم بێ ئەنجام بووین، ژبەركو ئەو رژێم كەفتبوو ژێر كاریگەری هزرێن شۆڤێنین هێز و لایەنێن سیاسیێن وی سەردەمی یێن ئیراقێ، ژبەر هندێ بارزانی گەهشتە وێ باوەریێ كو دانوستاندن د گەل ڤێ رژێمێ د بێ ئەنجامن لەوما ل 11 ئیلۆنا 1961ب رێبەرایەتیا بارزانی نەمر شۆرشا ئیلۆنێ سەرهەلدا.
بارزانی ژبەركو ئەزموونەكا زۆرا سیاسی و شۆرشگێری هەبوو دزانی سەركەفتنا شۆرشێ و پێشمەرگەیان بێ پشتەڤانیا جەماوەری بسەرناكەڤیت، لەوما بدەستڤەئینانا پشتەڤانیا جەماوەری ئێك ژ ئارمانجان بوو، د ڤێ شۆرشێ دا داستانێن مەزن هاتنە تۆماركرن ژ وان ژی داستانا زاویتە و چیایێ هندرین و ..هتد، گورزێن مەزن و بهێز ل داگیركەرێن كوردستانێ هاتنە دان، دیسا ژ رویێ جڤاكی و سیاسی ڤە د ڤێ شۆرشێ دا گوهۆرین چێبوون كو ڤێ شۆرشێ هوشداریا نیشتمان پەروەریێ ل دەڤ كوردستانیان بهێز و زێدەكر و هەتا نوكە ب شانازی ڤە ببێژن رۆژەكێ ژ رۆژان وەك ئەركەكێ نەتەوەیی ئەم پشكەك بووین ژ ڤێ شۆرشێ بۆ بەرەڤانیكرن ژ ماف و داخوازیێن ڕەوا یێن گەلێ كوردستانێ، هەروەسا هەر د شۆرشا ئیلۆنێ دا گەلێ كورد پتر هاتە نیاسین د بیاڤێ نیڤدەولەتێ دا و دبلۆماسیەتا كوردی ب هێزبوو ل سەر ئاستێ هەرێمی و نیڤدەولەتی ڤە.
شۆرشا مەزنا ئیلۆنێ ب رێبەرایەتیا بارزانی نەمر حوكمەتا ئیراقێ نەچاركر كو دان ب مافێن گەلێ كورد بینیت ب شێوەیەكێ فەرمێ د رێككەفتنا یازدەیێ ئادارا سالا 1970، ئەو رێككەفتن بوو بنەمایەكێ گرنگ و دیرۆكی كو گەلێ كورد هەمی سەردەمان بكەتە بنەمایەكێ بهێز بۆ دەستڤەئینانا ماف و داخوازیێن خۆ و دیسا بوو بنەمایەكێ یاسایی بۆ ڕەوابوونا خەباتا گەلێ كوردستانێ.
ل دوماهیێ دبێژین شۆرشا مەزنا ئیلۆنێ بنەمایێ دەستكەفتێن نوكەیە، ژبەركو ب رێكا وێ شۆرشێ گەلێ كورد زێدەتر خۆ نیاسی و زانین مافێن وان یێن ڕەوا چ نە و وەكر پتر ڕژد ببن ل سەر خەبات و تێكۆشینا خۆ ل پێناڤ كوردستانەكا ئازاد و سەربەخۆ.

نـەوزاد زادە نـەقـەبـی

پارتی دیموكراتی كوردستان ب رێبەراتیا بارزانیێ نەمر شییا ل دەستپێكا دامەزراندنا خۆ نوونەراتیا ڕاستەقینەیا خەلكێ كوردستانێ بكەت ب هەمی ئایین و مەزهەب و نەتەوان ڤە ل كوردستانێ، سەرەرای وی بارودۆخێ نەخۆش یێ وی سەردەمی كو پشتی جەنگێ جیهانی یێ دوویێ بوو، گەلێ كوردستانێ ژی د بارودۆخەكێ نەخۆش و ژینگەهەكا سیاسی یا ئاڵوز دا بوو، لێ كەسایەتی و ب هێزی و خۆراگری و بەرخۆدانا جەنابێ بارزانیێ نەمر شییا سەركردایەتیا خەلكێ كوردستانێ بكەت ب هەمی ئایینی و ئۆل و نەتەوان ڤە، جهێ شانازی و پشتەڤانیا جەماوەری بوو، لەوما باوەرا خەڵكی ب ڤی رێبەرێ بلیمەت و شاهرەزا بوو ئەگەرا هندێ كو پێكهاتێن گەلێ كوردستانێ بێ جوداهییا ڕەگەزی و ئایینی و مەزهەبی ل ژێر سەركردایەتیا ڤی رێبەری دا خەباتێ بكەن و ل بن ئالایێ پارتی دا خۆ ببینن، دامەزراندنا پارتی ژلایێ بارزانی، گرینگترین و پێدڤیترین دەستپێك بوو بۆ كۆمكرنا گەلێ كوردستانێ ل ژێر سێبەر و ئالایێ پارتیەكا سەرانسەری كو د چارچووڤێ لۆكالی دەركەڤیت و بشێت ب شێوەیەكی واقعییانە و سەردەمانە جەماوەری رێك بێخیت و ئاراستە بكەت و ئارمانجێن نەتەوەیی ب دەستڤەبینیت، بارزانیێ نەمر درك ب وێ چەندێ كربوو كو شۆرش و پێشمەرگە بێی پشتەڤانیا جەماوەری و خەلكێ كوردستانێ نەك هەر هیچ بهایەك نییە بەلكو كۆتانا ئاسنیە ب ساری و هەرگیز ب ئامانج ناگەهیت و سەركەفتنێ ب دەستڤە ناهینیت، ژ بەرهندێ پشتەڤانیا جەماوەری ئارمانجێن هەرە پیروزێ بوو بێی ل بەرچاڤكرنا ڤێ ئامانجێ شۆرش سەرناكەڤیت و هیچ مانا مەبەستەكێ ب دەستڤەنائینیت و شۆرشەكا دی خۆلقاند ب جۆرەكی ئاست و شێوەیێ بیركرنا ژیانا سیاسی گوهارت و مەودا و رەهندەكێ دی گرتەنبەر و شییا سنوورێن داخستی و پەیوەندیێن جڤاكی یێن جڤاكێ كوردستانێ ببەزینیت و گونجانێ د ناڤبەرا هزر و رێكخستنێ د ناڤ هەمی پێكهاتەیێن جڤاكی دا درۆست بكەت، هەر وەكو یا خۆیایە پارتی دیموكراتی كوردستان هەر دامەزراندنا وێ تاكو ئەڤرۆ كو دبنە 79 سال خۆدان پرۆژەیەكێ نەتەوەیی بوویە و ب هیچ شێوەیەكێ بەرهەڤ نەبوویە بۆ سازشكرنێ ل مافێن كورد وكوردستانییان و بەردەوام خەبات و قوربانی داینە بۆ بەرگریكرنێ ل دۆزا رەوایا گەلێ كوردستانێ و بدەستڤەئینانا مافێن وان، ئەو دەستكەفتیێن ل سەر دەستێ پارتی و سیمبۆلێن وێ ب دەست ڤەهاتی ب دەستكەفتیێن گرنگ دهێنە هژمارتن د دیرۆكا بزاڤا رزگاریخوازا گەلێ كوردستانێ دا كو قەوارەیا هەرێمێ بەرهەمێ وێ یە، ژلایێ ئاڤەدانكرن و پێشكەفتنا كوردستانێ ژی ڤە پارتی پێشەنگ بوویە، لەوما ب پشتەڤانیا جەماوەری پارتی ئەڤرۆ بوویە هێزەكا گرنگ ل سەر ئاستێ نێڤدەولەتی و هەرێمی و دناڤا مللەتێ كورد ب هێزەكا بێ هەڤرك دهێتە هژمارتن، ل دویماهیێ دبێژین ب هەلكەفتا 16 تەباخێ 79 سالیا دامەزراندنا پارتی دیموكراتی كوردستان هزاران سلاڤ بۆ گیانێ پاكێ شەهیدێن كوردستانێ سەروەرێ وان بارزانیێ نەمر و كاك ئیدریسێ هەردەم ساخ.

نەوزاد زادە نەقەبی

وەكی یا خۆیایە د جەنگێ جیهانیێ ئێكێ دا ئەڤ پەیمانە ل سالا 1916 هاتە ئەنجامدان ب شێوەیەكێ نهنێنی د ناڤبەرا بەریتانیا و فرەنسا و رۆسیا دا كو ئارمانچا ڤێ پەیمانێ دابەشكرنا دەولەتا ئوسمانیان بوو د ناڤبەرا خۆدا و هەر چەندە رۆسیا ل سالا 1917 خۆ ل ڤێ پەیمانێ ڤەكێشا ژبەركو گوهۆریین د دەستهەلاتا رۆسیا هاتنەكرن و سیستەمێ سیاسی قەیسەریێ هاتە گوهۆرین و شۆڕشا ئۆكتۆبەر یان شۆڕشا بەلشەڤیك بۆ سیستەمێ كۆمۆنیزم و شیۆعیان و سنوورێ جوگرافیا سیاسی یا دەولەتا ئوسمانی ب تەمامی هاتە گوهۆرین و د ناڤبەرا بەریتانیا و فرەنسا و كوردستانێ‌ ژی د هاتە دابەشكرن ژ دو دەولەتان كو پێشتر دبن دەستهەلاتا دەولەتێن ئوسمانیان و سەفەویان دا بوو هاتە دابەشكرن بۆ سەر چار وەلاتان، و كورد هاتنە بێ بەشكرن ژ هەمی مافەكی و ل هەمی پارچێن كوردستانێ حزبێن سیاسی و بزاڤێن چەكداری و شۆرەش هاتنەكرن ژبۆی رەتكرنا وێ ستەمێ و دیفاكتۆیێ واقع یا ب سەرگەلێ كوردستانێ هاتیە كێشان، هەر چەندە دەلیڤە بۆ كوردان جێ بوون بۆ سەرخەبونێ و رزگاربونێ لێ كورد نەشیان مفای ژ وان دەلیڤیەیان وەرگرن وەكو پەیمانا سیڤەر ل وەلاتێ فرەنسا ل سالا 1920 ل دویڤ وێ پەیمانێ بەڕیتانیا دڤیا كوردستانا باكوور ل توركیا جودا بكەت و ب ڕێفراندۆمەكێ ویلایەتا مووسڵ پێك ڤە گرێ بدەت و دەوڵەتەكا كوردی یا سەربخۆ بۆ كوردا لەژێر سەرپەرشتیكردنا خۆ دابمەزرینیت . ژبەر پەرتەوازەیێ و نەبوونا ئێك رێزیێ دناڤا گەلێ كوردستانێ د ناڤا ئاخا كوردان دا و سنوورێ سیاسی و ئیداری هەرێمی، چ ڕێككەفتنێن گشتی د ناڤبەرا كوردان نەبوو و وێنەیەكێ شلوڤەكاریێ كوردستانێ وەكی قەوارەیەكێ ل سال ١٩١٩ ژلایێ شەریف پاشا كو نوێنەرێ كوردان بوو ل كۆنفرانسا ئاشتیا پاریس هاتبوو پێشنیاركرن، پاشی ل سالا 1923 پەیمانا لۆزان هاتە گرێدان و پەیمانا سیڤەر هاتە هەلوەشاندن كو ئەگەرێ سەرەكی یێ هەلوەشاندنا ڤێ پەیمانێ كوردبوون ژبەركو زۆربەیا كەسایەتیێن جڤاكی یێن كورد ل كوردستانا باكور پالپشتیا كەمال ئەتاتوركی دكرن و پشتگیریا شەریف پاشای نەبوون و خۆفرۆش ‌(حەسەن خەیری) یێ كوردبوو و نوونەرێ ئەنجوومەنێ نیشتمانیێ تركیا بوو ل ژێر سەرپەرشتیا كەمال ئەتاتورك رابوو بنڤسینا نامەكێ بۆ كۆنگرەیا لۆزان بناڤێ هەمی كوردان كو درازینە ب دامەزراندنا دەولەتا تركیا، ژ بەر كو ئەورۆپی بێ كوردان ئامادە نەبوون ب ئیمزاكرنا پەیمانا لۆزان و ئەگەر ئەم بەرێ خۆ بدەینە دیرۆكێ دێ بۆ مە خۆیا بیت بۆ رەتكرنا كاریگەریێن سایكس پیكۆ تنێ ئێك رێك ل پێشیا مەیە ل دەمێ هەبوونا ئێكرێزیێ دەستكەفتی و سەركەفتن هەبووینە، نموونە ژی شۆرەشا ئیلۆنا مەزن دا بارزانیێ نەمر ل سالا1961 ئێكەمین رێبەر بوویە كو خەلكێ كوردستانێ ل ژێر ئێك ئالا كۆم ڤە بكەت شۆرەشەكا سەرتاسەری بكەت و بەیانناما 11 ئادارێ ل سالا 1970 بەرهەمێ ڤێ شورەشێ بوویە و بۆ ئێكەمین جار د دیرۆكا ئیراقێ دا دان مافێ كوردان ب شێوەیەكێ فەرمی هاتەدان و سەرهەلدانا پیرۆزا بهارا سالا 1991 كو بەرهەمێ ئێكرێزیا لایەنێن كوردستانێ ل ناڤ بەرەیێ كوردستانێ بوو كو دروستكرنا قەوارەیێ هەرێما كوردستانێ و دامودەزگەهێن وێ ل پەرلەمان و حوكمەتا هەرێمێ بەرئەنجامێ ڤێ سەرهلدانێ بوو، فەرە بۆ ڤێ قووناغێ ئەنجوومەنەكێ بلند یێن پارتێن سیاسی ل هەرێما كوردستانێ هەبیت و هەمی حزب و لایەنێن سیاسی پشكداربن ب تایبەت ل سەر پرۆژەیێ نەتەوەی و نیشتمانی و بەرهەڤی بۆ هەر گوهۆرینەكێ ل ڤێ قووناغێ دا بهێنەكرن و هەولێن زێدەتر بهێنەدان و لەز ل پێكئینانا كابینەیا 10 یا حوكمەتا هەرێما كوردستانێ بهێتەكرن و پێكئینەرێن حوكمەتێ، دڤێت ئێك هەلوەستبن ب تایبەتی ل هەمبەر بەغدا و پرسێن نەتەوەی و نیشتمانی.

نەوزاد زادە نەقەبی

وەكی یا دیارە رۆژهەلاتا ناڤین، جهەكێ ستراتیژی ل جوگرافیا سیاسی هەیە، ژ روویێ ئابووری ڤە ژێدەرەكێ گرنگە ب تایبەت كو بەشەكێ هەرە زۆرێ نەفتا جیهانێ ل ڤێ دەڤەرێ یە، دیسا هەر د كەڤن دا بازارەكێ گرنگ بوویە بۆ فرۆتنا كەرەستەیێن خاڤ، رێكا بازرگانی یا ستراتیژی یە د ناڤبەرا رۆژهەلات و رۆژئاڤا دا، لەوما بەردەوام جهێ ململانیێ بوویە د ناڤبەر وەلاتێن ز لهێز دا و شەڕ و ناكۆكی د ناڤبەرا وان ل سەر دروست بووینە، دیسا ژ بلی ڤێ چەندێ كێشەیێن نەتەوەیی لێ هەبووینە.
د ڤان گوهۆرینێن ل ڤێ دوماهیێ چێبوون؛ تایبەت پشتی هێرشا 7 ئوكتۆبەر یا بزاڤا حەماس ل سەر ئیسرائیلێ و ئەو رویدان شەڕێن پشتی ڤێ هێرشێ چێبووین، ئیسرائیل ب پشتەڤانیا ئەمریكا و وەلاتێن رۆژاڤا ب گشتی بوویە، بهێزترین دەولەت و هێزا دەڤەرێ و هەڤڕك و دوژمنێن وێ گەلەك هاتنە لاوازكرن، دهێتە چاڤەرێكرن گورانكاری تەڤایا رۆژهەلاتا ناڤین ڤەگرن و كاریگەریێن وێ بەرفرەهترببن و نەخشەیێ سیاسی ل رۆژهەلاتا ناڤین گوهۆڕینێن ب سەر دا بهێنەكرن، ب تایبەت كو بەحسێ پلانا دروستكرنا رۆژهەلاتا ناڤین یا نوی دهێتەكرن كو وەسا هاتیە دارێشتن كو حوكمەتێن ناڤەندی یێن رۆژهەلاتا ناڤین بهێنە لاوازكرن؛ داكو جارەكا دی چ حوكمەت نەبنە هەڕەشە بۆ سەر ئیسرائیلێ.
پرسیارا یا گرنگ ئەوە كو ئەرێ كورد ب گشتی و هەرێما كودستانێ ل ڤان گوهۆرینان ل كیڤە جهی دگرن و چەند د بەرژەوەندییا كوردان دانە؟، ل ڤێرە مە دڤێت بێژین پێدڤیە كورد ب بەرچاڤ وەرگرتنا ڤان گوهۆرینێنن، بەلێ ب شێوەیەكێ واقعی هەلوەستان وەربگرن و سیاسەتێ بكەن، ل دەستپێكێ هزرا پاراستنا دەستكەفتان دا بهێتەكر؛ن پاشی ب دەستڤەئینانا زێدەترا ماف و داخوازێن ڕەوا یێن گەلێ كوردستانێ، بۆ ڤێ چەندێ ژی ئەم پێدڤی ب ئێكرێزیا حزب و لایەنێن كوردستانینە، چونكو یا ئاشكرایە هەمی جاران ب ئێكریزیێ دەستكەفت و سەركەفتنێن زێدەتر بۆ گەلێ كوردستانێ بدەستڤەهاتینە، دڤێت وێ ڕاستیێ ژی ل بەرچاڤ وەربگرین، حزب و لایەنێن شوڤینی یێن ئیراقێ و دەولەتێن داگیركەر یێن كوردستانێ هەمی هەول و بزاڤێن ئەون كو كورد لاوازبن و دەستكەفتێن زێدەتر بۆ كوردان نەبن، بۆ ڤی ژی بەردەوام هەولا دروستكرنا ناكۆكی و هەڤركیان د ناڤبەرا حزب و لایەنێن كوردستانی ددەن.
ل دوماهیێ دبێژین حزب و لایەنێن كوردستانێ د داخوازكرینە كو د ڤان گوهۆینان دا ئێكرێز بن و ئێك پلان و ئێك سیاسەت هەبیت داكو مە كوردستانەكا پاراستی و بهێزتر هەبیت.

نـەوزاد زادە نـەقـەبـی

دەستپێكرنا هەر شەرەكێ د ناڤبەرا وەلاتان دا كاریگەری و ئەنجامێن خۆ هەنە ل سەر جیهانێ ب گشتی و وەلاتێن هەرێمی ب تایبەتی و هەتا ل ناڤخۆیا وەلاتێن پشكدار د شەڕی دا ژ وان گوهۆرینان دەستهەلاتا سیاسی و دروستبوونا كێشەیێن ئابووری و تێكدانا ژێرخانەیا ئابووری.
یا خۆیایە هەر دو وەلاتێن ئیران و ئیسرائیل هەڤڕكی و ململانێین كەڤن د ناڤبەرا وان دا هەنە كو دیرۆكا وان ب تایبەتێ دزڤریتەڤە بۆ پشتی دامەزراندنا كۆمارا ئیسلامی یا ئیرانێ ل سالا 1979، هەر چەندە ل سەردەمێ پاشایەتیێ بەری و پەیدابوونا كۆمارا ئیسلامی پەیوەندیێن بهێز و ستراتیجید ناڤبەرا هەردو وەلاتان دا هەبوون و هەڤپەیمانێن ستراتیژی یێن ئێك بوون، لێ پشتی دامەزراندنا كۆمارا ئیسلامی دەستهەلاتدارێن نوی یێن ئیرانێ هەر ل دەستپێكێ پەیوەندیێن وەلاتێ خۆ ل گەل ئیسرائیلێ بڕین و ب هەموو شێوەیەكێ دەست ب دژایەتیا هەبوونا ئیسرائیلێ ل دەڤەرێ كرن، بەلێ ئەڤ ناكۆكی و ململانێ یە ب نەراستەوخۆ دهاتنە رێڤەبرن ب تایبەت ژ لایێ ئیرانێ كو ب رێكا بریكارێن خۆ ل دەڤەرێ شەڕێ ئیسرائیلێ دكر نەمازە ب رێكا بزاڤێن حەماس و جیهادا ئیسلامی ل فلستینێ و حزب اللە لبنانی، لێ پشتی هێرشا بزاڤا حەماس ل سەر ئیسرائیلێ ل 7 ئوكتۆبەرا سالا 2023، ئیسرائیلێ هەر ل دەسپێكێ دەست ب پلانەكا ستراتیژی كر بۆ ژناڤبرنا بریكارێن ئیرانێ ل دەڤەرێ و نەهێلانا مەترسیێن وان كو دەستپێكێ ل حەماسا فلستینی ل كەرتێ غەزە دەستپێكر و پاشی ل حزب اللە لبنانی و ئیسرائیل سەركەفتی بوو و گەلەك لاواز و‌ بێ هێزكرینە، هەروەسا كەفتنا رژێما بشار ئەسەدی ل سووریا هەر پارچەك بوو ژ وێ پلانێ.
ئەڤە هەفتیەكە ب هێرشێن خۆ ئیسرائیلێ دەست شەڕەكێ راستەراست ل گەل ئیرانێ كریە كو ل دویڤ گۆتنێن وان ئارمانجا وان لاوازكرنا راستەوخۆ یا یا حوكمەتا ئیرانێ و گوهۆرینا نەخشەیێ سیاسی یێ دەڤەرێ یە.
گەلەك جاران د شەڕان روویدانێن نەچاڤەرێكری رووددەن و دبیت بەرفرەهتر ببن، هەرێما كوردستانێ ژی جیرانا ئیرانێ یە و یا دویر نینە ژ گۆرەپانا شەڕێ، لەوما ل ڤێرە یا گرنگ ئەوە هەمێ هەول و بزاڤ ل پێناڤ پاراستنا هەرێما كوردستانێ بن بۆ ڤێ ژێ پێدڤیە هەمی حزب و لایەنێن كوردستانێ ئێكرێز و ئێك هەلوەست بن و بێلایەنیێ هەلبژێرین داكو گەل و هەرێما كوردستانێ یا پاراستی بیت، دیسا دبیت ئەنجامێن ڤان شەڕ و كاودانێن ئالۆز یێن رۆژهەلاتا ناڤین دا د بەرژەوەندییا هەرێما كوردستانێ دا بن و نەیار ودوژمنێن مافێن گەلێ كورد لاواز ببن و قووناغەكا نوی دەست پێ بكەت و دەستكەفتێن زێدەتر بۆ گەلێ كوردستانێ هەبن.
ل دوماهیێ دبێژین چ رێك ل پێشییا مە نینە تنێ خۆ ئامادەكرن نەبیت ل گەل پێشهاتان ب شێوەیەكی واقعی كو بۆ ڤێ ژی ل دەستپكێ و بەرییا هەر تشتەكێ ئەم پێدڤی ب ئێك هەلوەستی و رێزیا لایەنێن سیاسی نە دا كو هەرێما مە یا پاراستی بیت.