نه‌زیر چه‌مباهیڤى
دبیت ده‌ما ئاخفتن و گۆتن ل سه‌ر ده‌وله‌تا كوردى دئێنه‌كرن، هنده‌ك بێژن ئه‌و خه‌ونا به‌تالایه‌ و دلخۆشكرنا دلێ هه‌ژاران, هنده‌ك ژى بێژن هه‌ما كورد بینه‌ ده‌وله‌ت دێ دونیا خراب بیت, به‌لێ شرۆڤه‌كار و سیاسه‌تمه‌دار وه‌سا نابینن و هزر دكن ده‌وله‌تا كوردى یا ب رێڤه‌ و ئه‌ڤ ئالۆزیێن نها ل ده‌ڤه‌رێ په‌یدا بین هه‌مى رێكخۆشكه‌رن بۆ ژ دایكبوونا ده‌وله‌ته‌كا كوردى هه‌ڤشێوه‌یى ده‌وله‌تا ئیسرائیل ل سالێن چلان دا ل چه‌رخێ بۆرى ب وه‌عد بلفۆرا بریتانى و ئورۆپى, ئه‌ڤ پویته‌دانا نها ژلایێ ده‌وله‌تا كویر (الدوله‌ العمیقه‌) ل ئه‌مریكا ب كوردان دئێته‌دان ژلایێ مرۆڤایه‌تى و دۆستایه‌تى ڤه‌ ئارمانجێن مه‌زن ل دووڤ هه‌نه‌ ژبۆ به‌رژه‌وه‌ندیا گه‌لێ كورد، دبیت وه‌ك وێ وه‌عد بلفۆرێ، به‌لێ ناڤ ئه‌مریكى ئورۆپى بیت بۆ كوردان، ژبه‌ركو ئه‌ڤ پرۆژێن ستراتیجى ب به‌رهه‌مئینانا كه‌رتێن په‌ترۆلێ و دانانا بنگه‌هێن له‌شكرى و كونسلخانه‌ و هه‌ماهه‌نگیا هه‌ڤپشك ل گه‌ل سه‌ركردایه‌تى و هێزا له‌شكرى یا كوردى ژبۆ په‌یداكرنا هه‌ڤسه‌نگیا هێزێ ل ده‌ڤه‌رێ, داكو به‌رژه‌وه‌ندیێن ئه‌مریكا و هه‌ڤالبه‌ندێن وێ ژناڤنه‌چن، دبینن گوهۆرینه‌كا ریچالى ل نه‌خشێ ده‌ڤه‌رێ دڤێت په‌یدا ببیت, پلان و پرۆگرام ل ژۆرێن دوور ژ راگه‌هاندنێ هاتینه‌ دارشتن و چ نێزیك یان بۆ ده‌مه‌ك درێژتر د ئارمانجا ئه‌مریكا و هه‌ڤالبه‌ندێن وێ دایه‌ ئه‌و نه‌خش ببیته‌ راستى و جێبه‌جێ ببیت, پلانا گوهۆرینا نه‌خشێ ده‌ڤه‌رێ ژى ئه‌وه‌ ئاڤاكرنا ده‌وله‌تا كوردى یا مه‌زن, چه‌ندین ساله‌ ئه‌و پرۆگرامه‌ یێ كار دكت وه‌كى هاندانا شه‌ڕێ تائیفه‌گه‌ریێ د ناڤبه‌را شێعه‌ و سونان ل عیراق و سووریێ دا ژبۆ لاوازكرنا هێزا ده‌ستهه‌لاتێن هه‌ردو وه‌لاتان و رێخۆشكرن بۆ ئیرانێ و هنده‌ك وه‌لاتێن ده‌ڤه‌رێ مایتیكرنێ د ئه‌ڤان هه‌ردو وه‌لاتان دا بكن, لادانا گه‌له‌ك سه‌ركردێن عه‌ره‌بان ب رێیا بهارا عه‌ره‌بى, ئیرانا پر نه‌ته‌وه‌ ژى یا به‌ر ب وه‌ستیانه‌كا زێده‌ڤه‌ دچیت ژبه‌ركو گه‌له‌ك یا دایه‌ به‌ر ده‌ڤێ داسا خوه‌ پشتى خوه‌ كرى یه‌ وارسا شێعێن جیهانێ و چ نێزیك یان ماوه‌یه‌ك درێژتر، دبیت بكه‌ڤته‌ وێ خه‌فكا عیراق و سووریا كه‌فتینێ, یێن نها ئاریشه‌ و ئاسته‌نگ د رێیا ژ دایكبوونا ده‌وله‌تا كوردى و بجهئینانا پرۆژێ ده‌وله‌تا كوور دا و توركیا و رۆسیا و كورد ب خوه‌نه‌:
ـ توركیا یا ل سه‌ر سێ پیان یا دچه‌ریت ژ لایه‌كى ڤه‌ ئه‌نداما كارایه‌ د ناتۆ دا و د هه‌مان ده‌م دا یا بوویه‌ برایێ نه‌ شرعیێ رۆسیا و ژ لایه‌ك دى ڤه‌ چه‌ندین گرۆپێن توندره‌وێن ناڤ ئیسلامى ل ده‌ڤه‌رێ و رۆژهه‌لاتا ناڤین و جیهانێ یێن ئیناین دگه‌ل هزرا خوه‌ بۆ مه‌ره‌مێن ڤه‌گه‌راندنا خیلافه‌تا ئیسلامى (ئوسمانى) سه‌ره‌رایى هه‌بوونا په‌یوه‌ندى و به‌رژه‌وه‌ندیێن زمانى ل گه‌ل چه‌ند وه‌لاتێن زمان تورك و به‌رژه‌وه‌ندیێن سیاسى و ئابوورى ل گه‌ل رێژه‌یه‌كا وه‌لاتێن جیهانێ, به‌لێ ئه‌مریكا نها ئه‌و ژى یا ئێخستى د شاشیا هه‌ڤركیا زه‌ڤله‌كان دا و دبیت ل نێزیك وه‌كى ئیرانێ گڤاشتن هێزا وێ لاواز بكن و ئورۆپا و گه‌له‌ك وه‌لاتێن ده‌ڤه‌رێ پشته‌ڤانێن ئه‌مریكا نه‌ بۆ ژناڤبرنا توركیا و دبینن ره‌فتار و هزرێن ده‌ستهه‌لاتا توركیا مه‌ترسیدارن ل سه‌ر ده‌ڤه‌رێ و ئورۆپا,
ـ رۆسیایه‌ وه‌كو راگه‌هاندن دگه‌ل مافێن كوردایه‌ و د هه‌مان ده‌م دا دژى پرۆژێ ده‌وله‌تا كوورا ئه‌مریكا یه‌ و ژ به‌رژه‌وه‌ندیێن خوه‌ دترسیت.
ـ نافمالیا كوردى ب خوه‌ سه‌رچه‌مكێ گرنگه‌ كا كورد ئاماده‌نه‌ بۆ ده‌وله‌تبوونێ یان نه‌, یا فه‌ره‌ پارتێن كوردى هه‌ستێ هه‌بوونا ده‌وله‌تێ هه‌بن دوور ژ چاڤسۆرى و ناكۆكیان و حه‌ز و به‌رژه‌وه‌ندیێن به‌رته‌نگ و خوه‌ نه‌ئێخنه‌ خه‌فكێن دوژمنێن خاپینۆك و نه‌بنه‌ مه‌تال و كڤانێ تیرێن ژه‌هركرى دژى خه‌باتا كوردایه‌تیێ و سه‌ربۆران ژبیر نه‌كن یێ سه‌دان ساله‌ نه‌ته‌وا كورد ب ئاگر دحه‌لینت و ب ئاسنى زمانێ كوردان دبرت و هه‌بوونا نه‌ته‌وا كورد ره‌تدكت هه‌تا ئه‌ڤرۆ نابت دۆستێ راسته‌قینه‌ ژبلى خاپاندنێ, بلا ب ئۆمێد بن چه‌ند دوژمن زۆر بن و هێزا وان زال بیت تنێ ئیراده‌ و باوه‌رى و براتى ژبۆ مافێن نه‌ته‌وى ژ هه‌مى هێزا دوژمنان خورتتر و زالتره‌.

نه‌زیر چه‌مباهیڤى

پشتى جه‌نگا جیهانى یا ئێكێ و ئاڤاكرنا ده‌وله‌تا شاهاتى ل عیراقێ، ته‌نێ چه‌ند ساله‌كان عیراق د گه‌شه‌پێدانێ دابوو ل بن وه‌سیه‌تا ئنگلیزى (بریتانیا) و پاشى ل كۆده‌تایا 1958 عیراق ژ شاهاتیێ بۆ كۆمارى هه‌ڤركى و ململانێ و ناكۆكیان ده‌سپێكر ژبۆ ده‌ستهه‌لاتێ هه‌تا پارتا به‌عس ل 1968 ده‌ستهه‌لاتا تاكى ب كۆده‌تایه‌كا سپى وه‌رگرتى و ناڤخوه‌یا عیراقێ و گۆره‌پانا سیاسى ب به‌عس هاته‌ پڕكرن و نه‌هێلانا چ پارتان د گۆره‌پانێ دا هه‌تا روخیانا رژێما به‌عس ل نیسانا 2003 و نه‌مانا ده‌ستهه‌لاتا وێ یا 35 سالى ب ئاسن و ئاگر بێ به‌رامبه‌ر هه‌ڤدژێن هزر و بۆچوونێن وێ تایبه‌ت پارتێن كوردى و یێن مه‌زهه‌ب شیعى و عیراق ب وه‌لاتێ ترسێ دهاته‌ نیاسین، خه‌لكێ عیراقێ وه‌ها هزردكر كو ژیان دێ ل ئه‌ڤى وه‌لاتى ئارام و پتر ئاڤا بیت و ماف دێ پاراستى بن و باوه‌رى دێ په‌یدا و كه‌س ئاواره‌ و ده‌ربه‌ده‌ر نابیت و پێشكه‌فتن دێ ل گوپیتكێ بت و پێكڤه‌ژیانا ئول و مه‌زهه‌ب و نه‌ته‌وان دێ ب براتى بیت, به‌لێ عیراق بوو گۆره‌پانا هه‌ڤركى و ململانێ د ناڤبه‌را مه‌زهه‌ب و نه‌ته‌وان دا و بێ دادیێ و تۆلڤه‌كرنێ و ده‌زگه‌هێن سیخۆرى یێن ده‌وله‌تێن ئه‌قلیمى و به‌رژه‌وه‌ندیان سه‌رێ خوه‌ هلدان و میراتگرێن شێعا و سونان و تركومانان گۆره‌پان داگیركرن و گه‌نده‌لیێ و تیرۆرێ خوه‌ ژ هه‌میان كرن پشته‌ڤان بوونه‌ ئیفلنجا مه‌زن د ناڤ هه‌مى چق و رهێن داموده‌زگه‌هان دا ژ كوپیتكا ده‌ستهه‌لاتێ هه‌تا بچووكترین فه‌رمانگه‌ه و ئه‌وێن دگۆتن دێ خه‌لكێ عیراقێ ژ دكتاتۆریه‌تێ قورتال كین بوونه‌ ده‌همه‌نپیس ل سه‌ر نامووسا عیراقیان وه‌كى ل 14/6/2003 لیژنا مافێ مرۆڤان یا عیراقى له‌شكرێ بریتانى و ئه‌مریكى گونه‌هباركرین ب تالوقه‌بوونا وان ل سه‌ر ژنێن عیراقێ (اغتصاب) د زیندانان دا, په‌یدابوونا تیرۆره‌كا رێخستى ب ناڤ جیهادى بوونه‌ ئه‌گه‌رێ كوشتنا وى ل 19/8/2003 كوشتنا سرجیو دیمیلو سه‌رۆكێ نه‌ته‌وێن ئێكگرتى ل عیراقێ ب په‌قاندنا باره‌گایێ وان ل به‌غدا, ل دووڤ راپۆرتا سه‌ندیكا رۆژنامه‌ڤانێن عیراقێ ل 16/3/2007 راگه‌هاندى كو هه‌ر ژ 1/4/2003 هه‌تا راگه‌هاندنا راپۆرتێ 200 رۆژنامه‌ڤان هاتینه‌ كوشتن و تیرۆركرن و ل 20/8/2007 تیرۆركرنا پارێزگارێ (موسه‌نا) محه‌مه‌د عه‌لی حه‌سانى ب رێیا بومبه‌كا چاندى و ل 11/8/2007 تیرۆركرنا پارێزگارێ (دیوانیێ) خلیل جلیل حمزه‌ و رێڤه‌به‌رێ پۆلیسێن دیوانیێ ب رێیا بومبه‌كا تیرۆرستى, ل 21/8/2007 كوشتنا رێڤه‌به‌رێ كریارێن له‌شكرێ عیراقێ ل صلاح الدین (تكریت) ب ده‌ستێ تیرۆرێ, ل 23/1/2008 تیرۆركرنا راگرێ كولیجا ددانا ل زانكۆیا به‌غدا (مونزر موهه‌رچ رازى) ل له‌تیفیێ, و ب هزاران كه‌س هاتینه‌ تیرۆركرن و گه‌له‌ك ده‌ڤه‌رێن عیراقێ هاتن ناڤكرن ب ده‌ڤه‌رێن مرنێ و ب هزاران خه‌لكێ عیراقێ گیان و مال و سامانێن خوه‌ ژ ده‌ستدان و ملیونان مشه‌خت و ئاواره‌بین, عیراقا ب ناڤ ده‌رگه‌هێ رۆژهه‌لاتا عه‌ربى بوو ده‌رگه‌هێ رۆژئاڤایێ ئیرانێ ژلایێ پشته‌ڤانى و هزرى و جڤاكى و ئابوورى ڤه‌, هه‌ستا نه‌ته‌وى و نیشتمانى ل عیراقێ تنێ ناڤ ما د ناڤ كۆمبوون و سمینار و راگه‌هاندنا شكه‌ستخوار و هه‌ڤدژ دا, ل شه‌ڤا 9ـ 10/6/2014 عیراق هاته‌ وێرانكرن ب هاتنا داعشێ و كه‌فتنا هه‌مى پارێزگه‌ها نه‌ینه‌وا (مووسل) و پاشى پارێزگه‌هێن ئه‌نبار و سه‌لاحه‌دین و پشكه‌ك ژ دیالا و ئێك ژ سماوه‌ و پشكه‌ك ژ به‌غدا و ئێشا ئیفلنجێ له‌شكرێ عیراقێ هنگافت و كوشتن و وێرانكرنێ ده‌ڤه‌ر ڤه‌گرت و سێ سالان ب تالان و قركرنێ هاته‌ ناڤكرن, سه‌ره‌رایى شه‌رێ هه‌شت سالى دژى ئیرانێ و یێ كوێتى و سێ شه‌رێن هه‌ڤپه‌یمانان و كوشتن و ئه‌نفال وێرانكرنا نه‌ته‌وا كورد هه‌ر ژ شۆره‌شا ئه‌یلۆلێ سالا 1961 و پاشى گولانێ و سه‌رهلدانێ و هه‌تا نها ژى یا ب شێوه‌یه‌كى نه‌ راسته‌وخوه‌ یا به‌رده‌وامه‌ و نها ژى ب ره‌نگه‌كێ دیتر عیراق وه‌ك گۆره‌پانه‌كا تۆلڤه‌كرنا به‌رژه‌وه‌ندیان یا دكه‌لیت و هه‌ژارى و بێ كارى به‌هرا هه‌ڤوه‌لاتیانه‌ و شه‌لاندن و گه‌نده‌لى به‌هرا به‌رپرسێن بێ هه‌ستێن ب ناسنامێن بیانى نه‌ ل بن درووشمێن خاپاندنێ ب چاكسازیێ و مافێ مرۆڤ و قانوون و دادپه‌روه‌ریێ.

نه‌زیر چه‌مباهیڤى

ئارامیا هه‌رێمێ سۆپاس بۆ خودێ و ده‌زگه‌هێن ئێمناهیێ و هه‌ست و پشته‌ڤانیا هه‌ڤوه‌لاتیان یا باشه‌, فه‌ره‌ بزانن قه‌یرانا دارایى ل هه‌ر وه‌لاته‌كى هه‌بت ب ئابوورێ وى وه‌لاتى ڤه‌ گرێدایى یه‌، قه‌یران یان كێشا دارایى ئانكو نه‌بوونا دراڤى و تێكچوون و به‌رته‌نگبوون و نه‌ ئارامبوون و راوه‌ستاندن ژ گه‌شه‌پێدانێ بۆ په‌یدابوونا هه‌ژاریێ و به‌رته‌نگبوونا ژیانێ و هه‌كه‌ دووم درێژ بى دێ به‌ر ب هه‌بوونا خه‌لا و وێرانبوونێ ڤه‌ چت و دبت شكه‌ستن بكه‌ڤته‌ د ده‌ستهه‌لاتێ دا ژبه‌ركو ئه‌ركێ وێ یه‌ و به‌هرا پتر ئه‌وه‌ ئه‌گه‌رێ سه‌ره‌كى د نه‌مانا خۆشكرنا ژیانا خه‌لكى دا. وه‌كو بۆچوون دشێم ب ئه‌ڤى شێوه‌ى ئه‌گه‌رێن په‌یدابوونا قه‌یرانا دارایى ل هه‌رێمێ دیار بكم:ـ جهێ جوگرافیا هه‌رێمێ ژلایێ هه‌بوونا هه‌ڤسوویێن زال بۆ مه‌ره‌مێن خوه‌ یێن برسى و مێتنا خوین و خێر و به‌ره‌كه‌تا سامانێ هه‌رێمێ و ڤالاكرنا دراڤى ژ هه‌رێمێ ب رێیا كرێكارێن وه‌لاتێن بیانی و پێكۆل به‌رده‌وام دهێنه‌ كرن بۆ شكه‌ستنا پێشكه‌فتن و سه‌ربۆرا هه‌رێمێ, نه‌پووته‌دان و پشته‌ڤانیا ده‌ستهه‌لاتا هه‌رێمێ بۆ كه‌رت و به‌رهه‌مێ ناڤخوه‌یى ژبلى كه‌رتێ سامانێن سروشتى (نه‌فتێ) و گرنگیدان ب كه‌ره‌ست و به‌رهه‌مێَ ده‌وله‌تێن هه‌ڤسوو كو هه‌رێم یا بوویه‌ وه‌لاته‌كى (مستهلك), نه‌بوونا پلانه‌كا راسته‌قینه‌ و دۆمدرێژ و ب ده‌ستێ كه‌سانێن بسپۆر و شاره‌زا و هزركرن د هه‌لگرتنا داهاتێ زێده‌ دا ژ سالێن خۆشیێ و به‌ره‌كه‌تێ ببن هاریكار بۆ سالێن ته‌نگاڤیێ, نه‌بوونا چاڤدێریه‌كا ساخله‌م ل سه‌ر مه‌زاختن و داهاتێ زه‌به‌لاح و مه‌زاختنا وى ل دووڤ حه‌ز و مه‌ره‌مێن تایبه‌ت و بێ رێنما و دامه‌زراندنا وه‌همى (تێر مووچه‌یى و مووچێن خیالى), شكه‌ستنا چاكسازیێ ل دژى په‌نجه‌شێرا گه‌نده‌لیا به‌رچاڤ و مرنا په‌یڤا (ته‌ ئه‌ڤه‌ شكیڤه‌ ئینایه‌؟) و لاوازیا ده‌ستهه‌لاتێن (ته‌شریعی ـ دادوه‌رى ـ جێبه‌جێكار) ژبه‌ر ناكۆیێن سیاسى ل هه‌رێمێ, دیاردا هه‌ڤپشكیا به‌رپرسان ل گه‌ل بازرگانان ب رێیێن نه‌ راسته‌وخوه‌, هه‌بوونا پتر ژ ئێك ملیۆن ئاواران د ناڤ هه‌رێمێ دا وه‌كو بارگرانیه‌كا زێده‌ ئێخستى یه‌ بارێ ژیانێ, په‌یدابوونا شه‌ره‌كى دژوار و درێژ سنۆر ب مل و زه‌ندێن دلسۆزێن ئاخا كوردستانێ دژى دوژمنه‌كى ب ترس (داعش) و هه‌ڤالبه‌ندێن وێ و مه‌زاختنه‌كا زه‌به‌لاح و نه‌ به‌رچاڤ یا دارایى بۆ ئه‌ڤى شه‌رى و هه‌یڤانه‌ ب ملیۆنان دۆلاران دهاتنه‌ مه‌زاختن و نها ژى ل به‌ندا چاكسازیا راسته‌قینه‌ نه‌ د كابینا نوو دا و چاكسازیا راسته‌قینه‌ ژ دادپه‌روه‌رى و چه‌سپاندنا قانوونێ په‌یدا دبت و پووته‌دان ب به‌رهه‌مێ ناڤخوه‌ و په‌یداكرنا ده‌لیڤێن كارى كێشه‌ و قه‌یران نامینن و دهه‌رفن ژبه‌ركو هه‌رێم ده‌وله‌مه‌نده‌ ب مرۆڤ و ئاخ و ئاڤ كانزاد و سامانێن ژێر ئه‌رد تنێ شه‌فافیه‌ت و خه‌مخۆرى هه‌بت و بلا بزانن سووارێ خه‌لكێ هه‌ر په‌یایه‌ و نه‌كه‌ڤنه‌ ل به‌ر چ منه‌تان.

كى دێ كوردا پارێزت
( كوردستانا روژئاڤا وه‌ك میناك )
ئه‌ڤا نها ل روژهه‌لاتا ناڤین رودده‌ت و تایبه‌ت كوردستان ب هه‌ر چوار پارچان ڤه‌, ته‌نها شه‌رێ به‌رژه‌وه‌ندا یه‌ و دویره‌ ژ رێكه‌فتنێن مافێ مروڤ و مافێن نه‌ته‌وێن سته‌ملێكرى, دبیت ل پاشه‌روژێ چ دور یان نێزیك ببیته‌ ئه‌گه‌رێ هه‌لوه‌شاندنا نه‌خشێ ده‌ڤه‌رێ چ بو به‌رژه‌وه‌ندیا نه‌ته‌وا كورد بیت یان ژى بو به‌رفره‌هكرنا نه‌خشێ هنده‌ك ده‌وله‌تا بیت مینا توركیا و ئیران, به‌رته‌نگكرنا نه‌خشێ ده‌وله‌تێن دى بت مینا سوریا و عیراق, دبیت ژى ده‌وله‌تێن زلهێزێن جیهانێ نه‌چار بن هه‌ر چوار ده‌وله‌تێن داگیركه‌رێن ئاخا كوردستانێ لاواز بكن و بكێشنه‌ سه‌ر مێزا دانپێدانێ ب مافێ نه‌ته‌وا كورد ل هه‌ر چوار پارچان ل ژێر فیدرالیا مه‌ركه‌زى یان ژى كونفدرالیا لا مه‌ركه‌زى, به‌لێ ل ڤێره‌ ئاسته‌نگ بو نه‌ته‌وا كورد زورن و هه‌ر كورد نه‌چارن بمینن لبن سیبه‌را داگیركرنێ ژبه‌ركو خالا ئێكێ ده‌رگه‌هێ ده‌ریایێ دێ هه‌ر قه‌پات بیت دگه‌ل جیهانێ, خالا دویێ كورد دبن سیبه‌را زلهێزان دا دێ مینن و د چاڤ و مێژكێ ده‌ردورێن خودا مینن نه‌ته‌وه‌ك لاواز و نه‌ خاك سه‌روه‌ر, خالا سیێ عه‌ره‌بكرن و تورككرن و فارسكرنا كه‌لتور و هزر و ئاخا كوردستانێ یا داگیركرى یه‌ ب سه‌دان ساله‌ و هه‌تا نها ژى یا به‌رده‌وامه‌, خالا چوارێ ده‌ستهه‌لاتدارێن نافمالیا كوردى ب خو نه‌ هاریكار و پشته‌ڤانێن ئێكرێزیێ نه‌ و كه‌س ئاماده‌نینه‌ خو بو یێ به‌رامبه‌ر بچه‌مینت و هه‌ر ئێك دبێژت ئه‌ز خودانێ دوزا نه‌ته‌وى مه‌, ئه‌ف خاله‌ نه‌ ژبو دناڤبه‌را هه‌ر چوار پارچان دا تنێ دئێته‌ چه‌سپاندن به‌لكو هه‌ر پارچه‌كێ ئه‌ڤ خالا چوارێ ل سه‌ر دئێته‌ چه‌سپاندن, میناك ژى روژئاڤایێ كوردستانێ وه‌كو ژمارا نیشته‌جیبویان دبیت كێمتر ژ سێ ملیون كه‌سان بت و هه‌مى ده‌ردورێن وێ لێ دوژمنن به‌لێ نافخویا وێ پتر ژ 30 پارتێن كوردى لێ هه‌نه‌ و هه‌ر پارته‌ك بو به‌رژه‌وه‌ندێن خو دیڤه‌لانكا ده‌سته‌كى ده‌ره‌كى یه‌ و ئه‌و ده‌سته‌ ژى دوژمنێ دوزا نه‌ته‌وى یه‌ سه‌ره‌رایى هه‌بونا پارت و بزاڤێن ئولى و نه‌ته‌وى یێن نه‌ كوردى ئه‌وێن رژێما سوریێ د ماوێ پتر ژ 60 سالا به‌رده‌وام هه‌تا 2011ێ دئینان و ئاكنجى دكرن ل سه‌ر وێ ئاخێ بو مه‌ره‌مێن سیاسى, هاتنا رێكخراوا ب ناڤ داعش دیسان ب سه‌دان هزار خیزانێن ئاواره‌ كێشان ناف ئاخا كوردستانێ ب مه‌ره‌ما ئیمناهیێ و ئاڤاكرنا خیڤه‌تگه‌هان, نها ژى بو مه‌ره‌مێن نخامتى توركیا یا پێكولێ دكت ب ناڤێ ئوپه‌راسیونا كانیا ئاشتیێ باژێركان بو ئاوارێن تورك و عه‌ره‌ب د جه‌رگێ كوردستانا روژئاڤا دا ئاڤا بكت, وان ئاوارا پر چه‌ك بكت و ناڤێ كوردستانێ ل روژئاڤا وندا بكت كا چه‌وا عه‌فرین ما بێ خودان بو به‌رمایكێن رهدرێژان و هزاران ئاواره‌ ژعه‌ره‌بێن غوته‌ و جهێن دى لێ ئاكنجى كرن وه‌سا د پروگرامێ وێ دایه‌ لبن دروشمێ ئاسایشا نه‌ته‌وى كوبانێ بكت عێنولعه‌ره‌ب و گرێ سپى بكت ته‌لولئه‌بیه‌ز و سه‌رێ كانیێ بكت ره‌ئسولعه‌ین و دێركێ بكت مالكى یه‌ و قامشلو ژى بكت تاخه‌ك ژ نسێبینێ و بارتێن كوردى نه‌شیانه‌ رێزێ ل ئێكودو بگرن و نه‌چارن رێزێ ل هه‌ڤسویێن خو بگرن مینا توركیا و رژێما سوریا و به‌رژه‌وندێن هه‌ڤپه‌یمانێن خاپینوك یێن تێشتێ دگه‌ل وان دخون و فراڤینێ دگه‌ل داگیركه‌رێن ئاخا وان دخون, بلا ئاشكرا بیت بو پارتێن كوردى یێ رێزێ ل برایێ ته‌ نه‌گریت دێ سوبه‌هى ته‌ژى بێ رێز كت, یێ په‌یڤا ناڤێ نژادێ ته‌ دناف خودا قه‌بول نه‌كت ئاماده‌یه‌ سوبه‌هى هه‌بونا ته‌ژى وندا بكت, ببن یه‌ك دا به‌رژه‌وه‌ندا نه‌ته‌وى بپارێزن و بزانن داگیركه‌ر یێن بونه‌ یه‌ك دا وه‌ ژناف ببن و نه‌هێلن هون ببن یه‌ك..

نه‌زیر چه‌مباهیڤى
هه‌ر ژ ده‌سپێكا شۆره‌شێن كوردى تایبه‌ت شۆره‌شا ئیلۆنا مه‌زن ئارمانج و درووشم ژبۆ ماف و ئازادى و سه‌ربه‌خوه‌یا كوردستانێ بین, شۆره‌ش ل دووڤ شۆره‌شێ به‌رده‌وام بین, قوربانیدان بێ جوداهى بۆ وان ئارمانجان بێ راوستان بین, ته‌خوچینێن جڤاكێ كوردى ب دو به‌ش دهاته‌ نیاسین ته‌خا ئازادیخواز و شۆره‌شگێر و ته‌خا لاینگر و سڤیلێن ل بن ده‌ستهه‌لاتا دوژمنى, ئانكو ناكۆكى و ململانا ناڤخوه‌یى و دژاتیا برایه‌تى د ناڤبه‌را شۆره‌شگێران دا نه‌بى, ده‌ستێن ده‌وله‌تێن هه‌ڤسوو د ناڤ كاروبارێن شۆره‌شێ دا زۆر یا كێم بوو, پشتى نه‌كسا ئیلۆنا مه‌زن شۆره‌ش ب دو به‌شان هاته‌ پێش وه‌ك پر حزبایه‌تى و ململان و براكوژیێ ل بن په‌ردا هه‌مان ئارمانجان, شه‌رێ داگیركه‌ر و دوژمنى ژى ب هه‌مان ئارمانج بوو, ده‌ستێن ده‌ره‌كى د كاروبارێن شۆره‌شێ دا ب زێده‌تر دهاته‌ به‌رچاڤ هه‌تا سه‌رهلدان و كۆچا ملیۆنى, پشتى دابینكرنا ده‌ڤه‌را ئارام و په‌یدابینا پارتێن كوردى د ناڤ باژێران دا و رێپێدان ب زێده‌بینا پارتان ل كوردستانێ و دامه‌زراندنا په‌رله‌مانه‌ك كوردى, دوژمن بینه‌ بینه‌ر و براكوژیێ سه‌رێ خوه‌ د ناڤمالیا كوردى دا هلدا, ناكۆكى, ململانێ, بێ باوه‌ریێ, به‌رژه‌وه‌ندیێن به‌رته‌نگ بینه‌ پلان و خه‌باتا خوه‌ بخودانێن كوردان و ب شیعاراتێن دۆزا نه‌ته‌وى بازرگانیكرن, خه‌باتا راسته‌قینه‌ هاته‌ وندا كرن, خه‌ون و ئۆمێدێن هه‌ژاران هاتن ئاشۆپكرن, ده‌ستێن ده‌ره‌كى دكاروباران دا ب ئاشكرایى هاتن به‌رچاڤ كرن, بیرهاتنێن میرنشینان دوباره‌كرن, سه‌فه‌وى و ئوسمانلى نێزیكى وارس بینێ كرن, وان بیانیا ناڤبژێڤانى كرن, كراسێ پاراستنا هه‌تكبه‌ریێ ل به‌ر مه‌ كرن, شڤانیا مه‌ كرن, ناهێلن جاره‌كا دى ل ئێكودو حوچانێ بكن, لا مركزى یه‌ت د هه‌رێما مه‌دا ژ سۆمال و قوبرسێ پێشكه‌فتیترن, جار كوردێن سه‌ربه‌خوه‌ نه‌, جار ژى عیراقیێن راسته‌قینه‌نه‌ د سه‌روه‌ریا عیراقێ دا, د واقعى دا په‌یڤ فارس و توركن و دلاواز و نه‌ مایتێكه‌رن, د دل دا كوردپه‌روه‌ر و خودان سه‌روه‌رین, د شاشه‌یێن كه‌نالێن كوردى دا دبینن فلمێن فارس و توركا مرۆڤ ئه‌ون و كورد دۆبلاج كه‌رن, و مه‌ردینى و مرۆڤاتى و خه‌بات و دیرۆكا وان بۆ مه‌ شرۆڤه‌دكن كو ئه‌و هه‌ژینه‌ و ئه‌م دیرۆك به‌رزه‌ كه‌رن, ئومێدا مه‌ نان و ئالیك هه‌بت تێر ب چه‌رین, بلا بزانین ئاڤاكرنا وه‌لاتان نه‌ ب رێیا به‌رژه‌وه‌ندیا پله‌ و پاران دایه‌، به‌لكو د هه‌ست و ئاڤاكرنا تاكێن مرۆڤان دایه‌ ل سه‌ر بنه‌مایێن فێربوون و رێخستنا پاك دایه‌ ژبۆ به‌رژه‌وه‌ندیا دۆزا نه‌ته‌وى ب پلانێن ستراتیجى و چاڤدێریا ساخله‌م, له‌ورا هیڤیا مه‌ ژ كابینا نوو ئه‌وه‌ باوه‌ریا تاكێ كورد ڤه‌گه‌رینت ب چاره‌سه‌ركرنا هه‌مى ئالۆزى و كێشێن بونه‌ ژان و ده‌رد د نافمالیا كوردى دا, ئه‌و ئارمانج و هیمایێن شۆره‌شا ئیلۆنێ و شۆره‌شێن كوردى ل سه‌ر هاتین ئاڤاكرن و تێدا مالوێرانى ب هزاران خێزانا كه‌فتى و هزاران خوین گه‌رمێن ئازادیێ گیانێ خو تێدا كرى قوربان چ ل به‌روك و چه‌په‌رێن كه‌رامه‌تێ و یان ل پشت شفشێن زیندانێن سته‌مێ و كنفێ سێداره‌دانێ بوینه‌ شه‌هیدێن ئه‌ڤێ دوزا ره‌وایا نه‌ته‌وا سته‌ملێكرى ژلایێ دوژمن و نه‌حزان ڤه‌ یێن ماف ل كوردا به‌رزه‌كرین و هه‌تا نها ژى ب هه‌مى شیانێن خو یێ پێكولێ دكن كورد نه‌بیت و بێ ماف و چاره‌نڤیس بت, له‌وما یا فه‌ره‌ كابینا نوى ببیته‌ كابینا ئیلۆنێ ژلایێ خه‌بات و هه‌ست و ئارمانج و هیماڤه‌ و گۆتن ببنه‌ كار و كریار ب رێخستنه‌كا پاك و زه‌لال بۆ به‌رژه‌وه‌ندیا گشتى و دوور ژ مایتێكرنا ده‌ره‌كى.

نه‌زیر چه‌مباهیڤى
ئه‌مریكا وه‌لاته‌ك به‌رژه‌وه‌ندچى یه‌, دو روویه‌, سیاسه‌تا وێ پر چه‌قه‌, بێ سۆزه‌, وژدان مرى یه‌, نه‌ هه‌ڤالێ كه‌سێ یه‌ وه‌كى شڤان په‌روه‌ر د سترانا خوه‌ دا دبێژت باوه‌ر نه‌كن ژ رۆمێ, ژبه‌ركو هه‌ر ئه‌ون ئه‌م پارچه‌كرین و هه‌ر ب چه‌كێ ئه‌مریكا و هه‌ڤالبه‌ندێن وێ قركرنا كوردا هاتیه‌ كرن و نها ژى به‌رده‌وامن, هه‌ر ئه‌مریكا و هه‌ڤالبه‌ندێن وێ دوژمنێن دۆزا مه‌ ب هێز خستینه‌ و هه‌تا نها ژى به‌رده‌وامن, راسته‌ ئه‌مریكا ب ده‌ڤه‌را ته‌نا ل گه‌ل هه‌ڤپه‌یمانێن خوه‌ ئه‌م پاراستى نه‌, دیسا بوویه‌ ئه‌گه‌رێ نه‌هێلانا شه‌رێ براكۆژیێ, راسته‌ پشتى ئازادیا عیراقێ وه‌ك پشته‌ڤانه‌ك به‌رچاڤ بۆ ئارامیا هه‌رێما كوردستانێ هه‌تا هاتنا گرۆپا تیرۆریا ب ناڤ داعش هه‌ر چێكه‌را وێ گرۆپێ ژى ئه‌مریكا و هنده‌ك ده‌وله‌تێن ده‌ڤه‌رێ بین بۆ مه‌ره‌مێن سیاسى و گه‌هاندنا ئارمانجێن خوه‌ داكو خوه‌ د گۆره‌پانێ دا بكت مێرخاسێ سه‌ره‌كى و پشته‌ڤانیه‌كا به‌رچاڤ ل گه‌ل هه‌رێما كوردستانێ و رۆژئاڤا كر, به‌لێ وه‌ك مه‌سه‌لا دبێژن زه‌لامه‌ك دبه‌ر جهێ سونه‌تكرنا بچووكان را بۆرى و دیت نۆژشدارى ده‌مژمێره‌ك ب دیوارى ڤه‌كر, زه‌لامى هزر كر جهێ فرۆتنا ده‌مژمێرانه‌ و چوو د ژۆرڤه‌ و گۆته‌ نۆشدارى كا بۆ من ده‌مژمێره‌كا ده‌ستى, نۆشدارى گۆتێ: ئه‌ز ده‌مژمێرا نافرۆشم, زه‌لامى گۆت پا تو چ دفرۆشى؟, نۆشدارى گۆت ئه‌ز بچووكا سونه‌ت دكم, زه‌لامى گۆت پا ته‌ بۆچى ده‌مژمێر ب دیوارى ڤه‌كر؟, نۆشدار كه‌نى و گۆته‌ زه‌لامى ئه‌گه‌ر ئه‌ز ده‌مژمێرێ ب دیوارى ڤه‌نه‌كم پا دێ …. ته‌ پێ ڤه‌كم… بلا ئه‌م كورد بزانن ئه‌مریكا نه‌ خولامێ كه‌سێ یه‌ و نه‌ ده‌زگه‌هه‌كى خێرخوازى یه‌ هاتبیت خێرا ب مه‌ بكت و مه‌ بپارێزت و چاڤێن مه‌ كل كت, راسته‌ ئه‌م نه‌ته‌وه‌كا پر دوژمنین و داگیركرى نه‌، به‌لێ ئه‌مریكا ب ناڤێ مافێ مرۆڤ و دیمۆكراسیه‌تێ یا هاتى به‌رژه‌وه‌ندیێن خوه‌ یێن ئابوورى و سیاسی بپارێزت و هیچ خه‌م نینه‌ چ شێوێ ده‌ستهه‌لاتێ مه‌ ب رێڤه‌ ببیت و ئه‌وێ ده‌ست یێ دانایى سه‌ر هێزا مه‌ یا (هزرى ـ ئابوورى ـ له‌شكرى ـ رامیارى) و یا ب كاردئینت بۆ گه‌هاندنا ئارمانجێن خوه‌ و هه‌رده‌ما ڤیا دێ رۆلێ مه‌ ب هێزئێخت ل به‌رامبه‌رى گورگێن ل ده‌ردورێن مه‌ و ده‌ما دیت به‌رژه‌وه‌ندیێن وێ دێ تێكچن ل گه‌ل چاڤبرسیێن كه‌له‌خێ مه‌, ل پشت په‌ردا دێ رێكه‌فتنێن لاوازكرنا مه‌ ئیمزا كت, كورد ژى كه‌له‌خه‌كى پر ناكۆكینه‌, ناكۆكیێن د ناڤ مالا كوردى دا مه‌زنترن ژ ئه‌وان ناكۆكیێن كوردان ل گه‌ل دوژمن و داگیركه‌رێن ئاخ و مێژكێ خوه‌ هه‌ین ل هه‌ر چار پارچان, تاكێ كورد ئاماده‌یه‌ ئیرادا خوه‌ راده‌ستى دوژمنێن دۆزا خوه‌ بكن و ئاماده‌نینه‌ ل برایێ خوه‌ ببۆرت و چاڤێن خوه‌ ل كێماسیێن ئێكودو بنه‌قینن و كه‌س ژى خوه‌ نادانیت شاش, یا فه‌ره‌ كورد بزانن یێ برایێ مرۆڤ بكت خوارنا تێشت و فراڤینێ و ب زمانێ نازك مرۆڤ بئالیست ئه‌وى ددانێن ژه‌هرى یێن تیژ كرین بۆ شه‌ڤه‌كا تارى مرۆڤى بكت خوارنا شیڤ و پاشیڤێ و ئه‌م نڤستینه‌ ل ده‌مێ هشیاربوونێ, نموونه‌ ژى مه‌ دیتن ل ریفراندۆما سه‌ربه‌خوه‌یا كوردستانێ و بێده‌نگیا ل سه‌ر داگیركرنا عه‌فرینێ و سته‌ما ئیران ل كوردێن رۆژهه‌لات دكت, توركیا ل كوردێن باكۆر و رۆژئاڤا دكت و هه‌موو ل به‌ر چاڤێن ئه‌مریكا و بهایێ 50 ملیۆن كوردێن بێ ماف و ژیان سته‌م لێ كرى نه‌ به‌رامبه‌رى قه‌شه‌یه‌كى ئه‌مریكى یه‌ و زیندانێن دوژمنان پرن ژ ئازادیخوازێن كوردان و ئه‌مریكا ل سه‌ر هایداره‌ و یا بێده‌نگه‌.

هه‌كه‌ ئه‌م پێداچونه‌كێ دمێژوویێ دا بكن دێ دیار بت كورد هه‌رده‌م هاتینه‌ خاپاندن و كه‌س نه‌بویه‌ پشته‌ڤانێ دوزا نه‌ته‌وا كوردى و تنێ چیا و كورد ل كوردى بینه‌ خودان و خه‌بات نه‌هاتى یه‌ راوستاندن, دیسان دێ شێم بێژم ب مخابنیڤه‌ پێگه‌ه و گوره‌پانا خه‌باتێ ل كوردستانێ ڤاله‌ نه‌بویه‌ ژ هه‌ڤركى و ململان و زالبونا به‌رژه‌وه‌ندا كه‌سوكى و لایه‌نى ل سه‌ر به‌رژه‌وه‌ندا گشتى دگه‌ل دیاردا دیڤه‌لانك و خوفروشى و راده‌ستكرنا ئیرادا خو بو دوژمنێن دوزا نه‌ته‌وى و نمونه‌ ژى د زورن و به‌رچاڤن, سیاسه‌تا گڤاشتن و ترساندن و برسى كرن و ئابلوقه‌دانێ یا بو یه‌ باشترین چه‌ك دده‌ستێن دوژمنێن كوردا دا سه‌ره‌راى سته‌م و وێرانكرن و ده‌ربه‌ده‌ركرنێ و ئه‌گه‌ر ژى هه‌مى ل ئه‌ستویێ سه‌ركردێن كوردا یه‌ ژبه‌ركو ل ده‌ما ده‌لیڤه‌ دئێت ئه‌و دنڤستى و خاپاندى نه‌ ژبه‌ر باوه‌ریا ساده‌ و نه‌شاره‌زاییا به‌رپرسیاره‌تیێ دكه‌ڤنه‌ ته‌لها پیلانێن دوژمنى و ئه‌زمونا هه‌رێما كوردستانێ باشترین نمونه‌یه‌, هه‌رێما كوردستانێ پێنگاڤا ئێكێ یا ئاڤێتى پشتى سه‌رهلدان و دامه‌زراندنا حكومه‌ت و په‌رله‌مانى و د ماوێ 29 سالان دا هه‌ر مایه‌ حكومه‌ته‌كا ساڤا سه‌ره‌راى باشى و خرابیان تێدا هه‌بین و گه‌له‌ك ده‌رفه‌تێن زێرین ژى بو هاتن به‌لێ هه‌مى ژ ده‌ست دان, وێ پێنگاڤێ ژلایێ له‌شكه‌رى ڤه‌ شیا له‌شكه‌ره‌كى بهێز ئاڤا بكت به‌س نه‌ ل دیف رێنمایێن پاكى و ئه‌ندازیارى و دشێم بێژم ژ نه‌دادپه‌روه‌ریێ و نه‌ چاكسازیێ ڤاله‌ نه‌بى و ل سه‌ر بنه‌مایه‌كى لایه‌نى و به‌رژه‌وه‌ندى و نه‌ئێكگرتى بى , ژلایێ ئابورى ڤه‌ ژى ئاڤه‌دانكرنه‌كا باش و به‌رچاڤ بخوڤه‌ گرت دهنده‌ك بواران دا به‌لێ چ پیته‌دان نه‌دا كه‌رتێ چاندن و كشتوكالى و به‌رهه‌مێ ناڤخو تنێ باوه‌رى دا كه‌رتێ سامانێن سروشتى ( په‌ترول )ێ لبن سیاسه‌تا نه‌ زه‌لال و ئه‌ڤه‌ژى بو ئه‌گه‌رێ به‌رته‌نگبونا ئابوریا هه‌رێمێ و قه‌یرانا دارایى, ژلایێ سیاسى ڤه‌ ژى حكومه‌تا هه‌رێمێ شیا خو بگه‌هینته‌ سیاسه‌تا ده‌وله‌تبونێ و تێكه‌لیا وێ دگه‌ل جیهانێ وه‌ك ده‌وله‌تێ بى, مخابن د ئه‌ڤى ماوێ داویێ دا هه‌مى هه‌رفت و وه‌ك چێلا زه‌ر زه‌ركا شیرێ خو رشت و د شه‌ڤه‌ك و روژه‌كێ دا هه‌ڤركێن وێ شیان دوست و هه‌ڤالان لێ بكن بیانى و گورگ ئه‌و ژى ژبه‌ر لاوازیا نافمالیا كوردى و نه‌ ئێكرێزى و ئێكگرتنا سیاسه‌تمه‌دارێن كورد بى و نمونه‌ژى به‌رچاڤن, ژلایێ ئه‌قلیمى ڤه‌ ده‌ستهلاتا كوردى تا راده‌یه‌كێ شیا خو بگونجینت دگه‌ل جیرانێن خو سه‌ره‌راى هنده‌ك ئالوزیان به‌لێ فاكته‌رێ ئابورى پتر د به‌رژه‌وه‌ندا جیرانان دا بى و جیرانا پتر پێدڤى ب هه‌رێمێ هه‌بى ژبه‌ر ناكوكى و هه‌ڤركیێن دناڤبه‌را ئه‌وان دا له‌ورا سیاسه‌تا هه‌رێمێ د گه‌شه‌پێدانێ دابى و چه‌وا جیران و عیراقا شكه‌ستى ده‌لیڤا خو دیتن دوباره‌ ناكوكیێن خو دانه‌ لایه‌كێ و دوزا كوردى كرن دوزه‌كه‌ نه‌ ره‌وا و ب فێلبازى شیان ده‌ستهه‌لاتا كوردى بكه‌نه‌ دوو به‌ش و لاواز بكن وه‌كى جاران و به‌شه‌ك كرن نیشتمان په‌روه‌رێن عیراقى و هه‌ڤدوستێن خو و به‌شه‌ك ژى كرن توندره‌و دا نافمالیا كوردى بهه‌لوه‌شت و هه‌مى خه‌ون و هیڤیێن ده‌وله‌تا كوردى نه‌بن راستى و به‌ره‌ف نه‌مانێ ڤه‌ بچن ونها ژى نه‌ زه‌لالى یا د چاره‌نڤیس و پاشه‌روژێ دا هه‌ى كورد ببنه‌ په‌رتال دبازارێ به‌رژه‌وه‌ندێن جیران و زلهێزان دا و ل هیڤیا كابینا نوى نه‌ بو بهێزخستنا نافمالیا كوردى و خورتكرنا په‌یوه‌ندیان بو به‌رژه‌وه‌ندیا نه‌ته‌ویا گشتى.

نه‌زیر چه‌مباهیڤى
گه‌نده‌لـى گه‌نیبوونا سیسته‌مێ ڕێڤه‌برنا ژیانا كۆمه‌ل و جڤاكى یه‌ و ب تایبه‌ت جڤاكێ ساده‌، ده‌ما دكه‌ڤته‌ د ده‌ست و چقێن وێ دا، له‌ورا فه‌ره‌ هۆكارێن هاریكاریا وێ دكن بزانن یان چقێن ژ كه‌لواشێ وێ ده‌ردكه‌ڤن و خوه‌ ب سه‌ر و دناڤـ خوین و مێشكێ جڤاكى دا دگرن, دبنه‌ ئه‌گه‌رێ نه‌مانا هه‌ست و دلۆڤانى و مرۆڤایه‌تى و زانست و ره‌وشتى و ل جهێ خوه‌ كاڤلكرن و وێرانكرنێ په‌یدا دكه‌ن و دبیت شوونوارێن وێ كاڤلكرنێ ب بۆرینا سالان ژى جهێن خوه‌ نه‌ به‌رده‌ن و چ چاكسازیكه‌ر ژى نه‌شێن به‌رامبه‌ر وێ ڕاوستن و چاكسازیان بكه‌ن، ب تایبه‌ت هه‌كه‌ ڤایرۆسا وێ چووبیته‌ د ناڤ خوینا پله‌دار و سه‌رمایه‌دار و كاربه‌ده‌ستێن جڤاكى دا و دگه‌ل خوینا وان هاتبیته‌ گونجاندن، ل ڤێره‌ دێ شێن بێژین كو هنده‌ك ژ هۆكارێن هاریكار یان ئاڤاكه‌ر و چقێن هێزكرنا وێ بۆ گه‌نده‌لكاران ئه‌ڤه‌نه‌: به‌رژه‌وه‌نده‌چى ئه‌وه‌ كاركرن ژبۆ مه‌ره‌مێن خوه‌ یێن تایبه‌ت ب ڕامانا خوه‌ نێزیككرن بۆ كه‌سه‌كى و په‌سناكرنا وى كه‌سى ب په‌یڤێن نازك و نه‌رم ژبۆ ب ده‌ستڤه‌ئینانا پێدڤیێن خوه‌ و پاشێ خوه‌ ڤه‌كێشان و دوورخستن ژ وى كه‌سێ بوویه‌ قوربانێ پێدڤیێن وى, ئانكو ل ده‌مێ ئه‌وێ پێدڤى شیان هه‌نه‌ بگه‌رت و بخوازت وه‌كى خوازخوازۆكان و پاشى چو تشته‌كى ل به‌رچاڤوه‌رنه‌گریت و ئه‌ڤه‌ یا دیاره‌ دبیته‌ ئه‌گه‌رێ نه‌مانا باوه‌رى و هاریكاریێ د ناڤ خه‌لك و جڤاكى دا, خاپاندن و لێبۆك ژى جۆره‌كى فێلبازیێن ڕازیكرنێ نه‌ ژلایێ یێ پێدڤى ڤه‌ ل سه‌ر یێ هه‌بوویێ شیانێن تێركرنا وێ پێدڤیێ ئانكو یا ل سه‌ر ئه‌زمانێ خاپینۆكى دئێته‌ گۆتن نه‌ وه‌كى وێ یه‌ یا دلـێ وى هه‌لگرتى و زۆربه‌یى جاران خاپاندن ل سه‌ر مرۆڤێ ساده‌ و دلپاك دئێته‌ چه‌سپاندن ژلایێ مرۆڤێ نه‌ دلپاك و خوه‌ د ناڤ كراس و عه‌بایه‌كى كه‌سه‌كى خودان سۆز و شیان و هه‌مى مه‌ره‌م و ئارمانجێن وى ئه‌ون ژبۆ خزمه‌تا گشتى، وه‌كى خاپاندنا كه‌سه‌كێ چ بۆ بازاركرن و بازرگانیێ بیت یان یا كه‌سوكى بیت بۆ كرێتكرنا كه‌سه‌كى هه‌ژى, خاپاندنا جڤاكه‌كى بیت بۆ ب ده‌ستڤه‌ئینانا ناڤوده‌نگێ كه‌سه‌كى كو هه‌ژى یه‌ و خودان شیانه‌، به‌لێ یا ڕاست به‌روڤاژى بیت, خاپاندنا ڕامیارى بیت بۆ ب ده‌ستڤه‌ئینانا ده‌نگان و لاوازكرنا هێزا به‌رامبه‌ر, خاپاندنا ده‌ستهه‌لاتێ بیت ژلایێ پله‌داره‌كى ڤه‌ كو ده‌ستهه‌لاتا خوه‌ بكاربینت بۆ تێركرنا حه‌ز و مه‌ره‌مێن خوه‌ یێن تایبه‌ت و نڤاندنا به‌رژه‌وه‌ندیا گشتى ژپێخه‌مه‌ت به‌رژه‌وه‌ندیا وى برێڤه‌ بچیت, ئه‌ڤه‌ژى دبیته‌ ئه‌گه‌رێ كرێتكرنا ناڤێ ده‌ستهه‌لاتێ و ل ڤێره‌ ژى كه‌س و جڤاك بێ باوه‌ر دبیت، ب خاپاندن و لێبۆكى و نه‌وه‌یى (دره‌و) ل خه‌لكێ یان ل كه‌سه‌كێ دكه‌ت ب هنده‌ك كار و ڕه‌فتاران هه‌تا وى كه‌سى یان جڤاكى ب سه‌ردا ببیت، دا ئارمانجێن خوه‌ ب ده‌ستڤه‌بینیت و بۆ وى نه‌خه‌مه‌ پشتى هینگێ كه‌س و جڤاك مه‌ره‌ما وى بزانن. چونكه‌ وى ئه‌ڤ گۆتنا كورده‌وارى وه‌كى وى ڤیایى بۆ خوه‌ یا ڕاستڤه‌كرى ژ (دره‌وین دخۆت ئێك فراڤین) یا كرى (هه‌مى فراڤین), ئه‌ڤ ڕه‌فتاره‌ نێزیك ئێكن و ژ ئێك جۆر و نه‌ژادن و دبنه‌ ئاڤاكه‌ر و پشته‌ڤان و ته‌مامكه‌رێن گه‌نیبوونا مه‌زن و سته‌ما ڤه‌شارتى و ئێشا ژناڤبرنا جڤاك و ملله‌تان ئه‌و ژى (گه‌نده‌لـى) یه‌ ملحه‌مێ دلـێ كه‌سێ نه‌هه‌ژى یه‌ ل جهێن هه‌ژى.

د لاپه‌رێن من دا 1992– 2019ێ
كوردستانا باشور سه‌ره‌رایێ سته‌م و بێ دادیا دوژمن و داگیركه‌ران هه‌رده‌م بو یه‌ پێگه‌هـ و وارێ پێكڤه‌ ژیانێ و نه‌راوستیا یه‌ ژ خه‌بات و قوربانى دانێ ژبو بده‌ستڤه‌ئینانا مافێن خو یێن ره‌وا و شوره‌ش ل دیف شوره‌شێ و هه‌تا دگه‌هیته‌ سه‌رهلدانا پیروز و حكومه‌ت و په‌له‌مان و داموده‌زگه‌ه ل هه‌رێما كوردستانێ هاتین دامه‌زراندن و من ب فه‌ر دیت ئه‌وان قوناغێن حكومه‌تا هه‌رێما كوردستانێ هه‌ر ژ سالا 1992 هه‌تا نها تێدا ده‌ربازبویین ب مێژویه‌كا ته‌حل و شرین ڤه‌ بده‌مه‌ به‌ر ده‌ستێن خوه‌نده‌ڤانان:
– 4/7/1992 كابینا ئێكێ یا حكومه‌تا هه‌رێما كوردستانێ هاته‌ راسپاردن و پێكئینان ل سه‌ر ئاستێ50/50 و سه‌روكێ ده‌ڤه‌را ده‌ستهه‌لاتا ئێكه‌تیێ به‌رێز جلال تالبانى و یێ ده‌ڤه‌را ده‌ستهه‌لاتا پارتی به‌رێز مسعود بارزانى و د. فوئاد مه‌عصوم بو سه‌روكێ حكومه‌تێ و جه‌هوه‌ر نامق سه‌لیم بو سه‌روكێ په‌رله‌مانى و ل 15/7/1992 ئێكه‌م كومبونا په‌رله‌مانى هات ئه‌نجام دا پشتى ل 19/5/1992 ئێكه‌م جار ب سه‌ربه‌ستى هه‌لبژارتن دمێژویا كوردستانێ دا هاتى ئه‌نجام دان و 15 یاسا ژ په‌رله‌مانى ده‌ركه‌فتن دگه‌ل ئێكه‌م یاسا ژلایێ رێبه‌راتیا سیاسیا به‌ره‌ى كوردستانى ڤه‌ ب ناڤێ یاسا هه‌لبژارتن و پێكئینانا ئه‌نجومه‌نى نیشتمانى كوردستان- عراق, ئانكو سه‌رجه‌م 16 یاسا بین.
– 25/4/1993 كابینا دویێ یا حكومه‌تا هه‌رێما كوردستانێ هات پێكئینان ب ته‌وافق و كوسره‌ت رسول عه‌لى بو سه‌روكێ حكومه‌تێ و جه‌هوه‌ر نامق سه‌لیم بو سه‌روكێ په‌رله‌مانى و 26 یاسا ده‌ركرن و ل 1/5/1994 ناكوكى په‌یدا بین و شه‌رێ برا كوژیا نافخویى په‌یدا بى دناڤبه‌را ئێكه‌تى و پارتى دا و كابینا دویێ هه‌لوه‌شیا و ده‌ستهه‌لاتا هه‌رێمێ بى دوو ئیداره‌ و سه‌روكێ ده‌ڤه‌را ده‌ستهه‌لاتا ئێكه‌تیێ به‌رێز جلال تالبانى و یێ ده‌ڤه‌را ده‌ستهه‌لاتا پارتى به‌رێز مسعود بارزانى .
– 26/9/1996 كابینا سیێ یا حوكمه‌تا هه‌رێما كوردستانێ هات پێكئینان ل هه‌ولێرێ ژ لایێ پارتى دیموكراتى كوردستان ڤه‌ و روژ نورى شاویس بو سه‌روك حكومه‌ت و جه‌هوه‌ر نامق سه‌لیم بو سه‌روكێ په‌رله‌مانى و نه‌ژاد ئه‌حمه‌د عه‌زیز ئاغا جێگرى سه‌روك په‌رله‌مانى و 4 یاسا و بریار ده‌ركرن و دهه‌مان سال دا كابینا سلێمانیێ ژلایێ ئێكه‌تى نیشتمانى ڤه‌ هات پێكئینان و كوسره‌ت رسول عه‌لى بو سه‌روكێ حكومه‌تێ و ده‌ڤه‌را ده‌ستهه‌لاتا ئێكه‌تیێ بسه‌روكاتیا به‌رێز جلال تالبانى و یا ده‌ڤه‌را ده‌ستهه‌لاتا پارتى ب سه‌روكاتیا به‌ریز مسعود بارزانى و ل 26/11/1997 كابینا هه‌ولێرێ ئالوگور دپوستێن ویزارى دا كرن و 32 یاسا هاتن چه‌سپاندن ژ په‌رله‌مانى, پشتى ل 24/9/1997 شه‌رێ براكوژى راوستیایى, و ل 12/2/1998 ب رێكه‌فتنا ل شه‌قلاوه‌ ئێكجارى شه‌رێ نافخو ب كوتایى هات و چه‌سپاندن ب رێكه‌فتنا 15 سالى یا واشنتون.
– 20/12/1999 كابینا چارێ یا حوكمه‌تا هه‌رێما كوردستانى ل هه‌ولێرێ هات پێكئینان ژلایێ پارتى ڤه‌ ب سه‌روكاتیا نێچیرڤان بارزانى و سه‌رگیس اغا جان وه‌ك جێگر و ژ 24 وه‌زاره‌تا پێكدهات و جه‌هوه‌ر نامق سه‌لیم بو سه‌روكێ په‌رله‌مانى و ل سلێمانیێ ژى ژلایێ ئێكه‌تى ڤه‌ كوسره‌ت رسول عه‌لى سه‌روك حكومه‌ت بى و پاشان ل 21/1/2001 د.برهم صالح بو سه‌روكێ حكومه‌تێ ل ده‌ڤه‌را ئێكه‌تیێ و ل 4/7/2001 عمر فتاح بى سه‌روكێ حكومه‌تێ ل ده‌ڤه‌را ئێكه‌تیێ هه‌تا 14/6/2005, و ل ده‌ڤه‌را ده‌ستهه‌لاتا پارتى ل 1/1/2000 دكتور روژ نورى شاویس بو سه‌روكى په‌رله‌مانى و ل هه‌یڤا 9/2004 د. كمال كه‌ركوكى بو سه‌روكى په‌رله‌مانى به‌روه‌خت, و پشتى رێكه‌فتنا ئێكگرتنا هه‌ردو ئیدارا ل سالا 2005ێ هه‌ر ل هه‌یڤا 6/2005 عدنان رشاد مفتى بو سه‌روكێ په‌رله‌مانى و 97 یاسا و بریار ده‌ركرن و سه‌روكێ ده‌ڤه‌را ئێكه‌تیێ به‌رێز جلال تالبانى بى و یێ ده‌ڤه‌را پارتى به‌رێز مسعود بارزانى بى هه‌تا به‌رێز جلال تالبانى ل 7/4/2005 بویى سه‌روك كومارێ عیراقێ و ل 14/6/2005 ده‌ست ب كار بویى و د هه‌مان روژ دا به‌رێز مسعود بارزانى بو سه‌روكێ هه‌رێما كوردستانێ, ل 15/12/2005 هه‌لبژارتنێن عیراقێ هاتن ئه‌نجامدان و پارتى و ئێكه‌تى ب لیستا برایه‌تى به‌شدار بین ب فه‌رمى به‌رێز جلال تالبانى بو سه‌روك كومارێ عیراقێ.
– 7/5/2006 كابینا پێنجێ هات پێكئینان ب سه‌روكاتیا سه‌روك مسعود بارزانى و سه‌روك حكومه‌ت نێچیرڤان بارزانى, و ب رێكه‌فتنا سیاسى دناڤبه‌را پارتى و ئێكه‌تى دا ب شێوێ سه‌روكاتیا حكومه‌تێ دو سال دو سال ئه‌وا ل 21/1/2006 هاتى ئیمزاكرن و ل 1/3/2006 سه‌روك بارزانى هه‌ر ژ به‌رێز نێچیرڤان بارزانى سه‌روك حكومه‌ت و عمر فتاح وه‌ك جێگر راسپاردن بو پێكئینانا حكومه‌تا هه‌رێمێ و ژ 30 وه‌زاره‌تان و 9 وه‌زیرێن بێ چانته‌ پێكهات و سه‌روك په‌رله‌مان عدنان رشاد مفتى و 87 یاسا ده‌ركرن.
– 28/10/2009 كابینا شه‌شێ یا حكومه‌تا هه‌رێما كوردستانێ هات پێكئینان یا ته‌مامكه‌را كابینا پێنجێ ب سه‌روكاتیا د. برهم ئه‌حمد صالح و ئازاد بروارى وه‌ك جێگر و ل 1/9/2009 هاتبین راسپاردن ژلایێ سه‌روك مسعود بارزانى ڤه‌ و ژ 19 وه‌زاره‌تان و 4 پلێن ناڤ وه‌زیر پێكدهات و د.كمال كه‌ركوكى بو سه‌روك په‌رله‌مان و ل 1/1/2012 ئه‌رسه‌لان بایز بو سه‌روكى په‌رله‌مانى و 49 یاسا ده‌ركرن.
– 5/4/2012 كابینا حه‌فتێ یا حكومه‌تا هه‌رێما كوردستانێ ب سه‌روكاتیا نێچیرڤان بارزانى و عماد احمد وه‌ك جێگر هاته‌ پێكئینان و ل 17/1/2012 هاتبین راسپاردن ژلایێ سه‌روكێ هه‌رێمێ ڤه‌ و ژ 19 وه‌زیر و 4 پلێن ناڤ وه‌زیر پێكدهات و ئه‌رسه‌لان بایز بو سه‌روكى په‌رله‌مان و ل گولانا 2014ێ د. محمد یوسف بو سه‌روكێ به‌رله‌مانى و 30 یاسا ده‌ركرن.
– 14/6/2014 كابینا هه‌شتێ یا حكومه‌تا هه‌رێما كوردستانێ هات پێكئینان ب سه‌روكاتیا نێچیرڤان بارزانى و قباد تالبانى وه‌ك جێگر و 21 وه‌زاره‌ت و 9 سه‌روك هه‌یئه‌ ب پلا وه‌زیر و سكرتێر و سه‌روك په‌رله‌مان یوسف محمد صادق پشتى ل 21/9/2013 هه‌لبژارتنێن په‌رله‌مانێ كوردستانێ هاتین ئه‌نجام دان و ل 12/9/2015 ل خالا پردێ رێك ل محمد یوسف هات گرتن بێته‌ هه‌ولێرێ ژبه‌ر خونیشادانێن سلێمانیێ و ل 20/12/2017 د.محمد یوسف صادق ده‌ست ژكارێ سه‌روكاتیا په‌رله‌مانى ڤه‌كێشا و جعغر ابراهیم ئیمنكی وه‌ك جێگر و بێگه‌رد دلشاد تالبانى سكرتێر كارێ په‌رله‌مانى ب رێڤه‌برن و 24 یاسا و بریار ده‌ركرن و ل 28/10/2017 مسعود بارزانى ناما ده‌ست ژكاركێشانێ ژ سه‌روكاتیا هه‌رێمێ دا په‌رله‌مانى و ل 1/11/2017 كوردستان ما بێ سه‌روك هه‌رێم و سه‌روكێ حكومه‌تێ كارێن سه‌روكى ب رێڤه‌برن.
– كابینا نه‌هێ پشتى ل 30/9/2018 هه‌لبژارتنێن په‌رله‌مانێ كوردستانێ هاتین ئه‌نجامدان و ل 6/11/2018 په‌رله‌مانى ئێكه‌م كومبونا خو گرێدا ب سه‌رپه‌رشتیا به‌رێز رێڤنگ هرورى وه‌ك دانعه‌مرترین ئه‌ندام په‌رله‌مان دخولێ دا و ل 18/2/2019 په‌رله‌مانى ڤالا فرید هه‌لبژارت وه‌ك سه‌روكا په‌رله‌مانى هه‌تا رێكه‌فتن په‌یدا ببت دناڤبه‌را ئێكه‌تى و پارتى دا و ل 8/5/2019 یاسا ژماره‌ ( 1 ) یا سالا 2019ێ ژ په‌رله‌مانى ده‌رچو یه‌ ئه‌و ژى یاسا كاراكرنا سه‌روكایه‌تیا هه‌رێمێ و ل 10/6/2019 به‌رێز نێچیرڤان بارزانى ب ئاماده‌بونا 1200 كه‌سایه‌تیان سویندا سه‌روكاتیا هه‌رێمێ خواندى وه‌ك سه‌روكێ هه‌رێمێ, ل11/6/2019 به‌رێز مسرور بارزانى هاتى یه‌ راسپاردن ژلایێ سه‌روكێ هه‌رێما كوردستانێ نێچیرڤان بارزانى ڤه‌ بو پێكئینانا حكمه‌تێ و كابینا نه‌هێ و ئه‌گه‌ر ئێكه‌تى نیشتمانى ب كارا بێته‌ دناف حكومه‌تێ دا بریاره‌ بێگه‌رد دلشاد تالبانى ببیته‌ سه‌روكا په‌رله‌مانى وه‌ك پشكا ئێكه‌تیێ, نها خه‌لكێ كوردستانێ چاڤه‌رێیى پێكئینانا كابینا نوى یه‌ و بارودوخ ژى زور یێ هه‌ستیاره‌ و ده‌ڤه‌را روژهه‌لاتا ناڤین یا د ئاقاره‌كى مه‌ترسیدار دا سه‌ره‌رایى پلانێن نه‌حز و دوژمنێن نه‌ته‌وا كورد و هه‌لوه‌شاندنا ئه‌زمونا هه‌رێما كوردستانێ, و هیڤى و ئومێدا مه‌ژى ئه‌وه‌ سه‌ركردایه‌تیا كوردى ب براتى و ئێكگرتن و حه‌كیمانه‌ سه‌ره‌ده‌ر بیت و كابینه‌كا كارا بیت ژبو به‌رژه‌وه‌ندیا گشتى…
ژێده‌رێن مفا ژێ هاتین وه‌رگرتن:
– ده‌زگه‌هێن راگه‌هاندنێن كوردى روژانه‌ ( كه‌نالێن ئه‌سمانى و ئه‌ردى و روژنامه‌ ).
– سایتێن پارتێن كوردستانا باشور.
– سایتێ په‌رله‌مانێ كوردستانێ.
– سایتێ حكومه‌تا هه‌رێما كوردستانێ.
بوزانین ئه‌ڤ بابه‌تێ من ل 3/7/2019 ل روژناما ئه‌ڤرو هات به‌لاڤ كرن

نه‌زیر چه‌مباهیڤى

هه‌ر ده‌وله‌ته‌كا ل جیهانێ ده‌ما ئه‌مریكا گه‌فێ لێ دكه‌ت خوه‌ دیار دكت یا ژخوه‌ رازى یه‌ و خودان هێزه‌ و شیانێن هه‌ین به‌رامبه‌رى ئه‌مریكا راوستیت و ئه‌مریكا بێ منه‌ت دكت و چ عیبره‌تان ژ سه‌ربۆران وه‌رناگریت, ئه‌و ده‌وله‌ت ژى تنێ چه‌كێ راگه‌هاندنێ یێ لاواز بكاردئینت و زه‌ڤله‌كێن خوه‌ دیار دكت و ل پشت په‌ردا لافلافێ ژ ئه‌مریكا دكت كو به‌رهه‌ڤه‌ ل سه‌ر هه‌مى مه‌رجان رازى بت تنێ مه‌رجێ روخاندنا ده‌ستهه‌لاتێ د ناڤ دا نه‌بیت وه‌ك میناك رژێما سه‌دام و قه‌زافى و هه‌تا دگه‌هیته‌ بهارا عه‌ره‌بى ئه‌وا كراسێ بێ شه‌رمیێ كرى به‌ر هه‌مى ده‌ستهه‌لاتدارێن فاشستێن عه‌ره‌ب و هه‌تا نها وێ بهارێ وه‌رزێ خوه‌ نه‌گوهارتى یه‌, نها ئیران ژى یا كه‌فتیه‌ به‌ر وى وه‌رزى و خوه‌ خشیم دكت ل سه‌ر هێزا ئه‌مریكا و حوپه‌حوپێ دكت ب چه‌كێن كۆپى كرى دشێت ل به‌رامبه‌رى ئه‌مریكا راوستیت و نزانت ئه‌گه‌ر عه‌جه‌لا بزنێ هات دێ نانێ شڤانى خۆت و ئه‌مریكا یا ئاگه‌هداره‌ ل سه‌ر هه‌مى هێز و شیانێن وێ ژلایێ له‌شكرى و ئابوورى و هه‌تا جڤاكى ڤه‌ ب رێیا هزاران سیخور و لایه‌نگرێن ئوپۆزسیۆنێ ڤه‌ د ناڤ هه‌مى داموده‌زگه‌هێن ده‌ستهه‌لاتێ دا و دبیت د گوپیتكا ده‌ستهه‌لاتێ ژى دا هه‌بن سه‌ره‌رایى, هه‌ڤپه‌یمانیا ئه‌مریكا یا هه‌ره‌ مه‌زن ژلایێ ناتۆ و ئه‌قلیمى ڤه‌ ل به‌رامبه‌ر هه‌ڤپه‌یمانیا ئیرانێ یا لاواز ب رێیا گرۆپێن شیعى ل چه‌ند وه‌لاتێن هه‌رفتى و چه‌كێ ئیرانێ یێ تازه‌ هاتى كوپیكرن ژ هنده‌ك جورێن چه‌كێن كرین و فروتنێ و نه‌ تایبه‌ت, وه‌كى یێن چینى و رۆسى و كۆرى ل به‌رامبه‌ر چه‌كێ پێشكه‌فتى و تاقیكرى یێ ئه‌مریكا ل گه‌ل پلانێن ستراتیجیێن له‌شكرى یێن ژیرانه‌ و خودانا ژماره‌كا زه‌به‌لاح یا باله‌فرێن پێشكه‌فتى ل گه‌ل پتر ژ 300 گه‌مى و نقۆمڤانێن پڕچه‌ك كرى و هه‌لگرێن باله‌فرا و ته‌كنۆلۆجیا نهێنى و پێشكه‌فتى د هه‌مى بواران دا ل گه‌ل هژمارا زۆر یا له‌شكرى و پتر ژ 150 بنگه‌هان ژ ده‌رڤه‌ى ئه‌مریكا ل هه‌مى جیهانێ هه‌ین ل گه‌ل پێلگر و پێلكۆژێن هه‌ره‌ پێشكه‌فتى و رۆكێتێن زیره‌ك و شاره‌زا, ژلایێ جوگرافى ئیران یا دۆرپێچكرى یه‌ ژ هه‌مى ره‌خان ڤه‌ ژ لایێ ئه‌مریكا ڤه‌ ب رێیا بنگه‌هێن له‌شكرى وه‌ك ل رۆژهه‌لات بنگه‌هێن ئه‌ڤغانستان و ل باكۆر جۆرجیا و ل رۆژئاڤا ڤه‌ بنگه‌هێن ل توركیا و ئیسرائیل و هه‌تا ل عیراقێ و ده‌ریا سپى یا ناڤه‌راست و ژلایێ باشۆرى ڤه‌ ده‌وله‌تێن كه‌نداڤى و كه‌نداڤێ ناڤ ناكۆكى (عه‌ره‌بى ـ فارسى) و ل ئه‌سمانى هژمارا زۆر یا هه‌یڤێن ده‌ستگرد یێن له‌شكرى و سیخورى یێن ئه‌مریكا ل سه‌ر ئه‌سمانێ ئیرانێ, ژ لایێ ناڤخوه‌یا ئیرانێ ڤه‌ هه‌بوونا گه‌له‌ك نه‌ته‌وه‌ وه‌كى كورد و ئه‌زه‌رى و عه‌ره‌بێن ئه‌هواز و توركمان ل گه‌ل ئوول و مه‌زهه‌بان ب تایبه‌ت سونى و ئه‌ڤ ئوول و نه‌ته‌وه‌ گه‌له‌ك بێزار بووینه‌ ژ سته‌ما ل سه‌ر ده‌ستێن ده‌ستهه‌لاتا مه‌لالى یا شیعى و ماف وندا كرینه‌ و جڤاكێ ئیرانێ ب گشتى ژى دبن سته‌مێ دایه‌ ژ لایێ ئابوورى و مافێن ئازادیا كه‌سایه‌تیێ و ده‌ربرینێ ڤه‌ و یێن ل هیڤیا ده‌لیڤه‌كێ نه‌ خوه‌ ژبن ئه‌ڤێ سته‌مێ ده‌ربێخن, به‌لێ ئه‌ز باوه‌رم ئه‌مریكا نه‌ڤێت ب ئێكجارى ده‌ستهه‌لاتا شیعى ژناڤببه‌ت و دبت ئه‌مریكا ده‌ربه‌كى ب ژان ژ نیشكه‌كێ ڤه‌ ل هێزا ئیرانێ بدت و تایبه‌ت یا ده‌ریایى لاواز بكت بۆ ئێمناهیا گه‌شتێن ل كه‌نداڤى و دوورخستنا ئیرانێ ژ سنۆرێ ئیسرائیلێ, ده‌ستهه‌لاتا شێعى بهێلت بۆ به‌رژه‌ندیێن خوه‌ ب مه‌ره‌ما ڤاله‌كرنا به‌ریكێن ده‌وله‌تێن كه‌نداڤى یێن خودان په‌ترۆل و ته‌رازوكرنا مه‌زهه‌بێ شێعى و سونى ل ده‌ڤه‌رێ.