رەعەد عومەر
د جیهانا سیاسەتێ دا، دبێژن «دوژمنێ دوژمنێ من هەڤالێ منە»
لێ ئەوا ئەڤڕۆ ل سووریا ڕووددەت ژ ڤێ بنەمایێ ژی دەرباز كرییە و چوویە د خانەیا پراگماتیبوونا لایەنێن دژبەر دا بۆ پاراستنا بەرژەوەندیێن باڵا.
ڕێككەفتنا ل ناڤبەرا مەزلۆم عەبدی، وەك فەرماندەیێ هێزێن سووریا دیموكرات و ئەحمەد ئەلشەرع وەك كاراكتەرێ سەرەكی یێ حوكمەتا نوو ل دیمەشقێ، تنێ ڕێككەفتنەكا سەربازی یا دەمكی نینە، بەلكو ڕاگەهاندنا قۆناغەكا نوو یا سیاسی یە كو تێدا كوردان ب ئەقلەكێ ساڕ یێ ڕیالپۆلیتیك بڕیارا مانێ ل سەر مێزا دیمەشقێ دا، نەك ل پشت دەرگەهێن گرتی.
ئەڤ پێنگاڤە نیشانا وێ چەندێیە كو كورد ل ڕۆژئاڤا گەهشتینە وێ باوەریێ كو ژناڤچوونا ڕژێما ئەسەد ڤالاییەكا مەزن دروست كریە و نابت ئەو ڤالاهییە ب شەڕەكێ وێرانكەر دگەل هێزا نوو بهێتە پڕكرن، بەلكو پێدڤیە ب ڕێیا لێكتێگەهشتنێ پێگەهێ كوردان د دەستوورێ داهاتی یێ سووریا دا بهێتە چەسپاندن.
ژ ڕوویێ شرۆڤەكاری ڤە ئەڤ ڕێككەفتنە د بنەڕەت دا دەستكەفتەكێ تاكتیكی یێ مەزنە بۆ پاراستنا جۆگرافیایا رۆژئاڤایێ كوردستانێ ژ هەرەشەیێن بەردەوام یێن توركیا.
ب ڤێ نێزیكبوونێ كوردان مایتێكرنا توركیا یا ب ناڤێ «شەڕێ دژی تیرۆرێ» لاواز كر و جیهان نەچار كر كو وەك پشكەكا سەرەكی ژ چارەسەریێ تەماشەی وان بكەت نەك وەك كێشەیەكا جوداخواز.
لێ مەترسی ل وێ دەمی دەستپێ دكەت كا ئایا ناسنامەیا دەولەتا نوو یا سووریا دێ چاوا بیت؛ ئەلشەرع، سەرەڕای گوهۆڕینا وێنەیێ خۆ یێ سیاسی بەرەف میانڕەویێ، هێشتا ژ بنیاتەكێ ئایدیۆلۆژی دهێت كو دگەل پرۆژێ نەتەوەیێ دیموكراتی یێ كوردان ناگونجیت.
ل ڤێرێ شكەستنا كوردان رەنگە د سادەبوونا سیاسی دا بیت ئەگەر باوەریێ ب پەیمانێن زارەكی بكەن بێی كو گەرەنتیێن نێڤدەوڵەتی و دەستووری هەبن، چونكی بارەدۆخێ سیاسی یێ سووریا نیشا ددەت كو هەر ڕێككەفتنەكا بێ پشتەڤانیا جڤاكێ نێڤدەوڵەتی، رەنگە ل ژێر فشارێن هەرێمی ب تایبەت توركیا، بهێتە هەلوەشاندن.
ل سەر ئاستێ نێڤدەوڵەتی، ئەڤ ڕێككەفتنە لایەنێن زلهێز خستینە د دوخەكێ چاڤەڕێكرنا ب هشیاری دا.
واشنتۆن، كو هەڤپەیمانێ ستراتیژی یێ كوردانە، نەیێ ئامادەیە پشتێ بدەتە كوردان لێ د هەمان دەم دا دڤێت پەیوەندیێن خۆ دگەل دیمەشقا نوو ب ڕێكا كوردان ڕێك بێخیتەوە دا كو جێگریا ناوچەیی بپارێزیت.
ژ لایێ دی ڤە، توركیا ب هەمی هێزا خۆ بزاڤێ دكەت ڤێ ڕێككەفتنێ تێك بدەت چونكی ئێكگرتنا هێزێن سووری دگەل كوردان ئانكو دوماهی هاتنا هەژموونا توركیا دهێت ل باكۆرێ سووریا.
ئەوروپا ژی، كو د ناڤبەرا ترسا ژ كۆچبەریێ و پاراستنا پرەنسیپێن دیموكراسیێ دا دچیت و دهێت، پشتەڤانیێ ل هەر بزاڤەكێ دكەت كو شەڕی ڕاوەستینیت، لێ ب گۆمان سەیری پاشەڕۆژا مافێن مرۆڤی و ئازادیێن مەدەنی دكەت ل ژێر سێبەرا دەسهەلاتا نوو.
د ئەنجام دا، ئەڤ ڕێككەفتنە (قومارەكا سیاسی یا مەزنە) كو مەزلۆم عەبدی پێ ڕابوویە.
ئەگەر كورد بشێن ڤێ دەرفەتێ بكاربینن بۆ چەسپاندنا سیستەمەكێ نەناڤەندی و فیدرال، ئەو دەم مێژوو دێ وەك سەرفەرازییەكا بێ وێنە ل قەلەمدەت.
لێ ئەگەر ئەحمەد شەرع تنێ وەك تەكتیكەك بۆ خاڤكرنا بەرەیێ كوردان ئەڤ ڕێككەفتنە ئەنجام دابیت.
ئەو دەم دێ كورد تووشی مەترسییەكا ستراتیژی بن كو رەنگە هەمی دەستكەفتێن وان یێن دەهـ ساڵێن بووری بئێختە د مەترسیێ دا.
بژارەیێ تاكانە یێ كوردان د ڤێ قۆناغێ دا، ئێكگرتنا ناڤماڵا سیاسی و پاراستنا هێزا سەربازییە وەك كارتەكا فشارێ، دا كو ڕێككەفتنا دگەل دیمەشقێ نەبیتە داڤەك بەلكو ببیتە پردەك بەرەف سووریایا پاشەڕۆژێ كو تێدا مافێن هەمی پێكهاتان پاراستی بن.