ئهگهر بیرئانینا ژنا جیهانی لههر ساڵهكێ ل رۆژا 8 ی ئادارێ بێته كرن وهك بهاداریهك بۆ وان، لێ دڤێت نه رۆژهكێ بتنێ، بهلكو ههمی رۆژێت سالێ بیرئانینا ژنا كورد بێته كرن،ژ بهر وی رۆلێ بهرچاڤێ وان دوهی وئهڤرۆ گێڕای و د گێڕن. ژنا كورد چو جارا وهكی ژنێت دی یێت مللهتیت دهور و بهرا نهبوویه، ئهڤه ژی گۆتنا گهلهك رۆژههلاتناسا و جڤاكناسا و مێژوونڤیسێت بیانی یه، ژنا كورد ههردهم مل ب ملێ زهلێمی، ل ناڤ ماڵ و دهرڤهی ماڵ كار یێ كری، كارێ چاندنێ و ڕهزی و پهزی زێدهباری كارێ ناڤ ماڵێ. نه ههر ئهڤه بهلكو ل رۆژا شهڕی، ژنا كورد مل ب ملێ زهلێمی شهڕ دكر وهندهك جارا بریندار د بوو و دهاته كوشتن. ئانهكو شهڕ كرنا ژنا كورد نه ههر ئهڤرۆیه ل بهرۆكێت شهڕی، بهلكو گهلهك كهڤنتره ژ وێ مێژوویێ.
زانایێ جڤاكناسێ كورد یێ ناڤدار (مهلا مهحموود بایهزیدی 1799 ـ 1867 ز ) د پهرتووكا خۆ یاناڤدار دا (عادات و رسوماتنامهئێ ئهكرادیه) ئهوا ل سالا 1274 ێ مشهختی بهرامبهر 1857 ـ 1858 ز دانای، كو ئێك ژ گرنگترین پهرتووكایه د وارێ جڤاكناسیا كوردیدا، پڕ پهسنا ژنا كورد دكهت ورۆلێ وێ دیار دكهت، بۆ نموونه لجههكێ سالۆخهتا ژنێ د دهت د شهڕی دا دهمێ دوژمن تێنه سهر مالێت كوردان و د بێژیت: (ژنێد وانێ مالان ژی ههر یهك كوون ئهستوونهكێ د گرن دهستێد خوه و حازر دبن،گوهێ ژنان ژی ل شهڕی یه، دیتن كو شهر هاته نێزوكا مالان، ئهو ژن ژی ب وان ئهستوون كوونان دچنه شهڕی و یاریا مێران د كهن. دبه ژن ژی تێنه بریندار كرن و كوشتن. یانی وهكو شهڕهكی وهها ل سهر مالێد ئهكرادان ب قهومن،ژن و مێر شهڕی دكهن)، ( مهلا مهحموودێ بایهزیدی، عادات و رسوماتنامهئێ ئهكرادیه،ئامادهكرن و وهرگێڕانا سهر زمانێ عهرهبی، رهشید فندی، دهۆك، 2006، بپ 18). كوون ئهستوون : ئانهكو ئهو ستوینێت د دهنه بهر كوینا ل زۆما.
ئهڤه ل دۆر شهڕی، لێ رهوشا ژنا كورد ل دۆر رێڤهبرنا كارێ ناڤ مالێ ژی یا ئاشكهرایه،، نهمازه دهمێ زهلێمێ وێ ل ماڵ نهبیت كو گهلهك ب ئاسایی پێشوازیا مێڤانا دكهت و بخێر هاتنا وان دكهت.
ژ بهر هندێ گهلهك ب دلگهرمی و بههمی باوهری د بێژین، نموونێت ژنا كورد ل ڤی دهڤهرێ، بۆ زیرهكی و چهلهنگی و چاڤ نهترسیێ نینن، ئهوا ئهڤرۆ ل مهیدانا شهڕی ل كۆبانێ و غهیری كوبانێ روی د دهت، ههر ڤهگیڕانا وێ رهوشا جارانه و ژنێت كورد ل بهرۆكێت شهڕی وهكی مێرخاسا شهڕێ تیرۆریستێت زهمانی د كهن و دیسا شههید دبن وبریندار ژێ د كهڤن و ژنا كورد ههژی هندێ یه ههمی رۆژ رۆژێت بیر ئانینا وێ بن.
نووترين نووچه
- سەرۆك بارزانی و شاندەكێ حزبا دەعوە پرسا پێكئینانا حوكمەتا نوو یا ئیراقێ گەنگەشەكر
- پاراستنا زمانێ دایكێ ئەركەكێ نیشتمانییە ل سەر ملێ مە هەموویان
- پاراستنا زمانێ دایك، پاراستنا ناسنامە و پاشەڕۆژا كوردستانێ یە
- زمان بنەمایێ سەرەكیێ ناسنامەیا مە یا نەتەوەییە
- گوهۆڕینێن دیموگرافی و ب ئەرەبكرنێ ل سنۆرێ مادەیێ 140 دهێتە كرن
- سەرۆك بارزانی: ئێكەتییا قوتابییان و لاوان قوتابخانەیا پێگەهاندنا خەباتكاران بوو
- سەرۆك بارزانی پیرۆزباهی ل ڕێكخەرێ گشتیێ بزاڤا گۆڕانێ كر
- گرنگە د حوكمەتا بهێت یا ئیراقێ دا هەڤپشكی و هەڤسەنگی و ل هەڤكرن بنەمایێن سەرەكی یێن هەڤبەندیێ بن ل گەل بەغدا
- نێچیرڤان بارزانی و جۆشوا هاریس دووماهی پێشهاتێن پرۆسەیا سیاسی ل ئیراقێ گەنگەشەكر
- ئێكەتییا قوتابییان و لاوان ڕۆلەكێ كاریگەر د بزاڤا ڕزگاریخوازا گەلێ كوردستانێ دا هەبوو
د.رهشيد فندى
گرنگیا گۆتنێن بهرپرسان د وارێ ئابووری دا
ژ بهر ڤێ قهیرانا ئابووری یا نوكه ههرێما كوردستانێ كهفتیه د خهفكا وێدا و دوم درێژیا ڤێ قهیرانێ لسهر ههرێمێ بۆ دهمێ پتر ژ ساڵهكێ، بێگومانه خهلكێ مه یێ فهرمانبهر و ههژار وخودان مههانه ژ ههر كهسهكی پتر ژ بهر ڤێ قهیرانێ د ناڵن وڕۆژ ب ڕۆژ گوهێ وان یێ ل بهیستنا نووچهیهكێ خۆش ل دۆر وهرگرتنا مههانهیا ، دا هندهك خهمێت خۆ پێ ڤهڕهڤینن ، لێ وهسا دیاره ، هندهك ژ كار بدهستا و ئهو كهسێت هندهك ژ دهنگوباسێت ئابووری ومههانهیا د زانن و ههر دهم لسهر شاشێت تهلهفزیۆنانه ، ڤێ راستیا فهرمانبهرا د زانن ، لهوما وان كهسان شاشێت تهلهفزیۆنا یێت كرینه جه و بارهگا بۆ بانگهشه وپڕۆپاگندا بخۆ و ههلبژارتنا ، دا وهسا بدهنه خویا كرن كو ئهو یێ قهرێ خهلكی ژ سهر خۆ رادكهن دهمێ دهنگێ خۆ دایه وان و خهمخۆرێت خهلكی نه.
ئهڤه ههمی ئاسایی یه و مافێ وانه ، لێ تشتێ نه ئاسایی ئهوه ، دهمێ گوتنێت وان د بێ بنهما بن یان ژی گۆتنێت وان دژی ئێك بن، كو بووینه جهێ سهرنجا خهلكی وهندهك جارا دبنه جهێ پێكهنینا خهلكی لسهر ئێش و ئازارێت خۆ.
ههر جارهكێ دێ بینین ، ئهندامهكێ پهڕلهمانێ بهغدا دێ دهركهڤیت و دی بێژیت ئهز مزگینیێ د دهمه خهلكی كو ل بهغدا پاره یێت گههشتینه بانكا ههرێمێ و سوباهی ههتا دوسبه دێ گههن ، پشتی وێ ئاخفتنێ ب چهند دهمژمێرهكا ، بهرپرسهكێ مهزن ژ وهزارهتا دارایی یا ئیراقێ ( كو وهزیرێ دارایی بخۆ كورده و كهسهكی ژێهاتیه ) دێ بێژیت ، ئهو ئاخفتن یا بێ بنهمایه و چو پاره نهچووینه بانكا ههریمێ وهێش ئهو گرفتاری ژ بنهجهێ نههاتیه چارهسهر كرن !!
باشه برایێ پهڕلهمانتار ! ئهگهر ته زانیاریێت دروست نهبن ، دێ بۆچی ڤان ئاخفتنێت قهبه بێژی ؟؟ ودێ خهلكێ خۆ خاپینی ودێ وهكهی خهلكێ ته ئهوێ دهنگ داینه ته ، باوهری بته نهمینیت ؟
من ل فێسبوكێ خواند ، ئێكی نڤیسیبوو : كهس باوهر ژ فلان پهڕلهمانتاری نهكهن دهمی بهحسێ پارێت مههانهیا دكهت ، ئاخفتنێت وی كهسی ههمی درهون ! مخابن بۆ ڤێ ئاخفتنێ !!
لهوما بهری نوكه ژی جارهكێ من نڤیسیبوو ، ئاخفتنێت بهرپرسان ههمی بهرپرساتیه، یان دڤێت چو گۆتنا نهكهن یان دڤێت ئاخفتنێت وان ههمی ددرست بن وجهێ باوهریێ بن ، و دڤێ دهلیڤێ دا فهره بێژم ، ل دنیایا پێشكهفتی، نابیت ههر كهسهك ل جهی خۆ گۆتنهكی بكهت و بكهیفا خۆ باخڤیت ، چنكی ئهگهر ئاخفتنا وی شاش دهركهفت ، دێ ئێته گازیكرن ودێ ئێته سزادان لسهر وان ئاخفتنێت بێ بنهما ، ئهگهر پهڕلهمانتار بیت چ ل ههولێرێ چ ل بهغدا د ڤێت ژ لایێ بهرپرسێخۆڤه بێته گازیكرن ، كا بۆچی گۆتنێت بێ بنهما بهڵاڤ دكهت ، ئهگهر فهرمانبهرهكێ مهزن یێ حكوومهتێ بیت، دیسا د ڤێت بێته گازیكرن و سزا دان ب گونهها هندێ كو ببهڵاڤكرنا گۆتنێت بێ بنهما، سومعهتا حكوومهتێ نزم دكهت و باوهریا خهلكی ب حوكمهتێ نامینیت.
بۆچی بیرهاتنا دامهزراندنا سۆپایێ ئیراقێ لبهر مه یا گران بوو؟
بهری چهند رۆژهكا و بتایبهت ل رۆژا 6 ی ڤێ مههێ، بیرهاتنا بۆرینا 94 ساڵا ل سهر ئاڤاكرنا سۆپایێ ئیراقێ ل مه بووری، كو ل رۆژا ناڤبری ل ساڵا 1921 ێ ئهو سوپا هاتبوو ئاڤاكرن ، لێ وهسا دیار بوو ئهو بیرهاتن لبهر خهلكێ كوردستانێ یا سار بوو و مه كهیف پێ نههات ، ههر چهنده حوكمهتا ههرێما كوردستانێ ئهو رۆژ كربوو بێنڤهدان و خهلكێ مه ژی یێ فێری هژمارهكا زۆر ژ بێنڤهدانا بووی، بۆ نموونه نزا چ حیكمهت د هندێ دا ههیه،كو رۆژا شهمبی بخۆ بێنڤهدانه و رۆژا ژ دایكبوونا پێغهمبهری ژی كهفته د رۆژا شهمبی دا، نزا چ حیكمه د هندێ دا ههبوو؟، ئهم رۆژا ئێكشهمب ژی بكهینه بێنڤهدان وهك قهرهبووكرن بۆ رۆژا شهمبی!!
ههر چاوا بیت زێدهبوونا رێژا بێنڤهدانان، نه د باشیا مه دایه وهك مللهت و حوكمهت ژ بهر ڤێ قووناغا ههستیار یا ئهم تێدا، چنكی ئهڤرۆ پتر ژ ههر رۆژهكا دی ئهم پێدڤی ئاڤاكرنا وهلاتێ خۆینه.
لێ بابهتێ مه نه بابهتێ بێنڤهدانایه، بهلكو بابهتێ پویته پێنهكرنا خهلكێ ههرێما كوردستانێ یه ب جهژنا ئاڤاكرنا سۆپایێ ئیراقێ. . جارێ دێ بێژین ههر ژ شۆرهشا 14 ی تیرمهها سالا 1958 ێ و ههتا نوكه مه چو باشی و خۆشی ژ سوپایێ ئیراقێ نهدیتیه دا كهیفا مه پێ بێت و وهكی وهلاتیێت ههمی دهولهتێت جیهانێ، ئهم شههنازیێ ب وی سوپای بكهین، ههر ژ سالا 1961 ێ ودهمێ شۆڕهشا ئهیلوولێ دهست پێ كری ، وههتا دوماهیا وێ شۆرهشێ، وی سۆپای تانك و تۆپ و فرۆكێت خۆ ل گوند وباژیر و تهرش وكهوال و دیكل و مریشكێت مه ئهزموون د كرن، ههر گوندهكێ كوردستانێ یێ وی سهردهمی تو چووبایێ دا بینی چاڵهك یان پتر یا ل نیڤا گوندی ههی ، جهێ بومبێت وان فرۆكا، ههر وهسا پشتی شۆهشا گولانێ دهست پێ كری، ئهو سوپا ههر ل سهر دهوسا خۆ چوو و هنده كارێت خرابتر ئهنجام دان وهكی كیمیا باران و ژههر رهشاندن و خرابكرنا گوندان ب ئێكجاری. .
پشتی كهفتن و ژناڤچوونا رژێما بهرێ یا سهددامی، مههزر كر، دێ سیستهمێ نوی یێ حكوومهتا ئیراقێ كارهكێ باش ئهنجام دهت و سوپایهكی پیشهكار ئاڤاكهت كو خهما ههمی مللهتێ ئیراقێ ههلگریت ، لێ مخابن ، وهسا نهبوو وسوپایهكێ وهسا دانا كو لایهنگریا پشكهكێ بكهت ژ سێ پشكا ژ مللهتێ 30 ملیۆنیێ ئیراقێ وسوپایهكێ پیشهكار و بێ لایهن نهبوو، كارێ ژ ههمیا خرابتر ئهوبوو ، دهركهت سوپایهكێ شهپ و شۆڕ وبێ سهروبهر و رۆژا لێ قهومی جلكێت لهشكری هاڤیتن و ئهو چهكێ گرانێ ئهمریكا دایێ ، ههمی بۆ دوژمنێت خۆ هێلا ! وشكهستنا سوپایێ ئیراقێ بسهرێ خهلكێ كوردستانێدا شكهست !و ژ ئهنجامێ وێ چهندێ داعش وهكی ئاگرێ سوور بهردا داڤ و دهلنگێت مه.
من ژ شۆرهشا تیرمهها سالا 1958 ێ سالۆخهتا ڤی سوپای دا، بۆچی؟ راسته ئهڤ سوپایه لسالا 1921 هاته پێكئینان وههر ژ وێ سالێ ژی ئهو سوپا یێ ئاراسته كری بوو بۆ دژاتیا كوردان و سهركوتكرنا شۆڕهشێت كوردی وهكی شۆڕهشێت بارزان بۆ نموونه، لێ ههر چاوابیت، د وان 37 سالا دا (1921_ 1958 ) ئهو سوپا یێ مهزههبی نهبوو و ئهنتی كورد نهبوو و هژمارهكا مهزن ژ سهركرده و ئهفسهرێت وی سوپای كورد بوون ولسهر پێناسا كورد بوونی ژ سوپای نه د هاتنه دوور ئێخستن و گهلهك جارا سهر لهشكهرێ ئیراقێ ههمیێ كورد بوو.
ئهو سۆپایێ ب درێژیا مێژوویا خۆ ئهڤه ب سهرێ مه ئینای ، ڤێجا چهوا مللهتێ مه ههست ب شهرهفمهندیێ بهرامبهر ڤی سوپای بكهت و چهوا ئاههنگێت خۆشیێ د رۆژا دامهزراندنا وی دا بگێریت ؟
بلا مه راگههاندن ب زمانێ عهرهبی ژی ههبیت
بهری نوكه گهلهك جارا من ب زمانێ كوردی و عهرهبی ژی نڤیسیبوو، كو دڤێن ل دهزگههێن مهیێن راگههاندنێ، پویته بزمانێ عهرهبی بێنه كرن زێده باری زمانێ كوردی،ئهڤه ژی ژ بهر چهند ئهگهرهكا، وهكی بوونا مه و مانا مه ل نێزیك عهرهبا، كو ههتا نوكه ژی دوو پارچێن كوردستانێ د گهل دوو دهولهتێن عهرهبی د ژین و ههیا نوكه ئهم ژێ جودا نهبووینه، ههر وهسا ژ بهر نێزیكیا مه ژ 20 دهولهتێن دی یێن عهرهبی ل رۆژههلاتا ناڤهڕاست، ژ بلی وان ههردووێن ئهم د ناڤدا د ژین، زێده باری هندێ كو بارا پتر ژ مللهتێ كورد بوسرمانن و زمانێ عهرهبی لهولهبێ تێگههشتنا دینێ بوسرمانهتیێ یه.
ئهڤه وێ رامانێ نادهت، ئهم زمانێ خۆ یێ شرینێ كوردی پشتگوهڤه پاڤێژین و بهرهف زمانێ عهرهبی بچین، نهخێر، زمان فاكتهرێ بوون و مانا ههر مللهتهكی یه و ئهم كورد ژ خهلكێ دی پتر تویشی بزاڤێن نههێلان و لاواز كرنا زمانێ كوردی بووینه. لهوما فهره ئهم بهری ههمیان پویتهی بزمانێ كوردی بكهین و خزمهتهكا بهردهوام بۆ گهشكرنا وی بكهین. لێ ژ بلی زمانێ كوردی كو فاكتهرێ سهرهكیێ كوردبوونا مهیه،دڤێن پویتهی بزمانێ ئنگلیزی ژی بكهین، وهك زمانهكێ زیندیێ ڤی سهر دهمی، لێ سهرهڕای هندێ پویتهكرن بزمانێ عهرهبی ژی، دێ خزمهتا وان ئارمانجا كهت یێن مه گۆتین.
رژێمێن ئێك لدویف ئێكێن ئیراقێ، ههر ژ دهمێ دانانا ڤێ دهولهتێ لسالا 1921 ێ و ب رهنگێن جودا جودا و لپهی دهلیڤه و دهم وسیاسهتا وان حوكمهتێن ئێك لدویف ئێكێن ئیراقێ، پڕۆپاگندێن نه حهق و نهرهوا دژی مللهتێ كورد كرینه و بدرێژیا ڤان سالێن ههمیان، وان لپهی مهرهم و ئارمانجێن خۆ كورد گونههبار دكرن، كو بهردهوام حهژ شهڕی دكهن ولێك تێ گههشتن لجهم وان نینه و وان نهڤێن ئارامی ل وهلێتی بهلێڤ ببیت. و وان لبن وێ پڕۆپاگندێ ههمی جۆرێن جینۆساید و قڕ كرنێ دژی كوردا بكار د ئینان.
لهوما بۆ مه فهره مه راگههاندنهكا زیرهك و ههڤسهنگ بزمانێ عهرهبی ههبیت، بۆ دیاركرن و رۆنكرنا رهوشا دادپهروهرانه یا كوردان لههر چار پارچێن كوردستانێ و بهرچاڤكرنا مافێن كوردان یێن رهوا.
من جارهكێ ئهڤ دانوستاندنه دگهل رێڤهبهبهرێ كهنالهكێ تهلهفزیۆنی یێ مه یێ كوردی كر، بهرسڤا وی ئهوبوو، گۆت: ئهز بتنێ نهشێم بهرامبهری سهد كهنالێن عهرهبی راوهستم !! بڕاستی ئهڤه بۆچوونهكا شاشه، چنكی ئهم ژ كهنالێن تهلهفزیۆنیێن كوردی ناخوازین بهرامبهری سهد كهنالێن عهرهبی راوهستن و سهنگهرا لێ بگرن، لێ بلا مه ئێك كهنالێ عهرهبی ئاخڤ ههبیت، راستیا مه و سیاسهتا مه یا درست بهرچاڤ بكهت و ل ئارمانج و مافێن مه ڤهكۆلیت، بلا شهڕێ كهسێ نهكهت. ئانهكۆ بتنێ بلا ئهو كهناڵ دهربڕینێ ژ رهوشا مه بكهت، چونكو پشتی دهمهكی راستی دێ خۆ فهرز كهت، و زلكهكێ شخاتێ ب وێ رۆناهیا كێم، دشێن تاریاتیێ ڤهڕهڤینیت و ههمی هێزا تاریێ نهشێن رۆناهیا زلكێ شخاتێ ڤهمرینیت. !!.
ئێزدی کوردێن رەسەنن و یێ نەڕازی..
پشتی وێ کارەساتا گران یا بسەرێ برایێت مە یێت ئێزدی ھاتی ل چیایێ شەنگارێ ھندەک دەنگێت نەشاز ل ڤێرە و وێراھە بلند بوون، و بخۆ ئەو کارەسات ب دەلیڤە دیت، دا یا نیڤا دلێ خۆ بڕێژن، یان ژی ھەما ئەو کەس ل ھیڤیا دەلیڤەیەکا ب وی رەنگی بوون، دا دربێ خۆ ڤەوەشینن .
راستە ھندەک شاشی چێبوون، بوونە ئەگەرا وێ کارەساتێ ل شەنگارێ و دڤێت ئەو کەس سزایێ خۆ بکێشن ژ بەر خەمساریا وان د مژارا پاراستنا شەنگارێدا ژ ھێڕشا تیرۆریستا یان ھەر چو نەبیت ئاگەھدار کرنا خەلکێ بێگونەە ژ ھەبوونا مەترسیا تیرۆریستا لسەر خەلکێ سڤیل، ئەو خەمساری ژی دێ گەلەک سزایا ل دویف خۆ ئینیت بۆ کەسێت خەمسار .لێ ئەڤ چەندە وێ برینێ دەرمان ناکەت یا چێبووی، کو ھندەک کەس پرۆپاگندێت نە د جھێ خۆدا بکەن و کار بگەھیتە وێ پلێ کو گومانێ بێخنە سەر کوردبوونا ئێزدیا .
شکەستنەک د وارێ لەشکەریدا جودایە وگومان ھاڤێتن بۆ سەر کوردبوونا ئێزدیا ژی جودایە، یان حەز کرنا ھندەکان بۆ گھوڕینا ئەسلێ ئێزدیان ژی جودایە . ئەم ھەمی ھەست ب ھندەک شاشیا دکەین د وارێ بەڕەڤانیکرنێ دا ژ ئێزدیا، و ھەر ئەم دێ شاشیێت خۆ ھەلسەنگینین و ھەوڵ دەین راست کەینەڤە، لێ گومان پەیدا کرن لسەر کوردبوونا ئێزدیان، ژکەسێ نا ئێتە قەبوول کرن،چەند پلە وپایە ژی ھەبن و ئەڤ بابەتە نە بابەتەکێ سیاسی یە بۆ رازیکرنا ڤی یان وێ ھە یان پڕۆپاگەندەکا حزبی بیت بۆ ڤێ حزبێ یان یا دی ، بەلکو بابەتەکێ مێژوویی و ھزری وزانستی یە .
ئەگەر ھات و ژ بەر جوداییا ئایینێ ئێزدیان، ھندە ئێریش ھاتبنە سەر وان و تەپەسەرکرنا دینی دژی وان ھاتبیتە کرن، ئەڤە وێ دەلیڤێ نادەت، کو ھێڕش لسەر توخم و نەژادێ وان بێتە کرن. ناڤێ وان بخۆ (ئێزدی) ناڤەکێ کوردیە و د مێژوویێ دا وەک (خودێ ناس) ھاتینە ناسین، لەوما ئەگەر ژێبرنا ناڤێ وان یێ دینی کارەکێ بزەحمەت بیت، ڤێجا ژێبرنا توخم و نەژادێ وان دێ چاوا بیت ؟. کەس نەشێت توخم و نەژادێ ئێزدیان ژێ ببەت، یان وان ب نەژادەکێ سەربخۆ ناڤبکەت، زانا و رەوشەنبیرێت ئێزدیا بخۆ، ڤی بابەتی ژ خەلکێ دی پتر دزانن.
ھەر کەسەکێ ئێزدی بیت یان غەیری ئێزدی بیت و ھەول بدەت ناسناما کوردبوونا ئێزدیا بگوھۆریت دێ قۆچانێ د گەل کەڤرەکێ رەق کەت ژ کەڤرێت چیایێت کوردستانێ وسوپاس بۆ خودێ کو گەلەک کەڤر یێت داناینە چیایێت مە وتێرا سەرێت وان ھەنە، و مێژوویا کوردی یا ئیسبات کری کو جھێ گەلەک سەرا ل سەر کەڤرێت مە ھەیە.
ھەر کەسەکێ بڤێت ژ کوردبوونا ئێزدیا دەرکەڤیت و بخۆ بتنێ وەک کەسەک، نەژادەکێ دی بخۆ پەیدا بکەت بلا کەرەم کەت بچیتە سەر وی نەژادێ وی د ڤێت، لێ وی چو پەیوەندی ب ئێزدیاڤە نینە، چنکی ب ئاخفتنەکێ و گۆتنەکێ نەژادێ ئیزدیا نا ئێتە گھۆڕین و ئێزدی ھەر کوردێت رەسەنن.
نيشاندانWP Facebook Auto Publish Powered By : XYZScripts.com