رزگار كێسته‌یى

چیرۆكنڤیسا ناڤدارا بریتانی ئاگاتا كریستی، ل ساڵێن 1930 ان ته‌ڤی زه‌لامێ خوه‌ گه‌ڕه‌كێ ژ بۆ سووریێ و كوردستانێ دكه‌ و وێ گه‌ڕا خوه‌ دكه‌ رۆمان ب ناڤێCome, Tell Me How You Live وه‌ره‌ بێژه‌ من تو چاوا دژی. ئه‌ڤ چیرۆكه‌ ل سالا 1946 هاتیه‌ چاپكرن، لێ دیسا ل ئه‌یلۆلا ئه‌ڤ ساله‌ ئه‌ڤ په‌رتووكه‌ جاره‌كا دی هاته‌ چاپكرن ڤه‌. كریستی ل دو جهان ب شێوه‌یه‌كی گه‌له‌ك بالكێش به‌حسا كوردان د ڤێ رۆمانا خوه‌ دا دكه‌، ب ڤی شێوێ خوارێ: 1ــ به‌حسا ژنێن كورد:  ده‌ما كریستی ل رۆژاڤایێ كوردستانێ بوویه‌ ب ڤی ئاوایی وه‌سفا ژنێن كورد دكه‌ د رۆمانا خوه‌ دا: ((كۆمه‌كا ژنان ژ دوورڤه‌ به‌ر ب من ڤه‌ دهێن. ژ جوانیا ڕه‌نگێن جلێن وان دیاره‌ كو ئه‌و كوردن. ئه‌و مژوولی ده‌رێخستنا بنكێن گیای و كۆمكرنا به‌لگانه‌. وان ب ڕێیه‌كا كورت خوه‌ گه‌هاندنه‌ ده‌ف من و نوكه‌ وه‌كی بازنه‌یه‌كێ ئه‌و یێ ل دۆر من زڤرین. ئه‌ڤ ژنێن هه‌ گه‌له‌ك د جوان و كه‌یفخوه‌شن. جلێن وان دڕه‌نگ ڤه‌بووینه‌. ده‌رسۆكێن د سه‌رێ وان ره‌نگ پرته‌قالیه‌كی ڤه‌بووینه‌. ڕه‌نگێ جلكێن وان كه‌سك، مۆر و زه‌رن. سه‌رێ وان هه‌رده‌م یێ بلنده‌ ل سه‌ر ملێن وان. به‌ژنێن وان دبلندن و شێوێ راوه‌ستانا وان به‌ژنكێلن. ئه‌و راست دراوه‌ستن و سینگێ خوه‌ دئیننه‌ ده‌ر و سه‌رێ خوه‌ بلند دكه‌ن، كو نیشانا شانازی و سه‌ربلندیێ دده‌ت. وان دێمه‌كی نۆرمالێ هه‌ی و ڕه‌نگێ وان ب سه‌ر ئه‌سمه‌ری ڤه‌یه‌. هنارۆكێن ڕوویێن وان دسۆرن وپڕانیا وان ژی د چاڤشینن. زه‌لامێن كوردان شێوێ لۆرد كچنه‌رێ بریتانی دده‌ن، كو ده‌مێ زارۆكیا من وێنه‌یه‌كی وی هه‌رده‌م ب ژوورا من ڤه‌ یێ هه‌لاویستی بوو. دێمه‌كێ سۆرێ تژی، سمبێلێن قه‌هوایێن تژی و مه‌زن، چاڤێن شین، ل گه‌ل له‌شه‌كێ موكوم و راوه‌ستانه‌كا له‌شكری. د ڤێ پارچا جیهانێ دا گوندێن كورد و عه‌ره‌با هندی ئێكن. ژیان و ئاینێ وان وه‌ك هه‌ڤه‌. لێ ب هیچ شێوه‌یه‌كی تو نه‌شێی ژنه‌كا كورد و ژنه‌كا عه‌ره‌ب ل گه‌ل هه‌ڤ هه‌ڤبه‌ر بكه‌ی. ژنێن عه‌ره‌ب هه‌رده‌م سه‌رنزم و شه‌رمینن و خوه‌ ژ خه‌لكی ڤه‌دشیرن. ده‌ما ل گه‌ل مرۆڤی دئاخڤن، دێمێ خوه‌ ژ مرۆڤی وه‌ردگێرن و ژ مرۆڤی ڤه‌دشێرن و ئه‌گه‌ر ته‌ماشه‌ی مرۆڤی ژی بكه‌ن ب دزیكی ڤه‌ و دبن چاڤێن خوه‌ را ته‌ماشه‌ی مرۆڤی دكه‌ن. ئه‌گه‌ر بكه‌نه‌ كه‌نی ژی دیسان نیڤا دێمێ خوه‌ دگرن و ڤه‌دشیرن. ب پرانی ره‌نگێن جلكێن وان د ره‌ش و تارینه‌. ژنه‌كا عه‌ره‌ب چجارا نه‌شێت لگه‌ل زه‌لامه‌كی باخڤیت. لێ ژنه‌كا كورد بێی دوودلی، هه‌موو ده‌مان خوه‌ وه‌كی زه‌لامان دبینیت و گه‌له‌ك جاران خوه‌ هێشتا باشتر ژی ژ زه‌لامی دبینیت. ئه‌و دشێن ل ده‌رڤه‌ ژی ل گه‌ل زه‌لامان باخڤن و بكه‌نه‌ كه‌نی و ب ئازادی حه‌نه‌كان بكه‌ن. ئه‌و رۆژێن خوه‌ ب سوحبه‌ت و كه‌نی و خوه‌شیێ دبوورینن)). 2ـ كریستی چاوا به‌حسا لاله‌شێ دكه‌ت؟ ئه‌و ب ڤی شێوێ خوارێ، به‌حسا لاله‌شێ دكه‌ د رۆمانا خوه‌ دا: ((تۆ نوها به‌ر ب مه‌زارگه‌ها پیرۆزا شێخادی ڤه‌ دچی، یا كو دكه‌ڤیته‌ ناڤكر و چیایێن كوردان، ل نێزیك مووسلێ. ئه‌ز باوه‌ر ناكه‌م جهه‌كی دی ل جیهانێ هه‌بیت وه‌كی ڤی جهی یێ جوان و دلڤه‌كه‌ر و ئارام بیت. تو دكه‌ڤیه‌ دناڤ چیا دا د ناڤ دارێن مازی و هناران دا، ل گه‌ل زنجیره‌كا چیای. بایه‌كێ پاك و خوه‌ش. ژ نشكه‌كێڤه‌ تو سه‌رێ دو برجێن سپیێن پیرۆز دبینی. هه‌ر تشت ل ڤێرێ یێ ئارامه‌ و ژیانه‌كا پری ته‌ناهیه‌. د نیڤا گه‌لی دا دێ بینی باخچه‌یه‌كێ تژی دار و كانیێن ئاڤێ یه‌. خزمه‌تكارێن مه‌زارگه‌هی مرۆڤێن رووخوه‌ش و دێم پری ڤیان و هه‌ڤالینی و مرۆڤایه‌تینه‌، ئه‌و چایێ بۆ مه‌ دئینن. تۆ دناڤ ڤێ ژینگه‌ها پاك و ئارام و دلڤه‌كه‌ر دا دروونی و چایێ ڤه‌دخۆی)).

رزگار كىسته‌ی
چه‌ند رۆژه‌كه‌ ل فێسبووكێ هێرشه‌كا ب هێز ل سه‌ر كچا ئێزدی نادیا مۆراد دهێته‌ رن. مخابن هنده‌ك جاران دگه‌هیته‌ وی ڕاده‌یی كو ژبه‌ر ڤی هه‌لوێستێ نادیایێ بێڕێزی ژی ب خووشك و برایێن مه‌ یێن كوردێن ئێزدی بێته‌كرن. ئه‌ز بخوه‌ ژی ئێك ژ وان كه‌سانم یێن كو گه‌له‌ك ئێشاین ب ڤێ كریارا نادیایێ، یا كو ڤیای ناڤێ كوردستانێ و حوگكمه‌تا وێ ل ده‌ڤ سه‌رۆكێ ئه‌مریكا ڕه‌ش بكه‌ت.
لێ ئه‌ز بخوه‌ ڤێ ڕوودانێ ب شێوه‌یه‌كی دی دخوینم. یا گرنگ ئه‌وه‌ كو دڤێت پێشیێ ئه‌م بزانین كانێ كێ نادیا چێكریه‌ و كی ل پشت وێ یه‌ و كی وێ بڕێڤه‌ دبه‌ت، نه‌ كانێ نادیا چ دبێژیت و چ دكه‌ت.
هه‌ر كه‌سێ های ژ نادیایێ و بزاڤێن وێ هه‌بیت باش دزانیت كو نادیا چێكریا (پ ك ك) یه‌، ڕێكخراوا وان یا بناڤێ (یه‌زدا) نادیا یا چێكری و هه‌ر ئه‌و ژی وێ بڕێڤه‌ دبه‌ن. نادیا تنێ په‌یكه‌ره‌كه‌، ئه‌و نه‌شێت ئێك پێنگاڤ بێی (پ ك ك ) پاڤێژیت، نه‌شێت ئێك په‌یڤ بێی وان باخڤیت. هه‌می تشتێن وێ (پ ك ك) بۆ ئاماده‌ دكه‌ت و ئه‌و وه‌ك رۆبۆته‌كی وان بجی تینیت.
ئه‌و بخۆ ئه‌ڤه‌ نه‌ جارا ئێكێ یه‌ نادیا ڤان هه‌لوێستا نیشا دده‌ت. ژ رۆژا نادیا چێكری و ئینایه‌ پێشو تاكو ئه‌ڤرۆ، وێ ئێك جار بتنێ ژی، په‌یڤا كورد و كوردستان ب لێڤ نه‌كریه‌.
وه‌كی ئه‌م دزانین د دیرۆكا مه‌ یا نێزیك دا چه‌ند چام (كاره‌سات) و ڕوودانێن مه‌زن ب سه‌رێ خه‌لكێ كوردستانێ هاتن و ئه‌و بوونه‌ به‌لگه‌ و ئه‌گه‌ر كو جیهان ل سه‌ر كوردان بده‌نگ بهێت و وان بپارێزیت و پشته‌ڤانیێ لێبكه‌ت. وه‌كی كیمیابارانا هه‌له‌بچه‌ و ئه‌نفالا ل ساڵا 1988، كۆچا ملیۆنی یا ساڵا 1991، شه‌ڕێ داعش و مێرخاسیا پێشمه‌رگێ كوردستانێ و جینۆسایدا شه‌نگالێ. ژ به‌ر هندێ ژی، (پ ك ك) و داگیركه‌رێن ل پشت وێ، ڕابوون ب چێكرنا ڤی فلمی دا كو مۆركا كورد و كوردستانی بوونێ ژ سه‌ر جینۆسایدا شه‌نگالێ ڕاكه‌ن و وێ به‌ره‌ڤ ئیراقی بوون و وونداكرنێ ڤه‌ ببه‌ن، دا كو ئه‌و ژی وه‌كی چامێن دی (كاره‌ساتێن دی) نه‌بیته‌ كارته‌كا دیا بهێز دده‌ستێ كوردستانێ دا ژ بۆ پشته‌ڤانیا ده‌رڤه‌ ژ بۆ پاراستنا كوردستانێ.
هه‌كه‌ وه‌سا نه‌بیت بۆچی دێ نادیا دێ حوكمه‌تا كوردستانێ ب تێكدانا ڕه‌وشا شه‌نگالێ گونه‌هباركه‌ت، دده‌مه‌كی دا كوردستانێ خوینا پتری 500 شه‌هیدان پێشكێشی ئاخا شه‌نگالێ كریه‌ تا كو ئه‌و رزگار كری. لێ (پ ك ك) ب هاریكاری و چاڤدێریا داگیركه‌رێن كوردستانێ ژ قه‌ندیلی د سه‌ر ئیران و سوریێ ڕا هاته‌ شه‌نگالێ و ل وێرێ ئاڵایێ كوردستانێ ئینانه‌ خوارێ و ل شوونا وی ئاڵایێ حه‌شدا وه‌حشی و ئیراقا ئه‌نفالان بلندكرن و ل دژی كوردستانێ و پێشمه‌رگێ وێ، ده‌ستێ خوه‌ كره‌ دده‌ستێ حه‌شدا وه‌حشی دا، یا كو ده‌ستێن وان بخوینا خه‌لكێ كوردستانێ دسۆرن و ئێزدیێن شه‌نگالێ جاره‌كا دی ئێخستنه‌ڤه‌ بن ده‌ستێ وێ حه‌شدا كو نیڤه‌كا وان ئه‌و داعشن یێن خه‌لكێ شه‌نگالێ قڕكرین و كچ و ژنێن وان برین.
ڤێجا هزرا خوه‌ بكه‌ن، ئه‌گه‌ر نادیا مرۆڤه‌كا گه‌له‌كا ساده‌ ژی با ما دا ل ده‌ڤ ترامپی گازندا ژ وێ كوردستانێ كه‌ت یا كو 500 شه‌هید داین بۆ رزگاركرنا شه‌نگالێ و ب سه‌دان ملیۆن دۆلار مه‌زاختین بۆ ڕزگاركرنا كچ و ژنێن ئێزدی، كو دهه‌مان ده‌م دا حكومه‌تا شه‌رعیا هه‌موو كوردستانێ یه‌ ژی، یان ژی دا گازندا ژ (پ ك ك) كه‌ت كو هێزه‌كا نه‌ شه‌رعی و بیانیه‌ و دسه‌ر سێ وه‌ڵاتان ڕا هاتیه‌ ده‌ستێ خوه‌ دایه‌ ده‌ستێ دوژمنێن شه‌نگالێ و كوردستانێ و ئێزدیێن شه‌نگالێ ئێخستینه‌ڤه‌ بن ده‌ستێ داعشا ب ناڤ حه‌شدا شه‌عبی؟؟!!
ل ڤێرێ دیار دبیت كو نادیا نه‌ تشته‌كه‌، ژ بلی رۆبۆته‌كی دده‌ستێ (پ ك ك) دا و ژبۆ بجی ئینانا ئارمانجێن وان و ئاغایێن وانێن داگیركه‌ر.
ژبه‌ر هندێ ئه‌ز دبێژم چ گونه‌ها نادیایێ نینه‌ وه‌ك كه‌س، چونكی ئه‌و بخوه‌ قوربانیا ده‌ستێ دوو تیرۆرانه‌، تیرۆرا داعش و تیرۆرا (پ ك ك).
ژ به‌ر هندێ ژی شوونا ئه‌م خوه‌ ب هێرشێن سه‌ر نادیایێ ڤه‌ گیرۆبكه‌ین، باشتره‌ ئه‌م هزر ل هندێ بكه‌ین كا چه‌وا دێ شێین ب باشترین شێوه‌ ڤێ جینۆسایدێ د به‌رژه‌وه‌ندیا كوردێن ئێزدی و كوردستانێ دا بكارئینین.

رزگار كێسته‌ى
• بنه‌مایێ سزا و پاداشت ژی بۆ هه‌ر وه‌ڵاته‌كی دینه‌مۆیه‌.
• دهۆك و به‌هدینان هێزا كۆماندۆیا پارتی و كوردستانێ یه‌.

رۆژا 12 گولانا 2018 د هه‌لبژارتنێن په‌رله‌مانێ ئیراقێ دا، خه‌لكێ كوردستانێ بنه‌مایێ سزا و پاداشت ب جوانی بكارئینا و هێزێن وه‌ڵاتفرۆش و بێ هه‌لوێست سزادان و هێزێن پارێزڤانێن گه‌ل و وه‌ڵات ژی پاداشت كرن.
ل گۆره‌ی ڤێ ڕێزبه‌ندیێ ژی پارتی دیمۆكراتی كوردستان بوو هێزا سه‌ركه‌فتیا ئێكێ ل كوردستانێ. ئه‌ڤه‌ ژی نیشانا گوهڕینه‌كا پۆزه‌تیڤ بوو.
لێ ژ ئالیه‌كی دیڤه‌، ئه‌ڤه‌ نابیته‌ نیشانا وێ چه‌ندێ كو پارتی یا بێ كێم و كاسی بوویه‌. نه‌خێر، پارتی ژی تێرا خوه‌ كێماتی هه‌نه‌. لێ خودان ده‌ركه‌تنا خه‌لكی یا ڤێ جارێ ل سه‌ر پارتی. ژبه‌ر هه‌لویستێن پارتی یێن نه‌ته‌وایه‌تی بوویه‌. به‌لێ ئه‌ڤه‌ نابیته‌ ڕامانا هندێ كو دڤێت پارتی ئێدی چاڤێن خوه‌ بنقینیت و بێژیت: تلیلییییی، ئه‌م سه‌ركه‌فتین، ئێدی كه‌س نه‌شێت مه‌ بشكێنیت. ژبه‌ر كو ئه‌گه‌ر مه‌ترسیێن ده‌رڤه‌یی ل سه‌ر كوردستانێ كێم ببن یان نه‌مینن، نه‌ دووره‌ چاوا ئه‌ڤرۆكه‌ خه‌لكێ كوردستانێ هێزێن دی سزادان، هه‌روه‌سا سوبه‌ پارتی ژی ل سه‌ر كێماتیێن وێ سزا بده‌ت.
ژ بۆ كو ئه‌ڤه‌ نه‌بیت و پارتی وه‌ك پێشه‌نگا پرسێن نه‌ته‌وایه‌تی، بێ ڕكابه‌ر ل كوردستانێ بمینیت جهێ باوه‌ریا خه‌لكی و هێشتا ژی بهێزتر بكه‌ڤیت، پێدڤیه‌ پارتی بێ گیرۆبوون و هه‌ر ئێكسه‌ر نوها ده‌ست پێبكه‌ت به‌رنامه‌یه‌كی ڕێكوپێك دانیت و هه‌موو ئارێشێن هه‌ین، كو دبن كۆنترۆلا وێ دا نه‌، چاره‌سه‌ر بكه‌ت. چونكی خه‌لكێ كوردستانێ چاڤه‌ڕێی پاداشتی یه‌ به‌رامبه‌ر ڤی كارێ مه‌زنێ وان بۆ پارتی و كوردستانێ ل رۆژا 12 گولانێ ئه‌نجامدای.
ل ڤێرێ ژی دێ چه‌ند خاله‌كا به‌رچاڤكه‌ین، یێن كو فه‌ره‌ پارتی وان بله‌ز بجبی بینیت:
1- چاكسازی: ڕاسته‌ به‌ری چه‌نده‌كێ جه‌نابێ سه‌رۆك بارزانی پرۆگرامێ چاكسازیێ ده‌ست پێكربوو، لێ دیاره‌ ئه‌ڤ پرۆسه‌یه‌ گه‌له‌ك هێدی و لاوازا بڕێڤه‌ دچیت و هێشتا ب هزاران عه‌فریت و مافیا یێ پلیپتانێ ب مالێ خه‌لكی دكه‌ن، بێی كو ئێك بێژیتێ (من این لك هژا)، ته‌ ئه‌ڤه‌ ژ كووڤه‌ ئینایه‌. ژ به‌ر هندێ پێدڤیه‌ ئه‌ڤ پرۆسه‌یه‌ بهێز بكه‌ڤیته‌ كاری و د نێزیكدا ئه‌م پێنگاڤێن پراكتیك ببینین.
2- دادپه‌روه‌ری: هه‌موو خه‌لكێ كوردستانێ ژ ئازادیا كوردستانێ مفادار بوویه‌. لێ ژ هه‌ژارێ هه‌ری كێم بگره‌ تا كو دگه‌هیته‌ ملیاردرێری، هه‌موو دنه‌ڕازینه‌ و چیێ تۆ ڤه‌لیڤینی كۆمه‌كا گازندا یا هه‌یی. ئه‌ڤه‌ ژی ژ ئه‌گه‌رێ نه‌داداپه‌روه‌ریێ یه‌.
ب هزاران خه‌لكێ هه‌ی رۆژێن سه‌خت مال و خوینا خوه‌ یا گۆری ڤی وه‌ڵاتی كری و ئه‌ڤرۆكه‌ ژی بێ خودان و بێ پسیار كه‌فتینه‌ د كۆلكه‌كی ڤه‌، كه‌س ژی لێ ناپرسیت. لێ خه‌لكه‌كی دی یێ هه‌لپه‌ره‌ست ل سه‌ر حسابا وی یێ دخۆت و قه‌له‌و دبیت. ب هزاران خه‌لكێ زانا و شاره‌زا مه‌ یێن هه‌ین، لێ گه‌له‌ك كه‌سێن بكێرنه‌هاتی و نه‌شاره‌زا و دز هاتینه‌ دانان ل جهێن بلند، بڕێیا مرۆڤكانێ و هه‌ڤالینی و گرۆپانێ و به‌رژه‌وه‌ندیێن كه‌سایه‌تی.
كه‌رتێن ساخله‌می و په‌روه‌ردێ، كو بنیاتێ وه‌ڵاتانه‌، ل وه‌ڵاتێ مه‌ هاتینه‌ پاشگوهڤه‌ هاڤێتن. هوون دزانن بۆچی؟ چونكی هندی به‌رپرس و زه‌نگینه‌ك هه‌یی، ئه‌گه‌ر سه‌رێ كوڕێ وان ژی ئێشا، رۆژا پاشتر یێ ل ڤیه‌ننا یان به‌رلینێ، د ده‌مه‌كی دا كو هه‌ژار ژی خانیێ خوه‌ دفرۆشن دا زارۆكێ خوه‌ نه‌رشته‌گه‌رى بكه‌ت، یان ده‌رمانان بۆ بكڕیت. هندی زه‌نگین و به‌رپرسه‌ك هه‌یی زارۆیێن هه‌میان یێ ل قوتابخانێن تایبه‌ت و ئینگلیزی. قوتابخانێن حكومی ژی یێن ماین ته‌نێ بۆ زارۆیێن هه‌ژاران. پێدڤیه‌ سیسته‌مه‌كا داداپه‌روه‌رانه‌ بێته‌ دانان، كو نه‌خوه‌شێن مه‌ هه‌میان پێكڤه‌ ل جهه‌كی بێنه‌ چاره‌سه‌ركرن، ڤێجا چ ل به‌رلینێ بیت چ ل دهۆكێ. زارۆیێن مه‌ هه‌میان ژی ل هه‌مان قوتابخانه‌ و هه‌مان سیسته‌م بخوینن، چ حكومی و چ تایبه‌ت.
كارمه‌ند و پێشمه‌رگه‌ مووچێ وان تێرا نیڤا مه‌هێ ناكه‌ت، لێ ب هزاران زه‌نگین و خه‌لكێ نه‌ ژهه‌ژی ب پله‌یێن بلندێن له‌شكری و مه‌ده‌نی هاتینه‌ خانه‌نشین كرن، ل سه‌ر حسابا خه‌لكێ دی.
كوڕێن به‌رپرس و زه‌نگینا هه‌ڕۆژ لێگززه‌كێ دگۆهۆڕن، كور و زارۆیێن بسه‌دان خه‌باتكه‌را ژی هه‌رشه‌ڤ ب كول و مه‌ره‌قێن تومبێله‌كا نۆرمال سه‌رێ خوه‌ ددانن و ته‌نێ وان دخه‌ونێ دا دبینن.
ب هزاران كه‌س ل ماڵێن خوه‌ دپاڵداینه‌ و ژ چه‌ند ڕه‌خاڤه‌ ژ پارتی و حوكمه‌تێ دمفادارن و بهزاران خه‌لكێ دی ژی شه‌ڤ و رۆژا دكه‌نه‌ ئێك ژبۆ سه‌ركه‌فتنا پارتی، لێ هزره‌تا وان ئه‌وه‌ ته‌نێ مه‌هه‌كێ مووچێ وان تێرا وان بكه‌ت.
ژ بۆ چاره‌سه‌ركرنا ڤێ ژی پێدڤیه‌ پارتی پێداچوونه‌كا بله‌ز بخۆ دا بكه‌ت و ده‌ست پێبكه‌ت ڤێ بێدادیا كرێت چاره‌سه‌ر بكه‌ت و ل خه‌لكێ خوه‌ یێ هه‌ژار و خه‌باتكه‌ر خودان ده‌ركه‌ڤیت و سنووره‌كی بۆ دز و گه‌نده‌لا دانیت.
3- ل هه‌موو وه‌ڵاتان ده‌ما حزبه‌ك ده‌سه‌ڵاتێ وه‌ردگریت، كادرێ خوه‌ د ئێخیته‌ د ناڤ جۆمگێن گرنگێن ده‌وله‌تێ و حوكمه‌تێ دا. لێ پارتی تا نوهه‌ كادرێ خوه‌ هه‌ر هێلایه‌ دجی دا و پله‌ و كارێن بلند بخێرا خوه‌ دانه‌ خه‌لكه‌كی دی، یان ژی دانه‌ وان كه‌سان یێن بۆ پله‌ و پایا بووینه‌ پارتی. پارتی دڤێت ئێدی ب رژدی ل كادر و دلسۆزێن خوه‌ خودان ده‌ركه‌ڤیت، چونكی ئه‌ون یێن ل رۆژێن ته‌نگاڤ ل پارتی خودان ده‌ردكه‌ڤن و پارتی سه‌رفراز دكه‌ن.
4- بنه‌مایا سزا و پاداشت: مخابن تا نوها كه‌سه‌كی باشی كربیت، كه‌سێ نه‌گۆتیێ ده‌ستێ ته‌ خوه‌ش و كه‌سه‌كی دی ژی خرابی و دزی كربیت، كه‌سێ نه‌گۆتیه‌ وی ژی، ته‌ بۆچی ئه‌ڤه‌ كریه‌. ژبه‌ر هندێ ژی ئێدی ل ڤی وه‌ڵاتێ مه‌ وه‌لێهاتیه‌ كو دزی و گه‌نده‌لی ب زیره‌كی و شاره‌زایی بهێته‌ بناڤكرن و ده‌ستپاكی ژی ب خشیمی و نه‌زانی بهێته‌ بناڤكرن. هه‌لبه‌ت بنه‌مایێ سزا و پاداشت ژی بۆ هه‌ر وه‌ڵاته‌كی وه‌كی دینه‌مۆیه‌ و گاڤا ئه‌ڤ دینه‌مۆیه‌ هاته‌ ڤه‌مراندن ئێدی سیسته‌م هه‌می دێ ژ كاركه‌ڤیت.
ژبه‌ر هندێ دڤێت پارتی ئێدی خرابێ خوه‌ سزا بده‌ت و باشێ خوه‌ ژی پاداشت بكه‌ت.
5- كورسی و پله‌یێن مه‌ ب خێرا خوه‌ نه‌ده‌نه‌ خه‌لكی: تا نوها گه‌له‌ك جاران پارتی ژ بۆ به‌رژه‌وه‌ندیا گشتی یا كوردستانێ، چ ل په‌رله‌مانی و چ ژی ل حوكمه‌تێ، كورسی و پله‌یێن خوه‌ داینه‌ حزب و ڕێخستنێن دی یێن كوردستانی، دا كو كورد ببنه‌ ئێك هێز و ئێك ده‌نگ، لێ مخابن وان ئه‌و كورسی و پله‌ ل دژی پارتی و كوردستانێ بكارئیناینه‌. ژبه‌ر هندێ پێدڤیه‌ پارتی ئێدی چ خێرا ب كورسی و پله‌یێن خوه‌ نه‌كه‌، نه‌ ل كوردستانێ و نه‌ژی ل ئیراقێ.
6- پووته‌دان ب گه‌نجان: وه‌ك ئه‌م هه‌می دزانین گه‌نج هێزا هه‌ری كاریگه‌رن ل دناڤ وه‌ڵاتان ده‌، لێ مخابن تا نوها ب شێوه‌یه‌كی مۆده‌رن و زانستی ئه‌م نه‌شیاینه‌ مفای ژ هێزا گه‌نجێن خوه‌ ببینین و هه‌ما بێژه‌ مه‌ ئه‌و یێن پاشگۆهڤه‌ هاڤێتین. ژبه‌ر هندێ گرنگه‌ پارتی ل گۆره‌ی پرۆگرامه‌كی مۆده‌رن و پێشكه‌فتی گه‌نجێن كوردستانێ و ب تایبه‌ت یێن پارتی بێخیته‌ د ناڤ ژیانا سیاسی و ئیداری و زانستی دا و مفای ژ هێزا وان وه‌رگریت.
7- بلا به‌رپرس ده‌رگه‌هێن خوه‌ ڤه‌كه‌ن: مخابن هه‌ر به‌رپرسه‌كی مه‌ ل پشت حه‌فت ده‌رگه‌ و سكرتێر و په‌رژانان خوه‌ ل مه‌ ڤه‌شارتیه‌ و مرادا خه‌لكی دیتنا به‌رپرسانه‌. ئه‌ز دبێژم ئێدی به‌سه‌. وان ده‌رگه‌ و په‌رژانان بشكێنن و وه‌رنه‌ ناڤا خه‌لكی و گوهداریا ئێش و ژانێن خه‌لكی بكه‌ن. هوون ژ ڤی خه‌لكینه‌ و هه‌ر بهێز و ده‌نگێ ڤی خه‌لكی ژی هوون بووینه‌ خودان پله‌ و كورسی. ئێدی ڤی دیواری ژ ناڤبه‌را خوه‌ وخه‌لكی ڕاكه‌ن، چونكی ئه‌ڤه‌ ئه‌و خه‌لكه‌ یێ هوون سه‌رفراز كرین.
8- دهۆك گونه‌هه‌: ئه‌ز چ جاران نه‌مرۆڤه‌كی ده‌ڤه‌رپرێسم و هه‌رده‌م من وه‌ك كه‌سه‌كی كوردستانی هزركریه‌. لێ دیسا ژی هنده‌ك تشتێن هه‌ین گرنگه‌ مرۆڤ ئاماژێ پێ بده‌ت. رۆلێ پارێزگه‌ها دهۆكێ و خه‌لكێ به‌هدینان ب گشتی، چ د هه‌ردو شوڕشێن ئه‌یلۆل و گولانێ دا و چ د سه‌رهه‌لدان و شه‌ڕێ داعش دا و چ ژی دپاراستنا ئارامی و ئاسایشێ دا، ئه‌ز دشێم بێژم هه‌رده‌م ئێكه‌م بوویه‌ ل سه‌ر ئاستێ كوردستانێ. ئه‌ز دشێم بێژم دهۆك و به‌هدینان وه‌ك هێزه‌كا كۆماندۆیا پارتی و كوردستانێ یه‌. هه‌رده‌مێ پارتی و كوردستان كه‌فتنه‌ د ته‌نگاڤیه‌كێ دا خه‌لكێ به‌هدینان یێ ل مه‌یدانێ ژ بۆ ڕزگاركرن و سه‌فرازكرنا پارتی و كوردستانێ. ئه‌ڤ هه‌لبژارتنه‌ ژی نموونه‌یه‌كا دیا ئاخفتنا مه‌نه‌. لێ مخابن هه‌رده‌م دهۆك وه‌ك باژێر و وه‌ك پارێزگه‌، ئه‌و گرنگیا ژ هه‌ژی وێ پێ نه‌هاتیه‌ دان و مافێ وێ هاتیه‌ خوارن یان دایه‌ پارێزگه‌هێن دی. ژبه‌ر هندێ پێدڤیه‌ پارتی و حوكمه‌تا كوردستانێ ڤێ جارێ ب رژدی ل ده‌ڤه‌را به‌هدینان ڤه‌گه‌ڕیت و چاڤێ خوه‌ بده‌تێ. چونكی ئه‌ز باوه‌ر دكه‌م ئه‌گه‌ر نیڤه‌ك خزمه‌تا بۆ هه‌ولێرێ هاتیه‌ كرن بۆ دهۆكێ هاتبا كرن، نه‌ 10 كورسیا به‌لێ هه‌ر 11 كورسیا پارتی دا ل دهۆكێ ئینیت.
9- بازاڕێ كڕینا خه‌لكێ لایه‌نێن دی: مخابن خه‌لكه‌كێ ل كوردستانێ په‌یدا بووی، هه‌ر جارا بوونه‌ هه‌لبژارتن بازاڕێ وان گه‌رم دبیت و خوه‌ ژ ڤێ حزبێ دفرۆشنه‌ یا دی بۆ پاره‌ و پله‌ و ده‌ستكه‌فتا. هه‌لبه‌ت ئه‌ڤه‌ ژی كاریگه‌ریه‌كا گه‌له‌ك خراب ل سه‌ر كادر و لایه‌نگرێ پارتی دكه‌ت. ئه‌ز هیڤیدارم پارتی واز ل ڤێ یاریێ بینیت و شوونا خه‌لكێ بێسه‌روبه‌ر ژ حزبێن دی بكڕیت، بلا وێ مه‌سره‌فێ ل كادر و ئه‌ندام و لایه‌نگرێ خوه‌ یێ دلسۆز بكه‌ت.
10- نه‌بوونا هه‌ڤسه‌نگیا حزبی و حكومی: بۆ نموونه‌ لگۆره‌ی وێ خزمه‌تا پارتی و حوكمه‌تا كوردستانێ بۆ هه‌ولێرێ كری، پێدڤی بوو چ جاران كورسیێن پارتی ل هه‌ولێرێ ژ 11-12 نه‌هاتبانه‌ خوارێ. لێ ب دیتنا من دده‌مه‌كی دا كو پارتی ئه‌ڤ خزمه‌ته‌ هه‌می بۆ ڤی باژێڕی كری، پارتی نه‌شیایه‌ ژ لایێ حزبیڤه‌ ڤێ خزمه‌تێ وه‌به‌رهێنیت. ئه‌ڤه‌ ژی ڤه‌دگه‌ڕیت بۆ لاوازیا وان به‌رپرسێن حزبی یێن پارتی ل هه‌ولێرێ كو نه‌شیاینه‌ بزاڤ و كارێ خوه‌ یێ حزبی بلند بكه‌ن بۆ ئاستێ وان خزمه‌تگوزاریێن پارتی بۆ ڤی باژێڕی كرین.
به‌رۆڤاژی ڤێ، گه‌له‌ك جارا ئه‌م وه‌ك پارتی ل به‌هدینان باجا شاشیێن حوكمه‌تێ ل به‌هدینان دده‌ین و ده‌نگێن مه‌ كێم دبن.
ژ به‌ر ڤێ چه‌ندێ پێدڤیه‌ پارتی هزر د ڤێ چه‌ندێ دا بكه‌ت كو ل هه‌موو پارێزگه‌هان كارێ حزبی و حوكمی هه‌ڤسه‌نگ بكه‌ت. كادرێن حزبی و حكومی یێن لاواز بگوهڕیت ب یێن چالاك و ژێهاتی.
11- ده‌ركه‌ڤنه‌ ناڤ خه‌لكی: مخابن سیسته‌ما مه‌ یا پارتی یا وه‌ل مه‌ كری، كو ژ بلی ده‌مێ هه‌لبژارتنان ئه‌م و خه‌لك هه‌ڤدو نابینین. ڤه‌كرنا ڤان هه‌موو باره‌گا و نڤیسینگه‌هان یا وه‌ل مه‌ كری هندی كادره‌ك مه‌ هه‌ی د ڤان باره‌گاڤه‌ مه‌ یێن ل پشت مێزا ئاسێ كرین و رۆژانه‌ دمژوولن بكارێن بیرۆكراتی و رۆتینێن بێ مفاڤه‌ و مه‌ های ژ ئێش و ژانێن خه‌لكێ خوه‌ نه‌مایه‌. ب دیتنا من ئه‌ڤ باره‌گایه‌ ب ئێكجاری بهێنه‌ كێمكرن و كادرێن مه‌ یێن چالاك و باش د ناڤ حوكمه‌تێ و هه‌می جۆمگێن ده‌وله‌تێ دا بهێنه‌ به‌ڵاڤكرن ب ڕێیا دامه‌زراندن و مه‌كانیزمێن دی. هۆسا دێ چێتر مه‌ های ژ خه‌لكێ خوه‌ هه‌بیت و دێ شێین پتر خزمه‌تا وان كه‌ین.
ب دیتنا من ئه‌گه‌ر پارتی ڤان خالان و گه‌له‌ك خالێن دی یێن كێماسیێن خوه‌ چاره‌سه‌ر بكه‌ت، ئێدی خه‌لك ژی دێ گارانتیێ ده‌ته‌ پارتی كو، نه‌ته‌نێ پارتی دێ مینیت هێزا ئێكێ ل كوردستانێ، به‌لكی گرۆپ و هێزێن دی ژی دێ ڤه‌ڕویشن و كتكته‌ هێنه‌ ناڤا پارتی، كو پارتی جاره‌كا دی ببیته‌ڤه‌ ئه‌و هێزا ئێكانه‌ یا رۆژانێن سه‌رده‌مێ بارزانیێ نه‌مر و شۆڕه‌شا ئه‌یلۆلێ.

من چه‌ند ئاخفتنێن بالكێش یێن هنده‌ك پشكداران وه‌رگرتینه‌ و ل ڤێرێ پێشكێشی وه‌ دكه‌م
1.رێزدار نێچیرڤان بارزانی سه‌رۆكێ حوكمه‌تا كوردستانێ پشتی په‌یڤا خوه‌ پێشكێشكری حه‌مه‌ی حاجی مه‌حموود سه‌كرتێرێ پارتیا سۆسیال ده‌مۆكراتا كوردستان و عرفان عه‌بدولعه‌زیز رابه‌رێ بزۆتنه‌وه‌یا ئیسلامی یه‌ك یه‌ك گازی كرنه‌ سه‌ر كورسیێ كو هه‌ر یه‌ك ژ وان ئاخفتنه‌كێ بكه‌ و كاك نێچیرڤان بخوه‌ ژی پێشكێشكاری بۆ وان كر و ڤێ چه‌ندێ ژی كه‌ش و هه‌وایه‌ك خوه‌ش دا كۆنفه‌رانسێ.
2.رێزدار مه‌سرور بارزانی شێوردارێ ئه‌نجومه‌نێ ئاسایشا كوردستانێ ((گه‌له‌ك كه‌س دبێژن ریسكه‌كه‌ مه‌زنه‌ ئه‌م نها سه‌رخوه‌بوونێ راگه‌هینن، ئێ ده‌باشه‌ ژ خوه‌ ده‌ما دوژمنێن مه‌ ئه‌م ئه‌نفالكرین مه‌ داخوازا سه‌رخوه‌بوونێ نه‌كربوو لێ ئه‌م قركرن، كه‌واته‌ ریسكا بنده‌ستیێ مه‌زنتره‌ ژ یا سه‌رخوه‌بوونێ)).
((ئه‌رێ چما ده‌ما سه‌دام ئه‌م ئه‌نفالكرین چ ده‌وله‌تان ده‌نگ خوه‌ نه‌كر لێ ده‌ما كوێت داگیركری هه‌موو جیهان د هه‌وارا كوێتێ هات؟ چونكی كوێت ده‌وله‌ت بوو و ئه‌م نه‌. چونكی ئێكه‌تیا نه‌ته‌وان و سیسته‌ما جیهانی ده‌وله‌تان دپارێزن نه‌كو مڵه‌تان)). ((كورد هه‌كه‌ نها بریارا خوه‌ نه‌دن دڤێت هه‌تا هه‌تایێ گازندێ ژ خوه‌ بكن نه‌ ژ كه‌سێ دن)).
٣. زه‌لمای خه‌لیلزاد بالیۆزێ به‌رێ یێ ئه‌مریكا ل عیراقێ ((گه‌لی كوردا بریارا سه‌رخوه‌بوونا خوه‌ بدن هوون پێدڤی ب رازیبوونا چ وه‌لاتان نینن)).
٤. پرۆفسۆر ئیسماعیل به‌شیكچی سۆسیۆنۆم و نڤیسه‌رێ تورك ((سنوورێن عیراق و تركی عه‌ره‌ب و تركا ژ هه‌ڤ جودا ناكه‌ لێ كوردا و كوردا ژ هه‌ڤ جودا دكه‌. هه‌روه‌سا سنوورێن سووریا و تركی و ئیران و ترك و ئیران و عیراق ترك و عه‌ره‌بان یان عه‌ره‌ب و فارسان ژ هه‌ڤدوو جودا ناكه‌ لێ ئه‌و سنوور ته‌ڤ ته‌نێ كورد ژ هه‌ڤ ڤه‌قه‌تاندنه‌ و وان ژ هه‌ڤ جودا دكه‌. پارچه‌ كرنا كوردستانێ هه‌ر وه‌كی وێیه‌ تۆ مه‌ژیێ كه‌سه‌كی بكی چار پارچێن ژ هه‌ڤ قه‌تاندین)). (( هه‌تا كۆ كورد بێ ده‌وله‌ت بن دڤێ ئه‌و چاڤه‌رێی گه‌له‌ك قركرنێن دن ژی بن)). (( ده‌ما كو وه‌ كوردان دڤێ بریارا سه‌رخوه‌بوونا خوه‌ بدن دڤێ هوون هزر د وێ ده‌ نه‌كن كانێ ده‌وله‌تێن دن چاوا ل سه‌ر ڤێ مه‌سه‌لێ هزر دكن)). ((بریار ته‌نێ د ده‌ستێ كوردان بخوه‌ دایه‌ هه‌كه‌ وان بڤێت ببنه‌ ده‌وله‌ت دێ ببنێ ژ خوه‌ هه‌كه‌ نه‌ڤێت ژی نابن)).
٥. د. به‌رنارد كۆشنه‌ر وه‌زیرێ ده‌رڤه‌ یێ فه‌ره‌نسا یێ به‌رێ ((پازده‌ ساله‌ ئه‌ز چاڤه‌رێی وێ چركه‌یێ مه‌ ئا كۆ سه‌رخوه‌بوونا كوردستانێ تێده‌ تێ راگه‌هاندن)).
٦. د. پیته‌ر گالبرێت بالیۆزێ به‌رێ یێ ئه‌مریكا ل كرواتیا ((گه‌له‌ك كه‌س ته‌نێ باس ل وێ یه‌كێ دكن كۆ راگه‌هاندنا سه‌رخوه‌بوونا كوردستانێ مه‌ترسی تێدا هه‌یه‌، لێ نزانم ئه‌و چما باس ل مه‌ترسیا مانا كوردان ل گه‌ل عیراقێ ناكن؟!)). ((ئه‌گه‌ر كو وه‌ كوردان سه‌رخوه‌بوون دڤێ چما ئاها نوها هوون وێ بریارێ نادن؟ ژ به‌ر كو ئه‌ڤ ده‌م باشترین ده‌مه‌ ژبۆ ڤێ بریارێ)). ((د هه‌موو دیرۆكا كوردان دا نها فره‌هترین ده‌رگه‌هێ سه‌رخوه‌بوونێ هه‌یه‌ بۆ كوردان لێ كوردان پێدڤی ب ئیراده‌كا ب هێز هه‌یه‌ كو د وی ده‌رگه‌هی را ده‌رباز ببن)).
٧. جه‌نگیز چاندار رۆژنامه‌ڤان و شیره‌تكارێ تورگۆت ئۆزال سه‌رۆكێ به‌رێ یێ تركی ((هه‌كه‌ كورد نها بریارا سه‌رخوه‌بوونا خوه‌ نه‌دن وێ خه‌لكێ دن بریارێن خوه‌ ل سه‌ر وان بدن)).
٨. د. فوئاد حوسێن سه‌رۆكێ دیوانا سه‌رۆكاتیا كوردستانێ ((ل گه‌ل گوهۆرینا ده‌می قانوونێن نێڤنه‌ته‌وه‌یی ژی هاتنه‌ گوهارتن، به‌رێ دۆزا كوردان وه‌ك دۆزه‌كا ناڤخوه‌ یا وه‌لاتێن داگیركه‌رێن كوردستان دهاته‌ دیتن لێ ئیرۆ ئه‌ڤ دۆزه‌ وه‌ك دۆزه‌كا نه‌ته‌وه‌یی تێ دیتن)). ((ستاتۆیا كوردستانێ د پراكتیكێ دا نها وه‌ك ده‌وله‌تێیه‌ و ل سه‌ر وی بنگه‌هی ژی دانووستاندن لگه‌ل تێ كرن، لێ ته‌نێ ئالا و نوونه‌رێ مه‌ ل ئێكه‌تیا نه‌ته‌وان نینه‌)). ((هه‌كه‌ ل گه‌ل به‌غدا گه‌هشتینه‌ ئه‌نجامه‌كی سه‌رخوه‌بوونا كوردستانێ دێ ئاسانتر به‌ لێ نه‌ مه‌عنا وی چه‌ندێ یه‌ كو ئه‌گه‌ر به‌غدا رازی نه‌به‌ ئه‌م بریارا خوه‌ نادن. دیسا دڤێت ئه‌م ل گه‌ل ئیران و تركی ژی دانووستاندنان بكن)).

ژ بیره‌وه‌ریێن شۆرشا گولانێ
زستانا 1982 بوو، ئه‌ز وی ده‌می كادرێ سیاسی بووم سه‌ر ب باره‌گایێ ل. ن. ئامێدیێ ڤه‌، دوو سێ رۆژ بوو به‌رپرسێن له‌شكه‌ری مژوولی بزاڤه‌كێ بوون، پاشی دیاربوو كو ئارمانج گرتنا بنگه‌هێن دوژمنی یه‌ ل سه‌رێ حه‌مێ(1 ) كو باره‌گایێ سریا له‌شكه‌ری وجهه‌كی گرنگ بوو، هه‌روه‌سا ئارمانجێن دی ژی ل گه‌ل گرتنا سه‌رێ حه‌مێ لێدانا لیوا بێگۆڤا و چه‌په‌رێن دوژمنی ل چه‌قه‌لا و بازیڤێ و بێگۆڤا و ناڤبه‌را چه‌لكێ و كێسته‌ بوون، كو دبوو چالاكیه‌كا گه‌له‌ك به‌رفره‌. چه‌كێ من وی ده‌می ته‌نێ ده‌مانجه‌یه‌كا نومره‌ 7 بوو و ئه‌و ژی بكێر شه‌ره‌كی وه‌سا نه‌دهات، ژ به‌ر هندێ من كلاشینكۆفا هه‌ڤالێ خوه‌ قادر كانی مه‌زنی ژێ وه‌رگرت و بریار دا كو ئه‌ز ژی پشكداریێ د گه‌ل هێزا هێرشكه‌ر دا بكه‌م.
ل رۆژا 14/12/1982 پشتی نیڤرۆ ئه‌م ژ گه‌لیێ بازێ باره‌گایێ ل. ن. ئامێدیێ به‌ره‌ڤ رۆژاڤا ڤه‌ بۆ گوندێن كانی به‌لاڤێ، بابیرێ و گه‌ره‌گو برێكه‌فتین. پشتی ئێڤاری ئه‌م ل وان هه‌رسێ گوندان به‌لاڤ بووین و مه‌ شیڤ خواری، هه‌ر گرۆپه‌ك ل وی گوندێ لێ ل جهه‌كی كۆمبوون تا كو ده‌مژمێر 1 شه‌ڤێ و پاشی هه‌ر ئێك ژ جهێ خوه‌ به‌ره‌ڤ جهێ بركه‌فتنێ ڤه‌ چوون، جهێ كۆمبوون و رێكه‌فتنێ ژی شكه‌فته‌ ره‌شێ هاتبوو ده‌ستنیشانكرن یا كو دكه‌ڤیته‌ به‌ر خابووری ناڤبه‌را هه‌ردوو گوندێن بابیرێ و رێوانێ دا. پشتی ‌هێزا مه‌ هه‌موو كۆمبووی مه‌ ده‌ستپێكر ئه‌م ژ وێرێ برێكه‌فتین دا كو ل ده‌ڤه‌را چه‌قه‌لا ل رێكا بێگۆڤا- كانیماسێ ده‌ربازببین به‌ره‌ڤ گه‌لیێ هرۆرێ كو دكه‌ڤیته‌ باكوورێ سه‌رێ حه‌مێ.
ده‌مێ ئه‌م ل ئاسته‌نگا شكه‌فته‌ره‌شێ ده‌ربازدبووین هێسترا مه‌ یا كو چه‌كێ مه‌ یێ دۆشكا ‌ لێ هاتبوو باركرن ب بارێ خوه‌ڤه‌ ژ ئاسته‌نگێ ڤه‌ره‌ست و كه‌فته‌ دگه‌ڕا ئاڤا خابووری دا. ب ده‌ستهه‌لی و چه‌له‌نگیا كۆمه‌كا پێشمه‌رگا پشتی وه‌ستیانه‌كا زۆر ئه‌م شیاین هێسترێ و دۆشكایێ هه‌ردوویا ژمرن و ژناڤچوونێ قۆرتال بكه‌ین و ژ خابووری ده‌ربێخین. لێ تاكو هه‌ردوو ژ ئاڤێ هاتینه‌ ده‌رێخستن و ل وێ تاریا شه‌ڤێ دۆشكا هاتیه‌ پارچه‌ پارچه‌كرن و لگه‌ل گوللێن وێ هه‌موو هاتینه‌ زوهاكرن و جاره‌كا دی لێكداین و باركرینه‌ڤه‌، ئێدی مه‌ هند ده‌مێ شه‌ڤێ نه‌ما كو تێرا مه‌ بكه‌ت ئه‌م ده‌ڤه‌را دبن كۆنترۆلا دوژمنی دا ببڕین و خوه‌ بگه‌هینینه‌ هشارێ ل گه‌لیێ هرۆرێ. ژ به‌ر هندێ ژی بڕیار هاته‌دان كو به‌ری رۆناهی بكه‌ڤیته‌ ئه‌ردی ئه‌م خوه‌ به‌لاڤ كه‌ین و هه‌ر 2-3 پێشمه‌رگه‌ دناڤ ته‌راشه‌كێ یان هه‌ڤرسته‌كێ را ل چه‌میكی ( جهێ رووبارێ نهنهكی تێته‌ سه‌ر خابووری ) خوه‌ هشارده‌ن و تا ئێڤاری ب وی نانێ لگه‌ل وان دا ئیدارا خوه‌ بكه‌ن. هه‌لبه‌ت ئه‌ڤ جهه‌ ژی گه‌له‌ك نێزیكی چه‌په‌رێن دوژمنی و لیوا دوژمنی یا بازیڤێ ( بیگۆڤا ) بوو.
ئه‌ز نزانم كانێ دوژمنی وێ رۆژێ هه‌ست ب هه‌بوونا وێ هێزا پێشمه‌رگه‌ی كربوو ل وێ ده‌ڤه‌رێ یان ژی خنزه‌كی سیخۆر ژ وان ده‌ڤه‌ران نووچه‌یه‌ك ب به‌رگوهێن دوژمنی ئێخستبوو، ژ به‌ر كو وێ رۆژێ هه‌ر ژ ده‌مژمێر 8 سپێدێ تا كو تاری كه‌فتیه‌ ئه‌ردی به‌رده‌وام 3-4 هه‌لیكۆپته‌ر ل هنداڤی سه‌رێ مه‌ دچه‌ورین، ژ به‌ر هندێ ژی وێ رۆژێ ژ سپێدێ تا كو ئێڤاری خوارن، بێڤه‌دان و ده‌ستاڤا هه‌ر پێشمه‌رگه‌یه‌كی دناڤ وێ ته‌ڕاشێ یان هه‌ڤرستێ رابوو یا كو سپێدێ بخۆ كریه‌ هشارو ب چ شێوا ده‌ركه‌فتن نه‌بوو.
ژبه‌ر كو نانێ دانه‌كی تنێ ل گه‌ل مه‌ بوو ئه‌م نه‌چار بووین پشتی تاری كه‌فتیه‌ ئه‌ردی بزڤرینه‌ڤه‌ گوندێن گه‌ره‌گوهێ و بابیرێ بۆ شیڤێ. لێ ڤێ جارێ هه‌ر پشتی شیڤێ ئێكسه‌ر ئه‌م ژ وان گوندان ده‌ركه‌فتین و برێكه‌فتین. ڤێ جارێ ئه‌م بێ ئارێشه‌ ل ئاسته‌نگێ ده‌ربازبووین و ل چه‌قه‌لا مه‌ جادا بێگۆڤا-كانیماسێ بڕی و پشتی ئه‌م كه‌فتینه‌ باكوورێ باره‌گایێ لیوا دوژمنی یا بێگۆڤا و به‌ره‌ڤ ده‌ڤه‌را هرۆرێ ڤه‌ چووین، ل ناڤ كه‌ڤنه‌ ره‌زێن چه‌لكیا ل خوَشانكێ هرچه‌كا كو ل وان ره‌زا ل پاشمایێن تری دگه‌ریا، ژ به‌ر پێشمه‌رگا خراب بوو و ره‌به‌نێ نه‌ دزانی رێزا پێشمه‌رگه‌ی هندا درێژه‌ و تا كو سه‌ر جادێ هه‌ر 50 مترا جووته‌كێ پێشمه‌رگا یێ تێت. هرچا مه‌ ژووردا خراب بوو و كه‌فته‌ ناڤ رێزا پێشمه‌رگه‌ی و كه‌س ژی نه‌شێت ته‌قێ لێ بكه‌ت ژ به‌ر كو چاردۆرێن مه‌ بنگه‌هێن دوژمنی نه‌ و دڤێت ب چ شێوه‌یا هه‌ست ب هه‌بوونا مه‌ ل وێرێ نه‌كه‌ت.
به‌رێ سپێده‌یا 15/12/1982 هێشتا رۆناهی باش نه‌كه‌فتیه‌ ئه‌ردی مه‌ خوه‌ گه‌هانده‌ گه‌لیێ هرۆرێ و هشاره‌ك په‌یداكر. هه‌رچه‌نده‌ بنگه‌هێ سه‌رێ حه‌مێ یێ كو ئارمانجا چالاكیا مه‌ بوو دكه‌فته‌ هنداڤی مه‌ كو نوها ئه‌م یێن ل پشت زڤرین و خوه‌ ل باكوورێ چه‌په‌رێن دوژمنی هشاردایه‌، لێ هه‌م جهێ مه‌ پچه‌كێ نه‌په‌نی بوو و هه‌م ژی مه‌ بێ ده‌نگ و پێژن تا كو ئێڤاری خوه‌ د وێرێ را هشار دا.
ژ هه‌ژی گۆتنێ یه‌ كو سه‌رێ حه‌مێ جهه‌كی گه‌له‌ك گرنگ و ستراتیژیه‌ ژ ئالیێ له‌شكه‌ری ڤه‌ و ژ باشوور ڤه‌ ژ‌ هنداڤی باره‌گایێ لیوا بێگۆڤا درێژ دبیت تاكو هنداڤی گوندێن گركا و قومریێ وژ ئالیێ باكوور ژی ڤه‌ دكه‌ڤیته‌ هنداڤی گه‌لیێ هرۆرێ. گرنگیا ڤی جهی د وێ چه‌ندێ دا بوو ژ ئالیه‌كی ڤه‌ باره‌گایێ لیوا بێگۆڤا و ژ ئالیه‌كی ژی ڤه‌ رێكا زاخۆ-كانیماسێ هه‌ر ژ بێگۆڤا تا كو گركا كۆنترۆل دكر، ژ به‌ر هندێ ژی هه‌موو ده‌ما ئه‌ڤ بنگه‌هه‌ یێ تژی چه‌ك و جبه‌خانه‌ و پێدڤیێن له‌شكه‌ری بوو كو پێشمه‌رگه‌ ژی وی ده‌می گه‌له‌كێ پێدڤی چه‌ك و جبه‌خانێ بوو، ژبه‌ر كو ژێده‌رێ سه‌ره‌كی یێ چه‌ك و فیشه‌ك و پێدڤیێن له‌شكه‌ری ژ بۆ شۆرشێ ته‌نێ ئه‌و ده‌ستكه‌فت بوون یێن ژ دوژمنی دهاتنه‌ ستاندن.
(2-6)
ژ بۆ ئه‌نجامدانا ڤێ چالاكیێ هه‌ماهه‌نگیه‌كا رێكوپێك د ناڤبه‌را ل. ن. زاخۆ و ئامێدیێ دا هاتبووكرن و پلانه‌كا له‌شكه‌ری یا سه‌ركه‌فتی هاتبوو دارێتن كو هه‌موو چه‌په‌ر و بنگه‌هێن دوژمنی هه‌ر ژ گرێ بیێ ل رۆژاڤایێ بێگۆڤا تا كو گركا بكه‌ڤنه‌ ژێر ئاگرێ پێشمه‌رگه‌ی، زێده‌باری گرتنا بنگه‌هێ ستراتیژی یێ سه‌رێ حه‌مێ كو ئارمانجا سه‌ره‌كی و كاكلا چالاكیێ بوو.
پلان ژی ب ڤی شێوه‌یێ خوارێ هاتبوو دارێتن:
ل. ن. زاخۆ ل رۆژاڤایێ خابووری دێ ڤان جهان ئاگرباران كه‌ت: بنگه‌هێ ساركێ و خالێن زێره‌ڤانیێ ل سه‌ر رێكا ناڤبه‌را گری بیێ و بێگۆڤا و ل گه‌ل بنگه‌هێ سه‌رێ ره‌زا ل هنداڤی بێگۆڤا.
ل. ن. ئامێدیێ ژی ل رۆژهه‌لاتێ خابووری دێ ل ڤان جهان ده‌ت: باره‌گایێ لیوا بێگۆڤا، باره‌گایێ سریا چه‌قه‌لا، بنگه‌هێن گرێ ئاخه‌سپیكێ، گرێ دێرێ و ده‌رێ ئادی. هه‌روه‌سا گرتنا سه‌رێ حه‌مێ ژی كو ئارمانجا سه‌ره‌كی یا ڤێ چالاكیێ بوو، ئه‌و ژی ئه‌ركێ ل. ن. ئامێدیێ بوو.
ژ هه‌ژی گۆتنێ یه‌ كو چه‌كێ دێ هێته‌ بكارئینان ژ بۆ لێدانا ڤان جهان، تۆپه‌كا 82 ملم، دۆشكه‌كا 12. 5 ملم چه‌ند تۆپێن 60 ملم و ( بی كه‌ سی ) و ( ئار پی جی 7 ) بوون.
هێزێن پێشمه‌رگه‌ی یێن پشكدار د ڤێ چالاكیێ دا ئه‌ڤه‌ بوون: ژ ل. ن. زاخۆ رێكخراوا شه‌هید محمد صالح، شانه‌یه‌كا سه‌ره‌كی ژ رێكخراوا شه‌هید حاجی عبدالقادر و شانه‌یه‌كا سه‌ره‌كی ژ رێكخراوا دلبرین. ژ ل. ن. ئامێدیێ ژی رێكخراوێن شه‌هیدان انور مائی، شعبان عمر و خدر محمود. بریار ژی ئه‌و بوو ته‌قا ئێكێ هێزا سه‌رێ حه‌مێ ده‌ست پێ بكه‌ت یا كو شه‌هید شه‌عبان غه‌فار سه‌رپه‌رشتیا وێ دكر. ژ به‌ر هندێ ژی مه‌ ل دۆرێن ده‌مژمێر 3 ئێڤاری خوه‌ ئاماده‌كر وهێدی هێدی ل به‌ته‌نا نزاری به‌ره‌ڤ سه‌رێ حه‌مێ بسه‌ركه‌فتین و مه‌ خوه‌ كێشا ئالیێ رۆژاڤایێ بنگه‌هێ دوژمنی ب نێزیكیا 60-70 متره‌كا. ژ نێزیك ڤه‌ مه‌ دیت كو جهه‌كی گه‌له‌ك ئاسێ یه‌ و د نیڤا كه‌ڤره‌كی دا هاتیه‌ ئاڤاكرن و ب بزاڤ و هاتنوچوونا له‌شكه‌ران ئه‌م دبینین كو هه‌ژماره‌كا مه‌زنا له‌شكه‌ران ژی تێدایه‌.
ئه‌ز بخوه‌ ژی ئه‌ڤه‌ 8 مه‌هه‌ بوویمه‌ پێشمه‌رگه‌ و هه‌رچه‌نده‌ تا نوها من پشكداری د 6 چالاكیێن پێشمه‌رگاتی دا كریه‌، لێ ئه‌ڤ جۆرێ چالاكیا بۆ من یێ نوو بوو و ئه‌ڤه‌ جارا ئێكێ یه‌ ئه‌ز پشكداریێ دگرتنا بنگه‌هه‌كێ دوژمنی دا دكه‌م.
ده‌م نێزیكی ده‌مژمێر 4 ئێڤاری دبوو و پێشمه‌رگه‌ ل جهێن خوه‌ دامه‌زرابوون و ده‌ستێ وان ل سه‌ر له‌پكا تڤه‌نگێ وچاڤێ وان ل ئارمانجێ و گوهێ وان ل ته‌قا ده‌ستپێكێ یه‌ و دلێ وان گه‌له‌كێ شاده‌ ژ به‌ر كو ڤێ ئێڤارێ هه‌موو خه‌لكێ مشارا به‌رواری بالا، گوندێن شخۆێ و نیڤه‌كا ده‌ڤه‌را گولیا دێ شاهدێن مێرانی و قاره‌مانیا وان بن ل دژی داگیركه‌رێن كوردستانێ. میلێ ده‌مژمێرێ گه‌هه‌شته‌ سه‌ر 4 و بازیێ به‌هدینان شه‌هید شه‌عبان غه‌فار ئارپیجیا ئێكێ ته‌قانده‌ دوژمنی و ئێدی ل گه‌ل وێ ژی ل سه‌ر پتر ژ 15 بنگه‌ و باره‌گایێن دوژمنی ئاگر دباری و هه‌ر ژ گرێ بیێ و تاكو گركا بوو ئێك پارچا ئاگری ل سه‌ر سه‌رێ دوژمنی. د سه‌ر وێ هه‌ژمارا مه‌زنا له‌شكه‌رێ دوژمنی را و وی چه‌كێ گران و مۆده‌رنێ دوژمنی ژ تۆپێن دووراڤێژ و تانگ و زریپۆش و هه‌موو جۆرێن دی یێن چه‌كێن وێرانكه‌ر، دوژمن كه‌ڕ و گێژ ببوو و ئێدی نه‌ دزانی كیده‌رێ ئاگرباران بكه‌ت و كیده‌رێ نه‌ !
چه‌كێ سه‌ره‌كی یێ هێزا مه‌ یا هێرشكه‌ر بۆ سه‌ر سه‌رێ حه‌مێ و ستاندنا وی بنگه‌هێ گرنگێ دوژمنی 2-3 ئارپیجی 7 بوون كو 6-8 گولله‌ ئارپیجی ل سه‌ر‌بوون ، لێ ژبه‌ر كو بنگه‌هێ دوژمنی دنیڤا كه‌ڤره‌كی را بوو و گه‌له‌كێ ئاسێ بوو، ژ به‌ر هندێ گولله‌ ئارپیجیێن مه‌ ب دوماهی هاتن بێی كو كاریگه‌ریه‌ك ل بنگه‌هێ دوژمنی بهێته‌كرن. لێ ژبه‌ر كو بریار هاتبوو دان كو دڤێت بهێته‌ ستاندن، ژ به‌ر هندێ شه‌هیدان شه‌عبان غه‌فار و ئه‌حمد چه‌لكی و سه‌عید چه‌لكی ل گه‌ل ده‌ستكه‌كا دی یا پێشمه‌رگێن ده‌ستهه‌ل و خوه‌ كێشا به‌ر دیوارێ بنگه‌هێ دوژمنی و شێلكه‌كا بهێز یا نارنجۆكێن ده‌ستی كره‌ سه‌ر و نیڤا بنگه‌هێ دوژمنی كره‌ دۆژه‌ه و ئێكه‌سه‌ر پشتی شێلكا نارنجۆكا وێ ده‌سته‌كا پێشمه‌رگا خوه‌ هاڤێته‌ تێدا و بنگه‌ ب ته‌مامی كونترۆل كر. هێرشا پێشمه‌رگه‌ی هندا دژوار و بله‌ز بووكو چاڤ ل له‌شكه‌رێ دوژمنی تاری كرن و چه‌ند له‌شكه‌ره‌كا رێكا ره‌ڤێ به‌رزه‌كر و خوه‌ د كه‌ڤرێ ئالیێ باشوورێ بنگه‌هی دا هاڤێتنه‌ خوارێ كو بده‌هان مترا یێ بلنده‌.
پشتی دیل و بریندارێن دوژمنی هاتینه‌ كۆمكرن و هه‌موو چه‌ك و كه‌لوپه‌لێن ده‌ستكه‌فتی ژ بنگه‌هی هاتینه‌ ڤه‌گوهاستن كو هه‌ژماره‌كا مه‌زنا فیشه‌ك و گولله‌ تۆپ و نارنجۆكا تێدابوون، تشتێن بێ وه‌ج و بكێر نه‌هاتی ژی هه‌موو دنیڤا بنگه‌هی دا هاتنه‌ كۆمكرن و ئاگره‌كێ مه‌زن پێ هاته‌ هه‌لكرن كو ل پرانیا گوندێن ده‌ڤه‌رێ دهاته‌ دیتن ژ به‌ر بلندیا جهی. ئه‌ڤ ئاگره‌ ژی مزگینی و نیشانا ستاندنا بنگه‌هێ دوژمنی بوو، دا كو هه‌م گوندێن ده‌ڤه‌رێ بزانن و هه‌م ژی هێزێن دی یێن پێشمه‌رگه‌ی كو ل به‌ره‌یێن دی یێن شه‌ری بوون بزانن كو هه‌ڤالێن وان ئارمانجا خوه‌ گرت و ل سه‌ر دوژمنی بسه‌ركه‌فتن.
(3-6)
زیانێن دوژمنی د ڤێ شه‌ری دا: ژ ده‌ستدانا چیایێ سه‌رێ حه‌مێ یێ ستراتیژی ته‌ڤی 49 كوشتی و 38 بریندارا و سۆتن و تێكدانا هنده‌ك بنگه‌ و چه‌ك جبه‌خانه‌یێن دوژمنی.
ده‌ستكه‌فتێن پێشمه‌رگه‌ی ژی: دیلكرنا 9 له‌شكه‌ران كو ئێك ژێ ئه‌فسه‌ره‌ك بوو ب پلا ملازمێ ئێكێ و هه‌موو دیل ژی سه‌ر ب لیوا 10 یا سنووری و فه‌وجا 165 سریا 3 بوون هه‌ژمارا یه‌كا ( الوحده‌ ) وان 1638 بوو. له‌شكه‌ر ژی ئه‌ڤه‌ بوون:
1-ملازمێ ئێكێ حازم صادق مصگفی/ تاخێ حلبه‌/تلعفر/مۆسل
2- خالد احمد محمد/ تاخێ بحیات/ حدیپه‌ / انبار
3- حسین علی رشید / گوندێ كوله‌ / دیالا
4- هادی حسین جمیل / ته‌یراوه‌ / هه‌ولێر
5- هاشم كریم مجید / سه‌یداوه‌ / هه‌ولێر
6- علاء عبدالحسین / الخچراء / بغداد
7- نجم عبود عباس / الشعب / بغداد
8- محمد سلیم رشید
9- محمد وحید محمد / الپوره‌ / بغداد
هه‌روه‌سا 12 كلاشینكۆفێن روسی و 1 بی كه‌ی سی و 2 دكتاریۆف و 1 ئار بی كه‌ی و تۆپه‌كا 60 ملم و ده‌زگایه‌كێ بێته‌ل ماركا راكال لگه‌ل هه‌ژماره‌كا مه‌زنا گولله‌ تۆپ و فیشه‌ك و نارنجۆكێن ده‌ستی و لگه‌ل هێستره‌كێ. براستی ئه‌ڤ چه‌ك و پێدڤیێن له‌شكه‌ری ل وی ده‌می گرنگیه‌كا مه‌زن هه‌بوو ژ بۆ پێشمه‌رگه‌ی.
تشتێ ژ هه‌موویان دلخۆشكه‌ر تر ژی ئه‌و بوو كو پێشمه‌رگه‌ دڤێ چالاكیێ هه‌موویێ دا یێ بێ زیان بوون.
پشتی ده‌ستكه‌فت هاتینه‌ كۆمكرن، پێشمه‌رگه‌ی ب ده‌ستكه‌فت و دیلێن خوه‌ ڤه‌ به‌رێ خوه‌ دا گه‌لیێ هرۆرێ. ل ده‌مێ خوه‌ ڤه‌كێشانێ ژ مه‌یدانا شه‌ری هه‌ژماره‌كا زۆرا گولله‌و فیشه‌كێن ده‌ستكه‌فتی دده‌ستێ مه‌ دا بوون و چه‌ند دیله‌كێن كو كه‌فتینه‌ ده‌ستێ مه‌ ژی دبریندار بوون. ئه‌م نه‌ شیاین وان برینداران بهێلینه‌ ل مه‌یدانا شه‌ری ژ به‌ر كو یان دا ب شه‌ڤێ ژ سه‌رمادا ببرینێن خوه‌ مرن یان ژی رۆژا پاشتر ده‌مێ دوژمنی هه‌ولا گرتنا سه‌رێ حه‌مێ دداڤه‌ دا وی جهی ب همبزی ( خه‌ستی ) تۆپباران كه‌ت و ترسا مه‌ ئه‌و بوو ئه‌و له‌شكه‌رێن دیل ئه‌گه‌ر ژ سه‌رمایێ ژی نه‌مربان ب تۆپبارانێ مربان. ژ به‌ر هندێ ئه‌م نه‌چار بووین ب چ ئاوایه‌كی بیت دڤیا مه‌ ئه‌و بربان. لێ ڤه‌گوهاستنا وان گه‌له‌كا بزه‌حمه‌ت بوو ژ بۆ مه‌، ژ به‌ر كو هه‌م هه‌ژمارا مه‌ یا كێم بوو و بارێ مه‌ ژی گه‌له‌كێ گران بوو ژ ده‌ستكه‌فتا، هه‌م ژی ئه‌و شه‌ڤا سیێ بوو ئه‌م نه‌نڤستین و گه‌له‌ك دوه‌ستیایی بووین. لێ دیسا ژی مه‌ چاره‌یه‌ك ژ بۆ ڤه‌گوهاستنێ دیت، ئه‌و ژی ئه‌ڤه‌ بوو: به‌ته‌نا سه‌رێ حه‌مێ یا كو ڤه‌درێژیته گه‌لیێ هرۆرێ پڕانیا وێ به‌فر بوو، مه‌ ژی هنده‌ك به‌ته‌نیێن ده‌ستكه‌فتی دانانه‌ سه‌ر به‌فرێ و دیلێن بریندار و ده‌ستكه‌فتیێن دی دانانه‌ سه‌ر به‌ته‌نیا و كێشان تاكو گه‌لیێ هرۆرێ. ئه‌م و لگه‌ل ‌هێزێن دی یێن مه‌ یێن كو ل به‌ره‌یێن دی بوون ل ناڤ كاڤلێ گوندێ هرۆرێ گه‌هه‌شتینه‌ هه‌ڤ.
ل ده‌مێ پلان دانانا چالاكیێ بڕیار هاتبوودان كو رێكخراوا (شه‌هیدێن خه‌نوكه‌ی ) كو كاك ڕێڤنگ هرۆری به‌رپرسێ وێ بوو ب كارێ لۆجستی رابیت، ئه‌و ژی ئه‌و بوو كو ئه‌و دێ خوارنێ ژ ناڤ مالێن پێشمه‌رگا یێن كو ل سه‌ر سنوورێ باكوور و باشوور دئاكنجی بوون كۆمكه‌ن و ئیننه‌ گه‌لیێ هرۆرێ ژ بۆ پێشمه‌رگه‌ی، پاشی ژی ئه‌و دێ دیل و برینداران ژ مه‌ وه‌رگرن و ل گه‌ل خوه‌ به‌نه‌ باره‌گایێ لقێ ل كۆماته‌ی كو دكه‌ڤیته‌ سه‌ر سنوورێ باكوورێ كوردستانێ ل جهێ خابوور تێته‌ ناڤ ئاخا باشوورێ كوردستانێ. رێكخراوا سه‌هیدێن خه‌نوكه‌ی ژی سه‌ر ب باره‌گایێ لقێ ڤه‌ بوو و باره‌گایێ وێ ژی ل قه‌سركێ بوو یا كو دكه‌ڤیته سه‌ر سنووری ل ناڤبه‌را هه‌ر‌دوو گوندێن هۆركێ ( باشوور ) و شیڤره‌زانێ ( باكوور ). ژ به‌ر كو هینگێ هه‌ژماره‌كا زۆرا مالێن پێشمه‌رگا‌ ل وان گه‌لیێن سه‌ر سنووری ئاكنجی ببوون، رێكخراوا ناڤبری‌ ژی ژبۆ سه‌رپه‌رشتیا وان ل وێرێ هاتبوو دامه‌زراندن.
ده‌مێ ئه‌م گه‌هه‌شتینه‌ ناڤ كاڤلێن گوندێ هرۆرێ یێ كو به‌عسیا سالا 1976 وێرانكری و خه‌لكێ وی ده‌ربه‌ده‌ركری، مه‌ دیت كو هه‌ڤالێن رێكخراوا شه‌هیدێن خه‌نوكه‌ بارێ سێ هێسترا نان و ژاژی و په‌نیر و چا یێن بۆ مه‌ ئیناینه‌ وێرێ و چا ژی یا بۆ مه‌ د كاڤلێ مزگه‌فتا گوندی دا كه‌لاندی و ل هیڤیا مه‌ نه‌. پشتی مه‌ نیڤ ده‌مژمێرێ بێهنا خوه‌ ل وێرێ ڤه‌دایی و هنده‌ك پێشمه‌رگا نان خوار، لێ دیار بوو پڕانیا وان ژی ژ وه‌ستیانێ هایا وان ژ برسێ نه‌مابوو و ته‌نێ چایه‌ك ڤه‌خوار بێی كو خوارنێ بخۆن. ئه‌ز بخوه‌ ژی ئێك ژ وان پێشمه‌رگا بووم یێن نان نه‌خواری، چه‌ند جاره‌كا هه‌ڤالا داخواز ژ من كر كو نانی بخۆم ل من هه‌ست دكر كو ئه‌ز یێ تێرم و من دڤیا ته‌نێ بێهنا خوه‌ ڤه‌ده‌م و ل گه‌ل وێ ژی من چایه‌ك ڤه‌خوار. ل دوماهیێ ژی ده‌ركه‌فت كو ئه‌زێ برسی بووم لێ ژ وه‌ستیانێ هایا من ژ برسێ نه‌بوو. پاشی پشتی هه‌ڤالێن ڕێكخراوێ دیل ژ مه‌ وه‌رگرتین ئه‌و به‌ره‌ڤ باكوور بۆ كۆماته‌ی برێكه‌فتن و ئه‌م ژی به‌ره‌ڤ رۆژهه‌لات بۆ سوارا كه‌لا قومریێ. لێ قۆناغا مه‌ یا دوماهیێ ته‌نێ شه‌هید شه‌عبان غه‌فار دزانی كا دێ ل كیده‌رێ راوه‌ستین، دیار ژی بوو وی بڕایار خوه‌ دا بوو كو دێ وێ شه‌ڤێ مه‌ ل چیایێ مه‌تینا ئاسێ كه‌ت، لێ وی ئه‌ڤه‌ نه‌گۆتبوو كه‌سێ ژ مه‌، یا وی فه‌رمانه‌ و یا مه‌ ژی بجیئینان، لێ راستیه‌ك هه‌بوو كو مه‌ ژی دزانی، ئه‌و ژی ئه‌و بوو كو بێگۆمان پێدڤیه‌ ئه‌م رێكا 5-6 ده‌مژێرا ژ جهێ چالاكیێ دووركه‌ڤین.
(4-6)
ژ به‌ر كو ئه‌م پشتراستین رۆژا پاشتر دوژمن دێ ده‌ڤه‌رێن نێزیكی جهێ چالاكیێ ب هه‌لیكۆپته‌را و له‌شكه‌ران پشكنیت و ئێك ژ پره‌سیپێن شه‌ڕێ پارتیزانی ژی ئه‌و بوو كو ئه‌م خوه‌ تووشی شه‌ڕه‌كی نه‌كه‌ین یێ كو دوژمنی ده‌م و جهێن وی هه‌لبژارتین، ژ به‌ر هندێ ژی باشترین رێ ژ بۆ مه‌ خوه‌ به‌رزه‌كرن و دووركه‌فتنه‌ ژ وان ده‌ڤه‌ران.
تا كو بنێ ژێهه‌لیێ كه‌لا قومریێ ژی، كو ژێهه‌لیه‌كێ گه‌له‌ك ڕكه‌، چوونا مه‌ یا نۆرمال بوو، ئه‌ز ل گه‌ل پێشیا ڕیزا پێشمه‌رگه‌ی دچووم، ئه‌ز باوه‌ر دكه‌م 9 – 10 پێشمه‌رگا ل به‌ری من بوون، لێ تا كو ئه‌ز گه‌هه‌شتیمه‌ نیڤا ژێهه‌لی من دیت كو پێشمه‌رگه‌ هه‌ر یێ ژ من دهه‌لبوورن و ئه‌ز مامه‌ ل دوماهیێ، من هه‌ستكر كو ره‌وشا من نه‌یا نۆرماله‌، ئه‌ز دكه‌م و ناكه‌م پێن من ژ ئه‌ردی بلند نابن، دێ بێژی هه‌ر پیه‌كێ من به‌ره‌كێ مه‌زن یێ پێڤه‌ گرێدایه‌. من هند دیت كو هه‌موو پێشمه‌رگه‌ یێ ژ من ده‌ربازبووین و ئه‌زێ مایمه‌ ل دوماهیێ، ته‌نێ هه‌ڤاله‌ك یێ مایه‌ د دووڤ من را، كو ب ژیێ خوه‌ ژ من مه‌زنتر بوو، ئه‌و ژی هات نێزیكی من بوو دا كو ژ من ده‌رباز ببیت. وی پرسیار ژ من كر: ته‌ چیه‌ تۆ برێڤه‌ ناچی ؟
من به‌رسڤدا: ئه‌ز نزانم، دێ بێژی هه‌ر‌ پیه‌كێ من باگوردانه‌كێ پێڤه‌، پێن من ژ ئه‌ردی رانابن. دیسا وی پرسیاركر: ته‌ نان خواربوو ؟ نه‌خێر ته‌نێ من چایه‌ك ڤه‌خوار، من گۆته‌ وی. گۆته‌ من: تۆ یێ برسی و براستی چ نان گه‌ل من ژی نینه و‌ ئه‌ز باوه‌ر دكه‌م رێكا مه‌ هێشتا گه‌له‌كا مایی، نزانم دێ چه‌وا خوه‌ گه‌هینیه‌ بنه‌جهێ؟! ب زۆری من خوه‌ گه‌هانده‌ سوارا كه‌لا قومریێ ل ناڤبه‌را هه‌ردوو گوندێن هرۆرێ و قومریێ.
ژ به‌ر كو ئه‌ز یێ نوو و بێ سه‌ربۆر بووم دژیانا پێشمه‌رگاتیێ دا له‌وما ژی د سه‌ر هندێ را كو من نان نه‌خواربوو، من ئه‌و هزر ژی نه‌كربوو كو هنده‌ك نانی بكه‌مه‌ د پاخلا خوه‌ دا ژ بۆ وێ رێكا درێژ. ده‌مێ ئه‌ز سه‌ركه‌تیمه‌ سوارا كه‌لا قومریێ هه‌موو پێشمه‌رگه‌ ل وێرێ راوه‌ستابوون و بێهنا خوه‌ ڤه‌ددان. لێ ل وێرێ دیاربوو كو نه‌ ته‌نێ ئه‌ز به‌لكی گه‌له‌ك پێشمه‌رگێن دی ژی وه‌كی من ژ برسان كه‌فتینه‌. ئه‌ز ژی پشتی من پرسیارا نانی ژ گه‌له‌ك هه‌ڤالێن خوه‌ كری، جاره‌كا دی بێ ده‌ستكه‌فت و بێ هیڤی ڤه‌گه‌رامه‌ ڤه‌ جهێ خوه‌ و من ل به‌ر لێڤا رێكێ پالا خوه‌ دا به‌ره‌كی و گۆت: نان هه‌ر بده‌ست من ناكه‌ڤیت هه‌ما دا تێر بێهنا خوه‌ ڤه‌ده‌م به‌لكی بشێم چه‌ند سه‌د مه‌تره‌كێن دی ژی رێ ببڕم.
هه‌ڤاله‌كی من وه‌سا دیاربوو كو چاڤێ وی ل من بوو ده‌مێ ئه‌ز ل ناڤ كۆما پێشمه‌رگا دگه‌ریام و ئێك ئێكه‌ من پرسیارا نانی ژ وان دكر، له‌وما پشتی من پالا خوه‌ دایه‌ به‌ری و ڤیایی هه‌ر چ نه‌بیت تێر بێهنا خوه‌ ڤه‌ده‌م، هاته‌ ره‌خ من و ده‌ڤێ خوه‌ ئینا به‌ر گوهێ من و هێێێێدی گۆته‌ من: تۆ یێ برسی ؟ من ژی گۆتێ: نه‌ ته‌نێ ئه‌زێ برسی مه‌، ئه‌زێ ب ئێكجاری ژ برسا كه‌فتیم و ئه‌ز باوه‌ر ناكه‌م ئه‌ز ئه‌ڤ شه‌ڤ بشێم ڤێ رێكێ به‌رده‌وام كه‌م! وی گۆته‌من: وه‌ره‌ پشت گوهیژكا هه‌نێ. ده‌مێ ئه‌ز چوویمه‌ پشت گوهیژكێ گۆته‌ من: من نانه‌كا ژ هرۆرێ ل گه‌ك خوه‌ ئینایی و تا نوكه‌ ئه‌ڤه‌ پترژ 10 پێشمه‌رگا پرسیار ژ من كر، لێ من گۆتیه‌ هه‌موویان كو نان ل گه‌ل من نینه‌، لێ ئه‌زێ دبینم كو تۆ ب ته‌مامی یێ كه‌فتی، ڤێجا ها ئه‌ڤه‌ قه‌ده‌ك بۆته‌ و ئێك ژی بۆ من و هه‌ما هه‌ر ل ڤێرێ ل پشت ڤێ گوهیژكێ بخۆ دا كه‌سێ دی نه‌بینیت دا ئه‌ز ژ وان شه‌رم نه‌كه‌م.
ئه‌ز هیچ نه‌شێم په‌سنا وێ بكه‌م كانێ وی ده‌می ئه‌ز چه‌ند شاد و كه‌یفخۆش بووم ب وێ قه‌دا نانی!! دڤێ ژیانا منا پری هه‌ژاری، مالوێرانی، زیندان و ئه‌شكه‌نجه‌، برینداری و ده‌ربه‌رده‌ری دا گه‌له‌ك جارا قه‌نجی ل من هاتینه‌ كرن كو ب بها و مه‌زنیا خوه‌ ب هزاران جارا ژ ڤێ دمه‌زنتر بوونه‌، لێ ل ده‌ف من و د دل و ووژدانا من دا نه‌ چ ژ وان قه‌نجیا هندی ڤێ د مه‌زن و بهادارن و نه‌ ژی دژیانا منا مایی دا قه‌نجیه‌كا دی جهێ وێ دگریت. دیسا ئه‌ڤ قه‌دا نانێ ره‌ق خوه‌شترین خوارنا من بوویه‌ د هه‌موو ژیانا من دا من خواری.
ئه‌م ژ وێرێ برێكه‌فتین به‌ره‌ڤ گوندێ قومریێ و پاشی به‌رێ مه‌ كه‌فته‌ ژێهه‌لیێ چیایێ بادوكێ كو دكه‌ڤیته‌ هنداڤی گوندێ تشیشێ و باره‌گایێ فه‌وجا دوژمنی ل سۆتكی.
وه‌سا دیاربوو كو ئارێشا مه‌ نه‌ ته‌نێ برس بوو، ژبه‌ر كو پشتی نێزیكی 2-3 ده‌مژمێران ئه‌م برێ چووین ئێدی ڤێجا خه‌و كه‌فته‌ چاڤێن پڕانیا پێشمه‌رگا، ژ به‌ر كو ئه‌ڤه‌ شه‌ڤا سیێ یه‌ خه‌و نه‌چوویه‌ چاڤێن كه‌سێ، زێده‌باری وه‌ستیانه‌كا به‌رده‌وام د وان چه‌ند رۆژان دا. ژ سه‌رێ چیایێ بادوكێ تاكو هنداڤی گوندێ تشیشێ ژی دوژمنی ب هزاران مین لێ چاندبوون، پێشمه‌رگه‌ی به‌ری هینگێ رێكه‌ك ل ناڤ مینا ڤه‌كربوو و وه‌كی كولانه‌كێ چێكربوو كو مین ژێ پاقژكربوون، لێ ئه‌گه‌ر ب شاشی یان دتاریێ دا مرۆڤ ژ وێ رێ ده‌ركه‌فتبا نه‌ دووره‌ كو مرۆڤ كه‌فتبایه‌ ناڤ تۆرا مینان و قوَرتال بوون ژی گه‌له‌كا بزه‌حمه‌ت بوو.
(5-6)
هه‌لبه‌ت چوونا پێشمه‌رگه‌ی برێز بوو و پچه‌ك ژی ناڤبه‌ر ددا هه‌ڤدوو، ژ به‌ر هندێ رێز گه‌له‌ك ‌ درێژ دبوو كو جارنا دگه‌هه‌شته 400-500 مترا فه‌رماندێ پێشمه‌رگه‌ی یان ژی هه‌ر پشمه‌رگه‌یه‌كێ دی ئه‌گه‌ر ڤیابا ئاخفتنه‌كێ یان په‌یامه‌كێ بگه‌هینیته‌ هه‌ڤالان، ئه‌گه‌ر ئه‌و ئاخفتن ژ پێشیێ ڤه‌ هاتبا هه‌ركه‌سه‌كی دگۆته‌ یێ پشتی خوه‌ تا كو دگه‌هه‌شته‌ دوماهیێ و به‌روڤاژی ژی دگۆته‌ یێ به‌ری خوه‌ تا كو دگه‌هه‌شته‌ یێ پێشیێ، ڤێجا جارنا ده‌ما په‌یام ژ دوماهیێ دهات و دگۆت:” ئێك بێژنه‌ ئێكی دوماهی نه‌هات” وی ده‌می باشترین ده‌لیڤه‌ بوو كو مرۆڤ ل به‌ر ره‌خێ رێكێ پالا خوه‌ ب ده‌ته‌ به‌ره‌كی و بێهنا خوه‌ ڤه‌ده‌ت، لێ براستی ژی هێشتا مرۆڤ ب دروستی نه‌ روونشتی خه‌وێ خوه‌ ب سه‌ر دل و چاڤێن مرۆڤی دادا و ئێدی هایا مرۆڤی نه‌ ژ دوماهیێ و نه‌ ژی ژ به‌راهیێ نه‌ دما، تاكو هه‌ڤاله‌كی یێ كو دبه‌ر مرۆڤی را دبووری ملێ مرۆڤی دگرت و دهه‌ژاند و گازی دكر:” هه‌ڤال هه‌ڤال رابه‌ مه‌ تۆ هێلای “. لێ گه‌له‌ك پێڤه‌ نه‌دچوو كو جاره‌كا دی مرۆڤ یێ دچیت بێی كو های ژ خوه‌ هه‌بیت تا كو ئه‌نیا مرۆڤی ب لولیا بڕنویا یێ به‌ری مرۆڤی دكه‌فت و ره‌قێن ژ ئه‌نیێ دئینا. جاره‌كێ ده‌ما ل چوونێ لولیا بڕنویا یێ به‌ری من ب ناڤبه‌را هه‌ردوو چاڤێن من كه‌فتی و ئه‌ز ژ وێ “خه‌وا شرین” هشیاركریم، من لێ كره‌ قێری:” مال میرات ته‌ ئه‌نیا من كونكر، ما تۆ نزانی جوان تڤه‌نگا خوه‌ ب ملێ خوه‌ ڤه‌ كه‌ی ته‌ هۆسا قلیچ كریه‌” ؟
وی ژی به‌رسڤا من دا: ” برا ئه‌ز نۆرمال یێ برێڤه‌ دچم و تڤه‌نگا من ژی ب ملێ من ڤه‌یه‌، لێ تۆ یێ دخه‌وی و ته‌ های ژ خوه‌ نینه‌، ته‌ ئه‌نیا خوه‌ یا ل لولیا تڤه‌نگا من دایی”.
لێ نه‌ نڤستنا ل به‌ر ره‌خێ رێكێ و نه‌ ژی ژانا ئه‌نیا ب لولیا بڕنویان كه‌فتیه‌ نه‌ گه‌له‌ك مه‌ترسی بوو، یا ژ هه‌موویان خرابتر ئه‌و بوو ده‌مێ پێشمه‌رگه‌یه‌كێ دخه‌و د سه‌ر رێدا دچوو و هڕدبوو ناڤ ده‌ڤه‌رێن ب مینان چاندی، لێ تشتێ باش ئه‌و بوو هه‌موو پێشمه‌رگه‌ گه‌له‌ك ل هه‌ڤدوو دهشیاربوون. دسه‌ر ره‌وشا خوه‌ را جاره‌كێ من دیت هه‌ڤاله‌كێ دسه‌ر رێدا چوویی و به‌ره‌ڤ تۆرێن مینان ژووردا دچیت، ئه‌ز گه‌هه‌شتمێ و من ملێ وی گرت و هه‌ژاند:” هه‌ڤال هه‌ڤال راوه‌سته‌ زێده‌تر نه‌چه‌، چاڤێن خوه‌ ڤه‌كه‌، خوه‌ هشیاركه‌ تۆ یێ دچیه‌ ناڤ مینان”. وی ده‌ستێ من ژ ملێ خوه‌ ڤه‌كر و هاڤێت و گۆت:” من به‌رده‌ هه‌ڤالێن من ئه‌زێ هێلایم دا بگه‌همه‌ وان”. لێ من ئه‌و به‌رنه‌دا تا كو هاتیه‌ سه‌ر هشێن خوه‌ و زڤریه‌ڤه‌ سه‌ر رێكێ.
د سه‌ر ڤێ ره‌وشا بێخه‌وی، برس و وه‌ستیانێ را نوها ژی د سه‌ر ڤی حالی را دڤێت ئه‌م ل جادا بێگۆڤا- كانیماسێ ل ژێریا گوندێ تشیشێ ( قه‌سرا ساده‌ی) ده‌رباز ببین كو ئێك ژ وان جهانه‌ یێن كو به‌رده‌وام جاشێن ئیسخباراتێ و هێزێن ( قوه‌ خاصه‌ ) كه‌مینان لێ ددانن ل پێشیا پێشمه‌رگه‌ی، ژ به‌ر كو وێرێ ئێك ژ رێین سه‌ره‌كی یێن پێشمه‌رگه‌ی بوو ژ بۆ هاتنووچوونا باره‌گایێ لقێ ل كۆماته‌ی. من باوه‌ر دكر ئه‌گه‌ر وێ شه‌ڤێ كه‌مین هه‌با ئه‌م دا گه‌له‌ك شه‌پلین كو نه‌ دووره‌ سه‌ركه‌فتنا مه‌ ل مه‌ ته‌حل كربا. لێ دوێرێ دا مه‌ شه‌نسه‌كێ باش ئینا و وێ شه‌ڤێ كه‌مین نه‌بوو. ئه‌م ل جادێ ده‌رباز بووین و ئێدی كه‌یف كه‌یفا مه‌یه‌ كو دێ نوها گه‌هینه‌ گوندێ خشخاشا ل باشوورێ جادا بێگۆڤا-كانیماسێ و دێ د مزگه‌فتا گوندی ڤه‌ تێر خه‌وا شرین كه‌ین و خه‌ونێن سۆر و زه‌ر بینین. لێ ده‌مێ ئه‌م گه‌هه‌شتینه‌ سه‌رێ گوندی مه‌ دیت كو شه‌هید شه‌عبان غه‌فار وه‌كی شێره‌كێ په‌یت و هشیار ل سه‌ر رێكێ یێ راوه‌ستیایه‌، ب كاروباره‌كێ كوك و لێكدایی، ره‌خت و ساجۆرێن گورج و كلاشینكۆفا وی یا رۆسی ب ملی ڤه‌ و گۆپالێ زراڤێ كنێرێ د ده‌ست دایه، نه‌ نیشانا وه‌ستیانێ و نه‌ ژی یا برس و خه‌وێ قه‌ت ل دێم و روومه‌تێ وی دیارنینه‌. دێ بێژی سپێده‌كا زوویه‌ و نوها ژ خه‌وه‌كا درێژ رابوویه تێر سه‌رتیك و په‌نیر و هنگڤین ب تێشتێ خوارنه‌ و نوها كارێ خوه‌ كریه‌، و ئه‌م ژی هه‌موو د خه‌و، برسی، وه‌ستیایی و تا كو شووتكێ بووینه‌ هه‌ڕی. دیاربوو شه‌هید شه‌عبانی مزگینه‌كا نه‌خۆش بۆ مه‌ ڤێ بوو! ئه‌و ژی ئه‌و بوو كو نابیت كه‌سه‌ك ژ مه‌ ژ رێ ده‌ركه‌ڤیت و ل ڤی گوندی راوه‌ستیت یان ژی بنڤیت، چونكی نێزیكی دوژمنیه‌ نه‌كو هێزا دوژمنی ب سه‌ر گوندی دا بگریت و خه‌لكێ گوندی ببیته‌ قوَربانی.
(6-6)
خه‌وا خشخاشا ژ ده‌ستێ مه‌ چوو، نوها هیڤیا مه‌ ب مزگه‌فتا گوندێ چه‌مسه‌یدا مایه‌ كو دكه‌ڤیته‌ باشووری خشخاشا، لێ ده‌مێ ئه‌م گه‌هه‌شتینه‌ سه‌رێ گوندی هه‌مان دیمه‌نێ خشخاشا كه‌فته‌ڤه‌ به‌رچاڤێن مه‌ و ڤێ جارێ فه‌رمان دا مه‌ كو نه‌ ته‌نێ ل چه‌مسه‌یدا به‌لكی نابیت ئه‌م ل گوندێ بازێ ژی، یێ كو دكه‌ڤیته‌ به‌رپالا چیایێ مه‌تینا بنڤین، و دڤێت ئه‌م خوه‌ بگه‌هینینه‌ گه‌لیێ بازێ ل چیایێ مه‌تینا و ل وێرێ ئه‌م دئازادین پشتی كو زێره‌ڤان بۆ مه‌ تێنه‌ دانان،هندی مه‌ دڤێت ئه‌م دشێین بنڤین. هه‌لبه‌ت دوماهیێ پشتی ئه‌م باش دژیانا پێشمه‌رگاتیێ گه‌هه‌شتین، مه‌ زانی كو ئه‌ڤه‌ ئێك ژ سیفه‌تێن فه‌رماندێ سه‌ركه‌فتی بوون وشه‌هید شه‌عبانی نه‌ دڤیا ئه‌م بمینینه‌ ل چ گوندا كو سپێدێ یان هێرشا دوژمنی ب له‌شكه‌رێ په‌یاده‌ یان ب هه‌لیكۆپته‌را ‌بهێته‌‌ سه‌ر و كه‌یف و شادیا سه‌ركه‌فتنا مه‌ ل مه‌ بكه‌نه‌ خه‌م و نه‌خۆشی.
ئه‌م گه‌هه‌شتینه‌ گه‌لیێ بازێ سپیده‌كا زوو بوو، لیستا زێره‌ڤانان هاته‌ چێكرن ژ وان پێشمه‌رگێن خودان و سه‌ربۆر كو كێمتر وه‌ستیابوون و چه‌كێ دۆشكا ل سه‌رێ چیای هاته‌ بنه‌جی كرن و پاشی فه‌رمان هاته‌ دان كو خوه‌ باش به‌لاڤه‌ بكه‌ن و ل ناڤ وان ته‌راش و شكه‌فت و به‌را و بێهنا خوه‌ ڤه‌ده‌ن و هه‌ركه‌سێ دڤێت بلا بنڤیت. من ژی ل ئالیێ رۆژهه‌لاتێ گه‌لی جهه‌ك ژ بۆ خوه‌ ل به‌ر به‌ره‌كی په‌یدا كر و ب قه‌مه‌ی من پچه‌ك ڤه‌كۆلا و راستكر و هنده‌ك تایێن ته‌ڕاشێ كو چلی ژی پێڤه‌ نه‌مابوو بڕین و دانانه‌ بن خوه‌ وه‌ك دۆشه‌ك و كلاشینكۆف و ساجۆر ژی كرنه‌ بالیفك و چاكیتێ خوه‌ ژی ب سه‌ر خوه‌ دادا وه‌ك لحێف، ئێدی سه‌رما و ته‌زیاتیا زستانێ ژی هیچ بۆ من خه‌م نه‌بوو. ده‌ما من سه‌رێ خوه‌ دانای من دیت كو پچه‌كا تاڤزه‌ركا سپێدێ خوه‌ هاڤێتیه‌ سه‌رێ كۆپێن چیایێ مه‌تینا. ئێدی هایا من ژ دونیایێ نه‌ما، ژ بلی هندێ كو دوو جارا هایا من ژێ هه‌بوو هه‌ڤاله‌كی گازی من دكر، جاره‌كێ دگۆت: “رابه‌ تێشتێ بخۆ” و جارا دی ژی دگۆت: “رابه‌ فراڤینێ بخۆ”. لێ هه‌ردوو جاران من دڤیا زوو به‌لا وی ژ خوه‌ ڤه‌كه‌م و من دگۆته‌ وی: ” من یا خواری” ، هه‌لبه‌ت ڕاست نه‌بوو، چونكی خوارنا من ته‌نێ ئه‌و قه‌دا نانی بوو یا شه‌ڤا به‌رێ وی هه‌ڤالی ل سوارا قومریێ دایه‌ من، لێ ڕاستی ئه‌و بوو كو من خه‌و نه‌دا ب نان.
جارا سیێ من های بوو كو هه‌ڤاله‌كێ من یێ ملێ من دهه‌ژینیت و گازی من دكه‌ت: رابه‌ برا دره‌نگه‌ دێ چینه‌ گوندی، هه‌ڤال هه‌موو دئاماده‌نه ( هه‌لبه‌ت ده‌ما تاری دكه‌فته‌ ئه‌ردی ئه‌م دچینه‌ گوندا)، من ژی چاڤێن خوه‌ ڤه‌كرن و دیت كو دیسا تاڤزه‌ركا ل كۆپه‌كێ چیایێ مه‌تینا. من ژی گۆتێ: هه‌ڤال تۆ بۆچی به‌لا خوه‌ ژ من ڤه‌ناكه‌ی پچه‌كێ بخوه‌ بنڤم، ئه‌ز نوكه‌ یێ نڤستیم، ما تۆ نابینی ژ نوو تاڤزه‌ركا سپێدێ یا ده‌ركه‌فتی نێ ئه‌ز نوكه‌ یێ نڤستیم ؟!!
هه‌ڤالێ من به‌ردا كه‌نی و كه‌نیه‌كێ پڕ ژ دل كر و گۆته‌ من: هه‌ڤالۆ ئه‌و نه‌ تاڤزه‌ركا سپێدێ یه‌، ئه‌و تاڤزه‌ركا رۆژئاڤابوونێ یه‌، رابه‌ دره‌نگه‌ هه‌ڤالێن ل هیڤیا مه‌. پشتی من باش چاڤێن خوه‌ ڤه‌كرین و باش ل كۆپێ چیایێ مه‌تینا ته‌ماشه‌كری، من دیت كو ب ڕاستی ژی تاڤزه‌ركا ل كۆپێ چیای یێ ڕه‌خێ رۆژهه‌لاتی و ژ نوو من باوه‌ر كر، كو ئه‌ز باشێ نڤستیم و ئه‌ڤه‌ تاڤزه‌ركا رۆژئاڤابوونێ یه‌ نه‌ یا سپێدێ یه‌.
براستی ژی ل وێ رۆژا زستانێ كو 17/12/1982 بوو ل پالا چیایێ مه‌تینا یێ سار و ل سه‌ر وان تاكێن ته‌ڕاشێ خوه‌شترین خه‌و دژیانا خوه‌ دا من كر، كو باوه‌رناكه‌م جاره‌كادی ئه‌و تام و خوه‌شیا خه‌وێ دووباره‌ ببیته‌ڤه‌. ‌‌‌

ده‌مێ ل هاڤینا 1988 قۆناغا هه‌شتێ یا ئه‌نفالێن ڕه‌شێن سه‌دامی ل دژی ده‌ڤه‌را به‌هدینان ل باشوورێ كوردستانێ ده‌ستپێكری، وی ده‌می ئاری زارۆكه‌كی 5 ساڵی بوو، بابێ وی پێشمه‌رگه‌ بوو و ماڵێن وان د گه‌لیه‌كی دا بوون ( گه‌لیێ سیرتێ ) كو دكه‌ڤیته‌ باكوورێ رۆژاڤایێ گوندێ كێسته‌ و دۆرێن 5 كلم نێزیكی سنوورێ باكوورێ كوردستانێ ل جهێ كو ڕووبارێ خابووری تێته‌ ناڤ باشوورێ كوردستانێ. ماڵا باپیرێ دایێ یێ ئاری ل بێگۆڤا بوو و ژبه‌ر كو وان نه‌ڤیێ خوه‌ نه‌ دیتبوو داخواز ژ بابێ ئاری كرن كو شه‌ڤه‌كێ وی ل گه‌ل خوه‌ بینیت و بۆ ده‌مه‌كی بهێلیته‌ ل ده‌ف وان دا كو ناڤیێ خوه‌ تێر ببینن. بابێ ئاری ژی شه‌ڤه‌كێ وی ل گه‌ل خوه‌ ل سه‌ر پشتا هه‌سپی سواردكه‌ت و دگه‌هینیته‌ بێگۆڤا ل ده‌ف باپیرێ وی و ئێكسه‌ر 2-3 رۆژا پشتی هینگێ له‌شكه‌ركێشیا به‌عسیێن داگیركه‌ر ژ بۆ قۆناغا هه‌شتێ یا ئه‌نفالان و سۆتن و وێرانكرنا كوردستانێ ده‌ستپێدكه‌ت و هه‌ر جهه‌ك ته‌ژی له‌شكه‌ر، جاش، تانگ و توپ دبیت و ئاگر و دۆمان ژ هه‌ر جهی بلند دبیت، كه‌س نه‌شێت نه‌ به‌ره‌ڤ ده‌ڤه‌رێن ڕزگاركریڤه‌ بچیت و نه‌ ژی كه‌س دشێت خوه‌ بگه‌هینیته‌ ده‌ڤه‌رێن بن كۆنترۆلا دوژمنی و ئێدی دۆزه‌خا سۆتن و وێرانكرن و قڕكرنا ب كیمیاوی ده‌ستپێدكه‌ت و وه‌كی رۆژا حه‌شرێ لێ تێت و كه‌سێ های ژ كه‌سێ نامینیت.
پشتی داگیركرن و وێرانكرنا ده‌ڤه‌رێ و كوشتن وقڕكرنا خه‌لكه‌كێ زۆر، هه‌ژماره‌كا زۆرا خه‌لكی خوه‌ گه‌هاندنه‌ ئالیێ دی یێ سنوورێ باكوورێ كوردستانێ و یێن ماین ژی كو ب هه‌زاران ژن و زارۆك و خه‌لكێ سڤیل بوون كه‌فتنه‌ ده‌ستێ دوژمنی و وان ژی ئه‌و خه‌لكه‌ برسی و تێهنی هاڤێتنه‌ د ترۆمبێلێن ئیڤایێن له‌شكه‌ری دا و ل بن لێدان و ئه‌شكه‌نجێ به‌رێ وان دانه‌ كه‌لها نزاركێ ل دهۆكێ و جهێن دی یێن كۆمكرنێ كو گه‌له‌ك ژێ برن و ل بیابانا ژێریا عێراق بن ئاخ كرن و یێن دژی برن هاڤێتنه‌ كه‌مپا به‌حركێ ل هه‌ولێرێ.
د ڤی ده‌می دا ده‌ما ئه‌و خه‌لكێ هۆسا ب هۆڤانه‌ ژ ده‌ڤه‌را كانیماسێ ڤه‌دگوهاستنه‌ دهۆكێ كاروانێ ترۆمبێلێن وان د بێگۆڤا ڕا ده‌رباز دبوون. هه‌رچه‌نده‌ ئاری وی ده‌می گه‌له‌كێ بچووك بوو، لێ ئه‌و شه‌ڕ و سۆتن و سه‌روبنێك بوونا ده‌ڤه‌رێ وه‌ل وی كر كو ئه‌و ژی هه‌ست بكه‌ت كو ڕه‌وشه‌كا نه‌سرووشتی یا هه‌یی، ژبه‌ر هندێ وی ده‌ست ب گریانێ كر و داخوازا ده‌یبابێن خوه‌ كر، باپیرێ وی ژی ئه‌و كره‌ ملێ خوه‌ و چوو خوه‌ نێزیكی جادێ كر كو كاروانێ ترۆمبێلێن ته‌ژی خه‌لكێ دیل تێڕا ده‌رباز دبوون به‌ره‌ڤ زاخۆ و دهۆكێ و وی خوه‌ دا به‌ر كوژیێ دیوارێ خانیه‌كی ل نێزیك جادێ كو به‌لكی ده‌یبابێن ئاری د ناڤ وان دیلا دا ببینیت و هه‌ر دگوته‌ ئاری: نه‌گری ئه‌ڤه‌ دێ نوكه‌ ده‌یبابێن ته‌ د ڤان ترۆمبێلان دا هێن و دێ هێنه‌ ده‌ف ته‌ !
2-3 رۆژان كارێ حه‌جی محه‌مه‌دێ باپیر و ئاری ئه‌و بوو، لێ كاروانێ دیلا ب دوماهی هات و ده‌یبابێن ئاری دیارنه‌بوون. ئێدی بۆ وان باوه‌ری چێبوو كو یان شه‌هید بووینه‌ یان ژی ده‌ربازی ئالیێ دی یێ سنوورێ باكوورێ كوردستانێ بووینه‌.
هه‌رۆژ ئاری د خریقێنكێن خوه‌ دا د خه‌و دچوو، لێ نوكه‌ ترسه‌كا دی ژی هاته‌ سه‌ر یا ده‌یبابا، ئێدی حه‌جی محه‌مه‌دێ باپیر ژ وێ چه‌ندێ دترسیت كو كورده‌كی خوه‌فرۆش بچیت و ئاگه‌هداریا له‌شكه‌رێ دوژمنی بكه‌ت كو ئه‌ڤه‌ كوڕێ پێشمه‌رگه‌یه‌كی یێ ل ڤێرێ، وی ده‌می ئێدی چاره‌نڤیسێ ئاری ژی دێ وه‌كی یێ وان ب هه‌زاران زارۆكان بیت یێن برینه‌ بیابانا ژێریا عێراق و بساخی بن ئاخ كرین. ژ به‌ر هندێ ئێدی پیر و باپیرێن ئاری بوونه‌ شڤانێن وی كو وی بهێلنه‌ دخانیڤه‌ و نه‌هێلن ب چ ڕه‌نگا ده‌ركه‌ڤیته‌ ده‌رڤه‌ ناڤ زارۆكا یاریا بكه‌ت.
ژ ئالیه‌كی دیڤه‌ رادیۆیا BBC و هنده‌ك ڕادیۆیێن دی دیاركرن و كو نێزیكی 100 هزار كه‌س ژ باشوورێ كوردستانێ ژ هێرشێن كیمیاوی ڕزگار بوونه‌ وخوه‌ گه‌هاندنه‌ باكوورێ كوردستانێ و حوكمه‌تا توركی ژی ئه‌و ل 3 كه‌مپێن ئامه‌د، ماردین و مووشێ بنه‌جی كرینه‌، لێ دیسان ژی باپیرێ ئاری هه‌ر چ پیزانینێن دروست نه‌بوون كانێ گه‌لۆ ده‌یبابێن ئاری ژ دناڤ ڤان كه‌سان دانه‌ یان ن؟
هۆسا نێزیكی 6 مه‌ها ده‌رباز بوون بێی كو باپیرێ ئاری تشته‌كی ژ ده‌یبابێن وی بزانیت. جاره‌كێ ل نیڤ شه‌ڤه‌كا دره‌نگ ده‌رگه‌هێ وان هاته‌ قوتان، خورپێن كه‌فته‌ دلێ پیر و باپیرا، ئه‌و پشتڕاست بوون كو ڤێ دره‌نگه‌ شه‌ڤێ ئه‌ڤه‌ كه‌س نینه‌ ژبلی مرۆڤكۆژێن دوژمنی و ئه‌و یێن هاتین ئاری ببه‌ن و بكوژن!! لێ پشتی دانوستاندنه‌كا درێژ و بده‌نگه‌كێ نزم ل گه‌ل كه‌سێ ل پشت ده‌رگه‌هی، وی ئه‌و پشتڕاست كرن كو ئه‌و پێشمه‌رگه‌یه‌ و نه‌ مرۆڤێ خرابیێ یه‌، ئێدی وان ژی گوته‌ هه‌ڤدوو یێ خرابیێ بیت یان نه‌، كابرا یێ چه‌كداره‌ ڤێجا چ دوژمن بیت یان پێشمه‌رگه‌ بیت ئه‌گه‌ر بڤێت دشێت ب زۆری ده‌ری بشكێنیت و بێته‌ ژوور، له‌وما ب نیڤ دوودلی وان ده‌رگه‌ه بۆ ڤه‌كر و ئه‌و ب ژووركه‌فت كو هه‌تا بن شووتكێ جلكێن وی د ته‌ڕ بوون و ژ سه‌رما برسا دڤه‌له‌رزی، پشتی وان سۆپه‌ بۆ خوه‌شكری و جلكێن وی زوها بووین د به‌ڕ را خوارن خاری و چایه‌كا گه‌رم ژی ب سه‌ردا كری، ئێدی وی ده‌ست ب ئاخفتنێ كر و گوته‌ وان: ناڤێ من سه‌ید ڕه‌مه‌زانێ چه‌لكی یه‌ و ئه‌ز هه‌ڤالێ ( سه‌لیم )ێ بابێ ئاری مه‌، ئه‌ز ژی پێشمه‌رگه‌مه‌ لێ ماڵا منا ل گوندێ ( شیڤ ڕه‌زانێ ) یێ ئالیێ دی یێ باكوورێ كوردستانێ و ئه‌ز نه‌چوومه‌ كه‌مپێن په‌نابه‌را ژبه‌ر كو د ده‌مێ خوه‌ دا ئه‌ز تووشی نه‌خۆشیه‌كێ ببووم و ب ده‌ستوورا شوڕشێ و هاریكاریا هنده‌ك كوردێن باكوور ناسناما توركی بۆ من هاته‌ چێكرن دا كو بشێم بچمه‌ توركی و چاره‌سه‌ریا نه‌خۆشیا خوه‌ بكه‌م.
ژ ڤێرێ وێ دێ بیته‌ پشكا دووێ
(2-2)
و نوكه‌ ژی ئه‌ز وه‌كی وه‌ڵاتیه‌كێ توركی مه‌ و له‌وما ل وی گوندی مامه‌ و نه‌چوومه‌ كه‌مپا. سه‌لیمێ بابێ ئاری ل گه‌ل مالباتا خوه‌ یێ ل كه‌مپا ئامه‌دێ و وی ب ڕێیا نامه‌یه‌كێ ئه‌زێ ئاگه‌هداركریم كو ئاریێ مایه‌ ل بێگۆڤا و داخوازا ژ من كری كو ئه‌ز بێم وی ببه‌م و بگه‌هینمه‌ ده‌یبابێن وی. لێ ژ به‌ر كو حه‌جی محه‌مه‌دی چ جارا سه‌ید ره‌مه‌زان نه‌دیتبوو و باوه‌ریا وی پێ نه‌هات و گوتێ: ئه‌ڤ تشتێ تو دبێژی مه‌ هیچ های ژێ نینه‌، نه‌ ئه‌م چ كه‌سا ب ناڤێ سه‌لیم دناسین و نه‌ ژی ب ناڤێ ئاری. هێشتا حه‌جی پشتڕاست نه‌بوویه‌ كو سه‌ید ره‌مه‌زان پێشمه‌رگه‌یه‌.
سه‌ید ڕه‌مه‌زانی گوتێ: حه‌جی سه‌لیم زاڤایێ ته‌یه‌ و نوكه‌ ماڵا وی یا ل كه‌مپا ئامه‌دێ و ئاری كوڕێ ویه‌ و یێ ل ده‌ف ته‌، سه‌لیمی نامه‌ یا بۆ من ڤڕێكری كو ئه‌ز بێم كوڕێ وی ببه‌م و بگه‌هینمه‌ وی، من ژی سه‌رخاترا هه‌ڤالینیێ و ڤی زارۆكی ژیانا خوه‌ یا ئێخستیه‌ مه‌ترسییێ و ئه‌ڤه‌ 2 شه‌ڤ و 2 رۆژه‌ ئه‌ز ب ڕێ تێم، ب رۆژ خوه‌ ل جهه‌كی ڤه‌دشێرم و ب شه‌ڤ چۆلبڕ تێم، تو دزانی هندی تو بهۆستا خوه‌ دانی نه‌مایه‌ كو له‌شكه‌ر و جاشێن دوژمنی تێدا نه‌بن، ئه‌ڤه‌ ڕێیا مرنێ یه‌، لێ من سه‌رخاترا وان یا خوه‌ لێدای، ڤێجا ئه‌ز ژ ڤێرێ ناچم هه‌تا ئه‌ز ڤی زارۆكی ل گه‌ل خوه‌ نه‌بم و فه‌رموو ئه‌ڤه‌ ژی ناما بابێ ئاری یا بۆ من ڤڕێكری، و سه‌ید ره‌مه‌زانی ئه‌و ناما كو بابێ ئاری بۆ ڤڕێكری و داخواز ژێ كری كو بچیت كوڕێ وی بۆ بینیت، كره‌ دده‌ستێ حه‌جی دا، پشتی حه‌كیمێ كوڕێ حه‌جی ناما بابێ ئاری بۆ بابێ خوه‌ خواندی ئێدی تازه‌ باوه‌ركر كو ئه‌ڤه‌ پێشمه‌رگه‌یه‌ و نه‌ زه‌لامێ دوژمنیه‌.
ئێدی ئه‌و ڕابوون چانتكێ سه‌یدی تژی نان و مێویژ و پسكێت كرن و مه‌ته‌رێ وی یێ ئاڤێ ژی تژی ئاڤ كر و ئاری ژی ژ خه‌و ڕاكر و پشتی گه‌له‌ك د به‌ر دا كری و گوتی و گوتنێ: ده‌یبابێن ته‌ یێن ل وێرا هه‌، دێ ته‌ به‌ینه‌ ده‌ف وان به‌س دڤێت تو نه‌گری و ده‌نگێ خوه‌ ژی نه‌كه‌ی. هه‌ر ل وێرێ سه‌یدی ب شووتكا خوه‌ ئاری باش ب پشتا خوه‌ڤه‌ گرێدا و ب شاره‌زایی د ناڤبه‌را بنگه‌هێن دوژمنی ڕا خوه‌ گه‌هانده‌ ڕووبارێ خابووری و كاربوو ئاڤا خابووری یا وه‌كی به‌فرێ و ده‌ربازی ڕه‌خێ دی بوو و دیسان هه‌ر د ناڤ ره‌بیه‌ و چه‌په‌رێن دوژمنی ڕا كه‌فته‌ به‌ته‌نێن چیایێ كێسته‌ و ژێهه‌ل به‌ره‌ڤ سنوورێ باكوورێ كوردستانێ. پشتی تاری ژ ئه‌ردی ڕابووی و بوویه‌ رۆناهی ل سه‌رێ گره‌كێ بلند دناڤ ته‌ڕاشه‌كا تاری ڕا جهێ خوه‌ چێكر و هنده‌ك پووش و په‌له‌خ بۆ ئاری كۆمكر و چاكیتێ خوه‌ ب سه‌ردادا و نڤاند و وی ژی بدووربینا خوه‌ به‌رده‌وام چاڤدێریا بزاڤێن دوژمنی دكر ب تایبه‌ت ل وان جهێن كو ئه‌و دێ تێڕا ده‌رباز بیت. پشتی ئێڤاری تاری كه‌فتیه‌ڤه‌ ئه‌ردی، جاره‌كا دی ئاری ب پشتا خوه‌ڤه‌ گرێدا و كه‌فته‌ڤه‌ ڕێ، لێ شه‌ڤ ب دووماهی هات و نه‌گه‌هه‌شتنه‌ سنوورێ باكوور، ڕێ ژی گه‌له‌ك نه‌مابوو، له‌وما وی نه‌ڤیا رۆژه‌كا دی ب ڤه‌شارتن د ناڤ ته‌ڕاشا ڕا ده‌رباز بكه‌ت، ئو وی كه‌له‌خێ خوه‌ و ئاری باش ب چلیێ هشكێ دارا و په‌له‌خا گیای داپۆشی و فیشه‌ك بره‌ به‌ر تڤه‌نگا خوه‌ و بده‌ستێ خوه‌ گرت و پشتی گه‌له‌ك ب هووری ب دووربینێ چاڤدێریا ڕێیا خوه‌ كری، هێدی و ب هشیاری كه‌فته‌ ڤه‌ ڕێ، لێ پشتی نیڤ دمژمێرا ڕێ ده‌مێ ل نێزیك ( بێلمبیرێ ) ل سه‌رێ مله‌كێ سه‌ركه‌فتی و هند دیت نێزیكی 10 له‌شكه‌رێن دوژمنی ڕاست سه‌ركه‌فتنه‌ به‌ر سینگێ وی و وان پێكڤه‌ وه‌ك تاڤیا بارانێ شێلكا گولله‌یان داڕێته‌ سه‌ر وان، ئێدی وی ژی چ پێ نه‌ما ژ بلی كو خوه‌ پاڤێته‌ ئه‌ردی و خوه‌ و ئاری ( كو ب پشتا ویڤه‌ یێ گرێدایی بوو ) د وی كه‌ندالی دا گڕێل كه‌ت و هۆسا شیا خوه‌ ژ وان نه‌په‌نی بكه‌ت و ل بنێ وێ دۆلێ خوه‌ كێشانه‌ دناڤ ته‌ڕاشه‌كێ دا ل به‌ر سینگێ ڕزده‌یه‌كا كه‌ڤری كو ژ شانسێ وان چلیێ ته‌ڕاشێ یێ هشك بووی لێ نه‌وه‌راندیه‌ و هه‌میێ پێڤه‌ و هه‌ر زوو د ناڤ ته‌ڕاشێ ڕا ب قه‌مه‌ی ئه‌رد ڤه‌كۆلا و پاڵدا تێدا و به‌لگێن چلی و په‌له‌خا گیای ڕادانه‌ سه‌ر كه‌له‌خێ خوه‌ و ئاری و ته‌نێ چاڤێن خوه‌ هێلانه‌ ژ ده‌رڤه‌. له‌شكه‌ر ب دووڤدا هاتن و ل نێزیكی وان دهاتنوو د چوون و دگوتنه‌ هه‌ڤدوو: باشه‌ ئه‌م دزانین مه‌ كوشت، به‌لێ پا كا ته‌رمێ وی؟ ئێكی ژی دگوت: ئه‌ز نزانم ئه‌و چ مرۆڤ بوو یێ وه‌سا، من دیت ئێك مرۆڤ بوو، لێ هندی دوو مرۆڤا بوو، هه‌ڤالێ وی ژی دگوتێ: موخه‌رب ( پێشمه‌رگه‌ ) هه‌می هۆسا د مه‌زن و ب سه‌همن. ( ئاری پشتی مه‌زن بووی گه‌له‌ك جارا بۆ من به‌حسا وێ گاڤێ دكه‌ت و دبێژیت: له‌شكه‌ر هاتنه‌ هنداڤی سه‌رێ مه‌، من دیت كولاڤێن وان د سۆر بوون، سه‌ید ره‌مه‌زانی ده‌ستێ خوه‌ ب ده‌ڤێ من ڤه‌نا بوو دا نه‌كه‌م قێڕی و من ژی پشتی كولاڤێن وان یێن سۆر دیتین ژ ترسادا چاڤێن خوه‌ گرتن.
پشتی ده‌مێ نێزیكی ده‌مژمێره‌كا لێگه‌ڕیانێ و گولله‌ باراندنێ ل وان به‌ته‌ن و كه‌ڤر و ته‌ڕاشا له‌شكه‌ر بێهیڤی بوون وان ڕێیا خوه‌ گرت و چوون. سه‌ید ره‌مه‌زان و ئاری ژی مان تا كو بوویه‌ڤه‌ تاری و پاشی كه‌فتنه‌ ڕێ و نیڤ شه‌ڤ گه‌هه‌شتنه‌ گوندێ شیڤ ڕه‌زانێ ل مالا سه‌یدی و رۆژا پاشتر ب ته‌له‌فۆنێ وی مزگینی گه‌هانده‌ بابێ ئاری و پشتی چه‌ند رۆژه‌كا ژی ئاری ل گه‌ل خوه‌ بر و گه‌هانده‌ ده‌یبابا ل كه‌مپا ئامه‌دێ.

تێبینی :
1- سه‌ید ڕه‌مه‌زان چه‌لكی ب مالبات ڤه‌ بۆ ده‌مێ 25 ساڵانه‌ ل ویله‌یه‌تا ته‌نه‌سی یا ئه‌مریكا دژیت.
2- ئاری ژی 24 ساڵه‌ لگه‌ل ده‌یبابێن خوه‌ ل سوێد دژیت و نوكه‌ بابێ 2 زارۆكانه‌.
3- سه‌لیم بابێ ئاری ژی هه‌ر ل سوێد دژیت.
4- باپیرێ ئاری حه‌جی محه‌مه‌د بێتكاری به‌ری چه‌ند ساڵه‌كا ل دهۆكێ وه‌فاتكریه‌.

سالا 1988 ده‌مێ ئه‌ز ژ بۆ چاره‌سه‌ریا برینداریا خوه‌ چوویمه‌ رۆژهه‌لاتێ كوردستانێ من ل وێرێ پێشمه‌رگه‌یه‌كی دی یێ بریندار دیت و بۆ ده‌مێ ساڵه‌كێ ئه‌م ماینه‌ د ئێك ژوورڤه‌، له‌وما گه‌له‌ك جارا وی چیرۆكا خوه‌ یا پڕی ته‌راژیدی بۆ من ڤه‌دگێرا كانێ چه‌وا ل ساڵا 1980 ده‌ما ئه‌و ل گوندێ كورێمه‌ یێ ناحیا مانگێشكێ بوون ل گه‌ل گرۆپه‌كا پێشمه‌رگا هێزه‌كا جاشێن ڕژێما سه‌دامی ب سه‌ر وان داگرت و د ئه‌نجامێ ڤی شه‌ڕی دا ئه‌و و پێشمه‌رگه‌یه‌كی دی بریندار بوون، پێشمه‌رگێ دی هاته‌ ڕزگاركرن، لێ ئه‌و ڕزگار نه‌بوو، ژبه‌ر كو گولله‌ ب سه‌رێ وی كه‌فتبوو و له‌شێ وی نیڤ ئیفلیج كربوو و ژ ئالیێ جاشاڤه‌ هاته‌ دیلكرن، ب گوتنا وی وی گه‌له‌ك هیڤی و لاڤا ژ جاشاكرن كو وی ته‌سلیمی به‌عسیا نه‌كه‌ن چنكو دێ وی ب ئه‌شكه‌نجێ كوژن و ئه‌گه‌ر وان بڤێت هه‌ر نوكه‌ بلا وی بكوژن به‌لێ نه‌ده‌نه‌ ده‌ست به‌عسیا، لێ جاشا گوتبوویێ: تۆ پاریه‌كی قه‌له‌وی و دێ پاره‌یه‌كی باش ب ته‌ وه‌رگرین، ژبه‌ر هندێ دێ هه‌ر ته‌ ده‌ینه‌ ده‌ست و وان ئه‌و ڕاكێشا بوو و ب شانازیڤه‌ وه‌ك نێچیره‌كا باش ئه‌و دابوو ده‌ستێ زه‌بانیێن ئه‌منا به‌عسیان. ئێدی چیرۆكا وی ژ ئه‌منا مانگێشكێ و پاشی یا دهۆكێ و تاكو گه‌هه‌شتیه‌ زیندان و ئه‌شكه‌نجه‌خانا هۆڤانه‌ یا ب ناڤێ (الهیئه‌ الخاصه‌) ل كه‌ركووكێ ده‌ست پێدكه‌ت. ژ به‌ر كو من ژی هه‌مان چیرۆك هه‌بوو د ده‌ستێ زه‌بانیێن به‌عسیان دا ( ژبلی كو ئه‌و وه‌ك پێشمه‌رگه‌یه‌كی بریندار و ئه‌ز وه‌ك قوتابیه‌ك ژ قوتابخانێ هاتبووینه‌ گرتن ) له‌وما من ب هووری گوهداری ل چیرۆكا وی دكر. ل هه‌یئا كه‌ركووكێ د سه‌ر هندێ را كو ئه‌و یێ بریندار و ئیفلیج ژی بوو لێ قه‌سابێن به‌عسیا ب كێر و ساتۆرا كه‌تبوونه‌ له‌شێ وی و ب كیلۆیان گۆش ژێڤه‌كربوون، من باوه‌ر نه‌كر هه‌تا رۆژه‌كێ ب چاڤێن گریڤه‌ له‌شێ خوه‌ نیشا من دای كو ته‌نێ هه‌ستی و ڕه‌هێن سپی مابوون ل ڕانێن وی.
هه‌ڤالێ مه‌ پێڤه‌ چوو و گوت كو: پشتی له‌شێ وی دایه‌ به‌ر كێر و ساتۆرا و ئه‌و هه‌موو گۆشت ژێڤه‌كری، ئێدی وی های ژ خوه‌ نه‌مایه‌ و دناڤ خوینا خوه‌ دا دناڤ به‌تانیه‌كی پێچایه‌ و هاڤێتیه‌ د زیندانێ ڤه‌. پشتی چه‌ند رۆژه‌كا وی های ژ خوه‌ بوویه‌ كو زیندانیێن دی ل دۆرێن وینه‌ و چاڤێ خوه‌ دده‌نێ و وان بۆ وی ڤه‌گێڕایه‌ كو ئه‌و یێ مری بوویه‌ و گه‌له‌ك جارا زه‌بانیا ڤیایه‌ وی ببه‌ن و بن ئاخ بكه‌ن ل جهه‌كی لێ زیندانیان لاڤا ژێكریه‌ و گوتیه‌ وان كو ئه‌و نه‌مریه‌ هێشتا گیان د له‌شێ وی دا مایه‌، بۆ وان گه‌له‌ك سه‌یره‌ كانێ چه‌وا ئه‌و ساخ بوویه‌ڤه‌ !!
هه‌لبه‌ت د ڤی ده‌می دا نووچه‌یێ شه‌هیدبوونا وی دگه‌هیته‌ شورشێ و سه‌ركردایه‌تیا پارتی و ئه‌ڤ نووچه‌ ل ئێزگێ ده‌نگێ كوردستانێ تێته‌ خواندن و ناڤێ وی د تۆمارا شه‌هیدێن شورشێ یێن پارتی دا تێته‌ تۆماركرن و تاكو ئه‌و ب خوه‌ دگه‌هیته‌ باره‌گایێ مه‌كته‌با سیاسی یا پارتی ناڤێ وی هه‌ر د تۆمارا شه‌هیدادانه‌و پشتی دگه‌هیته‌ وێرێ ژ نوو كاك ئیحسان باجلۆری ناڤێ وی ژ تۆمارا شه‌هیدا ده‌رتێخیت.
هه‌ڤالێ مه‌ ب حوكمێ هه‌تا هه‌تایی تێته‌ حوكمرن و پشتی چه‌ند ساڵه‌كان ژی ب لێبوورینه‌كا گشتی ئازاد دبیت و ب هاریكاریا هه‌ڤال و مرۆڤێن خوه‌، خوه‌ دگه‌هینیته‌ ده‌ڤه‌رێن ڕزگاركری و پاشی ژی ب ڕێیا شوَڕه‌شێ دگه‌هیته‌ رۆژهه‌لاتێ كوردستانێ ب هیڤیا هندێ كو به‌لكی بشێت ل ئیرانێ یان ژی بگه‌هیته‌ وه‌لاته‌كێ ئه‌ورۆپی ژ بۆ چاره‌سه‌ریا خوه‌.
پشتی چه‌ند ساڵه‌كا ده‌ما ئه‌ز ل سوێد بووم ته‌له‌فۆنا من لێدا و ده‌ما من به‌رسڤدای من بهیست كو ئه‌ڤه‌ هه‌ڤالێ مه‌ یێ بریندار كاك ره‌جه‌ب كۆڤلی یه‌ و گوته‌ من ئه‌زێ ل ئه‌ڵمانیا په‌نابه‌رم و ل ڤێرێ دژیم و پاشی ڤێ دوماهیێ ئه‌م ب ڕێیا فه‌یسبووكێ ژی ئه‌م بووینه‌ ڤه‌ هه‌ڤال.
به‌ری چه‌ند رۆژه‌كا ده‌ما من به‌ڵاڤۆكا ( اخبار كوردستان ) یا سه‌رده‌مێ شوڕشێ دخواند دوو نووچه‌یێن بالكێش ل سه‌ر كاك ره‌جه‌ب ب چاڤ من كه‌فتن كو یا ئێكێ باس ل برینداربوون و دیل بوونا وی دكه‌ت ل 13/7/1980 و یا دووێ ژی كو چه‌ند هه‌فتیه‌كا پشتی دیلكرنا ویه‌، باس ل شه‌هیدبوونا وی دكه‌ت ل هه‌یئا كه‌ركووكێ ل ژێر ئه‌شكه‌نجێ.
ژ به‌ر هندێ ژی من ڤیا كورتیه‌كێ ل سه‌ر چیرۆكا پڕ ئازارا ڤی پێشمه‌رگه‌ی بنڤێسم كو خۆشبه‌ختانه‌ نوكه‌ ل ئه‌ڵمانیا دژیت و خودان زارۆك و ماله‌.

ژ بیروه‌ریێن شوڕشێ
شوڕش نه‌ ته‌نێ شه‌ڕ بوو لێ جۆره‌كی دی یێ ژیانێ ژی ل پشت وی شه‌رێ هه‌بوو
زستانا سالا 1982 بوو، ئه‌م گرۆپه‌كێ 10 پێشمه‌رگه‌ بووین و پشتی كاره‌ك ب مه‌ هاتیه‌ سپارتن، ژ لژنا ناڤچا ئامێدیێ ل گه‌لیێ بازێ ل قونتارا چیایێ مه‌تینا، ئه‌م بڕیكه‌فتین د ناڤ ده‌ڤه‌را ناحیا مانگێشكێ را مه‌ خوه‌ گه‌هانده‌ كاڤله‌ گوندێ قه‌شه‌فڕێ، ل هنداڤی سێمێلێ. ب رۆژ مه‌ ل وێرێ خوه‌ هشار ددا و ب شه‌ڤ خوه‌ به‌رددا ناڤ گوندێ ده‌ڤه‌رێ، دوولبێ، مالتا، گه‌ڤه‌ركێ و قه‌سارا و گوندێن دی، ژ بۆ كارێ ب مه‌ هاتیه‌ سپارتن بجه بینین. پشتی چه‌ند رۆژه‌كا ب دوماهی ئینانا وان كاران و پشتی ب شێوه‌یه‌كێ سه‌یر ژ كه‌مینه‌كا دوژمنی رزگاربووین ل ژێریا گوندێ سێجێ، د باشوورێ دهوكێ را و د ناڤ ده‌شتا قایدیا ( سینا و شێخ خدرێ ) را مه‌ خوه‌ گه‌هانده‌ گه‌لی كورتكی و پاشی د ناڤ ده‌ڤه‌را مزووری ژێری و به‌رواری ژێری را، پشتی چه‌ند رۆژه‌كا گه‌هه‌شتینه‌ گوندێ گاره‌ی، ل ده‌ڤه‌را به‌رێ گاره‌ی.
ل وێرێ ئه‌م ب سه‌ر رێكخراوا پێشمه‌رگه‌ی یا شه‌هید ئه‌نوه‌ر مایی هه‌لبووین كو شه‌هیدێ قاره‌مان شه‌عبان غه‌فار وی ده‌می به‌رپرسێ وێ بوو و ئه‌ڤ رێكخراوه‌ دهاته‌ هه‌ژمارتن ئێك ژ مه‌زنترین گرۆپێن پێشمه‌رگه‌ی ل به‌هدینان، كو هه‌ژمارا پێشمه‌رگێن ڤێ رێكخراوێ خوه‌ ل نێزیكی 150 پێشمه‌رگا ددا. لێ دڤی ده‌می دا نێزیكی 80 پێشمه‌رگا لگه‌ل شه‌هید شه‌عبانی د ئه‌ركی دا بوون و یێن دی ل بێنڤه‌دانێ بوون، ژ به‌ر كو وی ده‌می هند چه‌ك نه‌بوو تێرا ڤێ هه‌ژمارا مه‌زنا پێشمه‌رگه‌ی بكه‌ت.
ده‌مێ شه‌هید شه‌عبانی ئه‌م دیتین داخوازكر كو ئه‌م ل گه‌ل وان گه‌ڕه‌كێ ( جه‌وله‌یه‌كێ ) ل ده‌ڤه‌رێ ده‌ستپێبكه‌ین. هه‌رچه‌نده‌ ئه‌و نێزیكی دوو مه‌ها بوو ئه‌م ده‌ركه‌فتین و پشتی كاره‌كی گران و چه‌ند جارا ژی ل گه‌ل دوژمنی رووبروو بووین و هه‌ڤاله‌كێ مه‌ژی دێمێ وی نیڤ شه‌له‌لێ ( شلل نصفی ) گرتی، ئه‌م گه‌له‌ك شه‌پرزه‌ و وه‌ستیایی بووین. لێ ئه‌و كی پێشمه‌رگه‌یه‌ ناخوازیت ل گه‌ل شه‌عبان غه‌فار پێشمه‌رگاتیێ بكه‌ت و وێ شانازیێ وه‌رگریت !!
مه‌ ل گوندێ گاره‌ی ل رۆژاڤایێ ده‌ڤه‌را به‌رێ گاره‌ی گه‌ڕا خوه‌ ده‌ستپێكر ل گه‌ل شه‌هید شه‌عبان و هه‌ڤالێن وی، كو ئه‌م بووینه‌ نێزیكی 90 پێشمه‌رگا. گه‌ڕا مه‌ به‌ره‌ڤ رۆژهه‌لاتێ به‌رێ گاره‌ی ڤه‌ چوو و تا كو ئه‌م گه‌هه‌شتینه‌ ده‌ڤه‌را زێبار ل گوندێ كافیا. پاشی چووینه‌ گوندێ سیانێ، كو گونده‌كێ كاڤله‌ و دكه‌ڤیته‌ گه‌لیه‌كێ قونتارا چیایێ گاره‌ی ل ئالیێ باشوور به‌ره‌ڤ ده‌ڤه‌را زێبارێ.
ده‌مێ ئه‌م گه‌هه‌شتینه‌ سیانێ مه‌ دیت كو كاك هشیار زێباری، لیوا بابه‌كر زێباری و نه‌مر لیوا عابد مزووری ( كو به‌ری چه‌ند سالان وه‌فات كریه‌ ) و هه‌ردوو ڕه‌حمه‌تیان سلێمان هه‌رنی و عه‌بدولا قادۆ ل گه‌ل چه‌ند پێشمه‌رگه‌یه‌كان ل وێرێ نه‌ و خانیه‌كێ بچووك ژی ئاڤاكرنه‌، لێ بیرا من ناهێت كا دوو ئوده‌ یان سێ بوون! ئه‌و وی ده‌می ل وێرێ مژوولی رێكخستنا لژنا ناڤچا ئاكرێ بوون، كو ئه‌و باره‌گایێ وان بوو.
كاك هشیاری داخواز ژ شه‌هید شه‌عبان كر كو وێ شه‌ڤێ ل ده‌ف وان بمینین. لێ ژبه‌ر كو زستانه‌ و چ خانی و جی ژی نینن ئه‌م ب شه‌ڤ تێدا بمینین، مه‌ نه‌خواست ئه‌م بمینین. پاشی كاك هشیاری ئه‌م رازی كرین كو ئه‌گه‌ر ئه‌م بمینین دێ بۆ مه‌ 3-4 په‌زا كڕن و ڤه‌كوژن و ئه‌م دشێین هه‌تا سپێدێ ئاگری هه‌لكه‌ین و گوشتی بخوین، دا كو بشێین وێ شه‌ڤا سار ده‌ربازبكه‌ین. ژبه‌ر كو مه‌ ژی به‌لكی پتر ژمه‌هه‌كێ بوو گوشت نه‌خواری، ئه‌م ئێكسه‌ر رازی بووین. تا ده‌مژمێر سێی شه‌ڤێ ئه‌م ماینه‌ هشیار ل به‌ر ئاگری ل گه‌ل گۆشت خوارنێ. لێ دیسا ژی پشتی رۆژه‌كا پڕی وه‌ستیان و سه‌رما ئه‌م پێدڤی پیچه‌كا نڤستنێ بووین. ژ به‌ر هندێ پشتی ده‌مژمێر سێی شه‌ڤێ ئه‌ز كه‌فتمه‌ وی گه‌لی و ژێهه‌ل به‌ره‌ڤ بنیا چیایێ گاره‌ی ژ ڕه‌خێ باشووری ڤه‌، ل بن به‌ره‌كی، شكه‌فته‌كێ دگه‌ریام كو بشێم پیچه‌كێ لێ بنڤم. ده‌مه‌كی من شكه‌فته‌ك دیت، پشتی من ب ئه‌له‌تریكا خوه‌ یا بچووك باش ته‌ماشه‌ی نیڤا شكه‌فتێ كری، من دیت شكه‌فت یا تژی كایه‌، لێ نه‌ كایا گه‌نمی بوو، به‌لكی كایا ماشا بوو. وه‌سا دیاره‌ كه‌سه‌كی ل پایزێ ل وان نێزیكا ماشێن خوه‌ گێره‌ كرینه‌ و كایا وان یا كریه‌ شكه‌فتێ كو پاشی بۆ گیاندار و په‌زی خوه‌ ببه‌ت. ئه‌ز نزانم چه‌ند كه‌یفا من هات ده‌ما من ئه‌و شكه‌فتا تژی كاماش دیتی! ئه‌زێ وه‌سا بووم هه‌روه‌كی من كۆشكه‌كا گه‌رما تژی دۆشه‌كێن هریێ دیتی. ئه‌ز زڤڕیم دا وێ مزگینیا خوه‌ش بده‌مه‌ هه‌ڤالێن خوه‌ ژی، لێ ئه‌ز نه‌وێرام بێژمه‌ هه‌میا ژ به‌ر كو ئه‌م هه‌موو نێزیكی 90 كه‌سا بووین وجهێ هه‌میا نه‌ دكر، له‌وما من ب دزیڤه‌ گوته‌ 20 كه‌سه‌كا و ئه‌م ڤه‌قه‌تاین و مه‌ به‌رێ خوه‌ دا شكه‌فتێ و من گوته‌ وان: وه‌رنه‌ ئوتێلا په‌روه‌. مه‌ وان بیست كه‌سان هه‌تا سپێدی دناڤ وێ كاماشێ را خه‌وه‌ك كر، كو ب ڕاستی ژی گه‌له‌ك ژ خه‌وا ئوتێلێن پێنچ ستێرێن ئه‌ورۆپا خوه‌شتر بوو. سپێدێ ژی پشتی هه‌ڤالێن مه‌ گه‌له‌ك ل مه‌ گه‌ڕیاین، ئه‌م دیتین و ژ خه‌و ڕابووین، كو هه‌موو جلك و چه‌كێن مه‌ ببوونه‌ كایا ماشا، لێ هه‌ڤالێن مه‌ گه‌له‌ك به‌خیلی ب مه‌ بر و ڕه‌خنه‌ ل مه‌ گرتن كو ئه‌م وێ شه‌ڤێ بووینه‌ مێڤانێن وێ ئوتێلا پێنچ ستێر و مه‌ ئه‌و هێلاینه‌ ژ ده‌رڤه‌. لێ ئه‌ز باوه‌رناكه‌م كو ئه‌ز چ جارا تام و خوه‌شیا وێ خه‌وێ ژبیربكه‌م.

تێته‌ بیڕا من رۆژا 28/11/1981 بوو، ئه‌و 21 رۆژ بوو مرۆڤكوژێن ئه‌منا به‌عسیا ئه‌ز ژ خویندنگه‌ها من ( هاوكاری )، كو ل گرێ باسێ یا دهوكێ بوو، ره‌ڤاندبووم و پشتی چه‌ند ده‌مژمێره‌كا ب لاندكرۆزه‌كا سپی و لگه‌ل 6 زه‌بانیێن ئه‌منا دهوكێ كو كین و ئاگر ژ ناڤچاڤێن وان دباری ئه‌ز گه‌هاندمه‌ باره‌گایێ ئه‌منا ( ده‌واسه‌ ) ل مووسل و پشتی ب شه‌ق و پێهن و فه‌للاقه‌ بخێرهاتنه‌كا گه‌رم ب من كری ئه‌ز ژوێرێ برمه‌ رێڤه‌به‌ریا ئه‌منا مووسل.
من ل به‌ر نینه‌ ئه‌ز ل ڤێرێ چیرۆكا ئه‌منا مووسل ب درێژی ڤه‌گێرم ژ به‌ر كو مژاڕا مه‌ نه‌ ئه‌وه‌ و ئه‌ز هیڤیدارم د ده‌لیڤه‌یه‌كا دی بۆ من هه‌لكه‌ڤه‌ كو ئه‌ز ب درێژی وێ ڤه‌گێرم.
رۆژا 28/11/1981 ئه‌ز و هه‌ڤالێ من حمید عجیل، كو نوكه‌ مامۆستایه‌ ل په‌یمانگه‌ها هونه‌رێن جوان یا دهوكێ و به‌ری من ئه‌و ل مووسل گرتبوو، ئه‌م ئیناینه‌ ئه‌منا دهوكێ و هاڤێتینه‌ د ئۆده‌یه‌كا ته‌نگ و تاری دا، وهه‌رچه‌نده‌ چاڤێن مه‌ دگرێدایی ژی بوون لێ من زانی كو ئه‌ڤ ئۆده‌یه‌ دكه‌ڤیته ئالیێ رۆژهه‌لاتێ ئه‌منێ. وی ده‌می ئاڤاهیێ نوو یێ ئه‌منا دهوكێ كو ل سه‌رێ گرێ باسێ ل هنداڤ ئاماده‌یی یا كاوه‌ بوو كو نوكه‌ زانكۆ تێدایه‌، چێدكر و هێشتا ته‌مام نه‌ ببوو و ئاڤاهیێ ئه‌منا كه‌ڤن ل به‌ڕامبه‌ر وی ل پشت جادێ بوو ( ئاڤاهیێ نوكه‌ پشكا ناڤخۆیی یا كچان تێدایه‌).
ده‌مێ ئه‌م ژ ده‌رگه‌هی ب پالا و پێهنا هاڤێتینه‌ دژوورڤه‌ ئه‌ز ب پیا ڤه‌ چوومه‌ سه‌ر تشته‌كێ نه‌رم و پشتی زه‌بانیێن ئه‌منێ ده‌رگه‌ گرتی و چووین من ب ده‌ستا سه‌حكرێ، من زانی ئه‌ڤه‌ كه‌له‌خێ مرۆڤه‌كی یه‌ د ناڤ به‌ته‌نیه‌كێ ڕا و من گازی كرێ و من بهیست‌ كو نویز نویزه‌كا د ناڤ ڤێ به‌ته‌نیێ ڕا تێت و هوسا من زانی كو ئه‌ڤ مرۆڤه‌ یێ ساخه‌، ئێدی‌ مه‌ هه‌ردووكا به‌لا خوه‌ ژێڤه‌ نه‌كر و هه‌رچه‌نده‌ ئۆده‌ یا تاری بوو نه‌ چ په‌نجه‌ر تێبوون و نه‌ ژی چ رۆناهی دهه‌ل بوون، لێ پشتی ده‌مه‌كی هێدی هێدی چاڤێن مه‌ فێری تاریێ بوون و هنده‌ك تشت مه‌ دیتن. هوسا مه‌ پتر ئه‌و تێكڤه‌دا و ئه‌م به‌رده‌وام لگه‌ل ئاخفتین و پشتی شیای هنده‌ك په‌یڤا لگه‌ل مه‌ باخڤیت مه‌ زانی كو ناڤێ وی قادره‌ و خه‌لكێ دهوكێ یه‌ و ئه‌و ژی وه‌كی مه‌ هه‌ردووكا ب گونه‌ها كوردبوونێ ( سیاسه‌تێ ) گرتیه‌. قادر ب خوه‌ گه‌نجه‌كێ زێده‌ لاواز و بێهێز بوو و هند ئه‌شكه‌نجه‌ ژی دابوو ژ هه‌موو بزاڤان ببوو و دسه‌ر هندێ ژی ڕا یێ نه‌خۆش بوو و دیار بوو كو ئه‌و هه‌فتیه‌ك بوو ئه‌و یێ پێچای بوو دناڤ وێ به‌ته‌نیێ ڕا و ده‌ستاڤ و هه‌موو پێدڤیێن وی ژی هه‌ر دناڤ وێ به‌ته‌نیێ ڕا بوون، ژ به‌ر هندێ ژی قادری د سه‌ر ره‌وشا خوه‌ ڕا كو ل به‌ر مرنێ بوو، به‌رده‌وام ب ئیشاره‌تا ده‌ستا و په‌یڤێن خوه‌ یێن نیڤه‌رۆ ژ مه‌ دخواست كو خوه‌ ژ وی دوور بكه‌ین ژ به‌ر بێهنێ دا گێژ و نه‌خوه‌ش نه‌بین، لێ ئه‌م دێ كیڤه‌ خوه‌ دوور كه‌ین، ئۆده‌ هه‌می رووبه‌رێ وێنێزیكی 4 م چارگۆشه‌یه.
دیاربوو چه‌ند رۆژه‌ قادری چ خوارن ژی نه‌خواریه‌. نانه‌كا ره‌ق و كه‌ڤن لگه‌ل تڕاره‌كێ ئاڤێ ل به‌ر سه‌رێ وی بوو مه‌ ئه‌و نان هووركره‌ د تڕارێ ئاڤێ دا و هێدی هێدی مه‌ هنده‌ك پاریێن بچووك كرنه‌ دده‌ڤێ وی دا ب زۆری و ئێدی هه‌رۆژ مه‌ چه‌ند پاریه‌ك ددانێ هه‌رچه‌نده‌ چ تشتا خوه‌ د ناڤ هناڤێن وی دا نه‌دگرت، لێ دیسا ژی پشتی چه‌ند رۆژه‌كا پچه‌ك گیان هاته‌ كه‌له‌خێ وی و ئێدی شیا لگه‌ل مه‌ باخڤیت. وه‌سا دیار بوو كو قادری ئێدی زێده‌تر ته‌حه‌مولا ڤێ دۆژه‌هێ و ئه‌شكه‌نجه‌دانێ نه‌دكر و بریار دابوو مرۆڤكوژێن به‌عسیا چ بڤێت ئه‌و دێ ل سه‌ر خوه‌ بێژیت، به‌لكو وی بكوژن یان ئیعدام بكه‌ن دا كو ژ ڤێ دۆژهێ و ئازاردانێ رزگار ببیت. لێ مه‌ باوه‌ری ب وی ئینا كو ئه‌و ب دانپێنانێ دێ پتر كه‌ڤیته‌ به‌ر ئه‌شكه‌نجه‌ و ئازاردانێ و ئێكه‌مین رێكا رزگاریا وی ئه‌وه‌ چ تشتا ل سه‌ر خۆ نه‌بێژیت. چه‌ند جاره‌كا ژی مه‌ داخواز ژ زه‌بانیێن ئه‌منێ كر و گوتێ: ئه‌ڤ گه‌نجه‌ یێ ل به‌ر مرنێ چاره‌یه‌كێ لێبكه‌ن، وان ژی لگه‌ل هنده‌ك ئاخفتنێن كرێت و پیس به‌رسڤا مه‌ دا و گوت: مه‌ یێ بۆ مرنێ هێلای ژیانا وی گه‌له‌ك نه‌مایه‌.
پشتی هه‌فتیه‌كێ ئه‌ز و هه‌ڤالێ من حمید عجیل چاڤگرێدایی هاڤێتینه‌ د ترۆمبێله‌كا زیندانیان دا و ڕاست به‌رێ مه‌ دا ( هیئه‌ التحقیق الخاصه‌ فی كركوك ) یان وێ زیندانا كو مرۆڤی خوه‌زی ل دۆژه‌هێ دخواستن پێش وێ ڤه‌، كو ئه‌و ژی چیرۆكه‌كا دیا درێژه‌ و بلا ئه‌و ژی بۆ ده‌لیڤه‌یه‌كا دی بیت. پشتی مه‌ قادرێ خوه‌ ل وێرێ هێلایی 80% من هیڤیا وی دانا بوو كو ئه‌و جاره‌كادی بێته‌ڤه‌ ناڤ ژیانێ.
پشتی ل سالا 1982 ئه‌ز ژ ( هه‌یئا كه‌ركوكێ ) رزگار بوویم و پاشی ژ گرتنا دووێ ژی رزگار بوویم و گه‌هه‌شتیمه‌ ناڤ شۆرشێ و به‌رده‌وام قادر بۆ من ببوو پرسه‌ك كو كه‌سێ به‌رسڤ ڤێ نه‌بوو. ل پێشمه‌رگاتیێ، ل ده‌ربه‌ده‌ریێ و ل كوردستانێ من گه‌له‌ك جاڕا پرسا وی یا كری و هه‌ر كه‌سه‌كێ من گۆمان كربا كو دێ تشته‌كی ژ قادری زانیت ئه‌ز ژێ دپرسیم لێ ئه‌ردو ئه‌سمانا ل قادری سووند خوار.
پشتی ئه‌ز ژ ده‌رڤه‌ زڤریمه‌ڤه‌ كوردستانێ و ل دهوكێ رۆژا 11/4/2010 ده‌رگه‌هێ مه‌ هاته‌ قوَتان و پاشی گوتنه‌ من كه‌سه‌ك یێ پرسا ته‌ دكه‌ت و ئه‌ز ده‌ركه‌فتم دبینم زه‌لامه‌كێ نه‌ قه‌له‌و نه‌ لاواز كو پرچێ وی په‌لاڤ ماشی بوویه‌ ل به‌ر ده‌رگه‌هی یه‌ و چوومه‌ ده‌ستی و من داخواز ژێكر بێته‌ ژوور لێ وی هه‌ر ژمن دپرسی: تۆ من دناسی ؟ من ژی پشتی باش ته‌ماشه‌كریێ سه‌رێ خۆ هه‌ژاند و گوتێ: ببووره‌ ئه‌ز ته‌ ناناسم.
گوته‌ من: چه‌وا ئه‌ز و تۆ پێكڤه‌ دزیندانا ئه‌منێ ڤه‌ بووین! دیسا من نه‌نیاسی. ئینا گوته‌ من: ئه‌ز قادرم ئه‌م ل ئه‌منا دهوكێ پێكڤه‌ بووین‌. ژ به‌ر كو من هینگێ ژی دێمێ وی باش نه‌دیتبوو لێ ئێكسه‌ر من ده‌نگێ وی ناسی و تۆنا ده‌نگێ وی هاته‌ بیڕا من و ئێدی رۆندكا خوه‌ دچاڤێن من نه‌گرت.
ئه‌ز ڕاستی بێژم پشتی كو هنده‌ ساله‌ من هند پرسا وی كری و چ پێزانین ژێ نه‌زانین و ب تایبه‌تی د وێ ره‌وشا مه‌ تێدا دیتی ل ئه‌منا دهوكێ من دانابوو 100% یێ ب ئه‌شكه‌نجێ هاتیه‌ كوشتن. ژ به‌ر هندێ ژی من ژ چاڤێن خوه‌ باوه‌ر نه‌كر ئه‌ڤه‌ ئه‌وه‌ لێ تۆنا ده‌نگێ وی ئه‌ز برمه‌ڤه‌ وێ رۆژێ و هه‌ر تشت ئیناڤه‌ به‌رچاڤێن من.
قادری بۆ من ڤه‌گێڕا كو شیره‌تا مه‌ یا كو مه‌ گۆتیێ چ پێزانینا نه‌ده‌ ئه‌منێ ل سه‌ر خوه‌ ئه‌و ژ مرنێ رزگاركریه‌ و ئه‌گه‌ر ئه‌م تێ نه‌ ته‌شقلیباین وی بریاڕا مرنا خوه‌ دابوو. ئیرۆ ژی قادر ژ ده‌رڤه‌ی وه‌لاتی هاتیه‌ دا كو ئه‌ز ل دادگه‌هێ بۆ ببمه‌ شاهدێ گرتنا وی دا كو ببیته‌ ئه‌ندامێ كۆمه‌لا زیندانیێن سیاسیێن كوردستانێ.
ڤێجا ئه‌ز دبێژم: قادر كه‌كۆ تۆ بخێر هاتی و ئه‌ز هزار جاڕا دێ بمه‌ شاهدێ خه‌بات و ئه‌شكه‌نجه‌ و ئازاڕا ته‌ و گه‌له‌ك قادرێن دی، نه‌ كو ته‌نێ ل دادگه‌هێ لێ بۆ دیروَكێ ژی ئه‌ز شاهدم.

بهارا ساڵا 1987 پشتی ڕژێما به‌عسا داگیركه‌ر هنده‌ك بڕیارێن هۆڤانه‌ ده‌رێخستین ژ بۆ كاڤلكرنا كوردستانێ و قڕكرنا خه‌لكێ كورد، كارڤه‌دانا شوڕشێ ژی به‌رامبه‌ر ڤان كریاران گه‌له‌كا دژوار بوو و ئێدی چالاكیێن پێشمه‌رگاتی یێن له‌شكه‌ری ده‌ربازی قۆناغه‌كا نوو بوون و جۆر و قه‌بارێ ڤان كریاران ژی هاته‌ گوهۆڕین.
وی ده‌می دكتۆر رۆژ نوری شاوه‌یس وه‌ك سه‌رپه‌رشتێ لقا ئێك ( كو هه‌موو به‌هدینان ڤه‌دگرت ) هاته‌ ده‌ستنیشانكرن ژ ئالیێ جه‌نابێ سه‌رۆك بارزانی ڤه‌. هه‌لبه‌ت رۆڵێ دكتۆر ڕۆژی د ڤان چالاكیێن پێشمه‌رگه‌ی دا گه‌له‌كێ به‌رچاڤ بوو، ب تایبه‌ت سه‌رپه‌رشتی كرنا وی یا گه‌له‌ك سه‌ركه‌فتی.
هۆسا بۆ جارا ئێكێ د دیرووكا شوڕشا گولانێ دا ل شه‌ڤا 5/5/1987 -4 فه‌وجا ( سۆتكی ) كو دكه‌فته‌ سه‌ر جادا بێگۆڤا – كانیماسێ نێزیكی گوندێ تشیشێ ب هه‌موو چه‌په‌ر و ره‌بیێن وێ ڤه‌ هاته‌ ڕزگاركرن ژ ئالیێ هێزێن پێشمه‌رگه‌ی ڤه‌ كو زیانێن پێشمه‌رگه‌ی ته‌نێ دوو سێ بریندارێن سڤك بوون.. ئێدی ئه‌ڤ چالاكیه‌ بوو كلیلا گه‌له‌ك چالاكیێن دی یێن مه‌زنتر ل ڤێ ده‌ڤه‌رێ.
پشتی هینگێ بڕیار هاته‌ دان كو هه‌ردوو فه‌وجێن جاشا یێن فرۆكه‌خانا بامه‌ڕنێ ته‌ڤی هه‌موو چه‌په‌ر و ڕه‌بیه‌یێن سه‌ر ب وان ڤه‌ ل بیره‌وه‌ریا شوڕشا گولانێ بێنه‌ گرتن، كو باره‌گایێ فه‌وجه‌كێ ژ وان دناڤ فرۆكه‌خانێ ب خوه‌ دا بوو و یا دی ژی ل باكوورێ رۆژهه‌لاتێ فرۆكه‌خانێ بوو.
پشتی بۆ ده‌مێ چه‌ند رۆژه‌كان چاڤنێڕی و ڤه‌كۆلین ( استگلاع )ا هه‌ردووو فه‌وجا و هه‌موو چه‌په‌رێن ده‌ڤه‌رێ هاتیه‌ كرن ژ ئالیێ كۆمیته‌یه‌كا له‌شكه‌ریڤه‌، بڕیار هاته‌ دان وه‌ك پیرۆزكرنه‌ك ژ بۆ بیره‌وه‌ریا شوڕشا 26 گولانێ شه‌ڤا 25-26/گولانێ چالاكی بهێته‌ كرن، ژ بۆ ڤێ چه‌ندێ ژی ئاماده‌كاری هاتنه‌ كرن و هێزێن پێشمه‌رگه‌ی گرۆپ گرۆپ سه‌ركه‌فتنه‌ سه‌رێ چیایێ مه‌تینا ل هنداڤی بامه‌ڕنێ دا كو ده‌مێ تاری دكه‌ڤیته‌ ئه‌ردی هه‌ر هێزه‌ك به‌ره‌ڤ جهێ بۆ هاتیه‌ ده‌ستنیشانكرن بكه‌ڤیته‌ ڕێ، وێ رۆژێ هه‌موویێ ژی به‌رده‌وام ب دووربینا مه‌ چاڤدێریا بزاڤێن دوژمنی دكر كو ژ وێ بلنداهیا چیایێ مه‌تینا هه‌موو بنگه‌هێن دوژمنی باش دهاتنه‌ دیتن.
هێشتا ب دروستی تاری نه‌كه‌فتیه‌ ئه‌ردی مه‌ دیت هێزێن دوژمنی كۆم ب كۆم ژ فه‌وجێن خوه‌ ده‌ركه‌تن و ل وان گر و نهالكان ل دۆرێن فه‌وجا به‌ڵاڤ بوون، ئێدی مه‌ زانی كو ڕه‌وشه‌كا نه‌ نۆرمال یا چێبووی و دوژمنی ب جۆره‌كی ژ جۆران پێزانینێن وه‌رگرتین. ئێدی پشتی ڤێ ڕوودانێ بڕیار هاته‌ دان كو ئه‌ڤ شه‌ڤه‌ چالاكی نه‌ هێته‌ ئه‌نجامدان و بهێته‌ پاشئێخستن و وێ شه‌ڤێ هه‌موو هێزێن پێشمه‌رگه‌ی مانه‌ ل سه‌رێ چیایێ مه‌تینا كۆم ب كۆم ل جهێن نه‌په‌نی ئاگرێن خوه‌ هه‌لكرن و چادانكێن چایێ دانانه‌ سه‌ر ئاگری و ل دۆرێن ئاگری ب چاڤه‌خوارنێ و ستران و سوحبه‌ت و پێكه‌نۆكان ده‌مێ خوه‌ دربازكرن. هه‌ر وێ شه‌ڤێ كۆمبوونه‌كا كادرێن له‌شكه‌ری هاته‌ كرن و دكۆمبوونێ دا د. رۆژ و نه‌مر سه‌ید سالح چه‌مسه‌یدی كو وه‌ك جێگرێ د. رۆژ یێ له‌شكه‌ری بوو ئاماده‌ بوون و نه‌مر سه‌ید سالح بۆ مه‌ دیاركر د ده‌مێ چاڤنێڕی و پلاندانان له‌شكه‌ری دا بۆ سه‌ر فرۆكه‌خانێ وان په‌یوه‌ندی ب فه‌رمانده‌یه‌كێ سریه‌كا جاشێن فرۆكه‌خانێ یێ نیاس كریه‌ كو د ده‌مێ شه‌ڕی دا ئه‌و و سریا خوه‌ شه‌ڕی نه‌كه‌ن و دهاریكار بن و پێشمه‌رگه‌ ژی به‌رامبه‌ر وێ چه‌ندێ دێ گیانێ وان پارێزیت و پشتی چالاكیێ ژی ئه‌و دێ دئازاد بن و وه‌ك دیل دانوستاندن ل گه‌ل وان ناهێته‌ كرن و سه‌یدی دیاركر كو ئه‌و یێ پشتڕاسته‌ ڤی كه‌سی خیانه‌تا كری و پیزانینێن داینه‌ دوژمنی له‌وما ژی وان فه‌وجێن خوه‌ به‌ردان و ل دۆرێن فه‌وجا بۆسه‌دانانه‌.
پشتی كو وێ شه‌ڤێ چ ڕوونه‌دای دوژمنی وه‌سا هزركر ئێدی پلانا پێشمه‌رگه‌ی هاته‌ پووچكرن و ئێدی ئه‌و پچه‌ك ئارام بوون. پشتی ئێڤاریا رۆژا 26 گولانێ مه‌ ب دووربینا باش چاڤدێریا دوژمنی كری مه‌ دیت كو ئه‌و ڤێ جارێ ژ باره‌گایێن خوه‌ نه‌ ده‌ركه‌تنه‌ و زێره‌ڤانیا وان ژی ب شێوه‌یه‌كی نۆرماله‌، د سه‌ر هندێ ڕا كو هه‌ر ل ده‌ستپێكا تاری بوونێ وان ده‌ست ب گولله‌بارانه‌كا دژوار و به‌رده‌وام كر ل هه‌موو ڕه‌خ و دۆرێن خوه‌ ژ ترسادا. لێ مه‌ گوه نه‌دا گولله‌بارانا وان و هه‌ر هێزه‌ك بۆ جهێ خوه‌ یێ ده‌ستنیشانكری ب ڕێكه‌فت، هێزا كو دا ژ باشوورێ فرۆكه‌خانێ ڤه‌ هێرشێ ئینیت ئه‌و ل گوندێ ئه‌ره‌دنا ژووری ب خوار كه‌فتن و د سپنه‌ی ڕا هاتنه‌ بن فرۆكه‌خانێ و یێن دی ژی ئێكسه‌ر ژ مه‌تینا بۆ بامه‌ڕنێ، هنده‌ك هێز بۆ هه‌ر دوو فه‌وجا و هێزه‌ك ژی بۆ چیا دێركی ل رۆژهه‌لاتێ بامه‌ڕنێ و ‌هێزا مه‌ ژی بۆ گرێ سیدی و هه‌تا گرێ هنداڤی گوندێ تنێ كو ڕێزه‌كا چه‌په‌رێن دوژمنی لێ بوو كو وه‌ك مله‌كا پان یان بانیه‌كێ ژ رۆژه‌ڤایێ فرۆكه‌خانێ درێژ دبیت تا كو بن بامه‌ڕنا نوو.
هۆسا هێرشا مه‌ ژ هه‌موو ئالیان ڤه‌ ل نێزیكی ده‌مژمێر 10 شه‌ڤا 26-27/گولانا 1987 ده‌سپێكر. د ده‌مه‌كی گه‌له‌ك كورت دا هه‌ردوو فه‌وج و هه‌موو بنگه‌ و چه‌په‌رێن سه‌ر ب وان ڤه‌ هاتنه‌ گرتن و هه‌ژماره‌كا زۆرا جاشان وه‌ك دیل و گه‌له‌ك چه‌ك و ته‌قه‌مه‌نی و ترۆمبێلێن له‌شكه‌ری كه‌فتنه‌ ده‌ستێ مه‌، لێ مخابن هه‌ردوو پێشمه‌رگێن مه‌ یێن قاره‌مان ستار مه‌لا سه‌دیق بناڤی و فه‌وزی ڕه‌مه‌زان ڕه‌شۆ بریفكی شه‌هید بوون و یاسین كانیساركی و حه‌سه‌ن چه‌مسه‌یدی و ئه‌ندامه‌كی هێزا به‌رگری مللی بریندار بوون.

هه‌ردوو پێشمه‌رگێن شه‌هید بووین( ستار مه‌لا سه‌دیق بناڤی و فه‌وزی ڕه‌مه‌زان ڕه‌شۆ بریفكی) هه‌ڤالێن من یێن نێزیك بوون، لێ شه‌هید فه‌وزی هه‌ڤالێ منێ زارۆكاتیێ و پێشمه‌رگاتیێ ژی بوو، ئێكانێ ده‌یبابێن خوه‌ بوو، گه‌نجه‌كی چاڤ شین و پرچ زه‌ر وه‌كی ئه‌ورۆپیا بوو، هندی بێژی كه‌سه‌كی ئارام، دلپاك، مێرخاس، هه‌ڤالخۆش و ده‌ڤ بكه‌نی بوو. ئه‌و ل ڕه‌خێ مه‌ بوو ل رۆژئاڤایێ فرۆكه‌خانێ، لێ ئه‌م ل ڕه‌بیێن سه‌ری بووین و ئه‌و ل ڕه‌بیا ژ هه‌میا خوارتر بوو كو دكه‌ڤیته‌ هنداڤی گوندێ تنێ.
پشتی مه‌ ئارمانجێن خوه‌ گرتین مه‌ دیت كو هێشتا ل ڕه‌خێ وان شه‌ڕ گه‌له‌كێ گه‌رمه‌ و داخوازا هاریكاریێ ژ مه‌ دكه‌ن. ئه‌م ژی كه‌فتینه‌ وێ بانیێ و بله‌ز به‌ره‌ڤ وان ڤه‌ چووین، بیرا من باش ناهێت كا ئه‌م چه‌ند كه‌س بووین، لێ بیرا من تێت كو ژ وان كه‌سێن لگه‌ل مه‌ ئێك ژێ شه‌هید عه‌مید حوزه‌یفی ئه‌ره‌دنی و ئێك ژی ڕه‌مه‌زانێ برایێ وی بوو. مه‌ گۆمان كر كو هه‌ڤالێن مه‌ تووشی زیانێ بووینه‌ و دته‌نگاڤن له‌وما ژی داخوازا هاریكاریێ ژ مه‌ دكه‌ن، ژ به‌ر هندێ ژی هه‌موو هزرا مه‌ ل سه‌ر وان بوو و كو ئه‌م زوو بگه‌هینه‌ هه‌وارا وان و مه‌ ب ئێكجاری ژ بیركربوو كو ئه‌و بانی هه‌موو ته‌ژی مینه‌ ( الغام ) و ئه‌مێ دناڤ مه‌یدانه‌كا مینان دا د به‌زین، د ڤی ده‌می دا من هند دیت ره‌مه‌زان ئه‌ره‌دنی ده‌ستێ خوه‌ ل سینگێ من دا و ڕاست وه‌كی داره‌كی هشك ئه‌ز ڕاوه‌ستاندم، من ژێ پرسی چیه‌: گوته‌ من: پێ منێ ب تلا مینه‌كا ڤالمارا ( پێنج شیشك ) ڤه‌، لێ باشه‌ من هه‌ست پێكر، تو پێ خوه‌ نه‌هاڤێ ئه‌گه‌ر نه‌ دێ ب مه‌ هه‌رچه‌ندا ڤه‌ په‌قیت و مه‌ پارچه‌ پارچه‌ كه‌ت. ڕه‌مه‌زان كو هینگێ ژی و نوكه‌ ژی پێشمه‌رگه‌یه‌كی گه‌له‌ك قاره‌مان و ل سه‌ر خوه‌ و شاره‌زایه‌ ڕاست ده‌ست خوه‌ دا قه‌مه‌ی ژ به‌ر خوه‌ ئیناده‌ر و هێدی و گه‌له‌ك ب شاره‌زای و ئارامی ئه‌و تێلا مینێ بڕی و لایته‌كا بچووك ژ به‌رووكا خوه‌ ئیناده‌ر و رۆناهیا وێ هه‌لكر و كه‌فته‌ پێشیا مه‌ و گوته‌ مه‌: ته‌نێ پێن خوه‌ داننه‌ جهێ پێن من و هندی به‌ر هه‌بان ژی پێن خوه‌ ددانانه‌ سه‌ر به‌را و نه‌ ددانه‌ سه‌ر ئاخێ چونكی نه‌ ته‌نێ مینێن ب تێلا ڤه‌ ل وێرێ هه‌بوون، به‌لكی یێن بێ تێله‌ و دبن ئاخێ ژی ڤه‌ د مشه‌ ‌بوون. ب وی ده‌ستوداری تا كو ئه‌م گه‌هه‌شتینه‌ وێرێ ڕه‌بیه‌ هاتبوو گرتن و جاش ژی هه‌موو هاتبوونه‌ دیلكرن. ئه‌و هه‌ڤالێن ل وێرێ ماین گۆتنه‌ مه‌ كو فه‌وزی برینداربوویه‌ و هنده‌ك هه‌ڤالان ئه‌و به‌ره‌ڤ كانی به‌ڵاڤێ ڤه‌ بر ژ بۆ ده‌رمانكرنێ، لێ نه‌گۆتن كو ڕه‌وشا وی گه‌له‌كا خرابه‌. به‌ری هینگێ ژی مه‌ زانیبوو كو ستار مه‌لا سه‌دیق ژی ل فه‌وجا رۆژهه‌لاتێ باكوورێ فرۆكه‌خانێ شه‌هید بوویه‌، ژ به‌ر هندێ ئیدی ئه‌م كه‌فتینه‌ ڕێ به‌ره‌ڤ فرۆكه‌خانێ و ل وێرێ مه‌ د. رۆژ دیت و گوته‌ مه‌: هه‌ول بده‌ن هه‌موو بریندار و دیل و چه‌ك و ته‌قه‌مه‌نیان ب ترۆمبێلان ڤه‌گوهێزنه‌ ڕه‌خێ دهێ و كانی به‌ڵاڤێ به‌ری ببیته‌ رۆژ و هه‌لیكۆپته‌ر بهێن، مه‌ ژی تا ده‌مژمێر 6 سپیدێ هه‌موو ڤه‌گوهاستن و دووماهیێ ل تاڤدانێ ل گه‌ل د. رۆژ و نه‌مر سه‌ید سالح ئه‌م ژی ئێدی به‌ره‌ڤ كانی به‌ڵاڤێ هاتین.
ده‌مێ ئه‌م گه‌هه‌شتینه‌ كانی به‌ڵاڤێ مه‌ دیت كو پزیشكێن مه‌ ( كو ئه‌و ژی هاریكارێن پزیشكا و برین پێچ بوون ) خه‌ریكی عه‌مه‌لیاتكرن و ده‌رمان كرنا برینداران بوون، ده‌ما من پرسا شه‌هید فه‌وزی كری د. كه‌مالی گۆته‌ من ئه‌و یێ ل ژووره‌كا دی و چ هیڤیا ساخ بوونا وی نینه‌، گولله‌یه‌كا ب سه‌رێ وی كه‌فتی و ل ڕه‌خێ دی یا ده‌ركه‌فتی. ئه‌ز گه‌له‌ك ب له‌ز و شه‌پرزه‌ به‌زیمه‌ سه‌ر كه‌له‌خێ وی، من دیت كو پچه‌ك بزاڤ تێدا مایه‌، لێ من زانی كێلیكێن دووماهیا ژیانا وینه‌، جارنا چاڤێن خوه‌ ڤه‌دكرن و من دزانی دڤیا تشته‌كی بێژیت لێ نه‌ دشیا و ئه‌ز پشتڕاستم وی دڤیا خاترا خوه‌ ژ من بخوازیت و ئه‌ز ب چاڤێن وی تێگه‌هه‌شتم. ئه‌ز ل به‌ر سه‌رێ وی ڕوونشتم و چاڤێن وی مانه‌ ب چاڤێن من ڤه‌ تا كو چاڤێن وی كه‌فتینه‌ سه‌رێك. ئێدی سینگێ من وه‌ك له‌هیه‌كێ په‌قی و من ژ هه‌موو دلێ خوه‌ به‌ردا گریه‌كا ب گۆڕ، هنده‌ك هه‌ڤالێن دۆرا من ژی خوه‌ نه‌گرت و وان ژی به‌ردا گری، ئه‌ز باوه‌ر دكه‌م بۆ ده‌مێ پتر ژ نیڤ ده‌مژمێرێ ژ نیڤا دلێ خوه‌ و ب هه‌موو هێزا خوه‌ من دكره‌ گری، كو ئه‌ڤه‌ بۆ جارا ئێكێ بوو پشتی ئه‌ز مه‌زن بوویم بكه‌مه‌ گری. نوكه‌ ژی چاڤێن هه‌ڤالێ من شه‌هید فه‌وزی ڕه‌مه‌زان ڕه‌شۆ بریفكی هه‌ر ل پێش چاڤێن مننن ده‌مێ بۆ جارا دوماهیێ كه‌فتینه‌ سه‌رێك و نه‌شیای ب په‌یڤه‌كێ خاترا خوه‌ ژ من بخوازیت.

هه‌ردوو پێشمه‌رگێن شه‌هید بووین( ستار مه‌لا سه‌دیق بناڤی و فه‌وزی ڕه‌مه‌زان ڕه‌شۆ بریفكی) هه‌ڤالێن من یێن نێزیك بوون، لێ شه‌هید فه‌وزی هه‌ڤالێ منێ زارۆكاتیێ و پێشمه‌رگاتیێ ژی بوو، ئێكانێ ده‌یبابێن خوه‌ بوو، گه‌نجه‌كی چاڤ شین و پرچ زه‌ر وه‌كی ئه‌ورۆپیا بوو، هندی بێژی كه‌سه‌كی ئارام، دلپاك، مێرخاس، هه‌ڤالخۆش و ده‌ڤ بكه‌نی بوو. ئه‌و ل ڕه‌خێ مه‌ بوو ل رۆژئاڤایێ فرۆكه‌خانێ، لێ ئه‌م ل ڕه‌بیێن سه‌ری بووین و ئه‌و ل ڕه‌بیا ژ هه‌میا خوارتر بوو كو دكه‌ڤیته‌ هنداڤی گوندێ تنێ. پشتی مه‌ ئارمانجێن خوه‌ گرتین مه‌ دیت كو هێشتا ل ڕه‌خێ وان شه‌ڕ گه‌له‌كێ گه‌رمه‌ و داخوازا هاریكاریێ ژ مه‌ دكه‌ن. ئه‌م ژی كه‌فتینه‌ وێ بانیێ و بله‌ز به‌ره‌ڤ وان ڤه‌ چووین، بیرا من باش ناهێت كا ئه‌م چه‌ند كه‌س بووین، لێ بیرا من تێت كو ژ وان كه‌سێن لگه‌ل مه‌ ئێك ژێ شه‌هید عه‌مید حوزه‌یفی ئه‌ره‌دنی و ئێك ژی ڕه‌مه‌زانێ برایێ وی بوو. مه‌ گۆمان كر كو هه‌ڤالێن مه‌ تووشی زیانێ بووینه‌ و دته‌نگاڤن له‌وما ژی داخوازا هاریكاریێ ژ مه‌ دكه‌ن، ژ به‌ر هندێ ژی هه‌موو هزرا مه‌ ل سه‌ر وان بوو و كو ئه‌م زوو بگه‌هینه‌ هه‌وارا وان و مه‌ ب ئێكجاری ژ بیركربوو كو ئه‌و بانی هه‌موو ته‌ژی مینه‌ ( الغام ) و ئه‌مێ دناڤ مه‌یدانه‌كا مینان دا د به‌زین، د ڤی ده‌می دا من هند دیت ره‌مه‌زان ئه‌ره‌دنی ده‌ستێ خوه‌ ل سینگێ من دا و ڕاست وه‌كی داره‌كی هشك ئه‌ز ڕاوه‌ستاندم، من ژێ پرسی چیه‌: گوته‌ من: پێ منێ ب تلا مینه‌كا ڤالمارا ( پێنج شیشك ) ڤه‌، لێ باشه‌ من هه‌ست پێكر، تو پێ خوه‌ نه‌هاڤێ ئه‌گه‌ر نه‌ دێ ب مه‌ هه‌رچه‌ندا ڤه‌ په‌قیت و مه‌ پارچه‌ پارچه‌ كه‌ت. ڕه‌مه‌زان كو هینگێ ژی و نوكه‌ ژی پێشمه‌رگه‌یه‌كی گه‌له‌ك قاره‌مان و ل سه‌ر خوه‌ و شاره‌زایه‌ ڕاست ده‌ست خوه‌ دا قه‌مه‌ی ژ به‌ر خوه‌ ئیناده‌ر و هێدی و گه‌له‌ك ب شاره‌زای و ئارامی ئه‌و تێلا مینێ بڕی و لایته‌كا بچووك ژ به‌رووكا خوه‌ ئیناده‌ر و رۆناهیا وێ هه‌لكر و كه‌فته‌ پێشیا مه‌ و گوته‌ مه‌: ته‌نێ پێن خوه‌ داننه‌ جهێ پێن من و هندی به‌ر هه‌بان ژی پێن خوه‌ ددانانه‌ سه‌ر به‌را و نه‌ ددانه‌ سه‌ر ئاخێ چونكی نه‌ ته‌نێ مینێن ب تێلا ڤه‌ ل وێرێ هه‌بوون، به‌لكی یێن بێ تێله‌ و دبن ئاخێ ژی ڤه‌ د مشه‌ بوون. ب وی ده‌ستوداری تا كو ئه‌م گه‌هه‌شتینه‌ وێرێ ڕه‌بیه‌ هاتبوو گرتن و جاش ژی هه‌موو هاتبوونه‌ دیلكرن. ئه‌و هه‌ڤالێن ل وێرێ ماین گۆتنه‌ مه‌ كو فه‌وزی برینداربوویه‌ و هنده‌ك هه‌ڤالان ئه‌و به‌ره‌ڤ كانی به‌ڵاڤێ ڤه‌ بر ژ بۆ ده‌رمانكرنێ، لێ نه‌گۆتن كو ڕه‌وشا وی گه‌له‌كا خرابه‌. به‌ری هینگێ ژی مه‌ زانیبوو كو ستار مه‌لا سه‌دیق ژی ل فه‌وجا رۆژهه‌لاتێ باكوورێ فرۆكه‌خانێ شه‌هید بوویه‌، ژ به‌ر هندێ ئیدی ئه‌م كه‌فتینه‌ ڕێ به‌ره‌ڤ فرۆكه‌خانێ و ل وێرێ مه‌ د. رۆژ دیت و گوته‌ مه‌: هه‌ول بده‌ن هه‌موو بریندار و دیل و چه‌ك و ته‌قه‌مه‌نیان ب ترۆمبێلان ڤه‌گوهێزنه‌ ڕه‌خێ دهێ و كانی به‌ڵاڤێ به‌ری ببیته‌ رۆژ و هه‌لیكۆپته‌ر بهێن، مه‌ ژی تا ده‌مژمێر 6 سپیدێ هه‌موو ڤه‌گوهاستن و دووماهیێ ل تاڤدانێ ل گه‌ل د. رۆژ و نه‌مر سه‌ید سالح ئه‌م ژی ئێدی به‌ره‌ڤ كانی به‌ڵاڤێ هاتین. ده‌مێ ئه‌م گه‌هه‌شتینه‌ كانی به‌ڵاڤێ مه‌ دیت كو پزیشكێن مه‌ ( كو ئه‌و ژی هاریكارێن پزیشكا و برین پێچ بوون ) خه‌ریكی عه‌مه‌لیاتكرن و ده‌رمان كرنا برینداران بوون، ده‌ما من پرسا شه‌هید فه‌وزی كری د. كه‌مالی گۆته‌ من ئه‌و یێ ل ژووره‌كا دی و چ هیڤیا ساخ بوونا وی نینه‌، گولله‌یه‌كا ب سه‌رێ وی كه‌فتی و ل ڕه‌خێ دی یا ده‌ركه‌فتی. ئه‌ز گه‌له‌ك ب له‌ز و شه‌پرزه‌ به‌زیمه‌ سه‌ر كه‌له‌خێ وی، من دیت كو پچه‌ك بزاڤ تێدا مایه‌، لێ من زانی كێلیكێن دووماهیا ژیانا وینه‌، جارنا چاڤێن خوه‌ ڤه‌دكرن و من دزانی دڤیا تشته‌كی بێژیت لێ نه‌ دشیا و ئه‌ز پشتڕاستم وی دڤیا خاترا خوه‌ ژ من بخوازیت و ئه‌ز ب چاڤێن وی تێگه‌هه‌شتم. ئه‌ز ل به‌ر سه‌رێ وی ڕوونشتم و چاڤێن وی مانه‌ ب چاڤێن من ڤه‌ تا كو چاڤێن وی كه‌فتینه‌ سه‌رێك. ئێدی سینگێ من وه‌ك له‌هیه‌كێ په‌قی و من ژ هه‌موو دلێ خوه‌ به‌ردا گریه‌كا ب گۆڕ، هنده‌ك هه‌ڤالێن دۆرا من ژی خوه‌ نه‌گرت و وان ژی به‌ردا گری، ئه‌ز باوه‌ر دكه‌م بۆ ده‌مێ پتر ژ نیڤ ده‌مژمێرێ ژ نیڤا دلێ خوه‌ و ب هه‌موو هێزا خوه‌ من دكره‌ گری، كو ئه‌ڤه‌ بۆ جارا ئێكێ بوو پشتی ئه‌ز مه‌زن بوویم بكه‌مه‌ گری. نوكه‌ ژی چاڤێن هه‌ڤالێ من شه‌هید فه‌وزی ڕه‌مه‌زان ڕه‌شۆ بریفكی هه‌ر ل پێش چاڤێن مننن ده‌مێ بۆ جارا دوماهیێ كه‌فتینه‌ سه‌رێك و نه‌شیای ب په‌یڤه‌كێ خاترا خوه‌ ژ من بخوازیت.