ده‌نگێ خه‌لكی ئێك ژ سروشتیترین مافێ مرۆڤی یه‌ و ل هه‌موو وه‌ڵاتێن دیمۆكراتی و ئازاد بڕیارێن چاره‌نڤیساز ب ده‌نگێ خه‌لكی و ریفراندۆمان دهێنه‌ ئێكلا كرن، لێ مخابن ل وه‌ڵاتێ مه‌ ده‌نگێ خه‌لكی یێ بوویه‌ چه‌كه‌كێ خراب د ده‌ستێ بازرگانێن سیاسه‌تێ دا و چه‌وا به‌رژه‌وه‌ندیا كه‌سایه‌تی و حزبی یا وان و ئه‌و ئالیێن ئه‌و پێڤه‌ گرێدایی دخوازیت وه‌سا ب خۆ یاریا ب ده‌نگێن خه‌لكی دكه‌ن و ڤی مافێ وانێ سروشتی لێ داگیر دكه‌ن. ئه‌گه‌ر د به‌رژه‌وه‌ندیا وان دا بوو دێ ڕێ ده‌نه‌ ده‌نگێ خه‌لكی و ئه‌گه‌ر د به‌رژه‌وه‌ندیا وان ده‌ نه‌بوو ب سه‌دان فرت و فێلان دێ ڤی مافی ژ ده‌ستێ خه‌لكی ئیننه‌ ده‌ر.
به‌ری چه‌ند ساڵان ل په‌رله‌مانێ كوردستانێ، ب زۆرینه‌یا ده‌نگان (ده‌نگێن 99 په‌رله‌مانته‌ران)، ده‌نگ ل سه‌ر ڕه‌شنڤیسا ده‌ستوورێ كوردستانێ هاته‌دان و د قۆناغا دووێ دا دڤیا ریفراندۆم ل سه‌ر هاتبا كرن و خه‌لكی ده‌نگ ل سه‌ر دابا، لێ وی ده‌می گۆڕان و هه‌ڤالبه‌ندێ وێ یێن گرۆپا 23 خه‌زیرانێ گۆتن ئه‌ڤه‌ دیكتاتۆریا زۆرینێ یه‌ و دڤێت ئه‌ڤ مه‌سه‌له‌ نه‌ ب ده‌نگدانێ لێ ب سازانێ بهێته‌ ئێكلا كرن. پارتی ژی سه‌رخاترا هندێ كو، زارۆكێ شویم جاره‌كا دی كانیا گوندی شێلی نه‌كه‌ته‌ڤه‌، ڕه‌شنڤیسا ده‌ستووری ڕاوه‌ستاند و نه‌ دا ده‌نگدان و ڕیفراندۆمێ.
ئاها ل ڤێرێ دووڕویاتی و بازرگانی كرنا وان ب چاره‌نڤیسێ گه‌ل و وه‌ڵاتی ئاشكه‌را بوو. باشه‌ چه‌وا ئه‌و ده‌ستوورێ وێ رۆژێ ب 99 ده‌نگان هاتیه‌ په‌ژراندن، ب دیتنا وه‌ نه‌یاسایی بوو، لێ ئه‌و 51 ده‌نگێن ل 23 خه‌زیرانا 2015 ب تڕێن ده‌لیا وه‌ كۆمكرین بۆ كۆده‌تایا خوه‌ یا شه‌رمه‌زار د یاسایی بوون؟ یان ئه‌گه‌ر ڕاسته‌ هوون حزبێن خه‌لكێ كوردستانێ نه‌ و وه‌ باوه‌ری ب ڤی خه‌لكی هه‌یه‌، بۆچی له‌رز و تا كه‌ته‌ له‌شێ وه‌ و وه‌ نه‌هێلا ده‌ستوور بكه‌ڤیته‌ ده‌نگدان و ڕیفراندومێ و خه‌لكێ كوردستانێ ب ئازادی ده‌نگێ خوه‌ بده‌ن كانێ وان چ ده‌ستوور دڤێت؟
ئه‌ز نزانم ئه‌ڤ ترسا وه‌ ژ ده‌نگێن خه‌لكی ژ كووڤه‌ تێت، ئه‌گه‌ر وه‌ باوه‌ری ب دیمۆكراسیێ هه‌بیت؟
وه‌ نه‌ هێلا ب ده‌نگێ زۆرینه‌یا په‌رله‌مانته‌ران ده‌رباز ببیت، وه‌ نه‌هێلا بكه‌ڤیته‌ به‌ر ده‌ستێ خه‌لكی و ئه‌و ب ئازادی ده‌نگی ل سه‌ر بده‌ن، ب دیتنا وه‌ ئه‌ڤه‌ هه‌موو نه‌ دیمۆكراسی بوو !! لێ ئیرۆ هوون هاتن ب گه‌ف و سۆز و هزار فرت و فێلا وه‌ 51 ده‌نگ ب سه‌رپه‌رشتیا كونسلێ وه‌لاته‌كێ داگیركه‌ر كۆمكرن و وه‌ ڤیا د ڤێ قۆناغا هندا نازك دا وه‌ڵاتێ مه‌ بهێلنه‌ بێ سه‌رۆك و وه‌ گۆت مانێ ئه‌ڤه‌ دیمۆكراسیه‌ !!!
نوكه‌ ژی ده‌ما ئاخفتن تێته‌ سه‌ر هندێ كو دڤێت سه‌رۆك ژ ئالیێ خه‌لكی ڤه‌ ب ئازادی بهێته‌ هه‌لبژارتن دیسان له‌رزك لێڤا وه‌ دگریت و هوون سه‌د هێجه‌تێن نه‌ساخ و بێ مه‌عنا تینن و وه‌ دڤێت جاره‌كا دی ژی ڤی مافێ سروشتی ژ ده‌ستێ خه‌لكی بیننه‌ ده‌ر.
ئه‌ز دزانم كا هوون چه‌وا بازرگانیێ ب ده‌نگ و چاره‌نڤیسێ خه‌لكی دكه‌ن ژ بۆ به‌رژه‌وه‌ندیا خوه‌ و ئاغایێن خوه‌، لێ ئه‌ز تێناگه‌هه‌م كانێ گه‌لۆ چه‌وا ئه‌و خه‌لكێ هوون ژ ده‌نگێ وان دترسن دێ جاره‌كا دی چاره‌نڤیسێ خوه‌ كه‌نه‌ د ده‌ستێ وه‌ دا و ده‌نگێ خوه‌ ده‌نه‌ وه‌ دا هوون بخۆ یاریا پێ بكه‌ن. چونكی هوون بڤی كارێ خوه‌ دبێژنه‌ خه‌لكی: هوون به‌رژه‌وه‌ندیا خوه‌ نزانن، هوون نه‌فامن، دڤێت ئه‌م بڕیارێ پێش وه‌ڤه‌ بده‌ین !!
ئه‌گه‌ر راسته‌ هوون ژ بۆ به‌رژه‌وه‌ندیا گه‌ل و وه‌لاتی هاتینه‌ و وه‌ خزمه‌تا خه‌لكی دڤێت، به‌سه‌ بێڕیزیێ بڤی خه‌لكی بكه‌ن و وه‌كی زه‌لامان بڕیارێ بده‌نه‌ ده‌ستێ خه‌لكی بلا سه‌رۆكێ خوه‌ و چاره‌نڤیسێ خوه‌ بهه‌لبژێرن، چونكی ئه‌ڤه‌ ئه‌لفابێیێن دیمۆكراسیێنه‌.

یا ئاشكه‌رایه‌ كو هه‌ر ژ ده‌ستپێكا هێرشێن داعش ل سوریێ، ئیراقێ و كوردستانێ، حكومه‌تا تركی نیڤ ئاشكه‌را و نیڤ ژی نه‌په‌نی، ب هه‌موو شێوه‌یان پشته‌ڤانیا ته‌رۆریستێن داعش كریه‌. هه‌لبه‌ت دده‌مێ شه‌ڕێ كۆبانێ دا هیڤیا حكومه‌تا تركی ب وێ چه‌ندێ هه‌بوو كو ئه‌ڤ باژێڕه‌ دێ كه‌ڤیته‌ ده‌ستێ داعش، لێ ب به‌رخوه‌دانا شه‌ڕڤانان و هاریكاری و پشكداریا هێزا پێشمه‌رگێ كوردستانێ و پشته‌ڤانیا ئاسمانی یا ئه‌مریكا، ئه‌و باژار ب هه‌رێما خوه‌ڤه‌ ژ ته‌رۆریستان هاته‌ پاقژ كرن. پشتی ڤێ ژی خالا هه‌ری گرنگا كو داعش و تركی دگه‌هاندنه‌ هه‌ڤ خالا باژێركێ گرێ سپی بوو، كو وه‌ك خاله‌كا ترانسێتێ بوو دناڤبه‌را تركی و داعش دا، كو دهه‌مان ده‌م ده‌ دوو هه‌رێمێن گرنگێن رۆژاڤایێ كوردستانێ ژی ژ هه‌ڤ ڤه‌دقه‌تاندن. پشتی ڤێ دوماهیێ گرێ سپی ژی ب هاریكاریا هێزێن ئاسمانی یێن ئه‌مریكا هاتیه‌ ڕزگاركرن، ئێدی ده‌ستێ تركی و داعش ژ هه‌ڤ هاته‌ قه‌تاندن، كو ئارمانجا ئه‌مریكا ژی ژ ڕزگاركرنا گرێ سپی ده‌رێخستنا ڤێ كارتێ بوو ژ ده‌ستێ تركی.
دڤی ده‌می ده‌ ب هێجه‌تا ئاڤاكرنا ده‌وله‌ته‌كا كوردی ل رۆژاڤایێ كوردستانێ، تركی ده‌ست ب گه‌فان و كێشانا له‌شكه‌ری كر بۆ سه‌ر سنوورێ دناڤبه‌را باكوور و رۆژاڤایێ كوردستانێ ده‌. تشتێ سه‌یر ئه‌وه‌ كو ئه‌ڤ گه‌فێن تركی هه‌مان سیناریۆیا ساڵێن 1990 ان نه‌ كو ل سه‌ر ده‌مێ تانسۆ چیلله‌ر و سلێمان ده‌میره‌ل و ئه‌جه‌ویدێ ل باشوورێ كوردستانێ دهاتنه‌ كرن و ئه‌ڤ سیاسه‌تا گه‌ف و چاڤسۆركرنێ تا كو ساڵا 2008 ل سه‌رده‌مێ ئه‌ردۆگانی ژی هه‌را به‌رده‌وام بوو، لێ پشتی هینگێ حكومه‌تا AKP ل سه‌ر ڤێ سیاسه‌تێ ڕه‌خنا خوه‌ كر و گه‌له‌ك ژ سیاسه‌تمه‌دارێن وان دیاركر كو وان د ئه‌نجامێ ڤێ سیاسه‌تا شاشا چاڤسۆركرنێ دا گه‌له‌ك زیان گه‌هانده‌ تركی. له‌ۆما ژی وان ئه‌و سیاسه‌تا خوه‌ ب ته‌مامی گوهڕی بۆ سیاسه‌تا نه‌رما جیرانی و بازرگانی و هه‌ڤكاریێ ل گه‌ل باشوورێ كوردستانێ. لێ وه‌سا دیاره‌ كو نوكه‌ ژی ترك یێ خوه‌ تووشی هه‌مان شاشیێ دكه‌ن یا كو به‌ری چه‌ند ساڵان وان بخۆ ڕه‌خنه‌ دكر.
هه‌لبه‌ت نه‌ له‌شكه‌رێ تركی دكه‌ڤیته‌ ناڤ رۆژاڤایێ كوردستانێ و نه‌ ژی PKK/YPG نه‌ ل رۆژاڤایێ كوردستانێ و نه‌ ژی ل چ پارچێن دی یێن كوردستانێ چ ده‌وله‌تێن كوردی چێدكه‌ن و ترك ژی ڤێ چه‌ندێ باش دزانن.
لێ ئارمانجا ڕاستی یا تركی ژ ڤان گه‌فان، ئێك ژێ ئه‌وه‌ كو پشتی ل هه‌لبژارتنێن ڤێ دوماهیێ AKP هند ده‌نگ نه‌ئیناین كو بشێت بتنێ حكومه‌تێ چێكه‌ت و دبیت كو پێدڤی هندێ بن هه‌لبژارتنێن پێشوه‌خت بێنه‌ كرن و دیاره‌ AKP وه‌سا هزردكه‌ت ئه‌گه‌ر مانۆره‌كا هۆسا بكه‌ت دێ پتر ده‌نگا ئینیت !! هه‌رچه‌نده‌ ئه‌ز باوه‌ر دكه‌م دێ به‌رۆڤاژی هندێ بیت.
ئه‌گه‌رێ دی ژی ئه‌وه‌ كو ژ ئه‌گه‌رێ پشته‌ڤانیا تركی بۆ داعشێ، تا ڕاده‌یه‌كێ تركی ژ ئالیێ ئه‌مریكاڤه‌ هاتیه‌ پشتگوهڤه‌ هاڤێتن و بڤان گه‌فان دخوازن كو ئه‌مریكا هنده‌ك تشتا بۆ بكه‌ت و تا ڕاده‌یه‌كێ تركی د یاریا سوریێ و ئیراقێ دا پشكدار بكه‌ت.
لێ ب دیتنا من ئه‌گه‌ر ئه‌ردۆگان یێ به‌رده‌وام بیت ل سه‌ر ڤێ سیاسه‌تێ دێ جاره‌كادی تركیا زڤرینه‌ته‌ڤه‌ رۆژێن وێ یێن ڕه‌شێن سه‌رده‌مێ تانسۆ چیلله‌ر و گه‌نه‌رالێن شه‌ڕخواز.

ب هزاره‌ها ساڵه‌ ئه‌م بێ ده‌وله‌ت و بێ ناسنامه‌ و ژ ئه‌گه‌رێ ڤێ چه‌ندێ ژی خه‌لك مه‌ قڕدكه‌ن، وه‌ڵاتێ مه‌ داگیردكه‌ن و وه‌كی كه‌ریێن په‌زی مه‌ سه‌رژێ دكه‌ن و دفرۆشنه‌ هه‌ڤدوو.
ئه‌گه‌رێن ڤێ به‌ختڕه‌شیێ ژی، جار مه‌ پاڵداینه‌ فه‌له‌كێ! كو چ ڕاستیه‌ك ژ بۆ نینه‌، به‌لكی فه‌له‌كا مه‌ هه‌ر ئه‌م بخوه‌ینه‌، جار ژی مه‌ پاڵداینه‌‌ ڕه‌وشا هه‌رێمێ و ده‌رڤه‌ و جار ژی مه‌ پاڵداینه‌ دوژمن و داگیركه‌رێن هۆڤ.
لێ پرس ئه‌وه‌، ما گه‌لۆ ئه‌ڤ فه‌له‌كه‌، یان ئه‌ڤ ڕه‌وشه‌ یان ژی ئه‌ڤ دوژمنێن هۆڤ كوردان ته‌نێ هه‌بووینه‌؟ نه‌خێر هه‌موو گه‌لێن كو بووینه‌ ده‌وله‌ت ئه‌ڤ فاكته‌ره‌ هه‌بووینه‌، لێ جوداهییا مه‌ و وان ئه‌و بوویه‌ كو ئه‌و بكێر خوه‌ هاتینه‌ و ئه‌م ژی دوژمنێ سه‌رێ خوه‌ بووینه‌ و ملله‌ته‌كێ خۆخۆر و زكڕه‌شین. باشترین سه‌لماندن ژی بۆ ڤێ چه‌ندێ ئه‌وه‌ كو د دیرووكا مه‌ دا هه‌ر جارا ده‌لیڤه‌یه‌ك بۆ مه‌ هاتبیته‌ پێش و كوردستان نێزیكی ئازادی و سه‌رخوه‌بوونا خوه‌ ببیت كه‌سه‌ك یان هێزه‌ك هه‌ر ژناڤ كوردان بخوه‌ بوویه‌ چه‌كوچێ ده‌ستێ داگیركه‌ران و ئه‌ڤ بزڤا سه‌رخوه‌بوونێ پێ هاتیه‌ هه‌ڕشاندن، نموونه‌ ژی د دیرووكا مه‌ دا گه‌له‌كن ل سه‌ر ڤێ چه‌ندێ.
عه‌جێبا كه‌س نه‌دیتی ئه‌وه‌ كو هنده‌ك ژ پارتی و ڕێكخستنێن كوردستانێ ب ده‌هان ساڵه‌ خه‌بات كریه‌ و ب ده‌ههه‌زاران قاره‌مان شه‌هید داینه‌ ل بن ناڤێ ڕزگاری و سه‌رخوه‌بوونا كوردستانێ. هنده‌كان ژی ل ده‌ستپێكێ دروشمێن سه‌رخوه‌بوونا كوردستانا مه‌زن ڕاكرن و ئۆتۆنۆمی و فیدرالی و چاره‌سه‌ریێن دی ب خیانه‌ت‌ دزانین.
ڤێجا تشتێ سه‌ریتر ئه‌وه‌ كو پشتی خه‌باتا ب سه‌دان ساڵان و قوربانیا ب سه‌دهه‌زاران شه‌هیدان، ئه‌ڤرۆكه‌ هه‌موو فاكته‌رێن ده‌رڤه‌یی و ناڤخۆیی و ڕه‌وشا سیاسی دهاریكارن ژ بۆ سه‌رخوه‌بوونا كوردستانێ، لێ ئه‌ڤ پارتی و ڕێكخستنێن كو ده‌مه‌كی ب سه‌دهه‌زاران خه‌لك ب ڤان درووشمێن مه‌زن و برسقی ب دووڤ خوه‌ ئێخستین، ئاها نوها دیسان هه‌ر ئه‌و بوونه‌ مه‌زنترین ئاسته‌نگ د ڕیا سه‌رخوه‌بوونا كوردستانێ دا. كو هنده‌ك ژ وان دبێژن: ئه‌م دژی ده‌وله‌تا كوردی نه‌ و هنده‌كێن دی ژی دبێژن: مه‌ هزرا سه‌رخوه‌بوونا كوردستانێ هاڤێتیه‌ د ته‌نه‌كا گه‌لێشێ دا و هنده‌ك ژی دبێژن: كوردستانه‌كا سه‌ربخوه‌ هزره‌كا پاشڤه‌ڕۆیه‌!! هنده‌ك ژ وان ژی هنده‌ك هێجه‌تێن نه‌ساخ دگرن یێن وه‌كی: ڕه‌وش هێشتا نه‌به‌رهه‌ڤه‌، هێشتا زوویه‌ و ئه‌م هێشتا نه‌ئاماده‌ینه‌!! ئه‌ز ژی دبێژمه‌ وان: چونكی هوون كۆله‌یێن دوژمنانه‌، نه‌ هوون به‌ری نوها جاره‌كێ د ئاماده‌بوونه‌ و نه‌ هوون ئه‌ڤرۆكه‌ دئاماده‌نه‌ و نه‌ ژی چ جارا ئاماده‌ دبن. هه‌لبه‌ت هه‌موو ئارمانجا وان ژی ئه‌ڤرۆكه‌ ته‌نێ ئه‌وه‌ مل بملێ داگیركه‌ران چه‌ند كورسیه‌كه‌ك ل په‌رله‌مانێن به‌غدا و ئه‌نقه‌ره‌ و شام و ته‌هرانێ بده‌ست وان بكه‌ڤن دا بشێن ب دلسۆزی خزمه‌تا ئاغایێن خوه‌ بكه‌ن.
ئاها هۆسا ژی دیار دبیت كو نه‌ فه‌له‌ك و نه‌ ژی ڕه‌وشا سیاسی یا ده‌رڤه‌ و ناڤخوه‌یی و نه‌ژی دوژمن و داگیركه‌ر ئه‌گه‌رێ سه‌ره‌كی یێ بنده‌ستیا مه‌نه‌، به‌لكی ئه‌گه‌رێ هه‌ره‌ سه‌ره‌كی كوردێن بناڤ سیاسیێن كۆله‌نه‌.
زانایه‌ك باش وه‌سفا ڤان جۆره‌ كۆله‌یان دكه‌ت ده‌ما دبێژیت: ئه‌گه‌ر بارانا ئازادیێ بباریت، هنده‌ك كۆله‌یێن كو فێری وێ ژیانا كۆله‌تیێ بووین، دێ سیوانا ل هنداڤی سه‌رێ خوه‌ ڤه‌ده‌ن دا ئه‌و باران ژ وان نه‌گریت. ڤێجا ئه‌ڤه‌ سه‌دێ سه‌د ژ ڤان كۆله‌یێن مه‌ ژی دگریت. ئه‌ز دزانم ئه‌و دێ هه‌ر سیوانا خوه‌ ڤه‌ده‌ن چونكی نوكه‌ تاڤیا بارانا سه‌رخوه‌بوونێ یا ل هنداڤی كوردستانێ، لێ ئه‌ز هیڤیدارم ئه‌و خه‌لكێ كو ب ساڵان وان ب ناڤێ دروشمێن بریقه‌دار خاپاندین، بیرا خوه‌ ل خه‌بات و قوربانیدان و شه‌هیدێن خوه‌ بینن و سیوانێن وان پاڤێژن و تێر تێر ب بارانا سه‌رخوه‌بوونێ شاد ببن. چونكی ئه‌گه‌ر خودێ نه‌كه‌ت مه‌ ئه‌ڤ ده‌لیڤه‌ ژی ژ ده‌ستدا نه‌ مسۆگه‌ره‌ كو پشتی سه‌د ساڵێن دی دیسا بۆ مه‌ بێته‌ڤه‌.

ده‌‌م پایزا 1986 بوو سه‌‌رۆك بارزانی هاتتبوو ده‌‌ڤه‌‌را به‌‌هدینان و باره‌گایێ خوه‌‌ ل گوندێ كانیساركا نێروه‌‌ییا دانابوو، كو دكه‌‌ڤیته‌‌ ناڤبه‌‌را هه‌‌ردوو باژێركێن ئامێدیێ ل باشوور و چه‌‌لێ ل باكوور، ل ئالیێ رۆژهه‌‌لاتێ رووبارێ زێی. باره‌گایێ لقا ئێك یا پارتی دیمۆكراتی كوردستان ژی ل گوندێ زێوا شكان بوو، ل هه‌‌مان ده‌‌ڤه‌‌رێ و دكه‌‌ڤیته‌‌ سه‌‌ر رووبارێ زێی.
كادرێن سیاسی و له‌‌شكه‌‌ری یێن لژنێن ناڤچا خوه‌‌ كرنه‌‌ دوو گرۆپ، گرۆپه‌‌ك دمانه‌‌ ل ده‌‌ڤه‌‌رێ ل گه‌‌ل پێشمه‌‌رگه‌‌ی دا ده‌‌ڤه‌‌ر چۆل نه‌‌بیت و پشكا دی دچوونه‌‌ سه‌‌ردانا سه‌‌رۆكی ل باره‌گایێ وی و پشتی ئه‌‌و دزڤرینه‌‌ڤه‌‌ گرۆپێ دی دچوون. ئه‌‌م ژی وه‌‌ك كادرێن لژنا ناڤچا ئامێدیێ، كو باره‌گایێ مه‌‌ ل گه‌‌لیێ بێشیلێ بوو، ل پاڵا چیایێ مه‌‌تینا یا باكوور، وه‌‌ك گرۆپێ ئێكێ برێكه‌‌فتین ژ بۆ سه‌‌ردان و كۆمبوونێ لگه‌‌ل سه‌‌رۆك بارزانی، كو شه‌‌هیدێ نه‌‌مر ئه‌‌حمه‌‌د كادر ( ئیدریس جه‌‌رجیس ) ئێك ژ به‌‌رپرسێن مه‌‌ بوو. پشتی ئه‌‌م گه‌‌هه‌‌شتینه‌‌ سه‌‌ر رووبارێ زێی، به‌‌ری ئه‌‌م ده‌‌رباز ببین بۆ باره‌گایێ سه‌‌رۆكی، مه‌‌ ل ده‌‌ستێ راستێ پیچه‌‌ك بادا به‌‌ره‌‌ڤ باشوور، دا كو درێیا خوه‌‌ دا سه‌‌را هه‌‌ڤالێن خوه‌‌ ل باره‌گایێ لقێ ژی بده‌‌ین و پاشی به‌‌ره‌‌ڤ باره‌گایێ سه‌‌رۆكی ڤه‌‌ بچین، پشتی ئه‌‌م ل خالا باره‌گایێ پێشمه‌‌رگێ قاره‌‌مان و ژێهاتی به‌‌ده‌‌ل ماروونسی ده‌‌رباز بووین، ئه‌‌م گه‌‌هه‌‌شتینه‌‌ باره‌گایێ لژنا ڤه‌‌كۆلینێ، كو هه‌‌م باره‌گایێ وان و هه‌‌م ژی زیندان دكه‌‌ڤته‌‌ د دۆله‌‌كا كوور دا ل ناڤبه‌‌را دوو تیێن بلندێن چیای ل به‌‌ر رووبارێ زێی.
هه‌‌لبه‌‌ت ئه‌‌و ده‌‌مه‌‌ك بوو سه‌‌رۆك بارزانی ل گه‌‌ل كۆمه‌‌كا سه‌‌ركردێن پارتی و هێزه‌‌كا پێشمه‌‌رگه‌‌ی گه‌هه‌‌شتیه‌‌ وێ ده‌‌ڤه‌‌رێ و دیاره‌‌ كو دوژمنی ژی پێزانین وه‌‌رگرتبوون. هه‌‌رچه‌‌نده‌‌ به‌‌ری هینگێ ژی بۆمبارانا دوژمنی ب رێیا تۆپێن هه‌‌مه‌‌جۆر، كاتیۆشا و فرۆكێن جه‌‌نگی، یا به‌‌رده‌‌وام بوو ل سه‌‌ر باره‌گایێ لقێ، لێ پشتی هاتنا سه‌‌رۆكی ئه‌‌ڤ بۆمبارانكرنه‌‌ ده‌هقات زیده‌‌تر لێهات. وی ده‌‌مێ ئه‌‌م گه‌هه‌ه‌شتینه‌‌ باره‌گایێ لژنا ڤه‌‌كۆلینێ و زیندانێ بۆمبارانێ ده‌‌ستپێكر و ژ دژواری و همبزیا بۆمبارانێ مرۆڤی دزانی كو ژێده‌‌رێ ڤێ بۆمبارانێ نه‌‌ جهه‌‌ك و دوو ب ته‌‌نێ نه‌‌ و وه‌‌سا دیار بوو كو تۆپ ژ دێره‌‌لۆكێ، ئامێدیێ، بێگۆڤا و كانیماسێ و كاتیۆشا ژی ژ كانیماسێ ب ئێك ده‌‌م دهاتنه‌‌ باراندن ل سه‌‌ر باره‌گای و دۆرێن وی. ژ به‌‌ر كو ئه‌‌ڤ جهه‌‌ هه‌‌موو كه‌‌ڤر و چیایێن بلندن، ژ به‌‌ر هندێ لگه‌‌ل په‌‌قینا هه‌‌ر تۆپه‌‌كێ ب وان كه‌‌ڤر و چیاڤه‌‌ ب سه‌‌دان كه‌‌ڤر و به‌‌ر ژی دپه‌‌قین و ب سه‌‌ر وی گه‌‌لیێ زێی دا دبارین و ب جاره‌‌كێ ئه‌‌و گه‌‌لی تژی تۆز و دووكێل ببوو. ئه‌‌م دروست دڤێ ره‌‌وشێ دا گه‌هه‌‌شتینه‌‌ باره‌گایێ لژنا ڤه‌‌كۆلینێ، كو كه‌‌پرۆكه‌‌ك ل به‌‌ر ده‌‌رێ باره‌گایێ وان بوو، كادرێ هه‌‌ره‌‌ دێرین و خه‌‌باتكه‌‌رێ شورشا گولانێ مسته‌‌فا مزووری و كادر و پێشمه‌‌رگێ نه‌‌مر دكتۆر سه‌‌عید بریفكانی هه‌‌ردوو ل به‌‌رامبه‌‌ر هه‌‌ڤ دروونشتینه‌‌، سازه‌‌كا د ده‌‌ستێ نه‌‌مر دكتۆر سه‌‌عیدی دا یێ دژه‌‌نیت و هه‌‌ردوو پێكڤه‌‌ یێ سرووده‌‌كێ دبێژن. دیاربوو كو هه‌‌لبه‌‌ست یا كاك مسته‌‌فا مزووری بوو و دكتۆر سه‌‌عیدی ژی ب سازا خوه‌‌ ئاواز بۆ چێدكر. ئه‌‌م گهه‌ه‌‌شتینه‌‌ هنداڤ سه‌‌رێ وان، بێی كو گه‌‌له‌‌ك پووته‌‌ی بده‌‌نه‌‌ مه‌‌ یان بۆمبارانا دژوار، هه‌‌ر دبه‌‌رده‌‌وام بوون ل سه‌‌ر سروودا خوه‌‌ و هه‌‌ردوویا پێكڤه‌‌ دگۆت:
ئه‌‌م دێ چین و هه‌‌ر دێ چین دێ چین
ئه‌‌م دێ چین و پێشكه‌‌ڤین دێ چین
ئه‌‌م دێ چین تا سه‌‌ركه‌‌ڤین دێ چی
مافێ كوردان وه‌‌رگرین دێ چین
ژ ئالیه‌كی ڤه‌‌ بۆ منێ حه‌‌ژێكه‌‌رێ ئه‌‌ده‌‌ب و هونه‌‌ری، ڤی دیمه‌‌نێ سروود و سازا وان د ناڤ ڤێ بۆمباران و تۆز و دووكێل و ده‌‌نگێ په‌‌قینا بۆمبا دا، هه‌‌می جیهان بۆ من دئینا، لێ دهه‌‌مان ده‌‌م دا ب ده‌هان ساچمێن تۆپ و كاتیۆشان ب تایێن وان دارا دكه‌‌فتن و كه‌‌ڤر و به‌‌ر ژ وان زناران ب سه‌‌ر باره‌گای دا دئینانه‌‌ خوارێ، ئه‌‌ز گه‌‌له‌‌ك ژ وان ترسیام كو هۆسا بێمنه‌‌ت ل ڤێرێ روونشتینه‌‌ و سروودا خوه‌‌ دبێژن و مه‌‌ترسیه‌كا مه‌‌زنه‌‌ ل سه‌‌ر ژیانا وان. ژ به‌‌ر هندێ هه‌‌رچه‌‌نده‌‌ ئه‌‌ز ژ وان هه‌‌ردوویان ژی بچووكتر بووم، لێ ب عاجزی ڤه‌‌ من گۆته‌‌ وان: رابن دا دبچینه‌‌ دڤێ شكه‌‌فتێ ڤه‌‌ ( كو بۆ خۆ پاراستنێ ژ بۆمبارانێ هاتبوو كۆلان )، نابیت هوون هۆسا بێمنه‌‌ت ل بن ڤێ بۆمبارانێ بمینن. د هه‌‌مان ده‌‌می ده‌ا شه‌هید ئه‌‌حمه‌‌د كادر ژی گه‌‌له‌‌ك رژدی ل وان كر، لێ وان گۆته‌‌ مه‌‌: هوون دشێن خوه‌‌ بپارێزن، لێ ئه‌‌م حه‌‌زدكه‌‌ین هوون زێده‌‌تر ره‌‌وشا مه‌‌ تێكنه‌‌ده‌‌ن، چونكی ژمێژه‌‌یه‌‌ ئه‌‌م ب ڤێ سروودێ ڤه‌‌ تا كو مه‌‌ ئاوازا وێ چێكری، له‌‌وما باشتره‌‌ هوون ژی مه‌‌ بهێلن ئازاد دا بشێین سروودا خوه‌‌ ته‌‌مام بكه‌‌ین. من گۆته‌‌ وان: باشه‌‌ ئه‌‌گه‌‌ر هوون ل سه‌‌ر ڤێ سروودێ هاتنه‌‌ شه‌هیدكرن نوكه‌‌، ما وی ده‌‌می سروود بۆ چیه‌‌ ؟
نه‌‌مر دكتۆر سه‌‌عیدی گۆته‌‌ من: كاك رزگار ئه‌‌م دێ رۆژه‌‌كێ هه‌‌ر مرین و چین و ئه‌‌م چ ژی ل دووڤ خوه‌‌ ناهێلین، لێ ئه‌‌گه‌‌ر مه‌‌ ئه‌‌ڤ سرووده‌‌ چێكر و پاشی هاته‌‌ تۆماركرن ژی دێ بیته‌‌ به‌‌رهه‌‌مه‌‌كێ نه‌‌مرێ شورشێ و چ جارا نامریت، ژ به‌‌ر هندێ ئه‌‌و ژ مه‌‌ گه‌‌له‌‌ك گرنگتره‌‌.
ئێدی مه‌‌ ئه‌‌و هێلانه‌‌ دگه‌‌ل سروودا وان، لێ ل ڤی ده‌‌می بیرا ل من سترانا هونه‌‌رمه‌‌ندێ شه‌هید ئه‌‌رده‌‌وانی هات ده‌‌ما دبێژیت: دادێ شه‌‌رێ گرانه‌‌.. . دیلان ده‌‌نگێ تۆپانه‌‌.
لێ من بخۆگۆت: یا كاك مسته‌‌فای و دكتۆر سه‌‌عیدی ( ئاواز ده‌‌نگێ تۆپانه‌‌ ).
هه‌‌لبه‌‌ت سروودا خوه‌‌ چێكرن و پاشی ژی هونه‌‌رمه‌‌ند حه‌‌سه‌‌ن شه‌‌ریف، كو ل ساڵا پاشتر بوو پێشمه‌‌رگه‌‌، لگه‌‌ل گرۆپه‌‌كا زارۆكێن پێشمه‌‌رگا ب ناڤێ ( تیپا پێشره‌‌و ) ئه‌‌و سروود تۆماركر، كو ته‌‌كستا وێ ژی ئه‌‌ڤا خوارێیه‌‌:
ئه‌‌م دێ چین و هه‌‌ر دێ چین دێ چین
ئه‌‌م دێ چین و پێشكه‌‌ڤین دێ چین
ئه‌‌م دێ چین تا سه‌‌ركه‌‌ڤین دێ چی
مافێ كوردان وه‌‌رگرین دێ چین
گه‌‌ل پێشمه‌‌رگه‌‌یێن چه‌‌له‌‌نگ
دێ ل جیهانێ كه‌‌ینه‌‌ ده‌‌نگ
ب ئاگر و تۆپ و تڤه‌‌نگ
ب نارنجۆك و ره‌‌شاشین
پێشمه‌‌رگا سویندا خاری
نادانن ئه‌‌ڤی باری
ملله‌‌ت هه‌‌می یێ ل هاری
وه‌‌كه‌‌ ڤیه‌‌تنام و چین
پاله‌‌ و جوتیار و شڤان
هه‌‌می لاو و خوه‌‌نده‌‌ڤان
له‌‌شكه‌‌رین بۆ كوردستان
ل مه‌‌یدانا په‌هله‌‌وانین
دێ چین گه‌‌ل پێشمه‌‌رگه‌ها
سه‌‌ر تخویب و ده‌‌رگه‌ها
ل دوژمن بین ئه‌‌ژده‌ها
دفن و گوها لێ برین

پشتی ژ ئه‌نجامێ پیلانا دوژمنكاریا ب ناڤێ په‌یمانا جه‌زائیرێ یا كو ب پشكداریا هه‌ردو دكتاتۆرێن گۆڕبه‌گۆڕ سه‌دام و شاهێ ئیرانێ و ناڤبه‌ینكاریا هه‌واری بۆمده‌ینێ سه‌رۆكێ جه‌زائیرێ، ل 6 ئادارا 1975 شۆڕشا ئیلۆنێ ل باشوورێ كوردستانێ تووشی شكه‌ستنێ بووی، پشتی ساڵه‌كێ و ب بڕیارا بارزانیێ نه‌مر و سه‌ركردایه‌تیا كاتی یا پارتی دیمۆكراتی كوردستان شۆره‌شا گۆلانێ ل ئێڤاریا رۆژا 26 گۆلانا 1976 ئێكه‌مین چریسكا ئاگرێ خوه‌ ل سه‌ر سه‌رێ داگیركه‌ران گه‌شكر و ئێدی خه‌لكێ مه‌ یێ كو هاتینه‌ دوورئیخستن ژ بۆ باشوورێ ئیراقێ و ب هه‌زارا گوندێن وان هاتینه‌ وێرانكرن و كه‌فتینه‌ بن ب ده‌هان جۆرێن كریارێن كرێتێن داگیركه‌ران، رۆژ بۆ رۆژێ ل دۆرێن شۆره‌شێ كۆمبوون و ئه‌و چریسكا بچووك ئێدی بوو ئاگره‌كێ گه‌شێ ڕه‌ونه‌قدار و رۆناهیا خوه‌ دا هه‌موو كوردستانێ و خه‌لكێ خه‌باتكه‌ر ملێن خوه‌ دانه‌ به‌ر شۆره‌شێ چ وه‌ك ڕێخستنێن نه‌په‌نی دناڤ باژاران و دا و چ ژی وه‌ك پێشمه‌رگه‌ ل چیایێن كوردستانێ. هه‌لبه‌ت دڤێ ئه‌م رۆلێ كوردێن پارچێن دی ژی ژبیرنه‌كه‌ین ب تایبه‌تی یێن باكوور، ژ به‌ر كو ده‌ستپێكا ئاگرێ شۆره‌شێ ل به‌هدینان ده‌ستپێكر، ژ به‌ر هندێ خه‌لكێ سه‌رسنووران ل ئالیێ باكوورێ كوردستانێ بوونه‌ پشكه‌كا كاریگه‌ر ژ ڤێ شۆره‌شێ، چ پشكداریكرن وه‌ك پێشمه‌رگه‌ و چ ژی ب سه‌دان مالێن پێشمه‌رگان دا ناڤ مال و گوندێن خوه‌ ده‌ ڤه‌حه‌واندن و هه‌روه‌سا خه‌لكێ باژێران ژی د هه‌موو كارێن پشته‌ڤانی و هاریكاریێ دا رۆله‌كێ قاره‌مانانه‌ له‌یزتن.
هه‌لبه‌ت پشتی هه‌لبوونا ئاگرێ شۆره‌شی ب ده‌مه‌كێ كێم پارتی و ڕێخستنێن دی ژی یێن باشوورێ كوردستانێ هه‌ر ئێكێ ل سنوورێ چالاكیێن خوه‌ ده‌ست ب شۆره‌شێ كر و هۆسا ژی ئاگرێ شۆره‌شێ كوردستان هه‌موو ڤه‌گرت.
ئێك ژ تایبه‌تمه‌ندیێن ڤێ شۆره‌شێ ئه‌و بوو كو د ره‌وشه‌كێ دا ده‌ستپێكر هه‌موو ده‌وله‌تێن داگیركه‌رێن كوردستانێ ل دژی بوون، ژ بلی سوریێ كو مرۆڤ دشێت بێژیت وی ده‌م هه‌لویسته‌كی نه‌رمتر هه‌بوو ژ یێن دی، ژ به‌ر دژایه‌تیا خوه‌ لگه‌ل به‌عسیێن ئیراقێ.
سیفه‌ته‌كێ دی یێ ڤێ شۆره‌شێ ئه‌و بوو كو نه‌ چه‌ك و نه‌ژی پاره‌ دده‌ستێ سه‌ركێشیا شۆره‌شێ دا نه‌بوو. ژ به‌ر هندێ ژی هه‌ر كه‌سێ دبوو پێشمه‌رگه‌ دڤیا چێله‌ك و یان هنده‌ك په‌ز یان هه‌ر تشته‌كێ دی هه‌با فرۆتبا و ژ بۆ خوه‌ تڤه‌نگه‌ك پێ كڕیبا و هه‌موو خه‌رجی و پیدڤیاتیێن دی ژی هه‌ر ل سه‌ر وی بخوه‌ بوون.
هه‌رچه‌نده‌ پێشمه‌رگاتی ئالیێ هه‌ره‌ گه‌شه‌دارێ شۆره‌شێ بوو، لێ ئه‌و بخوه‌ شۆره‌ش ب پێشمه‌رگاتیێ ته‌نێ نه‌دهاته‌ كرن، به‌لكی هه‌ژماره‌كا باشا كادرێن چه‌له‌نگێن ڕێخستنی داكه‌تنه‌ ناڤ خه‌لكی و ئه‌و رێكخستن ژ بۆ خزمه‌تا شۆره‌شێ، كو ئێك ژ وان نموونا ژی كادرێ قاره‌مان و كاریزماتیك شه‌هیدێ نه‌مر مه‌حمود ئێزدی بوو، كو دوژمن ئێخستبوو د ره‌وشه‌كا گه‌له‌كا به‌رته‌نگ دا. ل ئالیێ دی ژی دناڤ باژێران دا ب هه‌زاران خه‌لك هاتنه‌ ڕیكخستن دناڤ دڕێخستنێن نه‌په‌نیێن پارتی دا، كو هه‌م ب چالاكیێن فیداكاری ڕادبوون ل دژی داگیه‌ركه‌ران د ناڤ باژاران ده‌ و هه‌م ژی ژ ئالیێ لۆژستیك، ده‌رمان، خوارن، پێزانین و ڕێبه‌ریی ڤه‌ هاریكاریا پێشمه‌رگه‌ی ژی دكرن و ب سه‌دان ژ ڤان قاره‌مانان كه‌فتنه‌ زیندانان و هاتنه‌ سیێاره‌دان.
د سه‌ر ڤان هه‌موو كاودانێن به‌رته‌نگێن شۆره‌شێ دا یێن مه‌ ل سلالی دیاركرین، هه‌تا دوماهیێ ژی ڤێ شۆره‌شێ ( هه‌روه‌كی شۆره‌شا ئیلۆنێ ژی ) رۆژه‌كێ ژی هزر دكاره‌كێ تیرۆریستی دا نه‌كر، نه‌ ل دژی دوژمنی و نه‌ ژی ل دژی وان كوردین دبوونه‌ جاش و سیخۆڕ و ئێك جار ژی ده‌ستدرێژی ل سه‌ر خه‌لكێ سڤیل نه‌هاته‌ كرن و دام و ده‌زگایێن سڤیل هیچ جاره‌كی نه‌كه‌فتنه‌ به‌رهێرشێن پێشمه‌رگه‌ی. هه‌روه‌كی ئه‌م دزانین نێزیكی پێنج سه‌د هزار كوردێن كو بناڤێ جاش دهاتنه‌ نیاسین دوژمنی چه‌كدار كربوون دا كو وان و پێشمه‌رگه‌ی بهه‌ڤ بده‌ كوشتن، لێ ب فه‌رمانا سه‌رۆك مه‌سعود بارزانی سیاسه‌ته‌كا وه‌سا لگه‌ل وان هاته‌كرن كو هه‌م گیانێ وان كوردان بهێته‌ پاراستن و هه‌م ژی كاریگه‌ریا وان ل دژی شۆره‌شێ بهێته‌ پووچكرن. هۆسا ئه‌ڤ پیلانا وان ژی ب سیاسه‌تا سه‌رۆك بارزانی هاته‌ ژناڤبر و هه‌ر ئه‌ڤه‌ ژی بوو ئه‌گه‌رێ هندێ كو ل ساڵا 1991 ل ده‌مێ سه‌رهه‌لدانێ كوردێ جاش و كوردێ پێشمه‌رگه‌ پێكڤه‌ هێرشێ بكه‌نه‌ سه‌ر ده‌زگایێن داگیركه‌ران و وان ژ كوردستانێ ده‌ربێخن.
كاره‌كێ دی یێ جوانێ ڤێ شۆره‌شێ ئه‌و بوو كو چ جارا سه‌ركردایه‌تیێ نه‌ دهێلا سنێله‌ و زارۆك ببنه‌ پێشمه‌رگه‌ و چه‌كی بهه‌لگرن، كو ئه‌ڤه‌ ژی پره‌نسیپه‌كێ مرۆڤایه‌تیه‌ ل گۆره‌ی یاسایێن نه‌ته‌وه‌یێن ئێكگرتی و گه‌له‌ك كێم دناڤ بزاڤێن چه‌كداری دا مرۆڤ دبینیت كو ئه‌ڤ پره‌نسیپه‌ نه‌هاتبیته‌ بنپێكرن.
هه‌لبه‌ت هه‌ر ژ سایا ڤێ شۆره‌شێ و هه‌موو شۆره‌ش و سه‌رهه‌لدانێن دی یێن كوردا و ئه‌ڤ قاره‌مانیێن ئیرۆكه‌ پێشمه‌رگه‌ تۆماردكه‌ت ل به‌ره‌یێن دژی ترۆریستێن داگیركه‌ر و وێ سیاسه‌تا حه‌كیمانه‌ یا سه‌رۆك بارزانی یه‌ كو گه‌ل و وه‌ڵاتێ مه‌ گه‌هه‌شتی به‌ر ده‌رازینكا ئارامانجا خوه‌ یا هه‌ری بلند، ئه‌ڤرۆكه‌ ژی هه‌ر ئه‌و سه‌رۆكه‌ یێ سه‌ركێشیا شۆره‌شا گۆلانێ كری كو وه‌ڵات وه‌ڵات دگه‌ڕیت و پشته‌ڤانیا ده‌رڤه‌یی ژ بۆ وێ ئارمانجا هزاره‌ها ساڵان یا كوردان په‌یدا دكه‌ت كو ئه‌و ژی سه‌رخوه‌بوونا كوردستانێ یه‌.
شۆڕشا گۆلانێ ب خوینا هزاره‌ها قاره‌مانان سه‌ركه‌فت و گه‌هه‌شته‌ ئه‌ڤرۆكه‌، ژ به‌ر هندێ سڵاڤێن ئازادی و سه‌رخوه‌بوونێ دڤێ رۆژێ دا دكه‌مه‌ دیاری بۆ گیانێ وانێن نه‌مر و دبێژمه‌ وان:
مزگین ئه‌ی شه‌هید رۆژامه‌ هه‌لات
به‌رێ خوینا وه‌ سه‌رخوه‌بوون خه‌لات

به‌ری چه‌ند رۆژه‌كان نووچه‌یه‌كێ سه‌یر و گه‌له‌ك ب له‌ز ل هه‌موو مه‌دیایێن كوردستانێ به‌ڵاڤبوو، كو ب ڤێ ئاواێێ بوو (وه‌زاره‌تا پێشمه‌رگه‌ی خوه‌كوژه‌كێ داعش وه‌ك شه‌هێدێ پێشمه‌رگه‌ی تۆمار دكه‌ت)!!
هه‌لبه‌ت ئه‌ڤ نووچه‌یه‌ ژی ژ ئالیێ دلێر ماوه‌تی په‌رله‌مانته‌رێ ئێكه‌تیا نیشتمانێ كوردستانی و جێگرێ سه‌رۆكێ لژنه‌یا كاروبارێن پێشمه‌رگه‌ و شه‌هێدان و قوربانیێن جینۆسایدێ ل په‌رله‌مانێ كوردستانێ هاتیه‌ به‌ڵاڤكرن. ناڤبری وه‌سا ب شانازی ژی ڤه‌ ئه‌ڤه‌ نووچه‌یه‌ گه‌هانده‌ مه‌دیایێ، هه‌روه‌كی وی هنگڤین ل قلۆلا دارێ دا دیت و وه‌سا خوه‌ پێ بادا و دفنبلندكر هه‌روه‌كی وی سه‌خته‌كاریه‌كا گه‌له‌كا مه‌زن و پڕی مه‌ترسی ل سه‌ر ئاسایشا كوردستانێ ئاشكه‌را كری. په‌رله‌مانته‌رێ كو كارێ وی به‌ڕه‌ڤانی كرنه‌ ژ پێشمه‌رگه‌ و شه‌هیدان دبێژیت: (وه‌زاره‌تا پێشمه‌رگه‌ی ناڤێ داعشه‌كێ خوه‌كوژب ناڤێ (حوزه‌یفه‌)، كو ل ره‌بیعه‌ خوه‌ ب پێشمه‌رگه‌یڤه‌ په‌قاندیه‌ و چه‌ند پێشمه‌رگه‌یه‌ك شه‌هیدكربوون، بۆ په‌رله‌مانی ڕێكریه‌ دا كو وان دو ملیۆن دینارێن هاریكاریا شه‌هیدان بۆ مالباتا وی بمه‌زێخن، به‌لێ هه‌ر ئێكسه‌ر بۆ مه‌ گومان ل سه‌ر ناڤی وی چێبوو و پشتی (ڤه‌كۆلێنێ ده‌ركه‌فت كو ئه‌و داعش بووه‌)!!
باشه‌ ئه‌و چ جۆره‌ ڤه‌كۆلین بوو ڤی په‌رله‌مانته‌رێ (شاره‌زا و زانا) كری !! گه‌لۆ ئه‌و چ مه‌تۆد و ڕێبازێن ڤه‌كۆلێنا كه‌سنه‌دیتی بوون وی بكار ئیناین؟؟ یان ژی هه‌ر ته‌نێ ڤه‌كۆلینا وی ئه‌و بوو كو ناڤێ وی (حوزه‌یفی)یه‌ و ناڤه‌كێ عه‌ره‌بیه‌ و ئێدی خلاس ئه‌و داعشه‌؟ پا ئه‌گه‌ر وه‌سا بیت و داعشبوون ب ناڤێن عه‌ره‌بی بیت، وێ ده‌مێ باب و باپێرێن كاك دلێر ماوه‌تی ژی دڤێت هه‌ردو داعش بن چونكێ ناڤێن وان ژی عه‌ره‌بینه‌!!
هه‌لبه‌ت ئه‌ڤ (داعشێ) كو سه‌ێداێی په‌رله‌مانته‌ر ئاشكه‌را كری و گه‌له‌ك ب له‌ز نووچێ وی به‌لاڤكری دا هنده‌ك عمفه‌رینا پێ وه‌رگریت، ئه‌و نه‌ داعش بوویه‌ و نه‌ژی پێشمه‌رگه‌یه‌كێ نۆرمال بوویه‌، لێ ئه‌و ئێك ژ قاره‌مانێن هه‌ره‌ به‌رنیاسێن كوردستانێ بوویه‌، ئه‌و (حوزه‌یفی سه‌عید محمه‌د عه‌لی ئه‌ره‌دنی) یه‌ كو هێشتا د بهارا ژیێ خوه‌ دا ل سالا ١٩٨٥ بوویه‌ پێشمه‌رگه‌ ل سنوورێ لژنا ناڤچا ئامیدیێ یا سه‌ر ب لقا ئێكا پارتی دێمۆكراتی كوردستانێ ڤه‌، هه‌ما بێژه‌ هه‌موو داستانێن مه‌زنێن شۆڕشا گولانێ ل به‌هدینان، وه‌كی كانێماسێ، دێره‌لۆكێ، بامه‌ڕنێ، سۆتكێ و بێبادێ و ب ده‌هان قاره‌مانیێن دی شه‌هید حوزه‌یفی نه‌به‌س پشكداری تێدا كریه‌، به‌لكی رۆله‌كێ سه‌ره‌كی یێ قاره‌مانانه‌ تێدا هه‌بوویه‌ و ل ئه‌نفالان ژی بوویه‌ په‌نابه‌ر ل كه‌مپا ماردینێ ل باكوورێ كوردستانێ و پاشی ل ١٩٩١ دیسا بوویه‌ڤه‌ پێشمه‌رگه‌ و گه‌له‌ك پله‌یێن له‌شكه‌ری یێن جودا وه‌رگرتینه‌، ده‌مێ شه‌هید ژی بووی پلا عه‌مید هه‌بوو و ئه‌ندامێ فه‌رماندا سپیلكی یا له‌شكرێ كوردستانێ و به‌رپرسێ بزاڤێن له‌شكری یێن فه‌رماندا ناڤبری بوو. و هه‌ر ل ده‌ستپێكا هێرشا داعش بۆ سه‌ر كوردستانێ ل هاڤینا ٢٠١٤ شه‌هید حوزه‌یفی چ ل به‌ره‌یێ سحێلا و زومار و چ ژی ل به‌نداڤا مووسل و تلسقۆف و دووماهیێ ژی ل ره‌بیعه‌یا كو هه‌رل وێرێ ژی شه‌هید بوو، هه‌موو ده‌ما وه‌ك فه‌رمانده‌ و سه‌ركرده‌یه‌كێ له‌شكه‌ریێ زیره‌ك ل چه‌په‌رێن پێشیێ وه‌ك قاره‌مانان دربێن كوژه‌ك د داوه‌شاندنه‌ ته‌رۆرێستێن داعش. ژ بلی هندێ كو ئه‌ز وه‌ك هه‌ڤاڵ و هه‌ڤچه‌په‌ره‌كێ شه‌هید حوزه‌یفی گه‌له‌ك ب ڤێ بێڕێزیا ڤێ په‌رله‌مانته‌رێ بێئاگه‌ه و د گوهێ گای ده‌ نڤستی، خه‌مبار بووم، لێ خه‌مباریا مه‌زنتر ئه‌وه‌ كو گه‌لۆ ئه‌گه‌ر جێگرێ سه‌رۆكێ لژنا كاروبارێن پێشمه‌رگه‌ و شه‌هید و قوربانیێن جینۆسایدێ ل په‌رله‌مانێ كوردستانێ ئێك ژ پێشمه‌رگه‌ و شه‌هێدێن هه‌ره‌ قاره‌مان و به‌رنیاس بكه‌ته‌ داعش و بخۆ ب زیره‌كی و سه‌ربلندی بزانیت، پا ئه‌رێ حالێ پێشمه‌رگه‌ و شه‌هێده‌كێ نۆرمال و نه‌نیاس د ده‌ستێن ڤی عه‌مێ گۆزێ دا دێ چ بیت؟!
ئاها ل ڤێرێ بۆ مه‌ دیار دبیت كانێ هنده‌ك رێكخستنێن سیاسی یێن كوردستانێ چ جۆره‌ خه‌لكێ نه‌زان و بێئاگه‌ه (من ڕێز هه‌نه‌ بۆ په‌رله‌مانته‌رێن دی) ڤڕێدكه‌نه‌ په‌رله‌مانی و چاره‌نڤێسێ گه‌ل و وه‌لاتێ مه‌ دئێخنه‌ دده‌ستی دا!!
هه‌لبه‌ت هه‌كه‌ دلێر ماوه‌تی په‌رله‌مانته‌رێ هه‌ر وه‌لاته‌كێ دی با نه‌ كو یێ ڤێ كوردستانا مه‌یا ڕه‌به‌ن، ئه‌و دا ئێكسه‌ر ده‌ست ژ كارێ خوه‌ یێ په‌رله‌مانته‌ریێ به‌رده‌ت و داخوازا لێبۆرینێ ژ گێانێ ڤی شه‌هیدێ ب قاره‌مانیا خوه‌ ترس و له‌رو ئێخستیه‌ گیانێ دوژمنێن كوردستانێ و مالاباتا وی و هه‌موو خه‌لكێ كوردستانێ كه‌ت، لێ ژ به‌ر كو ل ڤێ وه‌لاتێ مه‌ یێ كه‌س ب كه‌سێ نه‌، چ كێشان و پیڤان و حسابن نینن، ژبه‌ر هندێ ژی ڤی سۆپه‌ر په‌رله‌مانته‌رێ د گوهێ گای دا پالادای و نه‌ ل منێ و نه‌ ل ته‌یێ، هه‌روه‌كی كێچه‌ك ژ پشتا گوهێ خوه‌ گرتی.
لێ ب دیتنا من دڤێت به‌ری هه‌ر كه‌سه‌كی وه‌زاره‌تا پێشمه‌رگه‌ی و وه‌زاره‌تا شه‌هێد و ئه‌نفالكریان و سه‌رۆكاتیا په‌رله‌مانێ كوردستانێ و هه‌موو خه‌لكێ كوردستانێ ژی، ب تایبه‌ت مالاباتێن شه‌هید و ئه‌نفالكریان، زه‌ختێ بێخنه‌ سه‌ر وی كو ئه‌و ده‌ست ژ كاری به‌رده‌ت و لێبۆرێنه‌كا فه‌رمی پێشكێشی مالاباتا شه‌هیدی و هه‌موو خه‌لكێ كوردستانێ بكه‌ت.
ژبه‌ر كو هه‌كه‌ حالێ شه‌هید و پێشمه‌رگێن مه‌ د ده‌ستێ په‌رله‌مانی و لژنێن به‌ڕه‌ڤانی ژ شه‌هید و پێشمه‌رگا ئه‌ڤه‌ بیت، پا خه‌لكێ دی دێ چ ب سه‌رێ مه‌ ئینن !!