ملله‌تێ كورد ئه‌ڤرۆ ل هه‌رێماكوردستانا عیراقێ ژیانه‌كا تایبه‌ت دژێت و هه‌ر ژ سه‌رهلدانا 1990 ێ و هه‌تا ئه‌ڤرۆ رۆژانه گوهۆرینێن به‌رده‌وام دكه‌ڤنه د ژیانا وان دا و هندی ساله‌ك ب سه‌ر ژیانا هه‌رێمێ ڤه دچیت، پتر ژیان رۆنتردبت
و ملله‌ت فێری جۆرێ ژیانا ئارام و پێشكه‌فتنێ دبت، ئه‌ڤ ملله‌ته یێ ده‌ركه‌فتی ژ بن هێرش و شه‌ڕێن جۆره‌وجۆر ، ئه‌ڤ شه‌ڕ و هێرشه یێن بووینه ئه‌گه‌را نه‌زانینا ڤی ملله‌تی بۆ زۆربه‌ی مه‌رج و رێنمایێن پێشكه‌فتنێ، ئه‌و ژی ژ ئه‌گه‌را نه‌بوونا ژماره‌كا پێدڤی ژ زانیار و شاره‌زایێن زانستی د هه‌می واران دا یێن كو ل هه‌می وه‌لاتێن جیهانێ نه‌خشێ پێشكه‌فتنێ و سیسته‌مێ وه‌لاتێ ئاڤادكن و بنه‌مایا ده‌وله‌تێ پێنگاڤ پێنگاڤ نیشا دده‌ن د سیسته‌مه‌كی نڤیساندی دا و ده‌وله‌ت ب رێیا قانوونێ به‌ره به‌ره جێبه‌جێدكه‌ت.
ئێك ژ گرنگترین ئاریشانه ئه‌ڤرۆ ل كوردستانا مه ئه‌وه كو ژماره‌كا باشا زانكۆ و په‌یمانگه‌هان هه‌یه سالانه قوتابیێن وی ده‌ر دچن بێ كو بزانن پاشه‌رۆژا وان چیه و دێ ل كیڤه كاركن و هه‌می ژی چاڤه‌رێ حوكمه‌تا هه‌رێمێنه بۆ دامه‌زراندنێ ل داموده‌زگه‌هێن حوكومی و ژ به‌ر قه‌یرانێن به‌رده‌وام یێن هه‌رێما كوردستانێ ل گه‌ل حوكمه‌تا به‌غدا، ژماره‌كا مه‌زن ژ ده‌چووێن كۆلیژ و په‌یمانگه‌هان ل مال روونشتینه و چاڤه‌رێ دامه‌زراندنێ نه، به‌لێ هه‌كه ئه‌م باش خواندنه‌كێ بكه‌ین ل سه‌ر پێشكه‌فتنا ملله‌تان د میژوویێ دا ئه‌م دێ بینین كو كه‌رتێ تایبه‌ت هه‌می ملله‌تان بسه‌ر دئێخت و فه‌رمانبه‌رێن د كه‌رتێ تایبه‌ت دا كار دكن شاره‌زاترن و زیره‌كترن ژ فه‌رمانبه‌رێن كه‌رتێ حكومی و دبنه پالده‌ر بۆ پێشكه‌فتنا وه‌لاتی، ئه‌ڤجا یا باش ئه‌وه كو ئه‌م فه‌لسه‌فا گه‌شه‌پێدانا كه‌رتێ تایبه‌ت به‌لاڤه‌كین د ناڤ ملله‌تی دا و حوكمه‌ت هنده‌ك ژ بودجێ خوه ته‌رخانكه‌ت بۆ گه‌شكرنا كه‌رتێ تایبه‌ت بۆ چه‌ندین سالان هه‌تا ئه‌ڤ ملله‌ته فێری كاركرنێ ببت ل كه‌رتێ تایبه‌ت و بازرگان ژی بزانت كو ئه‌گه‌ر پرۆژێ وی دێ خوساره‌ت بت دێ حوكمه‌ت
بۆ وی قه‌ره‌بۆ كه‌ت، ئه‌ڤ پێنگاڤه دێ بیته پالده‌رك بۆ هه‌بوونا ژماره‌كا مه‌زن ژ پرۆژێن تایبه‌ت ل كوردستانێ و ل ڤێرێ به‌لكو خوانده‌ڤان بێژیت هه‌كه حوكمه‌ت قه‌ره‌بۆكرنا پرۆژێن بنكه‌فتی بكه‌ت، هه‌ر حوكمه‌تێ پارێ خوه مه‌زاخت و چو جوداهی د ناڤبه‌را ڤی كاری و دامه‌زراندنا فه‌رمانبه‌ران دا نینه، ئه‌ز دێ بێژمێ نه‌خیر ئه‌ڤه هزره‌كا شاشه، چونكو هه‌كه بۆ گۆژمه‌كێ سنۆركری ژ پاره‌ی شیان هه‌بوو حوكمه‌ت پرۆژه‌كی پالده‌ت، ئه‌و نابیته وه‌كو پاره‌كێ ته‌رخانكری بۆ چه‌ندین سالێن فه‌رمانبه‌ر كاردكه‌ت ل داموده‌زگه‌هێن میری و یا باش ئه‌وه ئه‌م ب هژمێرێن سالێن كو فه‌رمانبه‌ر دبۆرینن ل داموده‌زگه‌هێن حكومی ل گه‌ل پارێ هه‌ر پرۆژه‌كێ تایبه‌ت كو هه‌ر ئه‌و ژمارا فه‌رمانبه‌ران كاربكن ل وێ پرۆژه‌ی، ئه‌م دێ بینێن كا چه‌ند حوكمه‌ت و ملله‌ت مفاداره ژ هه‌بوونا پرۆژێن تایبه‌ت، وه‌كو ملله‌تێ چینی دبێژن (من فێری گرتنا ماسیان بكه باشتره ژ تو ماسیه‌كێ بده‌یه من)، یان ژی ئه‌ڤ ملله‌ته ب رێیا دامه‌زراندنێ فێری ته‌مبه‌لیێ دبیت و من دڤێت دیاركم كو پتریا كارێن ته‌كنیكی یێن پێشكه‌فتی داموده‌زگه‌هێن حكومی پێدڤی كۆمپانیێن تایبه‌ت دبن ژ بۆ چاره‌سه‌ریا ڤان جۆره ئاریشان، وه‌كو كارێن ئه‌نترنێت و كامیره و ئامیرێن فۆتۆكۆپی و ئامیرێن ساخله‌میی ل نه‌خۆشخانان و گه‌له‌ك كارێن دی، ئه‌ڤه ژی دزڤریت بۆ نه‌شاره‌زاهیا وان فه‌رمانبه‌ران یێن ل ڤان داموده‌زگه‌هێن حكومی كاردكن ژ به‌ر نه‌بوونا خۆلێن فێركرنێ و نه‌بوونا چاڤدێریا باش ژی ل كه‌رتێ حكومی و هه‌ر وه‌كو دكتۆرێ شاره‌زا تارق سویدان دبێژیت (ئه‌و فه‌رمانبه‌رێ ل كه‌رتێ حكومی كاردكه‌ت دبیته عه‌بدێ رێڤه‌به‌ر و به‌رپرسێ خوه، به‌لێ فه‌رمانبه‌رێَ كه‌رتێ تایبه‌ت ئازاده)، ئه‌ڤجا بلا ئه‌م هه‌می وه‌كو ملله‌ت و حوكمه‌ت ده‌ست ب ده‌ست كاركین ل سه‌ر پێشكه‌فتنا كه‌رتێ تایبه‌ت داكو كوردستانا خوه پێشبێخین و ب گه‌هینه ئاستێ جیهانا پێشكه‌فتی.
نووترين نووچه
- چارەسەركرنا كێشەیان ل ئیراقێ خزمەتا پاراستنا ئارامییا وەلاتی دكەت
- سەرۆكێ هەرێما كوردستانێ و شاندەكێ توركی دوپاتیێ ل بەرفرەهكرنا هاریكارییا هەڤپشك دكەن
- مەسرور بارزانی و محەمەد ئەلحەسسان دوپاتی ل دابینكرنا ماف و شایستەیێن دارایی یێن خەلكێ كوردستان كر
- مەسرور بارزانی و شاندەكێ توركیا پرۆسەیا ئاشتیێ گەنگەشەكر
- پێدڤییە پشكا بودجەی و شایستەیێن دارایی یێن كوردستانێ بێی كێشە بهێنە هنارتن
- د. هێمن هەورامی و مازن ئەلفەقیهـ دووماهی پێشهات گەنگەشەكرن
- پەیمانگەها واشنتۆن: پێكهاتەیێن دەشتا نەینەوا میلیشیایێن چەكدار رەت دكەن
- قونسلخانەیا ئەمریكا ل هەولێرێ: هاریكارێن وەزارەتا پێشمەرگەینە بۆ دروستكرنا ژێرخانەیەكا ب هێز
- سەرۆكێ حوكمەتا هەرێمێ و بالیۆزێ هۆلەندا ب هێزكرنا هەڤبەندییان گەنگەشەكرن
- رێبەر ئەحمەد: مادەیێ 140 و رێككەفتنا شنگالێ كلیلێن چارەسەركرنا هەموو كێشەیانن
یه‌حیا قه‌ساب
پێشمه‌رگه قوربانن. .. و بازرگان نزانن
پشتی ئه‌ڤ شه‌ڕێ هنده مه‌زن ده‌ستپێكری د ناڤ هێزێن پێشمه‌رگه‌ی و گرۆپێن تیرورێ یێن ب ناڤێ داعشێ. ب دیتنا مه وه‌كو ملله‌تێ كورد هاته گوهۆرین بۆ زوربه‌ی ره‌خ و رویێن ژیانێ و بۆ مه دیاربوو كو هه‌ڤالێن مه یێن نێزیك ب ساناهی شیان هه‌یه ببنه نه‌یار و كێرێن خوه تیژكرن بۆ حه‌فحكا مه و مه زانی كو ب ساناهی نینه ئه‌م ده‌وله‌تا كوردی راگه‌هینین و مه زانی كو بێ قوربانی و شه‌هید گه‌له‌ك زه‌حمه‌ته ده‌ستكه‌فتیان ب ده‌ستخوه‌ڤه بینین و مه زانی كو ل به‌ر چاڤێن نه‌یاران كورد هه‌می ئێكرێز و ئێك ره‌نگن، گه‌له‌ك وێنێن دی بۆ مه دیاربوون كو به‌ری نها ئه‌م هه‌می هاتبووینه خاپاندن و مه هزرێن شاش تێدا كربوون, به‌لی وێنه‌ك هێشتا ماییه نه دیار و شاشی یێ تێدا هه‌ی و ژماره‌كا كێم ژ ملله‌تی ئاگه‌ه ژی نینه، به‌لێ گه‌له‌ك گرنگه ئه‌ڤ شاشیه بهێته راستكرن.
سه‌باره‌ت ڤێ شاشیا مه به‌حس لێ كری د شیان دانه بهێته داڤكرن و هه‌ر داڤه‌ك جودا ل دووڤ چوون لێ بهێته كرن و نموونا ئێكێ ئه‌م دێ به‌حس لێ كه‌ین نموونا بازرگان و بازرگانیێ ل گه‌ل كارێن گرێدای پێشمه‌رگه‌ی ڤه و بازرگانیا دهێته كرن بۆ خزمه‌تا پێشمه‌رگه‌ی، ئه‌ڤ بابه‌ته گرنگیا وێ دهێته دانان ل رێزا ئێكی ل ده‌مێن شه‌ڕێن مه‌زن وه‌كو شه‌ڕێ نها پێشمه‌رگه دكه‌ت, هه‌ر گه‌نده‌لیه‌كا هه‌بیت د ناڤ رێزین بازرگانان دا و كه‌سانێن كارتێكرنێ ل سه‌ر ژیانا پێشمه‌رگه‌ی یان سه‌ر په‌یداكرنا ئاسانكاریا ژیانا وان ل سه‌نگه‌ری بكه‌ن دڤێت ب توندی بهێنه سزادان, چونكو هه‌ر كاره‌كی چه‌ندین ساناهی بیت ل ده‌مێن شه‌ڕی دبیته ئه‌گه‌را شكستنێ ل سه‌نگه‌ری و ئه‌ڤ دیارده دڤێت ببیته هێله‌كا سۆر كه‌س پێلێ نه‌كت, بۆ نموونه كارێ كرینا جلك و پێلاڤێن شه‌ڕی بو پێشمه‌رگه‌ی دڤێت ب هووری ل سه‌ر بهێته راوه‌ستان, ئه‌رێ ئه‌ڤ پارێ هاتیه مه‌زاختن بۆ كرینا ڤان جلكان ب دروستی دهێته مه‌زاختن؟ و هه‌كه نه كانێ دووڤچوون دێ چاوا بیت؟ هه‌ر وه‌سا خوارنا دهێته مه‌زاختن بۆ پێشمه‌رگه‌ی, ئه‌رێ ئه‌ڤ خوارنه تێرا هه‌می پێشمه‌رگه‌ی دكه‌ت یان نه و دگه‌هیته هه‌می پێشمه‌رگه‌ی ل هه‌می خالێن سه‌نگه‌ری؟ و چه‌ندین كارێن دی یێن گرێدای پالپشتكرنا پێشمه‌رگه‌ی, ئه‌ڤه هه‌می دكه‌ڤتیه دبن خالا هه‌ستێ نه‌ته‌واتی یێ بازرگانان, ئه‌ڤ هسته دبیته پالده‌ره‌ك بۆ كارێ باش و بێ فیلبازی, چونكو ئه‌ڤ ده‌مه زۆر نازكه و نه‌یار چاڤه‌ری هه‌ر شاشیه‌كینه داكو هێرشی بكه‌نه كوردستانێ و هه‌ر فێلبازیه‌كا بازرگانی دبیته ئه‌گه‌ره‌ك بۆ پشته‌ڤانیا نه‌یاران و رێیه‌ك بۆ شكه‌ستنا پێشمه‌رگه‌ی، ب دیتنا من ئه‌ڤه جۆره‌كی مه‌زنه ژ جۆرێن خیانه‌تا كوردستانێ و یا فه‌ره ب ساناهی نه‌بوورت ئه‌ڤ جۆره خیانه‌ته, هه‌ر كاره‌كێ ببیته ئه‌گه‌را شكه‌ستنا پێشمه‌رگه‌ی دڤێت بهێته بنبركرن و ل هه‌می دیرۆكا جیهانی هه‌كه ئه‌م بخوینین، دێ زانین كو سزادانا خیانه‌ت و گه‌نده‌لیێ ل ده‌می شه‌ڕی دژوارتره ژ هه‌می ده‌مێن دی, ئه‌م هه‌می دژی زورداریێ نه ل كوردستانێ, به‌لێ ده‌مێ زۆرداری ده‌رمان بیت بۆ پاراستنا هه‌می كوردستانێ ئه‌م دێ بێژین بلا زۆرداری هه‌بیت و بلا خیانه‌ت نه‌بیت و كوردستان یێن كه‌فتیه ل سه‌ر رێیا ده‌وله‌تبوونێ و بلا كه‌س نه‌بت رێگر ژ ملله‌تێ كورد چونكو نه‌یار هه‌می رێگرن.
سزایێ ماره‌كرنا ژنا دووی
ب راستی بابه‌تێ ژنئینانا دووێ بوویه بابه‌ته‌كێ زۆر گرنگ د جڤاكێ مه‌دا و نه‌خاسمه ل په‌رله‌مانێ كوردستانێ و هه‌ر وه‌سا یا دیاره په‌رله‌مانتێره‌ك هێژا و تایبه‌تمه‌ند د وارێ یاسایێ بارێ كه‌سایه‌تی دا گرنگیه‌كا مه‌زن دایه ڤی بابه‌تی, وه‌كو دیاركری د رۆژناما ئه‌ڤرۆ دا یا ژماره 1566 ل 13/1/2015 و تێدا داخواز دكه‌ت كو ئه‌و كه‌سانێن ژنا دووێ ماردكه‌ن ل دادگه‌ها شێخان سزا وان بهێته دیاركرن, ئاماژه ب قانوونا عیراقێ دكه‌ت یا ژماره 88 ل سالا 1959 و یاكو ماف دایه زه‌لامی ژنا دووێ بینت و قانوونا په‌رله‌مانێ كوردستانێ ل 31/12/2008 یێ كو ب توندی مه‌رجێن ژن ئینانا ژنا دووێ سنۆركری و ب راستی ب دیتنا من قانوونا په‌رله‌مانێ كوردستانێ بوویه پالده‌ره‌ك و ئه‌گه‌ره‌ك بۆ هه‌بوونا ژماره‌كا مه‌زن یا به‌ردانا ژنان ل پارێزگه‌ها دهۆكێ و ل دووڤ گۆتنا به‌رێز محه‌مه‌د ئه‌مین هادی سه‌رۆكێ دادگه‌ها تێهه‌لچوونا دهۆكێ ل دوَر بابه‌تێ به‌ردانێ و ژێكجوودابوونێ دبێژت كو د نه‌ه هه‌یڤان دا ژ سالا 2014 ی ل سه‌رانسه‌ری دادگه‌هێن سه‌ر ب دادگه‌ها تێهه‌لچوونا ناوچا دهۆكێ ڤه 750 سكالایێن ژێكڤه‌بوونێ هه‌بووینه, یان ژی رۆژانه چار سكالایێن به‌ردان و ژێكجوودابوونێ دهێنه تۆماركرن، ئه‌ڤه ئه‌گه‌ر ئه‌م رۆژێن بیهنڤه‌دانێ وه‌كو ئه‌ینی و شه‌مبی ژناڤ بینین ده‌رڤه, هه‌ر وه‌سا یا سه‌یر ئه‌وه كو د رۆژناما ئه‌ڤرو دا ژماره 1557 ل 28/12/2014 ێ دا هاتبوو دیاركرن كو ژمارا حاله‌تێن به‌ردانێ د ده‌مێ نه‌ه هه‌یڤان دا گه‌هشتیه 6085 حاله‌ت, یان ژی 33 حاله‌تێن به‌ردانێ د رۆژێدا, د هه‌مان ده‌مان دا كو رۆژانه چه‌ندین سكالایێن به‌ردانی هه‌بن, ئه‌ڤه هه‌ژی راوه‌ستانه‌كێ یه ژ لایێ دادوه‌ر و په‌رله‌مانتێران ڤه و پرسیارا من ئه‌وه بوو دادوه‌رێن مه یێن به‌رێز, ئه‌رێ زه‌لامێن داخوازا ژنا دووێ دكه‌ن ل دووڤ چ ئه‌گه‌ران داخواز دكه‌ن؟ قانوونا په‌رله‌مانێ كوردستانێ ل 31/12/2008 ێ پشتی مافێن داین ژنێ راوه‌ستیت د رێكا ئینانا ژنا دووێ دا بۆ زه‌لامی, ئه‌رێ هه‌می زه‌لامان ئینانا ژنا دووێ كرینه عه‌ده‌ته‌ك؟ یان ژی هنده‌ك ئه‌گه‌رێن دی هه‌نه كو هنده ژماره یا زه‌لاما داوای ئینانا ژنا دووێ دكه‌ن؟ باشه ئه‌گه‌ر ژن بگه‌هیته ئاسته‌كی بلند ژ نه‌خۆشیێن ده‌روونی یان ژی هه‌ر ئاریشه‌كا ستاخله‌می و ژیانا زه‌لامی تێكچوو و ژنا وی ل گه‌ل كه‌س و كارێن وێ رێك نه‌دان زه‌لامی ژنێ بینت, كیژ رێ باشتره ژنا دووێ بینت یان ژی هه‌ڤژینا خوه به‌رده‌ت ؟ باشه هه‌كه ژنێ مه‌رج دانان ل سه‌ر ژیانا زه‌لامی، دێ زه‌لام چ كه‌ت ؟ ل دووڤ گۆتنا پارێزه‌ره‌كێ ل دادگه‌هێ دبێژت كو چه‌ندین سكالێن به‌ردانا ژنێ هاتینه توماركرن ژ ئه‌گه‌را داخوازا ژنێ بۆ هه‌بوونا مالا جودا (بیت شرعی مستقل) دووری دایك و بابێن زه‌لامی, وژبه‌ر نه‌بوونا شیانێن دارایی یێن زه‌لامی, نه‌چار بووینه كو ژنێن خوه یێن به‌رداین داكو بشێن دایكێن خوه بخوه‌دانكه‌ن, ئه‌رێ ل دووڤ چ شه‌ریعه‌ت و عورف و عه‌ده‌تێن كورده‌واری قانوونێ ماف داییه ژنێ دایكا زه‌لامی ژ مالا كوری ده‌ربێخیت؟ باشه ما دایك ژی نه ئافره‌ته و مافێن خوه دڤێن؟ و ئه‌گه‌ر زه‌لام بۆ نموونه پێشمه‌رگه‌بت و د شیانێن وی دا نه‌بت ماله‌كێ جودا بو ژنا خو دابینكه‌ت و هه‌ر وه‌سا دایكا خو ژی بخودانكه‌ت , دێ چ كه‌ت ؟ ئه‌ڤجا داخوازامن ژ دادوه‌رێن مه یێن به‌رێز ئه‌وه كو پێشنیاره‌كێ پێشكێشی په‌رله‌مانێ كوردستانێ بكه‌ن وئاریشا هه‌بوونا دایكا زه‌لامی ل گه‌ل خیزانا وی چاره‌سه‌ركه‌ن وه‌كو قانوونا عیراقی یا ژماره 88 ل سالا 1959 دیاركربوو كو زه‌لامی ماف هه‌یه دایكا خوه و بابێ خوه بخودانكه‌ت و هنده‌ك مه‌رجێن توند ل سه‌ر زه‌لامی سڤك بكه‌ن چونكو ئاریشا خیزانی رۆژانه زیده‌تر لێ دهێت و ژمارا به‌ردانا ژنا سالانه ل به‌ر زیده‌بوونێ یه و ئه‌ڤه ژی خزمه‌تا ملله‌تێ كورد ناكه‌ت و به‌لكو ژیانا كورده‌واری تێكده‌ت.
مه پێ شه‌رمه سه‌رۆك ل سه‌نگه‌ری بیت!!
پشتی روودانێن ڤان چه‌ند هه‌یڤێن بوورین دا رووداین ل شنگال و زۆمارێ، بێهیڤیه‌كا مه‌زن په‌یدابووی ل ده‌ف ملله‌تێ مه یێ كورد ب شێوه‌یكی گشتی و هه‌ستێ مه یێ نه‌ته‌وایه‌تی هاته برینداركرن، ئه‌م هه‌می دزانین كو ئه‌و روودانه كارتێكرنه‌كا مه‌زن ل سه‌ر هه‌ستێ سه‌رۆك مسعوود بارزانی كر و یا دیاره كو هه‌ستێ وی یێ نه‌ته‌وایه‌تی پالدا بۆ چوونا سه‌نگه‌ری و سه‌ركێشیا شه‌ڕی ژ نێزیك ل گه‌ل پێشمه‌رگه‌ی و پالدانا پێشمه‌رگه‌ی بۆ شه‌ره‌كی ب هێزتر و دژوارتر، ئه‌ڤ پێنگاڤه دهێته دیتن وه‌كو پێنگاڤه‌كا پیرۆز ژ لایێ سه‌رۆكه‌كی ناڤدار وه‌كو سه‌رۆكی و هاته نڤیسین د پرووتوكا مێژوویا وی یا به‌رنیاس دا.
به‌لێ ل ڤێرێ من دڤیا رۆنكرنه‌كێ ل سه‌ر پشكداركرنا سه‌رۆكی بكه‌م د شه‌ڕی دا ل سه‌نگه‌ری و بینمه بیرا هه‌ر كورده‌كی دلسۆز دا كو سه‌رۆك بارزانی ئه‌و سه‌رۆكه یێ كو په‌یوه‌ندیێن جیهانی ل گه‌ل هه‌رێما كوردستانێ ب هێزكرین و ب رێیا گه‌رانا خوه ل ده‌وله‌تێن جیهانێ دا شیان هه‌بوو كو چه‌ندین سه‌رۆك كۆمارێن جیهانێ رازیبكه‌ت بۆ پشتگیریا هه‌رێما كوردستانێ و ڤه‌كرنا قونسلخانان ل هه‌ولێرێ و ده‌ست ب وه‌به‌رهێنانێن خوه بكه‌ن ب رێیا كۆمپانیێن بیانی ل كوردستانێ، هه‌ر وه‌سا سه‌رۆك ئه‌و بوو كو شیره‌ت كربوو كو داخوازی ژ كۆمپانیێن مه‌زن یێن ئه‌مریكی بهێته كرن ژ بۆ كاركرنێ ل كوردستانێ داكو ئه‌م پشت راستبین كو ده‌وله‌تا ئه‌مریكا پاراستنا به‌رژه‌وه‌ندیا كۆمپانیێن خوه بكه‌ت ل كوردستانێ و ملله‌تێ كورد پشت راست بیت ژ پشتگیریا ئه‌مریكا، هه‌ر وه‌سا دخواز ژ وه‌لاتی ئه‌مریكا كریه كو قاعیده‌كا له‌شكری دانته كوردستانێ داكو ببیته شیره‌كی تیژ چاڤێن نه‌یارێن كوردان ل هه‌ر چه‌ند ده‌وروبه‌رێن هه‌رێما كوردستانێ.
ئه‌رێ پشتی ڤان هه‌می ده‌ستكه‌فتنا ما نه شه‌رمه بۆ هه‌می كه‌سێن شۆله‌ژێ كو كارێ خوه یێ له‌شكری ب دروستی نه‌كرین، ئه‌ڤرۆ سه‌رۆك بچیته سه‌نگه‌ری و كارێ دپلۆماسی بهێلیته پشت خوه داكو سه‌نگه‌رێ كوردستانێ بپارێزیت؟ ما خودی نه‌كه‌ت هه‌كه زیانه‌ك ل سه‌رۆكی بوو كی دێ ب ڤی شێوه‌ی خزمه‌تا ملله‌تێ كورد كه‌ت؟ هه‌كه ملله‌تێ كورد هه‌می هزرێن خوه باش بكه‌ن، دێ هه‌می چه‌كی راكه‌ن و داخوازیێ ژ سه‌رۆكی كه‌ن بزڤریته هه‌ولێرێ ڤه، هه‌كه له‌شكرێ كوردستانێ و پێشمه‌رگه باش هزرێن خوه بكه‌ن، ئه‌و دێ خۆشیێ ل خوه حه‌رامكه‌ن و ره‌حه‌تیا خوه وه‌رناگرن هه‌تا سه‌رۆكی پشت راست كه‌ن. بزڤریته پایته‌ختێ ڤه، پشتی چه‌ندین سالێن ده‌ستكه‌فتنان و پێشڤه‌چوونێ ل كوردستانێ ئه‌م چو نه به‌رهه‌ڤین ڤان ده‌ستكه‌فتنان به‌رئاڤدا به‌ردین، چو بهانه به‌رئاقلی ناكه‌ڤت هه‌كه كێماسی كه‌فته كارێ له‌شكری ل سه‌نگه‌ری، بلا هه‌می ملله‌ت هاریكاربیت بۆ ئاشكه‌راكرنا گه‌نده‌لیا هاتیه‌كرن ل رێزێن پێشمه‌رگه‌ی و ئه‌م هه‌می ببینه ده‌سته‌ك هاریكار ل گه‌ل سه‌رۆكی دا كو كه‌سانێن نه‌باش ژ ناڤ رێزێن پێشمه‌رگه‌ی لاده‌ته‌ڤه و ئه‌م هه‌می هاریكاربین بۆ پاقژكرنا داموده‌زگه‌هێن له‌شكری، بۆ كوردستانه‌كا پاك و بژین ژ خیانه‌تێ و پاشه‌رۆژه‌كا گه‌ش بۆ هه‌می زارۆیێن كورد ل كوردستانێ.
WP Facebook Auto Publish Powered By : XYZScripts.com