ئەڤرۆ ، نەوزاد زادە ھلۆری:

ھندەک ژ دکتورێن سینگ و دلی دیاردکەن کو د شیانێن وان دا ھەیە کو کارێ گوھرینا دلی بکەن ، بەلێ چاڤەرێ وێ یەکێ دکەن کو فەتوایەک ژلایێ لیژنا فەتوایێ بھێتەدان دا کو ئەڤ یەک بھێتە ئەنجام دان ، و سەروکێ لیژنا فەتوایێ ژی دیاردکەت کو ئەو چاڤەرێ نڤیسارەکا فەرمی نە دا کو بریارا خوە لسەر بدەن.

دکتور چاڤەرێ فەتوایێ نە

دکتور موزەفەر عەبدولرەحمان سەروکێ کومەلا پزیشکێن سنگ و دل ل ھەرێما کوردستانێ دیارکر کو چاندنا دلی ئێکە ژ وان کارێن گرنگێن کون ھا ل پرانیا جیھانێ دھێتکرن و سەرکەفتن ژی دەستڤە ئینایە و گۆت : ( نھا ل کوردستانێ شیان ھەنە کو کارێ چاندنا دلی بھێتکرن و پێدڤی یە پلانەک ھەبیت ژ بوو وان کەسانێن کو لەشی َخوە ل دەما گیان ژ دەستدانێ د بەخشن داکو مفا ژ لەشی َوان بھێتە وەرگرتن بو کەسانێن ساخ و ئەڤ یەک ژی دڤێت ب رەزامەندیا کەس و کارێن وان بیت ل گور فەتوا لیژنا فەتوایێ )

لیژنا فەتوایێ داخوازا رونکرنان دکەت

مەلا عەبدوللا مەلا سەعید سەروکێ ئێکەتیا زانایێن ئاینێ ئیسلامی ل کوردستانێ دیارکر کو پێدڤی یە جھێن شولەژێ رونکرنان لسەر چەوانیا چاندنا دلی بدەن لیژنا فەتوایێ داکو بکارن کارێ خوە بکەن و گۆت : ( گوھرینا دلێ کەسەکێ ژ بوو کەسەکێ ل وی دەمی دھێتکرن کو ئێک ژ وان زێندی بیت و یێ دن بمریت ژ بەرڤێ یا ب ساناھی نابیت فەتوا بو بھێتدان و دڤێت جھێن شولەژێ لایەنێن ئەرێنی و نەرێنیێن ڤێ یەکێ روون بکەن پاشی ئەم وەکو لیژنا بلندا فەتوایێ دی َھەلویستێ خوە دیارکەین )

  ١٠٠ کەسان لەشی َخوە بەخشی یە

ل ھەرێما کوردستانی َرێکخراوەک ھاتیە دامەزراندن بو بەخشینا لەشی و جێگرێ سەروکێ رێکخراوا ناڤھاتیش دیارکر کو ھەتا نھا نێزیکێ ١٠٠ کەسان فورمێن بەخشینا دلێ خوە پرکرینە و گۆت : ( رێکخراوا مە ناڤێن ئەندامێن بەخشینا دلی وەردگریت و لەش ژی ل وی دەمی دھێتە بەخشین پشتی ئەو کەس دمریت و دلێ وی ژ بوو کەسەکێ ساخ دھێت بەخشین و چوو کێشە ژی درۆست نابن )

کرین و فروتن قەدەغەیە

مەلا عەبدوللا مەلا سەعید سەروکێ ئێکەتیا زانایێن ئاینێ ئیسلامی ل کوردستانێ زێدەتر گۆت : ( نابیت ب ھیچ شێوەیەکێ کرین و فورتن ب دلی یان ئەندانێن لەشی بھێتەکرن و بتنێ کەسانێن کو گیانی َخوە د بەخشن خێرەکا من دگەھیتێ و دەلێڤێ ب ژیانا کەسەکی َدن ددەت پشتی مرنا خوە )

٢٥% ژ خەلکی َھەرێما کوردستانێ نەخوشیێن دلی ھەنە

ل گور ئامارەکا رێڤەبەریا ساخلەمیێ ل ھەولێرێ د سالا بوری دا ژ سەرجەمێ ٣ ملیون ٤١٠ ھزار ٦٤٠ کەسێن پشکنین بو ھاتیەکرن دیاربوویە کو ملیونەک ٩٧ ھزار ٨٣ کەسان ئاستەنگ و نەساخیێن سینگ و دلی ھەنە و ژ وان ژی ٨٠٨ کەسان ژی ژ ئەگەرا نەساخیێن دلی گیانێ خوە ژ دەستدایە و دکتور دیاردکەن کو چارەسەری پێدڤی ب خوە پاراستنێ ھەیە ب تایبەتی ژ ڤەخوارنا مەیێ و دوریکەفتن ژ جگاران ب تایبەتی ژ وان کەسانێن نەساخیا شەکرێ ھەیە و دخوازن کو بەردەوام خوارنێن ب پاقژ بخوون و وەرزشێ بکەن و خوە ب خەم و ئازار نەئێخن.

ئەڤرۆ، ئەمیر ئەترووشی:

پتریا ئەو فەرمانبەرێن دھێنە خانەنشینکرن ل ناڤ جڤاکێ مە چو ھیڤی و ئۆمێد د ژیانێ دا نامینن و ب تنێ چاڤەرێ مرنا خوە دکەن و دکەڤنە ژێر نەخۆشیێن دومدرێژ و کەس نەشێت دەقیقەکا ب تنێ یا وەرزشێ ژی بکەت. ڤەکۆلەرێن جڤاکی دیار دکەن ژیێ دەست نیشان کری بۆ خانەنشینکرنێ د ھەر جڤاکەکی دا جودایە ژ جڤاکەکێ دی، لێ د پتریا جڤاکان دا ل ناڤبەرا ژیێ (٦٠ ھەتا ٦٣) سالی یە و د ڤێ قوناغا ژیێ مرۆڤی دا ھندەک گوھۆرین ژ ئالیێ جەستەیی و دەروونی و جڤاکی ل دەف کەسی پەیدا دبن.

کەریم محەمەد نھا د ژیێ ٧٠ سالیێ دایە و بەری نھا فەرمانبەر بوویە و ھاتیە خانەنشینکرن، ل بەردەروکێ بانکا سەرھلدان چاڤەرێ وەرگرتنا مووچێ خوە یێ خانەنشینیێ دکر بۆ ئەڤرۆ دیار کر، ھەتا ژیێ ٦٣ سالیێ ئەو فەرمانبەرێ حوکمەتێ بوویە و وی چو نەخۆشی نەبوون، بەلێ پشتی ھاتیە خانەنشینکرن و چو کار نەماین سالەکێ ما دخانی ڤە و ئەڤە بۆ ئەگەر کو نەخۆشیا شەکرێ و فشارا خوینێ وی بگریت و گۆت: دەمێ مرۆڤ دھێتە خانەنشینکرن ب تنێ دمینیتە چاڤەرێ مرنا خوە.

ڤەکۆلەرێ جڤاکی بەیار باڤی بۆ ئەڤرۆ دیار کر، قوناغا خانەنشینکرن گەلەک کەس ب شێوەکێ سروشتی وەردگرن و ھەتا رادەیەکی ھندەک ب خوە ھەول ددەن خوە خانەنشین بکەن و ژ چارچوڤێ وان کار و پێگیریا دەرکەڤن یێن کو رۆژانە ئەنجام ددەن و بەروڤاژی جۆرێ ئیکێ جۆرەکێ دی یێ فەرمانبەر و کارمەندا ب ترس و مینا کابوسەکی بەرێ خوە ددەنە قوناغا خانەنشینکرنێ.

سەبارەت جڤاکێ مە، باڤی خویا کر، پتریا ئەگەرێن ترس ژ قوناغا خانەنشینکرنێ و بزاڤکرن بۆ مانا ل جھێ خوە و نەھاتنا خار ژ کورسیکێ ڤەدگەریت بۆ کۆمەکا ئەگەرێن ژێک جودا، بۆ نموونە ژ ئالیێ دەروونی ڤە، ئەڤ کەسە ھەست ب شکەستنەکێ  دکەت کو ئێدی ئەو شیانێن کار و بەرھەمھینانێ ل دەف نەمان و ل ڤێرێ ھەست ب کێم بھا بوونێ دکەت و ئەڤە ژی ھزر کرنەکا شاشە، یا دروست ئەوە بێژیت، ھندی من شیا من کارکر و ئەرکێ ل سەر ملێن خوە ئەدا کر، ئەڤرۆ قۆناغا بێھنڤەدانێ یە و ھندەک دێ ھێن جھێ من گرن و رۆلێ خوە بینن.

گۆت ژی: ژ ئالیێ جەستەیی ڤە، دەما مرۆڤ ھەموو رۆژێن گەنجاتیا خوە ب ھەر کارەکی ڤە ببورینیت (٣٠ ھەتا ٣٥ سالان کار بکەت)، ھەلبەت دەم بۆ دەمی دێ کێرفێ ڤێ گرماتی و ھێز و شیانا کەسی دابەزیت و ژلایێ جەستەیی ڤە وەک جاران نامینیت، ھەروەسا ئاڵاڤ و تەکنولوژیا نوو کەڤیتە سیستەمێ کاری رەنگە مرۆڤ نەشێت ڤێرا بگەھیت. ئەڤجا ل جھێ کو ململانێ و ھەڤرکیێ، باشترە ب ھەموو رێز دانپێدانێ ب وێ راستیێ بکەت کو ھێزا جەستەیی یا مرۆڤی ل ھەر قوناغەکا ژیانێ ب رەنگەکی یە.

شارەزایێ جڤاکی خویاژی کر، ژ ئالیێ ئابووری ڤە؛ھەلبەت فاکتەرێ سەرەکی ل جڤاکێ مە، بۆ بەرگریکرنا خانەنشینکرنێ ئەو کوژمێ کێمە یێ کو فەرمانبەر وەردگریت دەما دھێتە خانەنشینکرن، گەلەک جاران تێرا پێدڤیێن کەسەکی ناکەت. ئەڤە بەروڤاژی سیستەمێ گەلەک وەڵاتێن جیھانێ یە کو کەسێ خانەنشینکری دڤێت ل ڤان سالان دا موچەیەک ھەبیت سەربلند و سەرفەراز پێ بژیت.

ژ ئالیێ تێکەلیێن جڤاکی، ھەلبەت نەخوشترین تشت ل دەف ڤی فەرمانبەرێ دھێتە خانەنشینکرن ترسا دابڕین ژ ھەڤالان و لاوازبوونا پەیوەندیێن جڤاکیە ل گەل بازنێ جڤاکیێ جاران (چو ل گەل فەرمانبەرێن ل گەل دا یان خەلکەکێ گرێدان ب وان ڤە ھەی).

بەیار باڤی ئاماژە دا وێ چەندێ، ل ڤێرێ ژی شارەزاییا کەسی بۆ دڤێت و ئەڤ کەسە دڤێت بزانیت فاکتەرێ تێکەلیا ژ بەری نوکە پتر ل سەر بنەمایێ فەرمی و پەیوەندیێن کاری بوو و ئەڤرۆ ئەو دشێت ل سەر بنەمایەکێ جۆری وان ھەڤالان دەست نیشان بکەت یێت کو پتر دگەل دگونجیت و کاروانێ ژیانێ ب خانەنشینکرنێ ب دووماھی ناھێت، بەلکو گەلەک جاران دبیتە وێستگەھەک بۆ ئارامی و بێھنڤەدان و کار و داھێنان د بیاڤەکێ دی یێ ژیانێ دا.

ئەڤرۆ، حه‌مزه‌ ره‌زيكى:

سالانە ژ مارەکا مەزن یا خەلکی دھێنە نشتەرگەری کرن، گەلەک ئەگەر بۆ ئەنجامدانا نشتەرگەریان ھەنە، ھندەک نشتەرگەری بۆ کێمکرنا ێَشانێ دھێنە ئەنجامدان و ھندەک ژی بۆ کێمکرنا نیشانێن ئاریشەکا ساخلەمیێ و ھندەک ژی بۆ وەرگرتنا دەستنیشانکرنەکا دروست یا رەوشا نەخۆشی، ل سالێن بۆری گەلەک پێشکەفتن کەتیە دنشتەرگەریان دا و ل شوونا ڤەکرنا زکی یان ھەر جھەکێ دی ژ لەشی ھەتا ژمارەکا وان ب لیزەرێ دھێنە کرن.

د.سەردار حەسەن عارف، تایبەتمەندێ نشتەرگەریا گشتی دیارکر کو ھندەک نشتەرگەری یێن ناگەە و تەنگاڤ ھەنە و ھندەک ھەنە د تەنگاڤ نینن و ھەر نشتەرگەریەک د چار قوناغان دا دەرباز دبیت ژوانژی ( شیرەتکاریا نوشدارێ نشتەرگەریێ و سەرەدانا بەری نشتەرگەریێ و رۆژا نشتەرگەریێ و نڤاندنا نەخۆشی ل نەخۆشخانێ) و گۆت: بەری ھەر تشتەکی پێدڤیە نەخۆش دگەل نوشدارێ تایبەتمەند کۆم ببیت و سەربارک و مفایێن نشتەرگەریێ بزانیت و ژڤانی دەستنیشان بکەت، ئارمانج ژ سەرەدانێ پشتراستبوونە ژ رەوشا نەخۆشی و چاوانیا وەرگرتنا بەنجێ و کا چ پرسیار د سەرێ نەخۆشی دانە کو بۆ بھێنە روھنکرن، ھەروەسا نەخۆش دێ مینیتە ل نەخۆشخانێ یان دێ ئێکسەر چیتە مال .

دیارکر ژی پشتی وەرگرتنا بڕیارا نشتەرگەریێ رەنگە نەخۆش رۆژەکێ ل نەخوشخانێ بمینیت و ل ژڤانێ نشتەرگەریێ بیت و ل وێرێ ژی ھەموو ھووردەکاریێن نشتەرگەریێ بۆ دێ ھێنە شروڤەکرن و گۆت: ھەکە نەخۆش جگارکێش بیا باشترە رۆژەکێ بەری نشتەرگەریێ دەست ژ جگارەکێشانێ بەردەت و ئەڤە دێ ھاریکاریێ کەت کو زووتر ساخلەم ببیت و ھەکە نەخۆشی بڤێت ب دروستی مفای ژ نشتەرگەریێ وەرگریت باشترە دو حەفتیان بەری نشتەرگەریێ دەست ژجگارەکێشانێ بەردەت.

د.سەردار ل گەل وێ چەندێ بوو کو پتریا جاران دیتنا نوشدارێ تایبەتمەند ب رۆژەکێ بەری نشتەرگەریێ یا پێدڤیە و گۆت: دیتنا نوشداری بۆ وێ چەندێ یە کو جورێ بەنجێ بھێتە دیارکرن و نوشدارێ بەنجێ نەخوشی ببینت و ھندەک پرسیارێن گرێدای ساخلەمیا وی ئاراستە بکەت، ھەوەسا دبیت نەخوشی پێدڤی ب ئەنجامدانا ھندەک پشکنینان ھەبیت وەکو یێن خوینێ و دەستئاڤێ و نەخشەکێشانا دلی.

ھەروەسا تایبەتمەندێ نشتەرگەریێ دیارکر کو یا ل سەر نەخۆشی پێدڤیە خوە ئامادە بکەت بۆ بەرسڤدانا گەلەک پرسیاران ئەوێن کو ژلایێ نوشداری بۆ دھێنە ئاراستەکرن وەکو جورێن دەرمانێن ب کاردئینیت و چ ھەستداری ل ھەمبەر دەرمانا یان خوارنێ ھەیە یان نە و ھەکە ھەبیت ئەو چ خوارن یان دەرمانن، دیسا کا وی یان خێزانا وی چ ھەستداری ل ھەمبەر کەرستێن بەنجکرنێ ھەیە و چ ئاریشە ل گەل ھەنە؟ دیسا پێدڤیە نوشداری ئاگەھداربکەت ل دۆر ھەبوونا نەخۆشیێن دلی و گولچیسکا و سەھان و جگەرێ و نەخۆشیا شەکرێ و بلندبوونا فشارا خوینێ و گۆتژی: ھەکە نەخۆش خرخرێ ل گەل نڤستنێ بکەت باشترە بێژیتە نوشداری و ھەتا ھەبوونا ددانێن چێکری ژی دڤێت نوشداری ئاگەھداربکەت.

دەربارەی شەڤا بەری نشتەرگەریێ ژی د.سەرداری دیارکر کو گەلەک یا گرنگە ژبۆ نەھێلانا سەربارکێن نشتەرگەریێ و پشتی نشتەرگەریێ ژی، پێدڤیە نەخۆش ل دەمەکی ژ خوارن و ڤەخوارنێ ب راوەستیت، ژبەرکو د ماوێ کریارا نشتەرگەری دا رەنگە دلێ نەخوشی راببیت یان ئەو خوارن بچیتە سەھێن وی، لەورا ھەر خوارنەک ژ نیڤ شەڤ پێدا نابیت بھێتە خوارن و ھەتا بەنیشت و تشتێ شرین ژی و گۆتژی: پێدڤیە نەخۆش پرسیارا نوشداری بکەت کا دشێت ڤەخوارنێن شرین بەری نشتەرگەریێ ب دو سعەتا بخووت یان نە و گەلەک جارا دروستە نەخۆش ڤی کاری بکەت و دشێت ئاڤێ یان قەھوە و چایا بێ شەکر یان شەربەتا سێڤا ڤەخووت، بەلێ نابیت چ ڤەخوارنێن کحولی دماوێ ٢٤ دەمژمێرادا بەری نشتەرگەریێ ڤەخووت.

ھەروەسا دیارکر ژی، ل دەمێ ھاتنا ژڤانێ نشتەرگەریێ، باشترە جلکێن تایبەت بکەتە ل بەرخوە داکو فشار ل لەشێ وی نەبیت و ھەر تشتەکێ گران بەھا بیت باشترە ل گەل خوە نەئینیتە نەخوشخانێ و ل مال بھێلیت و ھەر تشتەکێ دەستکرد دگەل وی نەیت، نوشدار دێ بەرێخودانێ ل فایلێ نەخوشی کەت و قشکنینەکا گشتی بۆ ئەنجام دەت و پێدڤیە ئەو یێ ئامادەبیت بۆ ھەر پرسیارەکا بۆ وی دھیتە ئاراستەکرن سەبارەت دەرمانا و رەنگە نوشدار ژێ بخوازیت ئیمزایەکێبکەت کو رازی ببیت ل سەر باشی و خرابیێن ژئەنجامێ نشتەرگەریێ پەیدادبن و نشتەرگەری دێ ھێتە ئەنجامدان و گۆت: پشتی نشتەرگەریێ ستافێ ساخلەمیێ دێ زێرەڤانیا بەنجێ کەن و کارتێکرنا وێ کەن، و ھندەک دەرمانێن ئێشکێمکرنێ بۆ نەخوشی دێ ھێنە دان داکو ھەست ب ئێشانێ نەکەت و دپتریا جاران دا شیانین نەخۆشی پشتی نشتەرگەریێ ددەستنیشانکرینە لەورا نابیت نەخۆش پشتی نشتەرگەریێ کارۆبارێن کو پێدڤی ب ھووربینیێ ھەی بکەت یان ترۆمبیلێ ب ھاژووت و دیسا نابیت بۆ دەمێ رۆژەکێ یان دو رۆژا ڤەخوارنێن کحولی ڤەخووت و ھەر تشتەکێ نەسروشتی ببینیت باشترە پەیوەندیێ ب نوشدارێ خوە یێ تایبەتمەند بکەت.

ئەڤرۆ، ئەمیر ئەترووشی – ھەرھین محەمەد:

مەلایەکێ پارێزگەھا دھۆکێ راگەھاند، ھەر کەسێ شیانێن دراڤی ھەبن دڤێت ل جەژنێ قوربانی بدەت و نابیت پشتگوە پاڤێژیت، ھندەک زانایێن ئاینی وان کەسێن شیان ھەبن و قوربانی نەدەت گونەھکار دبینیت و گۆت ژی، ئێک پەز تێرا خێزانێ ھەموویێ ھەیە و حەفت خێزان ژی دشێت گولکەکی بدەن. رێڤەبەرێ ڤێتێرنەریا دھۆکێ ژی دیار کر کو رەنگە بۆ جەژنا ئەڤ سالە نێزیکی ١٠ ھزار سەرێن پەزی بھێنە سەرژێکرن.

سەمیر مزوری خودان خێزانە و ژ حەفت کەسان پێک دھێت، ھوسا دیار کر کو وی ل بەرە بۆ جەژنا قوربانا ئەڤ سالە گولکەکی بکەتە قوربان دا خێر بۆ ھەر حەفت ئەندامێن خێزانا وی بھێتە نڤێسین، بەلێ مەلایەکێ دھۆکێ د خوتبەیا ئەینیا بووری دا ل سەنتەرێ پارێزگەھا دھۆکێ راگەھاند کو خەلکەک دشێت پەزەکی بۆ خێزانێ ھەموویێ بدەت و ئێک گولک ژی دشێن بۆ حەفت خێزانان بھێتە دان نەکو بۆ حەفت کەسان پێکڤە.

د. دیار تەیب محەمەد، رێڤەبەری ڤێتێرنەری ل پارێزگەھا دھۆکێ دیار کر، سەرژێکرنا پەزی ل بەر دەرگەھێن مالا دیاردەکا جڤاکیە و گەلەک یا ب زەحمەتە کۆنترۆل ل سەر بھێتە کرن، ژ بەر ڤێ چەندێ بزاڤێ دکەین ل گەل وان پێرابوونێن قانوونی وەربگرین و دێ ھەوڵدەین گڤاشتنێ ل سەر جڤاکێ رەوشەنبیرببن ل شوونا زەحمەتێ ببەن ل جھێن نەگونجای پەزی سەرژێ کەن، ئەڤ چەندە ژی دبیتە دەرگەھەک بۆ وان گۆشتفروشان یێن مۆلەتا سەرژێکرنا پەزی ھەی.

ناڤبری گۆت ژی: رێگری ل چو کەسا ناھێتە گرتن ئەگەر پەزی بکرن و بفرۆشن، بەلێ سەرژێکرنا وان ل وان جھان نەیا دروستە وەک ل مەیدانکا دولبێ پولیس ل حەفتیێ جارەکێ سەرەدانا وان جھان دکەن ئەوێن پەز لێ دھێتە فروتن، ئەگەر ببین ئەو کەس ل وان جھان ئەوێن پەز لێ دھێتە فروتن پەز لێ بھێتە سەرژێ کرن، بەلێن نامەکێ ژێ وەردگرین، ھەروەسا دھێنە رەوانەکرن بۆ دادگەھێ و جۆرەکێ سزای دکەفیتە سەر ئەگەر ئەڤ سەرپێچیە دووبارە بیت دبیت بچیتە دزیندانێ ڤە.

مەلا جیھاد، رێڤەبەرێ ئەوقافا دھۆکێ بۆ ئەڤرۆ دیار کر، قوربان سونەتەکە ل سەر بوسلمانان نەکو ئەرکە ھەموو کەس قوربانی بدەن، گەلەک زانایێن ئاینی ژی ھوسا دبینن کو ئەو کەسێن شیانێن دراڤی ھەبن دڤێت قوربانی بدەن و گۆت: پێغەمبەری سلاڤێن خودێ ل سەر بن دو پەز کرینە قوربانی، یا گۆت ئێک ژ پێش من ڤە و یێ دی ژ پێش گەلێ بوسلمانان ھەموویێ ڤە و ھەر کەسێ شیان نەبن قوربانی بدەت ئەو پەزێ پێغەمبەری کریە خێر وەکو قوربان دێ خێر بۆ وی ھێتە نڤێسین.

د. دیار زێدەتر دبێژیت: ل نێزیک دێ ھەموو دەزگەھێن راگەھاندنێ ھێنە ئاگەھدارکرن ل سەر ھشیارکرنا خەلکی، ھەروەسا روونشتنێن تایبەت ل گەل گۆشتفروشان و ل گەل وان کەسان ئەوێن پەزی دفرۆشن، ل سالا بوری ئەڤ چەندە ھاتبوو کرن نێزیکی ٥٠٠ سەرێن پەزی ل سەرژێگەھا دھۆکێ ل خانکێ ھاتینە سەرژێکرن، لێ ئەڤ سالە ژی دێ ھەول دەین ل گەل وان کۆمپانیا ئەوێن سەرژێگەە د دەستێ وان دا گۆشتفرۆشت دھۆکێ خەلکێ دھۆکێ ئەوێن پێدڤی قوربانا گونجاندنەکێ د ناڤبەرا وان دا ھەبیت پەزێ وان بھێتە سەر ژێ کرن بگەھیتە وی جھی یێ وی دڤێت ل ڤی جەژنێ پێشبینی دکەین کو نێزیکی ١٠ ھزار سەرێن پەزی دێ ھێنە سەرژێکرن.

مەلا جیھاد ئاماژە دا وێ چەندێ، ئەو پەزێ دبیتە قوربانی نابیت یێ پەککەفتی بیت و ژیێ وی ژ سالەکێ پتر بیت و چوو بیتە د سالا دویێ دا، ھەروەسا ئێک کەس ژی دشێت ب تنێ بۆ خوە بدەت گۆت: دەمێ پەزەک دبیتە قوربان ژی دشێن گۆشتێ وی بکەنە سێ پشک، پشکەک بۆ خودانێ قوربانی، پشکەک بۆ ھەژاران و پشکا دی دشێت بدەتە ناسیارێن خوە و بلا ھەتا کەسێن دەولەمەند ژی دناڤ دا بن چو ئاریشە نینە.

رێڤەبەرێ ئەوقافا دھۆکێ ئاشکرا ژی کر کو دروستە قوربان ل سەرژێگەھێ بھێنە سەرژێکرن نەکو ب تنێ ل مال و بۆ مریا ناڤێ وی ل سەر بینیت دروستە.

مەجید ئەحمەد مەجید، خودانێ کۆمپانیا بلان بازار گۆت: دەمێ نێزیکبوونا جەژنا قوربانی  پەزی گران دکرین، لێ وی تشتی ل بەرچاڤ وەرناگرین و ئەو قازانجە ژ بلان بازار دچیت، راستە ل دەمێ نێزیکبوونا جەژنا قوربانی ل مەیدانکێن پەزی  پەز گران دبیت و خەلک ھەموو ھزردکەن کو ل بلان بازار ژی دێ گۆشتێ خوە گران کەن، لێ خەلکەکێ گەلەک باوەری ب بازارێ بلان بازار ھەیە و مە کوالەتی گوشتێ خومالی رۆژ بۆ رۆژێ بەر ب زێدەبوونێ دچیت، لێ گەلەک جاران قازانج کەین و ھندەک جاران ژی وەک ھەڤ دەردکەڤین چو قازانج ناکەین، بەلێ ھەر کەسەکێ کارەکی بکەت نابیت ب تنێ چاڤێ وی ل قازانجکرنێ بیت دڤێت بەرێ مرۆڤی ل خزمەتا خەلکی بیت ئەگەر د رێیا خزمەتێ دا قازانجەک بۆ مرۆڤی بھێت گەلەک باشە.

مەجید ھێشتا ژی گۆت: گەلەک جاران پەز کێم دبیت ناچار دبین پەزی ب گرانی بکرین و ھەر بوھایی جاران دەینە بکران، دا کو باوەریا وان ب مە بمینت ل بلان بازار (٩٥%) گۆشتێ خومالی دھێتە فرۆتن بەری ڤان کاودانا پەز ژ دەڤەرا شنگالێ و دەوروبەرێن مووسل دھات، لێ نوکە پەز ژ (ھەڤلێری و سوران وقەلادزێ) دھێت، لێ گەلەگ خەلک ھەنە دێ گۆشتەکێ پیر ژ جھەکی ب ئەرزانی کرن، دەمێ دھێنە بلان بازار دبێژن بۆچی گۆشتێ وە یێ گرانە و نزانن گۆشتی مە یێ خومالی یە.

حسێن زکری گۆشت فروشەکە ل دور بابەتی گۆت: نوکە نێزیکی جەژنا قوربانیە، پەز گران دبیت، چونکو خەلک گەلەک دھێن قوربانا دکرن دبیت گەلەک کەس ژی ھەنە ژبەر قوربانی پەزی ناکرن بۆ کورێن خوە بێن پێشمەرگە دکرن و دکەنە خێر، راستە دەمێ نێزیکبوونا جەژنێ ھەموو تشت گران دبیت، لێ خەلکێ دھۆکێ گەلەک ھاریکارە، دبیت بەری نوکە ب تنێ گۆشت فرۆشان ب تنێ پەز دکری، لێ نوکە ھەموو خەلک دکرن، بەلێ  ھندەک کەس ھەنە بازرگانیێ ب پەزی دکەن، ھەموو دزانن کو پەزە نەیێ خومالی یە دەمێ ئەڤ کەسە پەزی دھێن ھەموو کەس دزانن ئەڤ  کەسە نە بازرگانێن پەزی نە ل بازارێ گۆشتفروشان ژی بھایێن وان نەھاتینە گران کرن.

ئەڤرۆ، زەری نەوزاد:
گوستیرکا ھەڤژینیێ ڤەدگەریت بو کەڤنتیا مسری و ل دوڤدا ئەغریقیان چاڤ لێ کر پاشی ژ لایێ رومانیان ژی ھاتە بکار ئینان ھەڤژین دبێژن :زور رژدین ل سەر بەرکرنا گوستیرکا ھەڤژینیێ و چەندی مودیلین نوی ین دەرکەتین لێ ئەم ھەر شانازیێ ب گوستیرکا خوە یا نیشانیێ دبەین ، زەلام ژیانا خوە یا ھەڤژینی ب تایبەتمەندیە دبینیت کو نەڤێت ھەموو کەس پێبزانن، زەلام ھەنە گوستیرکا ھەڤژینی دکەنە بەر خوە چونکی ھەست ب شانازیا ژیانا خوە یا ھەڤژینی دکەن.
زینە عەبدولا ڤەکولەرا جڤاکی دیار دکەت کو ژن یا راستگو ترە ژ زەلامی د دەربرینێ ژ ڤیانا خوە و ھەست دکەت ل دەمێ کو ژیانا ھەڤژینی پێک دئینیت پلەیەکێ بلند دبیت لەورا ژی حەز دکەت ھەموو بزانن کو ئەو خێزاندارە و ڤێ چەندێ ب پیروزیەک ھەلدسەنگینیت و گوت(بەروڤاژی زەلامی حەز ژ ئازادیێ دکەت و نەڤێت ب چ تشتەکی ڤە یێ گرێدایی بیت و ژیانا خوە یا ھەڤژینی ب تایبەتمەندیە دبینیت کو نەڤێت ھەموو کەس پێبزانن )
بەفرین مەجید ژنەکا ٣٣ سالیە و فەرمانبەرە دیار دکەت کو گوستیرکا ھەڤژینیێ نیشانەکا جوانە د ناڤبەرا ھەڤژینان دا و پیروز راگرتنا وێ بیروز راگرتنا پروسەیا ھەڤژینیێ یە و گوت(ئەڤە ھەشت سالە من و ھەڤژینێ خوە خیزان پێک ئینایە و ئەم ھەردووک زور رژدین ل سەر بەرکرنا گوستیرکا ھەڤژینیێ و چەندی مودیلین نوی ین دەرکەتین لێ ئەم ھەر شانازیێ ب گوستیرکا خوە یا نیشانیێ دبەین و حەز ژێ دکەین)
محەمەد خوشناڤ بابێ دو زارۆیانە دبێژیت بەری نوکە ژنان گوستیرکا ھەڤژینیێ دکرە بەر خو و زەلامان نە نوکە بەروڤاژی زەلام دکەنی و ژن نە و ئەز دبینم پتریا زەلامان ل سەر خواستنا ھەڤژینێن خوە گوستیرکا ھەڤژینیێ دکەتە بەرخو و ژ بەر دو ئەگەران یا ئیکێ ئەوە کو ژن د سروشتێ خوە دا د غەیورن و حەز دکەن خەلک خرەک بزانیت ئەڤە ھەڤژینێ وێ یە و خلا دوێ ژیک ژ بەر ھندی کو ژن یا دلینیە و گوستیرکا ھەڤژینیێ ژی پشکەک ژ دلینیا خوە دبینیت
ژ لایەکێ دیڤە ڤەکولەرا جڤاکی زینە دبێژیت گەلەک زەلام ھەنە گوستیرکا ھەڤژینی دکەنە بەر خوە جونکی ھەست ب شانازیا ژیانا خوە یا ھەڤژینی دکەن و ب پروسەیەکا پیروز دبینن لێ نە ھەموو زەلام ژی.
دایکا دلینێ ئەڤە جوار سالە ژیانا ھەڤژینی پێک ئینایی و دبێژیت ئەز زور گرگیێ ب گوستیرکا ھەڤژینیێ ددەم بو خوە و بو ھەڤژینێ خوە ژی ئەز ب چاڤەکێ مازن بەرێ خوە ددەمە وان زەلامان یێن گوستیرکا ھەڤژینیێ دکەنە بەرخوە چونکی ئەو ب تنێ د راستن د دەربرینێ ژ ڤیانا خوە بو ھەڤژینێن خوە و چ کێماسیەکێ د ھەبونا ھەڤژینا خوە د ژیانا وی دا نابینن بەلکو بەروڤاژی ڤیانەکا تایبەت بو ھەیە.
تێتە زانین کو مێژویا گوستیرکا ھەڤژینیێ ڤەدگەریت بو کەڤنتیا مسری و ل دوڤدا ئەغریقیان چاڤ لێ کر پاشی ژ لایێ رومانیان ژی ھاتە بکار ئینان و ل دەست پێکێ ئەڤ گوستیرکە ژ ئاسنی دھاتە جیکرن و لسەر ددانێ فیلی تاکو قەبارێ پێدڤی بو بھێتە وەرگرتن و ل دوڤدا ب زێری و زیڤی ھاتنە دروست کرن و دناڤ مللەتان دا بەلاڤە بون

ئەڤرۆ، شاکر ئەترووشی:

پشتی پشکداری د ھژمارەکا فلم و کلیپێن کوردی دا کری، ل رۆژێن بۆری زارڤەکەرا گەنج (سەنا ھاشم سەعدی سالح) سترانا خوە یا ئێکێ تۆمارکر و ھیڤیا وێ ئەوە ل پاشەرۆژێ ببیتە سترانبێژەکا ناڤدار و خزمەتا سترانا کوردی بکەت.

ناڤبریێ کو نازناڤێ وێ یێ ھونەری (دونیا بەرواری) یە و ل سالا ١٩٩١ ژدایکبوویە، د دیدارەکێ دا بۆ ئەڤرۆ گۆت: “دەمێ ئەزا بچووک حەزا ھونەری ل دەف من پەیدابوو و من دڤیا ئەز ژی خزمەتەکێ پێشکێشی ھونەرێ کوردی بکەم، ئەو بوو بەری دەەـ سالان وەکو زارڤەکەر ئەز د کلیپا سترانبێژێ گەنج سەمیر عەبدوللاى دا ده‌ركه‌فتم، د دووڤ دا کلیپەکا سترانبێژێ گەنج بلند ئیبراھیم، لێ پشتی من شوو کری ھەڤژینێ من (عاشور بەرواری) پتر ھاریکاریا من کر و ئەو بۆ پشتەڤانێ منێ سەرەکی، ھەروەسا مە گەلەک کار ژی د سالێن بۆری دا پێکڤە کرینە”.

ھەروەسا گۆت: “ئێکەم کارێ من وەکو زارڤەکەر پشکداری تێدا کری دراما (دیلان) بوو، د دووڤ دا فلمێ (بێ بەخت) ھەروەسا چەند شانۆگەری و کلیپێن دی، ئانکو ئەز دشێم بێژم پتر ژ ٢٥ کارێن ھونەری دا ئەز پشکدار بوویمە”.

ل دۆر سترانا خوە ژی گۆت: “ب راستی ژ بەر حەزا منا زێدە بۆ پێشمەرگێ کوردستانێ ئەڤ ھزرە بۆ من و ھەڤژینێ من پەیدا بوو، پاشان مە پەیوەندی ب ھونەرمەند سدقی بناڤی کر ب سوپاسی ڤە بەرھەڤیا خوە دیارکر و سترانا من ژ پەیڤ و ئاوازێن وی یە و ل رۆژێن بۆری ھاتە تۆمارکرن و ل دەڤەرا خازری د ناڤ ھێزێن پێشمەرگەی دا ھاتیە کلیپکرن و ل نێزیک دێ بەلاڤ بیت”.

دا زانين ژى كو ل به‌ره‌ پشتى ڤێ كليپێ ژى كليپه‌كا دى ل دۆر خەبات و قوربانیدانا بارزانیێ نەمر تۆمارکەت و گۆت: “ھەکە من دیت ھاریکاری ھەبوو دێ ھزرێ دچێکرنا ئەلبۆمەکێ ژی دا کەم”.

د لایەکی دا گۆت: “ئەو کارێن من پشکداری تێدا کری ژھەموویان پتر ئەز حەز ژ دراما (دیلان) دکەم، من کارەک ل گەل خەلۆ و جەلۆی ژی کربوو، لێ ئەزا پەشیمانم”.

زێدە خوارنا شەکرێ دبیتە ئەگەرێ قەلەویێ و گەلەک ئاریشەیێن ساخلەمیێ ژی ژێ پەیدادبن و نەدوورە ببیتە ئەگەرێ پەنجەشێرێ و نەخوشیا شەکرێ  و نەخوشیێن دلی و کورەبوون و زوو مرنا مرۆڤی ژی و پێدڤیە وەلاتی گەلەک ل دووڤ ریکلامێن کومپانیێن شەکرێ نەچن، ژبەرکو مەترسیا شەکرێ ژی وەکو یا جگارەیانە و باشترە ریکلامێن تشتێ شەکر دناڤدا بھێنە قەدەغەکرن.

شەکر کێمی و زێدەیێ دئێخیتە رێژا شەکرا خوینێ دا و ئەڤە دبیتە ئەگەرێ تێکچوونا مەزاجێ مرۆڤی و گێژبوون و سەرئێشان ژێ پەیدادبن و ئەڤە مرۆڤی پال ددەن بۆ زێدەتر خوارنا شەکر ئانکو ئیدمان ژێ پەیدادبیت و ل دەمێ مرۆڤ شەکرێ دخوت بۆ دەمەکێ کێم ھەست ب باشبوونێ دکەت و پشتی دەمەکی دێ برسی بیت و ژلایەکێ دیتر ڤە ئەو کەسێن کێم شەکرێ دخون پتر دلینی ل دەڤ ھەیە و ھێزەکا مەزنتر ھەیە.

ئەڤرۆ، ساخلەمی:

ھەکە تە ئێشا دلی ھەبیت، یان تو ژ نەخۆشیەکا دلی چارەسەربووی، باشترین تشت بۆ تە وەرزشا ب رێڤەچوونێ یە، پروگرامێن رێکخستی یێن دلی شیان ھەنە کاربکەن بۆ بھێزکرنا دلی و زێدەکرنا شیانێن وی کو پتر خوینێ پال بدەت، ئەڤ چەندە دێ بیتە ھاندەر کو تو پتر کاربکەی، بۆ پتریا تووشبۆیێن ئێشێن دلی رێڤەچوون گەلەک یا باشە و ب تایبەت ھەکە ل ژێر سەرپەرشتیا نوشدارەکێ تایبەتمەندبیت.
رەنگە رێڤەچوون یا ب سانەھی بیت، بەلێ ھەر کەسەک پێدڤی یە ھندەک تشتان ژێ بزانیت، ئەرێ لەزاتیا من چەند بیت، ئەز دشێم ل چیا ب سەرکەڤم یان نە؟ پشتی خوارنێ ب رێڤەبچم یان نە؟ ئەرێ ھەکە دونیا یا سار یان گەرم بیت چاوا برێڤە بچم؟ ئەرێ دروستە ب تنێ برێڤەبچم یان نە؟ وەکی ڤان پرسیاران گەلەک دگرنگن و پێدڤیە تشتەکی ژێ بزانی.
تشتێ ژ ھەمیا گرنگتر ئەوە تو بەرێخودانێ ل وەرزشێ بکەی وەکو پشکەک ژ چارەسەریا ئێشا دلی و چارەسەری دێ باشتر ھەکە یا تمام بیت، ھەکە تە ب رێڤەچوون ل سەر پروگرامێ خۆ زێدەکر و تە پێگیری ب خوارنەکا کێم روین و ێودیوم کر و جگارەمەکێشان و لەشێ خۆ گەلەک نەوەستاند، ل وی دەمی دێ ئەنجامێن باش ب دەست تە ڤە ھێن.
ئەرێ ما تشتەکێ ب زەحمەتە ڤان ھەموو کاران ب دەست خوڤە بینی ب پێنگاڤەکێ؟ جارێ نەکە ئاریشە، ھندەک ژ خەلکی حەز دکەن پێنگاڤ پێنگاڤ دەست ب ڤی بەرنامەی بکەن، ئانکو ھەر جارێ پێنگاڤەکێ ب ھاڤێژن، دگەل ڤێ چەندێ ھندەک وەسان ھزر دکەن کو دێ باشتر بیت ھەموو پێنگاڤان پێکڤە ب ھاڤێژن.
رەنگە یا باشتر بیت دڤان دەلیڤەیان دا مرۆڤی ئاگەە ژ خۆ ھەبیت و ھەکە شێوازێ ژیانا خۆ راست ڤە کەت دێ ددەمەکێ زوو دا ھەست ب خوشیێ کەت، ھەکە ھەست ب خوشیێ ژی کر دێ بیتە دەرگەھەک کو ئەو پتر ل دووڤ پروگرامی کاربکەت.
ژلایەکێ دیتر ڤە ئەو نەخوشێ دلی یێ ھەست ب ئێشانێ و بێھن تەنگیێ دکەت، ھەکە ھەول بدەت ئەو ب خو چارەیا خۆ بکەت ب پالپشتیێ ل سەر رێڤەچوونێ ب تنێ، ئەو دێ ھەست ب داکەتنێ و بێھیڤیبوونێ کەت و برێڤەچوون ب تنێ چ جاران نابیتە ئەگەرێ دابەزینا رێژا کولیسترولی و وەرزش ب تنێ ژی یا تمام نینە بۆ نەھێلانا قەلەویێ یان کێمکرنا دژواریا دەروونی، ئانکو مرۆڤ ب لەزاتی ھەست ب ئەنجامێن وێ ناکەت .ئەو تشتێ تو ھەڤرکیێ دگەل دکەی ئەوە کو تە دەمەکێ گونجای ھەبیت بۆ ب رێڤەچوونێ و ھەست ب ئێمنیێ بکەی، ب شێوەیەکێ گشتی یا ل سەر نەخۆشێ دلی پێدڤیە ھەر حەفتیێ پێنج رۆژان و ھەر رۆژێ بۆ دەمێ نیڤ دەمژمێرێ برێڤەبچیت، یان حەفتیانە سێ رۆژان و ھەر رۆژێ دەمژمێرەکێ برێڤەبچیت، ھەلبەت نەخوشێ دلی نەشێت ئێکسەر ڤی رادەی ب رێڤەبچیت و پێدڤیە پیچ پیچە دەستپێبکەت، بۆ نموونە رۆژانێن ئێکێ پێنج دەقیقان و ھەتا دگەھیتە ڤی رادەی ئەوژی پێدڤیە رازەمەندیێ ژ نوشدارێ خۆ وەربگریت.
ھەتا کو ئەڤ گوتنا مە نەبیتە تشتەکێ نەباوەرپێکری ژلایێ تە، مە دڤێت ئەم ل ھزرا تە بینین کو ئەو نەخوشێ وەرزشەکا دژوار ئەنجام ددەت ب ھەشت جاران پتری تووشی مرنێ دبن ژوان نەخوشێن وەرزشەکا ھێدی ئەنجام ددەن. ل ڤێرێ مافێ تەیە پرسیار بکەی ئەرێ وەرزشا سڤک چیە و رێڤەچوونا ئارام چاوایە؟
بنیاتەکێ زێرین ھەیە دبێژیت، ھەکە تو شیای ب رێڤەبچی و گەنگەشێ ژی دگەل ئێکی بکەی، ئەڤە تشتەکێ باشە، رەنگە تو بێژی ئەڤە تشتەکێ دوورە ژ زانستی، بەلێ ئەم تە دلنیا دکەین کو ئەڤە دووماھی پێشھاتێن پزیشکینە دڤی واری دا.

گه‌له‌ك ژ پرۆژێن به‌لێنده‌رايه‌تي‮ ‬ب تايبه‌ت‮ ‬يێن به‌ر ئه‌رد و چێكرنا جاده‌ و ئاڤرێدان دبنه‌ ئه‌گه‌ر كو بۆريێن ئاڤێ‮ ‬يێن وه‌لاتيان و‮ ‬يێن حوكمه‌تێ ژي‮ ‬بهێنه‌ شكاندن و پتريا جاران به‌لێنده‌ر ئه‌گه‌رێن شكه‌ستنێ نه‌،‮ ‬به‌لێ پشتي‮ ‬دشكێنن خوه‌ لێ ناكه‌نه‌ خودان و وه‌لاتي‮ ‬ژي‮ ‬گازندا دكه‌ن،‮ ‬ل گه‌ل هندێ ژي‮ ‬رێڤه‌به‌ريا ئاڤا دهۆكێ ديار كر كو هه‌ر به‌لێنده‌ره‌كێ بۆريه‌كا ئاڤێ بشكێنيت دڤێت ئه‌و ب خوه‌ چێكه‌ته‌ڤه‌‮.‬
وه‌لاتيه‌كێ تاخێ ماسيكا2 بۆ رۆژناما ئه‌ڤرۆ ديار كر،‮ ‬پشتي‮ ‬به‌لينده‌ره‌كي‮ ‬جادێن تاخێ وان كولاين بۆ وێ‮ ‬يه‌كێ جاده‌ بهێته‌ ڤه‌كرن و قێركرن،‮ ‬بۆريا وان‮ ‬يا ئاڤێ هاته‌ شكاندن و بۆ ماوێ پتر ژ‮ ‬10‮ ‬رۆژان ئه‌و مانه‌ د وي‮ ‬حالي‮ ‬دا و كه‌سێ خوه‌ ل وان نه‌كره‌ خودان و گۆت‮: ‬ئه‌م ناچاربووين مه‌ ل سه‌ر كيستێ خوه‌ بۆري‮ ‬چێكره‌ ڤه‌‮.‬
نوري‮ ‬سه‌لاح،‮ ‬ئاكنجيێ تاخێ ماسيكا2‮ ‬زێده‌تر گۆت‮: ‬هنده‌ك به‌لێنده‌ر بووينه‌ ئه‌گه‌ر كو باژێر پووچ ببيت و چو مفاي‮ ‬ناگه‌هيننه‌ وه‌لاتي‮ ‬و حوكمه‌تێ و پرۆژێن وان گه‌له‌ك بێسه‌روبه‌ر برێڤه‌ دچن،‮ ‬چونكو پرۆژه‌ي‮ ‬ژ خوه‌ ڤه‌ دكه‌ن و ده‌مێ بۆريه‌كا ئاڤێ خوه‌‮ ‬يا گشتي‮ ‬دي‮ ‬بيت د شكێنن،‮ ‬ده‌مه‌ك درێژ دچيت هه‌تا جاره‌كا دي‮ ‬چێ دكه‌نه‌ڤه‌‮.‬
به‌لێنده‌ر هاريوان ره‌شيد بۆ ئه‌ڤرۆ ديار كر،‮ ‬هه‌ر پرۆژه‌كێ به‌لێنده‌ر كار تێدا بكه‌ت ل دووڤ ده‌مێ به‌لێنده‌رايه‌تيێ و ماوێ پرۆژه‌ي‮ ‬هه‌ر ئاريشه‌كا د ناڤ پرۆژه‌ي‮ ‬دا په‌يدا ببيت ل سه‌ر به‌لێنده‌ري‮ ‬دكه‌ڤيت دروست بكه‌ت و گۆت‮: ‬هه‌كه‌ ماوێ پرۆژه‌ي‮ ‬ساله‌ك بيت،‮ ‬د وێ سالێ هه‌موو‮ ‬يێ دا و هه‌تا پرۆژه‌ ب دووماهي‮ ‬دهێت هه‌ر بۆريه‌كا بهێته‌ شكاندن،‮ ‬چو‮ ‬يا گشتي‮ ‬بيت‮ ‬يان ژي‮ ‬يا وه‌لاتيان پێدڤيه‌ به‌لێنده‌ر دروست بكه‌ت،‮ ‬هه‌روه‌سا پتريا پرۆژه‌يان ژي‮ ‬ل دووڤ گرێبه‌ستێ هه‌تا ساله‌ك ژي‮ ‬ل سه‌ر پرۆژه‌ي‮ ‬ده‌رباز دبيت،‮ ‬به‌لێنده‌ر پێ دهێته‌ راسپاردن هه‌ر ئاريشه‌كا په‌يداببيت،‮ ‬دڤێت به‌لێنده‌ر چاك بكه‌ت‮.‬
هاريوان ئاشكرا كر كو چو به‌لێنده‌ر حه‌زناكه‌ن پرۆژه‌ي‮ ‬ژ خوه‌ ڤه‌ بكه‌ن‮ ‬يان ژي‮ ‬بێسه‌روبه‌ر دروست بكه‌ن‮ ‬يان ژي‮ ‬بۆريه‌كێ بشكێنن،‮ ‬به‌لێ پتريا جاران شكاندنا بۆريێن ئاڤێ ب ده‌ستێن قه‌لابه‌ و شه‌فه‌لا و حه‌فارا دهێنه‌ شكاندن،‮ ‬چونكو ل ده‌مێ كۆلانا جادێ گه‌له‌ك جاران بۆري‮ ‬ناهێنه‌ ديتن و شۆفێر نه‌شێت ببينيت و گۆت‮: ‬د ڤي‮ ‬بياڤي‮ ‬دا گه‌له‌ك به‌لێنده‌ر ژي‮ ‬د خه‌مسارن،‮ ‬چونكو هنده‌ك جارا دێ بۆريه‌كێ شكێنن و ماوه‌يه‌كێ درێژ ب سه‌رڤه‌ چيت و ل دووماهيێ هه‌ر چێناكه‌ن ژي‮.‬
جه‌لال جه‌ميل،‮ ‬رێڤه‌به‌رێ ئاڤا پارێزگه‌ها دهۆكێ بۆ ئه‌ڤرۆ ديار كر،‮ ‬هه‌ر پرۆژه‌كێ ئاريشه‌ك تێدا په‌يدا ببيت و زيان بگه‌هيته‌ حوكمه‌تێ‮ ‬يان وه‌لاتيان و پرۆژێ به‌لێنده‌رايه‌تي‮ ‬بيت،‮ ‬ل وي‮ ‬ده‌مي‮ ‬به‌لێنده‌ر پێ به‌رپرسياره‌ و دڤێت ب زووترين ده‌م چاره‌ بكه‌ت و گۆت‮: ‬ل ده‌مێ چێكرنا پرۆژه‌ي‮ ‬و هه‌تا پشتي‮ ‬ب دووماهي‮ ‬ژي‮ ‬دهێت ل دووڤ گرێبه‌ستێ ساله‌كێ چاككرن ژي‮ ‬ل سه‌ر به‌لێنده‌ري‮ ‬هه‌يه‌ خوه‌ چو ئاريشه‌ د‮ ‬وي‮ ‬پرۆژه‌ي‮ ‬دا په‌يدا ببيت‮.‬
ناڤبري‮ ‬ديار كر كو هه‌كه‌ ساله‌ك ل سه‌ر ماوێ پرۆژه‌يه‌كێ ئاڤێ دا بووري‮ ‬و ژ نوو ئاريشه‌ په‌يدابوون،‮ ‬ل وي‮ ‬ده‌مي‮ ‬دێ رێڤه‌به‌ريا ئاڤێ ژێ به‌رپرسياربيت و ئێدي‮ ‬به‌لێنده‌ري‮ ‬چو په‌يوه‌ندي‮ ‬پێڤه‌ نامينيت‮.‬