شاكر ئه‌تروشی
ئه‌ڤرۆ چل رۆژ ل سه‌ر وه‌غه‌ركرنا هه‌ڤال و هه‌ڤیشه‌یێ مه، نڤیسه‌ر و رۆژنامه‌ڤانێ دێرین (اسماعیل تاهر جانگیر) دیۆرن و ژ ده‌ستدانا وی نه‌به‌س زیانه‌كا مه‌زن گه‌هانده خێزان و زارۆ و كه‌س وكارێن وی، به‌لكو زیان گه‌هانده هه‌موو خه‌لكێ دهۆكێ، چنكو پتریا خه‌لكێ ڤی باژێری كاك ئیسماعیل دنیاسین و شاهدێن جامێری و پاقژی و خۆش مرۆڤی و ره‌فتارێن وی یێن جوان بوو، له‌ورا ده‌مێ وه‌غه‌ركری نیشانێن عاجزی و پوسیده‌یێ ل سه‌ر دێمێ پتریا خه‌لكی ب تایبه‌ت ژی رۆژنامه‌ڤان و نڤیسكار و هونه‌رمه‌ندان، هه‌روه‌سا گه‌نجان ژی د دیاربوون و هه‌موو هه‌ڤپشكێن وێ خه‌مێ بوون.
هه‌لبه‌ت نیاسینا من ل گه‌ل ره‌حمه‌تی كاك ئیسماعیل بۆ سالا (1984) دزڤریت كو ئه‌م هه‌ردو پێكه قوتابی بووین ل ناڤنجیا مه‌مێ ئالان ل دهۆكێ و هه‌تا شه‌ڤا وه‌غه‌ركری ژی ئه‌م پێكڤه ل جهه‌كی مێهڤان بووین، ئانكو ل ئێڤاریا رۆژا 12/7/ 2021 وه‌كی گه‌له‌ك رۆژێن دی سه‌ره‌دانا رۆژناما ئه‌ڤرۆ كر، چنكو ئێك ژ هه‌ڤالێن به‌رده‌وامێن رۆژنامێ بوو، هه‌موو ستافێ رۆژنامێ هه‌ر ژ سه‌رنڤیسكاری هه‌تا چایچی باش ئه‌و دنیاسی و بێ فه‌رق و جوداهی ل دیوانا هه‌موویان درونشت و سوحبه‌ت ل گه‌ل دكرن، ئانكو كه‌سه‌كێ ساده بوو، چو جاران نه دگۆت ئه‌ڤه به‌رپرسه یان ئه‌ڤه رێڤه‌به‌ره، ئه‌ڤێ دی ژی فه‌قیره ئه‌ز ل ده‌ف ناروینم، به‌رۆڤاژی هه‌رده‌م هه‌ڤالێ فه‌قیرو هه‌ژاران بوو گه‌له‌ك حه‌ز ژ خودانێن پله و پوستان نه‌دكر.
هه‌لبه‌ت دووماهی هاتنا وی بۆ رۆژنامێ ل وێ ئێڤارێ ل گه‌ل هه‌لبه‌ستڤان ( عه‌بدولقادر حه‌مید ئۆرمانی) بوو، كو ئه‌و ژی ئێك ژ هه‌ڤالێن وی یێن بچووكاتیێ بوو، وێ ئێڤارێ ژی چه‌نده‌كێ ل ژۆرا سه‌رنڤیسكاری، دووڤدا ژۆرا چێگرێ وی، ل دووماهیێ ژی بۆ جگاره كێشانه‌كێ ژی ل ژۆرا چاڤه‌خوارنا رۆژنامێ رونشتین و ب دروستی ل ده‌ژمێر حه‌فت و نیڤی شه‌ڤێ ژ باره‌گایێ رۆژنامێ ده‌ركه‌فتین و چووینه گوندێ دولبێ ئه‌م مێهڤانێن ماموستا (شه‌عبان تیله‌ری) بووین، به‌ری بچینه جهێ روونشتنێ كو ل ناڤ بیستانی بوو، ماموستا شه‌عبان جهێ چار ئاشێن گوندی نیشامه دان كو نهۆ بتنێ وه‌ك شینوار ماینه، و تبلا خوه درێژكره ئاشه‌كی و گۆت دبێژنه ڤی ئاشی (ئاشێ فیلی) ل ڤێره كاك ئیسماعیل گۆتێ بۆچی ئاشێ فیلی و چو په‌یوه‌ندیان فیلان بڤی گوندی ڤه هه‌بوو؟ ماموستا شه‌عبان گۆتێ سوحبه‌ت یا درێژه پشتی خوارنێ دێ بووته هه‌موویێ بێژم، ئینا كاك ئیسماعیلی گۆته من كاك شاكر كا وێنه‌كی بۆ من ل گه‌ل ڤی ئاشی بگره ( به‌حسێ ڤی وێنه یه یێ ل گه‌ل گۆتارێ) به‌لاڤ بووی پاشی دێ دووفچوونه‌كا باش ل سه‌ر كه‌م و تشته‌كی ل سه‌ر نڤیسم، مه ئه‌ڤ وێنه و چه‌ند وێنێن دی بۆ گرتن، لێ مخابن نه ئه‌ز گه‌هشتم وان وێنان بۆ فرێكه‌م، نه‌ژی ئه‌و گه‌هشت تشته‌كی ل سه‌ر وی ئاشی بنڤیسیت، چنكو پشتی گرتنا وێنه‌ی ب چه‌ند ده‌مژمێره‌كان بێ خاترخواستن وه‌غه‌ركر و چوو به‌ر دلوڤانیا خودێ مه‌زن.
هزرا سلاڤ ل سه‌ر گۆرێ ته‌بن هه‌ڤال و برایێ خۆشتڤی، هیڤیا مه ژ خودێ ئه‌وه جهێ ته بكه‌ته مێرگه‌گ ژ مێرگێن به‌هه‌شتێ و هه‌تا ئه‌م ژی دگه‌هینه ته دێ هه‌ر مینی زیندی د دلێ مه دا.
نيشاندان
