ئه‌ڤرۆ نيوز:

ئیرۆ چارشه‌مبێ پرۆسه‌یا دادگه‌هكرنا هه‌ڤسه‌رۆكێ به‌رێ یێ پارتیا ده‌مۆكراتیكا گه‌لان (هه‌ده‌په‌) سه‌لاهه‌دینن ده‌یمرتاش دیسان به‌رده‌وام دكه‌ت.

ل گۆر مه‌دیایا تركیێ, پرۆسه‌یا دادگه‌هكرنا ده‌میرتاش ژ ئالیێ 19ه‌مین دادگه‌ها جه‌زایێن گران یا ئە‌نقه‌رێ ل سینجانێ برێڤه‌ دچه‌ و ب تۆهمه‌تا “برێڤه‌برنا رێخستنا ته‌رۆریستی” داخوازا 142 سال زیندانكرنا ده‌میرتاش تێ كرن.

د روونشتنا داوی یا دادگه‌هێ ده‌ ده‌میرتاش ل سه‌ر ڤێ دۆسیایێ پاراستنا خوه‌ پێشكێش كر و گۆت: “ئه‌ز قه‌ت نه‌بوومه‌ رێڤه‌به‌رێ په‌كه‌كێ, قه‌ت من فه‌رمان ژ كه‌سی وه‌رنه‌گرتیه‌ و كه‌سی ژی فه‌رمان نه‌دایه‌ من.”

پارێزه‌رێن ده‌میرتاش، بۆ روونشتنا ئیرۆ یا دادگه‌هێ ل سه‌ر ڤێ دۆسیایێ 22 داخواز پێشكێشی ده‌سته‌یا دادگه‌هێ كرنه‌, ژ وان ئاماده‌بوون و وه‌رگرتنا ئاخافتنا سه‌رۆكوه‌زیرێ به‌رێ یێ تركیێ ئه‌حمه‌د داود ئۆغلئ و راوێژكارێ میتێ هاكان فیدان، وه‌زیرێ به‌رێ یێ ناڤخوه‌ ئە‌فكان ئالا، جیگرێ به‌رێ یێ سه‌رۆكوه‌زیر یالچن ئاكدۆگان و پارلامه‌نته‌رێن هه‌ده‌پێ سڕه‌یا سوره‌ییا ئونده‌ر و سه‌لما ئیرماك

ئه‌ڤرۆ نيوز، فاتما مزوورى:

هێزێن سوریا ده‌مۆكرات كو ئه‌مه‌ریكا پشتگیریا وان دكه ‌و باژارێ ره‌قه‌ دبن كۆنترۆلا وان دایه‌ بۆ ده‌مێ سێ رۆژان قه‌ده‌غه‌یا هاتوچویێ و بارێ نه‌ئاسایی ل وی باژاری راگه‌هاند ژبه‌ر كو چه‌كدارێن داعشێ هاتنه‌ ناڤا باژێر و دخوازن ئێرشێن چه‌كداری ئه‌نجام بده‌ن.

د داخویانیه‌كێ ده‌ هێزێن سوریا ده‌مۆكرات قه‌ده‌غه‌یا هاتن و چون و بارێ نه‌ئاسایی ل باژارێ ره‌قه‌ راگه‌هاند ژبۆ پێش گرتن ژ هه‌رئێرشه‌كه‌ داعشێ.

ئاماژه‌ ب وێ یه‌كێ ژی كر كو ده‌ستگه‌هێن هه‌والگه‌ریێن وان زانیاری ب وان دانه‌ كو هه‌ژماره‌ك ژ چه‌كدارێن داعش هاتنه‌ ناڤا باژێرێ ره‌قه ب مه‌ره‌ما تێكدانا ره‌وشا ئه‌منی و دخوازن ئێرشن چه‌كداری ئه‌نجام بده‌ن. بریارا قه‌ده‌غه‌یا هاتن و چونێ ل ئیرۆ یه‌كشه‌مبیێ ده‌ست پێ دكه‌ت و هه‌تا سێ رۆژان به‌رده‌وام دبیت.

ئه‌ڤرۆ نيوز، فاتما مزوورى:

شه‌ڤا ده‌ربازبوویی ل باژارێ پیرانشار ل رۆژهه‌لاتێ كوردستانێ شه‌ره‌كه‌ گران دناڤبه‌را پێشمه‌رگه‌هێن حیزبا ده‌مۆكراتا كوردستانا ئیرانێ و سوپایێ پاسدارێن ئیرانێ چێبوو.

فه‌رمانده‌هێ هێزێن پێشمه‌رگه‌هێ كوردستانێ كو سه‌ر ب حیزبا ده‌مۆكراتا كوردستانا ئیرانێ یه‌ داخویانیه‌ك به‌لاڤكر، د داخویانیێ ده‌ هاتیه‌، شه‌ڤا ده‌رباسبوویی د درێژاهییا كارو چالاكی و برێڤه‌برنا ئه‌ركێن هێزێن پێشمه‌رگه‌هێن كوردستانێ كو مژولی جیبجی كرنا ئه‌ركێ خۆه‌ بوون، ل چیایێن پشت زێوه‌ و لاجانا كه‌ڤن یا سه‌ر ب پیرانشارێ ژبال هێزێن كۆمارا ئیسلامی یا ئیرانێ دكه‌ڤنه‌ به‌ر ده‌سترێژا گۆله‌یان و شه‌رو په‌ڤچونێن گران چێبوون.

هه‌ر د داخویانیێ ده‌، هاتیه‌، پێشمه‌رگه‌هه‌كێ حیزبا حه‌دكا بناڤێ سامان حه‌سه‌نپور، ل ڤی باژاری شه‌هیدبووه‌ و هه‌ژماره‌ك ژ هێزێن سوپایێ پاسدارێن ئیرانێ ژی هاتنه‌ كوشتن و برینداركرن.

ئه‌ڤرۆ نيوز:

ل گەل نێزیکبوونا ژڤانێ زارۆبوونێ، حەزا ژنان زێدەدبیت کو زارۆیێ خوە دناڤ دەستێن خوەدا ببینن، و ‏دبیت پتر ئالوزببن و بترسن ژ زارۆبوونێ، پرسیارێن وان زێدە دبن، لەورا گەلەک تشت ھەنە کو پێدڤیە ژن ‏بزانیت ل ھەر سێ ھەیڤێن دووماھیێ ژ دووگیانیێ ئانکو ژ حەفتیا 29 ھەتا حەفتیا 40ێ.‏

گەلەک گۆھورین دێ ب سەر ژیانا تەدا ھێن، ب تایبەت ساخلەمی و لەشێ تە دەمێ دوگیان دبیت، بەلێ ‏ئەڤ گۆھورینە ھەیڤەکێ بۆ ئێکا دی جوداھی ھەنە، و رەنگە ژ حەفتیەکێ بۆ ئێکا دیتر ژی جوداھی ھەبن، ‏ل گەل نێزیکبوونا دەمێ زارۆبوونێ ل ھەر سێ ھەیڤێن دووماھیێ ژ دوگیانیێ، دێ ھەست ب زێدەبوونا ‏سەنگی و وەستیانێ کەی، دبیت ژی حەزا تە بۆ دەستئاڤا زراڤ زێدەببیت، پێن تە ب وەرمن، بەلێ ئەڤان ‏نیشانا ھەموویان چارەسەری یا ھەی و تو دشێی کونترۆل بکەی ب خوارنا ساخلەم و ئەنجامدانا وەرزشێ ‏و بێھنڤەدانێ.‏
لەشێ تە و خوارن:‏

ل گەل نێزیکبوونا تە بۆ ھەیڤێن دووماھیێ ژ دوگیانیێ، بلا ل بیرا تە بیت، خوارنێ باش بخو و وەرزشێ بکە ‏داکو سەنگێ زارۆیێ تە سروشتی ببیت، و داکو تو یا ئامادەبی بو ژانا و زارۆبوونێ، ل ھەر سێ ھەیڤێن ‏دووماھیێ پێدڤیە رۆژانە تو 300 کالوریێن زێدە بخووی ل گەل وێ خارنا کو تو ل دەمێ دوگیانیێ ل سەر ‏چووی، ھشیاربە وێ خارنێ ژ خارنێن پری کاربوھیدرات و پرۆتینان وەربگرە، وەکو موز و پتات و پەنیری، ‏رەنگە تو ھزربکەی کو زوو تو تێر دبی بەری ب دووماھی ھاتنا خارنێ وەکو جاران، ئەڤە تشتەکێ سرۆشتی ‏یە، چونکو مالبچووک فشارێ ل سەر مەعیدێ دکەت و بۆ ڤێ چەندێ باشترە رۆژانە شەش ھەتا ھەشت ‏جارا وەجبێن بچووک یێن خارنێ بخووی، ژبیرنەکە ژی پێدڤیە ھەر چو نەبیت ھەشت کوپێن ئاڤێ ژی ‏ڤەخووی و رۆژانە 1000ملگم کالسیومی وەربگری.‏

چالاکیێن لەشی:‏
ھەکە چو مەترسی نەبن کو زارۆیێ تە بەری وەختی بھێتە ل سەر دونیایێ، راھێنانێن وەرزشی یێن ئێمن ‏بکە و چو راھێنانێن دژوار ئەنجام نەدە، ھندی راھێنانێن تە د سڤک بن نەترسە و ھێشتا سڤک بکە، ھەکە ‏تە ھەست ب گێژبوونێ و وەستیانێ کر راھێنانا ب راوەستینە، رەنگە ھەستکرن ب ئیزعاجێ و گەلەک ‏چوونا دەستئاڤێ ب شەڤێ و کێم نڤستن ببنە ئەگەرێ وەستیانێ، لەورا دێ باشتر بیت ل دەمێ نڤستنێ ‏بالیفکەک ل بن پێن تە بیت و پشتی شەشێ ئێڤاری ئاڤێ و شلەمەنیا کێم بکە و ب رۆژێ خوە نەوەستینە و ‏ھەر سعەتێ پێنج دەقیقان بێھنا خوە ڤەدە.‏

پەیوەندیێن ھەڤژینیێ:‏
ئەنجامدانا پەیوەندیێن ھەڤژینیێ دماوێ دوگیانیێ دا یا ئێمنە، بەلێ ھەکە مەترسیەک ھەبیت کو زارۆ ‏بەری وەختێ خوە بھێتە سەر دونیایێ باشترە ئەو پەیوەندی نەبیت، بۆ ئارامبوونا دەروونی، باشترە ل گەل ‏ھندەک ژنێن دی باخڤی و شیرەتا ل تە بکەن، بەلکی شیرەتێن وان مفای ل تە بکەن بۆ چاوانیا برینا ناڤکا ‏زارۆکی یان سوزنەتکرنا وی، بەلێ ھشیاربی گوھداریا چێروکێن ب ترس نەکەی و نە ھەر پرتووکەکا کەتە ‏بەر دەستێن تە بخوینی.‏

دایک:‏
دبیت مەزنبوونا مالبچووکێ تە ببیتە ئەگەرێ ب زەحمەت ھەناسەکرنێ، ھەروەسا دێمێ تە ب شدیێت، ‏یان ھەست ب خوریانێ بکەی، و پێن تە ب وەرمن، ژ ئاریشێن گەلەک بەربەلاڤ دبن ل دەمێ دوگیانیێ ‏پێکھاتینە ژ (فشارا میزدانکێ: بۆ خوپاراستنێ ژ فشارا میزدانکێ و حەزا زێدە یا دەستئاڤا زراڤ، ب ‏شێوەیەکێ رێکخستی ھەرە دەستئاڤێ، قەھوێ و چایێ نەڤەخوو، ب شەڤێ گەلەک ئاڤێ و شلەمەنیا ‏بکاۆنەئینە، ب رۆژێ قەرەبوویا وان بکە، بۆ چارەسەریێ ژی چو دەرمانێن دەستنیشانکری نینن، بەلکو ‏ئەڤە حالەتەکێ سروشتی یە ل دەمێ دوگیاینێ).‏

قەبزبوون:‏
بۆ خوپاراستنێ ژ قەبزبوونێ، وەرزشێ ئەنجام بدە و خارنێن رووشال ژ فێقی و زەرزەواتی و نانی بخوو، ‏گەلەک ئاڤێ ڤەخوو، داخازا دەرمانێن دەستنیشانکری ژ نوشدارا خوە بکە و بۆ چەند دەقیقا ل ناڤ ئاڤەکا ‏گەرم ب روونە خارێ، بۆ نەھێلانا وەرمینا پێیا ژی، گەلەک ل سەر پێن خوە رانەوەستە، بەردەوام ل دەمێ ‏روونشتنێ ژی بلا پێن تە لڤینێ بکەن، ھندی دشیاندا بیت بلا ژ لەسشێ تە بلندتر بن، و گورێن پزیشکی ل ‏پێن خوە بکە، دەمێ خوینبەربوونەک بۆ تە پەیدابوو، یان سەرێ تە گەلەک ئێشا شیرەتا ژ نوشدارا خوە ‏وەربگرە، ھەکە گوھورینەک کەتە لڤینا کورپەلەی، یان ئێشانەک کەتە زکێ تە و دوگیانیا تە ژ 7 حەفتیا ‏کێمتر بوو، دیا قەستا نوشداری بکە.‏

ئەڤرۆ نیوز ، تۆڤی :

رێڤه‌به‌ریا گشتی یا سەقاناسی و بیڤە‌له‌رزان ل هه‌رێما كوردستانێ پێشبینیێن خوە بۆ رەوشا سەقایێ ئه‌ڤرۆ و سوبە یێن باژێرێن باشورێ كوردستانێ راگه‌هاندینە.
ئه‌ڤرۆ ئێکشه‌مبی دێ ئەسمانێ ل هه‌ولێر و سلێمانی و دهۆك و كه‌ركووكێ ساهی بیت ، بلندترین پلا گه‌رمێ دێ 39 پله بیت‌ و نزمترین پله‌ ژی دێ 21 پلا سیلیزی بیت.
هه‌روه‌سا سوبە دووشه‌مبی ئەسمانێ كوردستانێ دێ ب ‌هه‌مانشێوه‌ ل ژێر كاریگه‌ریا نزم یا فشارا‌ نیمچه‌ دوورگه‌یا عه‌ره‌بی مینیت ، ل هه‌ولێر و سلێمانی و كه‌ركووك و دهۆك ئاسمان دێ یێ ساهی بیت ، بلندترین پلا گه‌رمێ دێ 40 پله‌ بیت و نزمترین پلە ژی دێ 23 پلا سیلیزی بیت.

ئەڤرۆ نیوز ، زنار تۆڤی :

موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویاکرن:کو شڤێدی د روودانەکا ترافیکێ دا ل جادا مالتایێ شۆفێرێ ترۆمبێلەکێ برینداربوویە.

ناڤهاتی زێدەتر گوت:ل دەمژمێر ١٢:٤٥ خولەکی شەڤا ئەینی ل سەر شەمبی ١٩/٥/٢٠١٨ ل سەر جادا مالتایێ و ل نێزيك مزگەفتا كێسته روودانەکا ترافیکێ روودایە و ئەگەرێ ڤێ روودانێ شوفێری كونترۆل ل سەر ترومبێلا خوە نەمایە،لەوما وی ترۆمبێلا خوە ل پەرژانێ رەسیفی دایە و ژ ئەگەرێ ڤێ چەندێ ترومبێلا وی دبيته دوو پارچە و ئەو ژی برینداربوویە.

ئه‌ڤرۆ نيوز:

ھەلبەت ل ھەیڤا رەمەزانێ خەلک گەلەک ھەست ب تێھنیبوونێ دکەن ل رەمەزانێ و ب تایبەت ل وەرزێ ‏ھاڤینێ، پرسیار ل ڤێرێ ئەڤەیە، ئەم دێ چاوان ھاریکاریا لەشێن خۆ کەین کو ئاڤێ ب پارێزیت و مە پال ‏نەدەت کو ئاڤێ ڤەخوین یان ھەست ب تێھنیبوونێ بکەین.‏

ل ھەیڤا رەمەزانا پیرۆز مرۆڤێ رۆژیگر گەلەک ھەست ب تێھنیبوونێ دکەت و ب تایبەت ھەکە دونیا یا گەرم ‏بیت و مرۆڤ پتری 16 دەمژمێران چ نەخوت و نەڤەخوت، لەشێ مرۆڤی بەردەوام دێ ئاڤێ بەرزەکەت ھەتا دبیتە ‏وەختێ فتارێ و ل وی دەمی دێ گەلەک پێدڤی ب ئاڤێ و شلەمەنیان بیت بۆ دوبارە ڤەگەراندنا ئاڤا بەرزەبووی.‏

ھەر کەسەک ژ مە شیان ھەنە ھاریکاریا خۆ بکەین کو ئاڤێ د لەشێ خۆ دا ب پارێزین و ھەست ب تێھنیبوونێ ‏نەکەین، ئەوژی ب دۆڤچوونا ھندەک رێیان داکو پتر ھەست ب تێھناتیێ نەکەین.‏

ھەڤالێن مە یێن دژی تێھنیبوونێ:‏
‏* ئاڤ: سەرکێشا ھەموو شلەمەنیانە و چ شلەمەنیێن دیتر جھێ ئاڤێ ناگرن، شارەزا شیرەتان ل مە دکەن کو ‏رۆژانە دجو لیترێن ئاڤێ ڤەخوین و ب تایبەت ھەکە گەلەک خوھدان ل لەشێ مەدا پەیداببیت، باشترە ل دەمێ ‏سەرەدەریێ دگەل ئاڤێ دکەین ب ڤی رەنگی بیت:‏
‏- نابیت ب چ رەنگەکی تو بوتلێ ئاڤێ ڤەکری بھێلی بۆ دەمەکێ درێژ، ژبەرکو ئەو بەکتریایێن دناڤ دەڤێ مە و ‏دەوروبەرێن مە رەنگە دناڤدا چالاک ببن و ببنە ژێدەرێ نەخۆشیان.‏
‏- ھەکە تەڤیا دوبارە ئاڤێ بکەیە بوتلی، باشترە قەپاغێ وی و دەوروبەرێن قەباغی باش ب ئاڤا گەرم و سابوونێ ‏بشووی.‏
‏- تو دشێی ھندەک تشتا ل سەر ھەر کوپەکێ ئاڤا تو ڤەدخوی زێدەبکەی وەکو نیموکا و نەعنایێ و زەنجیلی.‏
‏- ژبۆ خۆ قورتالکرنێ ژ تاما کلۆری، باشترە ئاڤێ بدانیە دناڤ ئامانەکێ بەرفرەە دا بۆ دەمێ دەمژمێرەکێ بھێلە ‏بەری تو ڤەخوی.‏

* شلەمەنی ب ھەموو رەنگێن خۆڤە، ب تایبەت ڤەخوارنێن وەکو خوشاڤا و شەربەتا فێقیێ سروشتی کو خوێ ‏دناڤدا ھەیە دروستە تو ب کاربینی، شیرەتان خۆ دوور بکەن ژ شەربەتێن دەستکرد کو ب رێکێن پیشەسازی دھێنە ‏دروستکرن ژبەرکو گەلەک شەکر دناڤدا ھەیە و زیانێن مەزن دگەھینن ساخلەمیا مرۆڤی و ھەستداریێ ‏پەیدادکەن.‏
‏

* زەرزەوات و فێقیێ گەھشتی:دێ گەلەک باش بیت ب شەڤێ و ل دەمێ پاشیڤێ تو فێقی و زەرزەواتی بخوی، ‏ژبەرکو گەلەک ئاڤ دناڤدا ھەیە و بۆ دەمەکێ درێژ ئەو ئاڤ دناڤ رووڤیکان دا دمینیت و مرۆڤ ھەست ب برسیبوون ‏و تێھناتیێ ناکەت.‏
‏

* گیروکرنا پاشیڤی: باشترە پاشیڤ ل وەختێ خۆ بھێتە خوارن کو ژ نیڤ شەڤ پێدابیت، داکو رۆژیگر بشێت ‏بەرھنگاریا تێھنیبوونێ بکەت و ب تایبەت ل رۆژێن ئێکەم یێن رۆژیگرتنێ و ھندی خوارنا پاشیڤێ سڤکتر بیت ‏ھەلبەت باشترە.‏

ئەو دزیکەرێن ئاڤێ ژ لەشێ مە د دزن:
‏-‏ خوێ یا خوارنێ: خوارنا تشتێن سویر ھەلبەت پێدڤیا مە ب ئاڤێ زێدەدکەن، لەورا باشترە گەلەک خوێ ‏نەکەینە دناڤ خوارنێ دا و خۆ ژ خوارنێن سویرکری دوور بکەین، وەکو ماسیێن سویر و موخەللا و دێ ‏گەلەک باش بیت ئەم ئاڤا نیموکان ل جھێ خوێ ل زەرزەواتی بکەین ژبەرکو ئاڤا نیموکان خوارنێ ‏ھەڤسەنگ دکەت.‏
‏

-‏ دەرمانک و بھارات: ئەو خوارنێن گەلەک بھارات دناڤدا مرۆڤی پال ددەن کو گەلەک ئاڤێ ڤەخوت، ژبەرکو ‏ئەو خوارن ئاڤێ ژ گەوری و دەڤ و گەدەیا مرۆڤی دمێژن، دبنە ئەگەر ھشکاتی د لەشیدا پەیداببیت، پاشی ‏مرۆڤ ھەست ب تێھنی بوونێ دکەت، لەورا یا باشترە ل سەر رۆژیگری خو ژێ دوور بکەت و ب تایبەت ل ‏دەمێ پاشیڤی.‏
‏

-‏ چا و قەھوە: شیرەتان ل رۆژیگران دکەین ھندی دشیان دابیت خۆ ژ چایێ و قەھوێ دوور بکەت ژبەرکو ئەو ‏کارێ گولچیسکان چالاک دکەن و گولچیسکان پال ددەن خۆ ژ ئاڤێ قورتال بکەن، ددووڤدا دێ بنە ئەگەر ‏کو ئاڤ ژ لەشێ مرۆڤی کێم ببیت، نابیت ب چ رەنگەکی ئەم چایێ و قەھوێ وەکو شوونگر بۆ ئاڤێ ب ‏کاربینین، ژبەرکو ئەو ب سروشتێ خۆ دکەلن و رۆژیگری شیان نینن گەلەکێ ژێ ڤەخوت.‏
‏

-‏ ڤەخوارنێن غازی: ئەوێن کو کاربوون دناڤدا کو دبنە ئەگەرێ وەرمینا زکی و مرۆڤ ھەست ب تێربوونێ ‏دکەت و دبنە رێگر کو لەشێ مە مفای ژ شلەمەنیان نەبینیت، لەورا باشترە ب ئێکجاری دگەل فتارێ ‏ڤەنەخوین.‏
‏

-‏ ‏ تیرێژا ئێکسەر یا رۆژێ:ھندی دشیاندابیت خۆ ژ تیرێژا رۆژێ دوور بکە و ژبۆ ھندێ تیشکا رۆژێ گەلەک ‏کارتێکرنێ ل تە نەکەت و تو تێھنی نەبی.‏

ئه‌ڤرۆ نيوز:

پشکا چاڤدێری و سەلامەتیا خوراکی ل رێڤەبەریا کاروبارێن خوپاراستنا ساخلەمیێ ل گەل ھوبێن پەیوەندیدار چەندین رێنما بۆ خودانێن تەزیاتیا بۆ مەھا رەمەزانێ دانە دیار کرن.
عسمەت سلێمان وەیسی رێڤەبەرێ پشکێ ب ھەلکەفتا ھاتنا ھەیڤا رەمەزانا پیرۆز ئەڤ سالە ب تایبەت کو دکەڤیتە د وەرزێ ھاڤینێ دا وەکو یا دیار پلا گەرماتیێ زۆر یا بلندە ئەڤە ژی دبیتە ئەگەرێ تێکچوونا کەلوپەلێن خوارن و ڤەخوارنێ ب تایبەت شەربەتێن ب دەستی دھێنە دروست کرن و شریناھی و گوشت و بەرھەمێن سپیاتی، پێخەمەت پاراستانا ساخلەمیا گشتی و ساخلەمیا رۆژیگرێن بەرێز بڕیار ھاتە دان ئەڤ رێنماێن خوارێ بھێنە بەلاڤ کرن بۆ جھێن گشتی و پێگری پێ بھێتە کرن و نەپێگری پێکرن دێ کەڤیتە بەر قانوونا ساخلەمیا گشتی:

شەربەت:
١. دڤێت ھەموو جھێن تەزیاتیا ئامیرێ پالاوتنا ئاڤێ ب قەبارێ مەزن ھەبن بۆ ئامادەکرنا شەربەتێ و عەسیرا و شووشتنا ئامانێن بکار دئینن بۆ دروست کرنا وان.

٢. ئامیرێن پالاوتنێ دڤێت بەردەوام کار بکەن دا تافیلکرنا ئاڤێ ب شێوەکێ دروست بھێتە کرن و بەردەوام فیلتەرێن وان بێنە گوھاڕتن ل دووڤ قەبارێ کاری.

٣. شەربەت دڤێت د ناڤ تەزیکەرا دا بھێتە ھەلگرتن و دانان و نابیت ب چو رەنگەکی ل سەر ستێرکا و ژ دەرڤە بھێتە دانان.

٤. دڤێت ب تنێ شەربەت بۆ رۆژەکێ بھێتە دروست کرن، ھەکە ما دڤێت بھێتە ژ ناڤ برن.

٥. نابیت شەربەت ل سەر عەرەبانا و ل سەر جھێ پەیادێ بھێتە فرۆتن.

٦. فێقیێ تایبەت بۆ گڤاشتنێ دڤێت د ناف تەزینەران دا بھێتە دانان پشتی شووشتن و زوھا کرنێ.

چاوانیا دروستکرنا شەربەتا مێووژان ل مەھا رەمەزانێ:

١. ئەو جھێ شەربەت لێ دھێتە ئامادەکرن دڤێت یێ دەستوور دای بیت.

٢. جھەکێ گونجایی بۆ ھەلگرتنا مێووژێن ھشک.

٣. مێووژ ب ئاڤا پاقژ بھێنە شووشتن و تافیلکرن.

٤. نماندنا مێووژان ب ئاڤەکا پاقژ و ل جھەکێ گونجایی.

٥. ھێرانا مێووژا ب ئامیرێ ئوتوماتیک و پاقژ.

٦. بکار ئینانا ئاڤا فلتەر کری بۆ بکار ئینانێ.

٧. نابیت پینگ بھێتە بکار ئینان ب تنێ تاما وی.

٨. تنێ ئێک جار کیسک یان بتل بھێتە بکار ئینان بۆ داگرتنا شەربەتێ.

٩. نابیت شەربەت بۆ دو رۆژا بھێتە دروست کرن.

١٠. ئەو جھێن شەربەتێ ب کۆم د فرۆشن دڤێت پسولا فرۆتنێ ل گەل بیت دا ژێدەرێ وێ یێ دیار و ئاشکرا بیت.

١١. دڤێت شەربەت ژ جھەکی بۆ ئێکێ دی ب شێوەکێ ساخلەم بھێتە ڤەگۆھاستن.

١٢. بەردەوام نمونە دێ ھێنە وەرگرتن بۆ پشکنینا دێ ل دووڤ قانوونا ساخلەمێ بڕیار ل سەر ھێتە دان.

مادێ ١٠:
دەمێ رێنما نەھاتنە ئجھئینان بۆ جارا ئێکێ دێ ئەو جھـ ھێتە راوەستاندن بۆ ماوێ حەفتیەکێ ئەو جھـ دێ ھێتە پاقژ کرن و تافیلکرن و ھێتە ڤەکرن دەمێ بۆ جارا دویێ ئەڤ رێنمایە ھاتە پشت گوھـ ھاڤێتن ب رێیا قانوونی دێ کار ل گەل ھێتە کرن ل دووڤ ماددێ ٩٩ ژ قانوونا ساخلەمیا گشتی ٨٩ یا سالا ١٩٨١ و ھەموو ئەگەر ب رێیا پشکنینا دھێنە دیارکرن.