%50 فرۆتنا ترۆمبێلا ب دەینە و چو گرنتی نینن
ئەڤرۆ نیوز ، نەوزاد ھلۆری:
ل سنوورێ دەڤەرا ئامێدیێ ب گشتی و ناحیا شێلادزێ ب تایبەتی ھژمارەکا پێشانگەھێن ترۆمبێلان ھەنە، بەلێ قەیرانا دارایی کارتێکرنەکا مەزن لسەر کرین و فروتنا وان کریە، و شوفێر و خودانێن پێشانگەھان ددەن دیارکرن کو چوو گەرنتی نینن کەسەک ترومبێلا خوە بفروشیتە کەسەکێ ب دەین و مافێ وی بھێتە پاراستن، و ئەڤ یەک بویە سەدەم کو چەندین کێشە دناڤبەرا بکر و فروشیاران درۆست ببن.
عەونی عەباس شوفێرەکێ دەڤەرا ئامێدیێ یە دیارکر کو چوو گەرنتی دناڤبەرا بکری و فروشیاری بۆ فروتنا ترومبێلێ و پاراستنا مافێن وان نینە و بۆ ئەڤرۆ نیوز گۆت: (رەوشا کرین و فروتنا تورمبێلان ل سنوورێ ناحیا شێلادزێ ژبەر وەرزێ ھاڤینێ و قەیرانا دارایی لاوازبوویە، و پرانیا کرین و فروتنا ترومبێلان ژی ب دەین و قستە ، بەلێ چوو گەرنتی دناڤبەرا بکری و فروشیاری نینن کو پارێ فروشیاری ژلایێ بکری بھێتەدان ، و ھەردەما بکر یان فروشیار سەرا نەدانا پارەی سکالایێ ژی تومار بکەن چوو ئەنجام نابن ژبەرکو حوکمەت مایتێکرنێ دڤێ یەکێ دا ناکەت و کرین و فروتنا ترومبێلان لسەر بیروباوەر و وژدانا وەلاتیان ڤە گرێدایە و دبیت ھەند کەس ھەبن کو خوش مرۆڤ بن و ھەند ژی ھەبن بتنێ کارێ وان فێلبازی و خرابکاری بیت)
عیسا سەعید شوفێرەکێ دی یێ دەڤەرێ یە دایە دیارکرن کو کرین و فروتنا ترومبێلان 50% پتر بویە دەین و بۆ ئەڤرۆ نیوز گۆت: (پێدڤی یە لایەنێن شولەژێ تشتەکێ دناڤبەرا بکری و فروشیاری بکەن داکو کێشە درۆست نەبن، یان ژی بلا بکر و فروشیار بخوە ب پارێ کاش کرین و فروتنێ بکەن، گەلەک شوفێر پەنایێ بو کەفیلەکێ دبەن ، بەلێ کەفیلا چوو شیان نینن بەرامبەر وان کێشەیێن کو ل پاشەروژێ دکەڤنە دناڤبەرا بکری و فروشیاری دا درۆست دبن ، ب تایبەتی د حالەتێ مرنا کەفیلی یان چونا وی بو دەرڤە ، و دیسان چوو رەھینە ژی ژلایێ بکر و فروشیاری نینن ھەردەما کێشەیەک ھەبوو بابەت پێ بھێتە چارەسەرکرن، ژبەرڤێ گرنگە حوکمەت باشترین چارەسەری بۆ کرین و فروتنا تورمبێلان ببینیت داکو وەلاتی بکارن ب ئارامی ترومبێلێن خوە بفروشن یان بکرن و مافێ وان بەرزە نەبیت)
ژلایەکێ دنڤە خودانێ ئێک پێشانگەھێن کرین و فرۆتنا ترومبێلان دیارکر کو پێدڤی یە لایەنێن شولەژێ گەرنتیەکێ دناڤبەرا بکری و فرۆشیاری دا وەکو چارەسەری پەیدا بکەت داکو چوو کێشەیێن قانونی درۆست نەبن.
کاروان محەمەد خودانێ ئێک ژ پێشانگەھێن ترومبێلان دیارکر کو چوو گەرنتی دناڤبەرا بکری و فروشیارێ ترومبێلان نینە و بۆ ئەڤرۆ نیوز گۆت: (قەیرانا دارایی و گیروبوونا موچەیان بویە سەدەم کو 50% کرین و فروتنا ترومبێلان نەمینیت، و دیسان قەیران بوویە سەدەم کو ئێدی وەلاتی و شوفێر باوەری نەبیت کو ترومبێلێن خوە ب بدەین بفرۆشن ،ئەگەر چوو گەرنتی و رەھین و کەفیل نەبن)
زێدەتر گۆت: (حوکمەتێ و لایەنێن شولەژێ ھەتا نھا نەشیایە کو کێشەیێن دناڤبەرا شوفێران بۆ فروتنا ترومبێلان ئێکلابکەت ،کو مافێ کەس ژ وان نەھێتە خوارن پشتی فروتن یان کرینا ترومبێلێ، و ل سنوورێ ناحیا شێلادزێ چوو تەشقەلە و حیلە ناھێنەکرن و ئەڤ یەک بوویە سەدەم کو بکر ل ھەموو دەڤەرێن دھۆکێ و سوران قەستا پێشانگەھێن شێلادزێ بکەن)
ناڤبری دیارکر ژی کو ئەو ترومبێلێن کو کرین و فروتنا وان ل بازارێ شێلادزێ ھەیی ھەموو ئەو ترومبێلن کو بھایێ وان دکەڤیتە دناڤبەرا پێنج ھزار بۆ 14 ھزار دولارن ، زور ب کێمی کرین و فروتن ب ترومبێلێن لسەر 20 ھزار دولارن دھێتەکرن.
ل سنوورێ دەڤەرا ئامێدیێ نێزیکێ 10 پێشانگەھێن ترومبێلان ھەنە کو پرانیا وان دکەڤنە سەنتەرێ ناحیا شێلادزێ.
