Think Twice
د. عارف حیتۆ
گولەکا زەر ب بەر پەرچەما تەڤە تیشۆپ
دگەل بێهنێ دکەفتە گەڵتێ و چاڤزلکانێ..
شەیتانەکێ شعرێ سڵاڤ کرە وەختی و
گول ڕازاندە د قافکەکیدا
بێهنێ.. خوە د کوریا دویکێلێ وەرکر!
پەیڤ ل بەندەمانێ تەزین و ئەرێیا تە؛
دناڤ لاتەکا دلێ من یێ هەردەم تو ل بیر
کونبەفرەکا ژبیرکری بوو..
فەرە جاردی هزرێ د گولێن زەردا بکەم.
* * *
ب ڕەخ گوهارکێ تەڤە نیشانەک دبرسقیی
باخچەڤانی خوها خوە ژ ئەنیێ داقوتا و د حەودکێدا چاند
باخچە داجڕیان سەرایێ و سلۆگانێن تەڕ ژبەر دچوون!
مانگرتنێ ڤەکێشا بەر دەرێ سۆزێ و تەڤی دیدار…
کت کتە دکەفتن سەر ئاخێ و دئێڤتین
ل بن پی یێن دەواتچییان پەحن دبوون و دپەرچقین
شیراڤەکا چیڤانۆکی ژ وێ نیشانێ دڕژیا و ئەو نیشانە؛
ژ ڕستکا ستێرێن سبێ.. قەتیایی بوو
فەرە جاردی هزرا خوە د نیشانێدا بکەم.
* * *
گیا د چاڤێن تەدا دکەنیت
تەنی و قێڕێ ساڵێن بۆری
ژ پێنگاڤێن ژ غاردانێ کەفتیی، دڕەنیت
تەنویرێن سارێن تەمەنی
نەماینە ل هیڤیا مەستیێ، یان متیێ
کو کێلیکێن خوەشیا سەربەردای بزڤڕینیت
هەمی تشتەک بێ مەخسەد دادکەڤتە عەردی
جوانیا چاڤێن تە تێ نەبن… لێ نزانم:
چاڤێن تەنە جوانیێ ل عەردی دبارینن
یان ژی عەردە چاڤێن تە ب جوانیێ ڤەدژینن!
کەنیا گیای ڕیکلامەکا ڤەکری بوو
کو عەور ژ چاڤی فڕی بوو…
فەرە جاردی هزرا خوە د کەنیێدا بکەم.
* * *
وەغەرەکێ ل کنارێن تە سەما کر
تە ژی توخیب بۆ دوتا کر
من نەدڤێیا خوە د ڕێکا تەدا بکەمە صنگ
دا نەبیە بار ب ملێ من یێ وەغەرکەرڤە
ئەز سەنگا باران نزانم، لێ دزانم…
هەر بارەکێ دگەل خوە ببەمە جێ مەخسەدێ
دێ ل من تێکدەت فەرسەدێ
وەغەر هەردەم د مندا دژیا و ل تە دگەڕیا
لێ.. ژ من کەفت و ب دەهمەنا تە یا شۆرڤە
پێنگاڤەکا توڕکری بوو..
فەرە جاردی هزرا خوە د وەغەرێدا بکەم.
* * *
من تو ل سەر بەندەری دیتی
خەونا خەونێ ب ئەنیا تەڤە ببوو تیتی
خێڤزانکێن بەر لێڤا دەریا
نەدڤێیان دەستێ تە بخوینن،
یان سیتافکا تە ب پاپۆرێڤە کۆلاجکەن
چونکو بەندەر د دلخرابن، خو ل خەیالێ ژی ب گۆمانن
ژ سەر خیزی ڤێددەنەڤە و بەرەف تاریستانێڤە دبەن
د نۆبەتەکا بیرهاتنێن تەڕ و دلخوازدا دبن تەرم
جانێ خەیالێ دناڤ گاڤێن بەندەریدا،
هەناسەیەک بەندکری بوو..
فەرە جاردی هزرا خوە د بەندەریدا بکەم.
* * *
هەر ڕۆژ تو دهاتییە دەف من…
ب گولئاسمینێن عاشقڤە، بەر دبوویە من
دا ژڤانەک ژ دەرڤەی پەیڤان مە بدەت بەرئێک
… ژڤانێ مە نهۆ ل «واشنتۆن» نۆکەرە
ل میهرەگانا سەرسالا نوو فرۆشیارە
تەڤی بهایێن بشافتیی ژ سەربۆرێن کەل
دفرۆشیتە دەرفەتێن ژ هاتنێ ڕشتیی
ژڤان تنازا ب ڕێکێ دکەن!
ڕێکا ڕویپێن هێشتا نە ڕویپ،
ب سەرەدەرێڤە دادلەقیێت
دەنگێ فیتکا و چەپلەلێدانێ خەوارە
تنێ خەونەک ل بەندا تە ما بوو هشیار
لێ د کۆتانێڤە گرتیی بوو..
فەرە جاردی هزرا خوە د تەدا بکەم.
