ئهڤ ساله سێ قوتابخانه ل شنگال هاتینه داخستن
دهۆك، لهزگین جوقی
رێڤهبهرێ پهروهردا قهزا شنگال یا زمانێ كوردی دیار كر:” ئهڤ ساله سێ قوتابخانه دناڤ ئێك ئاڤاهی دا ل شنگال دهوامێ دكهن، ئهڤه ژی ژ ئهگهرێ گهڤێن گرۆپێن نهشهرعی هاتینه داخستن، نوكه ژ نهچاری پهروهردا شنگال چار قوتابخانه د ناڤ ئێك ئاڤاهی دا ل شنگال ڤهكرینه”.
مهیسهر حهجی، رێڤهبهرێ پهروهردا قهزا شنگال یا زمانێ كوردی بۆ ئهڤرۆ دیار كر:” قوتابخانا زهریفا ئۆسێ گهلهك ب شێوهیهكێ جوان و مۆدرێن هاتبوو ئاڤاكرن، قوتابخانهكا 18 پولی یا سێ قاتێ بوو، د ڤێ قوتابخانێ دا سێ قوتابخانا ههبوون، ئهو ژی قوتابخانهكا دوو دهوامی بوو، ههروهسا ژی ئامادهیا بازرگانی ژی دهوام دناڤ قوتابخانا زهریفا ئۆسێ دا كر. ههروهسا قوتابخانا چیایێ شنگال و قوتابیێن ئامادهیا كوردستان ژی دناڤ قوتابخانا زهریفا ئۆسێ دا بهردهوامیێ ب خواندنا خۆ دان، مخابن ئهڤ ساله گرۆپێن نهشهرعی رێگری كرن و نههێلان قوتابی د ناڤ قوتابخانا زهریفا ئوسێ دا بهردهوامیێ ب خواندنا خۆ بدهن”.
ئاماژه دا وێ چهندێ ژی: “ههتا نوكه ژی ئهگهر دیارنهبووینه، بۆچی رێگریێ ل خواندنا قوتابیان ل شنگال هاته كرن، ئهم وهكو پهروهردا كوردی نهچاربووینه رێیهكا دی یا چارهسهریێ بۆ قوتابیان ببینن، دا كو ژ خواندنێ نههێنه بێ بههركرن و ژ نهچاری ئهو ههموو قوتابیێن ل قوتابخانا زهریفا ئۆسێ دا هاتنه ڤهگهراندن بۆ قوتابخانهیێن وان یێن بهری نوكه ژێ هاتینه ڤهگوهاستن بۆ قوتابخانا زهریفا ئۆسێ”.
مهیسهر حهجی گۆت: “ل جههكی ب تنێ دا چار قوتابخانا د ئێك ئاڤاهیێ دناڤ ئێك قوتابخانێ دا بهردهوامیێ ب خواندنێ ددهن، ب راستی جهێ قوتابیان گهلهك بهرتهنگ بوویه، ل شنگال گهلهك كارتێكرن ل سهر قوتابیان و ئاستێ خواندنێ هاتیه كرن. ئهم داخوازێ ژ وان كهس و لایهنان دكهین یێن دهست ب سهر قوتابخانا زهریفا ئوسێ دا گرتی خۆ ژ قوتابخانێ ڤهكێشن، دا كو قوتابی بێ ئاریشه بهردهوامیێ ب خواندنێ بدهن”.
بهری سالا 2014ێ حۆكمهتا ههرێما كوردستانێ قوتابخانا زهریفا ئوسێ ل شنگال ئاڤاكریه و ل ساله 2014ێ دهمێ هێرشا هوڤانیێن تیرۆرستێن داعش ئهڤ قوتابخانه تووشی زیانێ بوو، پشتی پێشمهرگهی شنگال رزگاركری، ل سالا 2015ێ كار هاته كرن دهوام ل قوتابخانێ دهست پێ بكهت و پشتی هندهك خهلك ڤهگهریاینه شنگال، ژلایێ رێكخراوهكێ قوتابخانه هاته نووژهنكرن بۆ خواندنا كوردی و دهست ب پرۆسهیا خواندنا كوردێ تێدا هاته كرن.
د ناڤ سهنتهرێ قهزا شنگال دا 58 قوتابخانهیێن خواندنا كوردی یێن هاتینه ڤهكرن، پتر ژ 12 هزار قوتابیان ل ناڤ سهنتهرێ شنگال ب زمانی كوردی دخوینن.