بۆ جارا ئێكێ ل عیراقێ كارمەندێن كەرتێ تایبەت دێ هێنە خانەنشینكرن
سالار محەمەد دۆسكی
ئەندامەكێ پەرلەمانێ عیراقێ ژ فراكسیوونا پارتی دیموكراتی كوردستان ئاشكرا كر، قانوونا كەرتێ تایبەت ل پەرلەمانی هاتیە پەسەندكرن و دێ كەرتێ تایبەت ب گشتی و سەندیكایێن كرێكاران بخوە ڤەگریت و قانوونا ناڤبری بۆ جارا ئێكێ یە ل عیراقێ كەرتێ تایبەت بهێتە خانەنشینكرن و هەرێما كوردستانێ ژی دێ ڤەگریت.
خالد رێكانی، ئەندامێ پەرلەمانێ عیراقێ بۆ رۆژناما ئەڤرۆ گۆت: بۆ جارا ئێكێ ل سەر ئاستێ عیراقێ قانوونا گەرەنتیا جڤاكی هاتە پەسەندكرن و پێشتر هەمی قانوون هەبوون، بەلێ ئەڤ قانوونە نەبوو، ئەو كەسێن ل كومپانیێن كەرتێ تایبەت كار دكەن هەتا نوكە نەدهاتنە خانەنشینكرن، ئەڤە بۆ جارا ئێكێ یە پشتی دروستبوونا دەولەتا عیراقێ خانەنشین بوونا وان دهێـتە دانان.
هەمان ئەندامێ پەرلەمانێ عیراقێ دیار كر، قانوون هاتیە پەسەندكرن و پتر ژ 25% خەلكێ عیراقێ دێ مفاداربن ژ بریارێ و هەر خەلكەكێ ل كارگەه و كومپانیان و كەرتێ تایبەت ب گشتی كار بكەت دێ مفاداربیت ژ بریارێ، ئەڤە پشتی دهێنە توماركرن ل سەندیكایێن ب سەر ڤە و ل دووڤ دا دهێنە خانەنشینكرن و دیسا ئەو كرێكار هەیڤانە دێ رسوماتێن خوە دەن.
هێشتا گۆت: ئەف بریارە ب تنێ بۆ خانەنشین بوونێ مفادار نابیت، بەلكو هەر جارەكا نەخوش بیت یان تووشی روودانەكێ بیت و هەتا پێدڤی ب دەرڤە بیت بۆ چارەسەریێ دێ چارەسەریا وی هێتەكرن و ئەڤ قانوونە ژ 113 مادا پێك دهێت.
هەمان ئەندام پەرلەمان ئەو ژی گۆت: هەمی پێدڤیێن ژیانا كرێكاری تێدا هاتینە دەستەبەركرن و هەر ژ پارێ ژ دهێتە وەرگرتن و هەتا دهێتە خانەنشینكرن، هەر بریارەكا ژ پەرلەمانێ عیراقێ دەر دكەڤیت بێ گومان هەرێما كوردستانێ ژی ڤەدگریت و كرێكار و سەندیكایێن كوردستانێ ژی دێ مفاداربن ژ بریارێ و ئەڤە دێ مینیت ل سەر پەرلەمانێ كوردستانێ و كا هەتا چ ئاست دێ خوە ل گەل بریارێ گونجینیت و دڤێت دادپەروەردی هەبیت و نابیت كەسەك ل سەر 200 هزار و كەسەك ل سەر 500 هزار دیناران بهێـتە خانەنشینكرن.
خالد رێكانی زێدەتر ژی گۆت: ب گشتی خانەنشین ل عیراقێ هەمی دێ بنە ئێك خانەنشین و ل كوردستانێ ژی ب هەمان شێوێ ناڤەراست و ژووریا عیراقێ.
