ده‌ست ب نووژه‌نكرنا ده‌رگه‌هێ ئامێدیێ هاته كرن
ئامێدیێ، مه‌حمود نهێلی:
پشتی قۆنسلخانا ئه‌مریكا رازیبوونا خوه ل سه‌ر نووژه‌نكرنا ده‌رگه‌هێ ئامێدیێ یێ شوونواری دیار كری، دوهی 10/5/2022 ده‌ست ب نووژه‌نكرنا وی ده‌رگه‌هی هاته كرن.
وارشین سه‌لمان، ده‌ڤه‌ردارێ ئامێدیێ بۆ رۆژناما ئه‌ڤرۆ دیار كر، ب مه‌به‌ستا ده‌ستپێكرنا كارێ نووژه‌نكرنا ده‌رگه‌هێ شوونواری یێ ئامێدیێ و ب ئاماده‌بوونا شانده‌كێ قۆنسلخانا ئه‌مریكا، وان كۆمبوونه‌ك ل گه‌ل لایه‌نێن په‌یوه‌ندیدار ئه‌نجام دایه و گۆت: “مه‌به‌ست ژ ڤێ كۆمبوونێ ئه‌و بوویه، دا كو بهێته زانین ب چو رێك و شێواز ئه‌ڤ ده‌رگه‌هێ شوونواری بهێته نووژه‌نكرن و شێوازێ خوه‌یێ شوونواری ژ ده‌ست نه‌ده‌ت و ب ره‌نگه‌كێ باش بهێته نووژه‌نكرن”.
ده‌ڤه‌ردارێ ئامێدیێ سوپاسیا هاریكاری و هه‌ڤكاریا قۆنسلخانا ئه‌مریكا ل هه‌ولێرێ كر، بۆ نووژه‌نكرنا ده‌رگه‌هێ شوونواری یێ ئامێدیێ و هیڤی خواست ژی، كو ئه‌ڤ ره‌نگه هاریكاریه بۆ جهێن دی ژی ل سنوورێ ده‌ڤه‌رداریا ئامێدیێ ب مه‌ره‌ما پاراستنا جهێن شوونواری بهێنه كرن.
ده‌رگه‌هێ شوونواری یێ ئامێدیێ، كو ب ده‌رگه‌هێ مووسلێ دهێته ناسین، ژ لایێ زانكۆیا كولومبیا و ب پشته‌ڤانیا داریی یا قۆنسلخانا ئه‌مریكی ل هه‌ولێرێ ب گوژمێ 500 هزار دۆلاران دهێته نووژه‌نكرن.
