روودانێن هاتنوچوونێ ل ههرێمێ زێدهبووینه
ههولێر، قائید میرۆ:
پهیڤدارێ هاتنوچوونا ههرێما كوردستانێ هۆشداریێ ل دۆر روودانێن هاتنوچوونێ ددهت و دبێژیت: ئامارێن روودانێن هاتنوچوونێ زێدهبووینه و ئهگهرێ سهرهكی ژی بۆ پێگری نهكرنا شۆفێران ب یاسا و رێنمایێن هاتنوچوونێ ڤهدگهڕیت.
عهمید محهمهد روشدی، پهیڤدارێ هاتنوچوونا ههرێما كوردستانێ د كۆنفڕانسهكێ رۆژنامهڤانی دا راگههاند: “ئامارێن روودانێن هاتنوچوونێ ل ههرێما كوردستانێ بهر ب زێدهبوونێ دچن و ئهگهرێ سهرهكیێ پهیدابوونا روودانێن هاتنوچوونێ ژی بۆ پێگری نهكرنا شۆفێران ب یاسا و رێنمایێن هاتنوچوونێ ڤهدگهڕیت، ب تایبهتی ب كارئینانا مۆبایل و تۆڕێن جڤاكی د دهمێ هاژۆتنا ترۆمبێلێ دا و ئهڤێ كاریگهری ل سهر روودانێن هاتنوچوونێ ههیه”.
عهمید محهمهد روشدی خویا كر، ل گورهی ئامارێن نهتهوێن ئێكگرتی سالانه ژ ئهگهرێ روودانێن هاتنوچوونێ ملیۆنهك و 300 هزار كهس دبنه قوربانی و نێزیكی 50 ملیۆن كهسان ژی كێم ئهندام دبن و گۆت: “ئهڤه ئامارێن مهترسیدارن و پێدڤیه وهلاتی پێگریێ ب رێنمایێن هاتنوچوونێ بكهن، داكو سهر و مالێ خوه و وهلاتیان ب پارێزن”.